1. கந்த³ரகஸுத்தவண்ணனா

1. ஏவம் மே ஸுதந்தி கந்த³ரகஸுத்தம். தத்த² சம்பாயந்தி ஏவம்னாமகே நக³ரே. தஸ்ஸ ஹி நக³ரஸ்ஸ ஆராமபோக்க²ரணீஆதீ³ஸு தேஸு தேஸு டா²னேஸு சம்பகருக்கா²வ உஸ்ஸன்னா அஹேஸும், தஸ்மா சம்பாதி ஸங்க²மக³மாஸி. க³க்³க³ராய போக்க²ரணியா தீரேதி தஸ்ஸ சம்பானக³ரஸ்ஸ அவிதூ³ரே க³க்³க³ராய நாம ராஜமஹேஸியா க²ணிதத்தா க³க்³க³ராதி லத்³த⁴வோஹாரா போக்க²ரணீ அத்தி². தஸ்ஸா தீரே ஸமந்ததோ நீலாதி³பஞ்சவண்ணகுஸுமபடிமண்டி³தம் மஹந்தம் சம்பகவனம். தஸ்மிம் ப⁴க³வா குஸுமக³ந்த⁴ஸுக³ந்தே⁴ சம்பகவனே விஹரதி. தம் ஸந்தா⁴ய ‘‘க³க்³க³ராய போக்க²ரணியா தீரே’’தி வுத்தம். மஹதா பி⁴க்கு²ஸங்கே⁴ன ஸத்³தி⁴ந்தி அத³ஸ்ஸிதபரிச்சே²தே³ன மஹந்தேன பி⁴க்கு²ஸங்கே⁴ன ஸத்³தி⁴ம். பேஸ்ஸோதி தஸ்ஸ நாமம். ஹத்தா²ரோஹபுத்தோதி ஹத்தா²சரியஸ்ஸ புத்தோ. கந்த³ரகோ ச பரிப்³பா³ஜகோதி கந்த³ரகோதி ஏவம்னாமோ ச²ன்னபரிப்³பா³ஜகோ. அபி⁴வாதே³த்வாதி ச²ப்³ப³ண்ணானம் க⁴னபு³த்³த⁴ரஸ்மீனம் அந்தரம் பவிஸித்வா பஸன்னலாகா²ரஸே நிமுஜ்ஜமானோ விய, ஸிங்கீ³ஸுவண்ணவண்ணம் து³ஸ்ஸவரம் பஸாரேத்வா ஸஸீஸம் பாருபமானோ விய, வண்ணக³ந்த⁴ஸம்பன்னசம்பகபுப்பா²னி ஸிரஸா ஸம்படிச்ச²ந்தோ விய, ஸினேருபாத³ம் உபக³ச்ச²ந்தோ புண்ணசந்தோ³ விய ப⁴க³வதோ சக்கலக்க²ணபடிமண்டி³தே அலத்தகவண்ணபு²ல்லபது³மஸஸ்ஸிரிகே பாதே³ வந்தி³த்வாதி அத்தோ². ஏகமந்தம் நிஸீதீ³தி ச²னிஸஜ்ஜதோ³ஸவிரஹிதே ஏகஸ்மிம் ஓகாஸே நிஸீதி³.

துண்ஹீபூ⁴ தம் துண்ஹீபூ⁴தந்தி யதோ யதோ அனுவிலோகேதி, ததோ ததோ துண்ஹீபூ⁴தமேவாதி அத்தோ². தத்த² ஹி ஏகபி⁴க்கு²ஸ்ஸாபி ஹத்த²குக்குச்சம் வா பாத³குக்குச்சம் வா நத்தி², ஸப்³பே³ ப⁴க³வதோ சேவ கா³ரவேன அத்தனோ ச ஸிக்கி²தஸிக்க²தாய அஞ்ஞமஞ்ஞம் விக³தஸல்லாபா அந்தமஸோ உக்காஸிதஸத்³த³ம்பி அகரோந்தா ஸுனிகா²தஇந்த³கீ²லா விய நிவாதட்டா²னே ஸன்னிஸின்னம் மஹாஸமுத்³த³உத³கம் விய காயேனபி நிச்சலா மனஸாபி அவிக்கி²த்தா ரத்தவலாஹகா விய ஸினேருகூடம் ப⁴க³வந்தம் பரிவாரேத்வா நிஸீதி³ம்ஸு. பரிப்³பா³ஜகஸ்ஸ ஏவம் ஸன்னிஸின்னம் பரிஸம் தி³ஸ்வா மஹந்தம் பீதிஸோமனஸ்ஸம் உப்பஜ்ஜி. உப்பன்னம் பன அந்தோஹத³யஸ்மிம்யேவ ஸன்னித³ஹிதும் அஸக்கோந்தோ பியஸமுதா³ஹாரம் ஸமுட்டா²பேஸி. தஸ்மா அச்ச²ரியம் போ⁴திஆதி³மாஹ.

