10. அரஞ்ஞஸுத்தவண்ணனா

10. த³ஸமே ஸந்தானந்தி ஸந்தகிலேஸானம், பண்டி³தானம் வா. ‘‘ஸந்தோ ஹவே ஸப்³பி⁴ பவேத³யந்தி (ஜா. 2.21.413), தூ³ரே ஸந்தோ பகாஸந்தீ’’திஆதீ³ஸு (த⁴. ப. 304) ஹி பண்டி³தாபி ஸந்தோதி வுத்தா. ப்³ரஹ்மசாரினந்தி ஸேட்ட²சாரீனம் மக்³க³ப்³ரஹ்மசரியவாஸம் வஸந்தானம். கேன வண்ணோ பஸீத³தீதி கேன காரணேன ச²விவண்ணோ பஸீத³தீதி புச்ச²தி. கஸ்மா பனேஸா ஏவம் புச்ச²தி? ஏஸா கிர வனஸண்ட³வாஸிகா பு⁴ம்மதே³வதா ஆரஞ்ஞகே பி⁴க்கூ² பச்சா²ப⁴த்தம் பிண்ட³பாதபடிக்கந்தே அரஞ்ஞம் பவிஸித்வா ரத்திட்டா²னதி³வாட்டா²னேஸு மூலகம்மட்டா²னம் க³ஹேத்வா நிஸின்னே பஸ்ஸதி. தேஸஞ்ச ஏவம் நிஸின்னானம் ப³லவசித்தேகக்³க³தா உப்பஜ்ஜதி. ததோ விஸபா⁴க³ஸந்ததி வூபஸம்மதி, ஸபா⁴க³ஸந்ததி ஓக்கமதி, சித்தம் பஸீத³தி. சித்தே பஸன்னே லோஹிதம் பஸீத³தி, சித்தஸமுட்டா²னானி உபாதா³ரூபானி பரிஸுத்³தா⁴னி ஹோந்தி, வண்டா பமுத்ததாலப²லஸ்ஸ விய முக²ஸ்ஸ வண்ணோ ஹோதி. தம் தி³ஸ்வா தே³வதா சிந்தேஸி – ‘‘ஸரீரவண்ணோ நாமாயம் பணீதானி ரஸஸம்பன்னானி போ⁴ஜனானி ஸுக²ஸம்ப²ஸ்ஸானி நிவாஸனபாபுரணஸயனானி உதுஸுகே² தேபூ⁴மிகாதி³பே⁴தே³ ச பாஸாதே³ மாலாக³ந்த⁴விலேபனாதீ³னி ச லப⁴ந்தானம் பஸீத³தி, இமே பன பி⁴க்கூ² பிண்டா³ய சரித்வா மிஸ்ஸகப⁴த்தம் பு⁴ஞ்ஜந்தி, விரளமஞ்சகே வா ப²லகே வா ஸிலாய வா ஸயனானி கப்பேந்தி, ருக்க²மூலாதீ³ஸு வா அப்³போ⁴காஸே வா வஸந்தி, கேன நு கோ² காரணேன ஏதேஸம் வண்ணோ பஸீத³தீ’’தி. தஸ்மா புச்சி².

அத²ஸ்ஸா ப⁴க³வா காரணம் கதே²ந்தோ து³தியம் கா³த²ம் ஆஹ. தத்த² அதீதந்தி அதீதே அஸுகோ நாம ராஜா த⁴ம்மிகோ அஹோஸி, ஸோ அம்ஹாகம் பணீதே பச்சயே அதா³ஸி. ஆசரியுபஜ்ஜா²யா லாபி⁴னோ அஹேஸும். அத² மயம் ஏவரூபானி போ⁴ஜனானி பு⁴ஞ்ஜிம்ஹா, சீவரானி பாருபிம்ஹாதி ஏவம் ஏகச்சே பச்சயபா³ஹுல்லிகா விய இமே பி⁴க்கூ² அதீதம் நானுஸோசந்தி. நப்பஜப்பந்தி நாக³தந்தி அனாக³தே த⁴ம்மிகோ ராஜா ப⁴விஸ்ஸதி, பீ²தா ஜனபதா³ ப⁴விஸ்ஸந்தி, ப³ஹூனி ஸப்பினவனீதாதீ³னி உப்பஜ்ஜிஸ்ஸந்தி, ‘‘கா²த³த² பு⁴ஞ்ஜதா²’’தி தத்த² தத்த² வத்தாரோ ப⁴விஸ்ஸந்தி, ததா³ மயம் ஏவரூபானி போ⁴ஜனானி பு⁴ஞ்ஜிஸ்ஸாம, சீவரானி பாருபிஸ்ஸாமாதி ஏவம் அனாக³தம் ந பத்தே²ந்தி. பச்சுப்பன்னேனாதி யேன கேனசி தங்க²ணே லத்³தே⁴ன யாபேந்தி. தேனாதி தேன திவிதே⁴னாபி காரணேன.

ஏவம் வண்ணஸம்பத்திம் த³ஸ்ஸேத்வா இதா³னி தஸ்ஸேவ வண்ணஸ்ஸ வினாஸம் த³ஸ்ஸேந்தோ அனந்தரம் கா³த²மாஹ. தத்த² அனாக³தப்பஜப்பாயாதி அனாக³தஸ்ஸ பத்த²னாய. ஏதேனாதி ஏதேன காரணத்³வயேன. நளோவ ஹரிதோ லுதோதி யதா² ஹரிதோ நளோ லாயித்வா உண்ஹபாஸாணே பக்கி²த்தோ ஸுஸ்ஸதி, ஏவம் ஸுஸ்ஸந்தீதி.

அரஞ்ஞஸுத்தவண்ணனா நிட்டி²தா. நளவக்³கோ³ பட²மோ.