6. பாயாஸிவக்³கோ³

1. பட²மஅகா³ரியவிமானவண்ணனா

யதா² வனம் சித்தலதம் பபா⁴ஸதீதி அகா³ரியவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ராஜக³ஹே ஏகம் குலம் உப⁴தோபஸன்னம் ஹோதி ஸீலாசாரஸம்பன்னம் ஓபானபூ⁴தம் பி⁴க்கூ²னம் பி⁴க்கு²னீனம். தே த்³வே ஜயம்பதிகா ரதனத்தயம் உத்³தி³ஸ்ஸ யாவஜீவம் புஞ்ஞானி கத்வா ததோ சுதா தாவதிம்ஸேஸு நிப்³ப³த்திம்ஸு, தேஸம் த்³வாத³ஸயோஜனிகம் கனகவிமானம் நிப்³ப³த்தி. தே தத்த² தி³ப்³ப³ஸம்பத்திம் அனுப⁴வந்தி. அதா²யஸ்மா மஹாமோக்³க³ல்லானோதிஆதி³ ஹேட்டா² வுத்தனயேனேவ வேதி³தப்³ப³ம்.

1048. ‘‘யதா² வனம் சித்தலதம் பபா⁴ஸதி, உய்யானஸேட்ட²ம் தித³ஸானமுத்தமம்;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1049. ‘‘தே³வித்³தி⁴பத்தோஸி மஹானுபா⁴வோ, மனுஸ்ஸபூ⁴தோ கிமகாஸி புஞ்ஞம்;

கேனாஸி ஏவம் ஜலிதானுபா⁴வோ, வண்ணோ ச தே ஸப்³ப³தி³ஸா பபா⁴ஸதீ’’தி. –

தே²ரோ புச்சி².

1050. ‘‘ஸோ தே³வபுத்தோ அத்தமனோ, மோக்³க³ல்லானேன புச்சி²தோ;

பஞ்ஹம் புட்டோ² வியாகாஸி, யஸ்ஸ கம்மஸ்ஸித³ம் ப²லம்’’.

1051. ‘‘அஹஞ்ச ப⁴ரியா ச மனுஸ்ஸலோகே, ஓபானபூ⁴தா க⁴ரமாவஸிம்ஹ;

அன்னஞ்ச பானஞ்ச பஸன்னசித்தா, ஸக்கச்ச தா³னம் விபுலம் அத³ம்ஹ.

1052. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி. –

அத்தனோ ஸம்பத்திம் ப்³யாகாஸி. கா³தா²ஸுபி அபுப்³ப³ம் நத்தி².

பட²மஅகா³ரியவிமானவண்ணனா நிட்டி²தா.

2. து³தியஅகா³ரியவிமானவண்ணனா

யதா² வனம் சித்தலதந்தி து³தியஅகா³ரியவிமானம். ஏத்தா²பி அட்டு²ப்பத்தி அனந்தரஸதி³ஸாவ.

1054. ‘‘யதா² வனம் சித்தலதம் பபா⁴ஸதி, உய்யானஸேட்ட²ம் தித³ஸானமுத்தமம்;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1055. ‘‘தே³வித்³தி⁴பத்தோஸி மஹானுபா⁴வோ,

மனுஸ்ஸபூ⁴தோ கிமகாஸி புஞ்ஞம்;

கேனாஸி ஏவம் ஜலிதானுபா⁴வோ,

வண்ணோ ச தே ஸப்³ப³தி³ஸா பபா⁴ஸதீ’’தி. – புச்சி²;

1056. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1057. ‘‘அஹஞ்ச ப⁴ரியா ச மனுஸ்ஸலோகே, ஓபானபூ⁴தா க⁴ரமாவஸிம்ஹ;

அன்னஞ்ச பானஞ்ச பஸன்னசித்தா, ஸக்கச்ச தா³னம் விபுலம் அத³ம்ஹ.

1058. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி. –

அத்தனோ ஸம்பத்திம் ப்³யாகாஸி. கா³தா²ஸுபி அபுப்³ப³ம் நத்தி².

து³தியஅகா³ரியவிமானவண்ணனா நிட்டி²தா.