தத்த² அந்த⁴ஸ்ஸ பப்³ப³தாரோஹனம் விய நிச்சம் ந ஹோதீதி அச்ச²ரியம். அயம் தாவ ஸத்³த³னயோ. அயம் பன அட்ட²கதா²னயோ, அச்ச²ராயோக்³க³ந்தி அச்ச²ரியம். அச்ச²ரம் பஹரிதும் யுத்தந்தி அத்தோ². அபூ⁴தபுப்³ப³ம் பூ⁴தந்தி அப்³பு⁴தம். உப⁴யம்பேதம் விம்ஹயஸ்ஸேவாதி⁴வசனம். தம் பனேதம் க³ரஹஅச்ச²ரியம், பஸம்ஸாஅச்ச²ரியந்தி து³வித⁴ம் ஹோதி. தத்த² அச்ச²ரியம் மோக்³க³ல்லான அப்³பு⁴தம் மோக்³க³ல்லான, யாவ பா³ஹாக³ஹணாபி நாம ஸோ மோக⁴புரிஸோ ஆக³மேஸ்ஸதீதி (சூளவ. 383; அ. நி. 8.20), இத³ம் க³ரஹஅச்ச²ரியம் நாம. ‘‘அச்ச²ரியம் நந்த³மாதே அப்³பு⁴தம் நந்த³மாதே, யத்ர ஹி நாம சித்துப்பாத³ம்பி பரிஸோதே⁴ஸ்ஸஸீதி (அ. நி. 7.53) இத³ம் பஸம்ஸாஅச்ச²ரியம் நாம. இதா⁴பி இத³மேவ அதி⁴ப்பேதம்’’ அயஞ்ஹி தம் பஸம்ஸந்தோ ஏவமாஹ.

யாவஞ்சித³ந்தி ஏத்த² இத³ந்தி நிபாதமத்தம். யாவாதி பமாணபரிச்சே²தோ³, யாவ ஸம்மா படிபாதி³தோ, யத்தகேன பமாணேன ஸம்மா படிபாதி³தோ, ந ஸக்கா தஸ்ஸ வண்ணே வத்தும், அத² கோ² அச்ச²ரியமேவேதம் அப்³பு⁴தமேவேதந்தி வுத்தம் ஹோதி. ஏதபரமம்யேவாதி ஏவம் ஸம்மா படிபாதி³தோ ஏஸோ பி⁴க்கு²ஸங்கோ⁴ தஸ்ஸாபி பி⁴க்கு²ஸங்க⁴ஸ்ஸ பரமோதி ஏதபரமோ, தம் ஏதபரமம் யதா² அயம் படிபாதி³தோ, ஏவம் படிபாதி³தம் கத்வா படிபாதே³ஸும், ந இதோ பி⁴ய்யோதி அத்தோ². து³தியனயே ஏவம் படிபாதே³ஸ்ஸந்தி, ந இதோ பி⁴ய்யோதி யோஜேதப்³ப³ம். தத்த² படிபாதி³தோதி ஆபி⁴ஸமாசாரிகவத்தம் ஆதி³ம் கத்வா ஸம்மா அபச்சனீகபடிபத்தியம் யோஜிதோ. அத² கஸ்மா அயம் பரிப்³பா³ஜகோ அதீதானாக³தே பு³த்³தே⁴ த³ஸ்ஸேதி, கிமஸ்ஸ தியத்³த⁴ஜானனஞாணம் அத்தீ²தி. நத்தி², நயக்³கா³ஹே பன ட²த்வா ‘‘யேனாகாரேன அயம் பி⁴க்கு²ஸங்கோ⁴ ஸன்னிஸின்னோ த³ந்தோ வினீதோ உபஸந்தோ, அதீதபு³த்³தா⁴பி ஏதபரமம்யேவ கத்வா படிபஜ்ஜாபேஸும், அனாக³தபு³த்³தா⁴பி படிபஜ்ஜாபேஸ்ஸந்தி, நத்தி² இதோ உத்தரி படிபாத³னா’’தி மஞ்ஞமானோ அனுபு³த்³தி⁴யா ஏவமாஹ.

