2. ச²ன்னோவாத³ஸுத்தவண்ணனா

389. ஏவம் மே ஸுதந்தி ச²ன்னோவாத³ஸுத்தம். தத்த² ச²ன்னோதி ஏவம்னாமகோ தே²ரோ, ந அபி⁴னிக்க²மனம் நிக்க²ந்தத்தே²ரோ. படிஸல்லானாதி ப²லஸமாபத்திதோ. கி³லானபுச்ச²காதி கி³லானுபட்டா²னம் நாம பு³த்³த⁴வண்ணிதம், தஸ்மா ஏவமாஹ. ஸத்த²ந்தி ஜீவிதஹாரகஸத்த²ம். நாவகங்கா²மீதி இச்சா²மி.

390. அனுபவஜ்ஜந்தி அனுப்பத்திகம் அப்படிஸந்தி⁴கம்.

391. ஏதம் மமாதிஆதீ³னி தண்ஹாமானதி³ட்டி²கா³ஹவஸேன வுத்தானி. நிரோத⁴ம் தி³ஸ்வாதி க²யவயம் ஞத்வா. நேதம் மம நேஸோஹமஸ்மி ந மேஸோ அத்தாதி ஸமனுபஸ்ஸாமீதி அனிச்சம் து³க்க²ம் அனத்தாதி ஸமனுபஸ்ஸாமி.

393. தஸ்மாதி யஸ்மா மாரணந்திகவேத³னம் அதி⁴வாஸேதும் அஸக்கோந்தோ ஸத்த²ம் ஆஹராமீதி வத³தி, தஸ்மா. புது²ஜ்ஜனோ ஆயஸ்மா, தேன இத³ம்பி மனஸி கரோஹீதி தீ³பேதி. நிச்சகப்பந்தி நிச்சகாலம். நிஸ்ஸிதஸ்ஸாதி தண்ஹாதி³ட்டீ²ஹி நிஸ்ஸிதஸ்ஸ. சலிதந்தி விப்ப²ந்தி³தம் ஹோதி. பஸ்ஸத்³தீ⁴தி காயசித்தபஸ்ஸத்³தி⁴, கிலேஸபஸ்ஸத்³தி⁴ நாம ஹோதீதி அத்தோ². நதீதி தண்ஹானதி. நதியா அஸதீதி ப⁴வத்தா²ய ஆலயனிகந்திபரியுட்டா²னேஸு அஸதி. ஆக³திக³தி ந ஹோதீதி படிஸந்தி⁴வஸேன ஆக³தி நாம ந ஹோதி, சுதிவஸேன க³மனம் நாம ந ஹோதி. சுதூபபாதோதி சவனவஸேன சுதி, உபபஜ்ஜனவஸேன உபபாதோ. நேவித⁴ ந ஹுரம் ந உப⁴யமந்தரேனாதி நயித⁴ லோகே, ந பரலோகே, ந உப⁴யத்த² ஹோதி. ஏஸேவந்தோ து³க்க²ஸ்ஸாதி வட்டது³க்க²கிலேஸது³க்க²ஸ்ஸ அயமேவ அந்தோ அயம் பரிச்சே²தோ³ பரிவடுமபா⁴வோ ஹோதி. அயமேவ ஹி ஏத்த² அத்தோ². யே பன ‘‘ந உப⁴யமந்தரேனா’’தி வசனம் க³ஹேத்வா அந்தராப⁴வம் இச்ச²ந்தி, தேஸம் உத்தரம் ஹேட்டா² வுத்தமேவ.

394. ஸத்த²ம் ஆஹரேஸீதி ஜீவிதஹாரகம் ஸத்த²ம் ஆஹரி, கண்ட²னாளிம் சி²ந்தி³. அத²ஸ்ஸ தஸ்மிம் க²ணே மரணப⁴யம் ஓக்கமி, க³தினிமித்தம் உபட்டா²ஸி. ஸோ அத்தனோ புது²ஜ்ஜனபா⁴வம் ஞத்வா ஸம்விக்³கோ³ விபஸ்ஸனம் பட்ட²பேத்வா ஸங்கா²ரே பரிக்³க³ண்ஹந்தோ அரஹத்தம் பத்வா ஸமஸீஸீ ஹுத்வா பரினிப்³பா³யி. ஸம்முகா²யேவ அனுபவஜ்ஜதா ப்³யாகதாதி கிஞ்சாபி இத³ம் தே²ரஸ்ஸ புது²ஜ்ஜனகாலே ப்³யாகரணம் ஹோதி, ஏதேன பன ப்³யாகரணேன அனந்தராயமஸ்ஸ பரினிப்³பா³னம் அஹோஸி. தஸ்மா ப⁴க³வா தமேவ ப்³யாகரணம் க³ஹேத்வா கதே²ஸி. உபவஜ்ஜகுலானீதி உபஸங்கமிதப்³ப³குலானி. இமினா தே²ரோ, – ‘‘ப⁴ந்தே, ஏவம் உபட்டா²கேஸு ச உபட்டா²யிகாஸு ச விஜ்ஜமானாஸு ஸோ பி⁴க்கு² தும்ஹாகம் ஸாஸனே பரினிப்³பா³யிஸ்ஸதீ’’தி புச்ச²தி. அத²ஸ்ஸ ப⁴க³வா குலேஸு ஸம்ஸக்³கா³பா⁴வம் தீ³பேந்தோ ஹோந்தி ஹேதே ஸாரிபுத்தாதிஆதி³மாஹ. இமஸ்மிம் கிர டா²னே தே²ரஸ்ஸ குலேஸு அஸம்ஸட்ட²பா⁴வோ பாகடோ அஹோஸி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ச²ன்னோவாத³ஸுத்தவண்ணனா நிட்டி²தா.