10. அபண்ணகஸுத்தவண்ணனா

92. ஏவம் மே ஸுதந்தி அபண்ணகஸுத்தம். தத்த² சாரிகந்தி அதுரிதசாரிகம்.

93. அத்தி² பன வோ க³ஹபதயோதி கஸ்மா ஆஹ? ஸோ கிர கா³மோ அடவித்³வாரே நிவிட்டோ². நானாவிதா⁴ ஸமணப்³ராஹ்மணா தி³வஸம் மக்³க³ம் க³ந்த்வா ஸாயம் தம் கா³மம் வாஸத்தா²ய உபேந்தி, தேஸம் தே மனுஸ்ஸா மஞ்சபீடா²னி பத்த²ரித்வா பாதே³ தோ⁴வித்வா பாதே³ மக்கே²த்வா கப்பியபானகானி த³த்வா புனதி³வஸே நிமந்தேத்வா தா³னம் தே³ந்தி. தே பஸன்னசித்தா தேஹி ஸத்³தி⁴ம் ஸம்மந்தயமானா ஏவம் வத³ந்தி ‘‘அத்தி² பன வோ க³ஹபதயோ கிஞ்சி த³ஸ்ஸனம் க³ஹித’’ந்தி? நத்தி², ப⁴ந்தேதி. ‘‘க³ஹபதயோ வினா த³ஸ்ஸனேன லோகோ ந நிய்யாதி, ஏகம் த³ஸ்ஸனம் ருச்சித்வா க²மாபேத்வா க³ஹேதும் வட்டதி, ‘ஸஸ்ஸதோ லோகோ’தி த³ஸ்ஸனம் க³ண்ஹதா²’’தி வத்வா பக்கந்தா. அபரதி³வஸே அஞ்ஞே ஆக³தா. தேபி ததே²வ புச்சி²ம்ஸு. தே தேஸம் ‘‘ஆம, ப⁴ந்தே, புரிமேஸு தி³வஸேஸு தும்ஹாதி³ஸா ஸமணப்³ராஹ்மணா ஆக³ந்த்வா ‘ஸஸ்ஸதோ லோகோ’தி அம்ஹே இத³ம் த³ஸ்ஸனம் கா³ஹாபேத்வா க³தா’’தி ஆரோசேஸும். ‘‘தே பா³லா கிம் ஜானந்தி? ‘உச்சி²ஜ்ஜதி அயம் லோகோ’தி உச்சே²த³த³ஸ்ஸனம் க³ண்ஹதா²’’தி ஏவம் தேபி உச்சே²த³த³ஸ்ஸனம் க³ண்ஹாபேத்வா பக்கந்தா. ஏதேனுபாயேன அஞ்ஞே ஏகச்சஸஸ்ஸதம், அஞ்ஞே அந்தானந்தம், அஞ்ஞே அமராவிக்கே²பந்தி ஏவம் த்³வாஸட்டி² தி³ட்டி²யோ உக்³க³ண்ஹாபேஸும். தே பன ஏகதி³ட்டி²யம்பி பதிட்டா²தும் நாஸக்கி²ம்ஸு. ஸப்³ப³பச்சா² ப⁴க³வா அக³மாஸி. ஸோ தேஸம் ஹிதத்தா²ய புச்ச²ந்தோ ‘‘அத்தி² பன வோ க³ஹபதயோ’’திஆதி³மாஹ. தத்த² ஆகாரவதீதி காரணவதீ ஸஹேதுகா. அபண்ணகோதி அவிரத்³தோ⁴ அத்³வேஜ்ஜ²கா³மீ ஏகம்ஸகா³ஹிகோ.

94. நத்தி² தி³ன்னந்திஆதி³ த³ஸவத்து²கா மிச்சா²தி³ட்டி² ஹேட்டா² ஸாலேய்யகஸுத்தே வித்தா²ரிதா. ததா² தப்³பி³பச்சனீகபூ⁴தா ஸம்மாதி³ட்டி².

