4. அட்³ட⁴காஸிதே²ரீகா³தா²வண்ணனா

யாவ காஸிஜனபதோ³திஆதி³கா அட்³ட⁴காஸியா தே²ரியா கா³தா². அயம் கிர கஸ்ஸபஸ்ஸ த³ஸப³லஸ்ஸ காலே குலகே³ஹே நிப்³ப³த்தித்வா விஞ்ஞுதம் பத்வா பி⁴க்கு²னீனம் ஸந்திகம் க³ந்த்வா த⁴ம்மம் ஸுத்வா படிலத்³த⁴ஸத்³தா⁴ பப்³ப³ஜித்வா பி⁴க்கு²னிஸீலே டி²தம் அஞ்ஞதரம் படிஸம்பி⁴தா³ப்பத்தம் கீ²ணாஸவத்தே²ரிம் க³ணிகாவாதே³ன அக்கோஸித்வா, ததோ சுதா நிரயே பச்சித்வா இமஸ்மிம் பு³த்³து⁴ப்பாதே³ காஸிகரட்டே² உளாரவிப⁴வே ஸேட்டி²குலே நிப்³ப³த்தித்வா வுத்³தி⁴ப்பத்தா புப்³பே³ கதஸ்ஸ வசீது³ச்சரிதஸ்ஸ நிஸ்ஸந்தே³ன டா²னதோ பரிப⁴ட்டா² க³ணிகா அஹோஸி. நாமேன அட்³ட⁴காஸீ நாம. தஸ்ஸா பப்³ப³ஜ்ஜா ச தூ³தேன உபஸம்பதா³ ச க²ந்த⁴கே ஆக³தாயேவ. வுத்தஞ்ஹேதம் –

தேன கோ² பன ஸமயேன அட்³ட⁴காஸீ க³ணிகா பி⁴க்கு²னீஸு பப்³ப³ஜிதா ஹோதி. ஸா ச ஸாவத்தி²ம் க³ந்துகாமா ஹோதி ‘‘ப⁴க³வதோ ஸந்திகே உபஸம்பஜ்ஜிஸ்ஸாமீ’’தி. அஸ்ஸோஸும் கோ² து⁴த்தா – ‘‘அட்³ட⁴காஸீ கிர க³ணிகா ஸாவத்தி²ம் க³ந்துகாமா’’தி. தே மக்³கே³ பரியுட்டி²ம்ஸு. அஸ்ஸோஸி கோ² அட்³ட⁴காஸீ க³ணிகா ‘‘து⁴த்தா கிர மக்³கே³ பரியுட்டி²தா’’தி. ப⁴க³வதோ ஸந்திகே தூ³தம் பாஹேஸி – ‘‘அஹஞ்ஹி உபஸம்பஜ்ஜிதுகாமா, கத²ம் நு கோ² மயா படிபஜ்ஜிதப்³ப³’’ந்தி? அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, தூ³தேனபி உபஸம்பாதே³து’’ந்தி (சூளவ. 430).

ஏவம் லத்³தூ⁴பஸம்பதா³ பன விபஸ்ஸனாய கம்மம் கரோந்தீ ந சிரஸ்ஸேவ ஸஹ படிஸம்பி⁴தா³ஹி அரஹத்தம் பாபுணி. தேன வுத்தம் அபதா³னே (அப. தே²ரீ 2.4.168-183) –

‘‘இமம்ஹி ப⁴த்³த³கே கப்பே, ப்³ரஹ்மப³ந்து⁴ மஹாயஸோ;

கஸ்ஸபோ நாம கோ³த்தேன, உப்பஜ்ஜி வத³தம் வரோ.

‘‘ததா³ஹம் பப்³ப³ஜித்வான, தஸ்ஸ பு³த்³த⁴ஸ்ஸ ஸாஸனே;

ஸம்வுதா பாதிமோக்க²ம்ஹி, இந்த்³ரியேஸு ச பஞ்சஸு.

‘‘மத்தஞ்ஞுனீ ச அஸனே, யுத்தா ஜாக³ரியேபி ச;

வஸந்தீ யுத்தயோகா³ஹம், பி⁴க்கு²னிம் விக³தாஸவம்.

‘‘அக்கோஸிம் து³ட்ட²சித்தாஹம், க³ணிகேதி ப⁴ணிம் ததா³;

தேன பாபேன கம்மேன, நிரயம்ஹி அபச்சிஸம்.

‘‘தேன கம்மாவஸேஸேன, அஜாயிம் க³ணிகாகுலே;

ப³ஹுஸோவ பராதீ⁴னா, பச்சி²மாய ச ஜாதியம்.

‘‘காஸீஸு ஸேட்டி²குலஜா, ப்³ரஹ்மசாரீப³லேனஹம்;

அச்ச²ரா விய தே³வேஸு, அஹோஸிம் ரூபஸம்பதா³.

‘‘தி³ஸ்வான த³ஸ்ஸனீயம் மம், கி³ரிப்³ப³ஜபுருத்தமே;

க³ணிகத்தே நிவேஸேஸும், அக்கோஸனப³லேன மே.

‘‘ஸாஹம் ஸுத்வான ஸத்³த⁴ம்மம், பு³த்³த⁴ஸேட்டே²ன தே³ஸிதம்;

புப்³ப³வாஸனஸம்பன்னா, பப்³ப³ஜிம் அனகா³ரியம்.

‘‘ததூ³பஸம்பத³த்தா²ய, க³ச்ச²ந்தீ ஜினஸந்திகம்;

மக்³கே³ து⁴த்தே டி²தே ஸுத்வா, லபி⁴ம் தூ³தோபஸம்பத³ம்.

