6. கபிலஸுத்த-(த⁴ம்மசரியஸுத்த)-வண்ணனா

த⁴ம்மசரியந்தி கபிலஸுத்தம். கா உப்பத்தி? ஹேமவதஸுத்தே வுத்தனயேனேவ பரினிப்³பு³தே கஸ்ஸபே ப⁴க³வதி த்³வே குலபுத்தா பா⁴தரோ நிக்க²மித்வா ஸாவகானம் ஸந்திகே பப்³ப³ஜிம்ஸு. ஜேட்டோ² ஸோத⁴னோ நாம, கனிட்டோ² கபிலோ நாம. தேஸம் மாதா ஸாத⁴னீ நாம, கனிட்ட²ப⁴கி³னீ தாபனா நாம. தாபி பி⁴க்கு²னீஸு பப்³ப³ஜிம்ஸு. ததோ தே த்³வேபி ஹேமவதஸுத்தே வுத்தனயேனேவ ‘‘ஸாஸனே கதி து⁴ரானீ’’தி புச்சி²த்வா ஸுத்வா ச ஜேட்டோ² ‘‘வாஸது⁴ரம் பூரேஸ்ஸாமீ’’தி பஞ்ச வஸ்ஸானி ஆசரியுபஜ்ஜா²யானம் ஸந்திகே வஸித்வா பஞ்சவஸ்ஸோ ஹுத்வா யாவ அரஹத்தம், தாவ கம்மட்டா²னம் ஸுத்வா அரஞ்ஞம் பவிஸித்வா வாயமந்தோ அரஹத்தம் பாபுணி. கபிலோ ‘‘அஹம் தாவ தருணோ, வுட்³ட⁴காலே வாஸது⁴ரம் பரிபூரேஸ்ஸாமீ’’தி க³ந்த²து⁴ரம் ஆரபி⁴த்வா தேபிடகோ அஹோஸி. தஸ்ஸ பரியத்திம் நிஸ்ஸாய பரிவாரோ, பரிவாரம் நிஸ்ஸாய லாபோ⁴ ச உத³பாதி³.

ஸோ பா³ஹுஸச்சமதே³ன மத்தோ பண்டி³தமானீ அனஞ்ஞாதேபி அஞ்ஞாதமானீ ஹுத்வா பரேஹி வுத்தம் கப்பியம்பி அகப்பியம், அகப்பியம்பி கப்பியம், ஸாவஜ்ஜம்பி அனவஜ்ஜம், அனவஜ்ஜம்பி ஸாவஜ்ஜந்தி ப⁴ணதி. ஸோ பேஸலேஹி பி⁴க்கூ²ஹி, ‘‘மா, ஆவுஸோ கபில, ஏவம் அவசா’’திஆதி³னா நயேன ஓவதி³யமானோ ‘‘தும்ஹே கிம் ஜானாத² ரித்தமுட்டி²ஸதி³ஸா’’திஆதீ³ஹி வசனேஹி கு²ம்ஸேந்தோ வம்பே⁴ந்தோயேவ சரதி. பி⁴க்கூ² தஸ்ஸ பா⁴துனோ ஸோத⁴னத்தே²ரஸ்ஸாபி ஏதமத்த²ம் ஆரோசேஸும். ஸோபி நம் உபஸங்கமித்வா ஆஹ – ‘‘ஆவுஸோ கபில, ஸாஸனஸ்ஸ ஆயு நாம தும்ஹாதி³ஸானம் ஸம்மாபடிபத்தி. மா, ஆவுஸோ கபில, கப்பியம்பி அகப்பியம், அகப்பியம்பி கப்பியம், ஸாவஜ்ஜம்பி அனவஜ்ஜம், அனவஜ்ஜம்பி ஸாவஜ்ஜந்தி வதே³ஹீ’’தி. ஸோ தஸ்ஸபி வசனம் நாதி³யி. ததோ நம் ஸோத⁴னத்தே²ரோ த்³வத்திக்க²த்தும் வத்வா –

‘‘ஏகவாசம்பி த்³விவாசம், ப⁴ணேய்ய அனுகம்பகோ;

ததுத்தரிம் ந பா⁴ஸேய்ய, தா³ஸோவய்யஸ்ஸ ஸந்திகே’’தி. (ஜா. 2.19.34) –

பரிவஜ்ஜேத்வா ‘‘த்வமேவ, ஆவுஸோ, ஸகேன கம்மேன பஞ்ஞாயிஸ்ஸஸீ’’தி பக்காமி. ததோ பபு⁴தி நம் பேஸலா பி⁴க்கூ² ச²ட்³டே³ஸும்.

