1. சூளகோ³ஸிங்க³ஸுத்தவண்ணனா

325. ஏவம் மே ஸுதந்தி சூளகோ³ஸிங்க³ஸுத்தம். தத்த² நாதிகே விஹரதீதி நாதிகா நாம ஏகம் தளாகம் நிஸ்ஸாய த்³வின்னம் சூளபிதிமஹாபிதிபுத்தானம் த்³வே கா³மா, தேஸு ஏகஸ்மிம் கா³மே. கி³ஞ்ஜகாவஸதே²தி இட்ட²காமயே ஆவஸதே². ஏகஸ்மிம் கிர ஸமயே ப⁴க³வா மஹாஜனஸங்க³ஹம் கரோந்தோ வஜ்ஜிரட்டே² சாரிகம் சரமானோ நாதிகம் அனுப்பத்தோ. நாதிகவாஸினோ மனுஸ்ஸா ப⁴க³வதோ மஹாதா³னம் த³த்வா த⁴ம்மகத²ம் ஸுத்வா பஸன்னஹத³யா, ‘‘ஸத்து² வஸனட்டா²னம் கரிஸ்ஸாமா’’தி மந்தேத்வா இட்ட²காஹேவ பி⁴த்திஸோபானத்த²ம்பே⁴ வாளரூபாதீ³னி த³ஸ்ஸேந்தோ பாஸாத³ம் கத்வா ஸுதா⁴ய லிம்பித்வா மாலாகம்மலதாகம்மாதீ³னி நிட்டா²பேத்வா பு⁴ம்மத்த²ரணமஞ்சபீடா²தீ³னி பஞ்ஞபேத்வா ஸத்து² நிய்யாதேஸும். அபராபரம் பனேத்த² மனுஸ்ஸா பி⁴க்கு²ஸங்க⁴ஸ்ஸ ரத்திட்டா²னதி³வாட்டா²னமண்ட³பசங்கமாதீ³னி காரயிம்ஸு. இதி ஸோ விஹாரோ மஹா அஹோஸி. தம் ஸந்தா⁴ய வுத்தம் ‘‘கி³ஞ்ஜகாவஸதே²’’தி.

கோ³ஸிங்க³ஸாலவனதா³யேதி தத்த² ஏகஸ்ஸ ஜேட்ட²கருக்க²ஸ்ஸ க²ந்த⁴தோ கோ³ஸிங்க³ஸண்டா²னம் ஹுத்வா விடபம் உட்ட²ஹி, தம் ருக்க²ம் உபாதா³ய ஸப்³ப³ம்பி தம் வனம் கோ³ஸிங்க³ஸாலவனந்தி ஸங்க²ம் க³தம். தா³யோதி அவிஸேஸேன அரஞ்ஞஸ்ஸேதம் நாமம். தஸ்மா கோ³ஸிங்க³ஸாலவனதா³யேதி கோ³ஸிங்க³ஸாலவனஅரஞ்ஞேதி அத்தோ². விஹரந்தீதி ஸாமக்³கி³ரஸம் அனுப⁴வமானா விஹரந்தி. இமேஸஞ்ஹி குலபுத்தானம் உபரிபண்ணாஸகே புது²ஜ்ஜனகாலோ கதி²தோ, இத⁴ கீ²ணாஸவகாலோ. ததா³ ஹி தே லத்³த⁴ஸ்ஸாதா³ லத்³த⁴பதிட்டா² அதி⁴க³தபடிஸம்பி⁴தா³ கீ²ணாஸவா ஹுத்வா ஸாமக்³கி³ரஸம் அனுப⁴வமானா தத்த² விஹரிம்ஸு. தம் ஸந்தா⁴யேதம் வுத்தம்.

யேன கோ³ஸிங்க³ஸாலவனதா³யோ தேனுபஸங்கமீதி த⁴ம்மஸேனாபதிமஹாமோக்³க³ல்லானத்தே²ரேஸு வா அஸீதிமஹாஸாவகேஸு வா, அந்தமஸோ த⁴ம்மப⁴ண்டா³கா³ரிகஆனந்த³த்தே²ரம்பி கஞ்சி அனாமந்தேத்வா ஸயமேவ பத்தசீவரம் ஆதா³ய அனீகா நிஸ்ஸடோ ஹத்தீ² விய, யூதா² நிஸ்ஸடோ காளஸீஹோ விய, வாதச்சி²ன்னோ வலாஹகோ விய ஏககோவ உபஸங்கமி. கஸ்மா பனேத்த² ப⁴க³வா ஸயம் அக³மாஸீதி? தயோ குலபுத்தா ஸாமக்³கி³ரஸம் அனுப⁴வந்தா விஹரந்தி, தேஸம் பக்³க³ண்ஹனதோ, பச்சி²மஜனதம் அனுகம்பனதோ த⁴ம்மக³ருபா⁴வதோ ச. ஏவம் கிரஸ்ஸ அஹோஸி – ‘‘அஹம் இமே குலபுத்தே பக்³க³ண்ஹித்வா உக்கம்ஸித்வா படிஸந்தா²ரம் கத்வா த⁴ம்மம் நேஸம் தே³ஸேஸ்ஸாமீ’’தி. ஏவம் தாவ பக்³க³ண்ஹனதோ அக³மாஸி. அபரம்பிஸ்ஸ அஹோஸி – ‘‘அனாக³தே குலபுத்தா ஸம்மாஸம்பு³த்³தோ⁴ ஸமக்³க³வாஸம் வஸந்தானம் ஸந்திகம் ஸயம் க³ந்த்வா படிஸந்தா²ரம் கத்வா த⁴ம்மம் கதே²த்வா தயோ குலபுத்தே பக்³க³ண்ஹி, கோ நாம ஸமக்³க³வாஸம் ந வஸேய்யாதி ஸமக்³க³வாஸம் வஸிதப்³ப³ம் மஞ்ஞமானா கி²ப்பமேவ து³க்க²ஸ்ஸந்தம் கரிஸ்ஸந்தீ’’தி. ஏவம் பச்சி²மஜனதம் அனுகம்பனதோபி அக³மாஸி. பு³த்³தா⁴ ச நாம த⁴ம்மக³ருனோ ஹோந்தி, ஸோ ச நேஸம் த⁴ம்மக³ருபா⁴வோ ரத²வினீதே ஆவிகதோவ. இதி இமஸ்மா த⁴ம்மக³ருபா⁴வதோபி த⁴ம்மம் பக்³க³ண்ஹிஸ்ஸாமீதி அக³மாஸி.

