6. க³ப்³பி⁴னீஸுத்தவண்ணனா

16. ச²ட்டே² அஞ்ஞதரஸ்ஸ பரிப்³பா³ஜகஸ்ஸாதி ஏகஸ்ஸ குடும்பி³கஸ்ஸ பரிப்³பா³ஜகஸ்ஸ. த³ஹராதி தருணீ. மாணவிகாதி ப்³ராஹ்மணதீ⁴தாய வோஹாரோ. பஜாபதீதி ப⁴ரியா. க³ப்³பி⁴னீதி ஆபன்னஸத்தா. உபவிஜஞ்ஞாதி அஜ்ஜ ஸுவேதி பச்சுபட்டி²தவிஜாயனகாலா ஹோதீதி ஸம்ப³ந்தோ⁴. ஸோ கிர ப்³ராஹ்மணஜாதிகோ ஸப⁴ரியோ வாத³பத்த²ஸ்ஸமே டி²தோ, தேன நம் ஸபஜாபதிகம் பரிப்³பா³ஜகவோஹாரேன ஸமுதா³சரந்தி. ப⁴ரியா பனஸ்ஸ ப்³ராஹ்மணஜாதிகத்தா ப்³ராஹ்மணாதி ஆலபதி. தேலந்தி திலதேலம். தேலஸீஸேன சேத்த² யம் யம் விஜாதாய பஸவது³க்க²ப்படிகாரத்த²ம் இச்சி²தப்³ப³ம், தம் ஸப்³ப³ம் ஸப்பிலோணாதி³ம் ஆஹராதி ஆணாபேதி. யம் மே விஜாதாய ப⁴விஸ்ஸதீதி யம் தேலாதி³ மய்ஹம் விஜாதாய ப³ஹினிக்க²ந்தக³ப்³பா⁴ய உபகாராய ப⁴விஸ்ஸதி. ‘‘பரிப்³பா³ஜிகாயா’’திபி பாடோ². குதோதி கஸ்மா டா²னா, யதோ ஞாதிகுலா வா மித்தகுலா வா தேலாதி³ம் ஆஹரேய்யம், தம் டா²னம் மே நத்தீ²தி அதி⁴ப்பாயோ. தேலம் ஆஹராமீதி வத்தமானஸமீபதாய வத்தமானம் கத்வா வுத்தம், தேலம் ஆஹரிஸ்ஸாமீதி அத்தோ². ஸமணஸ்ஸ வா ப்³ராஹ்மணஸ்ஸ வா ஸப்பிஸ்ஸ வா தேலஸ்ஸ வாதி ச ஸமுச்சயத்தோ² வா-ஸத்³தோ³ ‘‘அக்³கி³தோ வா உத³கதோ வா மிது²பே⁴தா³ வா’’திஆதீ³ஸு (மஹாவ. 286; தீ³. நி. 2.152; உதா³. 76) விய. ஸப்பிஸ்ஸ வா தேலஸ்ஸ வாதி பச்சத்தே ஸாமிவசனம், ஸப்பி ச தேலஞ்ச யாவத³த்த²ம் பாதும் பிவிதும் தீ³யதீதி அத்தோ². அபரே பன ‘‘ஸப்பிஸ்ஸ வா தேலஸ்ஸ வாதி அவயவஸம்ப³ந்தே⁴ ஸாமிவசனம். ஸப்பிதேலஸமுதா³யஸ்ஸ ஹி அவயவோ இத⁴ யாவத³த்த²ஸத்³தே³ன வுச்சதீ’’தி வத³ந்தி. நோ நீஹரிதுந்தி பா⁴ஜனேன வா ஹத்தே²ன வா ப³ஹி நேதும் நோ தீ³யதி, உச்ச²த்³தி³த்வானாதி வமித்வா, யம்னூன த³தே³ய்யந்தி ஸம்ப³ந்தோ⁴. ஏவம் கிரஸ்ஸ அஹோஸி ‘‘அஹம் ரஞ்ஞோ கோட்டா²கா³ரம் க³ந்த்வா தேலம் கண்ட²மத்தம் பிவித்வா தாவதே³வ க⁴ரம் ஆக³ந்த்வா ஏகஸ்மிம் பா⁴ஜனே யதா²பீதம் வமித்வா உத்³த⁴னம் ஆரோபேத்வா பசிஸ்ஸாமி, யம் பித்தஸேம்ஹாதி³மிஸ்ஸிதம், தம் அக்³கி³னா ஜா²யிஸ்ஸதி, தேலம் பன க³ஹேத்வா இமிஸ்ஸா பரிப்³பா³ஜிகாய கம்மே உபனேஸ்ஸாமீ’’தி.

