10. ஸாமாதே²ரீகா³தா²வண்ணனா

சதுக்க²த்தும் பஞ்சக்க²த்துந்திஆதி³கா ஸாமாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினித்வா ஸுக³தீஸுயேவ ஸம்ஸரந்தீ இமஸ்மிம் பு³த்³து⁴ப்பாதே³ கோஸம்பி³யம் க³ஹபதிமஹாஸாலகுலே நிப்³ப³த்தித்வா ஸாமாதிஸ்ஸா நாமம் அஹோஸி. ஸா விஞ்ஞுதம் பத்தா ஸாமாவதியா உபாஸிகாய பியஸஹாயிகா ஹுத்வா தாய காலங்கதாய ஸஞ்ஜாதஸம்வேகா³ பப்³ப³ஜி. பப்³ப³ஜித்வா ச ஸாமாவதிகம் ஆரப்³ப⁴ உப்பன்னஸோகம் வினோதே³தும் அஸக்கோந்தீ அரியமக்³க³ம் க³ண்ஹிதும் நாஸக்கி². அபரபா⁴கே³ ஆஸனஸாலாய நிஸின்னஸ்ஸ ஆனந்த³த்தே²ரஸ்ஸ ஓவாத³ம் ஸுத்வா விபஸ்ஸனம் பட்ட²பேத்வா ததோ ஸத்தமே தி³வஸே ஸஹ படிஸம்பி⁴தா³ஹி அரஹத்தம் பாபுணி.

அரஹத்தம் பன பத்வா அத்தனோ படிபத்திம் பச்சவேக்கி²த்வா தம் பகாஸேந்தீ –

37. ‘‘சதுக்க²த்தும் பஞ்சக்க²த்தும், விஹாரா உபனிக்க²மிம்;

அலத்³தா⁴ சேதஸோ ஸந்திம், சித்தே அவஸவத்தினீ;

தஸ்ஸா மே அட்ட²மீ ரத்தி, யதோ தண்ஹா ஸமூஹதா.

38. ‘‘ப³ஹூஹி து³க்க²த⁴ம்மேஹி, அப்பமாத³ரதாய மே;

தண்ஹக்க²யோ அனுப்பத்தோ, கதம் பு³த்³த⁴ஸ்ஸ ஸாஸன’’ந்தி. –

உதா³னவஸேன இமா த்³வே கா³தா² அபா⁴ஸி.

தத்த² சதுக்க²த்தும் பஞ்சக்க²த்தும், விஹாரா உபனிக்க²மிந்தி ‘‘மம வஸனகவிஹாரே விபஸ்ஸனாமனஸிகாரேன நிஸின்னா ஸமணகிச்சம் மத்த²கம் பாபேதும் அஸக்கோந்தீ உதுஸப்பாயாபா⁴வேன நனு கோ² மய்ஹம் விபஸ்ஸனா மக்³கே³ன க⁴ட்டேதீ’’தி சிந்தேத்வா சத்தாரோ பஞ்ச சாதி நவ வாரே விஹாரா உபஸ்ஸயதோ ப³ஹி நிக்க²மிம். தேனாஹ ‘‘அலத்³தா⁴ சேதஸோ ஸந்திம், சித்தே அவஸவத்தினீ’’தி. தத்த² சேதஸோ ஸந்திந்தி அரியமக்³க³ஸமாதி⁴ம் ஸந்தா⁴யாஹ. சித்தே அவஸவத்தினீதி வீரியஸமதாய அபா⁴வேன மம பா⁴வனாசித்தே ந வஸவத்தினீ. ஸா கிர அதிவிய பக்³க³ஹிதவீரியா அஹோஸி. தஸ்ஸா மே அட்ட²மீ ரத்தீதி யதோ பட்டா²ய ஆனந்த³த்தே²ரஸ்ஸ ஸந்திகே ஓவாத³ம் படிலபி⁴ம், ததோ பட்டா²ய ரத்திந்தி³வமதந்தி³தா விபஸ்ஸனாய கம்மம் கரோந்தீ ரத்தியம் சதுக்க²த்தும் பஞ்சக்க²த்தும் விஹாரதோ நிக்க²மித்வா மனஸிகாரம் பவத்தேந்தீ விஸேஸம் அனதி⁴க³ந்த்வா அட்ட²மியம் ரத்தியம் வீரியஸமதம் லபி⁴த்வா மக்³க³படிபாடியா கிலேஸே கே²பேஸிந்தி அத்தோ². தேன வுத்தம் – ‘‘தஸ்ஸா மே அட்ட²மீ ரத்தி, யதோ தண்ஹா ஸமூஹதா’’தி. ஸேஸம் வுத்தனயமேவ.

ஸாமாதே²ரீகா³தா²வண்ணனா நிட்டி²தா.

து³கனிபாதவண்ணனா நிட்டி²தா.