தா³யபாலோதி அரஞ்ஞபாலோ. ஸோ தம் அரஞ்ஞம் யதா² இச்சி²திச்சி²தப்பதே³ஸேன மனுஸ்ஸா பவிஸித்வா தத்த² புப்ப²ம் வா ப²லம் வா நிய்யாஸம் வா த³ப்³ப³ஸம்பா⁴ரம் வா ந ஹரந்தி, ஏவம் வதியா பரிக்கி²த்தஸ்ஸ தஸ்ஸ அரஞ்ஞஸ்ஸ யோஜிதே த்³வாரே நிஸீதி³த்வா தம் அரஞ்ஞம் ரக்க²தி, பாலேதி. தஸ்மா ‘‘தா³யபாலோ’’தி வுத்தோ. அத்தகாமரூபாதி அத்தனோ ஹிதம் காமயமானஸபா⁴வா ஹுத்வா விஹரந்தி. யோ ஹி இமஸ்மிம் ஸாஸனே பப்³ப³ஜித்வாபி வேஜ்ஜகம்மதூ³தகம்மபஹிணக³மனாதீ³னம் வஸேன ஏகவீஸதிஅனேஸனாஹி ஜீவிகம் கப்பேதி, அயம் ந அத்தகாமரூபோ நாம. யோ பன இமஸ்மிம் ஸாஸனே பப்³ப³ஜித்வா ஏகவீஸதிஅனேஸனம் பஹாய சதுபாரிஸுத்³தி⁴ஸீலே பதிட்டா²ய பு³த்³த⁴வசனம் உக்³க³ண்ஹித்வா ஸப்பாயது⁴தங்க³ம் அதி⁴ட்டா²ய அட்ட²திம்ஸாய ஆரம்மணேஸு சித்தருசியம் கம்மட்டா²னம் க³ஹேத்வா கா³மந்தம் பஹாய அரஞ்ஞம் பவிஸித்வா ஸமாபத்தியோ நிப்³ப³த்தேத்வா விபஸ்ஸனாய கம்மம் குருமானோ விஹரதி, அயம் அத்தகாமோ நாம. தேபி தயோ குலபுத்தா ஏவரூபா அஹேஸும். தேன வுத்தம் – ‘‘அத்தகாமரூபா விஹரந்தீ’’தி.

மா தேஸம் அபா²ஸுமகாஸீதி தேஸம் மா அபா²ஸுகம் அகாஸீதி ப⁴க³வந்தம் வாரேஸி. ஏவம் கிரஸ்ஸ அஹோஸி – ‘‘இமே குலபுத்தா ஸமக்³கா³ விஹரந்தி, ஏகச்சஸ்ஸ ச க³தட்டா²னே ப⁴ண்ட³னகலஹவிவாதா³ வத்தந்தி, திகி²ணஸிங்கோ³ சண்ட³கோ³ணோ விய ஓவிஜ்ஜ²ந்தோ விசரதி, அதே²கமக்³கே³ன த்³வின்னம் க³மனம் ந ஹோதி, கதா³சி அயம்பி ஏவம் கரோந்தோ இமேஸம் குலபுத்தானம் ஸமக்³க³வாஸம் பி⁴ந்தே³ய்ய. பாஸாதி³கோ ச பனேஸ ஸுவண்ணவண்ணோ ஸுரஸகி³த்³தோ⁴ மஞ்ஞே, க³தகாலதோ பட்டா²ய பணீததா³யகானம் அத்தனோ உபட்டா²கானஞ்ச வண்ணகத²னாதீ³ஹி இமேஸம் குலபுத்தானம் அப்பமாத³விஹாரம் பி⁴ந்தே³ய்ய. வஸனட்டா²னானி சாபி ஏதேஸம் குலபுத்தானம் நிப³த்³தா⁴னி பரிச்சி²ன்னானி திஸ்ஸோ ச பண்ணஸாலா தயோ சங்கமா தீணி தி³வாட்டா²னானி தீணி மஞ்சபீடா²னி. அயம் பன ஸமணோ மஹாகாயோ வுட்³ட⁴தரோ மஞ்ஞே ப⁴விஸ்ஸதி. ஸோ அகாலே இமே குலபுத்தே ஸேனாஸனா வுட்டா²பேஸ்ஸதி. ஏவம் ஸப்³ப³தா²பி ஏதேஸம் அபா²ஸு ப⁴விஸ்ஸதீ’’தி. தம் அனிச்ச²ந்தோ, ‘‘மா தேஸம் அபா²ஸுகமகாஸீ’’தி ப⁴க³வந்தம் வாரேஸி.

