6. பாடலிகா³மியஸுத்தவண்ணனா

76. ச²ட்டே² மக³தே⁴ஸூதி மக³த⁴ரட்டே². மஹதாதி இதா⁴பி கு³ணமஹத்தேனபி அபரிச்சி²ன்னஸங்க்²யத்தா க³ணனமஹத்தேனபி மஹதா பி⁴க்கு²ஸங்கே⁴ன. பாடலிகா³மோதி ஏவம்னாமகோ மக³த⁴ரட்டே² ஏகோ கா³மோ. தஸ்ஸ கிர கா³மஸ்ஸ மாபனதி³வஸே கா³மக்³க³ஹணட்டா²னே த்³வே தயோ பாடலங்குரா பத²விதோ உப்³பி⁴ஜ்ஜித்வா நிக்க²மிம்ஸு. தேன தம் ‘‘பாடலிகா³மோ’’த்வேவ வோஹரிம்ஸு. தத³வஸரீதி தம் பாடலிகா³மம் அவஸரி அனுபாபுணி. கதா³ பன ப⁴க³வா பாடலிகா³மம் அனுபாபுணி? ஹேட்டா² வுத்தனயேன ஸாவத்தி²யம் த⁴ம்மஸேனாபதினோ சேதியம் காராபேத்வா ததோ நிக்க²மித்வா ராஜக³ஹே வஸந்தோ தத்த² ஆயஸ்மதோ மஹாமோக்³க³ல்லானஸ்ஸ ச சேதியம் காராபேத்வா ததோ நிக்க²மித்வா அம்ப³லட்டி²காயம் வஸித்வா அதுரிதசாரிகாவஸேன ஜனபத³சாரிகம் சரந்தோ தத்த² தத்த² ஏகரத்திவாஸேன வஸித்வா லோகம் அனுக்³க³ண்ஹந்தோ அனுக்கமேன பாடலிகா³மம் அனுபாபுணி.

பாடலிகா³மியாதி பாடலிகா³மவாஸினோ உபாஸகா. தே கிர ப⁴க³வதோ பட²மத³ஸ்ஸனேன கேசி ஸரணேஸு, கேசி ஸீலேஸு, கேசி ஸரணேஸு ச ஸீலேஸு ச பதிட்டி²தா. தேன வுத்தம் ‘‘உபாஸகா’’தி. யேன ப⁴க³வா தேனுபஸங்கமிம்ஸூதி பாடலிகா³மே கிர அஜாதஸத்துனோ லிச்ச²விராஜூனஞ்ச மனுஸ்ஸா காலேன காலம் க³ந்த்வா கே³ஹஸாமிகே கே³ஹதோ நீஹரித்வா மாஸம்பி அட்³ட⁴மாஸம்பி வஸந்தி. தேன பாடலிகா³மவாஸினோ மனுஸ்ஸா நிச்சுபத்³து³தா ‘‘ஏதேஸஞ்சேவ ஆக³தகாலே வஸனட்டா²னம் ப⁴விஸ்ஸதீ’’தி ஏகபஸ்ஸே இஸ்ஸரானம் ப⁴ண்ட³ப்படிஸாமனட்டா²னம், ஏகபஸ்ஸே வஸனட்டா²னம், ஏகபஸ்ஸே ஆக³ந்துகானம் அத்³தி⁴கமனுஸ்ஸானம், ஏகபஸ்ஸே த³லித்³தா³னம் கபணமனுஸ்ஸானம், ஏகபஸ்ஸே கி³லானானம் வஸனட்டா²னம் ப⁴விஸ்ஸதீதி ஸப்³பே³ஸம் அஞ்ஞமஞ்ஞம் அக⁴ட்டேத்வா வஸனப்பஹோனகம் நக³ரமஜ்ஜே² மஹாஸாலம் காரேஸும், தஸ்ஸா நாமம் ஆவஸதா²கா³ரந்தி. தம் தி³வஸஞ்ச நிட்டா²னம் அக³மாஸி. தே தத்த² க³ந்த்வா ஹத்த²கம்மஸுதா⁴கம்மசித்தகம்மாதி³வஸேன ஸுபரினிட்டி²தம் ஸுஸஜ்ஜிதம் தே³வவிமானஸதி³ஸம் தம் த்³வாரகோட்ட²கதோ பட்டா²ய ஓலோகேத்வா ‘‘இத³ம் ஆவஸதா²கா³ரம் அதிவிய மனோரமம் ஸஸ்ஸிரிகம், கேன நு கோ² பட²மம் பரிபு⁴த்தம் அம்ஹாகம் தீ³க⁴ரத்தம் ஹிதாய ஸுகா²ய அஸ்ஸா’’தி சிந்தேஸும், தஸ்மிம்யேவ ச க²ணே ‘‘ப⁴க³வா தம் கா³மம் அனுப்பத்தோ’’தி அஸ்ஸோஸும். தேன தே உப்பன்னபீதிஸோமனஸ்ஸா ‘‘அம்ஹேஹி ப⁴க³வா க³ந்த்வாபி ஆனேதப்³போ³ ஸியா, ஸோ பன ஸயமேவ அம்ஹாகம் வஸனட்டா²னம் ஸம்பத்தோ, அஜ்ஜ மயம் ப⁴க³வந்தம் இத⁴ வஸாபேத்வா பட²மம் பரிபு⁴ஞ்ஜாபேஸ்ஸாம ததா² பி⁴க்கு²ஸங்க⁴ம், பி⁴க்கு²ஸங்கே⁴ ஆக³தே தேபிடகம் பு³த்³த⁴வசனம் ஆக³தமேவ ப⁴விஸ்ஸதி, ஸத்தா²ரம் மங்க³லம் வதா³பேஸ்ஸாம, த⁴ம்மம் கதா²பேஸ்ஸாம. இதி தீஹி ரதனேஹி பரிபு⁴த்தே பச்சா² அம்ஹாகஞ்ச பரேஸஞ்ச பரிபோ⁴கோ³ ப⁴விஸ்ஸதி, ஏவம் நோ தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி ஸன்னிட்டா²னம் கத்வா ஏதத³த்த²மேவ ப⁴க³வந்தம் உபஸங்கமிம்ஸு. தஸ்மா ஏவமாஹம்ஸு – ‘‘அதி⁴வாஸேது நோ, ப⁴ந்தே ப⁴க³வா, ஆவஸதா²கா³ர’’ந்தி.

யேன ஆவஸதா²கா³ரம் தேனுபஸங்கமிம்ஸூதி கிஞ்சாபி தம் தம் தி³வஸமேவ பரினிட்டி²தத்தா தே³வவிமானம் விய ஸுஸஜ்ஜிதம் ஸுபடிஜக்³கி³தம், பு³த்³தா⁴ரஹம் பன கத்வா ந பஞ்ஞத்தம், ‘‘பு³த்³தா⁴ நாம அரஞ்ஞஜ்ஜா²ஸயா அரஞ்ஞாராமா, அந்தோகா³மே வஸேய்யும் வா நோ வா, தஸ்மா ப⁴க³வதோ ருசிம் ஜானித்வாவ பஞ்ஞாபேஸ்ஸாமா’’தி சிந்தேத்வா தே ப⁴க³வந்தம் உபஸங்கமிம்ஸு, இதா³னி ப⁴க³வதோ ருசிம் ஜானித்வா ததா² பஞ்ஞாபேதுகாமா யேன ஆவஸதா²கா³ரம் தேனுபஸங்கமிம்ஸு. ஸப்³ப³ஸந்த²ரிம் ஆவஸதா²கா³ரம் ஸந்த²ரித்வாதி யதா² ஸப்³ப³மேவ ஸந்த²தம் ஹோதி, ஏவம் தம் ஸந்த²ரித்வா ஸப்³ப³பட²மம் தாவ ‘‘கோ³மயம் நாம ஸப்³ப³மங்க³லேஸு வத்ததீ’’தி ஸுதா⁴பரிகம்மகதம்பி பூ⁴மிம் அல்லகோ³மயேன ஓபுஞ்ஜாபேத்வா பரிஸுக்க²பா⁴வம் ஞத்வா யதா² அக்கந்தட்டா²னே பத³ம் ந பஞ்ஞாயதி, ஏவம் சதுஜ்ஜாதியக³ந்தே⁴ஹி லிம்பேத்வா உபரி நானாவண்ணகடஸாரகே ஸந்த²ரித்வா தேஸம் உபரி மஹாபிட்டி²ககோஜவாதி³ம் கத்வா ஹத்த²த்த²ரணாதீ³ஹி நானாவண்ணேஹி அத்த²ரணேஹி ஸந்த²ரிதப்³ப³யுத்தகம் ஸப்³போ³காஸம் ஸந்த²ராபேஸும். தேன வுத்தம் – ‘‘ஸப்³ப³ஸந்த²ரிம் ஆவஸதா²கா³ரம் ஸந்த²ரித்வா’’தி.

