12. முதி³தத்தே²ரகா³தா²வண்ணனா

பப்³ப³ஜிந்திஆதி³கா ஆயஸ்மதோ முதி³தத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் தி³ஸ்வா பஸன்னமானஸோ ஏகம் மஞ்சமதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ கோஸலரட்டே² க³ஹபதிகுலே நிப்³ப³த்தித்வா முதி³தோதி லத்³த⁴னாமோ விஞ்ஞுதம் பாபுணி. தேன ச ஸமயேன தம் குலம் ரஞ்ஞா கேனசிதே³வ கரணீயேன பலிபு³த்³த⁴ம் அஹோஸி. முதி³தோ ராஜப⁴யாபீ⁴தோ பலாயித்வா அரஞ்ஞம் பவிட்டோ² அஞ்ஞதரஸ்ஸ கீ²ணாஸவத்தே²ரஸ்ஸ வஸனட்டா²னம் உபக³ச்சி². தே²ரோ தஸ்ஸ பீ⁴தபா⁴வம் ஞத்வா ‘‘மா பா⁴யீ’’தி ஸமஸ்ஸாஸேஸி. ஸோ ‘‘கித்தகேன நு கோ², ப⁴ந்தே, காலேன இத³ம் மே ப⁴யம் வூபஸமேஸ்ஸதீ’’தி புச்சி²த்வா ‘‘ஸத்தட்ட²மாஸே அதிக்கமித்வா’’தி வுத்தே – ‘‘ஏத்தகம் காலம் அதி⁴வாஸேதும் ந ஸக்கோமி, பப்³ப³ஜிஸ்ஸாமஹம், ப⁴ந்தே, பப்³பா³ஜேத² ம’’ந்தி ஜீவிதரக்க²ணத்த²ம் பப்³ப³ஜ்ஜம் யாசி. தே²ரோ தம் பப்³பா³ஜேஸி. ஸோ பப்³ப³ஜித்வா ஸாஸனே படிலத்³த⁴ஸத்³தோ⁴ ப⁴யே வூபஸந்தேபி ஸமணத⁴ம்மம்யேவ ரோசேந்தோ கம்மட்டா²னம் க³ஹேத்வா விபஸ்ஸனாய கம்மம் கரோந்தோ – ‘‘அரஹத்தம் அப்பத்வா இமஸ்மா வஸனக³ப்³பா⁴ ப³ஹி ந நிக்க²மிஸ்ஸாமீ’’திஆதி³னா படிஞ்ஞம் கத்வா விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 1.36.30-33) –

‘‘விபஸ்ஸினோ ப⁴க³வதோ, லோகஜேட்ட²ஸ்ஸ தாதி³னோ;

ஏகம் மஞ்சம் மயா தி³ன்னம், பஸன்னேன ஸபாணினா.

‘‘ஹத்தி²யானம் அஸ்ஸயானம், தி³ப்³ப³யானம் ஸமஜ்ஜ²க³ம்;

தேன மஞ்சகதா³னேன, பத்தோம்ஹி ஆஸவக்க²யம்.

‘‘ஏகனவுதிதோ கப்பே, யம் மஞ்சமத³தி³ம் ததா³;

து³க்³க³திம் நாபி⁴ஜானாமி, மஞ்சதா³னஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா விமுத்திஸுக²ம் படிஸம்வேதே³ந்தோ ஸஹாயபி⁴க்கூ²ஹி அதி⁴க³தம் புச்சி²தோ அத்தனோ படிபன்னாகாரம் கதே²ந்தோ –

311. ‘‘பப்³ப³ஜிம் ஜீவிகத்தோ²ஹம், லத்³தா⁴ன உபஸம்பத³ம்;

ததோ ஸத்³த⁴ம் படிலபி⁴ம், த³ள்ஹவீரியோ பரக்கமிம்.

312. ‘‘காமம் பி⁴ஜ்ஜதுயம் காயோ, மம்ஸபேஸீ விஸீயரும்;

உபோ⁴ ஜண்ணுகஸந்தீ⁴ஹி, ஜங்கா⁴யோ பபதந்து மே.