கிம் பனேஸ ஜானந்தோ வாரேஸி, அஜானந்தோதி? அஜானந்தோ. கிஞ்சாபி ஹி ததா²க³தஸ்ஸ படிஸந்தி⁴க்³க³ஹணதோ பட்டா²ய த³ஸஸஹஸ்ஸசக்கவாளகம்பனாதீ³னி பாடிஹாரியானி பவத்திம்ஸு, அரஞ்ஞவாஸினோ பன து³ப்³ப³லமனுஸ்ஸா ஸகம்மப்பஸுதா தானி ஸல்லக்கே²தும் ந ஸக்கோந்தி. ஸம்மாஸம்பு³த்³தோ⁴ ச நாம யதா³ அனேகபி⁴க்கு²ஸஹஸ்ஸபரிவாரோ ப்³யாமப்பபா⁴ய அஸீதிஅனுப்³யஞ்ஜனேஹி த்³வத்திம்ஸமஹாபுரிஸலக்க²ணஸிரியா ச பு³த்³தா⁴னுபா⁴வம் த³ஸ்ஸேந்தோ விசரதி, ததா³ கோ ஏஸோதி அபுச்சி²த்வாவ ஜானிதப்³போ³ ஹோதி. ததா³ பன ப⁴க³வா ஸப்³ப³ம்பி தம் பு³த்³தா⁴னுபா⁴வம் சீவரக³ப்³பே⁴ன படிச்சா²தே³த்வா வலாஹகக³ப்³பே⁴ன படிச்ச²ன்னோ புண்ணசந்தோ³ விய ஸயமேவ பத்தசீவரமாதா³ய அஞ்ஞாதகவேஸேன அக³மாஸி. இதி நம் அஜானந்தோவ தா³யபாலோ நிவாரேஸி.

ஏதத³வோசாதி தே²ரோ கிர மா ஸமணாதி தா³யபாலஸ்ஸ கத²ம் ஸுத்வாவ சிந்தேஸி – ‘‘மயம் தயோ ஜனா இத⁴ விஹராம, அஞ்ஞே பப்³ப³ஜிதா நாம நத்தி², அயஞ்ச தா³யபாலோ பப்³ப³ஜிதேன விய ஸத்³தி⁴ம் கதே²தி, கோ நு கோ² ப⁴விஸ்ஸதீ’’தி தி³வாட்டா²னதோ வுட்டா²ய த்³வாரே ட²த்வா மக்³க³ம் ஓலோகேந்தோ ப⁴க³வந்தம் அத்³த³ஸ. ப⁴க³வாபி தே²ரஸ்ஸ ஸஹ த³ஸ்ஸனேனேவ ஸரீரோபா⁴ஸம் முஞ்சி, அஸீதிஅனுப்³யஞ்ஜனவிராஜிதா ப்³யாமப்பபா⁴ பஸாரிதஸுவண்ணபடோ விய விரோசித்த². தே²ரோ, ‘‘அயம் தா³யபாலோ ப²ணகதம் ஆஸிவிஸம் கீ³வாய க³ஹேதும் ஹத்த²ம் பஸாரேந்தோ விய லோகே அக்³க³புக்³க³லேன ஸத்³தி⁴ம் கதே²ந்தோவ ந ஜானாதி, அஞ்ஞதரபி⁴க்கு²னா விய ஸத்³தி⁴ம் கதே²தீ’’தி நிவாரேந்தோ ஏதம், ‘‘மா, ஆவுஸோ தா³யபாலா’’திஆதி³வசனம் அவோச.

தேனுபஸங்கமீதி கஸ்மா ப⁴க³வதோ பச்சுக்³க³மனம் அகத்வா உபஸங்கமி? ஏவம் கிரஸ்ஸ அஹோஸி – ‘‘மயம் தயோ ஜனா ஸமக்³க³வாஸம் வஸாம, ஸசாஹம் ஏககோவ பச்சுக்³க³மனம் கரிஸ்ஸாமி, ஸமக்³க³வாஸோ நாம ந ப⁴விஸ்ஸதீ’’தி பியமித்தே க³ஹேத்வாவ பச்சுக்³க³மனம் கரிஸ்ஸாமி. யதா² ச ப⁴க³வா மய்ஹம் பியோ, ஏவம் ஸஹாயானம்பி மே பியோதி, தேஹி ஸத்³தி⁴ம் பச்சுக்³க³மனம் காதுகாமோ ஸயம் அகத்வாவ உபஸங்கமி. கேசி பன தேஸம் தே²ரானம் பண்ணஸாலத்³வாரே சங்கமனகோடியா ப⁴க³வதோ ஆக³மனமக்³கோ³ ஹோதி, தஸ்மா தே²ரோ தேஸம் ஸஞ்ஞம் த³த³மானோவ க³தோதி. அபி⁴க்கமதா²தி இதோ ஆக³ச்ச²த². பாதே³ பக்கா²லேஸீதி விகஸிதபது³மஸன்னிபே⁴ஹி ஜாலஹத்தே²ஹி மணிவண்ணம் உத³கம் க³ஹேத்வா ஸுவண்ணவண்ணேஸு பிட்டி²பாதே³ஸு உத³கமபி⁴ஸிஞ்சித்வா பாதே³ன பாத³ம் க⁴ம்ஸந்தோ பக்கா²லேஸி. பு³த்³தா⁴னம் காயே ரஜோஜல்லம் நாம ந உபலிம்பதி, கஸ்மா பக்கா²லேஸீதி? ஸரீரஸ்ஸ உதுக்³க³ஹணத்த²ம், தேஸஞ்ச சித்தஸம்பஹம்ஸனத்த²ம். அம்ஹேஹி அபி⁴ஹடேன உத³கேன ப⁴க³வா பாதே³ பக்கா²லேஸி, பரிபோ⁴க³ம் அகாஸீதி தேஸம் பி⁴க்கூ²னம் ப³லவஸோமனஸ்ஸவஸேன சித்தம் பீணிதம் ஹோதி, தஸ்மா பக்கா²லேஸி. ஆயஸ்மந்தம் அனுருத்³த⁴ம் ப⁴க³வா ஏதத³வோசாதி ஸோ கிர தேஸம் வுட்³ட⁴தரோ.