ஆஸனானஞ்ஹி மஜ்ஜ²ட்டா²னே தாவ மங்க³லத²ம்ப⁴ம் நிஸ்ஸாய மஹாரஹம் பு³த்³தா⁴ஸனம் பஞ்ஞாபேத்வா தத்த² யம் யம் முது³கஞ்ச மனோரமஞ்ச பச்சத்த²ரணம், தம் தம் பச்சத்த²ரித்வா உப⁴தோலோஹிதகம் மனுஞ்ஞத³ஸ்ஸனம் உபதா⁴னம் உபத³ஹித்வா உபரி ஸுவண்ணரஜததாரகாவிசித்தம் விதானம் ப³ந்தி⁴த்வா க³ந்த⁴தா³மபுப்ப²தா³மாதீ³ஹி அலங்கரித்வா ஸமந்தா த்³வாத³ஸஹத்தே² டா²னே புப்ப²ஜாலம் காரேத்வா திம்ஸஹத்த²மத்தட்டா²னம் படஸாணியா பரிக்கி²பாபேத்வா பச்சி²மபி⁴த்திம் நிஸ்ஸாய பி⁴க்கு²ஸங்க⁴ஸ்ஸ பல்லங்கஅபஸ்ஸயமஞ்சபீடா²தீ³னி பஞ்ஞாபேத்வா உபரி ஸேதபச்சத்த²ரணேஹி பச்சத்த²ராபேத்வா ஸாலாய பாசீனபஸ்ஸம் அத்தனோ நிஸஜ்ஜாயோக்³க³ம் காரேஸும். தம் ஸந்தா⁴ய வுத்தம் ‘‘ஆஸனானி பஞ்ஞாபேத்வா’’தி.

உத³கமணிகந்தி மஹாகுச்சி²கம் உத³கசாடிம். ஏவம் ப⁴க³வா பி⁴க்கு²ஸங்கோ⁴ ச யதா²ருசியா ஹத்த²பாதே³ தோ⁴விஸ்ஸந்தி, முக²ம் விக்கா²லேஸ்ஸந்தீதி தேஸு தேஸு டா²னேஸு மணிவண்ணஸ்ஸ உத³கஸ்ஸ பூரேத்வா வாஸத்தா²ய நானாபுப்பா²னி சேவ உத³கவாஸசுண்ணானி ச பக்கி²பித்வா கத³லிபண்ணேஹி பித³ஹித்வா பதிட்ட²பேஸும். தேன வுத்தம் ‘‘உத³கமணிகம் பதிட்டா²பேத்வா’’தி.

தேலப்பதீ³பம் ஆரோபேத்வாதி ரஜதஸுவண்ணாதி³மயத³ண்ட³தீ³பிகாஸு யோத⁴கரூபவிலாஸக²சிதரூபகாதீ³னம் ஹத்தே² ட²பிதஸுவண்ணரஜதாதி³மயகபல்லிகாஸு தேலப்பதீ³பம் ஜாலயித்வா. யேன ப⁴க³வா தேனுபஸங்கமிம்ஸூதி ஏத்த² பன தே பாடலிகா³மியா உபாஸகா ந கேவலம் ஆவஸதா²கா³ரமேவ, அத² கோ² ஸகலஸ்மிம்பி கா³மே வீதி²யோ ஸஜ்ஜாபேத்வா த⁴ஜே உஸ்ஸாபேத்வா கே³ஹத்³வாரேஸு புண்ணக⁴டே கத³லியோ ச ட²பாபேத்வா ஸகலகா³மம் தீ³பமாலாஹி விப்பகிண்ணதாரகம் விய கத்வா ‘‘கீ²ரபகே தா³ரகே கீ²ரம் பாயேத², த³ஹரகுமாரே லஹும் லஹும் போ⁴ஜேத்வா ஸயாபேத², உச்சாஸத்³த³ம் மா கரித்த², அஜ்ஜ ஏகரத்திம் ஸத்தா² அந்தோகா³மே வஸிஸ்ஸதி, பு³த்³தா⁴ நாம அப்பஸத்³த³காமா ஹோந்தீ’’தி பே⁴ரிம் சராபேத்வா ஸயம் த³ண்ட³தீ³பிகா ஆதா³ய யேன ப⁴க³வா தேனுபஸங்கமிம்ஸு.

அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன ஆவஸதா²கா³ரம் தேனுபஸங்கமீதி ‘‘யஸ்ஸ தா³னி, ப⁴ந்தே, ப⁴க³வா காலம் மஞ்ஞதீ’’தி ஏவம் கிர தேஹி காலே ஆரோசிதே ப⁴க³வா லாகா²ரஸேன திந்தரத்தகோவிளாரபுப்ப²வண்ணம் ரத்தது³பட்டம் கத்தரியா பது³மம் கந்தேந்தோ விய, ஸம்விதா⁴ய திமண்ட³லம் படிச்சா²தே³ந்தோ நிவாஸேத்வா ஸுவண்ணபாமங்கே³ன பது³மகலாபம் பரிக்கி²பந்தோ விய, விஜ்ஜுலதாஸஸ்ஸிரிகம் காயப³ந்த⁴னம் ப³ந்தி⁴த்வா ரத்தகம்ப³லேன க³ஜகும்ப⁴ம் பரியோனந்த⁴ந்தோ விய, ரதனஸதுப்³பே³தே⁴ ஸுவண்ணக்³கி⁴கே பவாளஜாலம் கி²பமானோ விய, மஹதி ஸுவண்ணசேதியே ரத்தகம்ப³லகஞ்சுகம் படிமுஞ்சந்தோ விய, க³ச்ச²ந்தம் புண்ணசந்த³ம் ரத்தவலாஹகேன படிச்சா²தே³ந்தோ விய, கஞ்சனகி³ரிமத்த²கே ஸுபக்கலாகா²ரஸம் பரிஸிஞ்சந்தோ விய, சித்தகூடபப்³ப³தமத்த²கம் விஜ்ஜுலதாஜாலேன பரிக்கி²பந்தோ விய, ஸகலசக்கவாளஸினேருயுக³ந்த⁴ரமஹாபத²விம் சாலேத்வா க³ஹிதனிக்³ரோத⁴பல்லவஸமானவண்ணம் ஸுரத்தவரபம்ஸுகூலம் பாருபித்வா வனக³ஹனதோ நிக்க²ந்தகேஸரஸீஹோ விய, ஸமந்ததோ உத³யபப்³ப³தகூடதோ புண்ணசந்தோ³ விய, பா³லஸூரியோ விய ச அத்தனா நிஸின்னசாருமண்ட³பதோ நிக்க²மி.

அத²ஸ்ஸ காயதோ மேக⁴முக²தோ விஜ்ஜுகலாபா விய ரஸ்மியோ நிக்க²மித்வா ஸுவண்ணரஸதா⁴ராபரிஸேகபிஞ்ஜரபத்தபுப்ப²ப²லஸாகா²விடபே விய ஸமந்ததோ ருக்கே² கரிம்ஸு. தாவதே³வ அத்தனோ அத்தனோ பத்தசீவரமாதா³ய மஹாபி⁴க்கு²ஸங்கோ⁴ ப⁴க³வந்தம் பரிவாரேஸி. தே ச நம் பரிவாரேத்வா டி²தா பி⁴க்கூ² ஏவரூபா அஹேஸும் அப்பிச்சா² ஸந்துட்டா² பவிவித்தா அஸம்ஸட்டா² ஆரத்³த⁴வீரியா வத்தாரோ வசனக்க²மா சோத³கா பாபக³ரஹினோ ஸீலஸம்பன்னா ஸமாதி⁴ஸம்பன்னா பஞ்ஞாஸம்பன்னா விமுத்திஸம்பன்னா விமுத்திஞாணத³ஸ்ஸனஸம்பன்னா. தேஹி பரிவுதோ ப⁴க³வா ரத்தகம்ப³லபரிக்கி²த்தோ விய ஸுவண்ணக்க²ந்தோ⁴, நக்க²த்தபரிவாரிதோ விய புண்ணசந்தோ³, ரத்தபது³மவனஸண்ட³மஜ்ஜ²க³தா விய ஸுவண்ணனாவா, பவாளவேதி³கபரிக்கி²த்தோ விய ஸுவண்ணபாஸாதோ³ விரோசித்த². மஹாகஸ்ஸபப்பமுகா² பன மஹாதே²ரா மேக⁴வண்ணம் பம்ஸுகூலசீவரம் பாருபித்வா மணிவம்மவம்மிதா விய மஹானாகா³ பரிவாரயிம்ஸு வந்தராகா³ பி⁴ன்னகிலேஸா விஜடிதஜடா சி²ன்னப³ந்த⁴னா குலே வா க³ணே வா அலக்³கா³.

