2. அக்³கி³வச்ச²ஸுத்தவண்ணனா

187. ஏவம் மே ஸுதந்தி அக்³கி³வச்ச²ஸுத்தம். தத்த² ந கோ² அஹந்தி பட²மவாரே நாஹம் ஸஸ்ஸததி³ட்டி²கோதி வத³தி, து³தியே நாஹம் உச்சே²த³தி³ட்டி²கோதி. ஏவம் அந்தானந்திகாதி³வஸேன ஸப்³ப³வாரேஸு படிக்கே²போ வேதி³தப்³போ³. ஹோதி ச ந ச ஹோதீதி அயம் பனேத்த² ஏகச்சஸஸ்ஸதவாதோ³. நேவ ஹோதி ந ந ஹோதீதி அயம் அமராவிக்கே²போதி வேதி³தப்³போ³.

189. ஸது³க்க²ந்தி கிலேஸது³க்கே²ன சேவ விபாகது³க்கே²ன ச ஸது³க்க²ம். ஸவிகா⁴தந்தி தேஸம்யேவ த்³வின்னம் வஸேன ஸஉபகா⁴தகம். ஸஉபாயாஸந்தி தேஸம்யேவ வஸேன ஸஉபாயாஸம். ஸபரிளாஹந்தி தேஸம்யேவ வஸேன ஸபரிளாஹம்.

கிஞ்சி தி³ட்டி²க³தந்தி காசி ஏகா தி³ட்டி²பி ருச்சித்வா க²மாபேத்வா க³ஹிதா அத்தீ²தி புச்ச²தி. அபனீதந்தி நீஹடம் அபவித்³த⁴ம். தி³ட்ட²ந்தி பஞ்ஞாய தி³ட்ட²ம். தஸ்மாதி யஸ்மா பஞ்சன்னம் க²ந்தா⁴னம் உத³யவயம் அத்³த³ஸ, தஸ்மா. ஸப்³ப³மஞ்ஞிதானந்தி ஸப்³பே³ஸம் திண்ணம்பி தண்ஹாதி³ட்டி²மானமஞ்ஞிதானம். மதி²தானந்தி தேஸம்யேவ வேவசனம். இதா³னி தானி விப⁴ஜித்வா த³ஸ்ஸேந்தோ ஸப்³ப³அஹம்கார-மமம்கார-மானானுஸயானந்தி ஆஹ. ஏத்த² ஹி அஹம்காரோ தி³ட்டி², மமம்காரோ தண்ஹா, மானானுஸயோ மானோ. அனுபாதா³ விமுத்தோதி சதூஹி உபாதா³னேஹி கஞ்சி த⁴ம்மம் அனுபாதி³யித்வா விமுத்தோ.

190. ந உபேதீதி ந யுஜ்ஜதி. ஏத்த² ச ‘‘ந உபபஜ்ஜதீ’’தி இத³ம் அனுஜானிதப்³ப³ம் ஸியா. யஸ்மா பன ஏவம் வுத்தே ஸோ பரிப்³பா³ஜகோ உச்சே²த³ம் க³ண்ஹேய்ய, உபபஜ்ஜதீதி பன ஸஸ்ஸதமேவ, உபபஜ்ஜதி ச ந ச உபபஜ்ஜதீதி ஏகச்சஸஸ்ஸதம், நேவ உபபஜ்ஜதி ந ந உபபஜ்ஜதீதி அமராவிக்கே²பம், தஸ்மா ப⁴க³வா – ‘‘அயம் அப்பதிட்டோ² அனாலம்போ³ ஹோது, ஸுக²பவேஸனட்டா²னம் மா லப⁴தூ’’தி அனனுஞ்ஞாய ட²த்வா அனுஞ்ஞம்பி படிக்கி²பி. அலந்தி ஸமத்த²ம் பரியத்தம். த⁴ம்மோதி பச்சயாகாரத⁴ம்மோ. அஞ்ஞத்ரயோகே³னாதி அஞ்ஞத்த² பயோகே³ன. அஞ்ஞத்ராசரியகேனாதி பச்சயாகாரம் அஜானந்தானம் அஞ்ஞேஸம் ஆசரியானம் ஸந்திகே வஸந்தேன.

191. தேன ஹி வச்சா²தி யஸ்மா த்வம் ஸம்மோஹமாபாதி³ந்தி வத³ஸி, தஸ்மா தம்யேவேத்த² படிபுச்சி²ஸ்ஸாமி. அனாஹாரோ நிப்³பு³தோதி அப்பச்சயோ நிப்³பு³தோ.

192. யேன ரூபேனாதி யேன ரூபேன ஸத்தஸங்கா²தம் ததா²க³தம் ரூபீதி பஞ்ஞாபேய்ய. க³ம்பீ⁴ரோதி கு³ணக³ம்பீ⁴ரோ. அப்பமேய்யோதி பமாணம் க³ண்ஹிதும் ந ஸக்குணேய்யோ. து³ப்பரியோகா³ள்ஹோதி து³ஓகா³ஹோ து³ஜ்ஜானோ. ஸேய்யதா²பி மஹாஸமுத்³தோ³தி யதா² மஹாஸமுத்³தோ³ க³ம்பீ⁴ரோ அப்பமேய்யோ து³ஜ்ஜானோ, ஏவமேவ கீ²ணாஸவோபி. தம் ஆரப்³ப⁴ உபபஜ்ஜதீதிஆதி³ ஸப்³ப³ம் ந யுஜ்ஜதி. கத²ம்? யதா² பரினிப்³பு³தம் அக்³கி³ம் ஆரப்³ப⁴ புரத்தி²மம் தி³ஸம் க³தோதிஆதி³ ஸப்³ப³ம் ந யுஜ்ஜதி, ஏவம்.

அனிச்சதாதி அனிச்சதாய. ஸாரே பதிட்டி²தந்தி லோகுத்தரத⁴ம்மஸாரே பதிட்டி²தம். ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

அக்³கி³வச்ச²ஸுத்தவண்ணனா நிட்டி²தா.