8. மல்லிகாவிமானவண்ணனா

பீதவத்தே² பீதத⁴ஜேதி மல்லிகாவிமானம். தஸ்ஸ கா உப்பத்தி? த⁴ம்மசக்கப்பவத்தனமாதி³ம் கத்வா யாவ ஸுப⁴த்³த³பரிப்³பா³ஜகவினயனா கதபு³த்³த⁴கிச்சே குஸினாராயம் உபவத்தனே மல்லராஜூனம் ஸாலவனே யமகஸாலானமந்தரே விஸாக²புண்ணமாயம் பச்சூஸவேலாயம் அனுபாதி³ஸேஸாய நிப்³பா³னதா⁴துயா பரினிப்³பு³தே ப⁴க³வதி லோகனாதே² தே³வமனுஸ்ஸேஹி தஸ்ஸ ஸரீரபூஜாய கயிரமானாய ததா³ குஸினாராயம் வஸமானா ப³ந்து⁴லமல்லஸ்ஸ ப⁴ரியா மல்லராஜபுத்தீ மல்லிகா நாம உபாஸிகா ஸத்³தா⁴ பஸன்னா விஸாகா²ய மஹாஉபாஸிகாய பஸாத⁴னஸதி³ஸம் அத்தனோ மஹாலதாபஸாத⁴னம் க³ந்தோ⁴த³கேன தோ⁴வித்வா து³கூலசும்ப³டகேன மஜ்ஜித்வா அஞ்ஞஞ்ச ப³ஹும் க³ந்த⁴மாலாதி³ம் க³ஹேத்வா ப⁴க³வதோ ஸரீரம் பூஜேஸி. அயமேத்த² ஸங்கே²போ, வித்தா²ரதோ பன மல்லிகாவத்து² த⁴ம்மபத³வண்ணனாயம் ஆக³தமேவ.

ஸா அபரபா⁴கே³ காலம் கத்வா தாவதிம்ஸேஸு நிப்³ப³த்தி, தேன பூஜானுபா⁴வேன அஸ்ஸா அஞ்ஞேஹி அஸாதா⁴ரணா உளாரா தி³ப்³ப³ஸம்பத்தி அஹோஸி. வத்தா²லங்காரவிமானானி ஸத்தரதனஸமுஜ்ஜலானி விஸேஸதோ ஸிங்கீ³ஸுவண்ணோபா⁴ஸானி அதிவிய பப⁴ஸ்ஸரானி ஸப்³பா³ தி³ஸா ஆஸிஞ்சமானாவ ஸுவண்ணரஸதா⁴ராபிஞ்ஜரா கரோந்தி. அதா²யஸ்மா நாரதோ³ தே³வசாரிகம் சரந்தோ தம் தி³ஸ்வா உபக³ஞ்சி². ஸா தம் தி³ஸ்வா வந்தி³த்வா அஞ்ஜலிம் பக்³க³ய்ஹ அட்டா²ஸி. ஸோ தம் –

658. ‘‘பீதவத்தே² பீதத⁴ஜே, பீதாலங்காரபூ⁴ஸிதே;

பீதந்தராஹி வக்³கூ³ஹி, அபிளந்தா⁴வ ஸோப⁴ஸி.

659. ‘‘கா கம்பு³காயூரத⁴ரே, கஞ்சனாவேளபூ⁴ஸிதே;

ஹேமஜாலகஸஞ்ச²ன்னே, நானாரதனமாலினீ.

660. ‘‘ஸோவண்ணமயா லோஹிதங்க³மயா ச, முத்தாமயா வேளுரியமயா ச;

மஸாரக³ல்லா ஸஹலோஹிதங்கா³, பாரேவதக்கீ²ஹி மணீஹி சித்ததா.

661. ‘‘கோசி கோசி ஏத்த² மயூரஸுஸ்ஸரோ, ஹம்ஸஸ்ஸரஞ்ஞோ கரவீகஸுஸ்ஸரோ;

தேஸம் ஸரோ ஸுய்யதி வக்³கு³ரூபோ, பஞ்சங்கி³கம் தூரியமிவப்பவாதி³தம்.

