6. குடிவிஹாரித்தே²ரகா³தா²வண்ணனா

கோ குடிகாயந்தி ஆயஸ்மதோ குடிவிஹாரித்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ ஆகாஸேன க³ச்ச²ந்தஸ்ஸ ‘‘உத³கதா³னம் த³ஸ்ஸாமீ’’தி ஸீதலம் உத³கம் க³ஹேத்வா பீதிஸோமனஸ்ஸஜாதோ உத்³த⁴ம்முகோ² ஹுத்வா உக்கி²பி. ஸத்தா² தஸ்ஸ அஜ்ஜா²ஸயம் ஞத்வா பஸாத³ஸம்வட்³ட⁴னத்த²ம் ஆகாஸே டி²தோவ ஸம்படிச்சி². ஸோ தேன அனப்பகம் பீதிஸோமனஸ்ஸம் படிஸம்வேதே³ஸி. ஸேஸம் அஞ்ஜனவனியத்தே²ரஸ்ஸ வத்து²ம்ஹி வுத்தஸதி³ஸமேவ. அயம் பன விஸேஸோ – அயம் கிர வுத்தனயேன பப்³ப³ஜித்வா கதபுப்³ப³கிச்சோ விபஸ்ஸனம் அனுயுஞ்ஜந்தோ ஸாயம் கே²த்தஸமீபேன க³ச்ச²ந்தோ தே³வே பு²ஸாயந்தே கே²த்தபாலகஸ்ஸ புஞ்ஞம் திணகுடிம் தி³ஸ்வா பவிஸித்வா தத்த² திணஸந்தா²ரகே நிஸீதி³. நிஸின்னமத்தோவ உதுஸப்பாயம் லபி⁴த்வா விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 1.11.29-35) –

‘‘ஸுவண்ணவண்ணம் ஸம்பு³த்³த⁴ம், க³ச்ச²ந்தம் அனிலஞ்ஜஸே;

க⁴தாஸனம்வ ஜலிதம், ஆதி³த்தம்வ ஹுதாஸனம்.

‘‘பாணினா உத³கம் க³ய்ஹ, ஆகாஸே உக்கி²பிம் அஹம்;

ஸம்படிச்சி² மஹாவீரோ, பு³த்³தோ⁴ காருணிகோ இஸி.

‘‘அந்தலிக்கே² டி²தோ ஸத்தா², பது³முத்தரனாமகோ;

மம ஸங்கப்பமஞ்ஞாய, இமா கா³தா² அபா⁴ஸத².

‘‘இமினா த³கதா³னேன, பீதிஉப்பாத³னேன ச;

கப்பஸதஸஹஸ்ஸம்பி, து³க்³க³திம் நுபபஜ்ஜதி.

‘‘தேன கம்மேன த்³விபதி³ந்த³, லோகஜேட்ட² நராஸப⁴;

பத்தோம்ஹி அசலம் டா²னம், ஹித்வா ஜயபராஜயம்.

‘‘ஸஹஸ்ஸராஜனாமேன, தயோ தே சக்கவத்தினோ;

பஞ்சஸட்டி²கப்பஸதே, சாதுரந்தா ஜனாதி⁴பா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா தே²ரே தத்த² நிஸின்னே கே²த்தபாலகோ ஆக³ந்த்வா ‘‘கோ குடிகாய’’ந்தி ஆஹ. தம் ஸுத்வா தே²ரோ ‘‘பி⁴க்கு² குடிகாய’’ந்திஆதி³மாஹ. தயித³ம் கே²த்தபாலஸ்ஸ தே²ரஸ்ஸ ச வசனம் ஏகஜ்ஜ²ம் கத்வா –

56. ‘‘கோ குடிகாயம் பி⁴க்கு² குடிகாயம், வீதராகோ³ ஸுஸமாஹிதசித்தோ;

ஏவம் ஜானாஹி ஆவுஸோ, அமோகா⁴ தே குடிகா கதா’’தி. –

ததா²ரூபேன ஸங்கீ³திம் ஆரோபிதம்.

