10. சூளபந்த²கஸுத்தவண்ணனா

50. த³ஸமே சூளபந்த²கோதி மஹாபந்த²கத்தே²ரஸ்ஸ கனிட்ட²பா⁴திகத்தா பந்தே² ஜாதத்தா ச த³ஹரகாலே லத்³த⁴வோஹாரேன அபரபா⁴கே³பி அயமாயஸ்மா ‘‘சூளபந்த²கோ’’த்வேவ பஞ்ஞாயித்த². கு³ணவிஸேஸேஹி பன ச²ளபி⁴ஞ்ஞோ பபி⁴ன்னபடிஸம்பி⁴தோ³ ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் மனோமயம் காயம் அபி⁴னிம்மினந்தானம் யதி³த³ம் சூளபந்த²கோ, சேதோவிவட்டகுஸலானம் யதி³த³ம் சூளபந்த²கோ’’தி த்³வீஸு (அ. நி. 1.199) டா²னேஸு ப⁴க³வதா ஏதத³க்³கே³ ட²பிதோ அஸீதியா மஹாஸாவகேஸு அப்³ப⁴ந்தரோ.

ஸோ ஏகதி³வஸம் பச்சா²ப⁴த்தம் பிண்ட³பாதப்படிக்கந்தோ அத்தனோ தி³வாட்டா²னே தி³வாவிஹாரம் நிஸின்னோ ஸமாபத்தீஹி தி³வஸபா⁴க³ம் வீதினாமேத்வா ஸாயன்ஹஸமயம் உபாஸகேஸு த⁴ம்மஸ்ஸவனத்த²ம் அனாக³தேஸு ஏவ விஹாரமஜ்ஜ²ம் பவிஸித்வா ப⁴க³வதி க³ந்த⁴குடியம் நிஸின்னே ‘‘அகாலோ தாவ ப⁴க³வதோ உபட்டா²னம் உபஸங்கமிது’’ந்தி க³ந்த⁴குடிபமுகே² ஏகமந்தம் நிஸீதி³ பல்லங்கம் ஆபு⁴ஜித்வா. தேன வுத்தம் – ‘‘தேன கோ² பன ஸமயேன ஆயஸ்மா சூளபந்த²கோ ப⁴க³வதோ அவிதூ³ரே நிஸின்னோ ஹோதி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா’’தி. ஸோ ஹி ததா³ காலபரிச்சே²த³ம் கத்வா ஸமாபத்திம் ஸமாபஜ்ஜித்வா நிஸீதி³.

ஏதமத்த²ம் விதி³த்வாதி ஏதம் ஆயஸ்மதோ சூளபந்த²கஸ்ஸ காயசித்தானம் ஸம்மாபணிஹிதபா⁴வஸங்கா²தம் அத்த²ம் ஜானித்வா. இமம் உதா³னந்தி அஞ்ஞோபி யோ பஸ்ஸத்³த⁴காயோ ஸப்³பி³ரியாபதே²ஸு உபட்டி²தஸ்ஸதி ஸமாஹிதோ, தஸ்ஸ பி⁴க்கு²னோ அனுபாதா³ பரினிப்³பா³னபரியோஸானஸ்ஸ விஸேஸாதி⁴க³மஸ்ஸ தத்த² பாதுபா⁴வவிபா⁴வனம் இமம் உதா³னம் உதா³னேஸி.

தத்த² டி²தேன காயேனாதி காயத்³வாரிகஸ்ஸ அஸம்வரஸ்ஸ பஹானேன அகரணேன ஸம்மா ட²பிதேன சோபனகாயேன, ததா² சக்கா²தீ³னம் இந்த்³ரியானம் நிப்³பி³ஸேவனபா⁴வகரணேன ஸுட்டு² ட²பிதேன பஞ்சத்³வாரிககாயேன, ஸம்யதஹத்த²பாத³தாய ஹத்த²குக்குச்சாதீ³னம் அபா⁴வதோ அபரிப²ந்த³னேன டி²தேன கரஜகாயேன சாதி ஸங்கே²பதோ ஸப்³பே³னபி காயேன நிப்³பி³காரதாஸங்கா²தேன நிச்சலபா⁴வேன டி²தேன. ஏதேனஸ்ஸ ஸீலபாரிஸுத்³தி⁴ த³ஸ்ஸிதா. இத்த²ம்பூ⁴தலக்க²ணே ச இத³ம் கரணவசனம். டி²தேன சேதஸாதி சித்தஸ்ஸ டி²திபரிதீ³பனேன ஸமாதி⁴ஸம்பத³ம் த³ஸ்ஸேதி. ஸமாதி⁴ ஹி சித்தஸ்ஸ ‘டி²தீ’தி வுச்சதி. தஸ்மா ஸமத²வஸேன விபஸ்ஸனாவஸேனேவ வா ஏகக்³க³தாய ஸதி சித்தம் ஆரம்மணே ஏகோதி³பா⁴வூபக³மனேன டி²தம் நாம ஹோதி, ந அஞ்ஞதா². இத³ஞ்ச யதா²வுத்தகாயசித்தானம் ட²பனம் ஸமாத³ஹனம் ஸப்³ப³ஸ்மிம் காலே ஸப்³பே³ஸு ச இரியாபதே²ஸு இச்சி²தப்³ப³ந்தி த³ஸ்ஸேந்தோ ஆஹ – ‘‘திட்ட²ம் நிஸின்னோ உத³ வா ஸயானோ’’தி. தத்த² வா-ஸத்³தோ³ அனியமத்தோ². தேன திட்ட²ந்தோ வா நிஸின்னோ வா ஸயானோ வா தத³ஞ்ஞிரியாபதோ² வாதி அயமத்தோ² தீ³பிதோ ஹோதீதி சங்கமனஸ்ஸாபி இத⁴ ஸங்க³ஹோ வேதி³தப்³போ³.