662. ‘‘ரதோ² ச தே ஸுபோ⁴ வக்³கு³, நானாரதனசித்திதோ;

நானாவண்ணாஹி தா⁴தூஹி, ஸுவிப⁴த்தோவ ஸோப⁴தி.

663. ‘‘தஸ்மிம் ரதே² கஞ்சனபி³ம்ப³வண்ணே, யா த்வம் டி²தா பா⁴ஸஸிமம் பதே³ஸம்;

தே³வதே புச்சி²தாசிக்க², கிஸ்ஸ கம்மஸ்ஸித³ம் ப²ல’’ந்தி. – புச்சி²;

658. தத்த² பீதவத்தே²தி பரிஸுத்³த⁴சாமீகரபப⁴ஸ்ஸரதாய பீதோபா⁴ஸனிவாஸனே. பீதத⁴ஜேதி விமானத்³வாரே ரதே² ச ஸமுஸ்ஸிதஹேமமயவிபுலகேதுபா⁴வதோ பீதோபா⁴ஸத⁴ஜே. பீதாலங்காரபூ⁴ஸிதேதி பீதோபா⁴ஸேஹி ஆப⁴ரணேஹி அலங்கதே. ஸதிபி அலங்காரானம் நானாவித⁴ரம்ஸிஜாலஸமுஜ்ஜலவிவித⁴ரதனவிசித்தபா⁴வே தாதி³ஸஸுசரிதவிஸேஸனிப்³ப³த்ததாய பன ஸுபரிஸுத்³த⁴சாமீகரமரீசிஜாலவிஜ்ஜோதிதத்தா விஸேஸதோ பீதனிபா⁴ஸானி தஸ்ஸா ஆப⁴ரணானி அஹேஸும். பீதந்தராஹீதி பீதவண்ணேஹி உத்தரியேஹி. ‘‘ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³’’ந்திஆதீ³ஸு (பாரா. 523-524) நிவாஸனே அந்தரஸத்³தோ³ ஆக³தோ, இத⁴ பன ‘‘அந்தரஸாடகா’’திஆதீ³ஸு விய உத்தரியே த³ட்ட²ப்³போ³. அந்தரா உத்தரியம் உத்தராஸங்கோ³ உபஸம்ப்³யானந்தி பரியாயஸத்³தா³ ஏதே. வக்³கூ³ஹீதி ஸோப⁴னேஹி ஸண்ஹமட்டே²ஹி. அபிளந்தா⁴வ ஸோப⁴ஸீதி த்வம் இமேஹி அலங்காரேஹி அனலங்கதாபி அத்தனோ ரூபஸம்பத்தியாவ ஸோப⁴ஸி. தே பன அலங்காரா தவ ஸரீரம் பத்வா ஸோப⁴ந்தி, தஸ்மா அனலங்கதாபி த்வம் அலங்கதஸதி³ஸீதி அதி⁴ப்பாயோ.

659. கா கம்பு³காயூரத⁴ரேதி கா த்வம் கதரதே³வனிகாயபரியாபன்னா ஸுவண்ணமயபரிஹாரகத⁴ரே, ஸுவண்ணமயகேயூரத⁴ரே வா. கம்பு³பரிஹாரகந்தி ச ஹத்தா²லங்காரவிஸேஸோ வுச்சதி, காயூரந்தி பு⁴ஜாலங்காரவிஸேஸோ. அத² வா கம்பூ³தி ஸுவண்ணம், தஸ்மா கம்பு³காயூரத⁴ரே ஸுவண்ணமயபா³ஹாப⁴ரணத⁴ரேதி அத்தோ². கஞ்சனாவேளபூ⁴ஸிதேதி கஞ்சனமயாவேளபிளந்த⁴னபூ⁴ஸிதே. ஹேமஜாலகஸஞ்ச²ன்னேதி ரதனபரிஸிப்³பி³தேன ஹேமமயேன ஜாலகேன சா²தி³தஸரீரே. நானாரதனமாலினீதி நக்க²த்தமாலாய விய காளபக்க²ரத்தியம் ஸீஸே படிமுக்காஹி விவிதா⁴ஹி ரதனாவலீஹி நானாரதனமாலினீ கா த்வந்தி புச்ச²தி.

