3. உபனீயஸுத்தவண்ணனா

3. ததியே உபனீயதீதி பரிக்கீ²யதி நிருஜ்ஜ²தி, உபக³ச்ச²தி வா, அனுபுப்³பே³ன மரணம் உபேதீதி அத்தோ². யதா² வா கோ³பாலேன கோ³க³ணோ நீயதி, ஏவம் ஜராய மரணஸந்திகம் உபனீயதீதி அத்தோ². ஜீவிதந்தி ஜீவிதிந்த்³ரியம். அப்பந்தி பரித்தம் தோ²கம். தஸ்ஸ த்³வீஹாகாரேஹி பரித்ததா வேதி³தப்³பா³ ஸரஸபரித்ததாய ச க²ணபரித்ததாய ச. ஸரஸபரித்ததாயபி ஹி ‘‘யோ, பி⁴க்க²வே, சிரம் ஜீவதி, ஸோ வஸ்ஸஸதம் அப்பம் வா பி⁴ய்யோ’’தி (தீ³. நி. 2.7; ஸம். நி. 2.143) வசனதோ பரித்தம். க²ணபரித்ததாயபி. பரமத்த²தோ ஹி அதிபரித்தோ ஸத்தானம் ஜீவிதக்க²ணோ ஏகசித்தப்பவத்திமத்தோயேவ. யதா² நாம ரத²சக்கம் பவத்தமானம்பி ஏகேனேவ நேமிப்பதே³ஸேன பவத்ததி, திட்ட²மானம்பி ஏகேனேவ திட்ட²தி, ஏவமேவம் ஏகசித்தக்க²ணிகம் ஸத்தானம் ஜீவிதம், தஸ்மிம் சித்தே நிருத்³த⁴மத்தே ஸத்தோ நிருத்³தோ⁴தி வுச்சதி. யதா²ஹ – அதீதே சித்தக்க²ணே ஜீவித்த² ந ஜீவதி ந ஜீவிஸ்ஸதி, அனாக³தே சித்தக்க²ணே ஜீவிஸ்ஸதி ந ஜீவதி ந ஜீவித்த², பச்சுப்பன்னே சித்தக்க²ணே ஜீவதி ந ஜீவித்த² ந ஜீவிஸ்ஸதி.

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹுஸோ வத்ததே க²ணோ.

‘‘யே நிருத்³தா⁴ மரந்தஸ்ஸ, திட்ட²மானஸ்ஸ வா இத⁴;

ஸப்³பே³பி ஸதி³ஸா க²ந்தா⁴, க³தா அப்படிஸந்தி⁴கா.

‘‘அனிப்³ப³த்தேன ந ஜாதோ, பச்சுப்பன்னேன ஜீவதி;

சித்தப⁴ங்கா³ மதோ லோகோ, பஞ்ஞத்தி பரமத்தி²யா’’தி. (மஹானி. 10);

ஜரூபனீதஸ்ஸாதி ஜரம் உபக³தஸ்ஸ, ஜராய வா மரணஸந்திகம் உபனீதஸ்ஸ. ந ஸந்தி தாணாதி தாணம் லேணம் ஸரணம் ப⁴விதும் ஸமத்தா² நாம கேசி நத்தி². ஏதம் ப⁴யந்தி ஏதம் ஜீவிதிந்த்³ரியஸ்ஸ மரணூபக³மனம், ஆயுபரித்ததா, ஜரூபனீதஸ்ஸ தாணாபா⁴வோதி திவித⁴ம் ப⁴யம் ப⁴யவத்து² ப⁴யகாரணந்தி அத்தோ². புஞ்ஞானி கயிராத² ஸுகா²வஹானீதி விஞ்ஞூ புரிஸோ ஸுகா²வஹானி ஸுக²தா³யகானி புஞ்ஞானி கரேய்ய. இதி தே³வதா ரூபாவசரஜ்ஜா²னம் ஸந்தா⁴ய புப்³ப³சேதனம் அபரசேதனம் முஞ்சசேதனஞ்ச க³ஹேத்வா ப³ஹுவசனவஸேன ‘‘புஞ்ஞானீ’’தி ஆஹ. ஜா²னஸ்ஸாத³ம் ஜா²னனிகந்திம் ஜா²னஸுக²ஞ்ச க³ஹேத்வா ‘‘ஸுகா²வஹானீ’’தி ஆஹ. தஸ்ஸா கிர தே³வதாய ஸயம் தீ³கா⁴யுகட்டா²னே ப்³ரஹ்மலோகே நிப்³ப³த்தத்தா ஹேட்டா² காமாவசரதே³வேஸு பரித்தாயுகட்டா²னே சவமானே உபபஜ்ஜமானே ச து²ல்லபு²ஸிதகே வுட்டி²பாதஸதி³ஸே ஸத்தே தி³ஸ்வா ஏதத³ஹோஸி ‘‘அஹோவதிமே ஸத்தா ஜா²னம் பா⁴வேத்வா அபரிஹீனஜ்ஜா²னா காலம் கத்வா ப்³ரஹ்மலோகே ஏககப்ப-த்³வேகப்ப-சதுகப்ப-அட்ட²கப்ப-ஸோளஸகப்ப-த்³வத்திம்ஸகப்ப-சதுஸட்டி²கப்பப்பமாணம் அத்³தா⁴னம் திட்டே²ய்யு’’ந்தி. தஸ்மா ஏவமாஹ.

அத² ப⁴க³வா – ‘‘அயம் தே³வதா அனிய்யானிகம் வட்டகத²ம் கதே²தீ’’தி விவட்டமஸ்ஸா த³ஸ்ஸேந்தோ து³தியம் கா³த²மாஹ. தத்த² லோகாமிஸந்தி த்³வே லோகாமிஸா பரியாயேன ச நிப்பரியாயேன ச. பரியாயேன தேபூ⁴மகவட்டம் லோகாமிஸம், நிப்பரியாயேன சத்தாரோ பச்சயா. இத⁴ பரியாயலோகாமிஸம் அதி⁴ப்பேதம். நிப்பரியாயலோகாமிஸம்பி வட்டதியேவ. ஸந்திபேக்கோ²தி நிப்³பா³னஸங்கா²தம் அச்சந்தஸந்திம் பேக்க²ந்தோ இச்ச²ந்தோ பத்த²யந்தோதி.

உபனீயஸுத்தவண்ணனா நிட்டி²தா.