95. நேக்க²ம்மே ஆனிஸம்ஸந்தி யோ நேஸம் அகுஸலதோ நிக்க²ந்தபா⁴வே ஆனிஸம்ஸோ, யோ ச வோதா³னபக்கோ² விஸுத்³தி⁴பக்கோ², தம் ந பஸ்ஸந்தீதி அத்தோ². அஸத்³த⁴ம்மஸஞ்ஞத்தீதி அபூ⁴தத⁴ம்மஸஞ்ஞாபனா. அத்தானுக்கம்ஸேதீதி ட²பேத்வா மம் கோ அஞ்ஞோ அத்தனோ த³ஸ்ஸனம் பரே க³ண்ஹாபேதும் ஸக்கோதீதி அத்தானம் உக்கி²பதி. பரம் வம்பே⁴தீதி ஏத்தகேஸு ஜனேஸு ஏகோபி அத்தனோ த³ஸ்ஸனம் பரே க³ண்ஹாபேதும் ந ஸக்கோதீதி ஏவம் பரம் ஹேட்டா² கி²பதி. புப்³பே³வ கோ² பனாதி புப்³பே³ மிச்சா²த³ஸ்ஸனம் க³ண்ஹந்தஸ்ஸேவ ஸுஸீல்யம் பஹீனம் ஹோதி, து³ஸ்ஸீலபா⁴வோ பச்சுபட்டி²தோ. ஏவமஸ்ஸிமேதி ஏவம் அஸ்ஸ இமே மிச்சா²தி³ட்டி²ஆத³யோ ஸத்த. அபராபரம் உப்பஜ்ஜனவஸேன பன தேயேவ மிச்சா²தி³ட்டி²பச்சயா அனேகே பாபகா அகுஸலா த⁴ம்மா உப்பஜ்ஜந்தி நாம.

தத்ராதி தாஸு தேஸம் ஸமணப்³ராஹ்மணானம் லத்³தீ⁴ஸு. கலிக்³க³ஹோதி பராஜயக்³கா³ஹோ. து³ஸ்ஸமத்தோ ஸமாதி³ன்னோதி து³க்³க³ஹிதோ து³ப்பராமட்டோ². ஏகம்ஸம் ப²ரித்வா திட்ட²தீதி ஏகந்தம் ஏககோட்டா²ஸம் ஸகவாத³மேவ ப²ரித்வா அதி⁴முச்சித்வா திட்ட²தி, ‘‘ஸசே கோ² நத்தி² பரோ லோகோ’’தி ஏவம் ஸந்தேயேவ ஸோத்தி²பா⁴வாவஹோ ஹோதி. ரிஞ்சதீதி வஜ்ஜேதி.

96. ஸத்³த⁴ம்மஸஞ்ஞத்தீதி பூ⁴தத⁴ம்மஸஞ்ஞாபனா.

கடக்³க³ஹோதி ஜயக்³கா³ஹோ. ஸுஸமத்தோ ஸமாதி³ன்னோதி ஸுக்³க³ஹிதோ ஸுபராமட்டோ². உப⁴யம்ஸம் ப²ரித்வா திட்ட²தீதி உப⁴யந்தம் உப⁴யகோட்டா²ஸம் ஸகவாத³ம் பரவாத³ஞ்ச ப²ரித்வா அதி⁴முச்சித்வா திட்ட²தி ‘‘ஸசே கோ² அத்தி² பரோ லோகோ’’தி ஏவம் ஸந்தேபி ‘‘ஸசே கோ² நத்தி² பரோ லோகோ’’தி ஏவம் ஸந்தேபி ஸோத்தி²பா⁴வாவஹோ ஹோதி. பரதோபி ஏகம்ஸஉப⁴யம்ஸேஸு இமினாவ நயேன அத்தோ² வேதி³தப்³போ³.

