5. அஞ்ஜனவனியத்தே²ரகா³தா²வண்ணனா

ஆஸந்தி³ம் குடிகம் கத்வாதி ஆயஸ்மதோ அஞ்ஜனவனியத்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ காலே ஸுத³ஸ்ஸனோ நாம மாலாகாரோ ஹுத்வா ஸுமனபுப்பே²ஹி ப⁴க³வந்தம் பூஜேத்வா அஞ்ஞம்பி தத்த² தத்த² ப³ஹும் புஞ்ஞம் கத்வா தே³வமனுஸ்ஸேஸு ஸம்ஸரந்தோ கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா ஸமணத⁴ம்மம் அகாஸி. அத² இமஸ்மிம் பு³த்³து⁴ப்பாதே³ வேஸாலியம் வஜ்ஜிராஜகுலே நிப்³ப³த்தித்வா தஸ்ஸ வயப்பத்தகாலே வஜ்ஜிரட்டே² அவுட்டி²ப⁴யம் ப்³யாதி⁴ப⁴யம் அமனுஸ்ஸப⁴யந்தி தீணி ப⁴யானி உப்பஜ்ஜிம்ஸு. தம் ஸப்³ப³ம் ரதனஸுத்தவண்ணனாயம் (கு². பா. அட்ட². ரதனஸுத்தவண்ணனா; ஸு. நி. அட்ட². 1.ரதனஸுத்தவண்ணனா) வுத்தனயேன வேதி³தப்³ப³ம். ப⁴க³வதி பன வேஸாலிம் பவிட்டே² ப⁴யேஸு ச வூபஸந்தேஸு ஸத்து² த⁴ம்மதே³ஸனாய ஸம்ப³ஹுலானம் தே³வமனுஸ்ஸானம் த⁴ம்மாபி⁴ஸமயே ச ஜாதே அயம் ராஜகுமாரோ பு³த்³தா⁴னுபா⁴வம் தி³ஸ்வா படிலத்³த⁴ஸத்³தோ⁴ பப்³ப³ஜி. யதா² சாயம் ஏவம் அனந்தரம் வுச்சமானா சத்தாரோபி ஜனா. தேபி ஹி இமஸ்ஸ ஸஹாயபூ⁴தா லிச்ச²விராஜகுமாரா ஏவம் இமினாவ நீஹாரேன பப்³ப³ஜிம்ஸு. கஸ்ஸபஸம்பு³த்³த⁴காலேபி ஸஹாயா ஹுத்வா இமினா ஸஹேவ பப்³ப³ஜித்வா ஸமணத⁴ம்மம் அகம்ஸு, பது³முத்தரஸ்ஸபி ப⁴க³வதோ பாத³மூலே குஸலபீ³ஜரோபனாதி³ம் அகம்ஸூதி. தத்தா²யம் கதபுப்³ப³கிச்சோ ஸாகேதே அஞ்ஜனவனே ஸுஸானட்டா²னே வஸந்தோ உபகட்டா²ய வஸ்ஸூபனாயிகாய மனுஸ்ஸேஹி ச²ட்³டி³தம் ஜிண்ணகம் ஆஸந்தி³ம் லபி⁴த்வா தம் சதூஸு பாஸாணேஸு ட²பேத்வா உபரி திரியஞ்ச திணாதீ³ஹி சா²தே³த்வா த்³வாரம் யோஜேத்வா வஸ்ஸம் உபக³தோ. பட²மமாஸேயேவ க⁴டேந்தோ வாயமந்தோ அரஹத்தம் பாபுணி. தேன வுத்தம் அபதா³னே (அப. தே²ர 1.11.24-28) –

‘‘ஸுத³ஸ்ஸனோதி நாமேன, மாலாகாரோ அஹம் ததா³;

அத்³த³ஸம் விரஜம் பு³த்³த⁴ம், லோகஜேட்ட²ம் நராஸப⁴ம்.

‘‘ஜாதிபுப்ப²ம் க³ஹேத்வான, பூஜயிம் பது³முத்தரம்;

விஸுத்³த⁴சக்கு² ஸுமனோ, தி³ப்³ப³சக்கு²ம் ஸமஜ்ஜ²க³ம்.