3. ப²லதா³யகவிமானவண்ணனா

உச்சமித³ம் மணிதூ²ணந்தி ப²லதா³யகவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ரஞ்ஞோ பி³ம்பி³ஸாரஸ்ஸ அகாலே அம்ப³ப²லானி பரிபு⁴ஞ்ஜிதும் இச்சா² உப்பஜ்ஜி. ஸோ ஆராமபாலம் ஆஹ – ‘‘மய்ஹம் கோ², ப⁴ணே, அம்ப³ப²லேஸு இச்சா² உப்பன்னா, தஸ்மா அம்பா³னி மே ஆனேத்வா தே³ஹீ’’தி. ‘‘தே³வ, நத்தி² அம்பே³ஸு அம்ப³ப²லம், அபிசாஹம் ததா² கரோமி, ஸசே தே³வோ கிஞ்சி காலம் ஆக³மேதி, யதா² அம்பா³ ந சிரஸ்ஸேவ ப²லம் க³ண்ஹந்தீ’’தி. ‘‘ஸாது⁴, ப⁴ணே, ததா² கரோஹீ’’தி. ஆராமபாலோ ஆராமம் க³ந்த்வா அம்ப³ருக்க²மூலேஸு பம்ஸும் அபனேத்வா தாதி³ஸம் பம்ஸும் ஆகிரி, தாதி³ஸஞ்ச உத³கம் ஆஸிஞ்சி, யதா² ந சிரஸ்ஸேவ அம்ப³ருக்கா² ஸச்சி²ன்னபத்தா அஹேஸும். அத² நம் பம்ஸும் அபனேத்வா பா²ருஸககஸடமிஸ்ஸகம் பாகதிகம் பம்ஸும் ஆகிரித்வா ஸாது⁴கம் உத³கம் அதா³ஸி. ததா³ அம்ப³ருக்கா² ந சிரேனேவ கோரகிதா பல்லவிதா குடமலகஜாதா ஹுத்வா புப்பி²ம்ஸு, அத² ஸலாடுகஜாதா ஹுத்வா ப²லானி க³ண்ஹிம்ஸு. தத்தே²கஸ்மிம் அம்ப³ருக்கே² பட²மதரம் சத்தாரி ப²லானி மனோஸிலாசுண்ணபிஞ்ஜரவண்ணானி ஸம்பன்னக³ந்த⁴ரஸானி பரிணதானி அஹேஸும்.

ஸோ தானி க³ஹேத்வா ‘‘ரஞ்ஞோ த³ஸ்ஸாமீ’’தி க³ச்ச²ந்தோ அந்தராமக்³கே³ ஆயஸ்மந்தம் மஹாமோக்³க³ல்லானம் பிண்டா³ய சரமானம் தி³ஸ்வா சிந்தேஸி ‘‘இமானி அம்பா³னி அக்³க³ப²லபூ⁴தானி இமஸ்ஸ அய்யஸ்ஸ த³ஸ்ஸாமி, காமம் மம் ராஜா ஹனது வா பப்³பா³ஜேது வா, ரஞ்ஞோ ஹி தி³ன்னே தி³ட்ட²த⁴ம்மே பூஜாமத்தம் அப்பமத்தகம் ப²லம், அய்யஸ்ஸ தி³ன்னே பன தி³ட்ட²த⁴ம்மிகம்பி ஸம்பராயிகம்பி அபரிமாணம் ப²லம் ப⁴விஸ்ஸதீ’’தி. ஏவம் பன சிந்தேத்வா தானி ப²லானி தே²ரஸ்ஸ த³த்வா ராஜானம் உபஸங்கமித்வா ரஞ்ஞோ தமத்த²ம் ஆரோசேஸி. தம் ஸுத்வா ராஜா ராஜபுரிஸே ஆணாபேஸி ‘‘வீமம்ஸத² தாவ, ப⁴ணே, யதா²யம் ஆஹா’’தி. தே²ரோ பன தானி ப²லானி ப⁴க³வதோ உபனாமேஸி. ப⁴க³வா தேஸு ஏகம் ஸாரிபுத்தத்தே²ரஸ்ஸ, ஏகம் மஹாமோக்³க³ல்லானத்தே²ரஸ்ஸ, ஏகம் மஹாகஸ்ஸபத்தே²ரஸ்ஸ த³த்வா ஏகம் அத்தனா பரிபு⁴ஞ்ஜி. புரிஸா தம் பவத்திம் ரஞ்ஞோ ஆரோசேஸும்.