97. கரோதோதி ஸஹத்தா² கரோந்தஸ்ஸ. காரயதோதி ஆணத்தியா காரேந்தஸ்ஸ. சி²ந்த³தோதி பரேஸம் ஹத்தா²தீ³னி சி²ந்த³ந்தஸ்ஸ. பசதோதி த³ண்டே³ன பீளேந்தஸ்ஸ வா தஜ்ஜேந்தஸ்ஸ வா. ஸோசயதோதி பரஸ்ஸ ப⁴ண்ட³ஹரணாதீ³ஹி ஸோகம் ஸயம் கரோந்தஸ்ஸபி பரேஹி காரேந்தஸ்ஸபி. கிலமதோதி ஆஹாரூபச்சே²த³-ப³ந்த⁴னாகா³ரப்பவேஸனாதீ³ஹி ஸயம் கிலமந்தஸ்ஸாபி பரேஹி கிலமாபேந்தஸ்ஸாபி. ப²ந்த³தோ ப²ந்தா³பயதோதி பரம் ப²ந்த³ந்தம் ப²ந்த³னகாலே ஸயம்பி ப²ந்த³தோ பரம்பி ப²ந்தா³பயதோ. பாணமதிபாதயதோதி பாணம் ஹனந்தஸ்ஸபி ஹனாபேந்தஸ்ஸபி. ஏவம் ஸப்³ப³த்த² கரணகாராபனவஸேனேவ அத்தோ² வேதி³தப்³போ³.

ஸந்தி⁴ந்தி க⁴ரஸந்தி⁴ம். நில்லோபந்தி மஹாவிலோபம். ஏகாகா³ரிகந்தி ஏகமேவ க⁴ரம் பரிவாரேத்வா விலும்பனம். பரிபந்தே² திட்ட²தோதி ஆக³தாக³தானம் அச்சி²ந்த³னத்த²ம் மக்³கே³ திட்ட²தோ. கரோதோ ந கரீயதி பாபந்தி யம்கிஞ்சி பாபம் கரோமீதி ஸஞ்ஞாய கரோதோபி பாபம் ந கரீயதி, நத்தி² பாபம். ஸத்தா பன கரோமாதி ஏவம்ஸஞ்ஞினோ ஹோந்தீதி அத்தோ². கு²ரபரியந்தேனாதி கு²ரனேமினா, கு²ரதா⁴ரஸதி³ஸபரியந்தேன வா. ஏகம் மம்ஸக²லந்தி ஏகம் மம்ஸராஸிம். புஞ்ஜந்தி தஸ்ஸேவ வேவசனம். ததோனிதா³னந்தி ஏகமம்ஸக²லகரணனிதா³னம். த³க்கி²ணதீரே மனுஸ்ஸா கக்க²ளா தா³ருணா, தே ஸந்தா⁴ய ஹனந்தோதிஆதி³ வுத்தம். உத்தரதீரே ஸத்³தா⁴ ஹோந்தி பஸன்னா பு³த்³த⁴மாமகா த⁴ம்மமாமகா ஸங்க⁴மாமகா, தே ஸந்தா⁴ய த³த³ந்தோதிஆதி³ வுத்தம்.

தத்த² யஜந்தோதி மஹாயாக³ம் கரோந்தோ. த³மேனாதி இந்த்³ரியத³மேன உபோஸத²கம்மேன. ஸம்யமேனாதி ஸீலஸம்யமேன. ஸச்சவஜ்ஜேனாதி ஸச்சவசனேன. ஆக³மோதி ஆக³மனம், பவத்தீதி அத்தோ². ஸப்³ப³தா²பி பாபபுஞ்ஞானம் கிரியமேவ படிக்கி²பந்தி. ஸுக்கபக்கோ²பி வுத்தனயேனேவ வேதி³தப்³போ³. ஸேஸமேத்த² புரிமவாரே வுத்தஸதி³ஸமேவ.