ஏதம் ஸதிம் பி⁴க்கு² அதி⁴ட்ட²ஹானோதி யாய பகே³வ பரிஸுத்³த⁴ஸமாசாரோ காயசித்தது³ட்டு²ல்லபா⁴வூபஸமனேன காயம் சித்தஞ்ச அஸாரத்³த⁴ம் கத்வா படிலத்³தா⁴ய அனவஜ்ஜஸுகா²தி⁴ட்டா²ய காயசித்தபஸ்ஸத்³தி⁴வஸேன சித்தம் லஹும் முது³ம் கம்மஞ்ஞஞ்ச கத்வா ஸம்மா ட²பேந்தோ ஸமாத³ஹந்தோ கம்மட்டா²னம் பரிப்³ரூஹேதி மத்த²கஞ்ச பாபேதி, தம் ஏவ கம்மட்டா²னானுயோக³ஸ்ஸ ஆதி³மஜ்ஜ²பரியோஸானேஸு ப³ஹூபகாரம் ஸதிம் பி⁴க்கு² அதி⁴ட்ட²ஹானோ ஸீலவிஸோத⁴னம் ஆதி³ம் கத்வா யாவ விஸேஸாதி⁴க³மா தத்த² தத்த² அதி⁴ட்ட²ஹந்தோதி அத்தோ². லபே⁴த² புப்³பா³பரியம் விஸேஸந்தி ஸோ ஏவம் ஸதிஆரக்கே²ன சேதஸா கம்மட்டா²னம் உபரூபரி வட்³டே⁴ந்தோ ப்³ரூஹேந்தோ பா²திம் கரோந்தோ புப்³பா³பரியம் புப்³பா³பரியவந்தம் புப்³பா³பரபா⁴கே³ன பவத்தம் உளாருளாரதராதி³பே⁴த³விஸேஸம் லபே⁴ய்ய.

தத்த² து³விதோ⁴ புப்³பா³பரியவிஸேஸோ ஸமத²வஸேன விபஸ்ஸனாவஸேன சாதி. தேஸு ஸமத²வஸேன தாவ நிமித்துப்பத்திதோ பட்டா²ய யாவ நேவஸஞ்ஞானாஸஞ்ஞாயதனவஸீபா⁴வோ, தாவ பவத்தோ பா⁴வனாவிஸேஸோ புப்³பா³பரியவிஸேஸோ. விபஸ்ஸனாவஸேன பன ரூபமுகே²ன அபி⁴னிவிஸந்தஸ்ஸ ரூபத⁴ம்மபரிக்³க³ஹதோ, இதரஸ்ஸ நாமத⁴ம்மபரிக்³க³ஹதோ பட்டா²ய யாவ அரஹத்தாதி⁴க³மோ, தாவ பவத்தோ பா⁴வனாவிஸேஸோ புப்³பா³பரியவிஸேஸோ. அயமேவ ச இதா⁴தி⁴ப்பேதோ.

லத்³தா⁴ன புப்³பா³பரியம் விஸேஸந்தி புப்³பா³பரியவிஸேஸம் உக்கம்ஸபாரமிப்பத்தம் அரஹத்தம் லபி⁴த்வா. அத³ஸ்ஸனம் மச்சுராஜஸ்ஸ க³ச்சே²தி ஜீவிதுபச்சே²த³வஸேன ஸப்³பே³ஸம் ஸத்தானம் அபி⁴ப⁴வனதோ மச்சுராஜஸங்கா²தஸ்ஸ மரணஸ்ஸ விஸயபூ⁴தம் ப⁴வத்தயம் ஸமதிக்கந்தத்தா அத³ஸ்ஸனம் அகோ³சரம் க³ச்சே²ய்ய. இமஸ்மிம் வக்³கே³ யம் அவுத்தம், தம் ஹேட்டா² வுத்தனயமேவாதி.

த³ஸமஸுத்தவண்ணனா நிட்டி²தா.

நிட்டி²தா ச மஹாவக்³க³வண்ணனா.