7. ஏகபுத்தகஸுத்தவண்ணனா

17. ஸத்தமே ஏகபுத்தகோதி ஏகோ புத்தோ, ஸோ ச அனுகம்பிதப்³ப³ட்டே²ன ஏகபுத்தகோ, பியாயிதப்³ப³ட்டே²ன பியோ, மனஸ்ஸ வட்³ட⁴னட்டே²ன மனாபோ. ஸரீரஸோபா⁴ஸம்பத்தியா வா த³ஸ்ஸனீயட்டே²ன பியோ, ஸீலாசாரஸம்பத்தியா கல்யாணத⁴ம்மதாய மனாபோ. கலேதி ஸத்தே கே²பேதீதி காலோ, மரணம். தம் கதோ பத்தோதி காலங்கதோ, காலேன வா மச்சுனா கதோ நட்டோ² அத³ஸ்ஸனம் க³தோதி காலங்கதோ, மதோதி அத்தோ².

ஸம்ப³ஹுலா உபாஸகாதி ஸாவத்தி²வாஸினோ ப³ஹூ உபாஸகா மதபுத்தஉபாஸகஸ்ஸ ஸஹஸோகீபா⁴வேன யாவ ஆளாஹனா பச்ச²தோ க³ந்த்வா மதஸரீரஸ்ஸ கத்தப்³ப³ம் காரேத்வா படினிவத்தா யதா²னிவத்தா²வ உத³கம் ஓதரித்வா ஸீஸம்ன்ஹாதா வத்தா²னி பீளேத்வா அனோதாபேத்வாவ ஏகம் நிவாஸேத்வா ஏகம் உத்தராஸங்க³ம் கத்வா உபாஸகம் புரதோ கத்வா ‘‘ஸோகவினோத³னம் த⁴ம்மம் ஸத்து² ஸந்திகே ஸோஸ்ஸாமா’’தி ப⁴க³வந்தம் உபஸங்கமிம்ஸு. தேன வுத்தம் ‘‘அல்லகேஸா’’திஆதி³.

தத்த² அல்லவத்தா²தி உத³கேன திந்தவத்தா². தி³வா தி³வஸ்ஸாதி தி³வஸஸ்ஸபி தி³வா, மஜ்ஜ²ன்ஹிகே காலேதி அத்தோ². யஸ்மா ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி. காலம் விதி³த்வா புச்ச²ந்தி, காலம் விதி³த்வா ந புச்ச²ந்தி, தஸ்மா ஜானந்தோயேவ ப⁴க³வா கதா²ஸமுட்டா²பனத்த²ம் புச்ச²ந்தோ ‘‘கிம் நு கோ² தும்ஹே உபாஸகா’’திஆதி³மாஹ. தஸ்ஸத்தோ² – தும்ஹே உபாஸகா அஞ்ஞேஸு தி³வஸேஸு மம ஸந்திகம் ஆக³ச்ச²ந்தா ஓதாபிதஸுத்³த⁴வத்தா² ஸாயன்ஹே ஆக³ச்ச²த², அஜ்ஜ பன அல்லவத்தா² அல்லகேஸா டி²தமஜ்ஜ²ன்ஹிகே காலே இதா⁴க³தா, தம் கிம் காரணந்தி. தேன மயந்தி தேன புத்தவியோக³ஜனிதசித்தஸந்தாபேன ப³லவஸோகாபி⁴பூ⁴ததாய ஏவம்பூ⁴தா மயம் இதூ⁴பஸங்கமந்தாதி.

ஏதமத்த²ம் விதி³த்வாதி பியவத்து²ஸம்ப⁴வா ஸோகது³க்க²தோ³மனஸ்ஸாத³யோ, அஸதி பியவத்து²ஸ்மிம் ஸப்³ப³ஸோ ஏதே ந ஸந்தீதி ஏதமத்த²ம் ஸப்³பா³காரதோ ஜானித்வா தத³த்த²ப்பகாஸனம் இமம் உதா³னம் உதா³னேஸி.

தத்த² பியரூபஸ்ஸாத³க³தி⁴தாஸேதி பியஸபா⁴வேஸு ரூபக்க²ந்தா⁴தீ³ஸு ஸுக²வேத³னஸ்ஸாதே³ன க³தி⁴தா படிப³த்³த⁴சித்தா. க³தி⁴தாஸேதி ஹி க³தி⁴தாஇச்சேவத்தோ². ஸேதி வா நிபாதமத்தம். பியரூபா நாம சக்கா²த³யோ புத்ததா³ராத³யோ ச. வுத்தஞ்ஹேதம் – ‘‘கிஞ்ச லோகே பியரூபம் ஸாதரூபம் சக்கு² லோகே …பே… த⁴ம்மதண்ஹா லோகே பியரூபம் ஸாதரூப’’ந்தி (சூளனி. ஹேமகமாணவபுச்சா²னித்³தே³ஸ 55).