இதி ப⁴க³வா ஸயம் வீதராகோ³ வீதராகே³ஹி, வீததோ³ஸோ வீததோ³ஸேஹி, வீதமோஹோ வீதமோஹேஹி, நித்தண்ஹோ நித்தண்ஹேஹி, நிக்கிலேஸோ நிக்கிலேஸேஹி, ஸயம் பு³த்³தோ⁴ அனுபு³த்³தே⁴ஹி பரிவாரிதோ பத்தபரிவாரிதம் விய கேஸரம், கேஸரபரிவாரிதா விய கண்ணிகா, அட்ட²னாக³ஸஹஸ்ஸபரிவாரிதோ விய ச²த்³த³ந்தோ நாக³ராஜா, நவுதிஹம்ஸஸஹஸ்ஸபரிவாரிதோ விய த⁴தரட்டோ² ஹம்ஸராஜா, ஸேனங்க³பரிவாரிதோ விய சக்கவத்திராஜா, மருக³ணபரிவாரிதோ விய ஸக்கோ தே³வராஜா, ப்³ரஹ்மக³ணபரிவாரிதோ விய ஹாரிதமஹாப்³ரஹ்மா, தாராக³ணபரிவாரிதோ விய புண்ணசந்தோ³, அனுபமேன பு³த்³த⁴வேஸேன அபரிமாணேன பு³த்³த⁴விலாஸேன பாடலிகா³மினம் மக்³க³ம் படிபஜ்ஜி.

அத²ஸ்ஸ புரத்தி²மகாயதோ ஸுவண்ணவண்ணா க⁴னபு³த்³த⁴ரஸ்மியோ உட்ட²ஹித்வா அஸீதிஹத்த²ட்டா²னம் அக்³க³ஹேஸும், ததா² பச்சி²மகாயதோ த³க்கி²ணபஸ்ஸதோ வாமபஸ்ஸதோ ஸுவண்ணவண்ணா க⁴னபு³த்³த⁴ரஸ்மியோ உட்ட²ஹித்வா அஸீதிஹத்த²ட்டா²னம் அக்³க³ஹேஸும், உபரிகேஸந்ததோ பட்டா²ய ஸப்³ப³கேஸாவட்டேஹி மோரகீ³வராஜவண்ணா அஸிதா க⁴னபு³த்³த⁴ரஸ்மியோ உட்ட²ஹித்வா க³க³னதலே அஸீதிஹத்த²ட்டா²னம் அக்³க³ஹேஸும், ஹேட்டா²பாத³தலேஹி பவாளவண்ணா ரஸ்மியோ உட்ட²ஹித்வா க⁴னபத²வியம் அஸீதிஹத்த²ட்டா²னம் அக்³க³ஹேஸும், த³ந்ததோ அக்கீ²னம் ஸேதட்டா²னதோ, நகா²னம் மம்ஸவிமுத்தட்டா²னதோ ஓதா³தா க⁴னபு³த்³த⁴ரஸ்மியோ உட்ட²ஹித்வா அஸீதிஹத்த²ட்டா²னம் அக்³க³ஹேஸும், ரத்தபீதவண்ணானம் ஸம்பி⁴ன்னட்டா²னதோ மஞ்ஜேட்ட²வண்ணா ரஸ்மியோ உட்ட²ஹித்வா அஸீதிஹத்த²ட்டா²னம் அக்³க³ஹேஸும், ஸப்³ப³த்த²கமேவ பப⁴ஸ்ஸரா ரஸ்மியோ உட்ட²ஹிம்ஸு. ஏவம் ஸமந்தா அஸீதிஹத்த²ட்டா²னம் ச²ப்³ப³ண்ணா பு³த்³த⁴ரஸ்மியோ விஜ்ஜோதமானா விப்ப²ந்த³மானா விதா⁴வமானா கஞ்சனத³ண்ட³தீ³பிகாதீ³ஹி நிச்ச²ரித்வா ஆகாஸம் பக்க²ந்த³மானா மஹாபதீ³பஜாலா விய, சாதுத்³தீ³பிகமஹாமேக⁴தோ நிக்க²ந்தவிஜ்ஜுலதா விய ச தி³ஸோதி³ஸம் பக்க²ந்தி³ம்ஸு. யாஹி ஸப்³பே³ தி³ஸாபா⁴கா³ ஸுவண்ணசம்பகபுப்பே²ஹி விகிரியமானா விய, ஸுவண்ணக⁴டதோ ஸுவண்ணரஸதா⁴ராஹி ஆஸிஞ்சியமானா விய, பஸாரிதஸுவண்ணபடபரிக்கி²த்தா விய, வேரம்ப⁴வாதேன ஸமுத்³த⁴தகிம்ஸுககணிகாரகோவிளாரபுப்ப²சுண்ணஸமோகிண்ணா விய, சீனபிட்ட²சுண்ணஸம்பரிரஞ்ஜிதா விய ச விரோசிம்ஸு.

ப⁴க³வதோபி அஸீதிஅனுப்³யஞ்ஜனப்³யாமப்பபா⁴பரிக்கே²பஸமுஜ்ஜலம் த்³வத்திம்ஸமஹாபுரிஸலக்க²ணப்படிமண்டி³தம் ஸரீரம் அப்³ப⁴மஹிகாதி³உபக்கிலேஸவிமுத்தம் ஸமுஜ்ஜலந்ததாரகாவபா⁴ஸிதம் விய, க³க³னதலம் விகஸிதம் விய பது³மவனம், ஸப்³ப³பாலிபு²ல்லோ விய யோஜனஸதிகோ பாரிச்ச²த்தகோ, படிபாடியா ட²பிதானம் த்³வத்திம்ஸஸூரியானம் த்³வத்திம்ஸசந்தி³மானம் த்³வத்திம்ஸசக்கவத்தீனம் த்³வத்திம்ஸதே³வராஜானம் த்³வத்திம்ஸமஹாப்³ரஹ்மானம் ஸிரியா ஸிரிம் அபி⁴ப⁴வமானம் விய விரோசித்த², யதா² தம் த³ஸஹி பாரமீஹி த³ஸஹி உபபாரமீஹி த³ஸஹி பரமத்த²பாரமீஹீதி ஸம்மதே³வ பரிபூரிதாஹி ஸமதிம்ஸபாரமிதாஹி அலங்கதம் கப்பஸதஸஹஸ்ஸாதி⁴கானி சத்தாரி அஸங்க்²யேய்யானி தி³ன்னேன தா³னேன ரக்கி²தேன ஸீலேன கதேன கல்யாணகம்மேன ஏகஸ்மிம் அத்தபா⁴வே ஸமோஸரித்வா விபாகம் தா³தும் ஓகாஸம் அலப⁴மானேன ஸம்பா³த⁴ப்பத்தம் விய நிப்³ப³த்திதம் நாவாஸஹஸ்ஸப⁴ண்ட³ம் ஏகம் நாவம் ஆரோபனகாலோ விய, ஸகடஸஹஸ்ஸப⁴ண்ட³ம் ஏகம் ஸகடம் ஆரோபனகாலோ விய, பஞ்சவீஸதியா க³ங்கா³னம் ஸம்பி⁴ன்னமுக²த்³வாரே ஏகதோ ராஸிபூ⁴தகாலோ விய அஹோஸி.

இமாய பு³த்³த⁴ஸிரியா ஓபா⁴ஸமானஸ்ஸபி ப⁴க³வதோ புரதோ அனேகானி த³ண்ட³தீ³பிகாஸஹஸ்ஸானி உக்கி²பிம்ஸு. ததா² பச்ச²தோ வாமபஸ்ஸே த³க்கி²ணபஸ்ஸே ஜாதிகுஸுமசம்பகவனமாலிகாரத்துப்பலனீலுப்பலப³குலஸிந்து³வாராதி³புப்பா²னி சேவ நீலபீதாதி³வண்ணஸுக³ந்த⁴சுண்ணானி ச சாதுத்³தீ³பிகமஹாமேக⁴விஸ்ஸட்டா² ஸலிலவுட்டி²யோ விய விப்பகிரிம்ஸு. பஞ்சங்கி³கதூரியனிக்³கோ⁴ஸா ச பு³த்³த⁴த⁴ம்மஸங்க⁴கு³ணாஸம்யுத்தா து²திகோ⁴ஸா ச ஸப்³பா³ தி³ஸா பூரயமானா முக²ஸம்பா⁴ஸா விய அஹேஸும். தே³வஸுபண்ணனாக³யக்க²க³ந்த⁴ப்³ப³மனுஸ்ஸானம் அக்கீ²னி அமதபானம் விய லபி⁴ம்ஸு. இமஸ்மிம் பன டா²னே ட²த்வா பத³ஸஹஸ்ஸேஹி க³மனவண்ணனம் வத்தும் வட்டதி. தத்ரியம் முக²மத்தம் –

‘‘ஏவம் ஸப்³ப³ங்க³ஸம்பன்னோ, கம்பயந்தோ வஸுந்த⁴ரம்;

அஹேட²யந்தோ பாணானி, யாதி லோகவினாயகோ.

