4. த⁴னியத்தே²ரகா³தா²வண்ணனா

ஸுக²ஞ்சே ஜீவிதும் இச்சே²தி ஆயஸ்மதோ த⁴னியத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் தி³ஸ்வா பஸன்னமானஸோ நளமாலாய பூஜம் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ராஜக³ஹே கும்ப⁴காரகுலே நிப்³ப³த்தித்வா த⁴னியோதி லத்³த⁴னாமோ வயப்பத்தோ கும்ப⁴காரகம்மேன ஜீவதி. தேன ச ஸமயேன ஸத்தா² த⁴னியஸ்ஸ கும்ப⁴காரஸ்ஸ ஸாலாயம் நிஸீதி³த்வா புக்குஸாதிஸ்ஸ குலபுத்தஸ்ஸ ச²தா⁴துவிப⁴ங்க³ஸுத்தம் (ம. நி. 3.342 ஆத³யோ) தே³ஸேஸி. ஸோ தம் ஸுத்வா கதகிச்சோ அஹோஸி. த⁴னியோ தஸ்ஸ பரினிப்³பு³தபா⁴வம் ஸுத்வா ‘‘நிய்யானிகம் வத பு³த்³த⁴ஸாஸனம், யத்த² ஏகரத்திபரிசயேனாபி வட்டது³க்க²தோ முஞ்சிதும் ஸக்கா’’தி படிலத்³த⁴ஸத்³தோ⁴ பப்³ப³ஜித்வா குடிமண்ட³னானுயுத்தோ விஹரந்தோ குடிகரணம் படிச்ச ப⁴க³வதா க³ரஹிதோ ஸங்கி⁴கே ஸேனாஸனே வஸந்தோ விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 2.48.1-7) –

‘‘ஸுவண்ணவண்ணம் ஸம்பு³த்³த⁴ம், ஆஹுதீனம் படிக்³க³ஹம்;

விபினக்³கே³ன க³ச்ச²ந்தம், அத்³த³ஸம் லோகனாயகம்.

‘‘நளமாலம் க³ஹேத்வான, நிக்க²மந்தோ ச தாவதே³;

தத்த²த்³த³ஸாஸிம் ஸம்பு³த்³த⁴ம், ஓக⁴திண்ணமனாஸவம்.

‘‘பஸன்னசித்தோ ஸுமனோ, நளமாலமபூஜயிம்;

த³க்கி²ணேய்யம் மஹாவீரம், ஸப்³ப³லோகானுகம்பகம்.

‘‘ஏகதிம்ஸே இதோ கப்பே, யம் மாலமபி⁴ரோபயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா யே பி⁴க்கூ² து⁴தங்க³ஸமாதா⁴னேன அத்தானம் உக்கம்ஸேத்வா ஸங்க⁴ப⁴த்தாதி³ம் ஸாதி³யந்தே அஞ்ஞே பி⁴க்கூ² அவஜானந்தி, தேஸம் ஓவாத³தா³னமுகே²ன அஞ்ஞம் ப்³யாகரோந்தோ –

228. ‘‘ஸுக²ஞ்சே ஜீவிதும் இச்சே², ஸாமஞ்ஞஸ்மிம் அபேக்க²வா;

ஸங்கி⁴கம் நாதிமஞ்ஞேய்ய, சீவரம் பானபோ⁴ஜனம்.

229. ஸுக²ஞ்சே ஜீவிதும் இச்சே², ஸாமஞ்ஞஸ்மிம் அபேக்க²வா;

அஹி மூஸிகஸோப்³ப⁴ம்வ, ஸேவேத² ஸயனாஸனம்.

230. ஸுக²ஞ்சே ஜீவிதும் இச்சே², ஸாமஞ்ஞஸ்மிம் அபேக்க²வா;

இதரீதரேன துஸ்ஸேய்ய, ஏகத⁴ம்மஞ்ச பா⁴வயே’’தி. – திஸ்ஸோ கா³தா² அபா⁴ஸி;

தத்த² ஸுக²ஞ்சே ஜீவிதும் இச்சே², ஸாமஞ்ஞஸ்மிம் அபேக்க²வாதி ஸாமஞ்ஞஸ்மிம் ஸமணபா⁴வே அபேக்க²வா ஸிக்கா²ய திப்³ப³கா³ரவோ ஹுத்வா ஸுக²ம் ஜீவிதும் இச்சே²ய்ய சே, அனேஸனம் பஹாய ஸாமஞ்ஞஸுகே²ன ஸசே ஜீவிதுகாமோதி அத்தோ². ஸங்கி⁴கம் நாதிமஞ்ஞேய்ய, சீவரம் பானபோ⁴ஜனந்தி ஸங்க⁴தோ ஆப⁴தம் சீவரம் ஆஹாரம் ந அவமஞ்ஞேய்ய, ஸங்க⁴ஸ்ஸ உப்பஜ்ஜனகலாபோ⁴ நாம பரிஸுத்³து⁴ப்பாதோ³ ஹோதீதி தம் பரிபு⁴ஞ்ஜந்தஸ்ஸ ஆஜீவபாரிஸுத்³தி⁴ஸம்ப⁴வேன ஸாமஞ்ஞஸுக²ம் ஹத்த²க³தமேவாதி அதி⁴ப்பாயோ. அஹி மூஸிகஸோப்³ப⁴ம்வாதி அஹி விய மூஸிகாய க²தபி³லம் ஸேவேத² ஸேவேய்ய ஸேனாஸனம். யதா² நாம ஸப்போ ஸயமத்தனோ ஆஸயம் அகத்வா மூஸிகாய அஞ்ஞேன வா கதே ஆஸயே வஸித்வா யேன காமம் பக்கமதி, ஏவமேவம் பி⁴க்கு² ஸயம் ஸேனாஸனகரணா ஸம்கிலேஸம் அனாபஜ்ஜித்வா யத்த² கத்த²சி வஸித்வா பக்கமேய்யாதி அத்தோ².

இதா³னி வுத்தே அவுத்தே ச பச்சயே யதா²லாப⁴ஸந்தோஸேனேவ ஸாமஞ்ஞஸுக²ம் ஹோதி, ந அஞ்ஞதா²தி த³ஸ்ஸேந்தோ ஆஹ ‘‘இதரீதரேன துஸ்ஸேய்யா’’தி, யேன கேனசி ஹீனேன வா பணீதேன வா யதா²லத்³தே⁴ன பச்சயேன ஸந்தோஸம் ஆபஜ்ஜேய்யாதி அத்தோ². ஏகத⁴ம்மந்தி அப்பமாத³பா⁴வம், தஞ்ஹி அனுயுஞ்ஜந்தஸ்ஸ அனவஜ்ஜம் ஸப்³ப³ம் லோகியஸுக²ம் லோகுத்தரஸுக²ஞ்ச ஹத்த²க³தமேவ ஹோதி. தேனாஹ ப⁴க³வா – ‘‘அப்பமத்தோ ஹி ஜா²யந்தோ, பப்போதி விபுலம் ஸுக²’’ந்தி (ம. நி. 2.352; த⁴. ப. 27).

த⁴னியத்தே²ரகா³தா²வண்ணனா நிட்டி²தா.