ஸோ து³ராசாரோ ஹுத்வா து³ராசாரபரிவுதோ விஹரந்தோ ஏகதி³வஸம் ‘‘உபோஸத²ம் ஓஸாரேஸ்ஸாமீ’’தி ஸீஹாஸனம் அபி⁴ருய்ஹ சித்ரபீ³ஜனிம் க³ஹேத்வா நிஸின்னோ ‘‘வத்ததி, ஆவுஸோ, ஏத்த² பி⁴க்கூ²னம் பாதிமோக்கோ²’’தி திக்க²த்தும் ஆஹ. அதே²கோ பி⁴க்கு²பி ‘‘மய்ஹம் வத்ததீ’’தி ந அவோச. ந ச தஸ்ஸ தேஸம் வா பாதிமோக்கோ² வத்ததி. ததோ ஸோ ‘‘பாதிமோக்கே² ஸுதேபி அஸுதேபி வினயோ நாம நத்தீ²’’தி ஆஸனா வுட்டா²ஸி. ஏவம் கஸ்ஸபஸ்ஸ ப⁴க³வதோ ஸாஸனம் ஓஸக்காபேஸி வினாஸேஸி. அத² ஸோத⁴னத்தே²ரோ தத³ஹேவ பரினிப்³பா³யி. ஸோபி கபிலோ ஏவம் தம் ஸாஸனம் ஓஸக்காபேத்வா காலகதோ அவீசிமஹானிரயே நிப்³ப³த்தி, ஸாபிஸ்ஸ மாதா ச ப⁴கி³னீ ச தஸ்ஸேவ தி³ட்டா²னுக³திம் ஆபஜ்ஜித்வா பேஸலே பி⁴க்கூ² அக்கோஸமானா பரிபா⁴ஸமானா காலம் கத்வா நிரயே நிப்³ப³த்திம்ஸு.

தஸ்மிம்யேவ ச காலே பஞ்சஸதா புரிஸா கா³மகா⁴தாதீ³னி கத்வா சோரிகாய ஜீவந்தா ஜனபத³மனுஸ்ஸேஹி அனுப³த்³தா⁴ பலாயமானா அரஞ்ஞம் பவிஸித்வா தத்த² கிஞ்சி க³ஹனம் வா படிஸரணம் வா அபஸ்ஸந்தா அவிதூ³ரே பாஸாணே வஸந்தம் அஞ்ஞதரம் ஆரஞ்ஞிகம் பி⁴க்கு²ம் தி³ஸ்வா வந்தி³த்வா ‘‘அம்ஹாகம், ப⁴ந்தே, படிஸரணம் ஹோதா²’’தி ப⁴ணிம்ஸு. தே²ரோ ‘‘தும்ஹாகம் ஸீலஸதி³ஸம் படிஸரணம் நத்தி², ஸப்³பே³ பஞ்ச ஸீலானி ஸமாதி³யதா²’’தி ஆஹ. தே ‘‘ஸாதூ⁴’’தி ஸம்படிச்சி²த்வா ஸீலானி ஸமாதி³யிம்ஸு. தே²ரோ ‘‘தும்ஹே ஸீலவந்தோ, இதா³னி அத்தனோ ஜீவிதம் வினாஸேந்தேஸுபி மா மனோ பதூ³ஸயித்தா²’’தி ஆஹ. தே ‘‘ஸாதூ⁴’’தி ஸம்படிச்சி²ம்ஸு. அத² தே ஜானபதா³ ஸம்பத்தா இதோ சிதோ ச மக்³க³மானா தே சோரே தி³ஸ்வா ஸப்³பே³வ ஜீவிதா வோரோபேஸும். தே காலம் கத்வா காமாவசரதே³வலோகே நிப்³ப³த்திம்ஸு. தேஸு ஜேட்ட²கசோரோ ஜேட்ட²கதே³வபுத்தோ அஹோஸி, இதரே தஸ்ஸேவ பரிவாரா.