ராஜா தம் ஸுத்வா ‘‘தீ⁴ரோ வதாயம் புரிஸோ, யோ அத்தனோ ஜீவிதம்பி பரிச்சஜித்வா புஞ்ஞபஸுதோ அஹோஸி, அத்தனோ பரிஸ்ஸமஞ்ச டா²னக³தமேவ அகாஸீ’’தி துட்ட²சித்தோ தஸ்ஸ ஏகம் கா³மவரம் வத்தா²லங்காராதீ³னி ச த³த்வா ‘‘யம் தயா ப⁴ணே அம்ப³ப²லதா³னேன புஞ்ஞம் பஸுதம், ததோ மே பத்திம் தே³ஹீ’’தி ஆஹ. ஸோ ‘‘தே³மி, தே³வ, யதா²ஸுக²ம் பத்திம் க³ண்ஹாஹீ’’தி அவோச. ஆராமபாலோ அபரபா⁴கே³ காலம் கத்வா தாவதிம்ஸேஸு உப்பஜ்ஜி, தஸ்ஸ ஸோளஸயோஜனிகம் கனகவிமானம் நிப்³ப³த்தி ஸத்தஸதகூடாகா³ரபடிமண்டி³தம். தம் தி³ஸ்வா ஆயஸ்மா மஹாமோக்³க³ல்லானோ புச்சி² –

1060. ‘‘உச்சமித³ம் மணிதூ²ணம் விமானம், ஸமந்ததோ ஸோளஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

1061. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம்;

அட்ட²ட்ட²கா ஸிக்கி²தா ஸாது⁴ரூபா, தி³ப்³பா³ ச கஞ்ஞா தித³ஸசரா உளாரா;

நச்சந்தி கா³யந்தி பமோத³யந்தி.

1062. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

1063. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1064. ‘‘ப²லதா³யீ ப²லம் விபுலம் லப⁴தி, த³த³முஜுக³தேஸு பஸன்னமானஸோ;

ஸோ ஹி பமோத³தி ஸக்³க³க³தோ திதி³வே, அனுபோ⁴தி ச புஞ்ஞப²லம் விபுலம்.

1065. ‘‘தவேவாஹம் மஹாமுனி, அதா³ஸிம் சதுரோ ப²லே.

1066. ‘‘தஸ்மா ஹி ப²லம் அலமேவ தா³தும், நிச்சம் மனுஸ்ஸேன ஸுக²த்தி²கேன;

தி³ப்³பா³னி வா பத்த²யதா ஸுகா²னி, மனுஸ்ஸஸோப⁴க்³க³தமிச்ச²தா வா.

1067. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி. – ஸோபிஸ்ஸ ப்³யாகாஸி;

1061. தத்த² அட்ட²ட்ட²காதி ஏகேகஸ்மிம் கூடாகா³ரே அட்ட²ட்ட²கா சதுஸட்டி²பரிமாணா. ஸாது⁴ரூபாதி ரூபஸம்பத்தியா ச ஸீலாசாரஸம்பத்தியா ச ஸிக்கா²ஸம்பத்தியா ச ஸுந்த³ரஸபா⁴வா. தி³ப்³பா³ ச கஞ்ஞாதி தே³வச்ச²ராயோ. தித³ஸசராதி தித³ஸேஸு ஸுகா²சாரா ஸுக²விஹாரினியோ. உளாராதி உளாரவிப⁴வா.

1064. ப²லதா³யீதி அத்தனா அம்ப³ப²லஸ்ஸ தி³ன்னத்தா அத்தானம் ஸந்தா⁴ய வத³தி. ப²லந்தி புஞ்ஞப²லம். விபுலந்தி மஹந்தம் லப⁴தி மனுஸ்ஸலோகே பதிட்டி²தோதி அதி⁴ப்பாயோ. த³த³ந்தி த³த³ந்தோ தா³னஹேது. உஜுக³தேஸூதி உஜுபடிபன்னேஸு. ஸக்³க³க³தோதி உப்பஜ்ஜனவஸேன ஸக்³க³ம் க³தோ, தத்தா²பி திதி³வே தாவதிம்ஸப⁴வனே அனுபோ⁴தி ச புஞ்ஞப²லம் விபுலம் யதா²ஹம், ஏவம் அஞ்ஞோபீதி அத்தோ².

1066. தஸ்மாதி யஸ்மா சதுன்னம் ப²லானம் தா³னமத்தேன ஈதி³ஸீ ஸம்பத்தி அதி⁴க³தா, தஸ்மா. அலமேவ யுத்தமேவ. நிச்சந்தி ஸப்³ப³காலம். தி³ப்³பா³னீதி தே³வலோகபரியாபன்னானி. மனுஸ்ஸஸோப⁴க்³க³தந்தி மனுஸ்ஸேஸு ஸுப⁴க³பா⁴வம். ஸேஸம் வுத்தனயமேவ.

ப²லதா³யகவிமானவண்ணனா நிட்டி²தா.