‘‘த³க்கி²ணம் பட²மம் பாத³ம், உத்³த⁴ரந்தோ நராஸபோ⁴;

க³ச்ச²ந்தோ ஸிரிஸம்பன்னோ, ஸோப⁴தே த்³விபது³த்தமோ.

‘‘க³ச்ச²தோ பு³த்³த⁴ஸேட்ட²ஸ்ஸ, ஹேட்டா² பாத³தலம் முது³;

ஸமம் ஸம்பு²ஸதே பூ⁴மிம், ரஜஸானுபலிம்பதி.

‘‘நின்னம் டா²னம் உன்னமதி, க³ச்ச²ந்தே லோகனாயகே;

உன்னதஞ்ச ஸமம் ஹோதி, பத²வீ ச அசேதனா.

‘‘பாஸாணா ஸக்க²ரா சேவ, கத²லா கா²ணுகண்டகா;

ஸப்³பே³ மக்³கா³ விவஜ்ஜந்தி, க³ச்ச²ந்தே லோகனாயகே.

‘‘நாதிதூ³ரே உத்³த⁴ரதி, நச்சாஸன்னே ச நிக்கி²பம்;

அக⁴ட்டயந்தோ நிய்யாதி, உபோ⁴ ஜாணூ ச கோ³ப்ப²கே.

‘‘நாதிஸீக⁴ம் பக்கமதி, ஸம்பன்னசரணோ முனி;

ந சாபி ஸணிகம் யாதி, க³ச்ச²மானோ ஸமாஹிதோ.

‘‘உத்³த⁴ம் அதோ⁴ ச திரியம், தி³ஸஞ்ச விதி³ஸம் ததா²;

ந பேக்க²மானோ ஸோ யாதி, யுக³மத்தம்வபேக்க²தி.

‘‘நாக³விக்கந்தசாரோ ஸோ, க³மனே ஸோப⁴தே ஜினோ;

சாரும் க³ச்ச²தி லோகக்³கோ³, ஹாஸயந்தோ ஸதே³வகே.

‘‘உஸப⁴ராஜாவ ஸோப⁴ந்தோ, சாருசாரீவ கேஸரீ;

தோஸயந்தோ ப³ஹூ ஸத்தே, கா³மம் ஸேட்டோ² உபாக³மீ’’தி. –

வண்ணகாலோ நாம கிரேஸ. ஏவம்விதே⁴ஸு காலேஸு ப⁴க³வதோ ஸரீரவண்ணே வா கு³ணவண்ணே வா த⁴ம்மகதி²கஸ்ஸ தா²மோயேவ பமாணம், சுண்ணியபதே³ஹி கா³தா²ப³ந்தே⁴ஹி யத்தகம் ஸக்கோதி, தத்தகம் வத்தப்³ப³ம். ‘‘து³க்கதி²த’’ந்தி வா ‘‘அதித்தே²ன பக்க²ந்தோ³’’தி வா ந வத்தப்³போ³. அபரிமாணவண்ணா ஹி பு³த்³தா⁴ ப⁴க³வந்தோ, தேஸம் பு³த்³தா⁴பி அனவஸேஸதோ வண்ணம் வத்தும் அஸமத்தா². ஸகலம்பி ஹி கப்பம் வண்ணேந்தா பரியோஸாபேதும் ந ஸக்கோந்தி, பகே³வ இதரா பஜாதி. இமினா ஸிரிவிலாஸேன அலங்கதப்படியத்தம் பாடலிகா³மம் பாவிஸி, பவிஸித்வா ப⁴க³வா பஸன்னசித்தேன ஜனேன புப்ப²க³ந்த⁴தூ⁴மவாஸசுண்ணாதீ³ஹி பூஜியமானோ ஆவஸதா²கா³ரம் பாவிஸி. தேன வுத்தம் – ‘‘அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன ஆவஸதா²கா³ரம் தேனுபஸங்கமீ’’தி.

பாதே³ பக்கா²லேத்வாதி யதி³பி ப⁴க³வதோ பாதே³ ரஜோஜல்லம் ந உபலிம்பதி, தேஸம் பன உபாஸகானம் குஸலாபி⁴வுத்³தி⁴ம் ஆகங்க²ந்தோ பரேஸம் தி³ட்டா²னுக³திம் ஆபஜ்ஜனத்த²ஞ்ச ப⁴க³வா பாதே³ பக்கா²லேதி. அபிச உபாதி³ன்னகஸரீரம் நாம ஸீதம் காதப்³ப³ம்பி ஹோதீதி ஏதத³த்த²ம்பி ப⁴க³வா ந்ஹானபாத³தோ⁴வனாதீ³னி கரோதியேவ. ப⁴க³வந்தம்யேவ புரக்க²த்வாதி ப⁴க³வந்தம் புரதோ கத்வா. தத்த² ப⁴க³வா பி⁴க்கூ²னஞ்சேவ உபாஸகானஞ்ச மஜ்ஜே² நிஸின்னோ க³ந்தோ⁴த³கேன ந்ஹாபேத்வா து³கூலசும்ப³டகேன வோத³கம் கத்வா ஜாதிஹிங்கு³லகேன மஜ்ஜித்வா ரத்தகம்ப³லேன பலிவேடே²த்வா பீடே² ட²பிதா ரத்தஸுவண்ணக⁴னபடிமா விய அதிவிரோசித்த².

அயம் பனேத்த² போராணானம் வண்ணப⁴ணனமக்³கோ³ –

‘‘க³ந்த்வான மண்ட³லமாளம், நாக³விக்கந்தசாரணோ;

ஓபா⁴ஸயந்தோ லோகக்³கோ³, நிஸீதி³ வரமாஸனே.

‘‘தஹிம் நிஸின்னோ நரத³ம்மஸாரதி²,

தே³வாதிதே³வோ ஸதபுஞ்ஞலக்க²ணோ;

பு³த்³தா⁴ஸனே மஜ்ஜ²க³தோ விரோசதி,

ஸுவண்ணனிக்க²ம் விய பண்டு³கம்ப³லே.

‘‘நேக்க²ம் ஜம்போ³னத³ஸ்ஸேவ, நிக்கி²த்தம் பண்டு³கம்ப³லே;

விரோசதி வீதமலோ, மணிவேரோசனோ யதா².

‘‘மஹாஸாலோவ ஸம்பு²ல்லோ, மேருராஜாவலங்கதோ;

ஸுவண்ணயூபஸங்காஸோ, பது³மோ கோகனதோ³ யதா².

‘‘ஜலந்தோ தீ³பருக்கோ²வ, பப்³ப³தக்³கே³ யதா² ஸிகீ²;

தே³வானம் பாரிச²த்தோவ, ஸப்³ப³பு²ல்லோ விரோசதீ’’தி.

பாடலிகா³மியே உபாஸகே ஆமந்தேஸீதி யஸ்மா தேஸு உபாஸகேஸு ப³ஹூ ஜனா ஸீலேஸு பதிட்டி²தா, தஸ்மா பட²மம் தாவ ஸீலவிபத்தியா ஆதீ³னவம் பகாஸேத்வா பச்சா² ஸீலஸம்பதா³ய ஆனிஸம்ஸம் த³ஸ்ஸேதும், ‘‘பஞ்சிமே க³ஹபதயோ’’திஆதி³னா த⁴ம்மதே³ஸனத்த²ம் ஆமந்தேஸி.