100. நத்தி² ஹேது நத்தி² பச்சயோதி ஏத்த² பச்சயோ ஹேதுவேவசனம். உப⁴யேனாபி விஜ்ஜமானகமேவ காயது³ச்சரிதாதி³ஸம்கிலேஸபச்சயம் காயஸுசரிதாதி³விஸுத்³தி⁴பச்சயம் படிக்கி²பந்தி. நத்தி² ப³லம், நத்தி² வீரியம், நத்தி² புரிஸதா²மோ, நத்தி² புரிஸபரக்கமோதி ஸத்தானம் ஸம்கிலேஸிதும் வா விஸுஜ்ஜி²தும் வா ப³லம் வா வீரியம் வா புரிஸேன காதப்³போ³ நாம புரிஸதா²மோ வா புரிஸபரக்கமோ வா நத்தி².

ஸப்³பே³ ஸத்தாதி ஓட்ட²கோ³ணக³த்³ரபா⁴த³யோ அனவஸேஸே நித³ஸ்ஸேந்தி. ஸப்³பே³ பாணாதி ஏகிந்த்³ரியோ பாணோ த்³விந்த்³ரியோ பாணோதி ஆதி³வஸேன வத³ந்தி. ஸப்³பே³ பூ⁴தாதி அண்ட³கோஸவத்தி²கோஸேஸு பூ⁴தே ஸந்தா⁴ய வத³ந்தி. ஸப்³பே³ ஜீவாதி ஸாலியவகோ³து⁴மாத³யோ ஸந்தா⁴ய வத³ந்தி. தேஸு ஹேதே விருஹனபா⁴வேன ஜீவஸஞ்ஞினோ. அவஸா அப³லா அவீரியாதி தேஸம் அத்தனோ வஸோ வா ப³லம் வா வீரியம் வா நத்தி². நியதிஸங்க³திபா⁴வபரிணதாதி ஏத்த² நியதீதி நியததா. ஸங்க³தீதி ச²ன்னம் அபி⁴ஜாதீனம் தத்த² தத்த² க³மனம். பா⁴வோதி ஸபா⁴வோயேவ. ஏவம் நியதியா ச ஸங்க³தியா ச பா⁴வேன ச பரிணதா நானப்பகாரதம் பத்தா. யேன ஹி யதா² ப⁴விதப்³ப³ம், ஸோ ததே²வ ப⁴வதி. யேன நோ ப⁴விதப்³ப³ம், ஸோ ந ப⁴வதீதி த³ஸ்ஸேந்தி. ச²ஸ்வேவாபி⁴ஜாதீஸூதி ச²ஸு ஏவ அபி⁴ஜாதீஸு ட²த்வா ஸுக²ஞ்ச து³க்க²ஞ்ச படிஸம்வேதே³ந்தி, அஞ்ஞா ஸுக²து³க்க²பூ⁴மி நத்தீ²தி த³ஸ்ஸேந்தி.

தத்த² ச² அபி⁴ஜாதியோ நாம கண்ஹாபி⁴ஜாதி நீலாபி⁴ஜாதி லோஹிதாபி⁴ஜாதி ஹலித்³தா³பி⁴ஜாதி ஸுக்காபி⁴ஜாதி பரமஸுக்காபி⁴ஜாதீதி. தத்த² ஸாகுணிகோ ஸூகரிகோ லுத்³தோ³ மச்ச²கா⁴தகோ சோரோ சோரகா⁴தகோ, யே வா பனஞ்ஞேபி கேசி குரூரகம்மந்தா, அயம் கண்ஹாபி⁴ஜாதி நாம. பி⁴க்கூ² நீலாபி⁴ஜாதீதி வத³ந்தி. தே கிர சதூஸு பச்சயேஸு கண்டகே பக்கி²பித்வா கா²த³ந்தி. ‘‘பி⁴க்கூ² ச கண்டகவுத்தினோ’’தி அயஞ்ஹி நேஸம் பாளியேவ. அத² வா கண்டகவுத்திகா ஏவம் நாம ஏகே பப்³ப³ஜிதாதி வத³ந்தி. ‘‘ஸமணகண்டகவுத்திகா’’திபி ஹி நேஸம் பாளி. லோஹிதாபி⁴ஜாதி நாம நிக³ண்டா² ஏகஸாடகாதி வத³ந்தி. இமே கிர புரிமேஹி த்³வீஹி பண்ட³ரதரா. கி³ஹீ அசேலகஸாவகா ஹலித்³தா³பி⁴ஜாதீதி வத³ந்தி. இதி அத்தனோ பச்சயதா³யகே நிக³ண்டே²ஹிபி ஜேட்ட²கதரே கரோந்தி. நந்தோ³, வச்சோ², ஸங்கிச்சோ, அயம் ஸுக்காபி⁴ஜாதீதி வத³ந்தி. தே கிர புரிமேஹி சதூஹி பண்ட³ரதரா. ஆஜீவகே பன பரமஸுக்காபி⁴ஜாதீதி வத³ந்தி. தே கிர ஸப்³பே³ஹி பண்ட³ரதரா.

