7. த்³விதா⁴பத²ஸுத்தவண்ணனா

77. ஸத்தமே அத்³தா⁴னமக்³க³படிபன்னோதி அத்³தா⁴னஸங்கா²தம் தீ³க⁴மக்³க³ம் படிபன்னோ க³ச்ச²ந்தோ ஹோதி. நாக³ஸமாலேனாதி ஏவம்னாமகேன தே²ரேன. பச்சா²ஸமணேனாதி அயம் ததா³ ப⁴க³வதோ உபட்டா²கோ அஹோஸி. தேன நம் பச்சா²ஸமணம் கத்வா மக்³க³ம் படிபஜ்ஜி. ப⁴க³வதோ ஹி பட²மபோ³தி⁴யம் வீஸதிவஸ்ஸானி அனிப³த்³தா⁴ உபட்டா²கா அஹேஸும், ததோ பரம் யாவ பரினிப்³பா³னா பஞ்சவீஸதிவஸ்ஸானி ஆயஸ்மா ஆனந்தோ³ சா²யாவ உபட்டா²ஸி. அயம் பன அனிப³த்³து⁴பட்டா²ககாலோ. தேன வுத்தம் – ‘‘ஆயஸ்மதா நாக³ஸமாலேன பச்சா²ஸமணேனா’’தி. த்³விதா⁴பத²ந்தி த்³விதா⁴பூ⁴தம் மக்³க³ம். ‘‘த்³வேதா⁴பத²’’ந்திபி பட²ந்தி ஆயஸ்மா நாக³ஸமாலோ அத்தனா புப்³பே³ தத்த² கதபரிசயத்தா உஜுபா⁴வஞ்சஸ்ஸ ஸந்தா⁴ய வத³தி ‘‘அயம், ப⁴ந்தே ப⁴க³வா, பந்தோ²’’தி.

ப⁴க³வா பன ததா³ தஸ்ஸ ஸபரிஸ்ஸயபா⁴வம் ஞத்வா ததோ அஞ்ஞம் மக்³க³ம் க³ந்துகாமோ ‘‘அயம், நாக³ஸமால, பந்தோ²’’தி ஆஹ. ‘‘ஸபரிஸ்ஸயோ’’தி ச வுத்தே அஸத்³த³ஹித்வா ‘‘ப⁴க³வா ந தத்த² பரிஸ்ஸயோ’’தி வதே³ய்ய, தத³ஸ்ஸ தீ³க⁴ரத்தம் அஹிதாய து³க்கா²யாதி ‘‘ஸபரிஸ்ஸயோ’’தி ந கதே²ஸி. திக்க²த்தும் ‘‘அயம் பந்தோ², இமினா க³ச்சா²மா’’தி வத்வா சதுத்த²வாரே ‘‘ந ப⁴க³வா இமினா மக்³கே³ன க³ந்தும் இச்ச²தி, அயமேவ ச உஜுமக்³கோ³, ஹந்தா³ஹம் ப⁴க³வதோ பத்தசீவரம் த³த்வா இமினா மக்³கே³ன க³மிஸ்ஸாமீ’’தி சிந்தேத்வா ஸத்து² பத்தசீவரம் தா³தும் அஸக்கோந்தோ பூ⁴மியம் ட²பேத்வா பச்சுபட்டி²தேன து³க்க²ஸம்வத்தனிகேன கம்முனா சோதி³யமானோ ப⁴க³வதோ வசனம் அனாதி³யித்வாவ பக்காமி. தேன வுத்தம் – ‘‘அத² கோ² ஆயஸ்மா நாக³ஸமாலோ ப⁴க³வதோ பத்தசீவரம் தத்தே²வ ச²மாயம் நிக்கி²பித்வா பக்காமீ’’தி. தத்த² ப⁴க³வதோ பத்தசீவரந்தி அத்தனோ ஹத்த²க³தம் ப⁴க³வதோ பத்தசீவரம். தத்தே²வாதி தஸ்மிம்யேவ மக்³கே³ ச²மாயம் பத²வியம் நிக்கி²பித்வா பக்காமி. இத³ம் வோ ப⁴க³வா பத்தசீவரம், ஸசே இச்ச²த², க³ண்ஹத², யதி³ அத்தனா இச்சி²தமக்³க³ம்யேவ க³ந்துகாமத்தா²தி அதி⁴ப்பாயோ. ப⁴க³வாபி அத்தனோ பத்தசீவரம் ஸயமேவ க³ஹேத்வா யதா²தி⁴ப்பேதம் மக்³க³ம் படிபஜ்ஜி.

