3. ஸப்புரிஸத⁴ம்மஸுத்தவண்ணனா

105. ஏவம் மே ஸுதந்தி ஸப்புரிஸத⁴ம்மஸுத்தம். தத்த² ஸப்புரிஸத⁴ம்மந்தி ஸப்புரிஸானம் த⁴ம்மம். அஸப்புரிஸத⁴ம்மந்தி பாபபுரிஸானம் த⁴ம்மம். ஏவம் மாதிகம் ட²பேத்வாபி புன யதா² நாம மக்³க³குஸலோ புரிஸோ வாமம் முஞ்சித்வா த³க்கி²ணம் க³ண்ஹாதி. பட²மம் முஞ்சிதப்³ப³ம் கதே²தி, ஏவம் பஹாதப்³ப³ம் த⁴ம்மம் பட²மம் தே³ஸேந்தோ கதமோ ச, பி⁴க்க²வே, அஸப்புரிஸத⁴ம்மோதிஆதி³மாஹ. தத்த² உச்சாகுலாதி க²த்தியகுலா வா ப்³ராஹ்மணகுலா வா. ஏததே³வ ஹி குலத்³வயம் ‘‘உச்சாகுல’’ந்தி வுச்சதி. ஸோ தத்த² புஜ்ஜோதி ஸோ பி⁴க்கு² தேஸு பி⁴க்கூ²ஸு பூஜாரஹோ. அந்தரம் கரித்வாதி அப்³ப⁴ந்தரம் கத்வா.

மஹாகுலாதி க²த்தியகுலா வா ப்³ராஹ்மணகுலா வா வேஸ்ஸகுலா வா. இத³மேவ ஹி குலத்தயம் ‘‘மஹாகுல’’ந்தி வுச்சதி. மஹாபோ⁴க³குலாதி மஹந்தேஹி போ⁴கே³ஹி ஸமன்னாக³தா குலா. உளாரபோ⁴க³குலாதி உளாரேஹி பணீதேஹி போ⁴கே³ஹி ஸம்பன்னகுலா. இமஸ்மிம் பத³த்³வயே சத்தாரிபி குலானி லப்³ப⁴ந்தி. யத்த² கத்த²சி குலே ஜாதோ ஹி புஞ்ஞப³லேஹி மஹாபோ⁴கோ³பி உளாரபோ⁴கோ³பி ஹோதியேவ.

106. யஸஸ்ஸீதி பரிவாரஸம்பன்னோ. அப்பஞ்ஞாதாதி ரத்திம் கி²த்தஸரா விய ஸங்க⁴மஜ்ஜா²தீ³ஸு ந பஞ்ஞாயந்தி. அப்பேஸக்கா²தி அப்பபரிவாரா.

107. ஆரஞ்ஞிகோதி ஸமாதி³ன்னஆரஞ்ஞிகது⁴தங்கோ³. ஸேஸது⁴தங்கே³ஸுபி ஏஸேவ நயோ. இமஸ்மிஞ்ச ஸுத்தே பாளியம் நவேவ து⁴தங்கா³னி ஆக³தானி, வித்தா²ரேன பனேதானி தேரஸ ஹோந்தி. தேஸு யம் வத்தப்³ப³ம், தம் ஸப்³ப³ம் ஸப்³பா³காரேன விஸுத்³தி⁴மக்³கே³ து⁴தங்க³னித்³தே³ஸே வுத்தமேவ.

108. அதம்மயதாதி தம்மயதா வுச்சதி தண்ஹா, நித்தண்ஹாதி அத்தோ². அதம்மயதஞ்ஞேவ அந்தரம் கரித்வாதி நித்தண்ஹதம்யேவ காரணம் கத்வா அப்³ப⁴ந்தரம் வா கத்வா, சித்தே உப்பாதே³த்வாதி அத்தோ².

நிரோத⁴வாரே யஸ்மா அனாகா³மிகீ²ணாஸவாவ தம் ஸமாபத்திம் ஸமாபஜ்ஜந்தி, புது²ஜ்ஜனஸ்ஸ ஸா நத்தி², தஸ்மா அஸப்புரிஸவாரோ பரிஹீனோ. ந கஞ்சி மஞ்ஞதீதி கஞ்சி புக்³க³லம் தீஹி மஞ்ஞனாஹி ந மஞ்ஞதி. ந குஹிஞ்சி மஞ்ஞதீதி கிஸ்மிஞ்சி ஓகாஸே ந மஞ்ஞதி. ந கேனசி மஞ்ஞதீதி கேனசி வத்து²னாபி தம் புக்³க³லம் ந மஞ்ஞதி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸப்புரிஸத⁴ம்மஸுத்தவண்ணனா நிட்டி²தா.