313. ‘‘நாஸிஸ்ஸம் ந பிவிஸ்ஸாமி, விஹாரா ச ந நிக்க²மே;

நபி பஸ்ஸம் நிபாதேஸ்ஸம், தண்ஹாஸல்லே அனூஹதே.

314. ‘‘தஸ்ஸ மேவம் விஹரதோ, பஸ்ஸ வீரியபரக்கமம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

சதஸ்ஸோ கா³தா² அபா⁴ஸி.

தத்த² ஜீவிகத்தோ²தி ஜீவிகாய அத்தி²கோ ஜீவிகப்பயோஜனோ. ‘‘ஏத்த² பப்³ப³ஜித்வா நிப்³ப⁴யோ ஸுகே²ன அகிலமந்தோ ஜீவிஸ்ஸாமீ’’தி ஏவம் ஜீவிகத்தா²ய பப்³ப³ஜிந்தி அத்தோ². லத்³தா⁴ன உபஸம்பத³ந்தி பட²மம் ஸாமணேரபப்³ப³ஜ்ஜாயம் டி²தோ ஞத்திசதுத்தே²ன கம்மேன உபஸம்பத³ம் லபி⁴த்வா. ததோ ஸத்³த⁴ம் படிலபி⁴ந்தி ததோ உபஸம்பன்னகாலதோ பட்டா²ய கல்யாணமித்தே ஸேவந்தோ த்³வே மாதிகா, திஸ்ஸோ அனுமோத³னா, ஏகச்சம் ஸுத்தம், ஸமத²கம்மட்டா²னம், விபஸ்ஸனாவிதி⁴ஞ்ச உக்³க³ண்ஹந்தோ பு³த்³தா⁴தீ³னம் மஹானுபா⁴வதம் தி³ஸ்வா – ‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி ரதனத்தயே ஸத்³த⁴ம் படிலபி⁴ம். த³ள்ஹவீரியோ பரக்கமிந்தி ஏவம் படிலத்³த⁴ஸத்³தோ⁴ ஹுத்வா விபஸ்ஸனாய கம்மம் கரோந்தோ நசிரஸ்ஸேவ ஸச்சபடிவேதா⁴ய த³ள்ஹவீரியோ தி²ரவீரியோ ஹுத்வா பரக்கமிம், அகுஸலானம் த⁴ம்மானம் பஹானாய குஸலானம் த⁴ம்மானம் உபஸம்பதா³ய ஸம்மதே³வ பத³ஹிம்.

யதா² பன பரக்கமிம், தம் த³ஸ்ஸேதும் ‘‘காம’’ந்திஆதி³ வுத்தம். தத்த² காமந்தி யதா²காமம் ஏகம்ஸதோ வா பி⁴ஜ்ஜது. அயம் காயோதி அயம் மம பூதிகாயோ, இமினா வீரியபதாபேன பி⁴ஜ்ஜதி சே, பி⁴ஜ்ஜது சி²ன்னபி⁴ன்னம் ஹோது. மம்ஸபேஸீ விஸீயருந்தி இமினா த³ள்ஹபரக்கமேன இமஸ்மா காயா மம்ஸபேஸியோ விஸீயந்தி சே, விஸீயந்து இதோ சிதோ வித்³த⁴ம்ஸந்து. உபோ⁴ ஜண்ணுகஸந்தீ⁴ஹி, ஜங்கா⁴யோ பபதந்து மேதி உபோ⁴ஹி ஜண்ணுகஸந்தீ⁴ஹி ஸஹ மம உபோ⁴ ஜங்கா⁴யோ ஸத்தி²யோ ஊருப³ந்த⁴தோ பி⁴ஜ்ஜித்வா பூ⁴மியம் பபதந்து. ‘‘ம’’ந்திபி பாடோ², ஸோ ஏவத்தோ². ஸேஸம் ஹேட்டா² வுத்தனயமேவ.

முதி³தத்தே²ரகா³தா²வண்ணனா நிட்டி²தா.

சதுக்கனிபாதவண்ணனா நிட்டி²தா.