தத்த² கோ குடிகாயந்தி, ‘‘இமிஸ்ஸம் குடிகாயம் கோ நிஸின்னோ’’தி கே²த்தபாலஸ்ஸ புச்சா²வசனம். தஸ்ஸ பி⁴க்கு² குடிகாயந்தி தே²ரஸ்ஸ படிவசனதா³னம். அத² நம் அத்தனோ அனுத்தரத³க்கி²ணேய்யபா⁴வதோ தம் குடிபரிபோ⁴க³ம் அனுமோதா³பேத்வா உளாரம் தமேவ புஞ்ஞம் பதிட்டா²பேதும் ‘‘வீதராகோ³’’திஆதி³ வுத்தம். தஸ்ஸத்தோ² – ஏகோ பி⁴ன்னகிலேஸோ பி⁴க்கு² தே குடிகாயம் நிஸின்னோ, ததோ ஏவ ஸோ அக்³க³மக்³கே³ன ஸப்³ப³ஸோ ஸமுச்சி²ன்னராக³தாய வீதராகோ³ அனுத்தரஸமாதி⁴னா நிப்³பா³னம் ஆரம்மணம் கத்வா ஸுட்டு² ஸமாஹிதசித்ததாய ஸுஸமாஹிதசித்தோ, இமஞ்ச அத்த²ம், ஆவுஸோ கே²த்தபால, யதா²ஹம் வதா³மி, ஏவம் ஜானாஹி ஸத்³த³ஹ அதி⁴முச்சஸ்ஸு. அமோகா⁴ தே குடிகா கதா தயா கதா குடிகா அமோகா⁴ அவஞ்ஜா² ஸப²லா ஸஉத்³ரயா, யஸ்மா அரஹதா கீ²ணாஸவேன பரிபு⁴த்தா. ஸசே த்வம் அனுமோத³ஸி, தம் தே ப⁴விஸ்ஸதி தீ³க⁴ரத்தம் ஹிதாய ஸுகா²யாதி.

தம் ஸுத்வா கே²த்தபாலோ ‘‘லாபா⁴ வத மே, ஸுலத்³த⁴ம் வத மே, யஸ்ஸ மே குடிகாயம் ஏதி³ஸோ அய்யோ பவிஸித்வா நிஸீத³தீ’’தி பஸன்னசித்தோ அனுமோத³ந்தோ அட்டா²ஸி. இமம் பன தேஸம் கதா²ஸல்லாபம் ப⁴க³வா தி³ப்³பா³ய ஸோததா⁴துயா ஸுத்வா அனுமோத³னஞ்சஸ்ஸ ஞத்வா தம்பா⁴வினிம் ஸம்பத்திம் விபா⁴வேந்தோ கே²த்தபாலம் இமாஹி கா³தா²ஹி அஜ்ஜ²பா⁴ஸி –

‘‘விஹாஸி குடியம் பி⁴க்கு², ஸந்தசித்தோ அனாஸவோ;

தேன கம்மவிபாகேன, தே³விந்தோ³ த்வம் ப⁴விஸ்ஸஸி.

‘‘ச²த்திம்ஸக்க²த்தும் தே³விந்தோ³, தே³வரஜ்ஜம் கரிஸ்ஸஸி;

சதுத்திம்ஸக்க²த்தும் சக்கவத்தீ, ராஜா ரட்டே² ப⁴விஸ்ஸஸி;

ரதனகுடி நாம பச்சேகபு³த்³தோ⁴, வீதராகோ³ ப⁴விஸ்ஸஸீ’’தி.

குடிகாயம் லத்³த⁴விஸேஸத்தா பன தே²ரஸ்ஸ ததோ பபு⁴தி குடிவிஹாரீத்வேவ ஸமஞ்ஞா உத³பாதி³. அயமேவ ச தே²ரஸ்ஸ அஞ்ஞாப்³யாகரணகா³தா²பி அஹோஸீதி.

குடிவிஹாரித்தே²ரகா³தா²வண்ணனா நிட்டி²தா.