5. உபோஸத²ஸுத்தவண்ணனா

45. பஞ்சமே தத³ஹூதி தஸ்மிம் அஹனி தஸ்மிம் தி³வஸே. உபோஸதே²தி ஏத்த² உபவஸந்தி ஏத்தா²தி உபோஸதோ², உபவஸந்தீதி ஸீலேன வா அனஸனேன வா உபேதா ஹுத்வா வஸந்தீதி அத்தோ². அயஞ்ஹி உபோஸத²ஸத்³தோ³ ‘‘அட்ட²ங்க³ஸமன்னாக³தம் உபோஸத²ம் உபவஸாமீ’’திஆதீ³ஸு (அ. நி. 3.71; 10.46) ஸீலே ஆக³தோ. ‘‘உபோஸதோ² வா பவாரணா வா’’திஆதீ³ஸு (மஹாவ. 155) பாதிமோக்கு²த்³தே³ஸாதி³வினயகம்மே. ‘‘கோ³பாலகூபோஸதோ² நிக³ண்டூ²போஸதோ²’’திஆதீ³ஸு (அ. நி. 3.71) உபவாஸே. ‘‘உபோஸதோ² நாம நாக³ராஜா’’திஆதீ³ஸு (தீ³. நி. 2.246) பஞ்ஞத்தியம். ‘‘அஜ்ஜுபோஸதோ² பன்னரஸோ’’திஆதீ³ஸு (மஹாவ. 168) தி³வஸே. இதா⁴பி தி³வஸேயேவ த³ட்ட²ப்³போ³, தஸ்மா ‘‘தத³ஹுபோஸதே²’’தி தஸ்மிம் உபோஸத²தி³வஸபூ⁴தே அஹனீதி அத்தோ². நிஸின்னோ ஹோதீதி மஹாபி⁴க்கு²ஸங்க⁴பரிவுதோ ஓவாத³பாதிமோக்க²ம் உத்³தி³ஸிதும் நிஸின்னோ ஹோதி. நிஸஜ்ஜ பன பி⁴க்கூ²னம் சித்தானி ஓலோகேந்தோ ஏகம் து³ஸ்ஸீலபுக்³க³லம் தி³ஸ்வா, ‘‘ஸசாஹம் இமஸ்மிம் புக்³க³லே இத⁴ நிஸின்னேயேவ பாதிமோக்க²ம் உத்³தி³ஸிஸ்ஸாமி, ஸத்ததா⁴ஸ்ஸ முத்³தா⁴ ப²லிஸ்ஸதீ’’தி தஸ்மிம் அனுகம்பாய துண்ஹீயேவ அஹோஸி.

ஏத்த² ச உத்³த⁴ஸ்தம் அருணந்தி அருணுக்³க³மனம் வத்வாபி ‘‘உத்³தி³ஸது, ப⁴ந்தே ப⁴க³வா, பி⁴க்கூ²னம் பாதிமோக்க²’’ந்தி தே²ரோ ப⁴க³வந்தம் பாதிமோக்கு²த்³தே³ஸம் யாசி தஸ்மிம் காலே ‘‘ந, பி⁴க்க²வே, அனுபோஸதே² உபோஸதோ² காதப்³போ³’’திஸிக்கா²பத³ஸ்ஸ (மஹாவ. 183) அபஞ்ஞத்தத்தா. அபரிஸுத்³தா⁴, ஆனந்த³, பரிஸாதி திக்க²த்தும் தே²ரேன பாதிமோக்கு²த்³தே³ஸஸ்ஸ யாசிதத்தா அனுத்³தே³ஸஸ்ஸ காரணம் கதே²ந்தோ ‘‘அஸுகபுக்³க³லோ அபரிஸுத்³தோ⁴’’தி அவத்வா ‘‘அபரிஸுத்³தா⁴, ஆனந்த³, பரிஸா’’தி ஆஹ. கஸ்மா பன ப⁴க³வா தியாமரத்திம் ததா² வீதினாமேஸி? ததோ பட்டா²ய ஓவாத³பாதிமோக்க²ம் அனுத்³தி³ஸிதுகாமோ தஸ்ஸ வத்து²ம் பாகடம் காதும்.

அத்³த³ஸாதி கத²ம் அத்³த³ஸ. அத்தனோ சேதோபரியஞாணேன தஸ்ஸம் பரிஸதி பி⁴க்கூ²னம் சித்தானி பரிஜானந்தோ தஸ்ஸ மோக⁴புரிஸஸ்ஸ து³ஸ்ஸீல்யசித்தம் பஸ்ஸி. யஸ்மா பன சித்தே தி³ட்டே² தம்ஸமங்கீ³புக்³க³லோ தி³ட்டோ² நாம ஹோதி, தஸ்மா ‘‘அத்³த³ஸா கோ² ஆயஸ்மா மஹாமோக்³க³ல்லானோ தம் புக்³க³லம் து³ஸ்ஸீல’’ந்திஆதி³ வுத்தம். யதே²வ ஹி அனாக³தே ஸத்தஸு தி³வஸேஸு பவத்தமானம் பரேஸம் சித்தம் சேதோபரியஞாணலாபீ⁴ ஜானாதி, ஏவம் அதீதேபீதி. து³ஸ்ஸீலந்தி நிஸ்ஸீலம், ஸீலவிரஹிதந்தி அத்தோ². பாபத⁴ம்மந்தி து³ஸ்ஸீலத்தா ஏவ ஹீனஜ்ஜா²ஸயதாய லாமகஸபா⁴வம். அஸுசிந்தி அபரிஸுத்³தே⁴ஹி காயகம்மாதீ³ஹி ஸமன்னாக³தத்தா ந ஸுசிம். ஸங்கஸ்ஸரஸமாசாரந்தி கிஞ்சிதே³வ அஸாருப்பம் தி³ஸ்வா ‘‘இத³ம் இமினா கதம் ப⁴விஸ்ஸதீ’’தி ஏவம் பரேஸம் ஆஸங்கனீயதாய ஸங்காய ஸரிதப்³ப³ஸமாசாரம், அத² வா கேனசிதே³வ கரணீயேன மந்தயந்தே பி⁴க்கூ² தி³ஸ்வா ‘‘கச்சி நு கோ² இமே மயா கதகம்மம் ஜானித்வா மந்தேந்தீ’’தி அத்தனோயேவ ஸங்காய ஸரிதப்³ப³ஸமாசாரம்.