326. தஸ்ஸ ஸங்க³ஹே கதே ஸேஸானம் கதோவ ஹோதீதி தே²ரஞ்ஞேவ ஏதம் கச்சி வோ அனுருத்³தா⁴திஆதி³வசனம் அவோச. தத்த² கச்சீதி புச்ச²னத்தே² நிபாதோ. வோதி ஸாமிவசனம். இத³ம் வுத்தம் ஹோதி – கச்சி அனுருத்³தா⁴ தும்ஹாகம் க²மனீயம், இரியாபதோ² வோ க²மதி? கச்சி யாபனீயம், கச்சி வோ ஜீவிதம் யாபேதி க⁴டியதி? கச்சி பிண்ட³கேன ந கிலமத², கச்சி தும்ஹாகம் ஸுலப⁴பிண்ட³ம், ஸம்பத்தே வோ தி³ஸ்வா மனுஸ்ஸா உளுங்கயாகு³ம் வா கடச்சு²பி⁴க்க²ம் வா தா³தப்³ப³ம் மஞ்ஞந்தீதி பி⁴க்கா²சாரவத்தம் புச்ச²தி. கஸ்மா? பச்சயேன அகிலமந்தேன ஹி ஸக்கா ஸமணத⁴ம்மோ காதும், வத்தமேவ வா ஏதம் பப்³ப³ஜிதானம். அத² தேன படிவசனே தி³ன்னே, ‘‘அனுருத்³தா⁴, தும்ஹே ராஜபப்³ப³ஜிதா மஹாபுஞ்ஞா, மனுஸ்ஸா தும்ஹாகம் அரஞ்ஞே வஸந்தானம் அத³த்வா கஸ்ஸ அஞ்ஞஸ்ஸ தா³தப்³ப³ம் மஞ்ஞிஸ்ஸந்தி, தும்ஹே பன ஏதம் பு⁴ஞ்ஜித்வா கிம் நு கோ² மிக³போதகா விய அஞ்ஞமஞ்ஞம் ஸங்க⁴ட்டேந்தா விஹரத², உதா³ஹு ஸாமக்³கி³பா⁴வோ வோ அத்தீ²’’தி ஸாமக்³கி³ரஸம் புச்ச²ந்தோ, கச்சி பன வோ, அனுருத்³தா⁴, ஸமக்³கா³திஆதி³மாஹ.

தத்த² கீ²ரோத³கீபூ⁴தாதி யதா² கீ²ரஞ்ச உத³கஞ்ச அஞ்ஞமஞ்ஞம் ஸம்ஸந்த³தி, விஸும் ந ஹோதி, ஏகத்தம் விய உபேதி, கச்சி ஏவம் ஸாமக்³கி³வஸேன ஏகத்தூபக³தசித்துப்பாதா³ விஹரதா²தி புச்ச²தி. பியசக்கூ²ஹீதி மேத்தசித்தம் பச்சுபட்ட²பேத்வா ஓலோகனசக்கூ²னி பியசக்கூ²னி நாம. கச்சி ததா²ரூபேஹி சக்கூ²ஹி அஞ்ஞமஞ்ஞம் ஸம்பஸ்ஸந்தா விஹரதா²தி புச்ச²தி. தக்³கா⁴தி ஏகம்ஸத்தே² நிபாதோ. ஏகம்ஸேன மயம், ப⁴ந்தேதி வுத்தம் ஹோதி. யதா² கத²ம் பனாதி ஏத்த² யதா²தி நிபாதமத்தம். கத²ந்தி காரணபுச்சா². கத²ம் பன தும்ஹே ஏவம் விஹரத², கேன காரணேன விஹரத², தம் மே காரணம் ப்³ரூதா²தி வுத்தம் ஹோதி. மேத்தம் காயகம்மந்தி மேத்தசித்தவஸேன பவத்தம் காயகம்மம். ஆவி சேவ ரஹோ சாதி ஸம்முகா² சேவ பரம்முகா² ச. இதரேஸுபி ஏஸேவ நயோ.

தத்த² ஸம்முகா² காயவசீகம்மானி ஸஹவாஸே லப்³ப⁴ந்தி, இதரானி விப்பவாஸே. மனோகம்மம் ஸப்³ப³த்த² லப்³ப⁴தி. யஞ்ஹி ஸஹவஸந்தேஸு ஏகேன மஞ்சபீட²ம் வா தா³ருப⁴ண்ட³ம் வா மத்திகாப⁴ண்ட³ம் வா ப³ஹி து³ன்னிக்கி²த்தம் ஹோதி, தம் தி³ஸ்வா கேனித³ம் வளஞ்ஜிதந்தி அவஞ்ஞம் அகத்வா அத்தனா து³ன்னிக்கி²த்தம் விய க³ஹேத்வா படிஸாமேந்தஸ்ஸ படிஜக்³கி³தப்³ப³யுத்தம் வா பன டா²னம் படிஜக்³க³ந்தஸ்ஸ ஸம்முகா² மேத்தம் காயகம்மம் நாம ஹோதி. ஏகஸ்மிம் பக்கந்தே தேன து³ன்னிக்கி²த்தம் ஸேனாஸனபரிக்கா²ரம் ததே²வ நிக்கி²பந்தஸ்ஸ படிஜக்³கி³தப்³ப³யுத்தட்டா²னம் வா பன படிஜக்³க³ந்தஸ்ஸ பரம்முகா² மேத்தம் காயகம்மம் நாம ஹோதி. ஸஹவஸந்தஸ்ஸ பன தேஹி ஸத்³தி⁴ம் மது⁴ரம் ஸம்மோத³னீயம் கத²ம் படிஸந்தா²ரகத²ம் ஸாரணீயகத²ம் த⁴ம்மீகத²ம் ஸரப⁴ஞ்ஞம் ஸாகச்ச²ம் பஞ்ஹபுச்ச²னம் பஞ்ஹவிஸ்ஸஜ்ஜனந்தி ஏவமாதி³கரணே ஸம்முகா² மேத்தம் வசீகம்மம் நாம ஹோதி. தே²ரேஸு பன பக்கந்தேஸு மய்ஹம் பியஸஹாயோ நந்தி³யத்தே²ரோ கிமிலத்தே²ரோ ஏவம் ஸீலஸம்பன்னோ, ஏவம் ஆசாரஸம்பன்னோதிஆதி³கு³ணகத²னம் பரம்முகா² மேத்தம் வசீகம்மம் நாம ஹோதி. மய்ஹம் பியமித்தோ நந்தி³யத்தே²ரோ கிமிலத்தே²ரோ அவேரோ ஹோது, அப்³யாபஜ்ஜோ ஸுகீ² ஹோதூதி ஏவம் ஸமன்னாஹரதோ பன ஸம்முகா²பி பரம்முகா²பி மேத்தம் மனோகம்மம் ஹோதியேவ.