தே அனுலோமபடிலோமம் ஸம்ஸரந்தா ஏகம் பு³த்³த⁴ந்தரம் தே³வலோகே கே²பேத்வா அம்ஹாகம் ப⁴க³வதோ காலே தே³வலோகதோ சவித்வா ஜேட்ட²கதே³வபுத்தோ ஸாவத்தி²த்³வாரே கேவட்டகா³மோ அத்தி², தத்த² பஞ்சஸதகுலஜேட்ட²ஸ்ஸ கேவட்டஸ்ஸ பஜாபதியா குச்சி²ம்ஹி படிஸந்தி⁴ம் அக்³க³ஹேஸி, இதரே அவஸேஸகேவட்டபஜாபதீனம். ஏவம் தேஸம் ஏகதி³வஸம்யேவ படிஸந்தி⁴க்³க³ஹணஞ்ச க³ப்³ப⁴வுட்டா²னஞ்ச அஹோஸி. அத² கேவட்டஜேட்டோ² ‘‘அத்தி² நு கோ² இமஸ்மிம் கா³மே அஞ்ஞேபி தா³ரகா அஜ்ஜ ஜாதா’’தி விசினந்தோ தே தா³ரகே தி³ஸ்வா ‘‘இமே மே புத்தஸ்ஸ ஸஹாயகா ப⁴விஸ்ஸந்தீ’’தி ஸப்³பே³ஸம் போஸாவனிகம் அதா³ஸி. தே ஸப்³பே³ ஸஹாயகா ஸஹபம்ஸும் கீளந்தா அனுபுப்³பே³ன வயப்பத்தா அஹேஸும். யஸோஜோ தேஸம் அக்³கோ³ அஹோஸி.

கபிலோபி ததா³ நிரயே பக்காவஸேஸேன அசிரவதியா ஸுவண்ணவண்ணோ து³க்³க³ந்த⁴முகோ² மச்சோ² ஹுத்வா நிப்³ப³த்தி. அதே²கதி³வஸம் ஸப்³பே³பி கேவட்டதா³ரகா ஜாலானி க³ஹேத்வா ‘‘மச்சே² ப³ந்தி⁴ஸ்ஸாமா’’தி நதி³ம் க³ந்த்வா ஜாலானி பக்கி²பிம்ஸு. தேஸம் ஜாலம் ஸோ மச்சோ² பாவிஸி. தம் தி³ஸ்வா ஸப்³போ³ கேவட்டகா³மோ உச்சாஸத்³த³மஹாஸத்³தோ³ அஹோஸி – ‘‘அம்ஹாகம் புத்தா பட²மம் மச்சே² ப³ந்த⁴ந்தா ஸுவண்ணமச்ச²ம் ப³ந்தி⁴ம்ஸு, வுட்³டி⁴ நேஸம் தா³ரகானம், இதா³னி ச நோ ராஜா பஹூதம் த⁴னம் த³ஸ்ஸதீ’’தி. அத² தே பஞ்சஸதாபி தா³ரகஸஹாயகா மச்ச²ம் நாவாய பக்கி²பித்வா நாவம் உக்கி²பித்வா ரஞ்ஞோ ஸந்திகம் அக³மம்ஸு. ராஜா தி³ஸ்வா ‘‘கிம் ஏதம் ப⁴ணே’’தி ஆஹ. ‘‘மச்சோ² தே³வா’’தி. ராஜா ஸுவண்ணவண்ணம் மச்ச²ம் தி³ஸ்வா ‘‘ப⁴க³வா ஏதஸ்ஸ வண்ணகாரணம் ஜானிஸ்ஸதீ’’தி மச்ச²ம் கா³ஹாபேத்வா ப⁴க³வதோ ஸந்திகம் அக³மாஸி. மச்ச²ஸ்ஸ முக²விவரணகாலே ஜேதவனம் அதிவிய து³க்³க³ந்த⁴ம் ஹோதி.