660. ஸோவண்ணமயாதிஆதி³ யாஹி ரதனமாலாஹி ஸா தே³வதா நானாரதனமாலினீதி வுத்தா, தாஸம் த³ஸ்ஸனம். தத்த² ஸோவண்ணமயாதி ஸிங்கீ³ஸுவண்ணமயா மாலா. லோஹிதங்க³மயாதி பது³மராகா³தி³ரத்தமணிமயா. மஸாரக³ல்லாதி மஸாரக³ல்லமணிமயா. ஸஹலோஹிதங்கா³தி லோஹிதங்க³மணிமயாஹி ஸத்³தி⁴ம் கப³ரமணிமயா சேவ லோஹிதங்க³ஸங்கா²தரத்தமணிமயா சாதி அத்தோ². பாரேவதக்கீ²ஹி மணீஹி சித்ததாதி பாரேவதக்கி²ஸதி³ஸேஹி மணீஹி யதா²வுத்தமணீஹி ச ஸங்க²தசித்தபா⁴வா இமா தவ கேஸஹத்தே² ரதனமாலாதி அதி⁴ப்பாயோ.

661. கோசி கோசீதி ஏகச்சோ ஏகச்சோ. ஏத்தா²தி ஏதேஸு மாலாதா³மேஸு. மயூரஸுஸ்ஸரோதி மயூரோ விய ஸுந்த³ரனாதோ³. ஹம்ஸஸ்ஸரஞ்ஞோதி ஹம்ஸஸ்ஸரோ அஞ்ஞோ, ஹம்ஸஸதி³ஸஸ்ஸரோ அபரோ. கரவீகஸுஸ்ஸரோதி கரவீகோ விய ஸோப⁴னஸ்ஸரோ. தேஸம் மாலாதா³மானம் யதா² மயூரஸ்ஸரோ, ஹம்ஸஸ்ஸரோ, கரவீகஸ்ஸரோ, ஏவம் வக்³கு³ரூபோ மது⁴ராகாரோ ஸரோ ஸுய்யதி. கிமிவ? பஞ்சங்கி³கம் தூரியமிவப்பவாதி³தம். யதா² குஸலேன வாதி³தே பஞ்சங்கி³கே தூரியே, ஏவம் தேஸம் ஸரோ ஸுய்யதி, வக்³கு³ரூபோதி அத்தோ². பு⁴ம்மத்தே² ஹி இத³ம் உபயோக³வசனம்.

662. நானாவண்ணாஹி தா⁴தூஹீதி அனேகரூபாஹி அக்க²சக்கஈஸாதி³அவயவதா⁴தூஹி. ஸுவிப⁴த்தோவ ஸோப⁴தீதி அவயவானம் அஞ்ஞமஞ்ஞம் யுத்தப்பமாணதாய விப⁴த்திவிபா⁴க³ஸம்பத்தியா ச ஸுவிப⁴த்தோவ ஹுத்வா விராஜதி. அத² வா ஸுவிப⁴த்தோவாதி கேவலம் கம்மனிப்³ப³த்தோபி ஸுஸிக்கி²தேன ஸிப்பாசரியேன விப⁴த்தோவ விரசிதோ விய ஸோப⁴தீதி அத்தோ².

663. கஞ்சனபி³ம்ப³வண்ணேதி ஸாதிஸயம் பீதோபா⁴ஸதாய கஞ்சனபி³ம்ப³கஸதி³ஸே தஸ்மிம் ரதே². கஞ்சனபி³ம்ப³வண்ணேதி வா தஸ்ஸா தே³வதாய ஆலபனம், க³ந்தோ⁴த³கேன தோ⁴வித்வா ஜாதிஹிங்கு³லகரஸேன மஜ்ஜித்வா து³கூலசும்ப³டகேன மஜ்ஜிதகஞ்சனபடிமாஸதி³ஸேதி அத்தோ². பா⁴ஸஸிமம் பதே³ஸந்தி இமம் ஸகலம்பி பூ⁴மிபதே³ஸம் பா⁴ஸயஸி விஜ்ஜோதயஸி.

ஏவம் தே²ரேன புச்சி²தா ஸாபி தே³வதா இமாஹி கா³தா²ஹி ப்³யாகாஸி –

664. ‘‘ஸோவண்ணஜாலம் மணிஸோண்ணசித்திதம், முத்தாசிதம் ஹேமஜாலேன ச²ன்னம்;

பரினிப்³பு³தே கோ³தமே அப்பமேய்யே, பஸன்னசித்தா அஹமாபி⁴ரோபயிம்.