லஜ்ஜிதப்³ப³தாய படிச்சா²தே³தப்³ப³காரணதோ படிச்ச²ன்னம் கம்மந்தம் ஏதஸ்ஸாதி படிச்ச²ன்னகம்மந்தம். குச்சி²தஸமணவேஸதா⁴ரிதாய ந ஸமணந்தி அஸ்ஸமணம். ஸலாகக்³க³ஹணாதீ³ஸு ‘‘கித்தகா ஸமணா’’தி ச க³ணனாய ‘‘அஹம்பி ஸமணோம்ஹீ’’தி மிச்சா²படிஞ்ஞாய ஸமணபடிஞ்ஞம். அஸேட்ட²சாரிதாய அப்³ரஹ்மசாரிம். அஞ்ஞே ப்³ரஹ்மசாரினோ ஸுனிவத்தே² ஸுபாருதே ஸுபத்தத⁴ரே கா³மனிக³மாதீ³ஸு பிண்டா³ய சரித்வா ஜீவிகம் கப்பேந்தே தி³ஸ்வா அப்³ரஹ்மசாரீ ஸமானோ ஸயம்பி தாதி³ஸேன ஆகாரேன படிபஜ்ஜந்தோ உபோஸதா²தீ³ஸு ஸந்தி³ஸ்ஸந்தோ ‘‘அஹம்பி ப்³ரஹ்மசாரீ’’தி படிஞ்ஞம் தே³ந்தோ விய ஹோதீதி ப்³ரஹ்மசாரிபடிஞ்ஞம். பூதினா கம்மேன ஸீலவிபத்தியா அந்தோ அனுபவிட்ட²த்தா அந்தோபூதிம். ச²ஹி த்³வாரேஹி ராகா³தி³கிலேஸவஸ்ஸனேன திந்தத்தா அவஸ்ஸுதம். ஸஞ்ஜாதராகா³தி³கசவரத்தா ஸீலவந்தேஹி ச²ட்³டே³தப்³ப³த்தா ச கஸம்பு³ஜாதம். மஜ்ஜே² பி⁴க்கு²ஸங்க⁴ஸ்ஸ நிஸின்னந்தி ஸங்க⁴பரியாபன்னோ விய பி⁴க்கு²ஸங்க⁴ஸ்ஸ அந்தோ நிஸின்னம். தி³ட்டோ²ஸீதி அயம் பன ந பகதத்தோதி ப⁴க³வதா தி³ட்டோ² அஸி. யஸ்மா ச ஏவம் தி³ட்டோ², தஸ்மா நத்தி² தே தவ பி⁴க்கூ²ஹி ஸத்³தி⁴ம் ஏககம்மாதி³ஸம்வாஸோ. யஸ்மா பன ஸோ ஸம்வாஸோ தவ நத்தி², தஸ்மா உட்டே²ஹி, ஆவுஸோதி ஏவமேத்த² பத³யோஜனா வேதி³தப்³பா³.

ததியம்பி கோ² ஸோ புக்³க³லோ துண்ஹீ அஹோஸீதி அனேகவாரம் வத்வாபி தே²ரோ ‘‘ஸயமேவ நிப்³பி³ன்னோ ஓரமிஸ்ஸதீ’’தி வா, ‘‘இதா³னி இமேஸம் படிபத்திம் ஜானிஸ்ஸாமீ’’தி வா அதி⁴ப்பாயேன துண்ஹீ அஹோஸி. பா³ஹாயம் க³ஹேத்வாதி ப⁴க³வதா மயா ச யாதா²வதோ தி³ட்டோ², யாவததியம் உட்டே²ஹீதி வுத்தோ ந உட்டா²தி, ‘‘இதா³னிஸ்ஸ நிக்கட்³ட⁴னகாலோ மா ஸங்க⁴ஸ்ஸ உபோஸத²ந்தராயோ அஹோஸீ’’தி தம் பா³ஹாயம் அக்³க³ஹேஸி, ததா² க³ஹேத்வா. ப³ஹித்³வாரகோட்ட²கா நிக்கா²மேத்வாதி த்³வாரகோட்ட²கஸாலதோ ப³ஹி நிக்கா²மேத்வா. ப³ஹீதி பன நிக்கா²மிதட்டா²னத³ஸ்ஸனம், அத² வா ப³ஹித்³வாரகோட்ட²காதி ப³ஹித்³வாரகோட்ட²கதோபி நிக்கா²மேத்வா, ந அந்தோத்³வாரகோட்ட²கதோ, ஏவம் உப⁴யதா²பி விஹாரதோ ப³ஹி கத்வாதி அத்தோ². ஸூசிக⁴டிகம் த³த்வாதி அக்³க³ளஸூசிஞ்ச உபரிக⁴டிகஞ்ச ஆத³ஹித்வா, ஸுட்டு²தரம் கவாடம் த²கேத்வாதி அத்தோ². யாவ பா³ஹாக³ஹணாபி நாமாதி இமினா ‘‘அபரிஸுத்³தா⁴, ஆனந்த³, பரிஸா’’தி வசனம் ஸுத்வா ஏவ ஹி தேன பக்கமிதப்³ப³ம் ஸியா, ஏவம் அபக்கமித்வா யாவ பா³ஹாக³ஹணாபி நாம ஸோ மோக⁴புரிஸோ ஆக³மேஸ்ஸதீதி அச்ச²ரியமித³ந்தி த³ஸ்ஸேதி. இத³ம்பி க³ரஹணச்ச²ரியமேவாதி வேதி³தப்³ப³ம்.

