7. அத்³த⁴வக்³கோ³

1. நாமஸுத்தவண்ணனா

61. அத்³த⁴வக்³க³ஸ்ஸ பட²மே நாமம் ஸப்³ப³ம் அத்³த⁴ப⁴வீதி நாமம் ஸப்³ப³ம் அபி⁴ப⁴வதி அனுபததி. ஓபபாதிகேன வா ஹி கித்திமேன வா நாமேன முத்தோ ஸத்தோ வா ஸங்கா²ரோ வா நத்தி². யஸ்ஸபி ஹி ருக்க²ஸ்ஸ வா பாஸாணஸ்ஸ வா ‘‘இத³ம் நாம நாம’’ந்தி ந ஜானந்தி, அனாமகோத்வேவ தஸ்ஸ நாமம் ஹோதி. பட²மம்.

2-3. சித்தஸுத்தாதி³வண்ணனா

62. து³தியே ஸப்³பே³வ வஸமன்வகூ³தி யே சித்தஸ்ஸ வஸம் க³ச்ச²ந்தி, தேஸம்யேவ அனவஸேஸபரியாதா³னமேதம். து³தியம்.

63. ததியேபி ஏஸேவ நயோ. ததியம்.

4-5. ஸம்யோஜனஸுத்தாதி³வண்ணனா

64. சதுத்தே² கிம் ஸு ஸம்யோஜனோதி கிம் ஸம்யோஜனோ கிம் ப³ந்த⁴னோ? விசாரணந்தி விசரணா பாதா³னி. ப³ஹுவசனே ஏகவசனம் கதம். விதக்கஸ்ஸ விசாரணந்தி விதக்கோ தஸ்ஸ பாதா³. சதுத்த²ம்.

65. பஞ்சமேபி ஏஸேவ நயோ. பஞ்சமம்.

6. அத்தஹதஸுத்தவண்ணனா

66. ச²ட்டே² கேனஸ்ஸுப்³பா⁴ஹதோதி கேன அப்³பா⁴ஹதோ. ஸு-காரோ நிபாதமத்தம். இச்சா²தூ⁴பாயிதோதி இச்சா²ய ஆதி³த்தோ. ச²ட்ட²ம்.

7-9. உட்³டி³தஸுத்தாதி³வண்ணனா

67. ஸத்தமே தண்ஹாய உட்³டி³தோதி தண்ஹாய உல்லங்கி⁴தோ. சக்கு²ஞ்ஹி தண்ஹாரஜ்ஜுனா ஆவுனித்வா ரூபனாக³த³ந்தே உட்³டி³தம், ஸோதாதீ³னி ஸத்³தா³தீ³ஸூதி தண்ஹாய உட்³டி³தோ லோகோ. மச்சுனா பிஹிதோதி அனந்தரே அத்தபா⁴வே கதம் கம்மம் ந தூ³ரம் ஏகசித்தந்தரம், ப³லவதியா பன மாரணந்திகவேத³னாய பப்³ப³தேன விய ஓத்த²டத்தா ஸத்தா தம் ந பு³ஜ்ஜ²ந்தீதி ‘‘மச்சுனா பிஹிதோ லோகோ’’தி வுத்தம். ஸத்தமம்.

68. அட்ட²மே ஸ்வேவ பஞ்ஹோ தே³வதாய ஹேட்டு²பரியாயவஸேன புச்சி²தோ. அட்ட²மம்.

69. நவமே ஸப்³ப³ம் உத்தானமேவ. நவமம்.

10. லோகஸுத்தவண்ணனா

70. த³ஸமே கிஸ்மிம் லோகோ ஸமுப்பன்னோதி கிஸ்மிம் உப்பன்னே லோகோ உப்பன்னோதி புச்ச²தி. ச²ஸூதி ச²ஸு அஜ்ஜ²த்திகேஸு ஆயதனேஸு உப்பன்னேஸு உப்பன்னோதி வுச்சதி. ச²ஸு குப்³ப³தீதி தேஸுயேவ ச²ஸு ஸந்த²வம் கரோதி. உபாதா³யாதி தானியேவ ச உபாதா³ய ஆக³ம்ம படிச்ச பவத்ததி. விஹஞ்ஞதீதி தேஸுயேவ ச²ஸு விஹஞ்ஞதி பீளியதி. இதி அஜ்ஜ²த்திகாயதனவஸேன அயம் பஞ்ஹோ ஆக³தோ, அஜ்ஜ²த்திகபா³ஹிரானம் பன வஸேன ஆஹரிதும் வட்டதி. ச²ஸு ஹி அஜ்ஜ²த்திகாயதனேஸு உப்பன்னேஸு அயம் உப்பன்னோ நாம ஹோதி, ச²ஸு பா³ஹிரேஸு ஸந்த²வம் கரோதி, ச²ன்னம் அஜ்ஜ²த்திகானம் உபாதா³ய ச²ஸு பா³ஹிரேஸு விஹஞ்ஞதீதி. த³ஸமம்.

அத்³த⁴வக்³கோ³ ஸத்தமோ.