2. ஏவமேதம் கந்த³ரகாதி பாடிஏக்கோ அனுஸந்தி⁴. ப⁴க³வா கிர தம் ஸுத்வா ‘‘கந்த³ரக த்வம் பி⁴க்கு²ஸங்க⁴ம் உபஸந்தோதி வத³ஸி, இமஸ்ஸ பன பி⁴க்கு²ஸங்க⁴ஸ்ஸ உபஸந்தகாரணம் துய்ஹம் அபாகடம், ந ஹி த்வம் ஸமதிம்ஸ பாரமியா பூரேத்வா குஸலமூலம் பரிபாசேத்வா போ³தி⁴பல்லங்கே ஸப்³ப³ஞ்ஞுதஞ்ஞாணம் படிவிஜ்ஜி², மயா பன பாரமியோ பூரேத்வா ஞாதத்த²சரியம் லோகத்த²சரியம் பு³த்³த⁴த்த²சரியஞ்ச கோடிம் பாபேத்வா போ³தி⁴பல்லங்கே ஸப்³ப³ஞ்ஞுதஞ்ஞாணம் படிவித்³த⁴ம், மய்ஹம் ஏதேஸம் உபஸந்தகாரணம் பாகட’’ந்தி த³ஸ்ஸேதும் இமம் தே³ஸனம் ஆரபி⁴.

ஸந்தி ஹி கந்த³ரகாதி அயம்பி பாடிஏக்கோ அனுஸந்தி⁴. ப⁴க³வதோ கிர ஏதத³ஹோஸி – ‘‘அயம் பரிப்³பா³ஜகோ இமம் பி⁴க்கு²ஸங்க⁴ம் உபஸந்தோதி வத³தி, அயஞ்ச பி⁴க்கு²ஸங்கோ⁴ கப்பேத்வா பகப்பேத்வா குஹகபா⁴வேன இரியாபத²ம் ஸண்ட²பேந்தோ சித்தேன அனுபஸந்தோ ந உபஸந்தாகாரம் த³ஸ்ஸேதி. ஏத்த² பன பி⁴க்கு²ஸங்கே⁴ படிபத³ம் பூரயமானாபி படிபத³ம் பூரேத்வா மத்த²கம் பத்வா டி²தபி⁴க்கூ²பி அத்தி², தத்த² படிபத³ம் பூரேத்வா மத்த²கம் பத்தா அத்தனா படிவித்³த⁴கு³ணேஹேவ உபஸந்தா, படிபத³ம் பூரயமானா உபரிமக்³க³ஸ்ஸ விபஸ்ஸனாய உபஸந்தா, இதோ முத்தா பன அவஸேஸா சதூஹி ஸதிபட்டா²னேஹி உபஸந்தா. தம் நேஸம் உபஸந்தகாரணம் த³ஸ்ஸேஸ்ஸாமீ’’தி ‘‘இமினா ச இமினா ச காரணேன அயம் பி⁴க்கு²ஸங்கோ⁴ உபஸந்தோ’’தி த³ஸ்ஸேதும் ‘‘ஸந்தி ஹி கந்த³ரகா’’திஆதி³மாஹ.

தத்த² அரஹந்தோ கீ²ணாஸவாதிஆதீ³ஸு யம் வத்தப்³ப³ம், தம் மூலபரியாயஸுத்தவண்ணனாயமேவ வுத்தம். ஸேக²படிபத³ம்பி தத்தே²வ வித்தா²ரிதம். ஸந்ததஸீலாதி ஸததஸீலா நிரந்தரஸீலா. ஸந்ததவுத்தினோதி தஸ்ஸேவ வேவசனம், ஸந்ததஜீவிகா வாதிபி அத்தோ². தஸ்மிம் ஸந்ததஸீலே ட²த்வாவ ஜீவிகம் கப்பேந்தி, ந து³ஸ்ஸீல்யம் மரணம் பாபுணந்தீதி அத்தோ².