உத்³த⁴ம் காதுந்தி வமனவஸேன உத்³த⁴ம் நீஹரிதும். ந பன அதோ⁴தி விரிஞ்சனவஸேன ஹேட்டா² நீஹரிதும் ந பன ஸக்கோதி. ஸோ ஹி ‘‘அதி⁴கம் பீதம் ஸயமேவ முக²தோ நிக்³க³மிஸ்ஸதீ’’தி பிவித்வா ஆஸயஸ்ஸ அரித்ததாய அனிக்³க³தே வமனவிரேசனயோக³ம் அஜானந்தோ அலப⁴ந்தோ வா கேவலம் து³க்கா²ஹி வேத³னாஹி பு²ட்டோ² ஆவட்டதி ச பரிவட்டதி ச. து³க்கா²ஹீதி து³க்க²மாஹி. திப்³பா³ஹீதி ப³ஹலாஹி திகி²ணாஹி வா. க²ராஹீதி கக்க²ளாஹி. கடுகாஹீதி அதிவிய அனிட்ட²பா⁴வேன தா³ருணாஹி. ஆவட்டதீதி ஏகஸ்மிம்யேவ டா²னே அனிபஜ்ஜித்வா அத்தனோ ஸரீரம் இதோ சிதோ ஆகட்³ட⁴ந்தோ ஆவட்டதி. பரிவட்டதீதி ஏகஸ்மிம் பதே³ஸே நிபன்னோபி அங்க³பச்சங்கா³னி பரிதோ கி²பந்தோ வட்டதி, அபி⁴முக²ம் வா வட்டந்தோ ஆவட்டதி, ஸமந்ததோ வட்டந்தோ பரிவட்டதி.

ஏதமத்த²ம் விதி³த்வாதி ‘‘ஸகிஞ்சனஸ்ஸ அப்படிஸங்கா²பரிபோ⁴க³ஹேதுகா அயம் து³க்கு²ப்பத்தி, அகிஞ்சனஸ்ஸ பன ஸப்³ப³ஸோ அயம் நத்தீ²’’தி ஏதமத்த²ம் ஸப்³பா³காரதோ ஜானித்வா தத³த்த²ப்பகாஸனம் இமம் உதா³னம் உதா³னேஸி.

தத்த² ஸுகி²னோ வதாதி ஸுகி²னோ வத ஸப்புரிஸா. கே பன தேதி? யே அகிஞ்சனா, யே ராகா³தி³கிஞ்சனஸ்ஸ பரிக்³க³ஹகிஞ்சனஸ்ஸ ச அபா⁴வேன அகிஞ்சனா, கேஸம் பனித³ம் கிஞ்சனம் நத்தீ²தி ஆஹ – ‘‘வேத³கு³னோ ஹி ஜனா அகிஞ்சனா’’தி, யே அரியமக்³க³ஞாணஸங்கா²தம் வேத³ம் க³தா அதி⁴க³தா, தேன வா வேதே³ன நிப்³பா³னம் க³தாதி வேத³கு³னோ, தே அரியஜனா கீ²ணாஸவபுக்³க³லா அனவஸேஸராகா³தி³கிஞ்சனானம் அக்³க³மக்³கே³ன ஸமுச்சி²ன்னத்தா அகிஞ்சனா நாம. அஸதி ஹி ராகா³தி³கிஞ்சனே குதோ பரிக்³க³ஹகிஞ்சனஸ்ஸ ஸம்ப⁴வோ. ஏவம் கா³தா²ய புரிமபா⁴கே³ன அரஹந்தே பஸம்ஸித்வா அபரபா⁴கே³ன அந்த⁴புது²ஜ்ஜனே க³ரஹந்தோ ‘‘ஸகிஞ்சனம் பஸ்ஸா’’திஆதி³மாஹ. தம் புரிமஸுத்தே வுத்தத்த²மேவ. ஏவம் இமாயபி கா³தா²ய வட்டவிவட்டம் கதி²தம்.

ச²ட்ட²ஸுத்தவண்ணனா நிட்டி²தா.