4. பட²மஉபஸ்ஸயதா³யகவிமானவண்ணனா

சந்தோ³ யதா² விக³தவலாஹகே நபே⁴தி உபஸ்ஸயதா³யகவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன அஞ்ஞதரோ பி⁴க்கு² கா³மகாவாஸே வஸ்ஸம் வஸித்வா வுத்த²வஸ்ஸோ பவாரேத்வா ப⁴க³வந்தம் வந்தி³தும் ராஜக³ஹம் க³ச்ச²ந்தோ அந்தராமக்³கே³ ஸாயம் அஞ்ஞதரம் கா³மம் பவிஸித்வா வஸனட்டா²னம் பரியேஸந்தோ அஞ்ஞதரம் உபாஸகம் தி³ஸ்வா புச்சி² – ‘‘உபாஸக, இமஸ்மிம் கா³மே அத்தி² கிஞ்சி பப்³ப³ஜிதானம் வஸனயோக்³க³ட்டா²ன’’ந்தி. உபாஸகோ பஸன்னசித்தோ கே³ஹம் க³ந்த்வா ப⁴ரியாய ஸத்³தி⁴ம் மந்தேத்வா தே²ரஸ்ஸ வஸனயோக்³க³ம் டா²னம் பரிச்சி²ந்தி³த்வா தத்த² ஆஸனம் பஞ்ஞாபேத்வா பாதோ³த³கம் பாத³பீட²ம் உபட்ட²பேத்வா தே²ரம் பவேஸேத்வா தஸ்மிம் பாதே³ தோ⁴வந்தே பதீ³பம் உஜ்ஜாலேத்வா மஞ்சே பச்சத்த²ரணானி பஞ்ஞாபேத்வா அதா³ஸி. ஸ்வாதனாய ச நிமந்தேத்வா தே²ரஸ்ஸ து³தியதி³வஸே போ⁴ஜேத்வா பானகத்தா²ய கு³ளபிண்ட³ஞ்ச த³த்வா தே²ரம் க³ச்ச²ந்தம் அனுக³ந்த்வா நிவத்தி. ஸோ அபரேன ஸமயேன ஸஹ ப⁴ரியாய காலம் கத்வா தாவதிம்ஸப⁴வனே த்³வாத³ஸயோஜனிகே கனகவிமானே நிப்³ப³த்தி. தம் ஆயஸ்மா மஹாமோக்³க³ல்லானோ த்³வீஹி கா³தா²ஹி படிபுச்சி² –

1069. ‘‘சந்தோ³ யதா² விக³தவலாஹகே நபே⁴, ஓபா⁴ஸயம் க³ச்ச²தி அந்தலிக்கே²;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1070. ‘‘தே³வித்³தி⁴பத்தோஸி மஹானுபா⁴வோ, மனுஸ்ஸபூ⁴தோ கிமகாஸி புஞ்ஞம்;

கேனாஸி ஏவம் ஜலிதானுபா⁴வோ, வண்ணோ ச தே ஸப்³ப³தி³ஸா பபா⁴ஸதீ’’தி.

ஸோ தே³வபுத்தோ இமாஹி கா³தா²ஹி ப்³யாகாஸி –

1071. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1072. ‘‘அஹஞ்ச ப⁴ரியா ச மனுஸ்ஸலோகே, உபஸ்ஸயம் அரஹதோ அத³ம்ஹ;

அன்னஞ்ச பானஞ்ச பஸன்னசித்தா, ஸக்கச்ச தா³னம் விபுலம் அத³ம்ஹ.

1073. ‘‘தேன மேதாதி³ஸோ வண்ணோ…பே… வண்ணோ ச மே ஸப்³ப³தி³ஸா பபா⁴ஸதீ’’தி.

தத்த² கா³தா²ஸு யம் வத்தப்³ப³ம், தம் ஹேட்டா² வுத்தனயமேவ;

பட²மஉபஸ்ஸயதா³யகவிமானவண்ணனா நிட்டி²தா.

5. து³தியஉபஸ்ஸயதா³யகவிமானவண்ணனா

ஸூரியோ யதா² விக³தவலாஹகே நபே⁴தி து³தியஉபஸ்ஸயதா³யகவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ஸம்ப³ஹுலா பி⁴க்கூ² கா³மகாவாஸே வஸ்ஸம் வஸித்வா ப⁴க³வந்தம் த³ஸ்ஸனாய ராஜக³ஹம் உத்³தி³ஸ்ஸ க³ச்ச²ந்தா ஸாயம் அஞ்ஞதரம் கா³மம் ஸம்பாபுணிம்ஸு. ஸேஸம் அனந்தரவிமானஸதி³ஸமேவ.

1075. ‘‘ஸூரியோ யதா² விக³தவலாஹகே நபே⁴…பே….

(யதா² புரிமவிமானம், ததா² வித்தா²ரேதப்³ப³ம்;)

1079. ‘‘வண்ணோ ச மே ஸப்³ப³தி³ஸா பபா⁴ஸதீ’’தி.

