8. க³ணிகாஸுத்தவண்ணனா

58. அட்ட²மே த்³வே பூகா³தி த்³வே க³ணா. அஞ்ஞதரிஸ்ஸா க³ணிகாயாதி அஞ்ஞதராய நக³ரஸோபி⁴னியா. ஸாரத்தாதி ஸுட்டு² ரத்தா. படிப³த்³த⁴சித்தாதி கிலேஸவஸேன ப³த்³த⁴சித்தா. ராஜக³ஹே கிர ஏகஸ்மிம் ச²ணதி³வஸே ப³ஹூ து⁴த்தபுரிஸா க³ணப³ந்த⁴னேன விசரந்தா ஏகமேகஸ்ஸ ஏகமேகம் வேஸிம் ஆனேத்வா உய்யானம் பவிஸித்வா ச²ணகீளம் கீளிம்ஸு. ததோ பரம்பி த்³வே தயோ ச²ணதி³வஸே தம் தம்யேவ வேஸிம் ஆனேத்வா ச²ணகீளம் கீளிம்ஸு. அதா²பரஸ்மிம் ச²ணதி³வஸே அஞ்ஞேபி து⁴த்தா ததே²வ ச²ணகீளம் கீளிதுகாமா வேஸியோ ஆனேந்தா புரிமது⁴த்தேஹி புப்³பே³ ஆனீதம் ஏகம் வேஸிம் ஆனேந்தி. இதரே தம் தி³ஸ்வா ‘‘அயம் அம்ஹாகம் பரிக்³க³ஹோ’’தி ஆஹம்ஸு. தேபி ததே²வ ஆஹம்ஸு. ‘‘ஏவம் அம்ஹாகம் பரிக்³க³ஹோ, அம்ஹாகம் பரிக்³க³ஹோ’’தி கலஹம் வட்³டே⁴த்வா பாணிப்பஹாராதீ³னி அகம்ஸு. தேன வுத்தம் – ‘‘தேன கோ² பன ஸமயேன ராஜக³ஹே த்³வே பூகா³’’திஆதி³. தத்த² உபக்கமந்தீதி பஹரந்தி. மரணம்பி நிக³ச்ச²ந்தீதி ப³லவூபக்கமேஹி மரணம் உபக³ச்ச²ந்தி, இதரேபி மரணமத்தம் மரணப்பமாணது³க்க²ம் பாபுணந்தி.

ஏதமத்த²ம் விதி³த்வாதி ஏதம் காமேஸு கே³த⁴ம் விவாத³மூலம் ஸப்³பா³னத்த²மூலந்தி ஸப்³பா³காரதோ விதி³த்வா. இமம் உதா³னந்தி அந்தத்³வயே ச மஜ்ஜி²மாய படிபத்தியா ஆதீ³னவானிஸம்ஸவிபா⁴வனம் இமம் உதா³னம் உதா³னேஸி.

தத்த² யஞ்ச பத்தந்தி யம் ரூபாதி³பஞ்சகாமகு³ணஜாதம் பத்தம் ‘‘நத்தி² காமேஸு தோ³ஸோ’’தி தி³ட்டி²ம் புரக்க²த்வா வா அபுரக்க²த்வா வா ஏதரஹி லத்³த⁴ம் அனுபு⁴ய்யமானம். யஞ்ச பத்தப்³ப³ந்தி யஞ்ச காமகு³ணஜாதமேவ ‘‘பு⁴ஞ்ஜிதப்³பா³ காமா, பரிபு⁴ஞ்ஜிதப்³பா³ காமா, ஆஸேவிதப்³பா³ காமா, படிஸேவிதப்³பா³ காமா, யோ காமே பரிபு⁴ஞ்ஜதி, ஸோ லோகம் வட்³டே⁴தி, யோ லோகம் வட்³டே⁴தி, ஸோ ப³ஹும் புஞ்ஞம் பஸவதீ’’தி தி³ட்டி²ம் உபனிஸ்ஸாய தம் அனிஸ்ஸஜ்ஜித்வா கதேன கம்முனா அனாக³தே பத்தப்³ப³ம் அனுப⁴விதப்³ப³ஞ்ச. உப⁴யமேதம் ரஜானுகிண்ணந்தி ஏதம் உப⁴யம் பத்தம் பத்தப்³ப³ஞ்ச ராக³ரஜாதீ³ஹி அனுகிண்ணம். ஸம்பத்தே ஹி வத்து²காமே அனுப⁴வந்தோ ராக³ரஜேன வோகிண்ணோ ஹோதி, தத்த² பன ஸம்கிலிட்ட²சித்தஸ்ஸ ப²லே ஆயதிம் ஆபன்னே தோ³மனஸ்ஸுப்பத்தியா தோ³ஸரஜேன வோகிண்ணோ ஹோதி, உப⁴யத்தா²பி மோஹரஜேன வோகிண்ணோ ஹோதி. கஸ்ஸ பனேதம் ரஜானுகிண்ணந்தி ஆஹ – ‘‘ஆதுரஸ்ஸானுஸிக்க²தோ’’தி காமபத்த²னாவஸேன கிலேஸாதுரஸ்ஸ, தஸ்ஸ ச ப²லேன து³க்கா²துரஸ்ஸ ச உப⁴யத்தா²பி படிகாராபி⁴லாஸாய கிலேஸப²லே அனுஸிக்க²தோ.