தத்த² து³ஸ்ஸீலோதி நிஸ்ஸீலோ. ஸீலவிபன்னோதி விபன்னஸீலோ பி⁴ன்னஸம்வரோ. ஏத்த² ச ‘‘து³ஸ்ஸீலோ’’தி பதே³ன புக்³க³லஸ்ஸ ஸீலாபா⁴வோ வுத்தோ. ஸோ பனஸ்ஸ ஸீலாபா⁴வோ து³விதோ⁴ அஸமாதா³னேன வா ஸமாதி³ன்னஸ்ஸ பே⁴தே³ன வாதி. தேஸு புரிமோ ந ததா² ஸாவஜ்ஜோ, யதா² து³தியோ ஸாவஜ்ஜதரோ. யதா²தி⁴ப்பேதாதீ³னவனிமித்தம் ஸீலாபா⁴வம் புக்³க³லாதி⁴ட்டா²னாய தே³ஸனாய த³ஸ்ஸேதும், ‘‘ஸீலவிபன்னோ’’தி வுத்தம். தேன ‘‘து³ஸ்ஸீலோ’’தி பத³ஸ்ஸ அத்த²ம் த³ஸ்ஸேதி. பமாதா³தி⁴கரணந்தி பமாத³காரணா. இத³ஞ்ச ஸுத்தம் க³ஹட்டா²னம் வஸேன ஆக³தம், பப்³ப³ஜிதானம்பி பன லப்³ப⁴தேவ. க³ஹட்டோ² ஹி யேன ஸிப்பட்டா²னேன ஜீவிகம் கப்பேதி யதி³ கஸியா யதி³ வாணிஜ்ஜாய யதி³ கோ³ரக்கே²ன, பாணாதிபாதாதி³வஸேன பமத்தோ தம் தம் யதா²காலம் ஸம்பாதே³தும் ந ஸக்கோதி, அத²ஸ்ஸ கம்மம் வினஸ்ஸதி. மாகா⁴தகாலே பன பாணாதிபாதாதீ³னி கரோந்தோ த³ண்ட³வஸேன மஹதிம் போ⁴க³ஜானிம் நிக³ச்ச²தி. பப்³ப³ஜிதோ து³ஸ்ஸீலோ பமாத³காரணா ஸீலதோ பு³த்³த⁴வசனதோ ஜா²னதோ ஸத்தஅரியத⁴னதோ ச ஜானிம் நிக³ச்ச²தி.

பாபகோ கித்திஸத்³தோ³தி க³ஹட்ட²ஸ்ஸ ‘‘அஸுகோ அமுககுலே ஜாதோ து³ஸ்ஸீலோ பாபத⁴ம்மோ பரிச்சத்தஇத⁴லோகபரலோகோ ஸலாகப⁴த்தமத்தம்பி ந தே³தீ’’தி பரிஸமஜ்ஜே² பாபகோ கித்திஸத்³தோ³ அப்³பு⁴க்³க³ச்ச²தி. பப்³ப³ஜிதஸ்ஸ ‘‘அஸுகோ நாம தே²ரோ ஸத்து² ஸாஸனே பப்³ப³ஜித்வா நாஸக்கி² ஸீலானி ரக்கி²தும், ந பு³த்³த⁴வசனம் க³ஹேதும், வேஜ்ஜகம்மாதீ³ஹி ஜீவதி, ச²ஹி அகா³ரவேஹி ஸமன்னாக³தோ’’தி ஏவம் பாபகோ கித்திஸத்³தோ³ அப்³பு⁴க்³க³ச்ச²தி.

அவிஸாரதோ³தி க³ஹட்டோ² தாவ அவஸ்ஸம் ப³ஹூனம் ஸன்னிபாதட்டா²னே ‘‘கோசி மம கம்மம் ஜானிஸ்ஸதி, அத² மம் நிந்தி³ஸ்ஸதி, ராஜகுலஸ்ஸ வா த³ஸ்ஸேஸ்ஸதீ’’தி ஸப⁴யோ உபஸங்கமதி, மங்குபூ⁴தோ பத்தக்க²ந்தோ⁴ அதோ⁴முகோ² நிஸீத³தி, விஸாரதோ³ ஹுத்வா கதே²தும் ந ஸக்கோதி. பப்³ப³ஜிதோபி ப³ஹுபி⁴க்கு²ஸங்கே⁴ ஸன்னிபதிதே ‘‘அவஸ்ஸம் கோசி மம கம்மம் ஜானிஸ்ஸதி, அத² மே உபோஸத²ம்பி பவாரணம்பி ட²பேத்வா ஸாமஞ்ஞதோ சாவேத்வா நிக்கட்³டி⁴ஸ்ஸதீ’’தி ஸப⁴யோ உபஸங்கமதி, விஸாரதோ³ ஹுத்வா கதே²தும் ந ஸக்கோதி. ஏகச்சோ பன து³ஸ்ஸீலோபி ஸமானோ ஸுஸீலோ விய சரதி, ஸோபி அஜ்ஜா²ஸயேன மங்கு ஹோதியேவ.

ஸம்மூள்ஹோ காலம் கரோதீதி து³ஸ்ஸீலஸ்ஸ ஹி மரணமஞ்சே நிபன்னஸ்ஸ து³ஸ்ஸீலகம்மானி ஸமாதா³ய பவத்திதட்டா²னானி ஆபாத²ம் ஆக³ச்ச²ந்தி. ஸோ உம்மீலேத்வா இத⁴லோகம், நிமீலேத்வா பரலோகம் பஸ்ஸதி. தஸ்ஸ சத்தாரோ அபாயா கம்மானுரூபம் உபட்ட²ஹந்தி, ஸத்திஸதேன பஹரியமானோ விய அக்³கி³ஜாலாபி⁴கா⁴தேன ஜா²யமானோ விய ச ஹோதி. ஸோ ‘‘வாரேத², வாரேதா²’’தி விரவந்தோவ மரதி. தேன வுத்தம் – ‘‘ஸம்மூள்ஹோ காலம் கரோதீ’’தி.

காயஸ்ஸ பே⁴தா³தி உபாதி³ன்னக்க²ந்த⁴பரிச்சாகா³. பரம் மரணாதி தத³னந்தரம் அபி⁴னிப்³ப³த்தக்க²ந்த⁴க்³க³ஹணா. அத² வா காயஸ்ஸ பே⁴தா³தி ஜீவிதிந்த்³ரியஸ்ஸ உபச்சே²தா³. பரம் மரணாதி சுதிதோ உத்³த⁴ம். அபாயந்திஆதி³ ஸப்³ப³ம் நிரயவேவசனம். நிரயோ ஹி ஸக்³க³மோக்க²ஹேதுபூ⁴தா புஞ்ஞஸங்கா²தா அயா அபேதத்தா, ஸுகா²னம் வா அயஸ்ஸ, ஆக³மனஸ்ஸ வா அபா⁴வா அபாயோ. து³க்க²ஸ்ஸ க³தி படிஸரணந்தி து³க்³க³தி, தோ³ஸப³ஹுலதாய வா து³ட்டே²ன கம்முனா நிப்³ப³த்தா க³தீதி து³க்³க³தி. விவஸா நிபதந்தி ஏத்த² து³க்கதகாரினோதி வினிபாதோ, வினஸ்ஸந்தா வா ஏத்த² நிபதந்தி ஸம்பி⁴ஜ்ஜமானங்க³பச்சங்கா³தி வினிபாதோ. நத்தி² ஏத்த² அஸ்ஸாத³ஸஞ்ஞிதோ அயோதி நிரயோ.

அத² வா அபாயக்³க³ஹணேன திரச்சா²னயோனிம் தீ³பேதி. திரச்சா²னயோனி ஹி அபாயோ ஸுக³திதோ அபேதத்தா, ந து³க்³க³தி மஹேஸக்கா²னம் நாக³ராஜாதீ³னம் ஸம்ப⁴வதோ. து³க்³க³திக்³க³ஹணேன பேத்திவிஸயம் தீ³பேதி. ஸோ ஹி அபாயோ சேவ து³க்³க³தி ச ஸுக³திதோ அபேதத்தா, து³க்க²ஸ்ஸ ச க³திபூ⁴தத்தா, ந து வினிபாதோ அஸுரஸதி³ஸம் அவினிபதிதத்தா பேதமஹித்³தி⁴கானம்பி விஜ்ஜமானத்தா. வினிபாதக்³க³ஹணேன அஸுரகாயம் தீ³பேதி. ஸோ ஹி யதா²வுத்தேனட்டே²ன ‘‘அபாயோ’’ சேவ ‘‘து³க்³க³தி’’ ச ஸப்³ப³ஸம்பத்திஸமுஸ்ஸயேஹி வினிபதிதத்தா ‘‘வினிபாதோ’’தி ச வுச்சதி. நிரயக்³க³ஹணேன அவீசிஆதி³கம் அனேகப்பகாரம் நிரயமேவ தீ³பேதி. உபபஜ்ஜதீதி நிப்³ப³த்ததி.