தத்த² கா³தா²ஸுபி அபுப்³ப³ம் நத்தி²;

து³தியஉபஸ்ஸயதா³யகவிமானவண்ணனா நிட்டி²தா.

6. பி⁴க்கா²தா³யகவிமானவண்ணனா

உச்சமித³ம் மணிதூ²ணம் விமானந்தி பி⁴க்கா²தா³யகவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன அஞ்ஞதரோ பி⁴க்கு² அத்³தா⁴னமக்³க³படிபன்னோ அஞ்ஞதரம் கா³மம் பிண்டா³ய பவிட்டோ² ஏகஸ்ஸ க⁴ரத்³தா⁴ரே அட்டா²ஸி. தத்த² அஞ்ஞதரோ புரிஸோ தோ⁴தஹத்த²பாதோ³ ‘‘பு⁴ஞ்ஜிஸ்ஸாமீ’’தி நிஸின்னோ போ⁴ஜனம் உபனேத்வா பாதியா பக்கி²த்தே தம் பி⁴க்கு²ம் தி³ஸ்வா பாதியா ப⁴த்தம் தஸ்ஸ பி⁴க்கு²னோ பத்தே ஆகிரந்தோ தேன ‘‘ஏகதே³ஸமேவ தே³ஹீ’’தி வுத்தோபி ஸப்³ப³மேவ ஆகிரி. ஸோ பி⁴க்கு² அனுமோத³னம் வத்வா பக்காமி. ஸோ புரிஸோ ‘‘சா²தஜ்ஜ²த்தஸ்ஸ பி⁴க்கு²னோ மயா அபு⁴ஞ்ஜித்வா ப⁴த்தம் தி³ன்ன’’ந்தி அனுஸ்ஸரந்தோ உளாரம் பீதிஸோமனஸ்ஸம் படிலபி⁴. ஸோ அபரபா⁴கே³ காலம் கத்வா தாவதிம்ஸேஸு த்³வாத³ஸயோஜனிகே கனகவிமானே நிப்³ப³த்தி. தம் ஆயஸ்மா மஹாமோக்³க³ல்லானத்தே²ரோ தே³வசாரிகம் சரந்தோ மஹதியா தே³வித்³தி⁴யா விரோசமானம் தி³ஸ்வா இமாஹி கா³தா²ஹி படிபுச்சி² –

1081. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

1082. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ இமாஹி கா³தா²ஹி ப்³யாகாஸி –

1083. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1084. ‘‘அஹம் மனுஸ்ஸேஸு மனுஸ்ஸபூ⁴தோ, தி³ஸ்வான பி⁴க்கு²ம் தஸிதம் கிலந்தம்;

ஏகாஹம் பி⁴க்க²ம் படிபாத³யிஸ்ஸம், ஸமங்கி³ ப⁴த்தேன ததா³ அகாஸிம்.

1085. ‘‘தேன மேதாதி³ஸோ வண்ணோ…பே… வண்ணோ ச மே ஸப்³ப³தி³ஸா பபா⁴ஸதீ’’தி.

1084. தத்த² ஏகாஹம் பி⁴க்க²ந்தி ஏகம் அஹம் பி⁴க்கா²மத்தம், ஏகம் ப⁴த்தவட்³டி⁴தகந்தி அத்தோ². படிபாத³யிஸ்ஸந்தி படிபாதே³ஸிம் அதா³ஸிம். ஸமங்கி³ ப⁴த்தேனாதி ப⁴த்தேன ஸமங்கீ³பூ⁴தம், லத்³த⁴பி⁴க்க²ந்தி அத்தோ². ஏவம் மஹாதே²ரோ தேன தே³வபுத்தேன அத்தனோ ஸுசரிதகம்மே பகாஸிதே ஸபரிவாரஸ்ஸ தஸ்ஸ த⁴ம்மம் தே³ஸேத்வா மனுஸ்ஸலோகமாக³தோ, தம் பவத்திம் ஸம்மாஸம்பு³த்³த⁴ஸ்ஸ கதே²ஸி. ஸத்தா² தம் அட்டு²ப்பத்திம் கத்வா ஸம்பத்தமஹாஜனஸ்ஸ த⁴ம்மம் தே³ஸேஸி. ஸா தே³ஸனா மஹாஜனஸ்ஸ ஸாத்தி²கா அஹோஸீதி.

பி⁴க்கா²தா³யகவிமானவண்ணனா நிட்டி²தா.

