3. வல்லியத்தே²ரகா³தா²வண்ணனா

மக்கடோ பஞ்சத்³வாராயந்திஆதி³கா ஆயஸ்மதோ வல்லியத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ இதோ ஏகதிம்ஸே கப்பே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் கேனசிதே³வ கரணீயேன அரஞ்ஞம் க³தோ தத்த² நாரத³ம் நாம பச்சேகஸம்பு³த்³த⁴ம் ருக்க²மூலே வஸந்தம் தி³ஸ்வா பஸன்னமானஸோ நளேஹி ஸாலம் கத்வா திணேஹி சா²தே³த்வா அதா³ஸி. சங்கமனட்டா²னஞ்சஸ்ஸ ஸோதே⁴த்வா வாலுகா ஓகிரித்வா அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணமஹாஸாலஸ்ஸ புத்தோ ஹுத்வா நிப்³ப³த்தி, வல்லியோதிஸ்ஸ நாமம் அஹோஸி. ஸோ வயப்பத்தோ யோப்³ப³னமனுப்பத்தோ இந்த்³ரியவஸிகோ ஹுத்வா விசரந்தோ கல்யாணமித்தஸம்ஸக்³கே³ன ப⁴க³வந்தம் உபஸங்கமித்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனம் பட்ட²பேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 2.50.93-103) –

‘‘ஹிமவந்தஸ்ஸாவிதூ³ரே, ஹாரிதோ நாம பப்³ப³தோ;

ஸயம்பூ⁴ நாரதோ³ நாம, ருக்க²மூலே வஸீ ததா³.

‘‘நளாகா³ரம் கரித்வான, திணேன சா²த³யிம் அஹம்;

சங்கமம் ஸோத⁴யித்வான, ஸயம்பு⁴ஸ்ஸ அதா³ஸஹம்.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

‘‘தத்த² மே ஸுகதம் ப்³யம்ஹம், நளகுடிகனிம்மிதம்;

ஸட்டி²யோஜனமுப்³பே³த⁴ம், திம்ஸயோஜனவித்த²தம்.

‘‘சதுத்³த³ஸேஸு கப்பேஸு, தே³வலோகே ரமிம் அஹம்;

ஏகஸத்ததிக்க²த்துஞ்ச, தே³வரஜ்ஜமகாரயிம்.

‘‘சதுத்திம்ஸதிக்க²த்துஞ்ச, சக்கவத்தீ அஹோஸஹம்;

பதே³ஸரஜ்ஜம் விபுலம், க³ணனாதோ அஸங்கி²யம்.

‘‘த⁴ம்மபாஸாத³மாருய்ஹ, ஸப்³பா³காரவரூபமம்;

யதி³ச்ச²காஹம் விஹரே, ஸக்யபுத்தஸ்ஸ ஸாஸனே.

‘‘ஏகதிம்ஸே இதோ கப்பே, யம் கம்மமகரிம் ததா³;

து³க்³க³திம் நாபி⁴ஜானாமி, நளகுடியித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா புது²ஜ்ஜனகாலே அத்தனோ சித்தஸ்ஸ ரூபாதி³ஆரம்மணேஸு யதா²காமப்பவத்தியா, இதா³னி அரியமக்³கே³ன நிக்³க³ஹிதபா⁴வஸ்ஸ ச விபா⁴வனேன அஞ்ஞம் ப்³யாகரோந்தோ –

125. ‘‘மக்கடோ பஞ்சத்³வாராயம், குடிகாயம் பஸக்கிய;

த்³வாரேன அனுபரியேதி, க⁴ட்டயந்தோ முஹும் முஹும்.

126. ‘‘திட்ட² மக்கட மா தா⁴வி, ந ஹி தே தம் யதா² புரே;

நிக்³க³ஹீதோஸி பஞ்ஞாய, நேவ தூ³ரம் க³மிஸ்ஸஸீ’’தி. – கா³தா²த்³வயம் அபா⁴ஸி;

தத்த² க⁴ட்டயந்தோதி அத்தனோ லோலபா⁴வேன ருக்க²ஸ்ஸ அஞ்ஞம் ஸாக²ம் முஞ்சித்வா அஞ்ஞஸ்ஸ க³ஹணேன அனேகவாரம் தத்த² ருக்க²ம் சாலேந்தோ ப²லூபபோ⁴க³மக்கடோ விய தேன தேன சக்கா²தி³த்³வாரேன ரூபாதி³ஆரம்மணேஸு அஞ்ஞம் முஞ்சித்வா அஞ்ஞம் க³ண்ஹந்தோ சித்தஸந்தானஸ்ஸ ஸமாதா³னவஸேன நிச்சலம் டா²தும் அப்பதா³னேன அபி⁴க்க²ணம் க⁴ட்டயந்தோ சாலேந்தோ தஸ்மிம்யேவ ரூபாதி³ஆரம்மணே அனுபரிவத்ததி யதா²காமம் விசரதி. வத்தமானஸமீபதாய சேத்த² வத்தமானவசனம். ஏவம் அனுபரியந்தோ ச திட்ட², மக்கட, மா தா⁴வி த்வம், சித்தமக்கட, இதா³னி திட்ட² மா தா⁴வி, இதோ பட்டா²ய தே தா⁴விதும் ந ஸக்கா, தஸ்மா ந ஹி தே தம் யதா² பூரே யஸ்மா தம் அத்தபா⁴வகே³ஹம் புப்³பே³ விய ந தே ஸேவிதம் பிஹிதத்³வாரபா⁴வதோ, கிஞ்ச நிக்³க³ஹீதோஸி பஞ்ஞாய ஸயஞ்ச இதா³னி மக்³க³பஞ்ஞாய கிலேஸாபி⁴ஸங்கா²ரஸங்கா²தானம் பாதா³னம் சே²த³னேன அச்சந்திகம் நிக்³க³ஹம் பத்தோஸி, தஸ்மா நேவ தூ³ரம் க³மிஸ்ஸஸி இதோ அத்தபா⁴வதோ தூ³ரம் து³தியாதி³அத்தபா⁴வம் நேவ க³மிஸ்ஸஸி யாவசரிமகசித்தம் ஏவ தே க³மனந்தி த³ஸ்ஸேதி. ‘‘நேதோ தூ³ர’’ந்திபி பாடோ², ஸோ ஏவத்தோ².

வல்லியத்தே²ரகா³தா²வண்ணனா நிட்டி²தா.