ராஜா ப⁴க³வந்தம் புச்சி² – ‘‘கஸ்மா, ப⁴ந்தே, மச்சோ² ஸுவண்ணவண்ணோ ஜாதோ, கஸ்மா சஸ்ஸ முக²தோ து³க்³க³ந்தோ⁴ வாயதீ’’தி? அயம், மஹாராஜ, கஸ்ஸபஸ்ஸ ப⁴க³வதோ பாவசனே கபிலோ நாம பி⁴க்கு² அஹோஸி, ப³ஹுஸ்ஸுதோ ஆக³தாக³மோ. அத்தனோ வசனம் அக³ண்ஹந்தானம் பி⁴க்கூ²னம் அக்கோஸகபரிபா⁴ஸகோ. தஸ்ஸ ச ப⁴க³வதோ ஸாஸனவினாஸகோ. யம் ஸோ தஸ்ஸ ப⁴க³வதோ ஸாஸனம் வினாஸேஸி, தேன கம்மேன அவீசிமஹானிரயே நிப்³ப³த்தி, விபாகாவஸேஸேன ச இதா³னி மச்சோ² ஜாதோ. யம் தீ³க⁴ரத்தம் பு³த்³த⁴வசனம் வாசேஸி, பு³த்³த⁴ஸ்ஸ வண்ணம் கதே²ஸி, தஸ்ஸ நிஸ்ஸந்தே³ன ஈதி³ஸம் வண்ணம் படிலபி⁴. யம் பி⁴க்கூ²னம் அக்கோஸகபரிபா⁴ஸகோ அஹோஸி, தேனஸ்ஸ முக²தோ து³க்³க³ந்தோ⁴ வாயதி. ‘‘உல்லபாபேமி நம் மஹாராஜா’’தி? ‘‘ஆம ப⁴க³வா’’தி. அத² ப⁴க³வா மச்ச²ம் ஆலபி – ‘‘த்வம்ஸி கபிலோ’’தி? ‘‘ஆம ப⁴க³வா, அஹம் கபிலோ’’தி. ‘‘குதோ ஆக³தோஸீ’’தி? ‘‘அவீசிமஹானிரயதோ ப⁴க³வா’’தி. ‘‘ஸோத⁴னோ குஹிம் க³தோ’’தி? ‘‘பரினிப்³பு³தோ ப⁴க³வா’’தி. ‘‘ஸாத⁴னீ குஹிம் க³தா’’தி? ‘‘மஹானிரயே நிப்³ப³த்தா ப⁴க³வா’’தி. ‘‘தாபனா குஹிம் க³தா’’தி? ‘‘மஹானிரயே நிப்³ப³த்தா ப⁴க³வா’’தி. ‘‘இதா³னி த்வம் குஹிம் க³மிஸ்ஸஸீ’’தி? ‘‘மஹானிரயம் ப⁴க³வா’’தி. தாவதே³வ விப்படிஸாராபி⁴பூ⁴தோ நாவம் ஸீஸேன பஹரித்வா காலகதோ மஹானிரயே நிப்³ப³த்தி. மஹாஜனோ ஸம்விக்³கோ³ அஹோஸி லோமஹட்ட²ஜாதோ. அத² ப⁴க³வா தத்த² ஸம்பத்தக³ஹட்ட²பப்³ப³ஜிதபரிஸாய தங்க²ணானுரூபம் த⁴ம்மம் தே³ஸேந்தோ இமம் ஸுத்தமபா⁴ஸி.

277-8. தத்த² த⁴ம்மசரியந்தி காயஸுசரிதாதி³ த⁴ம்மசரியம். ப்³ரஹ்மசரியந்தி மக்³க³ப்³ரஹ்மசரியம். ஏததா³ஹு வஸுத்தமந்தி ஏதம் உப⁴யம்பி லோகியலோகுத்தரம் ஸுசரிதம் ஸக்³க³மோக்க²ஸுக²ஸம்பாபகத்தா வஸுத்தமந்தி ஆஹு அரியா. வஸுத்தமம் நாம உத்தமரதனம், அனுகா³மிகம் அத்தாதீ⁴னம் ராஜாதீ³னம் அஸாதா⁴ரணந்தி அதி⁴ப்பாயோ.

ஏத்தாவதா ‘‘க³ஹட்ட²ஸ்ஸ வா பப்³ப³ஜிதஸ்ஸ வா ஸம்மாபடிபத்தியேவ படிஸரண’’ந்தி த³ஸ்ஸேத்வா இதா³னி படிபத்திவிரஹிதாய பப்³ப³ஜ்ஜாய அஸாரகத்தத³ஸ்ஸனேன கபிலம் அஞ்ஞே ச ததா²ரூபே க³ரஹந்தோ ‘‘பப்³ப³ஜிதோபி சே ஹோதீ’’தி ஏவமாதி³மாஹ.