நிபகாதி நேபக்கேன ஸமன்னாக³தா பஞ்ஞவந்தோ. நிபகவுத்தினோதி பஞ்ஞாய வுத்தினோ, பஞ்ஞாய ட²த்வா ஜீவிகம் கப்பேந்தி. யதா² ஏகச்சோ ஸாஸனே பப்³ப³ஜித்வாபி ஜீவிதகாரணா ச²ஸு அகோ³சரேஸு சரதி, வேஸியாகோ³சரோ ஹோதி, வித⁴வது²ல்லகுமாரிகபண்ட³கபானாகா³ரபி⁴க்கு²னிகோ³சரோ ஹோதி. ஸம்ஸட்டோ² விஹரதி ராஜூஹி ராஜமஹாமத்தேஹி தித்தி²யேஹி தித்தி²யஸாவகேஹி அனனுலோமிகேன கி³ஹிஸம்ஸக்³கே³ன (விப⁴. 514), வேஜ்ஜகம்மம் கரோதி, தூ³தகம்மம் கரோதி, பஹிணகம்மம் கரோதி, க³ண்ட³ம் பா²லேதி, அருமக்க²னம் தே³தி, உத்³த⁴ம்விரேசனம் தே³தி, அதோ⁴விரேசனம் தே³தி, நத்து²தேலம் பசதி, பிவனதேலம் பசதி, வேளுதா³னம், பத்ததா³னம், புப்ப²தா³னம், ப²லதா³னம், ஸினானதா³னம், த³ந்தகட்ட²தா³னம், முகோ²த³கதா³னம், சுண்ணமத்திகதா³னம் தே³தி, சாடுகம்யம் கரோதி, முக்³க³ஸூபியம், பாரிப⁴டும், ஜங்க⁴பேஸனியம் கரோதீதி ஏகவீஸதிவிதா⁴ய அனேஸனாய ஜீவிகம் கப்பேந்தோ அனிபகவுத்தி நாம ஹோதி, ந பஞ்ஞாய ட²த்வா ஜீவிகம் கப்பேதி, ததோ காலகிரியம் கத்வா ஸமணயக்கோ² நாம ஹுத்வா ‘‘தஸ்ஸ ஸங்கா⁴டிபி ஆதி³த்தா ஹோதி ஸம்பஜ்ஜலிதா’’தி வுத்தனயேன மஹாது³க்க²ம் அனுபோ⁴தி. ஏவம்விதா⁴ அஹுத்வா ஜீவிதஹேதுபி ஸிக்கா²பத³ம் அனதிக்கமந்தோ சதுபாரிஸுத்³தி⁴ஸீலே பதிட்டா²ய யதா²ப³லம் பு³த்³த⁴வசனம் உக்³க³ண்ஹித்வா ரத²வினீதபடிபத³ம், மஹாகோ³ஸிங்க³படிபத³ம், மஹாஸுஞ்ஞதபடிபத³ம், அனங்க³ணபடிபத³ம், த⁴ம்மதா³யாத³படிபத³ம், நாலகபடிபத³ம், துவட்டகபடிபத³ம், சந்தோ³பமபடிபத³ந்தி இமானி அரியபடிபதா³னி பூரேந்தோ சதுபச்சய-ஸந்தோஸ-பா⁴வனாராம-அரியவம்ஸபடிபத்தியம் காயஸக்கி²னோ ஹுத்வா அனீகா நிக்க²ந்தஹத்தீ² விய யூதா² விஸ்ஸட்ட²ஸீஹோ விய நிபச்சா²ப³ந்த⁴மஹானாவா விய ச க³மனாதீ³ஸு ஏகவிஹாரினோ விபஸ்ஸனம் பட்ட²பேத்வா அஜ்ஜஅஜ்ஜேவ அரஹத்தந்தி பவத்தஉஸ்ஸாஹா விஹரந்தீதி அத்தோ².

ஸுப்பதிட்டி²தசித்தாதி சதூஸு ஸதிபட்டா²னேஸு ஸுட்ட²பிதசித்தா ஹுத்வா. ஸேஸா ஸதிபட்டா²னகதா² ஹேட்டா² வித்தா²ரிதாவ. இத⁴ பன லோகியலோகுத்தரமிஸ்ஸகா ஸதிபட்டா²னா கதி²தா, ஏத்தகேன பி⁴க்கு²ஸங்க⁴ஸ்ஸ உபஸந்தகாரணம் கதி²தம் ஹோதி.

