10. கண்ணகத்த²லஸுத்தவண்ணனா

375. ஏவம் மே ஸுதந்தி கண்ணகத்த²லஸுத்தம். தத்த² உருஞ்ஞாயந்தி உருஞ்ஞாதி தஸ்ஸ ரட்ட²ஸ்ஸபி நக³ரஸ்ஸபி ஏததே³வ நாமம், ப⁴க³வா உருஞ்ஞானக³ரம் உபனிஸ்ஸாய விஹரதி. கண்ணகத்த²லே மிக³தா³யேதி தஸ்ஸ நக³ரஸ்ஸ அவிதூ³ரே கண்ணகத்த²லம் நாம ஏகோ ரமணீயோ பூ⁴மிபா⁴கோ³ அத்தி², ஸோ மிகா³னம் அப⁴யத்தா²ய தி³ன்னத்தா மிக³தா³யோதி வுச்சதி, தஸ்மிம் கண்ணகத்த²லே மிக³தா³யே. கேனசிதே³வ கரணீயேனாதி ந அஞ்ஞேன, அனந்தரஸுத்தே வுத்தகரணீயேனேவ. ஸோமா ச ப⁴கி³னீ ஸகுலா ச ப⁴கி³னீதி இமா த்³வே ப⁴கி³னியோ ரஞ்ஞோ பஜாபதியோ. ப⁴த்தாபி⁴ஹாரேதி ப⁴த்தம் அபி⁴ஹரணட்டா²னே. ரஞ்ஞோ பு⁴ஞ்ஜனட்டா²னஞ்ஹி ஸப்³பா³பி ஓரோதா⁴ கடச்சு²ஆதீ³னி க³ஹேத்வா ராஜானம் உபட்டா²தும் க³ச்ச²ந்தி, தாபி ததே²வ அக³மம்ஸு.

376. கிம் பன, மஹாராஜாதி கஸ்மா ஏவமாஹ? ரஞ்ஞோ க³ரஹபரிமோசனத்த²ம். ஏவஞ்ஹி பரிஸா சிந்தேய்ய – ‘‘அயம் ராஜா ஆக³ச்ச²மானோவ மாதுகா³மானம் ஸாஸனம் ஆரோசேதி, மயம் அத்தனோ த⁴ம்மதாய ப⁴க³வந்தம் த³ட்டு²ம் ஆக³தோதி மஞ்ஞாம, அயம் பன மாதுகா³மானம் ஸாஸனம் க³ஹேத்வா ஆக³தோ, மாதுகா³மதா³ஸோ மஞ்ஞே, ஏஸ புப்³பே³பி இமினாவ காரணேன ஆக³ச்ச²தீ’’தி. புச்சி²தோ பன ஸோ அத்தனோ ஆக³மனகாரணம் கதே²ஸ்ஸதி, ஏவமஸ்ஸ அயம் க³ரஹா ந உப்பஜ்ஜிஸ்ஸதீதி க³ரஹமோசனத்த²ம் ஏவமாஹ.

378. அப்³பு⁴தா³ஹாஸீதி கதே²ஸி. ஸகிதே³வ ஸப்³ப³ம் உஸ்ஸதி ஸப்³ப³ம் த³க்கி²தீதி யோ ஏகாவஜ்ஜனேன ஏகசித்தேன அதீதானாக³தபச்சுப்பன்னம் ஸப்³ப³ம் உஸ்ஸதி வா த³க்கி²தி வா, ஸோ நத்தீ²தி அத்தோ². ஏகேன ஹி சித்தேன அதீதம் ஸப்³ப³ம் ஜானிஸ்ஸாமீதி ஆவஜ்ஜித்வாபி அதீதம் ஸப்³ப³ம் ஜானிதும் ந ஸக்கா, ஏகதே³ஸமேவ ஜானாதி. அனாக³தபச்சுப்பன்னம் பன தேன சித்தேன ஸப்³பே³னேவ ஸப்³ப³ம் ந ஜானாதீதி. ஏஸ நயோ இதரேஸு. ஏவம் ஏகசித்தவஸேனாயம் பஞ்ஹோ கதி²தோ. ஹேதுரூபந்தி ஹேதுஸபா⁴வம் காரணஜாதிகம். ஸஹேதுரூபந்தி ஸகாரணஜாதிகம். ஸம்பராயிகாஹம், ப⁴ந்தேதி ஸம்பராயகு³ணம் அஹம், ப⁴ந்தே, புச்சா²மி.