ததா² யஞ்ச பத்தந்தி யம் அசேலகவதாதி³வஸேன பத்தம் அத்தபரிதாபனம். யஞ்ச பத்தப்³ப³ந்தி யம் மிச்சா²தி³ட்டி²கம்மஸமாதா³னஹேது அபாயேஸு பத்தப்³ப³ம் ப²லம். உப⁴யமேதம் ரஜானுகிண்ணந்தி தது³ப⁴யம் து³க்க²ரஜானுகிண்ணம். ஆதுரஸ்ஸாதி காயகிலமதே²ன து³க்கா²துரஸ்ஸ. அனுஸிக்க²தோதி மிச்சா²தி³ட்டி²ம், தஸ்ஸா ஸமாதா³யகே புக்³க³லே ச அனுஸிக்க²தோ.

யே ச ஸிக்கா²ஸாராதி யேஹி யதா²ஸமாதி³ன்னம் ஸீலப்³ப³தாதி³ஸங்கா²தம் ஸிக்க²ம் ஸாரதோ க³ஹேத்வா ‘‘இமினா ஸம்ஸாரஸுத்³தீ⁴’’தி கதி²தா. தேனாஹ – ஸீலப்³ப³தம் ஜீவிதம் ப்³ரஹ்மசரியம் உபட்டா²னஸாராதி. தத்த² யம் ‘‘ந கரோமீ’’தி ஓரமதி, தம் ஸீலம், விஸபோ⁴ஜனகிச்சா²சரணாதி³கம் வதம், ஸாகப⁴க்க²தாதி³ஜீவிகா ஜீவிதம், மேது²னவிரதி ப்³ரஹ்மசரியம், ஏதேஸம் அனுதிட்ட²னம் உபட்டா²னம், பூ⁴தபிண்ட³கபரிப⁴ண்டா³தி³வஸேன க²ந்த⁴தே³வஸிவாதி³பரிசரணம் வா உபட்டா²னம், ஏவமேதேஹி யதா²வுத்தேஹி ஸீலாதீ³ஹி ஸம்ஸாரஸுத்³தி⁴ ஹோதீதி தானி ஸாரதோ க³ஹேத்வா டி²தா ஸமணப்³ராஹ்மணா ஸிக்கா²ஸாரா ஸீலப்³ப³தம் ஜீவிதம் ப்³ரஹ்மசரியம் ‘‘உபட்டா²னஸாரா’’தி வேதி³தப்³பா³. அயமேகோ அந்தோதி அயம் ஸீலப்³ப³தபராமாஸவஸேன அத்தகிலமதா²னுயோக³ஸங்கா²தோ மஜ்ஜி²மாய படிபத்தியா உப்பத²பூ⁴தோ லாமகட்டே²ன ச ஏகோ அந்தோ. அயம் து³தியோ அந்தோதி அயம் காமஸுக²ல்லிகானுயோகோ³ காமேஸு பாதப்³யதாபத்திஸங்கா²தோ து³தியோ வுத்தனயேன அந்தோ.

