5. கதிசி²ந்த³ஸுத்தவண்ணனா

5. பஞ்சமே கதி சி²ந்தே³தி சி²ந்த³ந்தோ கதி சி²ந்தே³ய்ய. ஸேஸபதே³ஸுபி ஏஸேவ நயோ. ஏத்த² ச ‘‘சி²ந்தே³ ஜஹே’’தி அத்த²தோ ஏகம். கா³தா²ப³ந்த⁴ஸ்ஸ பன மட்ட²பா⁴வத்த²ம் அயம் தே³வதா ஸத்³த³புனருத்திம் வஜ்ஜயந்தீ ஏவமாஹ. கதி ஸங்கா³திகோ³தி கதி ஸங்கே³ அதிக³தோ, அதிக்கந்தோதி அத்தோ². ஸங்கா³திகோதிபி பாடோ², அயமேவ அத்தோ². பஞ்ச சி²ந்தே³தி சி²ந்த³ந்தோ பஞ்ச ஓரம்பா⁴கி³யஸம்யோஜனானி சி²ந்தே³ய்ய. பஞ்ச ஜஹேதி ஜஹந்தோ பஞ்சுத்³த⁴ம்பா⁴கி³யஸம்யோஜனானி ஜஹேய்ய. இதா⁴பி சி²ந்த³னஞ்ச ஜஹனஞ்ச அத்த²தோ ஏகமேவ, ப⁴க³வா பன தே³வதாய ஆரோபிதவசனானுரூபேனேவ ஏவமாஹ. அத² வா பாதே³ஸு ப³த்³த⁴பாஸஸகுணோ விய பஞ்சோரம்பா⁴கி³யஸம்யோஜனானி ஹேட்டா² ஆகட்³ட⁴மானாகாரானி ஹோந்தி, தானி அனாகா³மிமக்³கே³ன சி²ந்தே³ய்யாதி வத³தி. ஹத்தே²ஹி க³ஹிதருக்க²ஸாகா² விய பஞ்சுத்³த⁴ம்பா⁴கி³யஸம்யோஜனானி உபரி ஆகட்³ட⁴மானாகாரானி ஹோந்தி, தானி அரஹத்தமக்³கே³ன ஜஹேய்யாதி வத³தி. பஞ்ச சுத்தரி பா⁴வயேதி ஏதேஸம் ஸம்யோஜனானம் சி²ந்த³னத்தா²ய சேவ பஹானத்தா²ய ச உத்தரி அதிரேகம் விஸேஸம் பா⁴வேந்தோ ஸத்³தா⁴பஞ்சமானி இந்த்³ரியானி பா⁴வேய்யாதி அத்தோ². பஞ்ச ஸங்கா³திகோ³தி ராக³ஸங்கோ³ தோ³ஸஸங்கோ³ மோஹஸங்கோ³ மானஸங்கோ³ தி³ட்டி²ஸங்கோ³தி இமே பஞ்ச ஸங்கே³ அதிக்கந்தோ. ஓக⁴திண்ணோதி வுச்சதீதி சதுரோக⁴திண்ணோதி கதீ²யதி. இமாய பன கா³தா²ய பஞ்சிந்த்³ரியானி லோகியலோகுத்தரானி கதி²தானீதி.

கதிசி²ந்த³ஸுத்தவண்ணனா நிட்டி²தா.