2. ப⁴கு³த்தே²ரகா³தா²வண்ணனா

அஹம் மித்³தே⁴னாதிஆதி³கா ஆயஸ்மதோ ப⁴கு³த்தே²ரஸ்ஸ கா³தா². கா உப்பத்தி? அயம் கிர பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஸத்த²ரி பரினிப்³பு³தே தஸ்ஸ தா⁴துயோ புப்பே²ஹி பூஜேஸி. ஸோ தேன புஞ்ஞகம்மேன நிம்மானரதீஸு நிப்³ப³த்தித்வா அபராபரம் தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸக்யராஜகுலே நிப்³ப³த்தித்வா ப⁴கூ³தி லத்³த⁴னாமோ வயப்பத்தோ அனுருத்³த⁴கிமிலேஹி ஸத்³தி⁴ம் நிக்க²மித்வா பப்³ப³ஜித்வா பா³லகலோணககா³மே வஸந்தோ ஏகதி³வஸம் தி²னமித்³தா⁴பி⁴ப⁴வம் வினோதே³தும் விஹாரதோ நிக்க²ம்ம சங்கமம் அபி⁴ருஹந்தோ பபதித்வா ததே³வ அங்குஸம் கத்வா தி²னமித்³த⁴ம் வினோதே³த்வா விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 2.46.49-57) –

‘‘பரினிப்³பு³தே ப⁴க³வதி, பது³முத்தரே மஹாயஸே;

புப்ப²வடம்ஸகே கத்வா, ஸரீரமபி⁴ரோபயிம்.

‘‘தத்த² சித்தம் பஸாதே³த்வா, நிம்மானம் அக³மாஸஹம்;

தே³வலோகக³தோ ஸந்தோ, புஞ்ஞகம்மம் ஸராமஹம்.

‘‘அம்ப³ரா புப்ப²வஸ்ஸோ மே, ஸப்³ப³காலம் பவஸ்ஸதி;

ஸம்ஸராமி மனுஸ்ஸே சே, ராஜா ஹோமி மஹாயஸோ.

‘‘தஹிம் குஸுமவஸ்ஸோ மே, அபி⁴வஸ்ஸதி ஸப்³ப³தா³;

தஸ்ஸேவ புப்ப²பூஜாய, வாஹஸா ஸப்³ப³த³ஸ்ஸினோ.

‘‘அயம் பச்சி²மகோ மய்ஹம், சரிமோ வத்ததே ப⁴வோ;

அஜ்ஜாபி புப்ப²வஸ்ஸோ மே, அபி⁴வஸ்ஸதி ஸப்³ப³தா³.

‘‘ஸதஸஹஸ்ஸிதோ கப்பே, யம் புப்ப²மபி⁴ரோபயிம்;

து³க்³க³திம் நாபி⁴ஜானாமி, தே³ஹபூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ப²லஸுகே²ன நிப்³பா³னஸுகே²ன ச வீதினாமேந்தோ ஸத்தா²ரா ஏகவிஹாரம் அனுமோதி³தும் உபக³தேன – ‘‘கச்சி த்வம், பி⁴க்கு², அப்பமத்தோ விஹரஸீ’’தி புட்டோ² அத்தனோ அப்பமாத³விஹாரம் நிவேதே³ந்தோ –

271. ‘‘அஹம் மித்³தே⁴ன பகதோ, விஹாரா உபனிக்க²மிம்;

சங்கமம் அபி⁴ருஹந்தோ, தத்தே²வ பபதிம் ச²மா.

272. ‘‘க³த்தானி பரிமஜ்ஜித்வா, புனபாருய்ஹ சங்கமம்;

சங்கமே சங்கமிம் ஸோஹம், அஜ்ஜ²த்தம் ஸுஸமாஹிதோ.

273. ‘‘ததோ மே மனஸீகாரோ, யோனிஸோ உத³பஜ்ஜத²;

ஆதீ³னவோ பாதுரஹு, நிப்³பி³தா³ ஸமதிட்ட²த².

274. ‘‘ததோ சித்தம் விமுச்சி மே, பஸ்ஸ த⁴ம்மஸுத⁴ம்மதம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

இமா சதஸ்ஸோ கா³தா² அபா⁴ஸி.

தத்த² மித்³தே⁴ன பகதோதி காயாலஸியஸங்கா²தேன அஸத்திவிகா⁴தஸபா⁴வேன மித்³தே⁴ன அபி⁴பூ⁴தோ. விஹாராதி ஸேனாஸனதோ. உபனிக்க²மிந்தி சங்கமிதும் நிக்க²மிம். தத்தே²வ பபதிம் ச²மாதி தத்தே²வ சங்கமஸோபானே நித்³தா³பி⁴பூ⁴ததாய பூ⁴மியம் நிபதிம். க³த்தானி பரிமஜ்ஜித்வாதி பூ⁴மியம் பதனேன பம்ஸுகிதானி அத்தனோ ஸரீராவயவானி அனுமஜ்ஜித்வா. புனபாருய்ஹ சங்கமந்தி ‘‘பதிதோ தா³னாஹ’’ந்தி ஸங்கோசம் அனாபஜ்ஜித்வா புனபி சங்கமட்டா²னம் ஆருஹித்வா. அஜ்ஜ²த்தம் ஸுஸமாஹிதோதி கோ³சரஜ்ஜ²த்தே கம்மட்டா²னே நீவரணவிக்க²ம்ப⁴னேன ஸுட்டு² ஸமாஹிதோ ஏகக்³க³சித்தோ ஹுத்வா சங்கமிந்தி யோஜனா. ஸேஸம் வுத்தனயமேவ. இத³மேவ ச தே²ரஸ்ஸ அஞ்ஞாப்³யாகரணம் அஹோஸி.

ப⁴கு³த்தே²ரகா³தா²வண்ணனா நிட்டி²தா.