3. யாவ ஸுபஞ்ஞத்தாதி யாவ ஸுட்ட²பிதா ஸுதே³ஸிதா. மயம்பி ஹி, ப⁴ந்தேதி இமினா ஏஸ அத்தனோ காரகபா⁴வம் த³ஸ்ஸேதி, பி⁴க்கு²ஸங்க⁴ஞ்ச உக்கி²பதி. அயஞ்ஹேத்த² அதி⁴ப்பாயோ, மயம்பி ஹி, ப⁴ந்தே, கி³ஹி…பே… ஸுப்பதிட்டி²தசித்தா விஹராம, பி⁴க்கு²ஸங்க⁴ஸ்ஸ பன அயமேவ கஸி ச பீ³ஜஞ்ச யுக³னங்க³லஞ்ச பா²லபாசனஞ்ச, தஸ்மா பி⁴க்கு²ஸங்கோ⁴ ஸப்³ப³காலம் ஸதிபட்டா²னபராயணோ, மயம் பன காலேன காலம் ஓகாஸம் லபி⁴த்வா ஏதம் மனஸிகாரம் கரோம, மயம்பி காரகா, ந ஸப்³ப³ஸோ விஸ்ஸட்ட²கம்மட்டா²னாயேவாதி. மனுஸ்ஸக³ஹனேதி மனுஸ்ஸானம் அஜ்ஜா²ஸயக³ஹனேன க³ஹனதா, அஜ்ஜா²ஸயஸ்ஸாபி நேஸம் கிலேஸக³ஹனேன க³ஹனதா வேதி³தப்³பா³. கஸடஸாடே²ய்யேஸுபி ஏஸேவ நயோ. தத்த² அபரிஸுத்³த⁴ட்டே²ன கஸடதா, கேராடியட்டே²ன ஸாடே²ய்யதா வேதி³தப்³பா³. ஸத்தானம் ஹிதாஹிதம் ஜானாதீதி ஏவம் க³ஹனகஸடகேராடியானம் மனுஸ்ஸானம் ஹிதாஹிதபடிபத³ம் யாவ ஸுட்டு² ப⁴க³வா ஜானாதி. யதி³த³ம் பஸவோதி ஏத்த² ஸப்³பா³பி சதுப்பத³ஜாதி பஸவோதி அதி⁴ப்பேதா. பஹோமீதி ஸக்கோமி. யாவதகேன அந்தரேனாதி யத்தகேன க²ணேன. சம்பம் க³தாக³தம் கரிஸ்ஸதீதி அஸ்ஸமண்ட³லதோ யாவ சம்பானக³ரத்³வாரா க³மனஞ்ச ஆக³மனஞ்ச கரிஸ்ஸதி. ஸாடே²ய்யானீதி ஸட²த்தானி. கூடேய்யானீதி கூடத்தானி. வங்கேய்யானீதி வங்கத்தானி. ஜிம்ஹேய்யானீதி ஜிம்ஹத்தானி. பாதுகரிஸ்ஸதீதி பகாஸேஸ்ஸதி த³ஸ்ஸேஸ்ஸதி. ந ஹி ஸக்கா தேன தானி ஏத்தகேன அந்தரேன த³ஸ்ஸேதும்.

தத்த² யஸ்ஸ கிஸ்மிஞ்சிதே³வ டா²னே டா²துகாமஸ்ஸ ஸதோ யம் டா²னம் மனுஸ்ஸானம் ஸப்படிப⁴யம், புரதோ க³ந்த்வா வஞ்சேத்வா ட²ஸ்ஸாமீதி ந ஹோதி, தஸ்மிம் டா²துகாமட்டா²னேயேவ நிகா²தத்த²ம்போ⁴ விய சத்தாரோ பாதே³ நிச்சலே கத்வா திட்ட²தி, அயம் ஸடோ² நாம. யஸ்ஸ பன கிஸ்மிஞ்சிதே³வ டா²னே அவச்சி²ந்தி³த்வா க²ந்த⁴க³தம் பாதேதுகாமஸ்ஸ ஸதோ யம் டா²னம் மனுஸ்ஸானம் ஸப்படிப⁴யம், புரதோ க³ந்த்வா வஞ்சேத்வா பாதேஸ்ஸாமீதி ந ஹோதி, தத்தே²வ அவச்சி²ந்தி³த்வா பாதேதி, அயம் கூடோ நாம. யஸ்ஸ கிஸ்மிஞ்சிதே³வ டா²னே மக்³கா³ உக்கம்ம நிவத்தித்வா படிமக்³க³ம் ஆரோஹிதுகாமஸ்ஸ ஸதோ யம் டா²னம் மனுஸ்ஸானம் ஸப்படிப⁴யம், புரதோ க³ந்த்வா வஞ்சேத்வா ஏவம் கரிஸ்ஸாமீதி ந ஹோதி, தத்தே²வ மக்³கா³ உக்கம்ம நிவத்தித்வா படிமக்³க³ம் ஆரோஹதி, அயம் வங்கோ நாம. யஸ்ஸ பன காலேன வாமதோ காலேன த³க்கி²ணதோ காலேன உஜுமக்³கே³னேவ க³ந்துகாமஸ்ஸ ஸதோ யம் டா²னம் மனுஸ்ஸானம் ஸப்படிப⁴யம், புரதோ க³ந்த்வா வஞ்சேத்வா ஏவம் கரிஸ்ஸாமீதி ந ஹோதி, தத்தே²வ காலேன வாமதோ காலேன த³க்கி²ணதோ காலேன உஜுமக்³க³ம் க³ச்ச²தி, ததா² லண்ட³ம் வா பஸ்ஸாவம் வா விஸ்ஸஜ்ஜேதுகாமஸ்ஸ ஸதோ இத³ம் டா²னம் ஸுஸம்மட்ட²ம் ஆகிண்ணமனுஸ்ஸம் ரமணீயம், இமஸ்மிம் டா²னே ஏவரூபம் காதும் ந யுத்தம், புரதோ க³ந்த்வா படிச்ச²ன்னடா²னே கரிஸ்ஸாமீதி ந ஹோதி, தத்தே²வ கரோதி, அயம் ஜிம்ஹோ நாம. இதி இமம் சதுப்³பி³த⁴ம்பி கிரியம் ஸந்தா⁴யேதம் வுத்தம். ஸப்³பா³னி தானி ஸாடே²ய்யானி கூடேய்யானி வங்கேய்யானி ஜிம்ஹேய்யானி பாதுகரிஸ்ஸதீதி ஏவம் கரோந்தாபி தே ஸடா²த³யோ தானி ஸாடே²ய்யாதீ³னி பாதுகரோந்தி நாம.

