9. விஸாலக்கி²விமானவண்ணனா

கா நாம த்வம் விஸாலக்கீ²தி விஸாலக்கி²விமானம். தஸ்ஸ கா உப்பத்தி? ப⁴க³வதி பரினிப்³பு³தே ரஞ்ஞா அஜாதஸத்துனா அத்தனா படிலத்³தா⁴ ப⁴க³வதா ஸரீரதா⁴துயோ க³ஹேத்வா ராஜக³ஹே தூ²பே ச மஹே ச கதே ராஜக³ஹவாஸினீ ஏகா மாலாகாரதீ⁴தா ஸுனந்தா³ நாம உபாஸிகா அரியஸாவிகா ஸோதாபன்னா பிதும் கே³ஹதோ பேஸிதம் ப³ஹும் மாலஞ்ச க³ந்த⁴ஞ்ச பேஸேத்வா தே³வஸிகம் சேதியே பூஜம் காரேஸி, உபோஸத²தி³வஸேஸு பன ஸயமேவ க³ந்த்வா பூஜம் அகாஸி. ஸா அபரபா⁴கே³ அஞ்ஞதரேன ரோகே³ன பு²ட்டா² காலம் கத்வா ஸக்கஸ்ஸ தே³வரஞ்ஞோ பரிசாரிகா ஹுத்வா நிப்³ப³த்தி. அதே²கதி³வஸம் ஸா ஸக்கேன தே³வானமிந்தே³ன ஸஹ சித்தலதாவனம் பாவிஸி. தத்த² ச அஞ்ஞாஸம் தே³வதானம் பபா⁴ புப்பா²தீ³னம் பபா⁴ஹி படிஹதா ஹுத்வா விசித்தவண்ணா ஹோதி, ஸுனந்தா³ய பன பபா⁴ தாஹி அனபி⁴பூ⁴தா ஸபா⁴வேனேவ அட்டா²ஸி. தம் தி³ஸ்வா ஸக்கோ தே³வராஜா தாய கதஸுசரிதம் ஞாதுகாமோ இமாஹி கா³தா²ஹி புச்சி² –

666. ‘‘கா நாம த்வம் விஸாலக்கி², ரம்மே சித்தலதாவனே;

ஸமந்தா அனுபரியாஸி, நாரீக³ணபுரக்க²தா.

667. ‘‘யதா³ தே³வா தாவதிம்ஸா, பவிஸந்தி இமம் வனம்;

ஸயோக்³கா³ ஸரதா² ஸப்³பே³, சித்ரா ஹோந்தி இதா⁴க³தா.

668. ‘‘துய்ஹஞ்ச இத⁴ பத்தாய, உய்யானே விசரந்தியா;

காயே ந தி³ஸ்ஸதீ சித்தம், கேன ரூபம் தவேதி³ஸம்;

தே³வதே புச்சி²தாசிக்க², கிஸ்ஸ கம்மஸ்ஸித³ம் ப²ல’’ந்தி.

666. தத்த² கா நாம த்வந்தி புரிமத்தபா⁴வே கா நாம கீதி³ஸீ நாம த்வம், யத்த² கதேன ஸுசரிதேன அயம் தே ஈதி³ஸீ ஆனுபா⁴வஸம்பத்தி அஹோஸீதி அதி⁴ப்பாயோ. விஸாலக்கீ²தி விபுலலோசனே.

667. யதா³தி யஸ்மிம் காலே. இமம் வனந்தி இமம் சித்தலதானாமகம் உபவனம். சித்ரா ஹோந்தீதி இமஸ்மிம் சித்தலதாவனே விசித்தபபா⁴ஸம்ஸக்³கே³ன அத்தனோ ஸரீரவத்தா²லங்காராதீ³னம் பகதிஓபா⁴ஸதோபி விஸிட்ட²பா⁴வப்பத்தியா விசித்ராகாரா ஹோந்தி. இதா⁴க³தாதி இத⁴ ஆக³தா ஸம்பத்தா, இத⁴ வா ஆக³மனஹேது.

668. இத⁴ பத்தாயாதி இமம் டா²னம் ஸம்பத்தாய உபக³தாய. கேன ரூபம் தவேதி³ஸந்தி கேன காரணேன தவ ரூபம் ஸரீரம் ஏதி³ஸம் ஏவரூபம், சித்தலதாவனஸ்ஸ பப⁴ம் அபி⁴ப⁴வந்தம் திட்ட²தீதி அதி⁴ப்பாயோ.

ஏவம் ஸக்கேன புட்டா² ஸா தே³வதா இமாஹி கா³தா²ஹி ப்³யாகாஸி –

669. ‘‘யேன கம்மேன தே³விந்த³, ரூபம் மய்ஹம் க³தீ ச மே;

இத்³தி⁴ ச ஆனுபா⁴வோ ச, தம் ஸுணோஹி புரிந்த³த³.

670. ‘‘அஹம் ராஜக³ஹே ரம்மே, ஸுனந்தா³ நாமுபாஸிகா;

ஸத்³தா⁴ ஸீலேன ஸம்பன்னா, ஸம்விபா⁴க³ரதா ஸதா³.

671. ‘‘அச்சா²த³னஞ்ச ப⁴த்தஞ்ச, ஸேனாஸனம் பதீ³பியம்;

அதா³ஸிம் உஜுபூ⁴தேஸு, விப்பஸன்னேன சேதஸா.

672. ‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்.