நானா ஹி கோ² நோ, ப⁴ந்தே, காயாதி காயஞ்ஹி பிட்ட²ம் விய மத்திகா விய ச ஓமத்³தி³த்வா ஏகதோ காதும் ந ஸக்கா. ஏகஞ்ச பன மஞ்ஞே சித்தந்தி சித்தம் பன நோ ஹிதட்டே²ன நிரந்தரட்டே²ன அவிக்³க³ஹட்டே²ன ஸமக்³க³ட்டே²ன ஏகமேவாதி த³ஸ்ஸேதி. கத²ம் பனேதம் ஸகம் சித்தம் நிக்கி²பித்வா இதரேஸம் சித்தவஸேன வத்திம்ஸூதி? ஏகஸ்ஸ பத்தே மலம் உட்ட²ஹதி, ஏகஸ்ஸ சீவரம் கிலிட்ட²ம் ஹோதி, ஏகஸ்ஸ பரிப⁴ண்ட³கம்மம் ஹோதி. தத்த² யஸ்ஸ பத்தே மலம் உட்டி²தம், தேன மமாவுஸோ, பத்தே மலம் உட்டி²தம் பசிதும் வட்டதீதி வுத்தே இதரே மய்ஹம் சீவரம் கிலிட்ட²ம் தோ⁴விதப்³ப³ம், மய்ஹம் பரிப⁴ண்ட³ம் காதப்³ப³ந்தி அவத்வா அரஞ்ஞம் பவிஸித்வா தா³ரூனி ஆஹரித்வா சி²ந்தி³த்வா பத்தகடாஹே பரிப⁴ண்ட³ம் கத்வா ததோ பரம் சீவரம் வா தோ⁴வந்தி, பரிப⁴ண்ட³ம் வா கரோந்தி. மமாவுஸோ, சீவரம் கிலிட்ட²ம் தோ⁴விதும் வட்டதி, மம பண்ணஸாலா உக்லாபா பரிப⁴ண்ட³ம் காதும் வட்டதீதி பட²மதரம் ஆரோசிதேபி ஏஸேவ நயோ.

327. ஸாது⁴ ஸாது⁴, அனுருத்³தா⁴தி ப⁴க³வா ஹேட்டா² ந ச மயம், ப⁴ந்தே, பிண்ட³கேன கிலமிம்ஹாதி வுத்தே ந ஸாது⁴காரமதா³ஸி. கஸ்மா? அயஞ்ஹி கப³ளீகாரோ ஆஹாரோ நாம இமேஸம் ஸத்தானம் அபாயலோகேபி தே³வமனுஸ்ஸலோகேபி ஆசிண்ணஸமாசிண்ணோவ. அயம் பன லோகஸன்னிவாஸோ யேபு⁴ய்யேன விவாத³பக்க²ந்தோ³, அபாயலோகே தே³வமனுஸ்ஸலோகேபி இமே ஸத்தா படிவிருத்³தா⁴ ஏவ, ஏதேஸம் ஸாமக்³கி³காலோ து³ல்லபோ⁴, கதா³சிதே³வ ஹோதீதி ஸமக்³க³வாஸஸ்ஸ து³ல்லப⁴த்தா இத⁴ ப⁴க³வா ஸாது⁴காரமதா³ஸி. இதா³னி தேஸம் அப்பமாத³லக்க²ணம் புச்ச²ந்தோ கச்சி பன வோ, அனுருத்³தா⁴திஆதி³மாஹ. தத்த² வோதி நிபாதமத்தம் பச்சத்தவசனம் வா, கச்சி தும்ஹேதி அத்தோ². அம்ஹாகந்தி அம்ஹேஸு தீஸு ஜனேஸு. பிண்டா³ய படிக்கமதீதி கா³மே பிண்டா³ய சரித்வா பச்சாக³ச்ச²தி. அவக்காரபாதிந்தி அதிரேகபிண்ட³பாதம் அபனேத்வா ட²பனத்தா²ய ஏகம் ஸமுக்³க³பாதிம் தோ⁴வித்வா ட²பேதி.