அந்தராமக்³கே³ சோரா நிக்க²மித்வாதி ததா³ கிர பஞ்சஸதா புரிஸா லுத்³தா³ லோஹிதபாணினோ ராஜாபராதி⁴னோ ஹுத்வா அரஞ்ஞம் பவிஸித்வா சோரிகாய ஜீவிகம் கப்பேந்தா ‘‘பாரிபந்தி²கபா⁴வேன ரஞ்ஞோ ஆயபத²ம் பச்சி²ந்தி³ஸ்ஸாமா’’தி மக்³க³ஸமீபே அரஞ்ஞே திட்ட²ந்தி. தே தே²ரம் தேன மக்³கே³ன க³ச்ச²ந்தம் தி³ஸ்வா ‘‘அயம் ஸமணோ இமினா மக்³கே³ன ஆக³ச்ச²தி, அவளஞ்ஜிதப்³ப³ம் மக்³க³ம் வளஞ்ஜேதி, அம்ஹாகம் அத்தி²பா⁴வம் ந ஜானாதி, ஹந்த³ நம் ஜானாபேஸ்ஸாமா’’தி குஜ்ஜி²த்வா க³ஹனட்டா²னதோ வேகே³ன நிக்க²மித்வா ஸஹஸா தே²ரம் பூ⁴மியம் பாதேத்வா ஹத்த²பாதே³ஹி கோட்டேத்வா மத்திகாபத்தஞ்சஸ்ஸ பி⁴ந்தி³த்வா சீவரம் க²ண்டா³க²ண்டி³கம் சி²ந்தி³த்வா பப்³ப³ஜிதத்தா ‘‘தம் ந ஹனாம, இதோ பட்டா²ய இமஸ்ஸ மக்³க³ஸ்ஸ பரிஸ்ஸயபா⁴வம் ஜானாஹீ’’தி விஸ்ஸஜ்ஜேஸும். தேன வுத்தம் – ‘‘அத² கோ² ஆயஸ்மதோ…பே… விப்பா²லேஸு’’ந்தி.

ப⁴க³வாபி ‘‘அயம் தேன மக்³கே³ன க³தோ சோரேஹி பா³தி⁴தோ மம் பரியேஸித்வா இதா³னேவ ஆக³மிஸ்ஸதீ’’தி ஞத்வா தோ²கம் க³ந்த்வா மக்³கா³ ஓக்கம்ம அஞ்ஞதரஸ்மிம் ருக்க²மூலே நிஸீதி³. ஆயஸ்மாபி கோ² நாக³ஸமாலோ பச்சாக³ந்த்வா ஸத்தா²ரா க³தமக்³க³மேவ க³ஹேத்வா க³ச்ச²ந்தோ தஸ்மிம் ருக்க²மூலே ப⁴க³வந்தம் பஸ்ஸித்வா உபஸங்கமித்வா வந்தி³த்வா தம் பவத்திம் ஸப்³ப³ம் ஆரோசேஸி. தேன வுத்தம் – ‘‘அத² கோ² ஆயஸ்மா நாக³ஸமாலோ…பே… ஸங்கா⁴டிஞ்ச விப்பா²லேஸு’’ந்தி.

ஏதமத்த²ம் விதி³த்வாதி ஏதம் ஆயஸ்மதோ நாக³ஸமாலஸ்ஸ அத்தனோ வசனம் அனாதி³யித்வா அகே²மந்தமக்³க³க³மனம், அத்தனோ ச கே²மந்தமக்³க³க³மனம் விதி³த்வா தத³த்த²தீ³பனம் இமம் உதா³னம் உதா³னேஸி.

தத்த² ஸத்³தி⁴ம் சரந்தி ஸஹ சரந்தோ. ஏகதோ வஸந்தி இத³ம் தஸ்ஸேவ வேவசனம், ஸஹ வஸந்தோதி அத்தோ². மிஸ்ஸோ அஞ்ஞஜனேன வேத³கூ³தி வேதி³தப்³ப³ட்டே²ன வேத³ஸங்கா²தேன சதுஸச்சஅரியமக்³க³ஞாணேன க³தத்தா அதி⁴க³தத்தா, வேத³ஸ்ஸ வா ஸகலஸ்ஸ ஞேய்யஸ்ஸ பாரம் க³தத்தா வேத³கூ³. அத்தனோ ஹிதாஹிதம் ந ஜானாதீதி அஞ்ஞோ, அவித்³வா பா³லோதி அத்தோ². தேன அஞ்ஞேன ஜனேன மிஸ்ஸோ ஸஹசரணமத்தேன மிஸ்ஸோ. வித்³வா பஜஹாதி பாபகந்தி தேன வேத³கூ³பா⁴வேன வித்³வா ஜானந்தோ பாபகம் அப⁴த்³த³கம் அத்தனோ து³க்கா²வஹம் பஜஹாதி, பாபகம் வா அகல்யாணபுக்³க³லம் பஜஹாதி. யதா² கிம்? கோஞ்சோ கீ²ரபகோவ நின்னக³ந்தி யதா² கோஞ்சஸகுணோ உத³கமிஸ்ஸிதே கீ²ரே உபனீதே வினா தோயம் கீ²ரமத்தஸ்ஸேவ பிவனதோ கீ²ரபகோ நின்னட்டா²னக³மனேன நின்னக³ஸங்கா²தம் உத³கம் பஜஹாதி வஜ்ஜேதி, ஏவம் பண்டி³தோ கிர து³ப்பஞ்ஞபுக்³க³லேஹி டா²னனிஸஜ்ஜாதீ³ஸு ஸஹபூ⁴தோபி ஆசாரேன தே பஜஹாதி, ந கதா³சிபி ஸம்மிஸ்ஸோ ஹோதி.

ஸத்தமஸுத்தவண்ணனா நிட்டி²தா.