தத்ராயம் அத்த²வண்ணனா – யோ ஹி கோசி கி³ஹிப்³யஞ்ஜனானி அபனேத்வா ப⁴ண்டு³காஸாவாதி³க³ஹணமத்தம் உபஸங்கமனேன பப்³ப³ஜிதோபி சேஹோதி புப்³பே³ வுத்தத்த²ம் அகா³ரஸ்மா அனகா³ரியம், ஸோ சே முக²ரஜாதிகோ ஹோதி ப²ருஸவசனோ, நானப்பகாராய விஹேஸாய அபி⁴ரதத்தா விஹேஸாபி⁴ரதோ, ஹிரோத்தப்பாபா⁴வேன மக³ஸதி³ஸத்தா மகோ³, ஜீவிதம் தஸ்ஸ பாபியோ, தஸ்ஸ ஏவரூபஸ்ஸ ஜீவிதம் அதிபாபம் அதிஹீனம். கஸ்மா? யஸ்மா இமாய மிச்சா²படிபத்தியா ராகா³தி³மனேகப்பகாரம் ரஜம் வட்³டே⁴தி அத்தனோ.

279. ந கேவலஞ்ச இமினாவ காரணேனஸ்ஸ ஜீவிதம் பாபியோ, அபிச கோ² பன அயம் ஏவரூபோ முக²ரஜாதிகத்தா கலஹாபி⁴ரதோ பி⁴க்கு² ஸுபா⁴ஸிதஸ்ஸ அத்த²விஜானனஸம்மோஹனேன மோஹத⁴ம்மேன ஆவுதோ, ‘‘மா, ஆவுஸோ கபில, ஏவம் அவச, இமினாபி பரியாயேன தம் க³ண்ஹாஹீ’’தி ஏவமாதி³னா நயேன பேஸலேஹி பி⁴க்கூ²ஹி அக்கா²தம்பி ந ஜானாதி த⁴ம்மம் பு³த்³தே⁴ன தே³ஸிதம். யோ த⁴ம்மோ பு³த்³தே⁴ன தே³ஸிதோ, தம் நானப்பகாரேன அத்தனோ வுச்சமானம்பி ந ஜானாதி. ஏவம்பிஸ்ஸ ஜீவிதம் பாபியோ.

280. ததா² ஸோ ஏவரூபோ விஹேஸாபி⁴ரதத்தா விஹேஸம் பா⁴விதத்தானம் பா⁴விதத்தே கீ²ணாஸவபி⁴க்கூ² ஸோத⁴னத்தே²ரபபு⁴திகே ‘‘ந தும்ஹே வினயம் ஜானாத², ந ஸுத்தம் ந அபி⁴த⁴ம்மம், வுட்³ட⁴பப்³ப³ஜிதா’’திஆதி³னா நயேன விஹேஸந்தோ. உபயோக³ப்பவத்தியஞ்ஹி இத³ம் ஸாமிவசனம். அத² வா யதா²வுத்தேனேவ நயேன ‘‘விஹேஸம் பா⁴விதத்தானம் கரோந்தோ’’தி பாட²ஸேஸோ வேதி³தப்³போ³. ஏவம் நிப்பரியாயமேவ ஸாமிவசனம் ஸிஜ்ஜ²தி. அவிஜ்ஜாய புரக்க²தோதி பா⁴விதத்தவிஹேஸனே ஆதீ³னவத³ஸ்ஸனபடிச்சா²தி³காய அவிஜ்ஜாய புரக்க²தோ பேஸிதோ பயோஜிதோ ஸேஸபப்³ப³ஜிதானம் பா⁴விதத்தானம் விஹேஸபா⁴வேன பவத்தம் தி³ட்டே²வ த⁴ம்மே சித்தவிபா³த⁴னேன ஸங்கிலேஸம், ஆயதிஞ்ச நிரயஸம்பாபனேன மக்³க³ம் நிரயகா³மினம் ந ஜானாதி.

