1. நாக³ஸமாலத்தே²ரகா³தா²வண்ணனா

அலங்கதாதிஆதி³கா ஆயஸ்மதோ நாக³ஸமாலத்தே²ரஸ்ஸ கா³தா². கா உப்பத்தி? அயம்பி பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ கி³ம்ஹஸமயே ஸூரியாதபஸந்தத்தாய பூ⁴மியா க³ச்ச²ந்தம் ஸத்தா²ரம் தி³ஸ்வா பஸன்னமானஸோ ச²த்தம் அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸக்யராஜகுலே நிப்³ப³த்தித்வா நாக³ஸமாலோதி லத்³த⁴னாமோ வயப்பத்தோ ஞாதிஸமாக³மே படிலத்³த⁴ஸத்³தோ⁴ பப்³ப³ஜித்வா கிஞ்சி காலம் ப⁴க³வதோ உபட்டா²கோ அஹோஸி. ஸோ ஏகதி³வஸம் நக³ரம் பிண்டா³ய பவிட்டோ² அலங்கதபடியத்தம் அஞ்ஞதரம் நச்சகிம் மஹாபதே² தூரியேஸு வஜ்ஜந்தேஸு நச்சந்திம் தி³ஸ்வா, ‘‘அயம் சித்தகிரியவாயோதா⁴துவிப்பா²ரவஸேன கரஜகாயஸ்ஸ ததா² ததா² பரிவத்தி, அஹோ அனிச்சா ஸங்கா²ரா’’தி க²யவயம் பட்ட²பேத்வா விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 2.46.37-48) –

‘‘அங்கா³ரஜாதா பத²வீ, குக்குளானுக³தா மஹீ;

பது³முத்தரோ ப⁴க³வா, அப்³போ⁴காஸம்ஹி சங்கமி.

‘‘பண்ட³ரம் ச²த்தமாதா³ய, அத்³தா⁴னம் படிபஜ்ஜஹம்;

தத்த² தி³ஸ்வான ஸம்பு³த்³த⁴ம், வித்தி மே உபபஜ்ஜத².

‘‘மரீசியோத்த²டா பூ⁴மி, அங்கா³ராவ மஹீ அயம்;

உபஹந்தி மஹாவாதா, ஸரீரஸ்ஸாஸுகே²பனா.

‘‘ஸீதம் உண்ஹம் விஹனந்தம், வாதாதபனிவாரணம்;

படிக்³க³ண்ஹ இமம் ச²த்தம், ப²ஸ்ஸயிஸ்ஸாமி நிப்³பு³திம்.

‘‘அனுகம்பகோ காருணிகோ, பது³முத்தரோ மஹாயஸோ;

மம ஸங்கப்பமஞ்ஞாய, படிக்³க³ண்ஹி ததா³ ஜினோ.

‘‘திம்ஸகப்பானி தே³விந்தோ³, தே³வரஜ்ஜமகாரயிம்;

ஸதானம் பஞ்சக்க²த்துஞ்ச, சக்கவத்தீ அஹோஸஹம்.

‘‘பதே³ஸரஜ்ஜம் விபுலம், க³ணனாதோ அஸங்கி²யம்;

அனுபோ⁴மி ஸகம் கம்மம், புப்³பே³ ஸுகதமத்தனோ.

‘‘அயம் மே பச்சி²மா ஜாதி, சரிமோ வத்ததே ப⁴வோ;

அஜ்ஜாபி ஸேதச்ச²த்தம் மே, ஸப்³ப³காலம் த⁴ரீயதி.

‘‘ஸதஸஹஸ்ஸிதோ கப்பே, யம் ச²த்தமத³தி³ம் ததா³;

து³க்³க³திம் நாபி⁴ஜானாமி, ச²த்ததா³னஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா –

267. ‘‘அலங்கதா ஸுவஸனா, மாலினீ சந்த³னுஸ்ஸதா³;

மஜ்ஜே² மஹாபதே² நாரீ, தூரியே நச்சதி நட்டகீ.

268. ‘‘பிண்டி³காய பவிட்டோ²ஹம், க³ச்ச²ந்தோ நம் உதி³க்கி²ஸம்;

அலங்கதம் ஸுவஸனம், மச்சுபாஸம்வ ஓட்³டி³தம்.

269. ‘‘ததோ மே மனஸீகாரோ, யோனிஸோ உத³பஜ்ஜத²;

ஆதீ³னவோ பாதுரஹு, நிப்³பி³தா³ ஸமதிட்ட²த².

270. ‘‘ததோ சித்தம் விமுச்சி மே, பஸ்ஸ த⁴ம்மஸுத⁴ம்மதம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

சதூஹி கா³தா²ஹி அத்தனோ படிபத்திகித்தனமுகே²ன அஞ்ஞம் ப்³யாகாஸி.

