5. சித்தாதே²ரீகா³தா²வண்ணனா

கிஞ்சாபி கோ²ம்ஹி கிஸிகாதிஆதி³கா சித்தாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ இதோ சதுன்னவுதிகப்பே சந்த³பா⁴கா³ய நதி³யா தீரே கின்னரயோனியம் நிப்³ப³த்தி. ஸா ஏகதி³வஸம் ஏகம் பச்சேகபு³த்³த⁴ம் ருக்க²மூலே நிஸின்னம் தி³ஸ்வா பஸன்னமானஸா நளபுப்பே²ஹி பூஜம் கத்வா வந்தி³த்வா அஞ்ஜலிம் பக்³க³ஹேத்வா பத³க்கி²ணம் கத்வா பக்காமி. ஸா தேன புஞ்ஞகம்மேன தே³வமனுஸ்ஸேஸு ஸம்ஸரந்தீ இமஸ்மிம் பு³த்³து⁴ப்பாதே³ ராஜக³ஹே க³ஹபதிமஹாஸாலகுலே நிப்³ப³த்தித்வா விஞ்ஞுதம் பத்வா ஸத்து² ராஜக³ஹப்பவேஸனே படிலத்³த⁴ஸத்³தா⁴ பச்சா² மஹாபஜாபதிகோ³தமியா ஸந்திகே பப்³ப³ஜித்வா மஹல்லிகாகாலே கி³ஜ்ஜ²கூடபப்³ப³தம் அபி⁴ருஹித்வா ஸமணத⁴ம்மம் கரோந்தீ விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் பாபுணி. தேன வுத்தம் அபதா³னே –

‘‘சந்த³பா⁴கா³னதீ³தீரே, அஹோஸிம் கின்னரீ ததா³;

அத்³த³ஸம் விரஜம் பு³த்³த⁴ம், ஸயம்பு⁴ம் அபராஜிதம்.

‘‘பஸன்னசித்தா ஸுமனா, வேத³ஜாதா கதஞ்ஜலீ;

நளமாலம் க³ஹேத்வான, ஸயம்பு⁴ம் அபி⁴பூஜயிம்.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா கின்னரீதே³ஹம், அக³ச்சி²ம் தித³ஸம் க³திம்.

‘‘ச²த்திம்ஸதே³வராஜூனம், மஹேஸித்தமகாரயிம்;

த³ஸன்னம் சக்கவத்தீனம், மஹேஸித்தமகாரயிம்;

ஸம்வேஜேத்வான மே சித்தம், பப்³ப³ஜிம் அனகா³ரியம்.

‘‘கிலேஸா ஜா²பிதா மய்ஹம், ப⁴வா ஸப்³பே³ ஸமூஹதா;

ஸப்³பா³ஸவபரிக்கீ²ணா, நத்தி² தா³னி புனப்³ப⁴வோ.

‘‘சதுன்னவுதிதோ கப்பே, யம் புப்ப²மபி⁴பூஜயிம்;

து³க்³க³திம் நாபி⁴ஜானாமி, புப்ப²பூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ஸா பன அரஹத்தம் பத்வா அத்தனோ படிபத்திம் பச்சவேக்கி²த்வா –

27. ‘‘கிஞ்சாபி கோ²ம்ஹி கிஸிகா, கி³லானா பா³ள்ஹது³ப்³ப³லா;

த³ண்ட³மோலுப்³ப⁴ க³ச்சா²மி, பப்³ப³தம் அபி⁴ரூஹிய.

28. ‘‘ஸங்கா⁴டிம் நிக்கி²பித்வான, பத்தகஞ்ச நிகுஜ்ஜிய;

ஸேலே க²ம்பே⁴ஸிமத்தானம், தமோக²ந்த⁴ம் பதா³லியா’’தி. –

இமா த்³வே கா³தா² அபா⁴ஸி.

தத்த² கிஞ்சாபி கோ²ம்ஹி கிஸிகாதி யதி³பி அஹம் ஜராஜிண்ணா அப்பமம்ஸலோஹிதபா⁴வேன கிஸஸரீரா அம்ஹி. கி³லானா பா³ள்ஹது³ப்³ப³லாதி தா⁴த்வாதி³விகாரேன கி³லானா, தேனேவ கே³லஞ்ஞேன அதிவிய து³ப்³ப³லா. த³ண்ட³மோலுப்³ப⁴ க³ச்சா²மீதி யத்த² கத்த²சி க³ச்ச²ந்தீ கத்தரயட்டி²ம் ஆலம்பி³த்வாவ க³ச்சா²மி. பப்³ப³தம் அபி⁴ரூஹியாதி ஏவம் பூ⁴தாபி விவேககாமதாய கி³ஜ்ஜ²கூடபப்³ப³தம் அபி⁴ருஹித்வா.

ஸங்கா⁴டிம் நிக்கி²பித்வானாதி ஸந்தருத்தரா ஏவ ஹுத்வா யதா²ஸம்ஹதம் அம்ஸே ட²பிதம் ஸங்கா⁴டிம் ஹத்த²பாஸே ட²பேத்வா. பத்தகஞ்ச நிகுஜ்ஜியாதி மய்ஹம் வலஞ்ஜனமத்திகாபத்தம் அதோ⁴முக²ம் கத்வா ஏகமந்தே ட²பேத்வா. ஸேலே க²ம்பே⁴ஸிமத்தானம், தமோக²ந்த⁴ம் பதா³லியாதி பப்³ப³தே நிஸின்னா இமினா தீ³கே⁴ன அத்³து⁴னா அபதா³லிதபுப்³ப³ம் மோஹக்க²ந்த⁴ம் பதா³லேத்வா, தேனேவ ச மோஹக்க²ந்த⁴பதா³லனேன அத்தானம் அத்தபா⁴வம் க²ம்பே⁴ஸிம், மம ஸந்தானம் ஆயதிம் அனுப்பத்தித⁴ம்மதாபாத³னேன விக்க²ம்பே⁴ஸிந்தி அத்தோ².

சித்தாதே²ரீகா³தா²வண்ணனா நிட்டி²தா.