யோ பச்சா²தி தே கிர தே²ரா ந ஏகதோவ பி⁴க்கா²சாரம் பவிஸந்தி, ப²லஸமாபத்திரதா ஹேதே. பாதோவ ஸரீரப்படிஜக்³க³னம் கத்வா வத்தப்படிபத்திம் பூரேத்வா ஸேனாஸனம் பவிஸித்வா காலபரிச்சே²த³ம் கத்வா ப²லஸமாபத்திம் அப்பேத்வா நிஸீத³ந்தி. தேஸு யோ பட²மதரம் நிஸின்னோ அத்தனோ காலபரிச்சே²த³வஸேன பட²மதரம் உட்டா²தி; ஸோ பிண்டா³ய சரித்வா படினிவத்தோ ப⁴த்தகிச்சட்டா²னம் ஆக³ந்த்வா ஜானாதி – ‘‘த்³வே பி⁴க்கூ² பச்சா², அஹம் பட²மதரம் ஆக³தோ’’தி. அத² பத்தம் பித³ஹித்வா ஆஸனபஞ்ஞாபனாதீ³னி கத்வா யதி³ பத்தே படிவிஸமத்தமேவ ஹோதி, நிஸீதி³த்வா பு⁴ஞ்ஜதி. யதி³ அதிரேகம் ஹோதி, அவக்காரபாதியம் பக்கி²பித்வா பாதிம் பிதா⁴ய பு⁴ஞ்ஜதி. கதப⁴த்தகிச்சோ பத்தம் தோ⁴வித்வா வோத³கம் கத்வா த²விகாய ஓஸாபேத்வா பத்தசீவரம் க³ஹேத்வா அத்தனோ வஸனட்டா²னம் பவிஸதி. து³தியோபி ஆக³ந்த்வாவ ஜானாதி – ‘‘ஏகோ பட²மம் ஆக³தோ, ஏகோ பச்ச²தோ’’தி. ஸோ ஸசே பத்தே ப⁴த்தம் பமாணமேவ ஹோதி, பு⁴ஞ்ஜதி. ஸசே மந்த³ம், அவக்காரபாதிதோ க³ஹேத்வா பு⁴ஞ்ஜதி. ஸசே அதிரேகம் ஹோதி, அவக்காரபாதியம் பக்கி²பித்வா பமாணமேவ பு⁴ஞ்ஜித்வா புரிமத்தே²ரோ விய வஸனட்டா²னம் பவிஸதி. ததியோபி ஆக³ந்த்வாவ ஜானாதி – ‘‘த்³வே பட²மம் ஆக³தா, அஹம் பச்ச²தோ’’தி. ஸோபி து³தியத்தே²ரோ விய பு⁴ஞ்ஜித்வா கதப⁴த்தகிச்சோ பத்தம் தோ⁴வித்வா வோத³கம் கத்வா த²விகாய ஓஸாபேத்வா ஆஸனானி உக்கி²பித்வா படிஸாமேதி; பானீயக⁴டே வா பரிபோ⁴ஜனீயக⁴டே வா அவஸேஸம் உத³கம் ச²ட்³டே³த்வா க⁴டே நிகுஜ்ஜித்வா அவக்காரபாதியம் ஸசே அவஸேஸப⁴த்தம் ஹோதி, தம் வுத்தனயேன ஜஹித்வா பாதிம் தோ⁴வித்வா படிஸாமேதி; ப⁴த்தக்³க³ம் ஸம்மஜ்ஜதி. ததோ கசவரம் ச²ட்³டே³த்வா ஸம்மஜ்ஜனிம் உக்கி²பித்வா உபசிகாஹி முத்தட்டா²னே ட²பேத்வா பத்தசீவரமாதா³ய வஸனட்டா²னம் பவிஸதி. இத³ம் தே²ரானம் ப³ஹிவிஹாரே அரஞ்ஞே ப⁴த்தகிச்சகரணட்டா²னே போ⁴ஜனஸாலாயம் வத்தம். இத³ம் ஸந்தா⁴ய, ‘‘யோ பச்சா²’’திஆதி³ வுத்தம்.

யோ பஸ்ஸதீதிஆதி³ பன நேஸம் அந்தோவிஹாரே வத்தந்தி வேதி³தப்³ப³ம். தத்த² வச்சக⁴டந்தி ஆசமனகும்பி⁴ம். ரித்தந்தி ரித்தகம். துச்ச²ந்தி தஸ்ஸேவ வேவசனம். அவிஸய்ஹந்தி உக்கி²பிதும் அஸக்குணேய்யம், அதிபா⁴ரியம். ஹத்த²விகாரேனாதி ஹத்த²ஸஞ்ஞாய. தே கிர பானீயக⁴டாதீ³ஸு யம்கிஞ்சி துச்ச²கம் க³ஹேத்வா போக்க²ரணிம் க³ந்த்வா அந்தோ ச ப³ஹி ச தோ⁴வித்வா உத³கம் பரிஸ்ஸாவேத்வா தீரே ட²பேத்வா அஞ்ஞம் பி⁴க்கு²ம் ஹத்த²விகாரேன ஆமந்தேந்தி, ஓதி³ஸ்ஸ வா அனோதி³ஸ்ஸ வா ஸத்³த³ம் ந கரோந்தி. கஸ்மா ஓதி³ஸ்ஸ ஸத்³த³ம் ந கரோந்தி? தம் பி⁴க்கு²ம் ஸத்³தோ³ பா³தே⁴ய்யாதி. கஸ்மா அனோதி³ஸ்ஸ ஸத்³த³ம் ந கரோந்தி? அனோதி³ஸ்ஸ ஸத்³தே³ தி³ன்னே, ‘‘அஹம் புரே, அஹம் புரே’’தி த்³வேபி நிக்க²மேய்யும், ததோ த்³வீஹி கத்தப்³ப³கம்மே ததியஸ்ஸ கம்மச்சே²தோ³ ப⁴வேய்ய. ஸம்யதபத³ஸத்³தோ³ பன ஹுத்வா அபரஸ்ஸ பி⁴க்கு²னோ தி³வாட்டா²னஸந்திகம் க³ந்த்வா தேன தி³ட்ட²பா⁴வம் ஞத்வா ஹத்த²ஸஞ்ஞம் கரோதி, தாய ஸஞ்ஞாய இதரோ ஆக³ச்ச²தி, ததோ த்³வே ஜனா ஹத்தே²ன ஹத்த²ம் ஸம்ஸிப்³ப³ந்தா த்³வீஸு ஹத்தே²ஸு ட²பேத்வா உபட்ட²பேந்தி. தம் ஸந்தா⁴யாஹ – ‘‘ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்ட²பேமா’’தி.