7. யவபாலகவிமானவண்ணனா

உச்சமித³ம் மணிதூ²ணம் விமானந்தி யவபாலகவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ராஜக³ஹே அஞ்ஞதரோ து³க்³க³ததா³ரகோ யவகே²த்தம் ரக்க²தி. ஸோ ஏகதி³வஸம் பாதராஸத்தா²ய கும்மாஸம் லபி⁴த்வா ‘‘கே²த்தம் க³ந்த்வா பு⁴ஞ்ஜிஸ்ஸாமீ’’தி தம் கும்மாஸம் க³ஹேத்வா யவகே²த்தம் க³ந்த்வா ருக்க²மூலே நிஸீதி³. தஸ்மிம் க²ணே அஞ்ஞதரோ கீ²ணாஸவத்தே²ரோ மக்³க³ப்படிபன்னோ உபகட்டே² காலே தம் டா²னம் பத்வா யவபாலகேன நிஸின்னம் ருக்க²மூலம் உபஸங்கமி. யவபாலகோ வேலம் ஓலோகேத்வா ‘‘கச்சி, ப⁴ந்தே, ஆஹாரோ லத்³தோ⁴’’தி ஆஹ. தே²ரோ துண்ஹீ அஹோஸி. ஸோ அலத்³த⁴பா⁴வம் ஞத்வா ‘‘ப⁴ந்தே, உபகட்டா² வேலா, பிண்டா³ய சரித்வா பு⁴ஞ்ஜிதும் ந ஸக்கா, மய்ஹம் அனுகம்பாய இமம் கும்மாஸம் பரிபு⁴ஞ்ஜதா²’’தி வத்வா தே²ரஸ்ஸ தம் கும்மாஸம் அதா³ஸி. தே²ரோ தம் அனுகம்பந்தோ தஸ்ஸ பஸ்ஸந்தஸ்ஸேவ தம் பரிபு⁴ஞ்ஜித்வா அனுமோத³னம் வத்வா பக்காமி. ஸோபி தா³ரகோ ‘‘ஸுதி³ன்னம் வத மயா ஈதி³ஸஸ்ஸ கும்மாஸதா³னம் த³த³ந்தேனா’’தி சித்தம் பஸாதே³த்வா அபரபா⁴கே³ காலம் கத்வா தாவதிம்ஸப⁴வனே வுத்தனயேனேவ விமானே நிப்³ப³த்தி. தம் ஆயஸ்மா மஹாமோக்³க³ல்லானத்தே²ரோ இமாஹி கா³தா²ஹி படிபுச்சி² –

1087. ‘‘உச்சமித³ம் மணிதூ²ணம் விமானம்…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ இமாஹி கா³தா²ஹி ப்³யாகாஸி –

1089. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1090. ‘‘அஹம் மனுஸ்ஸேஸு மனுஸ்ஸபூ⁴தோ, அஹோஸிம் யவபாலகோ;

அத்³த³ஸம் விரஜம் பி⁴க்கு²ம், விப்பஸன்னமனாவிலம்.

1091. ‘‘தஸ்ஸ அதா³ஸஹம் பா⁴க³ம், பஸன்னோ ஸேஹி பாணிபி⁴;

கும்மாஸபிண்ட³ம் த³த்வான, மோதா³மி நந்த³னே வனே.

1092. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி.

தத்த² கா³தா²ஸுபி அபுப்³ப³ம் நத்தி².

யவபாலகவிமானவண்ணனா நிட்டி²தா.

8. பட²மகுண்ட³லீவிமானவண்ணனா

அலங்கதோ மல்யத⁴ரோ ஸுவத்தோ²தி குண்ட³லீவிமானம். தஸ்ஸ கா உபத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன த்³வே அக்³க³ஸாவகா ஸபரிவாரா காஸீஸு சாரிகம் சரந்தா ஸூரியத்த²ங்க³மனவேலாயம் அஞ்ஞதரம் விஹாரம் பாபுணிம்ஸு. தம் பவத்திம் ஸுத்வா தஸ்ஸ விஹாரஸ்ஸ கோ³சரகா³மே அஞ்ஞதரோ உபாஸகோ தே²ரே உபஸங்கமித்வா வந்தி³த்வா பாத³தோ⁴வனம் பாத³ப்³ப⁴ஞ்ஜனதேலம் மஞ்சபீட²ம் பச்சத்த²ரணம் பதீ³பியஞ்ச உபனேத்வா ஸ்வாதனாய ச நிமந்தேத்வா து³தியதி³வஸே மஹாதா³னம் பவத்தேஸி, தே²ரா தஸ்ஸ அனுமோத³னம் வத்வா பக்கமிம்ஸு. ஸோ அபரேன ஸமயேன காலம் கத்வா தாவதிம்ஸேஸு த்³வாத³ஸயோஜனிகே கனகவிமானே நிப்³ப³த்தி. தம் ஆயஸ்மா மஹாமோக்³க³ல்லானத்தே²ரோ இமாஹி கா³தா²ஹி படிபுச்சி² –

1094. ‘‘அலங்கதோ மல்யத⁴ரோ ஸுவத்தோ², ஸுகுண்ட³லீ கப்பிதகேஸமஸ்ஸு;

ஆமுத்தஹத்தா²ப⁴ரணோ யஸஸ்ஸீ, தி³ப்³பே³ விமானம்ஹி யதா²பி சந்தி³மா.

