3. ப⁴த்³த³த்தே²ரகா³தா²வண்ணனா

ஏகபுத்தோதிஆதி³கா ஆயஸ்மதோ ப⁴த்³த³த்தே²ரஸ்ஸ கா³தா². கா உப்பத்தி? அயம் கிர பது³முத்தரம் ப⁴க³வந்தம் பி⁴க்கு²ஸங்க⁴ஞ்ச ஸதஸஹஸ்ஸபரிமாணம் சீவராதீ³ஹி சதூஹி பச்சயேஹி பூஜேஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ஸேட்டி²குலே நிப்³ப³த்தி. நிப்³ப³த்தமானோ ச அபுத்தகேஸு மாதாபிதூஸு தே³வதாயாசனாதீ³னி கத்வாபி அலப⁴ந்தேஸு ஸத்தா²ரம் உபஸங்கமித்வா ‘‘ஸசே, ப⁴ந்தே, மயம் ஏகம் புத்தம் லச்சா²ம, தம் தும்ஹாகம் தா³ஸத்தா²ய த³ஸ்ஸாமா’’தி வத்வா ஆயாசித்வா க³தேஸு ஸத்து² அதி⁴ப்பாயம் ஞத்வா அஞ்ஞதரோ தே³வபுத்தோ கீ²ணாயுகோ ஹுத்வா டி²தோ ஸக்கேன தே³வரஞ்ஞா ‘‘அமுகஸ்மிம் குலே நிப்³ப³த்தாஹீ’’தி ஆணத்தோ தத்த² நிப்³ப³த்தி, ப⁴த்³தோ³திஸ்ஸ நாமம் அகம்ஸு. தம் ஸத்தவஸ்ஸுத்³தே³ஸிகம் ஜாதம் மாதாபிதரோ அலங்கரித்வா ப⁴க³வதோ ஸந்திகம் நேத்வா ‘‘அயம் ஸோ, ப⁴ந்தே, தும்ஹே ஆயாசித்வா லத்³த⁴தா³ரகோ, இமம் தும்ஹாகம் நிய்யாதேமா’’தி ஆஹம்ஸு. ஸத்தா² ஆனந்த³த்தே²ரம் ஆணாபேஸி – ‘‘இமம் பப்³பா³ஜேஹீ’’தி. ஆணாபேத்வா ச க³ந்த⁴குடிம் பாவிஸி. தே²ரோ தம் பப்³பா³ஜேத்வா ஸங்கே²பேன விபஸ்ஸனாமுக²ம் ஆசிக்கி². ஸோ உபனிஸ்ஸயஸம்பன்னத்தா விபஸ்ஸனாய கம்மம் கரோந்தோ ஸூரியே அனோக்³க³தேயேவ பா⁴வனம் உஸ்ஸுக்காபேத்வா ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 1.5.54-69) –

‘‘பது³முத்தரஸம்பு³த்³த⁴ம், மேத்தசித்தம் மஹாமுனிம்;

உபேதி ஜனதா ஸப்³பா³, ஸப்³ப³லோகக்³க³னாயகம்.

‘‘ஸத்துகஞ்ச ப³த்³த⁴கஞ்ச, ஆமிஸம் பானபோ⁴ஜனம்;

த³த³ந்தி ஸத்து²னோ ஸப்³பே³, புஞ்ஞக்கே²த்தே அனுத்தரே.

‘‘அஹம்பி தா³னம் த³ஸ்ஸாமி, தே³வதே³வஸ்ஸ தாதி³னோ;

பு³த்³த⁴ஸேட்ட²ம் நிமந்தேத்வா, ஸங்க⁴ம்பி ச அனுத்தரம்.

‘‘உய்யோஜிதா மயா சேதே, நிமந்தேஸும் ததா²க³தம்;

கேவலம் பி⁴க்கு²ஸங்க⁴ஞ்ச, புஞ்ஞக்கே²த்தம் அனுத்தரம்.

‘‘ஸதஸஹஸ்ஸபல்லங்கம், ஸோவண்ணம் கோ³னகத்த²தம்;

தூலிகாபடலிகாய, கோ²மகப்பாஸிகேஹி ச;

மஹாரஹம் பஞ்ஞாபயிம், ஆஸனம் பு³த்³த⁴யுத்தகம்.

‘‘பது³முத்தரோ லோகவிதூ³, தே³வதே³வோ நராஸபோ⁴;

பி⁴க்கு²ஸங்க⁴பரிப்³யூள்ஹோ, மம த்³வாரமுபாக³மி.