ஆனிஸம்ஸகதா² வுத்தவிபரியாயேன வேதி³தப்³பா³. அயம் பன விஸேஸோ – ஸீலவாதி ஸமாதா³னவஸேன ஸீலவா. ஸீலஸம்பன்னோதி பரிஸுத்³த⁴ம் பரிபுண்ணஞ்ச கத்வா ஸீலஸ்ஸ ஸமாதா³னேன ஸீலஸம்பன்னோ. போ⁴க³க்க²ந்த⁴ந்தி போ⁴க³ராஸிம். ஸுக³திம் ஸக்³க³ம் லோகந்தி ஏத்த² ஸுக³திக்³க³ஹணேன மனுஸ்ஸக³திபி ஸங்க³ய்ஹதி, ஸக்³க³க்³க³ஹணேன தே³வக³தி ஏவ. தத்த² ஸுந்த³ரா க³தி ஸுக³தி, ரூபாதீ³ஹி விஸயேஹி ஸுட்டு² அக்³கோ³தி ஸக்³கோ³, ஸோ ஸப்³போ³பி லுஜ்ஜனபலுஜ்ஜனட்டே²ன லோகோதி.

பாடலிகா³மியே உபாஸகே ப³ஹுதே³வ ரத்திம் த⁴ம்மியா கதா²யாதி அஞ்ஞாயபி பாளிமுத்தாய த⁴ம்மகதா²ய சேவ ஆவஸதா²னுமோத³னகதா²ய ச. ததா³ ஹி ப⁴க³வா யஸ்மா அஜாதஸத்துனா தத்த² பாடலிபுத்தனக³ரம் மாபேந்தேன அஞ்ஞேஸு கா³மனிக³மஜனபத³ராஜதா⁴னீஸு யே ஸீலாசாரஸம்பன்னா குடும்பி³கா, தே ஆனேத்வா த⁴னத⁴ஞ்ஞக⁴ரவத்து²கே²த்தவத்தா²தீ³னி சேவ பரிஹாரஞ்ச தா³பேத்வா நிவேஸியந்தி. தஸ்மா பாடலிகா³மியா உபாஸகா ஆனிஸம்ஸத³ஸ்ஸாவிதாய விஸேஸதோ ஸீலக³ருகா ஸப்³ப³கு³ணானஞ்ச ஸீலஸ்ஸ அதி⁴ட்டா²னபா⁴வதோ தேஸம் பட²மம் ஸீலானிஸம்ஸே பகாஸேத்வா ததோ பரம் ஆகாஸக³ங்க³ம் ஓதாரேந்தோ விய, பத²வோஜம் ஆகட்³ட⁴ந்தோ விய, மஹாஜம்பு³ம் மத்த²கே க³ஹேத்வா சாலேந்தோ விய, யோஜனிகமது⁴கண்ட³ம் சக்கயந்தேன பீளேத்வா மது⁴ரஸம் பாயமானோ விய பாடலிகா³மிகானம் உபாஸகானம் ஹிதஸுகா²வஹம் பகிண்ணககத²ம் கதே²ந்தோ ‘‘ஆவாஸதா³னம் நாமேதம் க³ஹபதயோ மஹந்தம் புஞ்ஞம், தும்ஹாகம் ஆவாஸோ மயா பரிபு⁴த்தோ, பி⁴க்கு²ஸங்கே⁴ன ச பரிபு⁴த்தோ, மயா ச பி⁴க்கு²ஸங்கே⁴ன ச பரிபு⁴த்தே பன த⁴ம்மரதனேனபி பரிபு⁴த்தோயேவ ஹோதி. ஏவம் தீஹி ரதனேஹி பரிபு⁴த்தே அபரிமேய்யோ ச விபாகோ, அபிச ஆவாஸதா³னஸ்மிம் தி³ன்னே ஸப்³ப³தா³னம் தி³ன்னமேவ ஹோதி, பூ⁴மட்ட²கபண்ணஸாலாய வா ஸாகா²மண்ட³பஸ்ஸ வா ஸங்க⁴ம் உத்³தி³ஸ்ஸ கதஸ்ஸ ஆனிஸம்ஸோ பரிச்சி²ந்தி³தும் ந ஸக்கா. ஆவாஸதா³னானுபா⁴வேன ஹி ப⁴வே நிப்³ப³த்தமானஸ்ஸபி ஸம்பீளிதக³ப்³ப⁴வாஸோ நாம ந ஹோதி, த்³வாத³ஸஹத்தோ² ஓவரகோ வியஸ்ஸ மாதுகுச்சி² அஸம்பா³தோ⁴வ ஹோதீ’’தி ஏவம் நானானயேஹி விசித்தம் ப³ஹும் த⁴ம்மகத²ம் கதே²த்வா –

‘‘ஸீதம் உண்ஹம் படிஹந்தி, ததோ வாளமிகா³னி ச;

ஸரீஸபே ச மகஸே, ஸிஸிரே சாபி வுட்டி²யோ.

‘‘ததோ வாதாதபோ கோ⁴ரோ, ஸஞ்ஜாதோ படிஹஞ்ஞதி;

லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதும்.

‘‘விஹாரதா³னம் ஸங்க⁴ஸ்ஸ, அக்³க³ம் பு³த்³தே⁴ன வண்ணிதம்;

தஸ்மா ஹி பண்டி³தோ போஸோ, ஸம்பஸ்ஸம் அத்த²மத்தனோ.

‘‘விஹாரே காரயே ரம்மே, வாஸயேத்த² ப³ஹுஸ்ஸுதே;

தேஸம் அன்னஞ்ச பானஞ்ச, வத்த²ஸேனாஸனானி ச.

‘‘த³தே³ய்ய உஜுபூ⁴தேஸு, விப்பஸன்னேன சேதஸா;

தே தஸ்ஸ த⁴ம்மம் தே³ஸேந்தி, ஸப்³ப³து³க்கா²பனூத³னம்;

யம் ஸோ த⁴ம்மம் இத⁴ஞ்ஞாய, பரினிப்³பா³தி அனாஸவோ’’தி. (சூளவ. 295) –

ஏவம் அயம்பி ஆவாஸதா³னே ஆனிஸம்ஸோதி ப³ஹுதே³வ ரத்திம் அதிரேகதரம் தி³யட்³ட⁴யாமம் ஆவாஸதா³னானிஸம்ஸகத²ம் கதே²ஸி. தத்த² இமா கா³தா² தாவ ஸங்க³ஹம் ஆருள்ஹா, பகிண்ணகத⁴ம்மதே³ஸனா பன ஸங்க³ஹம் நாரோஹதி. ஸந்த³ஸ்ஸேத்வாதிஆதீ³னி வுத்தத்தா²னேவ.

அபி⁴க்கந்தாதி அதிக்கந்தா த்³வே யாமா க³தா. யஸ்ஸ தா³னி காலம் மஞ்ஞதா²தி யஸ்ஸ க³மனஸ்ஸ தும்ஹே காலம் மஞ்ஞத², க³மனகாலோ தும்ஹாகம், க³ச்ச²தா²தி வுத்தம் ஹோதி. கஸ்மா பன ப⁴க³வா தே உய்யோஜேஸீதி? அனுகம்பாய. தியாமரத்திஞ்ஹி தத்த² நிஸீதி³த்வா வீதினாமேந்தானம் தேஸம் ஸரீரே ஆபா³தோ⁴ உப்பஜ்ஜேய்யாதி, பி⁴க்கு²ஸங்கே⁴பி ச விப்பபா⁴தஸயனனிஸஜ்ஜாய ஓகாஸோ லத்³து⁴ம் வட்டதி, இதி உப⁴யானுகம்பாய உய்யோஜேஸீதி. ஸுஞ்ஞாகா³ரந்தி பாடியேக்கம் ஸுஞ்ஞாகா³ரம் நாம தத்த² நத்தி². தேன கிர க³ஹபதயோ தஸ்ஸேவ ஆவஸதா²கா³ரஸ்ஸ ஏகபஸ்ஸே படஸாணியா பரிக்கி²பாபேத்வா கப்பியமஞ்சம் பஞ்ஞாபேத்வா தத்த² கப்பியபச்சத்த²ரணம் அத்த²ரித்வா உபரி ஸுவண்ணரஜததாரகாக³ந்த⁴மாலாதி³படிமண்டி³தம் விதானம் ப³ந்தி⁴த்வா தேலப்பதீ³பம் ஆரோபேஸும் ‘‘அப்பேவ நாம ஸத்தா² த⁴ம்மாஸனதோ வுட்டா²ய தோ²கம் விஸ்ஸமிதுகாமோ இத⁴ நிபஜ்ஜேய்ய, ஏவம் நோ இத³ம் ஆவஸதா²கா³ரம் ப⁴க³வதா சதூஹி இரியாபதே²ஹி பரிபு⁴த்தம் தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி. ஸத்தா²பி ததே³வ ஸந்தா⁴ய தத்த² ஸங்கா⁴டிம் பஞ்ஞாபேத்வா ஸீஹஸேய்யம் கப்பேஸி. தம் ஸந்தா⁴ய வுத்தம் ‘‘ஸுஞ்ஞாகா³ரம் பாவிஸீ’’தி. தத்த² பாத³தோ⁴வனட்டா²னதோ பட்டா²ய யாவ த⁴ம்மாஸனா அக³மாஸி, ஏத்தகே டா²னே க³மனம் நிப்ப²ன்னம். த⁴ம்மாஸனம் பத்வா தோ²கம் அட்டா²ஸி, இத³ம் தத்த² டா²னம். ப⁴க³வா த்³வே யாமே த⁴ம்மாஸனே நிஸீதி³, ஏத்தகே டா²னே நிஸஜ்ஜா நிப்ப²ன்னா. உபாஸகே உய்யோஜேத்வா த⁴ம்மாஸனதோ ஓருய்ஹ யதா²வுத்தே டா²னே ஸீஹஸேய்யம் கப்பேஸி. ஏவம் தம் டா²னம் ப⁴க³வதா சதூஹி இரியாபதே²ஹி பரிபு⁴த்தம் அஹோஸீதி.