தத்த² ஸப்³பே³ ஸத்தா பட²மம் ஸாகுணிகாத³யோவ ஹோந்தி, ததோ விஸுஜ்ஜ²மானா ஸக்யஸமணா ஹோந்தி, ததோ விஸுஜ்ஜ²மானா நிக³ண்டா², ததோ ஆஜீவகஸாவகா, ததோ நந்தா³த³யோ, ததோ ஆஜீவகாதி அயமேதேஸம் லத்³தி⁴. ஸுக்கபக்கோ² வுத்தபச்சனீகேன வேதி³தப்³போ³. ஸேஸமிதா⁴பி புரிமவாரே வுத்தஸதி³ஸமேவ.

இமாஸு பன தீஸு தி³ட்டீ²ஸு நத்தி²கதி³ட்டி² விபாகம் படிபா³ஹதி, அகிரியதி³ட்டி² கம்மம் படிபா³ஹதி, அஹேதுகதி³ட்டி² உப⁴யம்பி படிபா³ஹதி. தத்த² கம்மம் படிபா³ஹந்தேனாபி விபாகோ படிபா³ஹிதோ ஹோதி, விபாகம் படிபா³ஹந்தேனாபி கம்மம் படிபா³ஹிதம். இதி ஸப்³பே³பேதே அத்த²தோ உப⁴யபடிபா³ஹகா நத்தி²கவாதா³ சேவ அஹேதுகவாதா³ அகிரியவாதா³ ச ஹோந்தி. யே பன தேஸம் லத்³தி⁴ம் க³ஹேத்வா ரத்திட்டா²னே தி³வாட்டா²னே நிஸின்னா ஸஜ்ஜா²யந்தி வீமம்ஸந்தி, தேஸம் – ‘‘நத்தி² தி³ன்னம் நத்தி² யிட்ட²ம், கரோதோ ந கரியதி பாபம், நத்தி² ஹேது நத்தி² பச்சயோ’’தி தஸ்மிம் ஆரம்மணே மிச்சா²ஸதி ஸந்திட்ட²தி, சித்தம் ஏகக்³க³ம் ஹோதி, ஜவனானி ஜவந்தி, பட²மஜவனே ஸதேகிச்சா² ஹோந்தி, ததா² து³தியாதீ³ஸு. ஸத்தமே பு³த்³தா⁴னம்பி அதேகிச்சா² அனிவத்தினோ அரிட்ட²கண்டகஸதி³ஸா.