ஏவம் பஸூனம் உத்தானபா⁴வம் த³ஸ்ஸேத்வா இதா³னி மனுஸ்ஸானம் க³ஹனபா⁴வம் த³ஸ்ஸேந்தோ அம்ஹாகம் பன, ப⁴ந்தேதிஆதி³மாஹ. தத்த² தா³ஸாதி அந்தோஜாதகா வா த⁴னக்கீதா வா கரமரானீதா வா ஸயம் வா தா³ஸப்³யம் உபக³தா. பேஸ்ஸாதி பேஸனகாரகா. கம்மகராதி ப⁴த்தவேதனப⁴தா. அஞ்ஞதா²வ காயேனாதி அஞ்ஞேனேவாகாரேன காயேன ஸமுதா³சரந்தி, அஞ்ஞேனேவாகாரேன வாசாய, அஞ்ஞேன ச நேஸம் ஆகாரேன சித்தம் டி²தம் ஹோதீதி த³ஸ்ஸேதி. தத்த² யே ஸம்முகா² ஸாமிகே தி³ஸ்வா பச்சுக்³க³மனம் கரோந்தி, ஹத்த²தோ ப⁴ண்ட³கம் க³ண்ஹந்தி, இமம் விஸ்ஸஜ்ஜேத்வா இமம் க³ண்ஹந்தா ஸேஸானிபி ஆஸன-பஞ்ஞாபன-தாலவண்டபீ³ஜன-பாத³தோ⁴வனாதீ³னி ஸப்³பா³னி கிச்சானி கரோந்தி, பரம்முக²காலே பன தேலம்பி உத்தரந்தம் ந ஓலோகேந்தி, ஸதக்³க⁴னகேபி ஸஹஸ்ஸக்³க⁴னகேபி கம்மே பரிஹாயந்தே நிவத்தித்வா ஓலோகேதும்பி ந இச்ச²ந்தி, இமே அஞ்ஞதா² காயேன ஸமுதா³சரந்தி நாம. யே பன ஸம்முகா² ‘‘அம்ஹாகம் ஸாமி அம்ஹாகம் அய்யோ’’திஆதீ³னி வத்வா பஸம்ஸந்தி, பரம்முகா² அவத்தப்³ப³ம் நாம நத்தி², யம் இச்ச²ந்தி, தம் வத³ந்தி, இமே அஞ்ஞதா² வாசாய ஸமுதா³சரந்தி நாம.

4. சத்தாரோமே பேஸ்ஸபுக்³க³லாதி அயம்பி பாடிஏக்கோ அனுஸந்தி⁴. அயஞ்ஹி பேஸ்ஸோ ‘‘யாவஞ்சித³ம், ப⁴ந்தே, ப⁴க³வா ஏவம் மனுஸ்ஸக³ஹணே ஏவம் மனுஸ்ஸகஸடே ஏவம் மனுஸ்ஸஸாடே²ய்யே வத்தமானே ஸத்தானம் ஹிதாஹிதம் ஜானாதீ’’தி ஆஹ. புரிமே ச தயோ புக்³க³லா அஹிதபடிபத³ம் படிபன்னா, உபரி சதுத்தோ² ஹிதபடிபத³ம், ஏவமஹம் ஸத்தானம் ஹிதாஹிதம் ஜானாமீதி த³ஸ்ஸேதும் இமம் தே³ஸனம் ஆரபி⁴. ஹேட்டா² கந்த³ரகஸ்ஸ கதா²ய ஸத்³தி⁴ம் யோஜேதும்பி வட்டதி. தேன வுத்தம் ‘‘யாவஞ்சித³ம் போ⁴தா கோ³தமேன ஸம்மா பி⁴க்கு²ஸங்கோ⁴ படிபாதி³தோ’’தி. அத²ஸ்ஸ ப⁴க³வா ‘‘புரிமே தயோ புக்³க³லே பஹாய உபரி சதுத்த²புக்³க³லஸ்ஸ ஹிதபடிபத்தியம்யேவ படிபாதே³மீ’’தி த³ஸ்ஸேந்தோபி இமம் தே³ஸனம் ஆரபி⁴. ஸந்தோதி இத³ம் ஸம்விஜ்ஜமானாதி பத³ஸ்ஸேவ வேவசனம். ‘‘ஸந்தா ஹோந்தி ஸமிதா வூபஸந்தா’’தி (விப⁴. 542) ஏத்த² ஹி நிருத்³தா⁴ ஸந்தாதி வுத்தா. ‘‘ஸந்தா ஏதே விஹாரா அரியஸ்ஸ வினயே வுச்சந்தீ’’தி ஏத்த² (ம. நி. 1.82) நிப்³பு³தா. ‘‘ஸந்தோ ஹவே ஸப்³பி⁴ பவேத³யந்தீ’’தி ஏத்த² (ஜா. 2.21.413) பண்டி³தா. இத⁴ பன விஜ்ஜமானா உபலப்³ப⁴மானாதி அத்தோ².