281. அஜானந்தோ ச தேன மக்³கே³ன சதுப்³பி³தா⁴பாயபே⁴த³ம் வினிபாதம் ஸமாபன்னோ. தத்த² ச வினிபாதே க³ப்³பா⁴ க³ப்³ப⁴ம் தமா தமம் ஏகேகனிகாயே ஸதக்க²த்தும் ஸஹஸ்ஸக்க²த்தும்பி மாதுகுச்சி²தோ மாதுகுச்சி²ம் சந்தி³மஸூரியேஹிபி அவித்³த⁴ம்ஸனீயா அஸுரகாயதமா தமஞ்ச ஸமாபன்னோ. ஸ வே தாதி³ஸகோ பி⁴க்கு² பேச்ச இதோ பரலோகம் க³ந்த்வா அயம் கபிலமச்சோ² விய நானப்பகாரம் து³க்க²ம் நிக³ச்ச²தி.

282. கிம் காரணா? கூ³த²கூபோ யதா² அஸ்ஸ, ஸம்புண்ணோ க³ணவஸ்ஸிகோ,யதா² வச்சகுடிகூ³த²கூபோ க³ணவஸ்ஸிகோ அனேகவஸ்ஸிகோ ப³ஹூனி வஸ்ஸானி முக²தோ கூ³தே²ன பூரியமானோ ஸம்புண்ணோ அஸ்ஸ, ஸோ உத³ககும்ப⁴ஸதேஹி உத³ககும்ப⁴ஸஹஸ்ஸேஹி தோ⁴வியமானோபி து³க்³க³ந்த⁴து³ப்³ப³ண்ணியானபக³மா து³ப்³பி³ஸோதோ⁴ ஹோதி, ஏவமேவ யோ ஏவரூபோ அஸ்ஸ தீ³க⁴ரத்தம் ஸம்கிலிட்ட²கம்மந்தோ கூ³த²கூபோ விய கூ³தே²ன பாபேன ஸம்புண்ணத்தா ஸம்புண்ணோ புக்³க³லோ, ஸோ து³ப்³பி³ஸோதோ⁴ ஹி ஸாங்க³ணோ, சிரகாலம் தஸ்ஸ அங்க³ணஸ்ஸ விபாகம் பச்சனுபோ⁴ந்தோபி ந ஸுஜ்ஜ²தி. தஸ்மா வஸ்ஸக³ணனாய அபரிமாணம்பி காலம் ஸ வே தாதி³ஸகோ பி⁴க்கு² பேச்ச து³க்க²ம் நிக³ச்ச²தீதி. அத² வா அயம் இமிஸ்ஸா கா³தா²ய ஸம்ப³ந்தோ⁴ – யம் வுத்தம் ‘‘ஸ வே தாதி³ஸகோ பி⁴க்கு², பேச்ச து³க்க²ம் நிக³ச்ச²தீ’’தி, தத்ர ஸியா தும்ஹாகம் ‘‘ஸக்கா பனாயம் ததா² காதும், யதா² பேச்ச து³க்க²ம் ந நிக³ச்சே²ய்யா’’தி. ந ஸக்கா. கஸ்மா? யஸ்மா கூ³த²கூபோ…பே… ஸாங்க³ணோதி.

283-4. யதோ படிகச்சேவ யம் ஏவரூபம் ஜானாத², பி⁴க்க²வோ கே³ஹனிஸ்ஸிதம், யம் ஏவரூபம் பஞ்சகாமகு³ணனிஸ்ஸிதம் ஜானேய்யாத² அபூ⁴தகு³ணபத்த²னாகாரப்பவத்தாய பாபிகாய இச்சா²ய ஸமன்னாக³தத்தா பாபிச்ச²ம், காமவிதக்காதீ³ஹி ஸமன்னாக³தத்தா பாபஸங்கப்பம், காயிகவீதிக்கமாதி³னா வேளுதா³னாதி³பே⁴தே³ன ச பாபாசாரேன ஸமன்னாக³தத்தா பாபாசாரம், வேஸியாதி³பாபகோ³சரதோ பாபகோ³சரம், ஸப்³பே³ ஸமக்³கா³ ஹுத்வான அபி⁴னிப்³ப³ஜ்ஜியாத² நம். தத்த² அபி⁴னிப்³ப³ஜ்ஜியாதா²தி விவஜ்ஜேய்யாத² மா ப⁴ஜேய்யாத², மா சஸ்ஸ அபி⁴னிப்³ப³ஜ்ஜனமத்தேனேவ அப்போஸ்ஸுக்கதம் ஆபஜ்ஜேய்யாத², அபிச கோ² பன காரண்ட³வம் நித்³த⁴மத², கஸம்பு³ம் அபகஸ்ஸத², தம் கசவரபூ⁴தம் புக்³க³லம் கசவரமிவ அனபேக்கா² நித்³த⁴மத², கஸடபூ⁴தஞ்ச நம் க²த்தியாதீ³னம் மஜ்ஜே² பவிட்ட²ம் பபி⁴ன்னபக்³க⁴ரிதகுட்ட²ம் சண்டா³லம் விய அபகஸ்ஸத², ஹத்தே² வா ஸீஸே வா க³ஹேத்வா நிக்கட்³ட⁴த². ஸேய்யதா²பி ஆயஸ்மா மஹாமோக்³க³ல்லானோ தம் புக்³க³லம் பாபத⁴ம்மம் பா³ஹாய க³ஹேத்வா ப³ஹித்³வாரகோட்ட²கா நிக்கா²மேத்வா ஸூசிக⁴டிகம் அதா³ஸி, ஏவம் அபகஸ்ஸதா²தி த³ஸ்ஸேதி. கிம் காரணா? ஸங்கா⁴ராமோ நாம ஸீலவந்தானம் கதோ, ந து³ஸ்ஸீலானம்.

