3. ஜடாஸுத்தவண்ணனா

23. ததியே அந்தோஜடாதி கா³தா²யம் ஜடாதி தண்ஹாய ஜாலினியா அதி⁴வசனம். ஸா ஹி ரூபாதீ³ஸு ஆரம்மணேஸு ஹேட்டு²பரியவஸேன புனப்புனம் உப்பஜ்ஜனதோ ஸம்ஸிப்³ப³னட்டே²ன வேளுகு³ம்பா³தீ³னம் ஸாகா²ஜாலஸங்கா²தா ஜடா வியாதி ஜடா. ஸா பனேஸா ஸகபரிக்கா²ரபரபரிக்கா²ரேஸு ஸகஅத்தபா⁴வ-பரஅத்தபா⁴வேஸு அஜ்ஜ²த்திகாயதன-பா³ஹிராயதனேஸு ச உப்பஜ்ஜனதோ அந்தோஜடா ப³ஹிஜடாதி வுச்சதி. தாய ஏவம் உப்பஜ்ஜமானாய ஜடாய ஜடிதா பஜா. யதா² நாம வேளுஜடாதீ³ஹி வேளுஆத³யோ, ஏவம் தாய தண்ஹாஜடாய ஸப்³பா³பி அயம் ஸத்தனிகாயஸங்கா²தா பஜா ஜடிதா வினத்³தா⁴, ஸம்ஸிப்³பி³தாதி அத்தோ². யஸ்மா ச ஏவம் ஜடிதா, தம் தம் கோ³தம புச்சா²மீதி தஸ்மா தம் புச்சா²மி. கோ³தமாதி ப⁴க³வந்தம் கோ³த்தேன ஆலபதி. கோ இமம் விஜடயே ஜடந்தி இமம் ஏவம் தேதா⁴துகம் ஜடேத்வா டி²தம் ஜடம் கோ விஜடேய்ய, விஜடேதும் கோ ஸமத்தோ²தி புச்ச²தி.

அத²ஸ்ஸ ப⁴க³வா தமத்த²ம் விஸ்ஸஜ்ஜேந்தோ ஸீலே பதிட்டா²யாதிஆதி³மாஹ. தத்த² ஸீலே பதிட்டா²யாதி சதுபாரிஸுத்³தி⁴ஸீலே ட²த்வா. ஏத்த² ச ப⁴க³வா ஜடாவிஜடனம் புச்சி²தோ ஸீலம் ஆரப⁴ந்தோ ந ‘‘அஞ்ஞம் புட்டோ² அஞ்ஞம் கதே²தீ’’தி வேதி³தப்³போ³. ஜடாவிஜடகஸ்ஸ ஹி பதிட்டா²த³ஸ்ஸனத்த²மேத்த² ஸீலம் கதி²தம்.

நரோதி ஸத்தோ. ஸபஞ்ஞோதி கம்மஜதிஹேதுகபடிஸந்தி⁴பஞ்ஞாய பஞ்ஞவா. சித்தம் பஞ்ஞஞ்ச பா⁴வயந்தி ஸமாதி⁴ஞ்சேவ விபஸ்ஸனஞ்ச பா⁴வயமானோ. சித்தஸீஸேன ஹேத்த² அட்ட² ஸமாபத்தியோ கதி²தா, பஞ்ஞானாமேன விபஸ்ஸனா. ஆதாபீதி வீரியவா. வீரியஞ்ஹி கிலேஸானம் ஆதாபனபரிதாபனட்டே²ன ‘‘ஆதாபோ’’தி வுச்சதி, தத³ஸ்ஸ அத்தீ²தி ஆதாபீ. நிபகோதி நேபக்கம் வுச்சதி பஞ்ஞா, தாய ஸமன்னாக³தோதி அத்தோ². இமினா பதே³ன பாரிஹாரியபஞ்ஞம் த³ஸ்ஸேதி. பாரிஹாரியபஞ்ஞா நாம ‘‘அயம் காலோ உத்³தே³ஸஸ்ஸ, அயம் காலோ பரிபுச்சா²யா’’திஆதி³னா நயேன ஸப்³ப³த்த² காராபிதா பரிஹரிதப்³ப³பஞ்ஞா. இமஸ்மிஞ்ஹி பஞ்ஹாப்³யாகரணே திக்க²த்தும் பஞ்ஞா ஆக³தா. தத்த² பட²மா ஜாதிபஞ்ஞா, து³தியா விபஸ்ஸனாபஞ்ஞா, ததியா ஸப்³ப³கிச்சபரிணாயிகா பாரிஹாரியபஞ்ஞா.

ஸோ இமம் விஜடயே ஜடந்தி ஸோ இமேஹி ஸீலாதீ³ஹி ஸமன்னாக³தோ பி⁴க்கு². யதா² நாம புரிஸோ பத²வியம் பதிட்டா²ய ஸுனிஸிதம் ஸத்த²ம் உக்கி²பித்வா மஹந்தம் வேளுகு³ம்ப³ம் விஜடேய்ய, ஏவமேவம் ஸீலே பதிட்டா²ய ஸமாதி⁴ஸிலாயம் ஸுனிஸிதம் விபஸ்ஸனாபஞ்ஞாஸத்த²ம் வீரியப³லபக்³க³ஹிதேன பாரிஹாரியபஞ்ஞாஹத்தே²ன உக்கி²பித்வா ஸப்³ப³ம்பி தம் அத்தனோ ஸந்தானே பதிதம் தண்ஹாஜடம் விஜடேய்ய ஸஞ்சி²ந்தே³ய்ய ஸம்பதா³லேய்யாதி.

ஏத்தாவதா ஸேக²பூ⁴மிம் கதே²த்வா இதா³னி ஜடம் விஜடேத்வா டி²தம் மஹாகீ²ணாஸவம் த³ஸ்ஸேந்தோ யேஸந்திஆதி³மாஹ. ஏவம் ஜடம் விஜடேத்வா டி²தம் கீ²ணாஸவம் த³ஸ்ஸேத்வா புன ஜடாய விஜடனோகாஸம் த³ஸ்ஸேந்தோ யத்த² நாமஞ்சாதிஆதி³மாஹ. தத்த² நாமந்தி சத்தாரோ அரூபினோ க²ந்தா⁴. படிக⁴ம் ரூபஸஞ்ஞா சாதி ஏத்த² படிக⁴ஸஞ்ஞாவஸேன காமப⁴வோ க³ஹிதோ, ரூபஸஞ்ஞாவஸேன ரூபப⁴வோ. தேஸு த்³வீஸு க³ஹிதேஸு அரூபப⁴வோ க³ஹிதோவ ஹோதி ப⁴வஸங்கே²பேனாதி. ஏத்தே²ஸா சி²ஜ்ஜதே ஜடாதி ஏத்த² தேபூ⁴மகவட்டஸ்ஸ பரியாதி³யனட்டா²னே ஏஸா ஜடா சி²ஜ்ஜதி, நிப்³பா³னம் ஆக³ம்ம சி²ஜ்ஜதி நிருஜ்ஜ²தீதி அயம் அத்தோ² த³ஸ்ஸிதோ ஹோதி. ததியம்.