7. மஹாஸளாயதனிகஸுத்தவண்ணனா

428. ஏவம் மே ஸுதந்தி மஹாஸளாயதனிகஸுத்தம். தத்த² மஹாஸளாயதனிகந்தி மஹந்தானம் ச²ன்னம் ஆயதனானம் ஜோதகம் த⁴ம்மபரியாயம்.

429. அஜானந்தி ஸஹவிபஸ்ஸனேன மக்³கே³ன அஜானந்தோ. உபசயம் க³ச்ச²ந்தீதி வுட்³டி⁴ம் க³ச்ச²ந்தி, வஸிபா⁴வம் க³ச்ச²ந்தீதி அத்தோ². காயிகாதி பஞ்சத்³வாரிகத³ரதா². சேதஸிகாதி மனோத்³வாரிகத³ரதா². ஸந்தாபாதீ³ஸுபி ஏஸேவ நயோ.

430. காயஸுக²ந்தி பஞ்சத்³வாரிகஸுக²ம். சேதோஸுக²ந்தி மனோத்³வாரிகஸுக²ம். ஏத்த² ச பஞ்சத்³வாரிகஜவனேன ஸமாபஜ்ஜனம் வா வுட்டா²னம் வா நத்தி², உப்பன்னமத்தகமேவ ஹோதி. மனோத்³வாரிகேன ஸப்³ப³ம் ஹோதி. அயஞ்ச மக்³க³வுட்டா²னஸ்ஸ பச்சயபூ⁴தா ப³லவவிபஸ்ஸனா, ஸாபி மனோத்³வாரிகேனேவ ஹோதி.

431. ததா²பூ⁴தஸ்ஸாதி குஸலசித்தஸம்பயுத்தசேதோஸுக²ஸமங்கீ³பூ⁴தஸ்ஸ. புப்³பே³வ கோ² பனஸ்ஸாதி அஸ்ஸ பி⁴க்கு²னோ வாசாகம்மந்தாஜீவா புப்³ப³ஸுத்³தி⁴கா நாம ஆதி³தோ பட்டா²ய பரிஸுத்³தா⁴வ ஹோந்தி. தி³ட்டி²ஸங்கப்பவாயாமஸதிஸமாதி⁴ஸங்கா²தானி பன பஞ்சங்கா³னி ஸப்³ப³த்த²ககாராபகங்கா³னி நாம. ஏவம் லோகுத்தரமக்³கோ³ அட்ட²ங்கி³கோ வா ஸத்தங்கி³கோ வா ஹோதி.

விதண்ட³வாதீ³ பன ‘‘யா யதா²பூ⁴தஸ்ஸ தி³ட்டீ²’’தி இமமேவ ஸுத்தபதே³ஸம் க³ஹேத்வா ‘‘லோகுத்தரமக்³கோ³ பஞ்சங்கி³கோ’’தி வத³தி. ஸோ – ‘‘ஏவமஸ்ஸாயம் அரியோ அட்ட²ங்கி³கோ மக்³கோ³ பா⁴வனாபாரிபூரிம் க³ச்ச²தீ’’தி இமினா அனந்தரவசனேனேவ படிஸேதி⁴தப்³போ³. உத்தரி ச ஏவம் ஸஞ்ஞாபேதப்³போ³ – லோகுத்தரமக்³கோ³ பஞ்சங்கி³கோ நாம நத்தி², இமானி பன பஞ்ச ஸப்³ப³த்த²ககாராபகங்கா³னி மக்³க³க்க²ணே விரதிவஸேன பூரேந்தி. ‘‘யா சதூஹி வசீது³ச்சரிதேஹி ஆரதி விரதீ’’தி ஏவம் வுத்தவிரதீஸு ஹி மிச்சா²வாசம் பஜஹதி, ஸம்மாவாசம் பா⁴வேதி, ஏவம் ஸம்மாவாசம் பா⁴வேந்தஸ்ஸ இமானி பஞ்சங்கி³கானி ந வினா, ஸஹேவ விரதியா பூரேந்தி. ஸம்மாகம்மந்தாஜீவேஸுபி ஏஸேவ நயோ. இதி வசீகம்மாதீ³னி ஆதி³தோ பட்டா²ய பரிஸுத்³தா⁴னேவ வட்டந்தி. இமானி பன பஞ்ச ஸப்³ப³த்த²ககாராபகங்கா³னி விரதிவஸேன பரிபூரேந்தீதி பஞ்சங்கி³கோ மக்³கோ³ நாம நத்தி². ஸுப⁴த்³த³ஸுத்தேபி (தீ³. நி. 2.214) சேதம் வுத்தம் – ‘‘யஸ்மிம் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³’’தி. அஞ்ஞேஸு ச அனேகேஸு ஸுத்தஸதேஸு அட்ட²ங்கி³கோவ மக்³கோ³ ஆக³தோதி.

433. சத்தாரோபி ஸதிபட்டா²னாதி மக்³க³ஸம்பயுத்தாவ சத்தாரோ ஸதிபட்டா²னா. ஸம்மப்பதா⁴னாதீ³ஸுபி ஏஸேவ நயோ. யுக³னந்தா⁴தி ஏகக்க²ணிகயுக³னந்தா⁴. ஏதேஹி அஞ்ஞஸ்மிம் க²ணே ஸமாபத்தி, அஞ்ஞஸ்மிம் விபஸ்ஸனாதி. ஏவம் நானாக²ணிகாபி ஹோந்தி, அரியமக்³கே³ பன ஏகக்க²ணிகா.

விஜ்ஜா ச விமுத்தி சாதி அரஹத்தமக்³க³விஜ்ஜா ச ப²லவிமுத்தி ச. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மஹாஸளாயதனிகஸுத்தவண்ணனா நிட்டி²தா.