தத்த² கோசி ஏகம் த³ஸ்ஸனம் ஓக்கமதி, கோசி த்³வே, கோசி தீணிபி, ஏகஸ்மிம் ஓக்கந்தேபி த்³வீஸு தீஸு ஓக்கந்தேஸுபி நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மோக்க²மக்³கா³வரணஞ்ச, அப⁴ப்³போ³ தஸ்ஸ அத்தபா⁴வஸ்ஸ அனந்தரம் ஸக்³க³ம்பி க³ந்தும், பகே³வ மோக்க²ம். வட்டகா²ணு நாமேஸ ஸத்தோ பத²வீகோ³பகோ. கிம் பனேஸ ஏகஸ்மிம்யேவ அத்தபா⁴வே நியதோ ஹோதி, உதா³ஹு அஞ்ஞஸ்மிம்பீதி? ஏகஸ்மிஞ்ஞேவ நியதோ, ஆஸேவனவஸேன பன ப⁴வந்தரேபி தம் தம் தி³ட்டி²ம் ரோசேதியேவ. ஏவரூபஸ்ஸ ஹி யேபு⁴ய்யேன ப⁴வதோ வுட்டா²னம் நாம நத்தி².

தஸ்மா அகல்யாணஜனம், ஆஸீவிஸமிவோரக³ம்;

ஆரகா பரிவஜ்ஜேய்ய, பூ⁴திகாமோ விசக்க²ணோதி.

103. நத்தி² ஸப்³ப³ஸோ ஆருப்பாதி அரூபப்³ரஹ்மலோகோ நாம ஸப்³பா³காரேன நத்தி². மனோமயாதி ஜா²னசித்தமயா. ஸஞ்ஞாமயாதி அரூபஜ்ஜா²னஸஞ்ஞாய ஸஞ்ஞாமயா. ரூபானம்யேவ நிப்³பி³தா³ய விராகா³ய நிரோதா⁴ய படிபன்னோ ஹோதீதி அயம் லாபீ⁴ வா ஹோதி தக்கீ வா. லாபீ⁴ நாம ரூபாவசரஜ்ஜா²னலாபீ⁴. தஸ்ஸ ரூபாவசரே கங்கா² நத்தி², அரூபாவசரலோகே அத்தி². ஸோ – ‘‘அஹம் ஆருப்பா அத்தீ²தி வத³ந்தானம்பி நத்தீ²தி வத³ந்தானம்பி ஸுணாமி, அத்தி² நத்தீ²தி பன ந ஜானாமி. சதுத்த²ஜ்ஜா²னம் பத³ட்டா²னம் கத்வா அரூபாவசரஜ்ஜா²னம் நிப்³ப³த்தேஸ்ஸாமி. ஸசே ஆருப்பா அத்தி², தத்த² நிப்³ப³த்திஸ்ஸாமி, ஸசே நத்தி², ரூபாவசரப்³ரஹ்மலோகே நிப்³ப³த்திஸ்ஸாமி. ஏவம் மே அபண்ணகோ த⁴ம்மோ அபண்ணகோவ அவிரத்³தோ⁴வ ப⁴விஸ்ஸதீ’’தி ததா² படிபஜ்ஜதி. தக்கீ பன அப்படிலத்³த⁴ஜ்ஜா²னோ, தஸ்ஸாபி ரூபஜ்ஜா²னே கங்கா² நத்தி², அரூபலோகே பன அத்தி². ஸோ – ‘‘அஹம் ஆருப்பா அத்தீ²தி வத³ந்தானம்பி நத்தீ²தி வத³ந்தானம்பி ஸுணாமி, அத்தி² நத்தீ²தி பன ந ஜானாமி. கஸிணபரிகம்மம் கத்வா சதுத்த²ஜ்ஜா²னம் நிப்³ப³த்தேத்வா தம் பத³ட்டா²னம் கத்வா அரூபாவசரஜ்ஜா²னம் நிப்³ப³த்தேஸ்ஸாமி. ஸசே ஆருப்பா அத்தி², தத்த² நிப்³ப³த்திஸ்ஸாமி. ஸசே நத்தி², ரூபாவசரப்³ரஹ்மலோகே நிப்³ப³த்திஸ்ஸாமி. ஏவம் மே அபண்ணகோ த⁴ம்மோ அபண்ணகோவ அவிரத்³தோ⁴வ ப⁴விஸ்ஸதீ’’தி ததா² படிபஜ்ஜதி.