அத்தந்தபாதீ³ஸு அத்தானம் தபதி து³க்கா²பேதீதி அத்தந்தபோ. அத்தனோ பரிதாபனானுயோக³ம் அத்தபரிதாபனானுயோக³ம். பரம் தபதி து³க்கா²பேதீதி பரந்தபோ. பரேஸம் பரிதாபனானுயோக³ம் பரபரிதாபனானுயோக³ம். தி³ட்டே²வ த⁴ம்மேதி இமஸ்மிம்யேவ அத்தபா⁴வே. நிச்சா²தோதி சா²தம் வுச்சதி தண்ஹா, ஸா அஸ்ஸ நத்தீ²தி நிச்சா²தோ. ஸப்³ப³கிலேஸானம் நிப்³பு³தத்தா நிப்³பு³தோ. அந்தோ தாபனகிலேஸானம் அபா⁴வா ஸீதலோ ஜாதோதி ஸீதிபூ⁴தோ. ஜா²னமக்³க³ப²லனிப்³பா³னஸுகா²னி படிஸம்வேதே³தீதி ஸுக²படிஸம்வேதீ³. ப்³ரஹ்மபூ⁴தேன அத்தனாதி ஸேட்ட²பூ⁴தேன அத்தனா. சித்தம் ஆராதே⁴தீதி சித்தம் ஸம்பாதே³தி, பரிபூரேதி க³ண்ஹாதி பஸாதே³தீதி அத்தோ².

5. து³க்க²படிக்கூலந்தி து³க்க²ஸ்ஸ படிகூலம், பச்சனீகஸண்டி²தம் து³க்க²ம் அபத்த²யமானந்தி அத்தோ².