‘‘பச்சுக்³க³ந்த்வான ஸம்பு³த்³த⁴ம், லோகனாத²ம் யஸஸ்ஸினம்;

பஸன்னசித்தோ ஸுமனோ, அபி⁴னாமயிம் ஸங்க⁴ரம்.

‘‘பி⁴க்கூ²னம் ஸதஸஹஸ்ஸம், பு³த்³த⁴ஞ்ச லோகனாயகம்;

பஸன்னசித்தோ ஸுமனோ, பரமன்னேன தப்பயிம்.

‘‘பது³முத்தரோ லோகவிதூ³, ஆஹுதீனம் படிக்³க³ஹோ;

பி⁴க்கு²ஸங்கே⁴ நிஸீதி³த்வா, இமா கா³தா² அபா⁴ஸத².

‘‘யேனித³ம் ஆஸனம் தி³ன்னம், ஸோவண்ணம் கோ³னகத்த²தம்;

தமஹம் கித்தயிஸ்ஸாமி, ஸுணாத² மம பா⁴ஸதோ.

‘‘சதுஸத்ததிக்க²த்தும் ஸோ, தே³வரஜ்ஜம் கரிஸ்ஸதி;

அனுபோ⁴ஸ்ஸதி ஸம்பத்திம், அச்ச²ராஹி புரக்க²தோ.

‘‘பதே³ஸரஜ்ஜம் ஸஹஸ்ஸம், வஸுத⁴ம் ஆவஸிஸ்ஸதி;

ஏகபஞ்ஞாஸக்க²த்துஞ்ச, சக்கவத்தீ ப⁴விஸ்ஸதி.

‘‘ஸப்³பா³ஸு ப⁴வயோனீஸு, உச்சாகுலீ ப⁴விஸ்ஸதி;

ஸோ ச பச்சா² பப்³ப³ஜித்வா, ஸுக்கமூலேன சோதி³தோ;

ப⁴த்³தி³யோ நாம நாமேன, ஹேஸ்ஸதி ஸத்து² ஸாவகோ.

‘‘விவேகமனுயுத்தோம்ஹி, பந்தஸேனனிவாஸஹம்;

ப²லஞ்சாதி⁴க³தம் ஸப்³ப³ம், சத்தக்லேஸோம்ஹி அஜ்ஜஹம்.

‘‘மம ஸப்³ப³ம் அபி⁴ஞ்ஞாய, ஸப்³ப³ஞ்ஞூ லோகனாயகோ;

பி⁴க்கு²ஸங்கே⁴ நிஸீதி³த்வா, ஏதத³க்³கே³ ட²பேஸி மம்.

‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸன’’ந்தி.

தஸ்ஸ ப⁴க³வா ச²ளபி⁴ஞ்ஞுப்பத்திம் ஞத்வா ‘‘ஏஹி, ப⁴த்³தா³’’தி ஆஹ. ஸோ தாவதே³வ ஸத்தா²ரம் உபஸங்கமித்வா வந்தி³த்வா பஞ்ஜலிகோ ஸத்து² ஸமீபே அட்டா²ஸி, ஸா ஏவ சஸ்ஸ உபஸம்பதா³ அஹோஸி. பு³த்³தூ⁴பஸம்பதா³ நாம கிரேஸா. தே²ரோ ஜாதிதோ பட்டா²ய அத்தனோ பவத்தியா கத²னமுகே²ன அஞ்ஞம் ப்³யாகரோந்தோ –

473. ‘‘ஏகபுத்தோ அஹம் ஆஸிம், பியோ மாது பியோ பிது;

ப³ஹூஹி வதசரியாஹி, லத்³தோ⁴ ஆயாசனாஹி ச.

474. ‘‘தே ச மம் அனுகம்பாய, அத்த²காமா ஹிதேஸினோ;

உபோ⁴ பிதா ச மாதா ச, பு³த்³த⁴ஸ்ஸ உபனாமயும்.

475. ‘‘கிச்சா² லத்³தோ⁴ அயம் புத்தோ, ஸுகு²மாலோ ஸுகே²தி⁴தோ;

இமம் த³தா³ம தே நாத², ஜினஸ்ஸ பரிசாரகம்.

476. ‘‘ஸத்தா² ச மம் படிக்³க³ய்ஹ, ஆனந்த³ம் ஏதத³ப்³ரவி;

பப்³பா³ஜேஹி இமம் கி²ப்பம், ஹேஸ்ஸத்யாஜானியோ அயம்.

