5. மாதங்க³புத்தத்தே²ரகா³தா²வண்ணனா

அதிஸீதந்தி ஆயஸ்மதோ மாதங்க³புத்தத்தே²ரஸ்ஸ கா³தா². கா உப்பத்தி? அயம் கிர பது³முத்தரஸ்ஸ ப⁴க³வதோ காலே ஹிமவந்தஸமீபே மஹதோ ஜாதஸ்ஸரஸ்ஸ ஹேட்டா² மஹதி நாக³ப⁴வனே மஹானுபா⁴வோ நாக³ராஜா ஹுத்வா நிப்³ப³த்தோ ஏகதி³வஸம் நாக³ப⁴வனதோ நிக்க²மித்வா விசரந்தோ ஸத்தா²ரம் ஆகாஸேன க³ச்ச²ந்தம் தி³ஸ்வா பஸன்னமானஸோ அத்தனோ ஸீஸமணினா பூஜம் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ கோஸலரட்டே² மாதங்க³ஸ்ஸ நாம குடும்பி³கஸ்ஸ புத்தோ ஹுத்வா நிப்³ப³த்தோ மாதங்க³புத்தோத்வேவ பஞ்ஞாயித்த². ஸோ விஞ்ஞுதம் பத்தோ அலஸஜாதிகோ ஹுத்வா கிஞ்சி கம்மம் அகரோந்தோ ஞாதகேஹி அஞ்ஞேஹி ச க³ரஹிதோ ‘‘ஸுக²ஜீவினோ இமே ஸமணா ஸக்யபுத்தியா’’தி ஸுக²ஜீவிதம் ஆகங்க²ந்தோ பி⁴க்கூ²ஹி கதபரிசயோ ஹுத்வா ஸத்தா²ரம் உபஸங்கமித்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வா அஞ்ஞே பி⁴க்கூ² இத்³தி⁴மந்தே தி³ஸ்வா இத்³தி⁴ப³லம் பத்தே²த்வா ஸத்து² ஸந்திகே கம்மட்டா²னம் க³ஹேத்வா பா⁴வனம் அனுயுஞ்ஜந்தோ ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 2.48.8-29) –

‘‘பது³முத்தரோ நாம ஜினோ, ஸப்³ப³த⁴ம்மான பாரகூ³;

விவேககாமோ ஸம்பு³த்³தோ⁴, க³ச்ச²தே அனிலஞ்ஜஸே.

‘‘அவிதூ³ரே ஹிமவந்தஸ்ஸ, மஹாஜாதஸ்ஸரோ அஹு;

தத்த² மே ப⁴வனம் ஆஸி, புஞ்ஞகம்மேன ஸம்யுதம்.

‘‘ப⁴வனா அபி⁴னிக்க²ம்ம, அத்³த³ஸம் லோகனாயகம்;

இந்தீ³வரம்வ ஜலிதம், ஆதி³த்தம்வ ஹுதாஸனம்.

‘‘விசினம் நத்³த³ஸம் புப்ப²ம், பூஜயிஸ்ஸந்தி நாயகம்;

ஸகம் சித்தம் பஸாதே³த்வா, அவந்தி³ம் ஸத்து²னோ அஹம்.

‘‘மம ஸீஸே மணிம் க³ய்ஹ, பூஜயிம் லோகனாயகம்;

இமாய மணிபூஜாய, விபாகோ ஹோது ப⁴த்³த³கோ.

‘‘பது³முத்தரோ லோகவிதூ³, ஆஹுதீனம் படிக்³க³ஹோ;

அந்தலிக்கே² டி²தோ ஸத்தா², இமம் கா³த²ம் அபா⁴ஸத².

‘‘ஸோ தே இஜ்ஜ²து ஸங்கப்போ, லப⁴ஸ்ஸு விபுலம் ஸுக²ம்;

இமாய மணிபூஜாய, அனுபோ⁴ஹி மஹாயஸம்.

‘‘இத³ம் வத்வான ப⁴க³வா, ஜலஜுத்தமனாமகோ;

அக³மாஸி பு³த்³த⁴ஸேட்டோ², யத்த² சித்தம் பணீஹிதம்.

‘‘ஸட்டி²கப்பானி தே³விந்தோ³, தே³வரஜ்ஜமகாரயிம்;

அனேகஸதக்க²த்துஞ்ச, சக்கவத்தீ அஹோஸஹம்.

‘‘புப்³ப³கம்மம் ஸரந்தஸ்ஸ, தே³வபூ⁴தஸ்ஸ மே ஸதோ;

மணி நிப்³ப³த்ததே மய்ஹம், ஆலோககரணோ மமம்.

‘‘ச²ளஸீதிஸஹஸ்ஸானி, நாரியோ மே பரிக்³க³ஹா;

விசித்தவத்தா²ப⁴ரணா, ஆமுக்கமணிகுண்ட³லா.

‘‘அளாரபம்ஹா ஹஸுலா, ஸுஸஞ்ஞா தனுமஜ்ஜி²மா;

பரிவாரேந்தி மம் நிச்சம், மணிபூஜாயித³ம் ப²லம்.