665. ‘‘தாஹம் கம்மம் கரித்வான, குஸலம் பு³த்³த⁴வண்ணிதம்;

அபேதஸோகா ஸுகி²தா, ஸம்பமோதா³மனாமயா’’தி.

664. தத்த² ஸோவண்ணஜாலந்தி ஸரீரப்பமாணேன கதம் ஸுவண்ணமயம் ஜாலம். மணிஸோண்ணசித்திதந்தி ஸீஸாதி³ட்டா²னேஸு ஸீஸூபக³கீ³வூபகா³தி³ஆப⁴ரணவஸேன நானாவிதே⁴ஹி மணீஹி ச ஸுவண்ணேன ச சித்திதம். முத்தாசிதந்தி அந்தரந்தரா ஆப³த்³தா⁴ஹி முத்தாவலீஹி ஆசிதம். ஹேமஜாலேன ச²ன்னந்தி ஹேமமயேன பபா⁴ஜாலேன ச²ன்னம். தஞ்ஹி நானாவிதே⁴ஹி மணீஹி சேவ ஸுவண்ணேன ச சித்திதம் முத்தாவலீஹி ஆசிதம்பி ஸுபரிஸுத்³த⁴ஸ்ஸ ரத்தஸுவண்ணஸ்ஸேவ யேபு⁴ய்யதாய தி³வாகரகிரணஸம்ப²ஸ்ஸதோ அதிவிய பப⁴ஸ்ஸரேன ஹேமமயேன பபா⁴ஜாலேன ஸஞ்சா²தி³தம் ஏகோபா⁴ஸம் ஹுத்வா கஞ்சனாதா³ஸம் விய திட்ட²தி. பரினிப்³பு³தேதி அனுபாதி³ஸேஸாய நிப்³பா³னதா⁴துயா பரினிப்³பு³தே. கோ³தமேதி ப⁴க³வந்தம் கோ³த்தேன நித்³தி³ஸதி. அப்பமேய்யேதி கு³ணானுபா⁴வதோ பமினிதும் அஸக்குணேய்யே. பஸன்னசித்தாதி கம்மப²லவிஸயாய பு³த்³தா⁴ரம்மணாய ச ஸத்³தா⁴ய பஸன்னமானஸா. அபி⁴ரோபயிந்தி பூஜாவஸேன ஸரீரே ரோபேஸிம் படிமுஞ்சிம்.

665. தாஹந்தி தம் அஹம். குஸலந்தி குச்சி²தஸலனாதி³அத்தே²ன குஸலம். பு³த்³த⁴வண்ணிதந்தி ‘‘யாவதா, பி⁴க்க²வே, ஸத்தா அபதா³ வா த்³விபதா³ வா’’திஆதி³னா (ஸம். நி. 5.139; அ. நி. 4.34) ஸம்மாஸம்பு³த்³தே⁴ன பஸத்த²ம். அபேதஸோகாதி ஸோகஹேதூனம் போ⁴க³ப்³யஸனாதீ³னம் அபா⁴வேன அபக³தஸோகா. தேன சித்தது³க்கா²பா⁴வமாஹ. ஸுகி²தாதி ஸஞ்ஜாதஸுகா² ஸுக²ப்பத்தா. ஏதேன ஸரீரது³க்கா²பா⁴வம் வத³தி. சித்தது³க்கா²பா⁴வேன சஸ்ஸா பமோதா³பத்தி, ஸரீரது³க்கா²பா⁴வேன அரோக³தா. தேனாஹ ‘‘ஸம்பமோதா³மனாமயா’’தி. ஸேஸம் வுத்தனயமேவ. அயஞ்ச அத்தோ² ததா³ அத்தனா தே³வதாய ச கதி²தனியாமேனேவ ஸங்கீ³திகாலே ஆயஸ்மதா நாரதே³ன த⁴ம்மஸங்கா³ஹகானம் ஆரோசிதோ, தே ச தம் ததே²வ ஸங்க³ஹம் ஆரோபயிம்ஸூதி.

மல்லிகாவிமானவண்ணனா நிட்டி²தா.