‘‘ஏதிஸ்ஸா புப்ப²பூஜாய, சித்தஸ்ஸ பணிதீ⁴ஹி ச;

கப்பானம் ஸதஸஹஸ்ஸம், து³க்³க³திம் நுபபஜ்ஜஹம்.

‘‘ஸோளஸாஸிம்ஸு ராஜானோ, தே³வுத்தரஸனாமகா;

ச²த்திம்ஸம்ஹி இதோ கப்பே, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா விமுத்திஸுக²ம் படிஸம்வேதே³ந்தோ ஸமாபத்திதோ வுட்டா²ய யதா²லத்³த⁴ம் ஸம்பத்திம் பச்சவேக்கி²த்வா பீதிவேகே³ன உதா³னேந்தோ ‘‘ஆஸந்தி³ம் குடிகம் கத்வா’’தி கா³த²ம் அபா⁴ஸி.

55. தத்த² ஆஸந்தி³ம் குடிகம் கத்வாதி ஆஸந்தீ³ நாம தீ³க⁴பாத³கம் சதுரஸ்ஸபீட²ம், ஆயதம் சதுரஸ்ஸம்பி அத்தி²யேவ, யத்த² நிஸீதி³துமேவ ஸக்கா, ந நிபஜ்ஜிதும் தம் ஆஸந்தி³ம் குடிகம் கத்வா வாஸத்தா²ய ஹேட்டா² வுத்தனயேன குடிகம் கத்வா யதா² தத்த² நிஸின்னஸ்ஸ உதுபரிஸ்ஸயாபா⁴வேன ஸுகே²ன ஸமணத⁴ம்மம் காதும் ஸக்கா, ஏவம் குடிகம் கத்வா. ஏதேன பரமுக்கம்ஸக³தம் ஸேனாஸனே அத்தனோ அப்பிச்ச²தம் ஸந்துட்டி²ஞ்ச த³ஸ்ஸேதி. வுத்தம்பி சேதம் த⁴ம்மஸேனாபதினா –

‘‘பல்லங்கேன நிஸின்னஸ்ஸ, ஜண்ணுகேனாபி⁴வஸ்ஸதி;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³. 985; மி. ப. 6.1.1);

அபரே ‘‘ஆஸந்தி³குடிக’’ந்தி பாட²ம் வத்வா ‘‘ஆஸந்தி³ப்பமாணம் குடிகம் கத்வா’’தி அத்த²ம் வத³ந்தி. அஞ்ஞே பன ‘‘ஆஸனனிஸஜ்ஜாதி³க³தே மனுஸ்ஸே உத்³தி³ஸ்ஸ மஞ்சகஸ்ஸ உபரி கதகுடிகா ஆஸந்தீ³ நாம, தம் ஆஸந்தி³ம் குடிகம் கத்வா’’தி அத்த²ம் வத³ந்தி. ஓக்³க³ய்ஹாதி ஓகா³ஹேத்வா அனுபவிஸித்வா. அஞ்ஜனம் வனந்தி ஏவம்னாமகம் வனம், அஞ்ஜனவண்ணபுப்ப²பா⁴வதோ ஹி அஞ்ஜனா வுச்சந்தி வல்லியோ, தப்³ப³ஹுலதாய தம் வனம் ‘‘அஞ்ஜனவன’’ந்தி நாமம் லபி⁴. அபரே பன ‘‘அஞ்ஜனா நாம மஹாக³ச்சா²’’தி வத³ந்தி, தம் அஞ்ஜனவனம் ஓக்³க³ய்ஹ ஆஸந்தி³கம் குடிகம் கத்வா திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனந்தி விஹரதா மயாதி வசனஸேஸேனேவ யோஜனா. இத³மேவ ச தே²ரஸ்ஸ அஞ்ஞாப்³யாகரணம் அஹோஸீதி.

அஞ்ஜனவனியத்தே²ரகா³தா²வண்ணனா நிட்டி²தா.