1095. ‘‘தி³ப்³பா³ ச வீணா பவத³ந்தி வக்³கு³ம், அட்ட²ட்ட²கா ஸிக்கி²தா ஸாது⁴ரூபா;

தி³ப்³பா³ ச கஞ்ஞா தித³ஸசரா உளாரா, நச்சந்தி கா³யந்தி பமோத³யந்தி.

1096. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ இமாஹி கா³தா²ஹி ப்³யாகாஸி –

1097. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1098. ‘‘அஹம் மனுஸ்ஸேஸு மனுஸ்ஸபூ⁴தோ, தி³ஸ்வான ஸமணே ஸீலவந்தே;

ஸம்பன்னவிஜ்ஜாசரணே யஸஸ்ஸீ, ப³ஹுஸ்ஸுதே தண்ஹக்க²யூபபன்னே;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1099. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி.

1094. தத்த² ஸுகுண்ட³லீதி ஸுந்த³ரேஹி குண்ட³லேஹி அலங்கதகண்ணோ. ‘‘ஸகுண்ட³லீ’’திபி பாடோ², ஸதி³ஸம் குண்ட³லம் ஸகுண்ட³லம், தம் அஸ்ஸ அத்தீ²தி ஸகுண்ட³லீ, யுத்தகுண்ட³லீ அஞ்ஞமஞ்ஞஞ்ச துய்ஹஞ்ச அனுச்ச²விககுண்ட³லீதி அத்தோ². கப்பிதகேஸமஸ்ஸூதி ஸம்மாகப்பிதகேஸமஸ்ஸு. ஆமுத்தஹத்தா²ப⁴ரணோதி படிமுக்கஅங்கு³லியாதி³ஹத்தா²ப⁴ரணோ.

1098. தண்ஹக்க²யூபபன்னேதி தண்ஹக்க²யம் அரஹத்தம், நிப்³பா³னமேவ வா உபக³தே, அதி⁴க³தவந்தேதி அத்தோ². ஸேஸம் வுத்தனயமேவ.

பட²மகுண்ட³லீவிமானவண்ணனா நிட்டி²தா.

9. து³தியகுண்ட³லீவிமானவண்ணனா

அலங்கதோ மல்யத⁴ரோ ஸுவத்தோ²தி து³தியகுண்ட³லீவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன த்³வே அக்³க³ஸாவகா காஸீஸு ஜனபத³சாரிகம் சரந்தாதிஆதி³ ஸப்³ப³ம் அனந்தரஸதி³ஸமேவ.

1101. ‘‘அலங்கதோ மல்யத⁴ரோ ஸுவத்தோ², ஸுகுண்ட³லீ கப்பிதகேஸமஸ்ஸு;

ஆமுத்தஹத்தா²ப⁴ரணோ யஸஸ்ஸீ, தி³ப்³பே³ விமானம்ஹி யதா²பி சந்தி³மா.

1102. ‘‘தி³ப்³பா³ ச வீணா பவத³ந்தி வக்³கு³ம்;

அட்ட²ட்ட²கா ஸிக்கி²தா ஸாது⁴ரூபா;

தி³ப்³பா³ ச கஞ்ஞா தித³ஸசரா உளாரா, நச்சந்தி கா³யந்தி பமோத³யந்தி.

1103. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி. – புச்சி²;

1104. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1105. ‘‘அஹம் மனுஸ்ஸேஸு மனுஸ்ஸபூ⁴தோ, தி³ஸ்வான ஸமணே ஸாது⁴ரூபே;

ஸம்பன்னவிஜ்ஜாசரணே யஸஸ்ஸீ, ப³ஹுஸ்ஸுதே ஸீலவந்தே பஸன்னே;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1106. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி.

கா³தா²ஸுபி அபுப்³ப³ம் நத்தி².

து³தியகுண்ட³லீவிமானவண்ணனா நிட்டி²தா.