அத² ப⁴க³வா சிந்தேஸி – ‘‘இதா³னி பி⁴க்கு²ஸங்கோ⁴ அப்³பு³த³ஜாதோ, அபரிஸுத்³தா⁴ புக்³க³லா உபோஸத²ம் ஆக³ச்ச²ந்தி, ந ச ததா²க³தா அபரிஸுத்³தா⁴ய பரிஸாய உபோஸத²ம் கரோந்தி, பாதிமோக்க²ம் உத்³தி³ஸந்தி, அனுத்³தி³ஸந்தே ச பி⁴க்கு²ஸங்க⁴ஸ்ஸ உபோஸதோ² பச்சி²ஜ்ஜதி, யம்னூனாஹம் இதோ பட்டா²ய பி⁴க்கூ²னம்யேவ பாதிமோக்கு²த்³தே³ஸம் அனுஜானேய்ய’’ந்தி. ஏவம் பன சிந்தேத்வா பி⁴க்கூ²னம்யேவ பாதிமோக்கு²த்³தே³ஸம் அனுஜானி. தேன வுத்தம் – ‘‘அத² கோ² ப⁴க³வா…பே… பாதிமோக்க²ம் உத்³தி³ஸேய்யாதா²’’தி.

தத்த² ந தா³னாஹந்தி இதா³னி அஹம் உபோஸத²ம் ந கரிஸ்ஸாமி, பாதிமோக்க²ம் ந உத்³தி³ஸிஸ்ஸாமீதி பச்சேகம் ந-காரேன ஸம்ப³ந்தோ⁴. து³வித⁴ஞ்ஹி பாதிமோக்க²ம் ஆணாபாதிமோக்க²ம் ஓவாத³பாதிமோக்க²ந்தி. தேஸு ‘‘ஸுணாது மே, ப⁴ந்தே’’திஆதி³கம் (மஹாவ. 134) ஆணாபாதிமோக்க²ம், தம் ஸாவகாவ உத்³தி³ஸந்தி, ந பு³த்³தா⁴, அயம் அன்வத்³த⁴மாஸம் உத்³தி³ஸியதி. ‘‘க²ந்தீ பரமம்…பே… ஸப்³ப³பாபஸ்ஸ அகரணம்…பே… அனூபவாதோ³ அனூபகா⁴தோ…பே… ஏதம் பு³த்³தா⁴ன ஸாஸன’’ந்தி (தீ³. நி. 2.90; த⁴. ப. 183-185) இமா பன திஸ்ஸோ கா³தா² ஓவாத³பாதிமோக்க²ம் நாம, தம் பு³த்³தா⁴வ உத்³தி³ஸந்தி, ந ஸாவகா, ச²ன்னம்பி வஸ்ஸானம் அச்சயேன உத்³தி³ஸந்தி. தீ³கா⁴யுகபு³த்³தா⁴னஞ்ஹி த⁴ரமானகாலே அயமேவ பாதிமோக்கு²த்³தே³ஸோ, அப்பாயுகபு³த்³தா⁴னம் பன பட²மபோ³தி⁴யம்யேவ. ததோ பரம் இதரோ, தஞ்ச கோ² பி⁴க்கூ² ஏவ உத்³தி³ஸந்தி, ந பு³த்³தா⁴, தஸ்மா அம்ஹாகம்பி ப⁴க³வா வீஸதிவஸ்ஸமத்தம் ஓவாத³பாதிமோக்க²ம் உத்³தி³ஸித்வா இமம் அந்தராயம் தி³ஸ்வா ததோ பரம் ந உத்³தி³ஸி. அட்டா²னந்தி அகாரணம். அனவகாஸோதி தஸ்ஸேவ வேவசனம். காரணஞ்ஹி யதா² திட்ட²தி ஏத்த² ப²லம் ததா³யத்தவுத்திதாயாதி டா²னந்தி வுச்சதி, ஏவம் அனவகாஸோதிபி வுச்சதீதி. யந்தி கிரியாபராமஸனம், தம் ஹேட்டா² வுத்தனயேன யோஜேதப்³ப³ம்.

அட்டி²மே, பி⁴க்க²வே, மஹாஸமுத்³தே³தி கோ அனுஸந்தி⁴? ய்வாயம் அபரிஸுத்³தா⁴ய பரிஸாய பாதிமோக்க²ஸ்ஸ அனுத்³தே³ஸோ வுத்தோ, ஸோ இமஸ்மிம் த⁴ம்மவினயே அச்ச²ரியோ அப்³பு⁴தோ த⁴ம்மோதி தம் அபரேஹி ஸத்தஹி அச்ச²ரியப்³பு⁴தத⁴ம்மேஹி ஸத்³தி⁴ம் விப⁴ஜித்வா த³ஸ்ஸேதுகாமோ பட²மம் தாவ தேஸம் உபமாபா⁴வேன மஹாஸமுத்³தே³ அட்ட² அச்ச²ரியப்³பு⁴தத⁴ம்மே த³ஸ்ஸேந்தோ ஸத்தா² ‘‘அட்டி²மே, பி⁴க்க²வே, மஹாஸமுத்³தே³’’திஆதி³மாஹ.

பகதிதே³வா விய ந ஸுரந்தி ந இஸந்தி ந விரோசந்தீதி அஸுரா, ஸுரா நாம தே³வா, தேஸம் படிபக்கா²தி வா அஸுரா, வேபசித்திபஹாராதா³த³யோ. தேஸம் ப⁴வனம் ஸினேருஸ்ஸ ஹேட்டா²பா⁴கே³, தே தத்த² பவிஸந்தா நிக்க²மந்தா ஸினேருபாதே³ மண்ட³பாதி³ம் நிம்மினித்வா கீளந்தாவ அபி⁴ரமந்தி. தத்த² தேஸம் அபி⁴ரதி இமே கு³ணே தி³ஸ்வாதி ஆஹ – ‘‘யே தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தீ’’தி. தத்த² அபி⁴ரமந்தீதி ரதிம் விந்த³ந்தி, அனுக்கண்ட²மானா வஸந்தீதி அத்தோ².

