5. உபாஸகஸுத்தவண்ணனா

15. பஞ்சமே இச்சா²னங்க³லகோதி இச்சா²னங்க³லனாமகோ கோஸலேஸு ஏகோ ப்³ராஹ்மணகா³மோ, தம்னிவாஸிதாய தத்த² வா ஜாதோ ப⁴வோதி வா இச்சா²னங்க³லகோ. உபாஸகோதி தீஹி ஸரணக³மனேஹி ப⁴க³வதோ ஸந்திகே உபாஸகபா⁴வஸ்ஸ பவேதி³தத்தா உபாஸகோ பஞ்சஸிக்கா²பதி³கோ பு³த்³த⁴மாமகோ, த⁴ம்மமாமகோ, ஸங்க⁴மாமகோ. கேனசிதே³வ கரணீயேனாதி உத்³தா⁴ரஸோதா⁴பனாதி³னா கேனசிதே³வ கத்தப்³பே³ன. தீரேத்வாதி நிட்டா²பேத்வா. அயம் கிர உபாஸகோ புப்³பே³ அபி⁴ண்ஹம் ப⁴க³வந்தம் உபஸங்கமித்வா பயிருபாஸதி, ஸோ கதிபயம் காலம் ப³ஹுகரணீயதாய ஸத்து² த³ஸ்ஸனம் நாபி⁴ஸம்போ⁴ஸி. தேனாஹ ப⁴க³வா – ‘‘சிரஸ்ஸம் கோ² த்வம், உபாஸக, இமம் பரியாயமகாஸி, யதி³த³ம் இதா⁴க³மனாயா’’தி.

தத்த² சிரஸ்ஸந்தி சிரேன. பரியாயந்தி வாரம். யதி³த³ந்தி நிபாதோ, யோ அயந்தி அத்தோ². இத³ம் வுத்தம் ஹோதி – இத⁴ மம ஸந்திகே ஆக³மனாய யோ அயம் அஜ்ஜ கதோ வாரோ, தம் இமம் சிரேன பபஞ்சம் கத்வா அகாஸீதி. சிரபடிகாஹந்தி சிரபடிகோ அஹம், சிரகாலதோ பட்டா²ய அஹம் உபஸங்கமிதுகாமோதி ஸம்ப³ந்தோ⁴. கேஹிசி கேஹிசீதி ஏகச்சேஹி ஏகச்சேஹி. அத² வா கேஹிசி கேஹிசீதி யேஹி வா தேஹி வா. தத்த² கா³ரவம் த³ஸ்ஸேதி. ஸத்த²ரி அபி⁴ப்பஸன்னஸ்ஸ ஹி ஸத்து²த³ஸ்ஸனத⁴ம்மஸ்ஸவனேஸு விய ந அஞ்ஞத்த² ஆத³ரோ ஹோதி. கிச்சகரணீயேஹீதி ஏத்த² அவஸ்ஸம் காதப்³ப³ம் கிச்சம், இதரம் கரணீயம். பட²மம் வா காதப்³ப³ம் கிச்சம், பச்சா² காதப்³ப³ம் கரணீயம். கு²த்³த³கம் வா கிச்சம், மஹந்தம் கரணீயம். ப்³யாவடோதி உஸ்ஸுக்கோ. ஏவாஹந்தி ஏவம் இமினா பகாரேன அஹம் நாஸக்கி²ம் உபஸங்கமிதும், ந அகா³ரவாதி³னாதி அதி⁴ப்பாயோ.

ஏதமத்த²ம் விதி³த்வாதி து³ல்லபே⁴ பு³த்³து⁴ப்பாதே³ மனுஸ்ஸத்தலாபே⁴ ச ஸத்தானம் ஸகிஞ்சனபா⁴வேன கிச்சபஸுததாய குஸலந்தராயோ ஹோதி, ந அகிஞ்சனஸ்ஸாதி ஏதமத்த²ம் ஸப்³பா³காரதோ விதி³த்வா. இமம் உதா³னந்தி தத³த்த²பரிதீ³பனமேவ இமம் உதா³னம் உதா³னேஸி.