‘‘ஸப்³ப³கம்மம் பரிக்கீ²ணம், புஞ்ஞம் பாபம் ததே²வ ச;

ஸப்³ப³ஸம்ஸாரமுத்திண்ணா, க³ணிகத்தஞ்ச கே²பிதம்.

‘‘இத்³தீ⁴ஸு ச வஸீ ஹோமி, தி³ப்³பா³ய ஸோததா⁴துயா;

சேதோபரியஞாணஸ்ஸ, வஸீ ஹோமி மஹாமுனே.

‘‘புப்³பே³னிவாஸம் ஜானாமி, தி³ப்³ப³சக்கு² விஸோதி⁴தம்;

ஸப்³பா³ஸவபரிக்கீ²ணா, நத்தி² தா³னி புனப்³ப⁴வோ.

‘‘அத்த²த⁴ம்மனிருத்தீஸு, படிபா⁴னே ததே²வ ச;

ஞாணம் மம மஹாவீர, உப்பன்னம் தவ ஸந்திகே.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி. (அப. தே²ரீ 2.4.168-183);

அரஹத்தம் பன பத்வா உதா³னவஸேன –

25. ‘‘யாவ காஸிஜனபதோ³, ஸுங்கோ மே தத்தகோ அஹு;

தம் கத்வா நேக³மோ அக்³க⁴ம், அட்³டே⁴னக்³க⁴ம் ட²பேஸி மம்.

26. ‘‘அத² நிப்³பி³ந்த³ஹம் ரூபே, நிப்³பி³ந்த³ஞ்ச விரஜ்ஜஹம்;

மா புன ஜாதிஸம்ஸாரம், ஸந்தா⁴வேய்யம் புனப்புனம்;

திஸ்ஸோ விஜ்ஜா ஸச்சி²கதா, கதம் பு³த்³த⁴ஸ்ஸ ஸாஸன’’ந்தி. –

இமா கா³தா² அபா⁴ஸி.

தத்த² யாவ காஸிஜனபதோ³, ஸுங்கோ மே தத்தகோ அஹூதி காஸீஸு ஜனபதே³ஸு ப⁴வோ ஸுங்கோ காஸிஜனபதோ³, ஸோ யாவ யத்தகோ, தத்தகோ மய்ஹம் ஸுங்கோ அஹு அஹோஸி. கித்தகோ பன ஸோதி? ஸஹஸ்ஸமத்தோ. காஸிரட்டே² கிர ததா³ ஸுங்கவஸேன ஏகதி³வஸம் ரஞ்ஞோ உப்பஜ்ஜனகஆயோ அஹோஸி ஸஹஸ்ஸமத்தோ, இமாயபி புரிஸானம் ஹத்த²தோ ஏகதி³வஸம் லத்³த⁴த⁴னம் தத்தகம். தேன வுத்தம் – ‘‘யாவ காஸிஜனபதோ³, ஸுங்கோ மே தத்தகோ அஹூ’’தி. ஸா பன காஸிஸுங்கபரிமாணதாய காஸீதி ஸமஞ்ஞம் லபி⁴. தத்த² யேபு⁴ய்யேன மனுஸ்ஸா ஸஹஸ்ஸம் தா³தும் அஸக்கோந்தா ததோ உபட்³ட⁴ம் த³த்வா தி³வஸபா⁴க³மேவ ரமித்வா க³ச்ச²ந்தி, தேஸம் வஸேனாயம் அட்³ட⁴காஸீதி பஞ்ஞாயித்த². தேன வுத்தம் – ‘‘தம் கத்வா நேக³மோ அக்³க⁴ம், அட்³டே⁴னக்³க⁴ம் ட²பேஸி ம’’ந்தி. தம் பஞ்சஸதமத்தம் த⁴னம் அக்³க⁴ம் கத்வா நேக³மோ நிக³மவாஸிஜனோ இத்தி²ரதனபா⁴வேன அனக்³க⁴ம்பி ஸமானம் அட்³டே⁴ன அக்³க⁴ம் நிமித்தம் அட்³ட⁴காஸீதி ஸமஞ்ஞாவஸேன மம் ட²பேஸி, ததா² மம் வோஹரீதி அத்தோ².

அத² நிப்³பி³ந்த³ஹம் ரூபேதி ஏவம் ரூபூபஜீவினீ ஹுத்வா டி²தா. அத² பச்சா² ஸாஸனம் நிஸ்ஸாய ரூபே அஹம் நிப்³பி³ந்தி³ம் ‘‘இதிபி ரூபம் அனிச்சம், இதிபித³ம் ரூபம் து³க்க²ம், அஸுப⁴’’ந்தி பஸ்ஸந்தீ தத்த² உக்கண்டி²ம். நிப்³பி³ந்த³ஞ்ச விரஜ்ஜஹந்தி நிப்³பி³ந்த³ந்தீ சாஹம் ததோ பரம் விராக³ம் ஆபஜ்ஜிம். நிப்³பி³ந்த³க்³க³ஹணேன சேத்த² தருணவிபஸ்ஸனம் த³ஸ்ஸேதி, விராக³க்³க³ஹணேன ப³லவவிபஸ்ஸனம். ‘‘நிப்³பி³ந்த³ந்தோ விரஜ்ஜதி விராகா³ விமுச்சதீ’’தி ஹி வுத்தம். மா புன ஜாதிஸம்ஸாரம், ஸந்தா⁴வேய்யம் புனப்புனந்தி இமினா நிப்³பி³ந்த³னவிரஜ்ஜனாகாரே நித³ஸ்ஸேதி. திஸ்ஸோ விஜ்ஜாதிஆதி³னா தேஸம் மத்த²கப்பத்திம், தம் வுத்தனயமேவ.

அட்³ட⁴காஸிதே²ரீகா³தா²வண்ணனா நிட்டி²தா.