அனுபுப்³ப³னின்னோதிஆதீ³னி ஸப்³பா³னி அனுபடிபாடியா நின்னபா⁴வஸ்ஸேவ வேவசனானி. ந ஆயதகேனேவ பபாதோதி ந சி²ன்னதடோ மஹாஸோப்³போ⁴ விய ஆதி³தோ ஏவ பபாதோ. ஸோ ஹி தீரதே³ஸதோ பட்டா²ய ஏகங்கு³லத்³வங்கு³லவித³த்தி²ரதனயட்டி²உஸப⁴அட்³ட⁴கா³வுதகா³வுதட்³ட⁴யோஜனாதி³வஸேன க³ம்பீ⁴ரோ ஹுத்வா க³ச்ச²ந்தோ க³ச்ச²ந்தோ ஸினேருபாத³மூலே சதுராஸீதியோஜனஸஹஸ்ஸக³ம்பீ⁴ரோ ஹுத்வா டி²தோதி த³ஸ்ஸேதி.

டி²தத⁴ம்மோதி டி²தஸபா⁴வோ அவட்டி²தஸபா⁴வோ. ந மதேன குணபேன ஸம்வஸதீதி யேன கேனசி ஹத்தி²அஸ்ஸாதீ³னம் களேவரேன ஸத்³தி⁴ம் ந ஸம்வஸதி. தீரம் வாஹேதீதி தீரம் அபனேதி. த²லம் உஸ்ஸாரேதீதி ஹத்தே²ன க³ஹேத்வா விய வீசிப்பஹாரேனேவ த²லே கி²பதி. க³ங்கா³ யமுனாதி அனோதத்தத³ஹஸ்ஸ த³க்கி²ணமுக²தோ நிக்க²ந்தனதீ³ பஞ்ச தா⁴ரா ஹுத்வா பவத்தட்டா²னே க³ங்கா³திஆதி³னா பஞ்சதா⁴ ஸங்க²ம் க³தா.

தத்ராயம் இமாஸம் நதீ³னம் ஆதி³தோ பட்டா²ய உப்பத்திகதா² – அயஞ்ஹி ஜம்பு³தீ³போ த³ஸஸஹஸ்ஸயோஜனபரிமாணோ, தத்த² சதுஸஹஸ்ஸயோஜனப்பமாணோ பதே³ஸோ உத³கேன அஜ்ஜோ²த்த²டோ ஸமுத்³தோ³தி ஸங்க²ம் க³தோ, திஸஹஸ்ஸயோஜனப்பமாணே மனுஸ்ஸா வஸந்தி, திஸஹஸ்ஸயோஜனப்பமாணே ஹிமவா பதிட்டி²தோ உப்³பே³தே⁴ன பஞ்சயோஜனஸதிகோ சதுராஸீதிகூடஸஹஸ்ஸபடிமண்டி³தோ ஸமந்ததோ ஸந்த³மானபஞ்சஸதனதீ³விசித்தோ, யத்த² ஆயாமேன வித்தா²ரேன க³ம்பீ⁴ரதாய ச பண்ணாஸயோஜனப்பமாணோ தி³யட்³ட⁴யோஜனஸதபரிமண்ட³லோ அனோதத்தத³ஹோ கண்ணமுண்ட³த³ஹோ ரத²காரத³ஹோ ச²த்³த³ந்தத³ஹோ குணாலத³ஹோ மந்தா³கினித³ஹோ ஸீஹபபாதத³ஹோதி ஸத்த மஹாஸரா பதிட்டி²தா.

தேஸு அனோதத்தத³ஹோ ஸுத³ஸ்ஸனகூடம் சித்தகூடம் காளகூடம் க³ந்த⁴மாத³னகூடம் கேலாஸகூடந்தி இமேஹி பஞ்சஹி பப்³ப³தகூடேஹி பரிக்கி²த்தோ. தத்த² ஸுத³ஸ்ஸனகூடம் ஸோவண்ணமயம் தியோஜனஸதுப்³பே³த⁴ம் அந்தோவங்கம் காகமுக²ஸண்டா²னம் தமேவ ஸரம் படிச்சா²தே³த்வா டி²தம், சித்தகூடம் ஸத்தரதனமயம். காளகூடம் அஞ்ஜனமயம். க³ந்த⁴மாத³னகூடம் மஸாரக³ல்லமயம் அப்³ப⁴ந்தரே முக்³க³வண்ணம்; மூலக³ந்தோ⁴, ஸாரக³ந்தோ⁴, பே²க்³கு³க³ந்தோ⁴, தசக³ந்தோ⁴, பபடிகாக³ந்தோ⁴, க²ந்த⁴க³ந்தோ⁴, ரஸக³ந்தோ⁴, புப்ப²க³ந்தோ⁴, ப²லக³ந்தோ⁴, பத்தக³ந்தோ⁴தி இமேஹி த³ஸஹி க³ந்தே⁴ஹி உஸ்ஸன்னம், நானப்பகாரஓஸத⁴ஸஞ்ச²ன்னம், காளபக்கு²போஸத²தி³வஸே ஆதி³த்தம் விய அங்கா³ரம் பஜ்ஜலந்தம் திட்ட²தி. கேலாஸகூடம் ரஜதமயம். ஸப்³பா³னி சேதானி ஸுத³ஸ்ஸனேன ஸமானுப்³பே³த⁴ஸண்டா²னானி தமேவ ஸரம் படிச்சா²தே³த்வா டி²தானி. தத்த² தே³வானுபா⁴வேன நாகா³னுபா⁴வேன ச தே³வோ வஸ்ஸதி, நதி³யோ ச ஸந்த³ந்தி, தம் ஸப்³ப³ம்பி உத³கம் அனோதத்தமேவ பவிஸதி, சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தத்த² ஓபா⁴ஸம் கரோந்தி, உஜுகம் க³ச்ச²ந்தா ந கரோந்தி, தேனேவஸ்ஸ ‘‘அனோதத்த’’ந்தி ஸங்கா² உத³பாதி³.

தத்த² ரதனமயமனுஞ்ஞஸோபானஸிலாதலானி நிம்மச்ச²கச்ச²பானி ப²லிகஸதி³ஸானி நிம்மலூத³கானி தது³பபோ⁴க³ஸத்தானம் கம்மனிப்³ப³த்தானேவ நஹானதித்தா²னி ச ஹோந்தி, யத்த² பு³த்³த⁴பச்சேகபு³த்³தா⁴ இத்³தி⁴மந்தோ ஸாவகா இஸயோ ச நஹானாதீ³னி கரோந்தி, தே³வயக்கா²த³யோ உத³ககீளம் கீளந்தி.