‘‘கே²த்தம் வத்து²ம் ஹிரஞ்ஞம் வா, க³வஸ்ஸம் தா³ஸபோரிஸம்;

தி²யோ ப³ந்தூ⁴ புது² காமே, யோ நரோ அனுகி³ஜ்ஜ²தீ’’தி ச. (ஸு. நி. 775);

தஸ்மா தேஸு பியரூபேஸு அஸ்ஸாதே³ன கி³த்³தா⁴ முச்சி²தா அஜ்ஜா²பன்னாதி அத்தோ². கே பன தே பியரூபஸ்ஸாத³க³தி⁴தாதி தே த³ஸ்ஸேதி ‘‘தே³வகாயா புது²மனுஸ்ஸா சா’’தி, சாதுமஹாராஜிகாத³யோ ப³ஹுதே³வஸமூஹா சேவ ஜம்பு³தீ³பகாதி³கா ப³ஹுமனுஸ்ஸா ச. அகா⁴வினோதி காயிகசேதஸிகது³க்கே²ன து³க்கி²தா. பரிஜுன்னாதி ஜராரோகா³தி³விபத்தியா யோப்³ப³னாரோக்³யாதி³ஸம்பத்திதோ பரிஹீனா. யதா²லாப⁴வஸேன வாயமத்தோ² தே³வமனுஸ்ஸேஸு வேதி³தப்³போ³. அத² வா காமஞ்சேகந்தஸுக²ஸமப்பிதானம் தே³வானம் து³க்க²ஜராரோகா³ ந ஸம்ப⁴வந்தி, தத³னதிவத்தஸபா⁴வதாய பன தேபி ‘‘அகா⁴வினோ’’தி ‘‘பரிஜுன்னா’’தி ச வுத்தா. தேஸம்பி வா புப்³ப³னிமித்துப்பத்தியா படிச்ச²ன்னஜராய சேதஸிகரோக³ஸ்ஸ ச வஸேன து³க்கா²தீ³னம் ஸம்ப⁴வோ வேதி³தப்³போ³. மச்சுராஜஸ்ஸ வஸம் க³ச்ச²ந்தீதி பியவத்து²விஸயாய தண்ஹாய அப்பஹீனத்தா புனப்புனம் க³ப்³பூ⁴பக³மனதோ தா⁴துத்தயிஸ்ஸரதாய மச்சுராஜஸங்கா²தஸ்ஸ மரணஸ்ஸ வஸம் ஹத்த²மேவ க³ச்ச²ந்தி.

ஏத்தாவதா வட்டம் த³ஸ்ஸேத்வா இதா³னி ‘‘யே வே தி³வா’’திஆதி³னா விவட்டம் த³ஸ்ஸேதி. தத்த² யே வே தி³வா ச ரத்தோ ச அப்பமத்தாதி ‘‘தி³வஸம் சங்கமேன நிஸஜ்ஜாய ஆவரணீயேஹி த⁴ம்மேஹி சித்தம் பரிஸோதே⁴தீ’’திஆதி³னா வுத்தனயேன தி³வஸபா⁴கே³ ரத்திபா⁴கே³ ச த³ள்ஹம் அப்பமத்தா அப்பமாத³ப்படிபத³ம் பூரேந்தி. ஜஹந்தி பியரூபந்தி சதுஸச்சகம்மட்டா²னபா⁴வனம் உஸ்ஸுக்காபேத்வா அரியமக்³கா³தி⁴க³மேன பியரூபம் பியஜாதிகம் சக்கா²தி³பியவத்து²ம் தப்படிப³த்³த⁴ச²ந்த³ராக³ஜஹனேன ஜஹந்தி. தே வே க²ணந்தி அக⁴மூலம், மச்சுனோ ஆமிஸம் து³ரதிவத்தந்தி தே அரியபுக்³க³லா அக⁴ஸ்ஸ வட்டது³க்க²ஸ்ஸ மூலபூ⁴தம், மச்சுனா மரணேன ஆமஸிதப்³ப³தோ ஆமிஸம், இதோ ப³ஹித்³தா⁴ கேஹிசிபி ஸமணப்³ராஹ்மணேஹி நிவத்திதும் அஸக்குணேய்யதாய து³ரதிவத்தம், ஸஹ அவிஜ்ஜாய தண்ஹம் அரியமக்³க³ஞாணகுதா³லேன க²ணந்தி, லேஸமத்தம்பி அனவஸேஸந்தா உம்மூலயந்தீதி. ஸ்வாயமத்தோ² –

‘‘அப்பமாதோ³ அமதபத³ம், பமாதோ³ மச்சுனோ பத³ம்;

அப்பமத்தா ந மீயந்தி, யே பமத்தா யதா² மதா’’தி. (த⁴. ப. 21) –

ஆதீ³ஹி ஸுத்தபதே³ஹி வித்தா²ரேதப்³போ³தி.

ஸத்தமஸுத்தவண்ணனா நிட்டி²தா.