6. பண்டி³தோதி இத⁴ சதூஹி காரணேஹி பண்டி³தோதி ந வத்தப்³போ³, ஸதிபட்டா²னேஸு பன கம்மம் கரோதீதி பண்டி³தோதி வத்தும் வட்டதி. மஹாபஞ்ஞோதி இத³ம்பி மஹந்தே அத்தே² பரிக்³க³ண்ஹாதீதிஆதி³னா மஹாபஞ்ஞலக்க²ணேன ந வத்தப்³ப³ம், ஸதிபட்டா²னபரிக்³கா³ஹிகாய பன பஞ்ஞாய ஸமன்னாக³தத்தா மஹாபஞ்ஞோதி வத்தும் வட்டதி. மஹதா அத்தே²ன ஸம்யுத்தோ அக³மிஸ்ஸாதி மஹதா அத்தே²ன ஸம்யுத்தோ ஹுத்வா க³தோ ப⁴வேய்ய, ஸோதாபத்திப²லம் பாபுணேய்யாதி அத்தோ². கிம் பன யேஸம் மக்³க³ப²லானம் உபனிஸ்ஸயோ அத்தி², பு³த்³தா⁴னம் ஸம்முகீ²பா⁴வே டி²தேபி தேஸம் அந்தராயோ ஹோதீதி. ஆம ஹோதி, ந பன பு³த்³தே⁴ படிச்ச, அத² கோ² கிரியபரிஹானியா வா பாபமித்ததாய வா ஹோதி. தத்த² கிரியபரிஹானியா ஹோதி நாம – ஸசே ஹி த⁴ம்மஸேனாபதி த⁴னஞ்ஜானிஸ்ஸ ப்³ராஹ்மணஸ்ஸ ஆஸயம் ஞத்வா த⁴ம்மம் அதே³ஸயிஸ்ஸா, ஸோ ப்³ராஹ்மணோ ஸோதாபன்னோ அப⁴விஸ்ஸா, ஏவம் தாவ கிரியபரிஹானியா ஹோதி. பாபமித்ததாய ஹோதி நாம – ஸசே ஹி அஜாதஸத்து தே³வத³த்தஸ்ஸ வசனம் க³ஹேத்வா பிதுகா⁴தகம்மம் நாகரிஸ்ஸா, ஸாமஞ்ஞப²லஸுத்தகதி²ததி³வஸேவ ஸோதாபன்னோ அப⁴விஸ்ஸா, தஸ்ஸ வசனம் க³ஹேத்வா பிதுகா⁴தகம்மஸ்ஸ கதத்தா பன ந ஹோதி, ஏவம் பாபமித்ததாய ஹோதி. இமஸ்ஸாபி உபாஸகஸ்ஸ கிரியபரிஹானி ஜாதா, அபரினிட்டி²தாய தே³ஸனாய உட்ட²ஹித்வா பக்கந்தோ. அபிச, பி⁴க்க²வே, ஏத்தாவதாபி பேஸ்ஸோஹத்தா²ரோஹபுத்தோ மஹதா அத்தே²ன ஸம்யுத்தோதி கதரேன மஹந்தேன அத்தே²ன? த்³வீஹி ஆனிஸம்ஸேஹி. ஸோ கிர உபாஸகோ ஸங்கே⁴ ச பஸாத³ம் படிலபி⁴, ஸதிபட்டா²னபரிக்³க³ஹணத்தா²ய சஸ்ஸ அபி⁴னவோ நயோ உத³பாதி³. தேன வுத்தம் ‘‘மஹதா அத்தே²ன ஸம்யுத்தோ’’தி. கந்த³ரகோ பன ஸங்கே⁴ பஸாத³மேவ படிலபி⁴. ஏதஸ்ஸ ப⁴க³வா காலோதி ஏதஸ்ஸ த⁴ம்மக்கா²னஸ்ஸ, சதுன்னம் வா புக்³க³லானம் விப⁴ஜனஸ்ஸ காலோ.

8. ஓரப்³பி⁴காதீ³ஸு உரப்³பா⁴ வுச்சந்தி ஏளகா, உரப்³பே⁴ ஹனதீதி ஓரப்³பி⁴கோ. ஸூகரிகாதீ³ஸுபி ஏஸேவ நயோ. லுத்³தோ³தி தா³ருணோ கக்க²ளோ. மச்ச²கா⁴தகோதி மச்ச²ப³ந்த⁴கேவட்டோ. ப³ந்த⁴னாகா³ரிகோதி ப³ந்த⁴னாகா³ரகோ³பகோ. குருரகம்மந்தாதி தா³ருணகம்மந்தா.

9. முத்³தா⁴வஸித்தோதி க²த்தியாபி⁴ஸேகேன முத்³த⁴னி அபி⁴ஸித்தோ. புரத்தி²மேன நக³ரஸ்ஸாதி நக³ரதோ புரத்தி²மதி³ஸாய. ஸந்தா²கா³ரந்தி யஞ்ஞஸாலம். க²ராஜினம் நிவாஸேத்வாதி ஸகு²ரம் அஜினசம்மம் நிவாஸேத்வா. ஸப்பிதேலேனாதி ஸப்பினா ச தேலேன ச. ட²பேத்வா ஹி ஸப்பிம் அவஸேஸோ யோ கோசி ஸ்னேஹோ தேலந்தி வுச்சதி. கண்டூ³வமானோதி நகா²னம் சி²ன்னத்தா கண்டூ³விதப்³ப³காலே தேன கண்டூ³வமானோ. அனந்தரஹிதாயாதி அஸந்த²தாய. ஸரூபவச்சா²யாதி ஸதி³ஸவச்சா²ய. ஸசே கா³வீ ஸேதா ஹோதி, வச்சோ²பி ஸேதகோவ. ஸசே கா³வீ கப³ரா வா ரத்தா வா, வச்சோ²பி தாதி³ஸோ வாதி ஏவம் ஸரூபவச்சா²ய. ஸோ ஏவமாஹாதி ஸோ ராஜா ஏவம் வதே³தி. வச்ச²தராதி தருணவச்ச²கபா⁴வம் அதிக்கந்தா ப³லவவச்சா². வச்ச²தரீஸுபி ஏஸேவ நயோ. ப³ரிஹிஸத்தா²யாதி பரிக்கே²பகரணத்தா²ய சேவ யஞ்ஞபூ⁴மியம் அத்த²ரணத்தா²ய ச. ஸேஸம் ஹேட்டா² தத்த² தத்த² வித்தா²ரிதத்தா உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

கந்த³ரகஸுத்தவண்ணனா நிட்டி²தா.