தஸ்ஸ சதூஸு பஸ்ஸேஸு ஸீஹமுக²ம், ஹத்தி²முக²ம், அஸ்ஸமுக²ம், உஸப⁴முக²ந்தி சத்தாரி உத³கனிக்க²மனமுகா²னி ஹோந்தி, யேஹி சதஸ்ஸோ நதி³யோ ஸந்த³ந்தி. ஸீஹமுகே²ன நிக்க²ந்தனதீ³தீரே கேஸரஸீஹா ப³ஹுதரா ஹோந்தி, ததா² ஹத்தி²முகா²தீ³ஹி ஹத்தி²அஸ்ஸஉஸபா⁴. புரத்தி²மதி³ஸதோ நிக்க²ந்தனதீ³ அனோதத்தம் திக்க²த்தும் பத³க்கி²ணம் கத்வா இதரா திஸ்ஸோ நதி³யோ அனுபக³ம்ம பாசீனஹிமவந்தேனேவ அமனுஸ்ஸபத²ம் க³ந்த்வா மஹாஸமுத்³த³ம் பவிஸதி. பச்சி²மதி³ஸதோ உத்தரதி³ஸதோ ச நிக்க²ந்தனதி³யோபி ததே²வ பத³க்கி²ணம் கத்வா பச்சி²மஹிமவந்தேனேவ உத்தரஹிமவந்தேனேவ ச அமனுஸ்ஸபத²ம் க³ந்த்வா மஹாஸமுத்³த³ம் பவிஸந்தி.

த³க்கி²ணதி³ஸதோ நிக்க²ந்தனதீ³ பன தம் திக்க²த்தும் பத³க்கி²ணம் கத்வா த³க்கி²ணேன உஜுகம் பாஸாணபிட்டே²னேவ ஸட்டி²யோஜனானி க³ந்த்வா பப்³ப³தம் பஹரித்வா உட்டா²ய பரிக்கே²பேன திகா³வுதப்பமாணஉத³கதா⁴ரா ஹுத்வா ஆகாஸேன ஸட்டி²யோஜனானி க³ந்த்வா தியக்³க³ளே நாம பாஸாணே பதிதா, பாஸாணோ உத³கதா⁴ராவேகே³ன பி⁴ன்னோ. தத்த² பஞ்ஞாஸயோஜனப்பமாணா தியக்³க³ளா நாம போக்க²ரணீ ஜாதா, போக்க²ரணியா கூலம் பி⁴ந்தி³த்வா பாஸாணம் பவிஸித்வா ஸட்டி²யோஜனானி க³ந்த்வா ததோ க⁴னபத²விம் பி⁴ந்தி³த்வா உமங்கே³ன ஸட்டி²யோஜனானி க³ந்த்வா விஞ்ஜ²ம் நாம திரச்சா²னபப்³ப³தம் பஹரித்வா ஹத்த²தலே பஞ்சங்கு³லிஸதி³ஸா பஞ்சதா⁴ரா ஹுத்வா பவத்தந்தி.

ஸா திக்க²த்தும் அனோதத்தம் பத³க்கி²ணம் கத்வா க³தட்டா²னே ‘‘ஆவட்டக³ங்கா³’’தி வுச்சதி, உஜுகம் பாஸாணபிட்டே²ன ஸட்டி²யோஜனானி க³தட்டா²னே ‘‘கண்ஹக³ங்கா³’’தி, ஆகாஸேன ஸட்டி²யோஜனானி க³தட்டா²னே ‘‘ஆகாஸக³ங்கா³’’தி, தியக்³க³ளபாஸாணே பஞ்ஞாஸயோஜனோகாஸே டி²தா ‘‘தியக்³க³ளபோக்க²ரணீ’’தி, கூலம் பி⁴ந்தி³த்வா பாஸாணம் பவிஸித்வா ஸட்டி²யோஜனானி க³தட்டா²னே ‘‘ப³ஹலக³ங்கா³’’தி, உமங்கே³ன ஸட்டி²யோஜனானி க³தட்டா²னே ‘‘உமங்க³க³ங்கா³’’தி வுச்சதி, விஞ்ஜ²ம் நாம திரச்சா²னபப்³ப³தம் பஹரித்வா பஞ்சதா⁴ரா ஹுத்வா பவத்தட்டா²னே க³ங்கா³, யமுனா, அசிரவதீ, ஸரபூ⁴, மஹீதி பஞ்சதா⁴ ஸங்க²ம் க³தா. ஏவமேதா பஞ்ச மஹானதி³யோ ஹிமவந்ததோ பவத்தந்தீதி வேதி³தப்³பா³.

தத்த² நதீ³ நின்னகா³திஆதி³கம் கோ³த்தம், க³ங்கா³ யமுனாதிஆதி³கம் நாமம். ஸவந்தியோதி யா காசி ஸவமானா ஸந்த³மானா க³ச்ச²ந்தியோ மஹானதி³யோ வா குன்னதி³யோ வா. அப்பேந்தீதி அல்லீயந்தி ஓஸரந்தி. தா⁴ராதி வுட்டி²தா⁴ரா. பூரத்தந்தி புண்ணபா⁴வோ. மஹாஸமுத்³த³ஸ்ஸ ஹி அயம் த⁴ம்மதா – ‘‘இமஸ்மிம் காலே தே³வோ மந்தோ³ ஜாதோ, ஜாலக்கி²பாதீ³னி ஆதா³ய மச்ச²கச்ச²பே க³ண்ஹிஸ்ஸாமா’’தி வா ‘‘இமஸ்மிம் காலே அதிமஹந்தீ வுட்டி², ந லபி⁴ஸ்ஸாம நு கோ² பிட்டி²பஸாரணட்டா²ன’’ந்தி வா தம் ந ஸக்கா வத்தும். பட²மகப்பிககாலதோ பட்டா²ய ஹி யம் வஸ்ஸித்வா ஸினேருமேக²லம் ஆஹச்ச உத³கம் டி²தம், தம் ததோ ஏகங்கு³லமத்தம்பி உத³கம் நேவ ஹேட்டா² ஓதரதி, ந உத்³த⁴ம் உத்தரதி.

