4. அச்சேந்திஸுத்தவண்ணனா

4. சதுத்தே² அச்சேந்தீதி அதிக்கமந்தி. காலாதி புரேப⁴த்தாத³யோ காலா. தரயந்தி ரத்தியோதி ரத்தியோ அதிக்கமமானா புக்³க³லம் மரணூபக³மனாய தரயந்தி ஸீக⁴ம் ஸீக⁴ம் க³மயந்தி. வயோகு³ணாதி பட²மமஜ்ஜி²மபச்சி²மவயானம் கு³ணா, ராஸயோதி அத்தோ². ‘‘அனுஜானாமி, பி⁴க்க²வே, அஹதானம் வத்தா²னம் தி³கு³ணம் ஸங்கா⁴டி’’ந்தி (மஹாவ. 348) ஏத்த² ஹி படலட்டோ² கு³ணட்டோ². ‘‘ஸதகு³ணா த³க்கி²ணா பாடிகங்கி²தப்³பா³’’தி (ம. நி. 3.379) ஏத்த² ஆனிஸம்ஸட்டோ². ‘‘அந்தம் அந்தகு³ண’’ந்தி ஏத்த² கோட்டா²ஸட்டோ². ‘‘கயிரா மாலாகு³ணே ப³ஹூ’’தி (த⁴. ப. 53) ஏத்த² ராஸட்டோ². ‘‘பஞ்ச காமகு³ணா’’தி ஏத்த² ப³ந்த⁴னட்டோ². இத⁴ பன ராஸட்டோ² கு³ணட்டோ². தஸ்மா வயோகு³ணாதி வயோராஸயோ வேதி³தப்³பா³. அனுபுப்³ப³ம் ஜஹந்தீதி அனுபடிபாடியா புக்³க³லம் ஜஹந்தி. மஜ்ஜி²மவயே டி²தம் ஹி பட²மவயோ ஜஹதி, பச்சி²மவயே டி²தம் த்³வே பட²மமஜ்ஜி²மா ஜஹந்தி, மரணக்க²ணே பன தயோபி வயா ஜஹந்தேவ. ஏதம் ப⁴யந்தி ஏதம் காலானம் அதிக்கமனம், ரத்திதி³வானம் தரிதபா⁴வோ, வயோகு³ணானம் ஜஹனபா⁴வோதி திவித⁴ம் ப⁴யம். ஸேஸம் புரிமஸதி³ஸமேவாதி.

அச்சேந்திஸுத்தவண்ணனா நிட்டி²தா.