2. து³தியனிப்³பா³னபடிஸம்யுத்தஸுத்தவண்ணனா

72. து³தியே இமம் உதா³னந்தி இமம் நிப்³பா³னஸ்ஸ பகதியா க³ம்பீ⁴ரபா⁴வதோ து³த்³த³ஸபா⁴வதீ³பனம் உதா³னம் உதா³னேஸி. தத்த² து³த்³த³ஸந்தி ஸபா⁴வக³ம்பீ⁴ரத்தா அதிஸுகு²மஸண்ஹஸபா⁴வத்தா ச அனுபசிதஞாணஸம்பா⁴ரேஹி பஸ்ஸிதும் ந ஸக்காதி து³த்³த³ஸம். வுத்தஞ்ஹேதம் – ‘‘தஞ்ஹி தே, மாக³ண்டி³ய, அரியம் பஞ்ஞாசக்கு² நத்தி², யேன த்வம் ஆரோக்³யம் ஜானேய்யாஸி, நிப்³பா³னம்பி பஸ்ஸேய்யாஸீ’’தி (ம. நி. 2.218). அபரம்பி வுத்தம் – ‘‘இத³ம்பி கோ² டா²னம் து³த்³த³ஸம், யதி³த³ம் ஸப்³ப³ஸங்கா²ரஸமதோ²’’திஆதி³ (மஹாவ. 8; ம. நி. 1.281; 2.337). அனதந்தி ரூபாதி³ஆரம்மணேஸு, காமாதீ³ஸு ச ப⁴வேஸு நமனதோ தன்னின்னபா⁴வேன பவத்திதோ ஸத்தானஞ்ச தத்த² நமனதோ தண்ஹா நதா நாம, நத்தி² ஏத்த² நதாதி அனதம், நிப்³பா³னந்தி அத்தோ². ‘‘அனந்த’’ந்திபி பட²ந்தி, நிச்சஸபா⁴வத்தா அந்தவிரஹிதம், அசவனத⁴ம்மம் நிரோத⁴ம் அமதந்தி அத்தோ². கேசி பன ‘‘அனந்த’’ந்தி பத³ஸ்ஸ ‘‘அப்பமாண’’ந்தி அத்த²ம் வத³ந்தி. ஏத்த² ச ‘‘து³த்³த³ஸ’’ந்தி இமினா பஞ்ஞாய து³ப்³ப³லீகரணேஹி ராகா³தி³கிலேஸேஹி சிரகாலபா⁴விதத்தா ஸத்தானம் அபச்சயபா⁴வனா ந ஸுகராதி நிப்³பா³னஸ்ஸ கிச்சே²ன அதி⁴க³மனீயதம் த³ஸ்ஸேதி. ந ஹி ஸச்சம் ஸுத³ஸ்ஸனந்தி இமினாபி தமேவத்த²ம் பாகடம் கரோதி. தத்த² ஸச்சந்தி நிப்³பா³னம். தஞ்ஹி கேனசி பரியாயேன அஸந்தஸபா⁴வாபா⁴வதோ ஏகந்தேனேவ ஸந்தத்தா அவிபரீதட்டே²ன ஸச்சம். ந ஹி தம் ஸுத³ஸ்ஸனம் ந ஸுகே²ன பஸ்ஸிதப்³ப³ம், ஸுசிரம்பி காலம் புஞ்ஞஞாணஸம்பா⁴ரே ஸமானேந்தேஹிபி கஸிரேனேவ ஸமதி⁴க³ந்தப்³ப³தோ. ததா² ஹி வுத்தம் ப⁴க³வதா – ‘‘கிச்சே²ன மே அதி⁴க³த’’ந்தி (மஹாவ. 8; ம. நி. 1.281; 2.337).

படிவித்³தா⁴ தண்ஹா ஜானதோ பஸ்ஸதோ நத்தி² கிஞ்சனந்தி தஞ்ச நிரோத⁴ஸச்சம் ஸச்சி²கிரியாபி⁴ஸமயவஸேன அபி⁴ஸமேந்தேன விஸயதோ கிச்சதோ ச ஆரம்மணதோ ச ஆரம்மணப்படிவேதே⁴ன அஸம்மோஹப்படிவேதே⁴ன ச படிவித்³த⁴ம், யதா²பரிஞ்ஞாபி⁴ஸமயவஸேன து³க்க²ஸச்சம், பா⁴வனாபி⁴ஸமயவஸேன மக்³க³ஸச்சஞ்ச அஸம்மோஹதோ படிவித்³த⁴ம் ஹோதி, ஏவம் பஹானாபி⁴ஸமயவஸேன அஸம்மோஹதோ ச படிவித்³தா⁴ தண்ஹா ஹோதி. ஏவஞ்ச சத்தாரி ஸச்சானி யதா²பூ⁴தம் அரியமக்³க³பஞ்ஞாய ஜானதோ பஸ்ஸதோ ப⁴வாதீ³ஸு நதபூ⁴தா தண்ஹா நத்தி², தத³பா⁴வே ஸப்³ப³ஸ்ஸபி கிலேஸவட்டஸ்ஸ அபா⁴வோ, ததோவ கம்மவிபாகவட்டானம் அஸம்ப⁴வோயேவாதி ஏவம் ப⁴க³வா தேஸம் பி⁴க்கூ²னம் அனவஸேஸவட்டது³க்க²வூபஸமஹேதுபூ⁴தம் அமதமஹானிப்³பா³னஸ்ஸ ஆனுபா⁴வம் பகாஸேஸி. ஸேஸம் வுத்தனயமேவ.

து³தியஸுத்தவண்ணனா நிட்டி²தா.