ஏகரஸோதி அஸம்பி⁴ன்னரஸோ. முத்தாதி கு²த்³த³கமஹந்தவட்டதீ³கா⁴தி³பே⁴தா³ அனேகவிதா⁴ முத்தா. மணீதி ரத்தனீலாதி³பே⁴தோ³ அனேகவிதோ⁴ மணி. வேளுரியோதி வம்ஸவண்ணஸிரீஸபுப்ப²வண்ணாதி³ஸண்டா²னதோ அனேகவிதோ⁴. ஸங்கோ²தி த³க்கி²ணாவத்ததம்ப³குச்சி²கத⁴மனஸங்கா²தி³பே⁴தோ³ அனேகவிதோ⁴. ஸிலாதி ஸேதகாளமுக்³க³வண்ணாதி³பே⁴தா³ அனேகவிதா⁴. பவாளந்தி கு²த்³த³கமஹந்தமந்த³ரத்தக⁴னரத்தாதி³பே⁴த³ம் அனேகவித⁴ம். லோஹிதங்கோ³தி பது³மராகா³தி³பே⁴தோ³ அனேகவிதோ⁴ மஸாரக³ல்லந்தி கப³ரமணி. ‘‘சித்தப²லிக’’ந்திபி வத³ந்தி.

மஹதம் பூ⁴தானந்தி மஹந்தானம் ஸத்தானம். திமிதிமிங்க³லாதி³கா திஸ்ஸோ மச்ச²ஜாதியோ. திமிம் கி³லனஸமத்தா² திமிங்க³லா, திமிஞ்ச திமிங்க³லஞ்ச கி³லனஸமத்தா² ‘‘திமிதிமிங்க³லா’’தி வத³ந்தி. நாகா³தி ஊமிபிட்டி²வாஸினோபி விமானட்ட²கனாகா³பி.

ஏவமேவ கோ²தி கிஞ்சாபி ஸத்தா² இமஸ்மிம் த⁴ம்மவினயே ஸோளஸபி பா³த்திம்ஸபி ததோ பி⁴ய்யோபி அச்ச²ரியப்³பு⁴தத⁴ம்மே விப⁴ஜித்வா த³ஸ்ஸேதும் ஸக்கோதி, ததா³ உபமாபா⁴வேன பன க³ஹிதானம் அட்ட²ன்னம் அனுரூபவஸேன அட்டே²வ தே உபமேதப்³ப³த⁴ம்மே விப⁴ஜித்வா த³ஸ்ஸேந்தோ ‘‘ஏவமேவ கோ², பி⁴க்க²வே, இமஸ்மிம் த⁴ம்மவினயே அட்ட² அச்ச²ரியா அப்³பு⁴தா த⁴ம்மா’’திஆதி³மாஹ.

தத்த² அனுபுப்³ப³ஸிக்கா²ய திஸ்ஸோ பி⁴க்கா² க³ஹிதா, அனுபுப்³ப³கிரியாய தேரஸ து⁴தங்க³த⁴ம்மா, அனுபுப்³ப³படிபதா³ய ஸத்த அனுபஸ்ஸனா அட்டா²ரஸ மஹாவிபஸ்ஸனா அட்ட²திம்ஸ ஆரம்மணவிப⁴த்தியோ ஸத்ததிம்ஸ போ³தி⁴பக்கி²யத⁴ம்மா ச க³ஹிதா. ந ஆயதகேனேவ அஞ்ஞாபடிவேதோ⁴தி மண்டூ³கஸ்ஸ உப்பதித்வா க³மனம் விய ஆதி³தோவ ஸீலபூரணாதீ³னி அகத்வா அரஹத்தபடிவேதோ⁴ நாம நத்தி², படிபாடியா பன ஸீலஸமாதி⁴பஞ்ஞாயோ பூரேத்வாவ அரஹத்தப்பத்தீதி அத்தோ².

மம ஸாவகாதி ஸோதாபன்னாதி³கே அரியபுக்³க³லே ஸந்தா⁴ய வத³தி. ந ஸம்வஸதீதி உபோஸத²கம்மாதி³வஸேன ஸம்வாஸம் ந கரோதி. உக்கி²பதீதி அபனேதி. ஆரகாவாதி தூ³ரேயேவ. ந தேன நிப்³பா³னதா⁴துயா ஊனத்தம் வா பூரத்தம் வாதி அஸங்க்²யேய்யேபி மஹாகப்பே பு³த்³தே⁴ஸு அனுப்பஜ்ஜந்தேஸு ஏகஸத்தோபி பரினிப்³பா³தும் ந ஸக்கோதி, ததா³பி ‘‘துச்சா² நிப்³பா³னதா⁴தூ’’தி ந ஸக்கா வத்தும், பு³த்³த⁴காலே பன ஏகேகஸ்மிம் ஸமாக³மே அஸங்க்²யேய்யாபி ஸத்தா அமதம் ஆராதே⁴ந்தி, ததா³பி ந ஸக்கா வத்தும் ‘‘பூரா நிப்³பா³னதா⁴தூ’’தி. விமுத்திரஸோதி கிலேஸேஹி விமுச்சனரஸோ. ஸப்³பா³ ஹி ஸாஸனஸ்ஸ ஸம்பத்தி யாவதே³வ அனுபாதா³ய ஆஸவேஹி சித்தஸ்ஸ விமுத்தியா ஹோதி.

ரதனானீதி ரதிஜனனட்டே²ன ரதனானி. ஸதிபட்டா²னாத³யோ ஹி பா⁴வியமானா புப்³ப³பா⁴கே³பி அனப்பகம் பீதிபாமோஜ்ஜம் நிப்³ப³த்தேந்தி, பகே³வ அபரபா⁴கே³. வுத்தஞ்ஹேதம் –

‘‘யதோ யதோ ஸம்மஸதி, க²ந்தா⁴னம் உத³யப்³ப³யம்;

லப⁴தீ பீதிபாமோஜ்ஜம், அமதம் தம் விஜானத’’ந்தி. (த⁴. ப. 374) –

லோகியரதனனிமித்தம் பன பீதிபாமோஜ்ஜம் ந தஸ்ஸ கலபா⁴க³ம்பி அக்³க⁴தீதி அயமத்தோ² ஹேட்டா² த³ஸ்ஸிதோ ஏவ. அபிச –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ‘ரதன’ந்தி பவுச்சதீ’’தி.