285-6. யதோ ஏததே³வ ததோ பலாபே வாஹேத², அஸ்ஸமணே ஸமணமானினே, யதா² ஹி பலாபா அந்தோ தண்டு³லரஹிதாபி ப³ஹி து²ஸேஹி வீஹீ விய தி³ஸ்ஸந்தி, ஏவம் பாபபி⁴க்கூ² அந்தோ ஸீலாதி³விரஹிதாபி ப³ஹி காஸாவாதி³பரிக்கா²ரேன பி⁴க்கூ² விய தி³ஸ்ஸந்தி. தஸ்மா ‘‘பலாபா’’தி வுச்சந்தி. தே பலாபே வாஹேத², ஓபுனாத², வித⁴மத² பரமத்த²தோ அஸ்ஸமணே வேஸமத்தேன ஸமணமானினே. ஏவம் நித்³த⁴மித்வான…பே… பதிஸ்ஸதா. தத்த² கப்பயவ்ஹோதி கப்பேத², கரோதா²தி வுத்தம் ஹோதி. பதிஸ்ஸதாதி அஞ்ஞமஞ்ஞம் ஸகா³ரவா ஸப்பதிஸ்ஸா. ததோ ஸமக்³கா³ நிபகா, து³க்க²ஸ்ஸந்தம் கரிஸ்ஸதா²தி அதே²வம் தும்ஹே ஸுத்³தா⁴ ஸுத்³தே⁴ஹி ஸம்வாஸம் கப்பேந்தா, தி³ட்டி²ஸீலஸாமஞ்ஞதாய ஸமக்³கா³, அனுபுப்³பே³ன பரிபாகக³தாய பஞ்ஞாய நிபகா, ஸப்³ப³ஸ்ஸேவிமஸ்ஸ வட்டது³க்கா²தி³னோ து³க்க²ஸ்ஸ அந்தம் கரிஸ்ஸதா²தி அரஹத்தனிகூடேனேவ தே³ஸனம் நிட்ட²பேஸி.

தே³ஸனாபரியோஸானே தே பஞ்சஸதா கேவட்டபுத்தா ஸம்வேக³மாபஜ்ஜித்வா து³க்க²ஸ்ஸந்தகிரியம் பத்த²யமானா ப⁴க³வதோ ஸந்திகே பப்³ப³ஜித்வா நசிரஸ்ஸேவ து³க்க²ஸ்ஸந்தம் கத்வா ப⁴க³வதா ஸத்³தி⁴ம் ஆனேஞ்ஜவிஹாரஸமாபத்தித⁴ம்மபரிபோ⁴கே³ன ஏகபரிபோ⁴கா³ அஹேஸும். ஸா ச நேஸம் ஏவம் ப⁴க³வதா ஸத்³தி⁴ம் ஏகபரிபோ⁴க³தா உதா³னே வுத்தயஸோஜஸுத்தவஸேனேவ வேதி³தப்³பா³தி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய கபிலஸுத்தவண்ணனா நிட்டி²தா.