477. ‘‘பப்³பா³ஜேத்வான மம் ஸத்தா², விஹாரம் பாவிஸீ ஜினோ;

அனோக்³க³தஸ்மிம் ஸூரியஸ்மிம், ததோ சித்தம் விமுச்சி மே.

478. ‘‘ததோ ஸத்தா² நிராகத்வா, படிஸல்லானவுட்டி²தோ;

ஏஹி ப⁴த்³தா³தி மம் ஆஹ, ஸா மே ஆஸூபஸம்பதா³.

479. ‘‘ஜாதியா ஸத்தவஸ்ஸேன, லத்³தா⁴ மே உபஸம்பதா³;

திஸ்ஸோ விஜ்ஜா அனுப்பத்தா, அஹோ த⁴ம்மஸுத⁴ம்மதா’’தி. –

இமா கா³தா² அபா⁴ஸி.

தத்த² வதசரியாஹீதி, ‘‘ஏவம் கத்வா புத்தம் லபி⁴ஸ்ஸதா²’’தி வுத்தம் ஸமணப்³ராஹ்மணானம் வசனம் ஸுத்வா, கீ²ரம் பாயித்வா, அனஸனாதி³வதசரணேஹி. ஆயாசனாஹீதி தே³வதாயாசனாஹி ஸத்து²ஆயாசனாய ச, இத³மேவ சேத்த² காரணம், இதரம் தே²ரோ மாதாபிதூனம் படிபத்தித³ஸ்ஸனத்த²ஞ்சேவ கிச்ச²லத்³த⁴பா⁴வத³ஸ்ஸனத்த²ஞ்ச வத³தி.

தேதி மாதாபிதரோ. உபனாமயுந்தி உபனாமேஸும்.

ஸுகே²தி⁴தோதி ஸுக²ஸம்வட்³டி⁴தோ. தேதி துய்ஹம். பரிசாரகந்தி கிம்காரம்.

ஹேஸ்ஸத்யாஜானியோ அயந்தி அயம் தா³ரகோ மம ஸாஸனே ஆஜானீயோ ப⁴விஸ்ஸதி. தஸ்மா கி²ப்பம் அஜ்ஜேவ பப்³பா³ஜேஹீதி ஏதம் அப்³ரவி, ஆஹ.

பப்³பா³ஜேத்வானாதி ஆனந்த³த்தே²ரேன பப்³பா³ஜேத்வா. விஹாரந்தி க³ந்த⁴குடிம். அனோக்³க³தஸ்மிம் ஸூரியஸ்மிந்தி ஸூரியே அனத்த²ங்க³தேயேவ. ததோ சித்தம் விமுச்சி மேதி ததோ விபஸ்ஸனாரம்ப⁴தோ பரம் ந சிரேனேவ க²ணேன ஸப்³பா³ஸவேஹி மே சித்தம் விமுச்சி, கீ²ணாஸவோ அஹோஸிம்.

ததோதி மம ஆஸவக்க²யதோ பச்சா². நிராகத்வாதி அத்தனா ஸமாபன்னம் ப²லஸமாபத்திம் அப்பேத்வா ததோ வுட்டா²ய. தேனாஹ ‘‘படிஸல்லானவுட்டி²தோ’’தி. ஸா மே ஆஸூபஸம்பதா³தி யா மம் உத்³தி³ஸ்ஸ ‘‘ஏஹி, ப⁴த்³தா³’’தி ஸத்து² வாசா பவத்தா, ஸா ஏவ மே மய்ஹம் உபஸம்பதா³ ஆஸி. ஏவம் ஜாதியா ஸத்தவஸ்ஸேன, லத்³தா⁴ மே உபஸம்பதா³தி ஸாதிஸயம் ஸத்தா²ரா அத்தனோ கதம் அனுக்³க³ஹம் ஸாஸனஸ்ஸ ச நிய்யானிகதம் த³ஸ்ஸேதி. தேனாஹ ‘‘அஹோ த⁴ம்மஸுத⁴ம்மதா’’தி.

ஏத்த² ச ‘‘சித்தம் விமுச்சி மே’’தி கீ²ணாஸவபா⁴வம் பகாஸேத்வாபி புன ‘‘திஸ்ஸோ விஜ்ஜா அனுப்பத்தா’’தி லோகியாபி⁴ஞ்ஞேகதே³ஸத³ஸ்ஸனம் ச²ளபி⁴ஞ்ஞபா⁴வவிபா⁴வனத்த²ம். தேனாஹ அபதா³னே ‘‘ச²ளபி⁴ஞ்ஞா ஸச்சி²கதா’’தி.

ப⁴த்³த³த்தே²ரகா³தா²வண்ணனா நிட்டி²தா.