யதி³ ச சித்தீகதாதி³பா⁴வேன ரதனம் நாம ஹோதி, ஸதிபட்டா²னாதீ³னம்யேவ பூ⁴ததோ ரதனபா⁴வோ. போ³தி⁴பக்கி²யத⁴ம்மானஞ்ஹி ஸோ ஆனுபா⁴வோ, யம் ஸாவகா ஸாவகபாரமீஞாணம், பச்சேகபு³த்³தா⁴ பச்சேகபோ³தி⁴ஞாணம், ஸம்மாஸம்பு³த்³தா⁴ ஸம்மாஸம்போ³தி⁴ம் அதி⁴க³ச்ச²ந்தீதி ஆஸன்னகாரணத்தா. பரம்பரகாரணஞ்ஹி தா³னாதி³உபனிஸ்ஸயோதி ஏவம் ரதிஜனனட்டே²ன சித்தீகதாதி³அத்தே²ன ச ரதனபா⁴வோ போ³தி⁴பக்கி²யத⁴ம்மானம் ஸாதிஸயோ. தேன வுத்தம் – ‘‘தத்ரிமானி ரதனானி, ஸேய்யதி²த³ம், சத்தாரோ ஸதிபட்டா²னா’’திஆதி³.

தத்த² ஆரம்மணே பக்க²ந்தி³த்வா உபட்டா²னட்டே²ன பட்டா²னம், ஸதியேவ பட்டா²னம் ஸதிபட்டா²னம். ஆரம்மணஸ்ஸ பன காயாதி³வஸேன சதுப்³பி³த⁴த்தா வுத்தம் ‘‘சத்தாரோ ஸதிபட்டா²னா’’தி. ததா² ஹி காயவேத³னாசித்தத⁴ம்மேஸு ஸுப⁴ஸுக²னிச்சஅத்தஸஞ்ஞானம் பஹானதோ அஸுப⁴து³க்கா²னிச்சானத்ததாக³ஹணதோ ச நேஸம் காயானுபஸ்ஸனாதி³பா⁴வோ விப⁴த்தோ.

ஸம்மா பத³ஹந்தி ஏதேன, ஸயம் வா ஸம்மா பத³ஹதி, பஸத்த²ம், ஸுந்த³ரம் வா பத³ஹந்தி ஸம்மப்பதா⁴னம். புக்³க³லஸ்ஸ வா ஸம்மதே³வ பதா⁴னபா⁴வகரணதோ ஸம்மப்பதா⁴னம். வீரியஸ்ஸேதம் அதி⁴வசனம். தம்பி அனுப்பன்னுப்பன்னானம் அகுஸலானம் அனுப்பாத³னபஹானவஸேன அனுப்பன்னுப்பன்னானம் குஸலானம் த⁴ம்மானம் உப்பாத³னபா⁴வனவஸேன ச சதுகிச்சம் கத்வா வுத்தம் ‘‘சத்தாரோ ஸம்மப்பதா⁴னா’’தி.

இஜ்ஜ²தீதி இத்³தி⁴, ஸமிஜ்ஜ²தி நிப்ப²ஜ்ஜதீதி அத்தோ². இஜ்ஜ²ந்தி வா ஏதாய ஸத்தா இத்³தா⁴ வுத்³தா⁴ உக்கம்ஸக³தா ஹோந்தீதி இத்³தி⁴. இதி பட²மேன அத்தே²ன இத்³தி⁴ ஏவ பாதோ³ இத்³தி⁴பாதோ³, இத்³தி⁴கோட்டா²ஸோதி அத்தோ². து³தியேன அத்தே²ன இத்³தி⁴யா பாதோ³ பதிட்டா² அதி⁴க³மூபாயோதி இத்³தி⁴பாதோ³. தேன ஹி உபரூபரிவிஸேஸஸங்கா²தம் இத்³தி⁴ம் பஜ்ஜந்தி பாபுணந்தி, ஸ்வாயம் இத்³தி⁴பாதோ³ யஸ்மா ச²ந்தா³தி³கே சத்தாரோ அதி⁴பதித⁴ம்மே து⁴ரே ஜேட்ட²கே கத்வா நிப்³ப³த்தியதி, தஸ்மா வுத்தம் ‘‘சத்தாரோ இத்³தி⁴பாதா³’’தி.

பஞ்சிந்த்³ரியானீதி ஸத்³தா⁴தீ³னி பஞ்ச இந்த்³ரியானி. தத்த² அஸ்ஸத்³தி⁴யம் அபி⁴ப⁴வித்வா அதி⁴மோக்க²லக்க²ணே இந்த³ட்ட²ம் காரேதீதி ஸத்³தி⁴ந்த்³ரியம், கோஸஜ்ஜம் அபி⁴ப⁴வித்வா பக்³க³ஹலக்க²ணே, பமாத³ம் அபி⁴ப⁴வித்வா உபட்டா²னலக்க²ணே, விக்கே²பம் அபி⁴ப⁴வித்வா அவிக்கே²பலக்க²ணே, அஞ்ஞாணம் அபி⁴ப⁴வித்வா த³ஸ்ஸனலக்க²ணே இந்த³ட்ட²ம் காரேதீதி பஞ்ஞிந்த்³ரியம்.

தானியேவ அஸ்ஸத்³தி⁴யாதீ³ஹி அனபி⁴ப⁴வனீயதோ அகம்பியட்டே²ன ஸம்பயுத்தத⁴ம்மேஸு தி²ரபா⁴வேன ‘‘ப³லானீ’’தி வேதி³தப்³பா³னி.