379. பஞ்சிமானீதி இமஸ்மிம் ஸுத்தே பஞ்ச பதா⁴னியங்கா³னி லோகுத்தரமிஸ்ஸகானி கதி²தானி. கதி²னங்க³ணவாஸீசூளஸமுத்³த³த்தே²ரோ பன ‘‘தும்ஹாகம், ப⁴ந்தே, கிம் ருச்சதீ’’தி வுத்தே ‘‘மய்ஹம் லோகுத்தரானேவாதி ருச்சதீ’’தி ஆஹ. பதா⁴னவேமத்ததந்தி பதா⁴னனானத்தம். அஞ்ஞாதி³ஸமேவ ஹி புது²ஜ்ஜனஸ்ஸ பதா⁴னம், அஞ்ஞாதி³ஸம் ஸோதாபன்னஸ்ஸ, அஞ்ஞாதி³ஸம் ஸகதா³கா³மினோ, அஞ்ஞாதி³ஸம் அனாகா³மினோ, அஞ்ஞாதி³ஸம் அரஹதோ, அஞ்ஞாதி³ஸம் அஸீதிமஹாஸாவகானம், அஞ்ஞாதி³ஸம் த்³வின்னம் அக்³க³ஸாவகானம், அஞ்ஞாதி³ஸம் பச்சேகபு³த்³தா⁴னம், அஞ்ஞாதி³ஸம் ஸப்³ப³ஞ்ஞுபு³த்³தா⁴னம். புது²ஜ்ஜனஸ்ஸ பதா⁴னம் ஸோதாபன்னஸ்ஸ பதா⁴னம் ந பாபுணாதி…பே… பச்சேகபு³த்³த⁴ஸ்ஸ பதா⁴னம் ஸப்³ப³ஞ்ஞுபு³த்³த⁴ஸ்ஸ பதா⁴னம் ந பாபுணாதி. இமமத்த²ம் ஸந்தா⁴ய ‘‘பதா⁴னவேமத்ததம் வதா³மீ’’தி ஆஹ. த³ந்தகாரணம் க³ச்சே²ய்யுந்தி யம் அகூடகரணம், அனவச்சி²ந்த³னம், து⁴ரஸ்ஸ அச்சி²ந்த³னந்தி த³ந்தேஸு காரணம் தி³ஸ்ஸதி, தம் காரணம் உபக³ச்சே²ய்யுந்தி அத்தோ². த³ந்தபூ⁴மிந்தி த³ந்தேஹி க³ந்தப்³ப³பூ⁴மிம். அஸ்ஸத்³தோ⁴திஆதீ³ஸு புது²ஜ்ஜனஸோதாபன்னஸகதா³கா³மிஅனாகா³மினோ சத்தாரோபி அஸ்ஸத்³தா⁴ நாம. புது²ஜ்ஜனோ ஹி ஸோதாபன்னஸ்ஸ ஸத்³த⁴ம் அப்பத்தோதி அஸ்ஸத்³தோ⁴, ஸோதாபன்னோ ஸகதா³கா³மிஸ்ஸ, ஸகதா³கா³மீ அனாகா³மிஸ்ஸ, அனாகா³மீ அரஹதோ ஸத்³த⁴ம் அப்பத்தோதி அஸ்ஸத்³தோ⁴, ஆபா³தோ⁴ அரஹதோபி உப்பஜ்ஜதீதி பஞ்சபி ப³ஹ்வாபா³தா⁴ நாம ஹோந்தி. அரியஸாவகஸ்ஸ பன ஸடோ² மாயாவீதி நாமம் நத்தி². தேனேவ தே²ரோ – ‘‘பஞ்ச பதா⁴னியங்கா³னி லோகுத்தரானி கதி²தானீதி மய்ஹம் ருச்சதீ’’தி ஆஹ. அஸ்ஸக²ளுங்கஸுத்தந்தே பன – ‘‘தயோ ச, பி⁴க்க²வே, அஸ்ஸக²ளுங்கே தயோ ச புரிஸக²ளுங்கே தே³ஸேஸ்ஸாமீ’’தி (அ. நி. 3.141) ஏத்த² அரியஸாவகஸ்ஸாபி ஸம்போ³தி⁴னாமம் ஆக³தம், தஸ்ஸ வஸேன லோகுத்தரமிஸ்ஸகா கதி²தாதி வுத்தம். புது²ஜ்ஜனோ பன ஸோதாபத்திமக்³க³வீரியம் அஸம்பத்தோ…பே… அனாகா³மீ அரஹத்தமக்³க³வீரியம் அஸம்பத்தோதி குஸீதோபி அஸ்ஸத்³தோ⁴ விய சத்தாரோவ ஹோந்தி, ததா² து³ப்பஞ்ஞோ.