ஸுனித⁴வஸ்ஸகாராதி ஸுனிதோ⁴ ச வஸ்ஸகாரோ ச த்³வே ப்³ராஹ்மணா. மக³த⁴மஹாமத்தாதி மக³த⁴ரஞ்ஞோ மஹாஅமச்சா, மக³த⁴ரட்டே² வா மஹாமத்தா மஹதியா இஸ்ஸரியமத்தாய ஸமன்னாக³தாதி மஹாமத்தா. பாடலிகா³மே நக³ரம் மாபேந்தீதி பாடலிகா³மஸங்கா²தே பூ⁴மிபதே³ஸே நக³ரம் மாபேந்தி. வஜ்ஜீனம் படிபா³ஹாயாதி லிச்ச²விராஜூனம் ஆயமுக²ப்பச்சி²ந்த³னத்த²ம். ஸஹஸ்ஸஸஹஸ்ஸேவாதி ஏகேகவக்³க³வஸேன ஸஹஸ்ஸம் ஸஹஸ்ஸம் ஹுத்வா. வத்தூ²னீதி க⁴ரவத்தூ²னி. சித்தானி நமந்தி நிவேஸனானி மாபேதுந்தி ரஞ்ஞோ ராஜமஹாமத்தானஞ்ச நிவேஸனானி மாபேதும் வத்து²விஜ்ஜாபாட²கானம் சித்தானி நமந்தி. தே கிர அத்தனோ ஸிப்பானுபா⁴வேன ஹேட்டா²பத²வியம் திம்ஸஹத்த²மத்தே டா²னே ‘‘இத⁴ நாக³க்³கா³ஹோ, இத⁴ யக்க²க்³கா³ஹோ, இத⁴ பூ⁴தக்³கா³ஹோ, இத⁴ பாஸாணோ வா கா²ணுகோ வா அத்தீ²’’தி ஜானந்தி. தே ததா³ ஸிப்பம் ஜப்பேத்வா தே³வதாஹி ஸத்³தி⁴ம் ஸம்மந்தயமானா விய மாபேந்தி.

அத² வா நேஸம் ஸரீரே தே³வதா அதி⁴முச்சித்வா தத்த² தத்த² நிவேஸனானி மாபேதும் சித்தம் நாமேந்தி. தா சதூஸு கோணேஸு கா²ணுகே கோட்டேத்வா வத்து²ம்ஹி க³ஹிதமத்தே படிவிக³ச்ச²ந்தி. ஸத்³த⁴குலானம் ஸத்³தா⁴ தே³வதா ததா² கரோந்தி, அஸ்ஸத்³த⁴குலானம் அஸ்ஸத்³தா⁴ தே³வதா. கிம்காரணா? ஸத்³தா⁴னஞ்ஹி ஏவம் ஹோதி ‘‘இத⁴ மனுஸ்ஸா நிவேஸனம் மாபேந்தா பட²மம் பி⁴க்கு²ஸங்க⁴ம் நிஸீதா³பேத்வா மங்க³லம் வதா³பேஸ்ஸந்தி, அத² மயம் ஸீலவந்தானம் த³ஸ்ஸனம் த⁴ம்மகத²ம் பஞ்ஹவிஸ்ஸஜ்ஜனம் அனுமோத³னம் ஸோதும் லபி⁴ஸ்ஸாம, மனுஸ்ஸா ச தா³னம் த³த்வா அம்ஹாகம் பத்திம் த³ஸ்ஸந்தீ’’தி. அஸ்ஸத்³தா⁴ தே³வதாபி ‘‘அத்தனோ இச்சா²னுரூபம் தேஸம் படிபத்திம் பஸ்ஸிதும், கத²ஞ்ச ஸோதும் லபி⁴ஸ்ஸாமா’’தி ததா² கரோந்தி.

தாவதிம்ஸேஹீதி யதா² ஹி ஏகஸ்மிம் குலே ஏகம் பண்டி³தமனுஸ்ஸம், ஏகஸ்மிஞ்ச விஹாரே ஏகம் ப³ஹுஸ்ஸுதம் பி⁴க்கு²ம் உபாதா³ய ‘‘அஸுககுலே மனுஸ்ஸா பண்டி³தா, அஸுகவிஹாரே பி⁴க்கூ² ப³ஹுஸ்ஸுதா’’தி ஸத்³தோ³ அப்³பு⁴க்³க³ச்ச²தி, ஏவமேவ ஸக்கம் தே³வராஜானம், விஸ்ஸகம்மஞ்ச தே³வபுத்தம் உபாதா³ய ‘‘தாவதிம்ஸா பண்டி³தா’’தி ஸத்³தோ³ அப்³பு⁴க்³க³தோ. தேனாஹ ‘‘தாவதிம்ஸேஹீ’’தி. ஸேய்யதா²பீதிஆதி³னா தே³வேஹி தாவதிம்ஸேஹி ஸத்³தி⁴ம் மந்தேத்வா விய ஸுனித⁴வஸ்ஸகாரா நக³ரம் மாபேந்தீதி த³ஸ்ஸேதி.

யாவதா, ஆனந்த³, அரியம் ஆயதனந்தி யத்தகம் அரியமனுஸ்ஸானம் ஓஸரணட்டா²னம் நாம அத்தி². யாவதா வணிப்பதோ²தி யத்தகம் வாணிஜானம் ஆஹடப⁴ண்ட³ஸ்ஸ ராஸிவஸேன கயவிக்கயட்டா²னம் நாம, வாணிஜானம் வஸனட்டா²னம் வா அத்தி². இத³ம் அக்³க³னக³ரந்தி தேஸம் அரியாயதனவணிப்பதா²னம் இத³ம் நக³ரம் அக்³க³ம் ப⁴விஸ்ஸதி ஜேட்ட²கம் பாமோக்க²ம். புடபே⁴த³னந்தி ப⁴ண்ட³புடபே⁴த³னட்டா²னம், ப⁴ண்ட³ப⁴ண்டி³கானம் மோசனட்டா²னந்தி வுத்தம் ஹோதி. ஸகலஜம்பு³தீ³பே அலத்³த⁴ப⁴ண்ட³ம்பி ஹி இதே⁴வ லபி⁴ஸ்ஸந்தி, அஞ்ஞத்த² விக்கயம் அக³ச்ச²ந்தாபி இதே⁴வ விக்கயம் க³ச்சி²ஸ்ஸந்தி, தஸ்மா இதே⁴வ புடம் பி⁴ந்தி³ஸ்ஸந்தீதி அத்தோ². ஆயானம்பி ஹி சதூஸு த்³வாரேஸு சத்தாரி, ஸபா⁴யம் ஏகந்தி ஏவம் தி³வஸே தி³வஸே பஞ்சஸதஸஹஸ்ஸானி தத்த² உட்ட²ஹிஸ்ஸந்தி. தானி ஸபா⁴வானி ஆயானீதி த³ஸ்ஸேதி.

