7. து³தியகுடிவிஹாரித்தே²ரகா³தா²வண்ணனா

அயமாஹு புராணியாதி ஆயஸ்மதோ குடிவிஹாரித்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ பஸன்னமானஸோ பரிளாஹகாலே நளவிலீவேஹி விரசிதம் பீ³ஜனிம் அதா³ஸி. தம் ஸத்தா² அனுமோத³னகா³தா²ய ஸம்பஹம்ஸேஸி. ஸேஸம் யதே³த்த² வத்தப்³ப³ம், தம் அஞ்ஜனவனியத்தே²ரவத்து²ம்ஹி வுத்தஸதி³ஸமேவ. அயம் பன விஸேஸோ – அயம் கிர வுத்தனயேன பப்³ப³ஜித்வா அஞ்ஞதராய புராணகுடிகாய விஹரந்தோ ஸமணத⁴ம்மம் அசிந்தேத்வா, ‘‘அயம் குடிகா ஜிண்ணா, அஞ்ஞம் குடிகம் காதும் வட்டதீ’’தி நவகம்மவஸேன சித்தம் உப்பாதே³ஸி. தஸ்ஸ அத்த²காமா தே³வதா ஸம்வேக³ஜனனத்த²ம் இமம் உத்தானோபா⁴ஸம் க³ம்பீ⁴ரத்த²ம் ‘‘அயமாஹு’’தி கா³த²மாஹ.

57. தத்த² அயந்தி ஆஸன்னபச்சக்க²வசனம். ஆஹூதி அஹோஸீதி அத்தோ². கா³தா²ஸுக²த்த²ஞ்ஹி தீ³க⁴ம் கத்வா வுத்தம். புராணியாதி புராதனீ அத்³த⁴க³தா. அஞ்ஞம் பத்த²யஸே நவம் குடிந்தி இமிஸ்ஸா குடியா புராணபா⁴வேன ஜிண்ணதாய இதோ அஞ்ஞம் இதா³னி நிப்³ப³த்தனீயதாய நவம் குடிம் பத்த²யஸே பத்தே²ஸி ஆஸீஸஸி. ஸப்³பே³ன ஸப்³ப³ம் பன ஆஸம் குடியா விராஜய புராணியம் விய நவாயம்பி குடியம் ஆஸம் தண்ஹம் அபேக்க²ம் விராஜேஹி, ஸப்³ப³ஸோ தத்த² விரத்தசித்தோ ஹோஹி. கஸ்மா? யஸ்மா து³க்கா² பி⁴க்கு² புன நவா நாம குடி பி⁴க்கு² புன இதா³னி நிப்³ப³த்தியமானா து³க்கா²வஹத்தா து³க்கா², தஸ்மா அஞ்ஞம் நவம் து³க்க²ம் அனுப்பாதே³ந்தோ யதா²னிப்³ப³த்தாயம் புராணியம்யேவ குடியம் ட²த்வா அத்தனா கதப்³ப³ம் கரோஹீதி. அயஞ்ஹேத்த² அதி⁴ப்பாயோ – த்வம், பி⁴க்கு², ‘‘அயம் புராணீ திணகுடிகா ஜிண்ணா’’தி அஞ்ஞம் நவம் திணகுடிகம் காதும் இச்ச²ஸி, ந ஸமணத⁴ம்மம், ஏவம் இச்ச²ந்தோ பன பா⁴வனாய அனனுயுஞ்ஜனேன புனப்³ப⁴வாபி⁴னிப்³ப³த்தியா அனதிவத்தனதோ ஆயதிம் அத்தபா⁴வகுடிம்பி பத்தே²ந்தோ காதும் இச்ச²ந்தோயேவ நாம ஹோதி. ஸா பன நவா திணகுடி விய கரணது³க்கே²ன ததோ பி⁴ய்யோபி ஜராமரணஸோகபரிதே³வாதி³து³க்க²ஸம்ஸட்ட²தாய து³க்கா², தஸ்மா திணகுடியம் விய அத்தபா⁴வகுடியம் ஆஸம் அபேக்க²ம் விராஜய ஸப்³ப³ஸோ தத்த² விரத்தசித்தோ ஹோஹி, ஏவம் தே வட்டது³க்க²ம் ந ப⁴விஸ்ஸதீதி. தே³வதாய ச வசனம் ஸுத்வா தே²ரோ ஸம்வேக³ஜாதோ விபஸ்ஸனம் பட்ட²பேத்வா க⁴டேந்தோ வாயமந்தோ நசிரஸ்ஸேவ அரஹத்தே பதிட்டா²ஸி. தேன வுத்தம் அபதா³னே (அப. தே²ர 1.11.36-46) –