104. ப⁴வனிரோதோ⁴தி நிப்³பா³னம். ஸாராகா³ய ஸந்திகேதி ராக³வஸேன வட்டே ரஜ்ஜனஸ்ஸ ஸந்திகே. ஸம்யோகா³யாதி தண்ஹாவஸேன ஸம்யோஜனத்தா²ய. அபி⁴னந்த³னாயாதி தண்ஹாதி³ட்டி²வஸேன அபி⁴னந்த³னாய. படிபன்னோ ஹோதீதி அயம்பி லாபீ⁴ வா ஹோதி தக்கீ வா. லாபீ⁴ நாம அட்ட²ஸமாபத்திலாபீ⁴. தஸ்ஸ ஆருப்பே கங்கா² நத்தி², நிப்³பா³னே அத்தி². ஸோ – ‘‘அஹம் நிரோதோ⁴ அத்தீ²திபி நத்தீ²திபி ஸுணாமி, ஸயம் ந ஜானாமி. ஸமாபத்திம் பாத³கம் கத்வா விபஸ்ஸனம் வட்³டே⁴ஸ்ஸாமி. ஸசே நிரோதோ⁴ ப⁴விஸ்ஸதி, அரஹத்தம் பத்வா பரினிப்³பா³யிஸ்ஸாமி. நோ சே ப⁴விஸ்ஸதி, ஆருப்பே நிப்³ப³த்திஸ்ஸாமீ’’தி ஏவம் படிபஜ்ஜதி. தக்கீ பன ஏகஸமாபத்தியாபி ந லாபீ⁴, ஆருப்பே பனஸ்ஸ கங்கா² நத்தி², ப⁴வனிரோதே⁴ அத்தி². ஸோ – ‘‘அஹம் நிரோதோ⁴ அத்தீ²திபி நத்தீ²திபி ஸுணாமி, ஸயம் ந ஜானாமி, கஸிணபரிகம்மம் கத்வா அட்ட²ஸமாபத்தியோ நிப்³ப³த்தேத்வா ஸமாபத்திபத³ட்டா²னம் விபஸ்ஸனம் வட்³டே⁴ஸ்ஸாமி. ஸசே நிரோதோ⁴ ப⁴விஸ்ஸதி, அரஹத்தம் பத்வா பரினிப்³பா³யிஸ்ஸாமி. நோ சே ப⁴விஸ்ஸதி, ஆருப்பே நிப்³ப³த்திஸ்ஸாமீ’’தி ஏவம் படிபஜ்ஜதி. ஏத்தா²ஹ – ‘‘அத்தி² தி³ன்னந்திஆதீ³னி தாவ அபண்ணகானி ப⁴வந்து, நத்தி² தி³ன்னந்திஆதீ³னி பன கத²ம் அபண்ணகானீ’’தி. க³ஹணவஸேன. தானி ஹி அபண்ணகம் அபண்ணகந்தி ஏவம் க³ஹிதத்தா அபண்ணகானி நாம ஜாதானி.

105. சத்தாரோமேதி அயம் பாடிஏக்கோ அனுஸந்தி⁴. நத்தி²கவாதோ³, அஹேதுகவாதோ³ அகிரியவாதோ³, ஆருப்பா நத்தி² நிரோதோ⁴ நத்தீ²தி ஏவம்வாதி³னோ ச த்³வேதி இமே பஞ்ச புக்³க³லா ஹேட்டா² தயோ புக்³க³லாவ ஹோந்தி. அத்தி²கவாதா³த³யோ பஞ்ச ஏகோ சதுத்த²புக்³க³லோவ ஹோதி. ஏதமத்த²ம் த³ஸ்ஸேதும் ப⁴க³வா இமம் தே³ஸனம் ஆரபி⁴. தத்த² ஸப்³ப³ம் அத்த²தோ உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

அபண்ணகஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.