ஏவம் பனேத்த² ஓபம்மஸம்ஸந்த³னம் வேதி³தப்³ப³ம் – அத³ந்தஹத்தி²ஆத³யோ விய ஹி மக்³க³பதா⁴னரஹிதோ புக்³க³லோ. த³ந்தஹத்தி²ஆத³யோ விய மக்³க³பதா⁴னவா. யதா² அத³ந்தா ஹத்தி²ஆத³யோ கூடாகாரம் அகத்வா அவிச்சி²ந்தி³த்வா து⁴ரம் அபாதேத்வா த³ந்தக³மனம் வா க³ந்தும் த³ந்தபூ⁴மிம் வா பத்தும் ந ஸக்கோந்தி, ஏவமேவம் மக்³க³பதா⁴னரஹிதோ மக்³க³பதா⁴னவதா பத்தப்³ப³ம் பாபுணிதும் நிப்³ப³த்தேதப்³ப³ம் கு³ணம் நிப்³ப³த்தேதும் ந ஸக்கோதி. யதா² பன த³ந்தஹத்தி²ஆத³யோ கூடாகாரம் அகத்வா அவிச்சி²ந்தி³த்வா து⁴ரம் அபாதேத்வா த³ந்தக³மனம் வா க³ந்தும் த³ந்தபூ⁴மிம் வா பத்தும் ஸக்கோந்தி, ஏவமேவம் மக்³க³பதா⁴னவா மக்³க³பதா⁴னவதா பத்தப்³ப³ம் பாபுணிதும் நிப்³ப³த்தேதப்³ப³ம் கு³ணம் நிப்³ப³த்தேதும் ஸக்கோதி. இத³ம் வுத்தம் ஹோதி – ‘‘ஸோதாபத்திமக்³க³பதா⁴னவா ஸோதாபத்திமக்³க³பதா⁴னவதா பத்தோகாஸம் பாபுணிதும் நிப்³ப³த்தேதப்³ப³ம் கு³ணம் நிப்³ப³த்தேதும் ஸக்கோதி…பே… அரஹத்தமக்³க³பதா⁴னவா அரஹத்தமக்³க³பதா⁴னவதா பத்தோகாஸம் பாபுணிதும் நிப்³ப³த்தேதப்³ப³ம் கு³ணம் நிப்³ப³த்தேதும் ஸக்கோதீ’’தி.

380. ஸம்மப்பதா⁴னாதி மக்³க³பதா⁴னேன ஸம்மப்பதா⁴னா. ந கிஞ்சி நானாகரணம் வதா³மி யதி³த³ம் விமுத்தியா விமுத்திந்தி யம் ஏகஸ்ஸ ப²லவிமுத்தியா இதரஸ்ஸ ப²லவிமுத்திம் ஆரப்³ப⁴ நானாகரணம் வத்தப்³ப³ம் ஸியா, தம் ந கிஞ்சி வதா³மீதி அத்தோ². அச்சியா வா அச்சிந்தி அச்சியா வா அச்சிம்ஹி. ஸேஸபத³த்³வயேபி ஏஸேவ நயோ, பு⁴ம்மத்தே² ஹி ஏதம் உபயோக³வசனம். கிம் பன த்வம், மஹாராஜாதி, மஹாராஜ, கிம் த்வம்? ‘‘ஸந்தி தே³வா சாதுமஹாராஜிகா, ஸந்தி தே³வா தாவதிம்ஸா…பே… ஸந்தி தே³வா பரனிம்மிதவஸவத்தினோ, ஸந்தி தே³வா ததுத்தரி’’ந்தி ஏவம் தே³வானம் அத்தி²பா⁴வம் ந ஜானாஸி, யேன ஏவம் வதே³ஸீதி. ததோ அத்தி²பா⁴வம் ஜானாமி, மனுஸ்ஸலோகம் பன ஆக³ச்ச²ந்தி நாக³ச்ச²ந்தீதி இத³ம் புச்ச²ந்தோ யதி³ வா தே, ப⁴ந்தேதிஆதி³மாஹ. ஸப்³யாப³ஜ்ஜா²தி ஸது³க்கா², ஸமுச்சே²த³ப்பஹானேன அப்பஹீனசேதஸிகது³க்கா². ஆக³ந்தாரோதி உபபத்திவஸேன ஆக³ந்தாரோ. அப்³யாப³ஜ்ஜா²தி ஸமுச்சி²ன்னது³க்கா². அனாக³ந்தாரோதி உபபத்திவஸேன அனாக³ந்தாரோ.