‘‘பது³முத்தரபு³த்³த⁴ஸ்ஸ, லோகஜேட்ட²ஸ்ஸ தாதி³னோ;

திணத்த²ரே நிஸின்னஸ்ஸ, உபஸந்தஸ்ஸ தாதி³னோ.

‘‘நளமாலம் க³ஹேத்வான, ப³ந்தி⁴த்வா பீ³ஜனிம் அஹம்;

பு³த்³த⁴ஸ்ஸ உபனாமேஸிம், த்³விபதி³ந்த³ஸ்ஸ தாதி³னோ.

‘‘படிக்³க³ஹேத்வா ஸப்³ப³ஞ்ஞூ, பீ³ஜனிம் லோகனாயகோ;

மம ஸங்கப்பமஞ்ஞாய, இமம் கா³த²ம் அபா⁴ஸத².

‘‘யதா² மே காயோ நிப்³பா³தி, பரிளாஹோ ந விஜ்ஜதி;

ததே²வ திவித⁴க்³கீ³ஹி, சித்தம் தவ விமுச்சது.

‘‘ஸப்³பே³ தே³வா ஸமாக³ச்சு²ம், யே கேசி வனனிஸ்ஸிதா;

ஸோஸ்ஸாம பு³த்³த⁴வசனம், ஹாஸயந்தஞ்ச தா³யகம்.

‘‘நிஸின்னோ ப⁴க³வா தத்த², தே³வஸங்க⁴புரக்க²தோ;

தா³யகம் ஸம்பஹம்ஸேந்தோ, இமா கா³தா² அபா⁴ஸத².

‘‘இமினா பீ³ஜனிதா³னேன, சித்தஸ்ஸ பணிதீ⁴ஹி ச;

ஸுப்³ப³தோ நாம நாமேன, சக்கவத்தீ ப⁴விஸ்ஸதி.

‘‘தேன கம்மாவஸேஸேன, ஸுக்கமூலேன சோதி³தோ;

மாலுதோ நாம நாமேன, சக்கவத்தீ ப⁴விஸ்ஸதி.

‘‘இமினா பீ³ஜனிதா³னேன, ஸம்மானவிபுலேன ச;

கப்பஸதஸஹஸ்ஸம்பி, து³க்³க³திம் நுபபஜ்ஜதி.

‘‘திம்ஸகப்பஸஹஸ்ஸம்ஹி, ஸுப்³ப³தா அட்ட²திம்ஸ தே;

ஏகூனதிம்ஸஸஹஸ்ஸே, அட்ட² மாலுதனாமகா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தே பன பதிட்டி²தோ ‘‘அயம் மே அரஹத்தப்பத்தியா அங்குஸபூ⁴தா’’தி தமேவ கா³த²ம் பச்சுதா³ஹாஸி. ஸாயேவ ச தே²ரஸ்ஸ அஞ்ஞாப்³யாகரணகா³தா² அஹோஸி. குடிஓவாதே³ன லத்³த⁴விஸேஸத்தா சஸ்ஸ குடிவிஹாரீத்வேவ ஸமஞ்ஞா அஹோஸீதி.

து³தியகுடிவிஹாரித்தே²ரகா³தா²வண்ணனா நிட்டி²தா.