தத்த² ஸுக²ம் வத தஸ்ஸ ந ஹோதி கிஞ்சீதி யஸ்ஸ புக்³க³லஸ்ஸ கிஞ்சி ரூபாதீ³ஸு ஏகவத்து²ம்பி ‘‘மமேத’’ந்தி தண்ஹாய பரிக்³க³ஹிதபா⁴வேன ந ஹோதி நத்தி² ந விஜ்ஜதி, ஸுக²ம் வத தஸ்ஸ புக்³க³லஸ்ஸ, அஹோ ஸுக²மேவாதி அத்தோ². ‘‘ந ஹோஸீ’’திபி பாடோ², தஸ்ஸ அதீதகாலவஸேன அத்தோ² வேதி³தப்³போ³. கேசி பன ந ஹோதி கிஞ்சீதி பத³ஸ்ஸ ‘‘ராகா³தி³கிஞ்சனம் யஸ்ஸ ந ஹோதீ’’தி அத்த²ம் வண்ணேந்தி, தம் ந ஸுந்த³ரம் பரிக்³க³ஹத⁴ம்மவஸேன தே³ஸனாய ஆக³தத்தா. ராகா³தி³கிஞ்சனந்தி பரிக்³க³ஹேதப்³ப³ஸ்ஸாபி ஸங்க³ஹே ஸதி யுத்தமேவ வுத்தம் ஸியா அத² வா யஸ்ஸ புக்³க³லஸ்ஸ கிஞ்சி அப்பம்பி கிஞ்சனம் பலிபோ³த⁴ஜாதம் ராகா³தி³கிஞ்சனாபா⁴வதோ ஏவ ந ஹோதி, தம் தஸ்ஸ அகிஞ்சனத்தம் ஸுக²ஸ்ஸ பச்சயபா⁴வதோ ஸுக²ம் வதம், அஹோ ஸுக²ந்தி அத்தோ². கஸ்ஸ பன ந ஹோதி கிஞ்சனந்தி சே, ஆஹ ‘‘ஸங்கா²தத⁴ம்மஸ்ஸ ப³ஹுஸ்ஸுதஸ்ஸா’’தி. யோ சதூஹிபி மக்³க³ஸங்கா²ஹி ஸோளஸகிச்சனிப்ப²த்தியா ஸங்கா²தத⁴ம்மோ கதகிச்சோ, ததோ ஏவ படிவேத⁴பா³ஹுஸச்சேன ப³ஹுஸ்ஸுதோ, தஸ்ஸ.

இதி ப⁴க³வா அகிஞ்சனபா⁴வே ஆனிஸம்ஸம் த³ஸ்ஸேத்வா ஸகிஞ்சனபா⁴வே ஆதீ³னவம் த³ஸ்ஸேதும் ‘‘ஸகிஞ்சனம் பஸ்ஸா’’திஆதி³மாஹ. தஸ்ஸத்தோ² – ராகா³தி³கிஞ்சனானம் ஆமிஸகிஞ்சனானஞ்ச அத்தி²தாய ஸகிஞ்சனம், ஸகிஞ்சனத்தா ஏவ அலத்³தா⁴னஞ்ச லத்³தா⁴னஞ்ச காமானம் பரியேஸனாரக்க²ணஹேது கிச்சகரணீயவஸேன ‘‘அஹம் மமா’’தி க³ஹணவஸேன ச விஹஞ்ஞமானம் விகா⁴தம் ஆபஜ்ஜமானம் பஸ்ஸாதி த⁴ம்மஸம்வேக³ப்பத்தோ ஸத்தா² அத்தனோ சித்தம் வத³தி. ஜனோ ஜனஸ்மிம் படிப³ந்த⁴ரூபோதி ஸயம் அஞ்ஞோ ஜனோ ஸமானோ அஞ்ஞஸ்மிம் ஜனே ‘‘அஹம் இமஸ்ஸ, மம அய’’ந்தி தண்ஹாவஸேன படிப³ந்த⁴ஸபா⁴வோ ஹுத்வா விஹஞ்ஞதி விகா⁴தம் ஆபஜ்ஜதி. ‘‘படிப³த்³த⁴சித்தோ’’திபி பாடோ². அயஞ்ச அத்தோ² –

‘‘புத்தா மத்தி² த⁴னம்மத்தி², இதி பா³லோ விஹஞ்ஞதி;

அத்தா ஹி அத்தனோ நத்தி², குதோ புத்தா குதோ த⁴ன’’ந்தி. (த⁴. ப. 62) –

ஆதீ³ஹி ஸுத்தபதே³ஹி தீ³பேதப்³போ³தி.

பஞ்சமஸுத்தவண்ணனா நிட்டி²தா.