‘‘ஸோண்ணமயா மணிமயா, லோஹிதங்கமயா ததா²;

ப⁴ண்டா³ மே ஸுகதா ஹோந்தி, யதி³ச்ச²ஸி பிளந்த⁴னா.

‘‘கூடாகா³ரா க³ஹா ரம்மா, ஸயனஞ்ச மஹாரஹம்;

மம ஸங்கப்பமஞ்ஞாய, நிப்³ப³த்தந்தி யதி³ச்ச²கம்.

‘‘லாபா⁴ தேஸம் ஸுலத்³த⁴ஞ்ச, யே லப⁴ந்தி உபஸ்ஸுதிம்;

புஞ்ஞக்கே²த்தம் மனுஸ்ஸானம், ஓஸத⁴ம் ஸப்³ப³பாணினம்.

‘‘மய்ஹம்பி ஸுகதம் கம்மம், யோஹம் அத³க்கி² நாயகம்;

வினிபாதா பமுத்தோம்ஹி, பத்தோம்ஹி அசலம் பத³ம்.

‘‘யம் யம் யோனூபபஜ்ஜாமி, தே³வத்தம் அத² மானுஸம்;

தி³வஸஞ்சேவ ரத்திஞ்ச, ஆலோகோ ஹோதி மே ஸதா³.

‘‘தாயேவ மணிபூஜாய, அனுபோ⁴த்வான ஸம்பதா³;

ஞாணாலோகோ மயா தி³ட்டோ², பத்தோம்ஹி அசலம் பத³ம்.

‘‘ஸதஸஹஸ்ஸிதோ கப்பே, யம் மணிம் அபி⁴பூஜயிம்;

து³க்³க³திம் நாபி⁴ஜானாமி, மணிபூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ச²ளபி⁴ஞ்ஞோ பன ஹுத்வா புக்³க³லாதி⁴ட்டா²னவஸேன கோஸஜ்ஜம் க³ரஹந்தோ அத்தனோ ச வீரியாரம்ப⁴ம் கித்தேந்தோ –

231. ‘‘அதிஸீதம் அதிஉண்ஹம், அதிஸாயமித³ம் அஹு;

இதி விஸ்ஸட்ட²கம்மந்தே, க²ணா அச்சேந்தி மாணவே.

232. ‘‘யோ ச ஸீதஞ்ச உண்ஹஞ்ச, திணா பி⁴ய்யோ ந மஞ்ஞதி;

கரம் புரிஸகிச்சானி, ஸோ ஸுகா² ந விஹாயதி.

233. ‘‘த³ப்³ப³ம் குஸம் போடகிலம், உஸீரம் முஞ்ஜபப்³ப³ஜம்;

உரஸா பனுதி³ஸ்ஸாமி, விவேகமனுப்³ரூஹய’’ந்தி. – கா³தா²த்தயமாஹ;

தத்த² அதிஸீதந்தி ஹிமபாதவத்³த³லாதி³னா அதிவிய ஸீதம், இத³ம் அஹூதி ஆனேத்வா ஸம்ப³ந்தோ⁴. அதிஉண்ஹந்தி த⁴ம்மபரிதாபாதி³னா அதிவிய உண்ஹம், உப⁴யேனபி உதுவஸேன கோஸஜ்ஜவத்து²மாஹ. அதிஸாயந்தி தி³வஸஸ்ஸ பரிணதியா அதிஸாயம், ஸாயக்³க³ஹணேனேவ சேத்த² பாதோபி ஸங்க³ய்ஹதி, தது³ப⁴யேன காலவஸேன கோஸஜ்ஜவத்து²மாஹ. இதீதி இமினா பகாரேன. ஏதேன ‘‘இத⁴, பி⁴க்க²வே, பி⁴க்கு²னா கம்மம் கத்தப்³ப³ம் ஹோதீ’’திஆதி³னா (அ. நி. 8.80; தீ³. நி. 3.334) வுத்தம் கோஸஜ்ஜவத்து²ம் ஸங்க³ண்ஹாதி. விஸ்ஸட்ட²கம்மந்தேதி பரிச்சத்தயோக³கம்மந்தே. க²ணாதி பு³த்³து⁴ப்பாதா³த³யோ ப்³ரஹ்மசரியவாஸஸ்ஸ ஓகாஸா. அச்சேந்தீதி அதிக்கமந்தி. மாணவேதி ஸத்தே. திணா பி⁴ய்யோ ந மஞ்ஞதீதி திணதோ உபரி ந மஞ்ஞதி, திணம் விய மஞ்ஞதி, ஸீதுண்ஹானி அபி⁴ப⁴வித்வா அத்தனா கத்தப்³ப³ம் கரோதி. கரந்தி கரோந்தோ. புரிஸகிச்சானீதி வீரபுரிஸேன கத்தப்³பா³னி அத்தஹிதபரஹிதானி. ஸுகா²தி ஸுக²தோ, நிப்³பா³னஸுக²தோதி அதி⁴ப்பாயோ. ததியகா³தா²ய அத்தோ² ஹேட்டா² வுத்தோயேவ.

மாதங்க³புத்தத்தே²ரகா³தா²வண்ணனா நிட்டி²தா.