பஞ்சாஹிகம் கோ² பனாதி சாதுத்³த³ஸே பன்னரஸே அட்ட²மியந்தி இத³ம் தாவ பகதித⁴ம்மஸ்ஸவனமேவ, தம் அக²ண்ட³ம் கத்வா பஞ்சமே பஞ்சமே தி³வஸே த்³வே தே²ரா நாதிவிகாலே ந்ஹாயித்வா அனுருத்³த⁴த்தே²ரஸ்ஸ வஸனட்டா²னம் க³ச்ச²ந்தி. தத்த² தயோபி நிஸீதி³த்வா திண்ணம் பிடகானம் அஞ்ஞதரஸ்மிம் அஞ்ஞமஞ்ஞம் பஞ்ஹம் புச்ச²ந்தி, அஞ்ஞமஞ்ஞம் விஸ்ஸஜ்ஜேந்தி, தேஸம் ஏவம் கரோந்தானம்யேவ அருணம் உக்³க³ச்ச²தி. தம் ஸந்தா⁴யேதம் வுத்தம். ஏத்தாவதா தே²ரேன ப⁴க³வதா அப்பமாத³லக்க²ணம் புச்சி²தேன பமாத³ட்டா²னேஸுயேவ அப்பமாத³லக்க²ணம் விஸ்ஸஜ்ஜிதம் ஹோதி. அஞ்ஞேஸஞ்ஹி பி⁴க்கூ²னம் பி⁴க்கா²சாரம் பவிஸனகாலோ, நிக்க²மனகாலோ, நிவாஸனபரிவத்தனம், சீவரபாருபனம், அந்தோகா³மே பிண்டா³ய சரணம் த⁴ம்மகத²னம், அனுமோத³னம், கா³மதோ நிக்க²மித்வா ப⁴த்தகிச்சகரணம், பத்ததோ⁴வனம், பத்தஓஸாபனம், பத்தசீவரபடிஸாமனந்தி பபஞ்சகரணட்டா²னானி ஏதானி. தஸ்மா தே²ரோ அம்ஹாகம் ஏத்தகம் டா²னம் முஞ்சித்வா பமாத³காலோ நாம நத்தீ²தி த³ஸ்ஸேந்தோ பமாத³ட்டா²னேஸுயேவ அப்பமாத³லக்க²ணம் விஸ்ஸஜ்ஜேஸி.

328. அத²ஸ்ஸ ப⁴க³வா ஸாது⁴காரம் த³த்வா பட²மஜ்ஜா²னம் புச்ச²ந்தோ புன அத்தி² பன வோதிஆதி³மாஹ. தத்த² உத்தரி மனுஸ்ஸத⁴ம்மாதி மனுஸ்ஸத⁴ம்மதோ உத்தரி. அலமரியஞாணத³ஸ்ஸனவிஸேஸோதி அரியபா⁴வகரணஸமத்தோ² ஞாணவிஸேஸோ. கிஞ்ஹி நோ ஸியா, ப⁴ந்தேதி கஸ்மா, ப⁴ந்தே, நாதி⁴க³தோ ப⁴விஸ்ஸதி, அதி⁴க³தோயேவாதி. யாவ தே³வாதி யாவ ஏவ.

329. ஏவம் பட²மஜ்ஜா²னாதி⁴க³மே ப்³யாகதே து³தியஜ்ஜா²னாதீ³னி புச்ச²ந்தோ ஏதஸ்ஸ பன வோதிஆதி³மாஹ. தத்த² ஸமதிக்கமாயாதி ஸமதிக்கமத்தா²ய. படிப்பஸ்ஸத்³தி⁴யாதி படிப்பஸ்ஸத்³த⁴த்தா²ய. ஸேஸம் ஸப்³ப³த்த² வுத்தனயேனேவ வேதி³தப்³ப³ம். பச்சி²மபஞ்ஹே பன லோகுத்தரஞாணத³ஸ்ஸனவஸேன அதி⁴க³தம் நிரோத⁴ஸமாபத்திம் புச்ச²ந்தோ அலமரியஞாணத³ஸ்ஸனவிஸேஸோதி ஆஹ. தே²ரோபி புச்சா²னுரூபேனேவ ப்³யாகாஸி. தத்த² யஸ்மா வேத³யிதஸுக²தோ அவேத³யிதஸுக²ம் ஸந்ததரம் பணீததரம் ஹோதி, தஸ்மா அஞ்ஞம் பா²ஸுவிஹாரம் உத்தரிதரம் வா பணீததரம் வா ந ஸமனுபஸ்ஸாமாதி ஆஹ.

330. த⁴ம்மியா கதா²யாதி ஸாமக்³கி³ரஸானிஸம்ஸப்படிஸம்யுத்தாய த⁴ம்மியா கதா²ய. ஸப்³பே³பி தே சதூஸு ஸச்சேஸு பரினிட்டி²தகிச்சா, தேன தேஸம் படிவேத⁴த்தா²ய கிஞ்சி கதே²தப்³ப³ம் நத்தி². ஸாமக்³கி³ரஸேன பன அயஞ்ச அயஞ்ச ஆனிஸம்ஸோதி ஸாமக்³கி³ரஸானிஸம்ஸமேவ நேஸம் ப⁴க³வா கதே²ஸி. ப⁴க³வந்தம் அனுஸம்யாயித்வாதி அனுக³ந்த்வா. தே கிர ப⁴க³வதோ பத்தசீவரம் க³ஹேத்வா தோ²கம் அக³மம்ஸு, அத² ப⁴க³வா விஹாரஸ்ஸ பரிவேணபரியந்தம் க³தகாலே, ‘‘ஆஹரத² மே பத்தசீவரம், தும்ஹே இதே⁴வ திட்ட²தா²’’தி பக்காமி. ததோ படினிவத்தித்வாதி ததோ டி²தட்டா²னதோ நிவத்தித்வா. கிம் நு கோ² மயம் ஆயஸ்மதோதி ப⁴க³வந்தம் நிஸ்ஸாய பப்³ப³ஜ்ஜாதீ³னி அதி⁴க³ந்த்வாபி அத்தனோ கு³ணகதா²ய அட்டியமானா அதி⁴க³மப்பிச்ச²தாய ஆஹம்ஸு. இமாஸஞ்ச இமாஸஞ்சாதி பட²மஜ்ஜா²னாதீ³னம் லோகியலோகுத்தரானம். சேதஸா சேதோ பரிச்ச விதி³தோதி அஜ்ஜ மே ஆயஸ்மந்தோ லோகியஸமாபத்தியா வீதினாமேஸும், அஜ்ஜ லோகுத்தராயாதி ஏவம் சித்தேன சித்தம் பரிச்சி²ந்தி³த்வா விதி³தம். தே³வதாபி மேதி, ப⁴ந்தே அனுருத்³த⁴, அஜ்ஜ அய்யோ நந்தி³யத்தே²ரோ, அஜ்ஜ அய்யோ கிமிலத்தே²ரோ இமாய ச இமாய ச ஸமாபத்தியா வீதினாமேஸீதி ஏவமாரோசேஸுந்தி அத்தோ². பஞ்ஹாபி⁴புட்டே²னாதி தம்பி மயா ஸயம் விதி³தந்தி வா தே³வதாஹி ஆரோசிதந்தி வா ஏத்தகேனேவ முக²ம் மே ஸஜ்ஜந்தி கத²ம் ஸமுட்டா²பேத்வா அபுட்டே²னேவ மே ந கதி²தம். ப⁴க³வதா பன பஞ்ஹாபி⁴புட்டே²ன பஞ்ஹம் அபி⁴புச்சி²தேன ஸதா ப்³யாகதம், தத்ர மே கிம் ந ரோசதா²தி ஆஹ.