தத்த² அலங்கதாதி ஹத்தூ²பகா³தி³ஆப⁴ரணேஹி அலங்கதக³த்தா. ஸுவஸனாதி ஸுந்த³ரவஸனா ஸோப⁴னவத்த²னிவத்தா². மாலினீதி மாலாதா⁴ரினீ பிளந்தி⁴தபுப்ப²மாலா. சந்த³னுஸ்ஸதா³தி சந்த³னானுலேபலித்தஸரீரா. மஜ்ஜே² மஹாபதே² நாரீ, தூரியே நச்சதி நட்டகீதி யதா²வுத்தட்டா²னே ஏகா நாரீ நட்டகீ நாடகித்தீ² நக³ரவீதி²யா மஜ்ஜே² பஞ்சங்கி³கே தூரியே வஜ்ஜந்தே நச்சதி, யதா²பட்ட²பிதம் நச்சம் கரோதி.

பிண்டி³காயாதி பி⁴க்கா²ய. பவிட்டோ²ஹந்தி நக³ரம் பவிட்டோ² அஹம். க³ச்ச²ந்தோ நம் உதி³க்கி²ஸந்தி நக³ரவீதி²யம் க³ச்ச²ந்தோ பரிஸ்ஸயபரிஹரணத்த²ம் வீதி²ம் ஓலோகேந்தோ தம் நட்டகிம் ஓலோகேஸிம். கிம் விய? மச்சுபாஸம்வ ஓட்³டி³தந்தி யதா² மச்சுஸ்ஸ மச்சுராஜஸ்ஸ பாஸபூ⁴தோ ரூபாதி³கோ ஓட்³டி³தோ லோகே அனுவிசரித்வா டி²தோ ஏகம்ஸேன ஸத்தானம் அனத்தா²வஹோ, ஏவம் ஸாபி அப்படிஸங்கா²னே டி²தானம் அந்த⁴புது²ஜ்ஜனானம் ஏகம்ஸதோ அனத்தா²வஹாதி மச்சுபாஸஸதி³ஸீ வுத்தா.

ததோதி தஸ்மா மச்சுபாஸஸதி³ஸத்தா. மேதி மய்ஹம். மனஸீகாரோ யோனிஸோ உத³பஜ்ஜதா²தி ‘‘அயம் அட்டி²ஸங்கா⁴தோ ந்ஹாருஸம்ப³ந்தோ⁴ மம்ஸேன அனுபலித்தோ ச²வியா படிச்ச²ன்னோ அஸுசிது³க்³க³ந்த⁴ஜேகு³ச்ச²படிக்கூலோ அனிச்சுச்சா²த³னபரிமத்³த³னபே⁴த³னவித்³த⁴ம்ஸனத⁴ம்மோ ஈதி³ஸே விகாரே த³ஸ்ஸேதீ’’தி ஏவம் யோனிஸோ மனஸிகாரோ உப்பஜ்ஜி. ஆதீ³னவோ பாதுரஹூதி ஏவம் காயஸ்ஸ ஸபா⁴வூபதா⁴ரணமுகே²ன தஸ்ஸ ச தம்னிஸ்ஸிதானஞ்ச சித்தசேதஸிகானம் உத³யப்³ப³யம் ஸரஸபப⁴ங்கு³தஞ்ச மனஸி கரோதோ தேஸு ச யக்க²ரக்க²ஸாதீ³ஸு விய ப⁴யதோ உபட்ட²ஹந்தேஸு தத்த² மே அனேகாகாரஆதீ³னவோ தோ³ஸோ பாதுரஹோஸி. தப்படிபக்க²தோ ச நிப்³பா³னே ஆனிஸம்ஸோ. நிப்³பி³தா³ ஸமதிட்ட²தா²தி நிப்³பி³ந்த³னம் ஆதீ³னவானுபஸ்ஸனானுபா⁴வஸித்³த⁴ம் நிப்³பி³தா³ஞாணம் மம ஹத³யே ஸண்டா²ஸி, முஹுத்தம்பி தேஸம் ரூபாரூபத⁴ம்மானம் க³ஹணே சித்தம் நாஹோஸி, அஞ்ஞத³த்து² முஞ்சிதுகாமதாதி³வஸேன தத்த² உதா³ஸீனமேவ ஜாதந்தி அத்தோ².

ததோதி விபஸ்ஸனாஞாணதோ பரம். சித்தம் விமுச்சி மேதி லோகுத்தரபா⁴வனாய வத்தமானாய மக்³க³படிபாடியா ஸப்³ப³கிலேஸேஹி மம சித்தம் விமுத்தம் அஹோஸி. ஏதேன ப²லுப்பத்திம் த³ஸ்ஸேதி. மக்³க³க்க²ணே ஹி கிலேஸா விமுச்சந்தி நாம, ப²லக்க²ணே விமுத்தாதி. ஸேஸம் வுத்தனயமேவ.

நாக³ஸமாலத்தே²ரகா³தா²வண்ணனா நிட்டி²தா.