673. ‘‘உபோஸத²ம் உபவஸிஸ்ஸம், ஸதா³ ஸீலேஸு ஸம்வுதா;

ஸஞ்ஞமா ஸம்விபா⁴கா³ ச, விமானம் ஆவஸாமஹம்.

674. ‘‘பாணாதிபாதா விரதா, முஸாவாதா³ ச ஸஞ்ஞதா;

தே²ய்யா ச அதிசாரா ச, மஜ்ஜபானா ச ஆரகா.

675. ‘‘பஞ்சஸிக்கா²பதே³ ரதா, அரியஸச்சான கோவிதா³;

உபாஸிகா சக்கு²மதோ, கோ³தமஸ்ஸ யஸஸ்ஸினோ.

676. ‘‘தஸ்ஸா மே ஞாதிகுலா தா³ஸீ, ஸதா³ மாலாபி⁴ஹாரதி;

தாஹம் ப⁴க³வதோ தூ²பே, ஸப்³ப³மேவாபி⁴ரோபயிம்.

677. ‘‘உபோஸதே² சஹம் க³ந்த்வா, மாலாக³ந்த⁴விலேபனம்;

தூ²பஸ்மிம் அபி⁴ரோபேஸிம், பஸன்னா ஸேஹி பாணிபி⁴.

678. ‘‘தேன கம்மேன தே³விந்த³, ரூபம் மய்ஹம் க³தீ ச மே;

இத்³தி⁴ ச ஆனுபா⁴வோ ச, யம் மாலம் அபி⁴ரோபயிம்.

679. ‘‘யஞ்ச ஸீலவதீ ஆஸிம், ந தம் தாவ விபச்சதி;

ஆஸா ச பன மே தே³விந்த³, ஸகதா³கா³மினீ ஸிய’’ந்தி.

669. தத்த² க³தீதி அயம் தே³வக³தி, நிப்³ப³த்தி வா. இத்³தீ⁴தி அயம் தே³வித்³தி⁴, அதி⁴ப்பாயஸமிஜ்ஜ²னம் வா. ஆனுபா⁴வோதி பபா⁴வோ. புரிந்த³தா³தி ஸக்கம் ஆலபதி. ஸோ ஹி புரே தா³னம் அதா³ஸீதி ‘‘புரிந்த³தோ³’’தி வுச்சதி.

676. ஞாதிகுலாதி பிது கே³ஹம் ஸந்தா⁴ய வத³தி. ஸதா³ மாலாபி⁴ஹாரதீதி ஸதா³ ஸப்³ப³காலம் தி³வஸே தி³வஸே ஞாதிகுலதோ தா³ஸியா புப்ப²ம் மய்ஹம் அபி⁴ஹரீயதி. ஸப்³ப³மேவாபி⁴ரோபயிந்தி மய்ஹம் பிளந்த⁴னத்தா²ய பிதுகே³ஹதோ ஆஹடம் மாலம் அஞ்ஞஞ்ச க³ந்தா⁴தி³ம் ஸப்³ப³மேவ அத்தனா அபரிபு⁴ஞ்ஜித்வா ப⁴க³வதோ தூ²பே பூஜனவஸேன அபி⁴ரோபயிம் பூஜம் காரேஸிம்.

677-8. உபோஸதே² சஹம் க³ந்த்வாதி உபோஸத²தி³வஸே அஹமேவ தூ²பட்டா²னம் க³ந்த்வா. யம் மாலம் அபி⁴ரோபயிந்தி யம் ததா³ ப⁴க³வதோ தூ²பே மாலாக³ந்தா⁴பி⁴ரோபனம் கதம், தேன கம்மேனாதி யோஜனா.

679. ந தம் தாவ விபச்சதீதி யம் ஸீலவதீ ஆஸிம், தம் ஸீலரக்க²ணம் தம் ரக்கி²தம் ஸீலம் பூஜாமயபுஞ்ஞஸ்ஸ ப³லவபா⁴வேன அலத்³தோ⁴காஸம் ந தாவ விபச்சதி, ந விபச்சிதும் ஆரத்³த⁴ம், அபரஸ்மிம்யேவ அத்தபா⁴வே தஸ்ஸ விபாகோதி அத்தோ². ஆஸா ச பன மே தே³விந்த³, ஸகதா³கா³மினீ ஸியந்தி ‘‘கத²ம் நு கோ² அஹம் ஸகதா³கா³மினீ ப⁴வேய்ய’’ந்தி பத்த²னா ச மே தே³விந்த³, அரியத⁴ம்மவிஸயாவ, ந ப⁴வவிஸேஸவிஸயா. ஸா பன ஸப்பிமண்ட³ம் இச்ச²தோ த³தி⁴தோ பசிதம் விய அனிப்பா²தி³னீதி த³ஸ்ஸேதி. ஸேஸம் வுத்தனயமேவ.

இமம் பன அத்த²ம் ஸக்கோ தே³வானமிந்தோ³ அத்தனா ச தாய தே³வதீ⁴தாய ச வுத்தனியாமேனேவ ஆயஸ்மதோ வங்கீ³ஸத்தே²ரஸ்ஸ ஆரோசேஸி. ஆயஸ்மா வங்கீ³ஸோ ஸங்கீ³திகாலே த⁴ம்மஸங்கா³ஹகானம் மஹாதே²ரானம் ஆரோசேஸி, தே ச தம் ததே²வ ஸங்கீ³திம் ஆரோபயிம்ஸூதி.

விஸாலக்கி²விமானவண்ணனா நிட்டி²தா.