அக்³கி³தோ வாதிஆதீ³ஸு ஸமுச்சயத்தோ² வாஸத்³தோ³, அக்³கி³னா ச உத³கேன ச மிது²பே⁴தே³ன ச நஸ்ஸிஸ்ஸதீதி அத்தோ². தஸ்ஸ ஹி ஏகோ கோட்டா²ஸோ அக்³கி³னா நஸ்ஸிஸ்ஸதி, நிப்³பா³பேதும் ந ஸக்கி²ஸ்ஸந்தி, ஏகம் கோட்டா²ஸம் க³ங்கா³ க³ஹேத்வா க³மிஸ்ஸதி, ஏகோ இமினா அகதி²தம் அமுஸ்ஸ, அமுனா அகதி²தம் இமஸ்ஸ வத³ந்தானம் பிஸுணவாசானம் வஸேன பி⁴ன்னானம் மனுஸ்ஸானம் அஞ்ஞமஞ்ஞபே⁴தே³ன வினஸ்ஸிஸ்ஸதி. ஏவம் வத்வா ப⁴க³வா பச்சூஸகாலே க³ங்கா³தீரம் க³ந்த்வா கதமுக²தோ⁴வனோ பி⁴க்கா²சாரவேலம் ஆக³மயமானோ நிஸீதி³.

ஸுனித⁴வஸ்ஸகாராபி ‘‘அம்ஹாகம் ராஜா ஸமணஸ்ஸ கோ³தமஸ்ஸ உபட்டா²கோ, ஸோ அம்ஹே உபக³தே புச்சி²ஸ்ஸதி ‘ஸத்தா² கிர பாடலிகா³மம் அக³மாஸி, கிம் தஸ்ஸ ஸந்திகம் உபஸங்கமித்த², ந உபஸங்கமித்தா²’தி. ‘உபஸங்கமிம்ஹா’தி ச வுத்தே ‘நிமந்தயித்த², ந நிமந்தயித்தா²’தி புச்சி²ஸ்ஸதி. ‘ந நிமந்தயிம்ஹா’தி ச வுத்தே அம்ஹாகம் தோ³ஸம் ஆரோபேத்வா நிக்³க³ண்ஹிஸ்ஸதி, இத³ஞ்சாபி மயம் அகதட்டா²னே நக³ரம் மாபேம, ஸமணஸ்ஸ கோ² பன கோ³தமஸ்ஸ க³தக³தட்டா²னே காளகண்ணிஸத்தா படிக்கமந்தி, தம் மயம் நக³ரமங்க³லம் வாசாபேஸ்ஸாமா’’தி சிந்தேத்வா ஸத்தா²ரம் உபஸங்கமித்வா நிமந்தயிம்ஸு. தேன வுத்தம் – ‘‘அத² கோ² ஸுனித⁴வஸ்ஸகாரா’’திஆதி³.

புப்³ப³ண்ஹஸமயந்தி புப்³ப³ண்ஹே காலே. நிவாஸேத்வாதி கா³மபவேஸனனீஹாரேன நிவாஸனம் நிவாஸேத்வா காயப³ந்த⁴னம் ப³ந்தி⁴த்வா. பத்தசீவரமாதா³யாதி சீவரம் பாருபித்வா பத்தம் ஹத்தே²ன க³ஹேத்வா.

ஸீலவந்தேத்தா²தி ஸீலவந்தோ ஏத்த² அத்தனோ வஸனட்டா²னே. ஸஞ்ஞதேதி காயவாசாசித்தேஹி ஸஞ்ஞதே. தாஸம் த³க்கி²ணமாதி³ஸேதி ஸங்க⁴ஸ்ஸ தி³ன்னே சத்தாரோ பச்சயே தாஸம் க⁴ரதே³வதானம் ஆதி³ஸேய்ய பத்திம் த³தே³ய்ய. பூஜிதா பூஜயந்தீதி ‘‘இமே மனுஸ்ஸா அம்ஹாகம் ஞாதகாபி ந ஹோந்தி, ஏவம்பி நோ பத்திம் தே³ந்தீ’’தி ஆரக்க²ம் ஸுஸம்விஹிதம் கரோந்தி ஸுட்டு² ஆரக்க²ம் கரோந்தி. மானிதா மானயந்தீதி காலானுகாலம் ப³லிகம்மகரணேன மானிதா ‘‘ஏதே மனுஸ்ஸா அம்ஹாகம் ஞாதகாபி ந ஹோந்தி, ததா²பி சதுபஞ்சச²மாஸந்தரம் நோ ப³லிகம்மம் கரோந்தீ’’தி மானேந்தி உப்பன்னபரிஸ்ஸயம் ஹரந்தி. ததோ நந்தி ததோ தம் பண்டி³தஜாதிகம் புரிஸம். ஓரஸந்தி உரே ட²பேத்வா வட்³டி⁴தம், யதா² மாதா ஓரஸம் புத்தம் அனுகம்பதி, உப்பன்னபரிஸ்ஸயஹரணத்த²மேவஸ்ஸ யதா² வாயமதி, ஏவம் அனுகம்பந்தீதி அத்தோ². ப⁴த்³ரானி பஸ்ஸதீதி ஸுந்த³ரானி பஸ்ஸதி.

அனுமோதி³த்வாதி தேஹி ததா³ பஸுதபுஞ்ஞஸ்ஸ அனுமோத³னவஸேன தேஸம் த⁴ம்மகத²ம் கத்வா. ஸுனித⁴வஸ்ஸகாராபி ‘‘யா தத்த² தே³வதா ஆஸும், தாஸம் த³க்கி²ணமாதி³ஸே’’தி ப⁴க³வதோ வசனம் ஸுத்வா தே³வதானம் பத்திம் அத³ம்ஸு. தம் கோ³தமத்³வாரம் நாம அஹோஸீதி தஸ்ஸ நக³ரஸ்ஸ யேன த்³வாரேன ப⁴க³வா நிக்க²மி, தம் கோ³தமத்³வாரம் நாம அஹோஸி. க³ங்கா³ய பன உத்தரணத்த²ம் அனோதிண்ணத்தா கோ³தமதித்த²ம் நாம நாஹோஸி. பூராதி புண்ணா. ஸமதித்திகாதி தடஸமம் உத³கஸ்ஸ தித்தா ப⁴ரிதா. காகபேய்யாதி தீரே டி²தகாகேஹி பாதும் ஸக்குணேய்யஉத³கா. த்³வீஹிபி பதே³ஹி உப⁴தோகூலஸமம் பரிபுண்ணபா⁴வமேவ த³ஸ்ஸேதி. உளும்பந்தி பாரக³மனத்தா²ய தா³ரூனி ஸங்கா⁴டேத்வா ஆணியோ கோட்டேத்வா கதம். குல்லந்தி வேளுத³ண்டா³தி³கே வல்லிஆதீ³ஹி ப³ந்தி⁴த்வா கதம்.

ஏதமத்த²ம் விதி³த்வாதி ஏதம் மஹாஜனஸ்ஸ க³ங்கோ³த³கமத்தஸ்ஸபி கேவலம் தரிதும் அஸமத்த²தம், அத்தனோ பன பி⁴க்கு²ஸங்க⁴ஸ்ஸ ச அதிக³ம்பீ⁴ரவித்த²தம் ஸம்ஸாரமஹண்ணவம் தரித்வா டி²தபா⁴வஞ்ச ஸப்³பா³காரதோ விதி³த்வா தத³த்த²பரிதீ³பனம் இமம் உதா³னம் உதா³னேஸி.

தத்த² அண்ணவந்தி ஸப்³ப³ந்திமேன பரிச்சே²தே³ன யோஜனமத்தம் க³ம்பீ⁴ரஸ்ஸ ச வித்த²தஸ்ஸ ச உத³கட்டா²னஸ்ஸேதம் அதி⁴வசனம். ஸரந்தி ஸரித்வா க³மனதோ இத⁴ நதீ³ அதி⁴ப்பேதா. இத³ம் வுத்தம் ஹோதி – யே க³ம்பீ⁴ரவித்த²தம் ஸம்ஸாரண்ணவம் தண்ஹாஸரிதஞ்ச தரந்தி, தே அரியமக்³க³ஸங்கா²தம் ஸேதும் கத்வான விஸஜ்ஜ பல்லலானி அனாமஸித்வாவ உத³கப⁴ரிதானி நின்னட்டா²னானி, அயம் பன இத³ம் அப்பமத்தகம் உத³கம் தரிதுகாமோ குல்லஞ்ஹி ஜனோ பப³ந்த⁴தி குல்லம் ப³ந்தி⁴தும் ஆயாஸம் ஆபஜ்ஜதி. திண்ணா மேதா⁴வினோ ஜனாதி அரியமக்³க³ஞாணஸங்கா²தாய மேதா⁴ய ஸமன்னாக³தத்தா மேதா⁴வினோ பு³த்³தா⁴ ச பு³த்³த⁴ஸாவகா ச வினா ஏவ குல்லேன திண்ணா பரதீரே பதிட்டி²தாதி.

ச²ட்ட²ஸுத்தவண்ணனா நிட்டி²தா.