381. பஹோதீதி ஸக்கோதி. ராஜா ஹி புஞ்ஞவந்தம்பி லாப⁴ஸக்காரஸம்பன்னம் யதா² ந கோசி உபஸங்கமதி, ஏவம் கரோந்தோ தம்ஹா டா²னா சாவேதும் ஸக்கோதி. தம் அபுஞ்ஞவந்தம்பி ஸகலகா³மம் பிண்டா³ய சரித்வா யாபனமத்தம் அலப⁴ந்தம் யதா² லாப⁴ஸக்காரஸம்பன்னோ ஹோதி, ஏவம் கரோந்தோ தம்ஹா டா²னா சாவேதும் ஸக்கோதி. ப்³ரஹ்மசரியவந்தம்பி இத்தீ²ஹி ஸத்³தி⁴ம் ஸம்பயோஜேத்வா ஸீலவினாஸம் பாபேந்தோ ப³லக்காரேன வா உப்பப்³பா³ஜேந்தோ தம்ஹா டா²னா சாவேதும் ஸக்கோதி. அப்³ரஹ்மசரியவந்தம்பி ஸம்பன்னகாமகு³ணம் அமச்சம் ப³ந்த⁴னாகா³ரம் பவேஸேத்வா இத்தீ²னம் முக²ம்பி பஸ்ஸிதும் அதே³ந்தோ தம்ஹா டா²னா சாவேதி நாம. ரட்ட²தோ பன யம் இச்ச²தி, தம் பப்³பா³ஜேதி நாம.

த³ஸ்ஸனாயபி நப்பஹோந்தீதி காமாவசரே தாவ அப்³யாப³ஜ்ஜே² தே³வே ஸப்³யாப³ஜ்ஜா² தே³வா சக்கு²விஞ்ஞாணத³ஸ்ஸனாயபி நப்பஹோந்தி. கஸ்மா? அரஹதோ தத்த² டா²னாபா⁴வதோ. ரூபாவசரே பன ஏகவிமானஸ்மிம்யேவ திட்ட²ந்தி ச நிஸீத³ந்தி சாதி சக்கு²விஞ்ஞாணத³ஸ்ஸனாய பஹோந்தி, ஏதேஹி தி³ட்ட²ம் பன ஸல்லக்கி²தம் படிவித்³த⁴ம் லக்க²ணம் த³ட்டு²ம் ஸல்லக்கி²தும் படிவிஜ்ஜி²தும் ந ஸக்கோந்தீதி ஞாணசக்கு²னா த³ஸ்ஸனாய நப்பஹோந்தி, உபரிதே³வே ச சக்கு²விஞ்ஞாணத³ஸ்ஸனேனாபீதி.

382. கோ நாமோ அயம், ப⁴ந்தேதி ராஜா தே²ரம் ஜானந்தோபி அஜானந்தோ விய புச்ச²தி. கஸ்மா? பஸம்ஸிதுகாமதாய. ஆனந்த³ரூபோதி ஆனந்த³ஸபா⁴வோ. ப்³ரஹ்மபுச்சா²பி வுத்தனயேனேவ வேதி³தப்³பா³. அத² கோ² அஞ்ஞதரோ புரிஸோதி ஸா கிர கதா² விடடூபே⁴னேவ கதி²தா, தே ‘‘தயா கதி²தா, தயா கதி²தா’’தி குபிதா அஞ்ஞமஞ்ஞம் இமஸ்மிம்யேவ டா²னே அத்தனோ அத்தனோ ப³லகாயம் உட்டா²பேத்வா கலஹம்பி கரேய்யுந்தி நிவாரணத்த²ம் ஸோ ராஜபுரிஸோ ஏதத³வோச. ஸேஸம் ஸப்³ப³த்த² உத்தானமேவ. அயம் பன தே³ஸனா நேய்யபுக்³க³லஸ்ஸ வஸேன நிட்டி²தாதி.

பபஞ்சஸூத³னியா மஜ்ஜி²மனிகாயட்ட²கதா²ய

கண்ணகத்த²லஸுத்தவண்ணனா நிட்டி²தா.

சதுத்த²வக்³க³வண்ணனா நிட்டி²தா.