இச்சேதே உபோ⁴ அந்தாதி காமஸுக²ல்லிகானுயோகோ³ அத்தகிலமதா²னுயோகோ³ ச இதி ஏதே உபோ⁴ அந்தா. தே ச கோ² ஏதரஹி பத்தே, ஆயதிம் பத்தப்³பே³ ச கிலேஸது³க்க²ரஜானுகிண்ணே காமகு³ணே அத்தபரிதாபனே ச அல்லீனேஹி கிலேஸது³க்கா²துரானம் அனுஸிக்க²ந்தேஹி, ஸயஞ்ச கிலேஸது³க்கா²துரேஹி படிபஜ்ஜிதப்³ப³த்தா லாமகா உப்பத²பூ⁴தா சாதி அந்தா. கடஸிவட்³ட⁴னாதி அந்த⁴புது²ஜ்ஜனேஹி அபி⁴கங்கி²தப்³ப³ட்டே²ன கடஸிஸங்கா²தானம் தண்ஹாஅவிஜ்ஜானம் அபி⁴வட்³ட⁴னா. கடஸியோ தி³ட்டி²ம் வட்³டே⁴ந்தீதி தா பன கடஸியோ நானப்பகாரதி³ட்டி²ம் வட்³டே⁴ந்தி. வத்து²காமேஸு அஸ்ஸாதா³னுபஸ்ஸினோ ஹி தே பஜஹிதும் அஸக்கோந்தஸ்ஸ தண்ஹாஅவிஜ்ஜாஸஹகாரீகாரணம் லபி⁴த்வா ‘‘நத்தி² தி³ன்ன’’ந்திஆதி³னா (த⁴. ஸ. 1221; விப⁴. 938) நத்தி²கதி³ட்டி²ம் அகிரியதி³ட்டி²ம் அஹேதுகதி³ட்டி²ஞ்ச க³ண்ஹாபேந்தி, அத்தபரிதாபனம் அனுயுத்தஸ்ஸ பன அவிஜ்ஜாதண்ஹாஸஹகாரீகாரணம் லபி⁴த்வா ‘‘ஸீலேன ஸுத்³தி⁴ வதேன ஸுத்³தீ⁴’’திஆதி³னா அத்தஸுத்³தி⁴அபி⁴லாஸேன ஸீலப்³ப³தபராமாஸதி³ட்டி²ம் க³ண்ஹாபேந்தி. ஸக்காயதி³ட்டி²யா பன தேஸம் பச்சயபா⁴வோ பாகடோயேவ. ஏவம் அந்தத்³வயூபனிஸ்ஸயேன தண்ஹாஅவிஜ்ஜானம் தி³ட்டி²வட்³ட⁴கதா வேதி³தப்³பா³. கேசி பன ‘‘கடஸீதி பஞ்சன்னம் க²ந்தா⁴னம் அதி⁴வசன’’ந்தி வத³ந்தி. தேஸம் யத³க்³கே³ன ததோ அந்தத்³வயதோ ஸம்ஸாரஸுத்³தி⁴ ந ஹோதி, தத³க்³கே³ன தே உபாதா³னக்க²ந்தே⁴ அபி⁴வட்³டே⁴தீதி அதி⁴ப்பாயோ. அபரே பன ‘‘கடஸிவட்³ட⁴னா’’தி பத³ஸ்ஸ ‘‘அபராபரம் ஜராமரணேஹி ஸிவதி²கவட்³ட⁴னா’’தி அத்த²ம் வத³ந்தி. தேஹிபி அந்தத்³வயஸ்ஸ ஸம்ஸாரஸுத்³தி⁴ஹேதுபா⁴வாபா⁴வோயேவ வுத்தோ, கடஸியா பன தி³ட்டி²வட்³ட⁴னகாரணபா⁴வோ வத்தப்³போ³.

ஏதே தே உபோ⁴ அந்தே அனபி⁴ஞ்ஞாயாதி தே ஏதே யதா²வுத்தே உபோ⁴பி அந்தே அஜானித்வா ‘‘இமே அந்தா தே ச ஏவம்க³ஹிதா ஏவம்அனுட்டி²தா ஏவம்க³திகா ஏவம்அபி⁴ஸம்பராயா’’தி ஏவம் அஜானனஹேது அஜானனகாரணா. ‘‘பஞ்ஞாய சஸ்ஸ தி³ஸ்வா ஆஸவா பரிக்கீ²ணா’’திஆதீ³ஸு (பு. ப. 208; அ. நி. 9.43) வியஸ்ஸ ஹேதுஅத்த²தா த³ட்ட²ப்³பா³. ஓலீயந்தி ஏகேதி ஏகே காமஸுகா²னுயோக³வஸேன ஸங்கோசம் ஆபஜ்ஜந்தி. அதிதா⁴வந்தி ஏகேதி ஏகே அத்தகிலமதா²னுயோக³வஸேன அதிக்கமந்தி. காமஸுக²மனுயுத்தா ஹி வீரியஸ்ஸ அகரணதோ கோஸஜ்ஜவஸேன ஸம்மாபடிபத்திதோ ஸங்கோசமாபன்னதா ஓலீயந்தி நாம, அத்தபரிதாபனமனுயுத்தா பன கோஸஜ்ஜம் பஹாய அனுபாயேன வீரியாரம்ப⁴ம் கரோந்தா ஸம்மாபடிபத்தியா அதிக்கமனதோ அதிதா⁴வந்தி நாம, தது³ப⁴யம் பன தத்த² ஆதீ³னவாத³ஸ்ஸனதோ. தேன வுத்தம் – ‘‘உபோ⁴ அந்தே அனபி⁴ஞ்ஞாய ஓலீயந்தி ஏகே அதிதா⁴வந்தி ஏகே’’தி. தத்த² தண்ஹாபி⁴னந்த³னவஸேன ஓலீயந்தி, தி³ட்டா²பி⁴னந்த³னவஸேன அதிதா⁴வந்தீதி வேதி³தப்³ப³ம்.