ஸத்த போ³ஜ்ஜ²ங்கா³தி போ³தி⁴யா, போ³தி⁴ஸ்ஸ வா அங்கா³தி போ³ஜ்ஜ²ங்கா³. யா ஹி ஏஸா த⁴ம்மஸாமக்³கீ³ யாய லோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹனகாமஸுக²த்தகிலமதா²னுயோக³- உச்சே²த³ஸஸ்ஸதாபி⁴னிவேஸாதீ³னம் அனேகேஸம் உபத்³த³வானம் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபேக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தி, கிலேஸனித்³தா³ய வுட்ட²ஹதி, சத்தாரி வா அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி ‘‘போ³தீ⁴’’தி வுச்சதி, தஸ்ஸா த⁴ம்மஸாமக்³கி³ஸங்கா²தாய போ³தி⁴யா அங்கா³திபி போ³ஜ்ஜ²ங்கா³ ஜா²னங்க³மக்³க³ங்கா³த³யோ விய. யோபேஸ வுத்தப்பகாராய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ ‘‘போ³தீ⁴’’தி வுச்சதி, தஸ்ஸ போ³தி⁴ஸ்ஸ அங்கா³திபி போ³ஜ்ஜ²ங்கா³ ஸேனங்க³ரத²ங்கா³த³யோ விய. தேனாஹு போராணா – ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி போ³ஜ்ஜ²ங்கா³’’தி. ‘‘போ³தி⁴யா ஸம்வத்தந்தீதி போ³ஜ்ஜ²ங்கா³’’திஆதி³னா நயேனபி போ³ஜ்ஜ²ங்கா³னம் போ³ஜ்ஜ²ங்க³த்தோ² வேதி³தப்³போ³.

அரியோ அட்ட²ங்கி³கோ மக்³கோ³தி தம்தம்மக்³க³வஜ்ஜ²கிலேஸேஹி ஆரகத்தா அரியபா⁴வகரத்தா அரியப²லபடிலாப⁴கரத்தா ச அரியோ. ஸம்மாதி³ட்டி²ஆதீ³னி அட்ட²ங்கா³னி அஸ்ஸ அத்தி², அட்ட² அங்கா³னியேவ வா அட்ட²ங்கி³கோ. கிலேஸே மாரேந்தோ க³ச்ச²தி, நிப்³பா³னத்தி²கேஹி மக்³கி³யதி, ஸயம் வா நிப்³பா³னம் மக்³க³தீதி மக்³கோ³தி. ஏவமேதேஸம் ஸதிபட்டா²னாதீ³னம் அத்த²விபா⁴கோ³ வேதி³தப்³போ³.

ஸோதாபன்னோதி மக்³க³ஸங்கா²தம் ஸோதம் ஆபஜ்ஜித்வா பாபுணித்வா டி²தோ, ஸோதாபத்திப²லட்டோ²தி அத்தோ². ஸோதாபத்திப²லஸச்சி²கிரியாய படிபன்னோதி ஸோதாபத்திப²லஸ்ஸ அத்தபச்சக்க²கரணாய படிபஜ்ஜமானோ பட²மமக்³க³ட்டோ², யோ அட்ட²மகோதிபி வுச்சதி. ஸகதா³கா³மீதி ஸகிதே³வ இமம் லோகம் படிஸந்தி⁴க்³க³ஹணவஸேன ஆக³மனஸீலோ து³தியப²லட்டோ². அனாகா³மீதி படிஸந்தி⁴க்³க³ஹணவஸேன காமலோகம் அனாக³மனஸீலோ ததியப²லட்டோ². யோ பன ஸத்³தா⁴னுஸாரீ த⁴ம்மானுஸாரீ ஏகபீ³ஜீதி ஏவமாதி³கோ அரியபுக்³க³லவிபா⁴கோ³, ஸோ ஏதேஸம்யேவ பபே⁴தோ³தி. ஸேஸம் வுத்தனயமேவ.

ஏதமத்த²ம் விதி³த்வாதி ஏதம் அத்தனோ த⁴ம்மவினயே மதகுணபஸதி³ஸேன து³ஸ்ஸீலபுக்³க³லேன ஸத்³தி⁴ம் ஸம்வாஸாபா⁴வஸங்கா²தம் அத்த²ம் விதி³த்வா. இமம் உதா³னந்தி இமம் அஸம்வாஸாரஹஸம்வாஸாரஹவிபா⁴க³காரணபரிதீ³பனம் உதா³னம் உதா³னேஸி.

தத்த² ச²ன்னமதிவஸ்ஸதீதி ஆபத்திம் ஆபஜ்ஜித்வா படிச்சா²தே³ந்தோ அஞ்ஞம் நவம் ஆபத்திம் ஆபஜ்ஜதி, ததோ பரம் ததோ பரந்தி ஏவம் ஆபத்திவஸ்ஸம் கிலேஸவஸ்ஸம் அதிவிய வஸ்ஸதி. விவடம் நாதிவஸ்ஸதீதி ஆபத்திம் ஆபன்னோ தம் அப்படிச்சா²தே³த்வா விவரந்தோ ஸப்³ரஹ்மசாரீனம் பகாஸேந்தோ யதா²த⁴ம்மம் யதா²வினயம் படிகரோந்தோ தே³ஸேந்தோ வுட்ட²ஹந்தோ அஞ்ஞம் நவம் ஆபத்திம் ந ஆபஜ்ஜதி, தேனஸ்ஸ விவடம் புன ஆபத்திவஸ்ஸம் கிலேஸவஸ்ஸம் ந வஸ்ஸதி. யஸ்மா ச ஏததே³வம், தஸ்மா ச²ன்னம் சா²தி³தம் ஆபத்திம் விவரேத² பகாஸேத². ஏவம் தம் நாதிவஸ்ஸதீதி ஏவம் ஸந்தே தம் ஆபத்திஆபஜ்ஜனகம் ஆபன்னபுக்³க³லம் அத்தபா⁴வம் அதிவிஜ்ஜி²த்வா கிலேஸவஸ்ஸம் ந வஸ்ஸதி ந தேமேதி. ஏவம் ஸோ கிலேஸேஹி அனவஸ்ஸுதோ பரிஸுத்³த⁴ஸீலோ ஸமாஹிதோ ஹுத்வா விபஸ்ஸனம் பட்ட²பேத்வா ஸம்மஸந்தோ அனுக்கமேன நிப்³பா³னம் பாபுணாதீதி அதி⁴ப்பாயோ.

பஞ்சமஸுத்தவண்ணனா நிட்டி²தா.