331. தீ³கோ⁴தி ‘‘மணி மாணிவரோ தீ³கோ⁴, அதோ² ஸேரீஸகோ ஸஹா’’தி (தீ³. நி. 3.293) ஏவம் ஆக³தோ அட்ட²வீஸதியா யக்க²ஸேனாபதீனம் அப்³ப⁴ந்தரோ ஏகோ தே³வராஜா. பரஜனோதி தஸ்ஸேவ யக்க²ஸ்ஸ நாமம். யேன ப⁴க³வா தேனுபஸங்கமீதி ஸோ கிர வேஸ்ஸவணேன பேஸிதோ ஏதம் டா²னம் க³ச்ச²ந்தோ ப⁴க³வந்தம் ஸயம் பத்தசீவரம் க³ஹேத்வா கி³ஞ்ஜகாவஸத²தோ கோ³ஸிங்க³ஸாலவனஸ்ஸ அந்தரே தி³ஸ்வா ப⁴க³வா அத்தனா பத்தசீவரம் க³ஹேத்வா கோ³ஸிங்க³ஸாலவனே திண்ணம் குலபுத்தானம் ஸந்திகம் க³ச்ச²தி. அஜ்ஜ மஹதீ த⁴ம்மதே³ஸனா ப⁴விஸ்ஸதி. மயாபி தஸ்ஸா தே³ஸனாய பா⁴கி³னா ப⁴விதப்³ப³ந்தி அதி³ஸ்ஸமானேன காயேன ஸத்து² பதா³னுபதி³கோ க³ந்த்வா அவிதூ³ரே ட²த்வா த⁴ம்மம் ஸுத்வா ஸத்த²ரி க³ச்ச²ந்தேபி ந க³தோ, – ‘‘இமே தே²ரா கிம் கரிஸ்ஸந்தீ’’தி த³ஸ்ஸனத்த²ம் பன தத்தே²வ டி²தோ. அத² தே த்³வே தே²ரே அனுருத்³த⁴த்தே²ரம் பலிவேடே²ந்தே தி³ஸ்வா, – ‘‘இமே தே²ரா ப⁴க³வந்தம் நிஸ்ஸாய பப்³ப³ஜ்ஜாத³யோ ஸப்³ப³கு³ணே அதி⁴க³ந்த்வாபி ப⁴க³வதோவ மச்ச²ராயந்தி, ந ஸஹந்தி, அதிவிய நிலீயந்தி படிச்சா²தே³ந்தி, ந தா³னி தேஸம் படிச்சா²தே³தும் த³ஸ்ஸாமி, பத²விதோ யாவ ப்³ரஹ்மலோகா ஏதேஸம் கு³ணே பகாஸேஸ்ஸாமீ’’தி சிந்தேத்வா யேன ப⁴க³வா தேனுபஸங்கமி.

லாபா⁴ வத, ப⁴ந்தேதி யே, ப⁴ந்தே, வஜ்ஜிரட்ட²வாஸினோ ப⁴க³வந்தஞ்ச இமே ச தயோ குலபுத்தே பஸ்ஸிதும் லப⁴ந்தி, வந்தி³தும் லப⁴ந்தி, தே³ய்யத⁴ம்மம் தா³தும் லப⁴ந்தி, த⁴ம்மம் ஸோதும் லப⁴ந்தி, தேஸம் லாபா⁴, ப⁴ந்தே, வஜ்ஜீனந்தி அத்தோ². ஸத்³த³ம் ஸுத்வாதி ஸோ கிர அத்தனோ யக்கா²னுபா⁴வேன மஹந்தம் ஸத்³த³ம் கத்வா ஸகலம் வஜ்ஜிரட்ட²ம் அஜ்ஜோ²த்த²ரந்தோ தம் வாசம் நிச்சா²ரேஸி. தேன சஸ்ஸ தேஸு ருக்க²பப்³ப³தாதீ³ஸு அதி⁴வத்தா² பு⁴ம்மா தே³வதா ஸத்³த³ம் அஸ்ஸோஸும். தம் ஸந்தா⁴ய வுத்தம் – ‘‘ஸத்³த³ம் ஸுத்வா’’தி. அனுஸ்ஸாவேஸுந்தி மஹந்தம் ஸத்³த³ம் ஸுத்வா ஸாவேஸும். ஏஸ நயோ ஸப்³ப³த்த². யாவ ப்³ரஹ்மலோகாதி யாவ அகனிட்ட²ப்³ரஹ்மலோகா. தஞ்சேபி குலந்தி, ‘‘அம்ஹாகம் குலதோ நிக்க²மித்வா இமே குலபுத்தா பப்³ப³ஜிதா ஏவம் ஸீலவந்தோ கு³ணவந்தோ ஆசாரஸம்பன்னா கல்யாணத⁴ம்மா’’தி ஏவம் தஞ்சேபி குலம் ஏதே தயோ குலபுத்தே பஸன்னசித்தம் அனுஸ்ஸரேய்யாதி ஏவம் ஸப்³ப³த்த² அத்தோ² த³ட்ட²ப்³போ³. இதி ப⁴க³வா யதா²னுஸந்தி⁴னாவ தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

சூளகோ³ஸிங்க³ஸுத்தவண்ணனா நிட்டி²தா.