6. மேத்திகாதே²ரீகா³தா²வண்ணனா

கிஞ்சாபி கோ²ம்ஹி து³க்கி²தாதிஆதி³கா மேத்திகாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தீ ஸித்³த⁴த்த²ஸ்ஸ ப⁴க³வதோ காலே க³ஹபதிகுலே நிப்³ப³த்தித்வா விஞ்ஞுதம் பத்வா ஸத்து² சேதியே ரதனேன படிமண்டி³தாய மேக²லாய பூஜம் அகாஸி. ஸா தேன புஞ்ஞகம்மேன தே³வமனுஸ்ஸேஸு ஸம்ஸரந்தீ இமஸ்மிம் பு³த்³து⁴ப்பாதே³ ராஜக³ஹே ப்³ராஹ்மணமஹாஸாலகுலே நிப்³ப³த்தி. ஸேஸம் அனந்தரே வுத்தஸதி³ஸம். அயம் பன படிபா⁴க³கூடம் அபி⁴ருஹித்வா ஸமணத⁴ம்மம் கரோந்தீ விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் பாபுணி. தேன வுத்தம் அபதா³னே (அப. தே²ரீ 2.1.20-25) –

‘‘ஸித்³த⁴த்த²ஸ்ஸ ப⁴க³வதோ, தூ²பகாராபிகா அஹும்;

மேக²லிகா மயா தி³ன்னா, நவகம்மாய ஸத்து²னோ.

‘‘நிட்டி²தே ச மஹாதூ²பே, மேக²லம் புனதா³ஸஹம்;

லோகனாத²ஸ்ஸ முனினோ, பஸன்னா ஸேஹி பாணிபி⁴.

‘‘சதுன்னவுதிதோ கப்பே, யம் மேக²லமத³ம் ததா³;

து³க்³க³திம் நாபி⁴ஜானாமி, தூ²பகாரஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திம் பச்சவேக்கி²த்வா உதா³னவஸேன –

29. ‘‘கிஞ்சாபி கோ²ம்ஹி து³க்கி²தா, து³ப்³ப³லா க³தயோப்³ப³னா;

த³ண்ட³மோலுப்³ப⁴ க³ச்சா²மி, பப்³ப³தம் அபி⁴ரூஹிய.

30. ‘‘நிக்கி²பித்வான ஸங்கா⁴டிம், பத்தகஞ்ச நிகுஜ்ஜிய;

நிஸின்னா சம்ஹி ஸேலம்ஹி, அத² சித்தம் விமுச்சி மே;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

இமா த்³வே கா³தா² அபா⁴ஸி.

தத்த² து³க்கி²தாதி ரோகா³பி⁴ப⁴வேன து³க்கி²தா ஸஞ்ஜாதது³க்கா² து³க்க²ப்பத்தா. து³ப்³ப³லாதி தாய சேவ து³க்க²ப்பத்தியா, ஜராஜிண்ணதாய ச ப³லவிரஹிதா. தேனாஹ ‘‘க³தயோப்³ப³னா’’தி, அத்³த⁴க³தாதி அத்தோ².

அத² சித்தம் விமுச்சி மேதி ஸேலம்ஹி பாஸாணே நிஸின்னா சம்ஹி, அத² தத³னந்தரம் வீரியஸமதாய ஸம்மதே³வ யோஜிதத்தா மக்³க³படிபாடியா ஸப்³பே³ஹிபி ஆஸவேஹி மம சித்தம் விமுச்சி. ஸேஸம் வுத்தனயமேவ.

மேத்திகாதே²ரீகா³தா²வண்ணனா நிட்டி²தா.