அத² வா ஸஸ்ஸதாபி⁴னிவேஸவஸேன ஓலீயந்தி ஏகே, உச்சே²தா³பி⁴னிவேஸவஸேன அதிதா⁴வந்தி ஏகே. கோ³ஸீலாதி³வஸேன ஹி அத்தபரிதாபனமனுயுத்தா ஏகச்சே ‘‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா, தத்த² நிச்சோ து⁴வோ ஸஸ்ஸதோ அவிபரிணாமத⁴ம்மோ ஸஸ்ஸதிஸமம் ததே²வ ட²ஸ்ஸாமீ’’தி ஸஸ்ஸதத³ஸ்ஸனம் அபி⁴னிவிஸந்தா ஸம்ஸாரே ஓலீயந்தி நாம, காமஸுக²மனுயுத்தா பன ஏகச்சே யம்கிஞ்சி கத்வா இந்த்³ரியானி ஸந்தப்பேதுகாமா லோகாயதிகா விய தத³னுகு³ணம் உச்சே²த³த³ஸ்ஸனம் அபி⁴னிவிஸந்தா அனுபாயேன வட்டுபச்சே²த³ஸ்ஸ பரியேஸனதோ அதிதா⁴வந்தி நாம. ஏவம் ஸஸ்ஸதுச்சே²த³வஸேனபி ஓலீயனாதிதா⁴வனானி வேதி³தப்³பா³னி.

யே ச கோ² தே அபி⁴ஞ்ஞாயாதி யே ச கோ² பன அரியபுக்³க³லா தே யதா²வுத்தே உபோ⁴ அந்தே ‘‘இமே அந்தா ஏவம்க³ஹிதா ஏவம்அனுட்டி²தா ஏவம்க³திகா ஏவம்அபி⁴ஸம்பராயா’’தி அபி⁴விஸிட்டே²ன ஞாணேன விபஸ்ஸனாஸஹிதாய மக்³க³பஞ்ஞாய ஜானித்வா மஜ்ஜி²மபடிபத³ம் ஸம்மாபடிபன்னா, தாய ஸம்மாபடிபத்தியா. தத்ர ச நாஹேஸுந்தி தத்ர தஸ்மிம் அந்தத்³வயே பதிதா ந அஹேஸும், தம் அந்தத்³வயம் பஜஹிம்ஸூதி அத்தோ². தேன ச நாமஞ்ஞிம்ஸூதி தேன அந்தத்³வயபஹானேன ‘‘மம இத³ம் அந்தத்³வயபஹானம், அஹம் அந்தத்³வயம் பஹாஸிம், இமினா அந்தத்³வயபஹானேன ஸேய்யோ’’திஆதி³னா தண்ஹாதி³ட்டி²மானமஞ்ஞனாவஸேன ந அமஞ்ஞிம்ஸு ஸப்³ப³மஞ்ஞனானம் ஸம்மதே³வ பஹீனத்தா. ஏத்த² ச அக்³க³ப²லே டி²தே அரியபுக்³க³லே ஸந்தா⁴ய ‘‘தத்ர ச நாஹேஸும், தேன ச நாமஞ்ஞிம்ஸூ’’தி அதீதகாலவஸேன அயம் தே³ஸனா பவத்தா, மக்³க³க்க²ணே பன அதி⁴ப்பேதே வத்தமானகாலவஸேனேவ வத்தப்³ப³ம் ஸியா. வட்டம் தேஸம் நத்தி² பஞ்ஞாபனாயாதி யே ஏவம் பஹீனஸப்³ப³மஞ்ஞனா உத்தமபுரிஸா, தேஸம் அனுபாதா³பரினிப்³பு³தானம் கம்மவிபாககிலேஸவஸேன திவித⁴ம்பி வட்டம் நத்தி² பஞ்ஞாபனாய, வத்தமானக்க²ந்த⁴பே⁴த³தோ உத்³த⁴ம் அனுபாதா³னோ விய ஜாதவேதோ³ அபஞ்ஞத்திகபா⁴வமேவ க³ச்ச²தீதி அத்தோ².

அட்ட²மஸுத்தவண்ணனா நிட்டி²தா.