4. குமாரகஸுத்தவண்ணனா

44. சதுத்தே² குமாரகாதி தருணபுக்³க³லா. யே ஸுபா⁴ஸிதது³ப்³பா⁴ஸிதஸ்ஸ அத்த²ம் ஜானந்தி, தே இத⁴ குமாரகாதி அதி⁴ப்பேதா. இமே ஹி ஸத்தா ஜாததி³வஸதோ பட்டா²ய யாவ பஞ்சத³ஸவஸ்ஸகா, தாவ ‘‘குமாரகா, பா³லா’’தி ச வுச்சந்தி, ததோ பரம் வீஸதிவஸ்ஸானி ‘‘யுவானோ’’தி. மச்ச²கே பா³தே⁴ந்தீதி மக்³க³ஸமீபே ஏகஸ்மிம் தளாகே நிதா³க⁴காலே உத³கே பரிக்கீ²ணே நின்னட்டா²னே டி²தம் உத³கம் உஸ்ஸிஞ்சித்வா கு²த்³த³கமச்சே² க³ண்ஹந்தி சேவ ஹனந்தி ச ‘‘பசித்வா கா²தி³ஸ்ஸாமா’’தி. தேனுபஸங்கமீதி மக்³க³தோ தோ²கம் தளாகம் அதிக்கமித்வா டி²தோ, தஸ்மா ‘‘உபஸங்கமீ’’தி வத³தி. கஸ்மா பன உபஸங்கமி? தே குமாரகே அத்தனி விஸ்ஸாஸம் ஜனேதும் உபஸங்கமி. பா⁴யத² வோதி ஏத்த² வோதி நிபாதமத்தம். து³க்க²ஸ்ஸாதி நிஸ்ஸக்கே ஸாமிவசனம், து³க்க²ஸ்மாதி அத்தோ². அப்பியம் வோ து³க்க²ந்தி ‘‘கிம் தும்ஹாகம் ஸரீரே உப்பஜ்ஜனகது³க்க²ம் அப்பியம் அனிட்ட²’’ந்தி புச்ச²தி.

ஏதமத்த²ம் விதி³த்வாதி இமே ஸத்தா அத்தனோ து³க்க²ம் அனிச்ச²ந்தா ஏவ ஹுத்வா து³க்க²ஹேதும் படிபஜ்ஜந்தா அத்தனோ தம் இச்ச²ந்தா ஏவ நாம ஹோந்தீதி ஏதமத்த²ம் ஸப்³பா³காரதோ விதி³த்வா. இமம் உதா³னந்தி இமம் பாபகிரியாய நிஸேத⁴னம் ஆதீ³னவவிபா⁴வனஞ்ச உதா³னம் உதா³னேஸி.

தஸ்ஸத்தோ² – யதி³ தும்ஹாகம் ஸகலமாபாயிகம், ஸுக³தியஞ்ச அப்பாயுகதாமனுஸ்ஸதோ³ப⁴க்³கி³யாதி³பே⁴த³ம் து³க்க²ம் அப்பியம் அனிட்ட²ம், யதி³ தும்ஹே ததோ பா⁴யத², ஆவி வா பரேஸம் பாகடபா⁴வவஸேன அப்படிச்ச²ன்னம் கத்வா காயேன வா வாசாய வா பாணாதிபாதாதி³ப்பபே⁴த³ம் யதி³ வா ரஹோ அபாகடபா⁴வவஸேன படிச்ச²ன்னம் கத்வா மனோத்³வாரே ஏவ அபி⁴ஜ்ஜா²தி³ப்பபே⁴த³ம் அணுமத்தம்பி பாபகம் லாமகத⁴ம்மம் மாகத்த² மா கரித்த², அத² பன தம் பாபகம்மம் ஏதரஹி கரோத², ஆயதிம் வா கரிஸ்ஸத², நிரயாதீ³ஸு சதூஸு அபாயேஸு மனுஸ்ஸேஸு ச தஸ்ஸ ப²லபூ⁴தம் து³க்க²ம் இதோ வா ஏத்தோ வா பலாயந்தே அம்ஹே நானுப³ந்தி⁴ஸ்ஸதீதி அதி⁴ப்பாயேன உபேச்ச அபேச்ச பலாயதம்பி தும்ஹாகம் ததோ முத்தி மோக்கோ² நத்தி². க³திகாலாதி³பச்சயந்தரஸமவாயே விபச்சிஸ்ஸதியேவாதி த³ஸ்ஸேதி. ‘‘பலாயனே’’திபி பட²ந்தி, வுத்தனயேன யத்த² கத்த²சி க³மனே பக்கமனே ஸதீதி அத்தோ². அயஞ்ச அத்தோ² ‘‘ந அந்தலிக்கே² ந ஸமுத்³த³மஜ்ஜே²…பே… பாபகம்மா’’தி (த⁴. ப. 127; மி. ப. 4.2.4) இமாய கா³தா²ய தீ³பேதப்³போ³.

சதுத்த²ஸுத்தவண்ணனா நிட்டி²தா.