10. (உத்தர) பாயாஸிவிமானவண்ணனா

யா தே³வராஜஸ்ஸ ஸபா⁴ ஸுத⁴ம்மாதி உத்தரவிமானம். தஸ்ஸ கா உப்பத்தி? ப⁴க³வதி பரினிப்³பு³தே தா⁴துவிபா⁴கே³ ச கதே தத்த² தத்த² தூ²பேஸு பதிட்டா²பியமானேஸு த⁴ம்மவினயம் ஸங்கா³யிதும் உச்சினித்வா க³ஹிதேஸு மஹாகஸ்ஸபப்பமுகே²ஸு மஹாதே²ரேஸு யாவ வஸ்ஸூபக³மனா அஞ்ஞேஸு ச தே²ரேஸு அத்தனோ அத்தனோ பரிஸாய ஸத்³தி⁴ம் தத்த² தத்த² வஸந்தேஸு ஆயஸ்மா குமாரகஸ்ஸபோ பஞ்சஹி பி⁴க்கு²ஸதேஹி ஸத்³தி⁴ம் ஸேதப்³யனக³ரம் க³ந்த்வா ஸிம்ஸபாவனே வஸி. அத² பாயாஸி ராஜஞ்ஞோ தே²ரஸ்ஸ தத்த² வஸனபா⁴வம் ஸுத்வா மஹதா ஜனகாயேன பரிவுதோ தம் உபஸங்கமித்வா படிஸந்தா²ரம் கத்வா நிஸின்னோ அத்தனோ தி³ட்டி²க³தம் பவேதே³ஸி. அத² நம் தே²ரோ சந்தி³மஸூரியூதா³ஹரணாதீ³ஹி பரலோகஸ்ஸ அத்தி²பா⁴வம் பகாஸேந்தோ அனேகவிஹிதஹேதூபமாலங்கதம் தி³ட்டி²க³ண்டி²வினிவேட²னம் நானானயவிசித்தம் பாயாஸிஸுத்தம் (தீ³. நி. 2.406 ஆத³யோ) தே³ஸேத்வா தம் தி³ட்டி²ஸம்பதா³யம் பதிட்டா²பேஸி.

ஸோ விஸுத்³த⁴தி³ட்டி²கோ ஹுத்வா ஸமணப்³ராஹ்மணகபணத்³தி⁴காதீ³னம் தா³னம் தே³ந்தோ அனுளாரஜ்ஜா²ஸயதாய லூக²ம் அதா³ஸி கா⁴ஸச்சா²த³னமத்தம் கணாஜகம் பி³லங்க³து³தியம் ஸாணானி ச வத்தா²னி. ஏவம் பன அஸக்கச்சதா³னம் த³த்வா காயஸ்ஸ பே⁴தா³ ஹீனகாயம் உபபஜ்ஜி சாதுமஹாராஜிகானம் ஸஹப்³யதம். தஸ்ஸ பன கிச்சாகிச்சேஸு யுத்தப்பயுத்தோ உத்தரோ நாம மாணவோ அஹோஸி தா³னே ப்³யாவடோ. ஸோ ஸக்கச்சதா³னம் த³த்வா தாவதிம்ஸகாயம் உபபன்னோ, தஸ்ஸ த்³வாத³ஸயோஜனிகம் விமானம் நிப்³ப³த்தி. ஸோ கதஞ்ஞுதம் விபா⁴வேந்தோ ஸஹ விமானேன குமாரகஸ்ஸபத்தே²ரம் உபஸங்கமித்வா விமானதோ ஓருய்ஹ பஞ்சபதிட்டி²தேன வந்தி³த்வா அஞ்ஜலிம் பக்³க³ய்ஹ அட்டா²ஸி. தம் தே²ரோ –

1108. ‘‘யா தே³வராஜஸ்ஸ ஸபா⁴ ஸுத⁴ம்மா, யத்த²ச்ச²தி தே³வஸங்கோ⁴ ஸமக்³கோ³;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1109. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி. – கா³தா²ஹி படிபுச்சி²;

1110. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1111. ‘‘அஹம் மனுஸ்ஸேஸு மனுஸ்ஸபூ⁴தோ, ரஞ்ஞோ பாயாஸிஸ்ஸ அஹோஸிம் மாணவோ;

லத்³தா⁴ த⁴னம் ஸம்விபா⁴க³ம் அகாஸிம், பியா ச மே ஸீலவந்தோ அஹேஸும்;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1112. ‘‘தேன மேதாதி³ஸோ வண்ணோ…பே…

வண்ணோ ச மே ஸப்³ப³தி³ஸா பபா⁴ஸதீ’’தி. –

ஸோ தே³வபுத்தோ தஸ்ஸ இமாஹி கா³தா²ஹி ப்³யாகாஸி.