3. சூளமாலுக்யஸுத்தவண்ணனா

122. ஏவம் மே ஸுதந்தி மாலுக்யஸுத்தம். தத்த² மாலுக்யபுத்தஸ்ஸாதி ஏவம்னாமகஸ்ஸ தே²ரஸ்ஸ. ட²பிதானி படிக்கி²த்தானீதி தி³ட்டி²க³தானி நாம ந ப்³யாகாதப்³பா³னீதி ஏவம் ட²பிதானி சேவ படிக்கி²த்தானி ச. ததா²க³தோதி ஸத்தோ. தம் மே ந ருச்சதீதி தம் அப்³யாகரணம் மய்ஹம் ந ருச்சதி. ஸிக்க²ம் பச்சக்கா²யாதி ஸிக்க²ம் படிக்கி²பித்வா.

125. கோ ஸந்தோ கம் பச்சாசிக்க²ஸீதி யாசகோ வா ஹி யாசிதகம் பச்சாசிக்கே²ய்ய, யாசிதகோ வா யாசகம். த்வம் நேவ யாசகோ ந யாசிதகோ, ஸோ தா³னி த்வம் கோ ஸந்தோ கம் பச்சாசிக்க²ஸீதி அத்தோ².

126. வித்³தோ⁴ அஸ்ஸாதி பரஸேனாய டி²தேன வித்³தோ⁴ ப⁴வேய்ய. கா³ள்ஹபலேபனேனாதி ப³ஹலலேபனேன. பி⁴ஸக்கந்தி வேஜ்ஜம். ஸல்லகத்தந்தி ஸல்லகந்தனம் ஸல்லகந்தியஸுத்தவாசகம். அக்கஸ்ஸாதி அக்கவாகே க³ஹேத்வா ஜியம் கரோந்தி. தேன வுத்தம் ‘‘அக்கஸ்ஸா’’தி. ஸண்ஹஸ்ஸாதி வேணுவிலீவஸ்ஸ. மருவாகீ²ரபண்ணீனம்பி வாகேஹியேவ கரோந்தி. தேன வுத்தம் யதி³ வா மருவாய யதி³ வா கீ²ரபண்ணினோதி. க³ச்ச²ந்தி பப்³ப³தக³ச்ச²னதீ³க³ச்சா²தீ³ஸு ஜாதம். ரோபிமந்தி ரோபேத்வா வட்³டி⁴தம் ஸரவனதோ ஸரம் க³ஹேத்வா கதம். ஸிதி²லஹனுனோதி ஏவம்னாமகஸ்ஸ பக்கி²னோ. பே⁴ரவஸ்ஸாதி காளஸீஹஸ்ஸ. ஸேம்ஹாரஸ்ஸாதி மக்கடஸ்ஸ. ஏவம் நோதி ஏதாய தி³ட்டி²யா ஸதி ந ஹோதீதி அத்தோ².

127. அத்தே²வ ஜாதீதி ஏதாய தி³ட்டி²யா ஸதி ப்³ரஹ்மசரியவாஸோவ நத்தி², ஜாதி பன அத்தி²யேவ. ததா² ஜராமரணாதீ³னீதி த³ஸ்ஸேதி. யேஸாஹந்தி யேஸம் அஹம். நிகா⁴தந்தி உபகா⁴தம் வினாஸம். மம ஸாவகா ஹி ஏதேஸு நிப்³பி³ன்னா இதே⁴வ நிப்³பா³னம் பாபுணந்தீதி அதி⁴ப்பாயோ.

128. தஸ்மாதிஹாதி யஸ்மா அப்³யாகதமேதம், சதுஸச்சமேவ மயா ப்³யாகதம், தஸ்மாதி அத்தோ². ந ஹேதம் மாலுக்யபுத்த அத்த²ஸம்ஹிதந்தி ஏதம் தி³ட்டி²க³தம் வா ஏதம் ப்³யாகரணம் வா காரணனிஸ்ஸிதம் ந ஹோதி. ந ஆதி³ப்³ரஹ்மசரியகந்தி ப்³ரஹ்மசரியஸ்ஸ ஆதி³மத்தம்பி புப்³ப³பா⁴க³ஸீலமத்தம்பி ந ஹோதி. ந நிப்³பி³தா³யாதிஆதீ³ஸு வட்டே நிப்³பி³ந்த³னத்தா²ய வா விரஜ்ஜ²னத்தா²ய வா வட்டனிரோதா⁴ய வா ராகா³தி³வூபஸமனத்தா²ய வா அபி⁴ஞ்ஞேய்யே த⁴ம்மே அபி⁴ஜானனத்தா²ய வா சதுமக்³க³ஸங்கா²தஸம்போ³த⁴த்தா²ய வா அஸங்க²தனிப்³பா³னஸச்சி²கிரியத்தா²ய வா ந ஹோதி. ஏதம் ஹீதி ஏதம் சதுஸச்சப்³யாகரணம். ஆதி³ப்³ரஹ்மசரியகந்தி ப்³ரஹ்மசரியஸ்ஸ ஆதி³பூ⁴தம் புப்³ப³பத³ட்டா²னம். ஸேஸம் வுத்தபடிவிபக்க²னயேன வேதி³தப்³ப³ம். இமம்பி தே³ஸனம் ப⁴க³வா நேய்யபுக்³க³லவஸேன நிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

சூளமாலுக்யஸுத்தவண்ணனா நிட்டி²தா.