9. மானகாமஸுத்தவண்ணனா

9. நவமே மானகாமஸ்ஸாதி மானம் காமேந்தஸ்ஸ இச்ச²ந்தஸ்ஸ. த³மோதி ஏவரூபஸ்ஸ புக்³க³லஸ்ஸ ஸமாதி⁴பக்கி²கோ த³மோ நத்தீ²தி வத³தி. ‘‘ஸச்சேன த³ந்தோ த³மஸா உபேதோ, வேத³ந்தகூ³ வுஸிதப்³ரஹ்மசரியோ’’தி (ஸம். நி. 1.195) ஏத்த² ஹி இந்த்³ரியஸம்வரோ த³மோதி வுத்தோ. ‘‘யதி³ ஸச்சா த³மா சாகா³, க²ந்த்யா பி⁴ய்யோத⁴ விஜ்ஜதீ’’தி (ஸம். நி. 1.246; ஸு. நி. 191) ஏத்த² பஞ்ஞா. ‘‘தா³னேன த³மேன ஸம்யமேன ஸச்சவஜ்ஜேன அத்தி² புஞ்ஞம், அத்தி² புஞ்ஞஸ்ஸ ஆக³மோ’’தி (ஸம். நி. 4.365) ஏத்த² உபோஸத²கம்மம். ‘‘ஸக்கி²ஸ்ஸஸி கோ² த்வம், புண்ண, இமினா த³மூபஸமேன ஸமன்னாக³தோ ஸுனாபரந்தஸ்மிம் ஜனபதே³ விஹரிது’’ந்தி (ஸம். நி. 4.88; ம. நி. 3.396) ஏத்த² அதி⁴வாஸனக²ந்தி. இமஸ்மிம் பன ஸுத்தே த³மோதி ஸமாதி⁴பக்கி²கத⁴ம்மானம் ஏதம் நாமம். தேனேவாஹ – ‘‘ந மோனமத்தி² அஸமாஹிதஸ்ஸா’’தி. தத்த² மோனந்தி சதுமக்³க³ஞாணம், தஞ்ஹி முனாதீதி மோனம், சதுஸச்சத⁴ம்மே ஜானாதீதி அத்தோ². மச்சுதே⁴ய்யஸ்ஸாதி தேபூ⁴மகவட்டஸ்ஸ. தஞ்ஹி மச்சுனோ பதிட்டா²னட்டே²ன மச்சுதே⁴ய்யந்தி வுச்சதி. பாரந்தி தஸ்ஸேவ பாரம் நிப்³பா³னம். தரேய்யாதி படிவிஜ்ஜே²ய்ய பாபுணேய்ய வா. இத³ம் வுத்தம் ஹோதி – ஏகோ அரஞ்ஞே விஹரந்தோ பமத்தோ புக்³க³லோ மச்சுதே⁴ய்யஸ்ஸ பாரம் ந தரேய்ய ந படிவிஜ்ஜே²ய்ய ந பாபுணேய்யாதி.

மானம் பஹாயாதி அரஹத்தமக்³கே³ன நவவித⁴மானம் பஜஹித்வா. ஸுஸமாஹிதத்தோதி உபசாரப்பனாஸமாதீ⁴ஹி ஸுட்டு² ஸமாஹிதத்தோ. ஸுசேதஸோதி ஞாணஸம்பயுத்ததாய ஸுந்த³ரசித்தோ. ஞாணவிப்பயுத்தசித்தேன ஹி ஸுசேதஸோதி ந வுச்சதி, தஸ்மா ஞாணஸம்பயுத்தேன ஸுசேதஸோ ஹுத்வாதி அத்தோ². ஸப்³ப³தி⁴ விப்பமுத்தோதி ஸப்³பே³ஸு க²ந்தா⁴யதனாதீ³ஸு விப்பமுத்தோ ஹுத்வா. தரேய்யாதி ஏத்த² தேபூ⁴மகவட்டம் ஸமதிக்கமந்தோ நிப்³பா³னம் படிவிஜ்ஜ²ந்தோ தரதீதி படிவேத⁴தரணம் நாம வுத்தம். இதி இமாய கா³தா²ய திஸ்ஸோ ஸிக்கா² கதி²தா ஹோந்தி. கத²ம் – மானோ நாமாயம் ஸீலபே⁴த³னோ, தஸ்மா ‘‘மானம் பஹாயா’’தி இமினா அதி⁴ஸீலஸிக்கா² கதி²தா ஹோதி. ‘‘ஸுஸமாஹிதத்தோ’’தி இமினா அதி⁴சித்தஸிக்கா². ‘‘ஸுசேதஸோ’’தி ஏத்த² சித்தேன பஞ்ஞா த³ஸ்ஸிதா, தஸ்மா இமினா அதி⁴பஞ்ஞாஸிக்கா² கதி²தா. அதி⁴ஸீலஞ்ச நாம ஸீலே ஸதி ஹோதி, அதி⁴சித்தம் சித்தே ஸதி, அதி⁴பஞ்ஞா பஞ்ஞாய ஸதி. தஸ்மா ஸீலம் நாம பஞ்சபி த³ஸபி ஸீலானி, பாதிமோக்க²ஸம்வரோ அதி⁴ஸீலம் நாமாதி வேதி³தப்³ப³ம். அட்ட² ஸமாபத்தியோ சித்தம், விபஸ்ஸனாபாத³கஜ்ஜா²னம் அதி⁴சித்தம். கம்மஸ்ஸகதஞாணம் பஞ்ஞா, விபஸ்ஸனா அதி⁴பஞ்ஞா. அனுப்பன்னேபி ஹி பு³த்³து⁴ப்பாதே³ பவத்ததீதி பஞ்சஸீலம் த³ஸஸீலம் ஸீலமேவ, பாதிமோக்க²ஸம்வரஸீலம் பு³த்³து⁴ப்பாதே³யேவ பவத்ததீதி அதி⁴ஸீலம். சித்தபஞ்ஞாஸுபி ஏஸேவ நயோ. அபிச நிப்³பா³னம் பத்த²யந்தேன ஸமாதி³ன்னம் பஞ்சஸீலம்பி த³ஸஸீலம்பி அதி⁴ஸீலமேவ. ஸமாபன்னா அட்ட² ஸமாபத்தியோபி அதி⁴சித்தமேவ. ஸப்³ப³ம்பி வா லோகியஸீலம் ஸீலமேவ, லோகுத்தரம் அதி⁴ஸீலம். சித்தபஞ்ஞாஸுபி ஏஸேவ நயோதி. இதி இமாய கா³தா²ய ஸமோதா⁴னேத்வா திஸ்ஸோ ஸிக்கா² ஸகலஸாஸனம் கதி²தம் ஹோதீதி.

மானகாமஸுத்தவண்ணனா நிட்டி²தா.