2. சூளவக்³கோ³

1. ரதனஸுத்தவண்ணனா

யானீத⁴ பூ⁴தானீதி ரதனஸுத்தம். கா உப்பத்தி? அதீதே கிர வேஸாலியம் து³ப்³பி⁴க்கா²த³யோ உபத்³த³வா உப்பஜ்ஜிம்ஸு. தேஸம் வூபஸமனத்தா²ய லிச்ச²வயோ ராஜக³ஹம் க³ந்த்வா, யாசித்வா, ப⁴க³வந்தம் வேஸாலிமானயிம்ஸு. ஏவம் ஆனீதோ ப⁴க³வா தேஸம் உபத்³த³வானம் வூபஸமனத்தா²ய இத³ம் ஸுத்தமபா⁴ஸி. அயமேத்த² ஸங்கே²போ. போராணா பனஸ்ஸ வேஸாலிவத்து²தோ பபு⁴தி உப்பத்திம் வண்ணயந்தி. ஸா ஏவம் வேதி³தப்³பா³ – பா³ராணஸிரஞ்ஞோ கிர அக்³க³மஹேஸியா குச்சி²ம்ஹி க³ப்³போ⁴ ஸண்டா²ஸி. ஸா தம் ஞத்வா ரஞ்ஞோ நிவேதே³ஸி. ராஜா க³ப்³ப⁴பரிஹாரம் அதா³ஸி. ஸா ஸம்மா பரிஹரியமானக³ப்³பா⁴ க³ப்³ப⁴பரிபாககாலே விஜாயனக⁴ரம் பாவிஸி. புஞ்ஞவதீனம் பச்சூஸஸமயே க³ப்³ப⁴வுட்டா²னம் ஹோதி, ஸா ச தாஸம் அஞ்ஞதரா, தேன பச்சூஸஸமயே அலத்தகபடலப³ந்து⁴ஜீவகபுப்ப²ஸதி³ஸம் மம்ஸபேஸிம் விஜாயி. ததோ ‘‘அஞ்ஞா தே³வியோ ஸுவண்ணபி³ம்ப³ஸதி³ஸே புத்தே விஜாயந்தி, அக்³க³மஹேஸீ மம்ஸபேஸிந்தி ரஞ்ஞோ புரதோ மம அவண்ணோ உப்பஜ்ஜேய்யா’’தி சிந்தேத்வா தேன அவண்ணப⁴யேன தம் மம்ஸபேஸிம் ஏகஸ்மிம் பா⁴ஜனே பக்கி²பித்வா அஞ்ஞேன படிகுஜ்ஜித்வா ராஜமுத்³தி³காய லஞ்சே²த்வா க³ங்கா³ய ஸோதே பக்கி²பாபேஸி. மனுஸ்ஸேஹி ச²ட்³டி³தமத்தே தே³வதா ஆரக்க²ம் ஸம்வித³ஹிம்ஸு. ஸுவண்ணபட்டிகஞ்சேத்த² ஜாதிஹிங்கு³லகேன ‘‘பா³ராணஸிரஞ்ஞோ அக்³க³மஹேஸியா பஜா’’தி லிகி²த்வா ப³ந்தி⁴ம்ஸு. ததோ தம் பா⁴ஜனம் ஊமிப⁴யாதீ³ஹி அனுபத்³து³தம் க³ங்கா³ய ஸோதேன பாயாஸி.

தேன ச ஸமயேன அஞ்ஞதரோ தாபஸோ கோ³பாலகுலம் நிஸ்ஸாய க³ங்கா³ய தீரே வஸதி. ஸோ பாதோவக³ங்க³ம் ஓதிண்ணோ தம் பா⁴ஜனம் ஆக³ச்ச²ந்தம் தி³ஸ்வா பம்ஸுகூலஸஞ்ஞாய அக்³க³ஹேஸி. ததோ தத்த² தம் அக்க²ரபட்டிகம் ராஜமுத்³தி³காலஞ்ச²னஞ்ச தி³ஸ்வா முஞ்சித்வா தம் மம்ஸபேஸிம் அத்³த³ஸ. தி³ஸ்வானஸ்ஸ ஏதத³ஹோஸி – ‘‘ஸியா க³ப்³போ⁴, ததா² ஹிஸ்ஸ து³க்³க³ந்த⁴பூதிபா⁴வோ நத்தீ²’’தி தம் அஸ்ஸமம் நேத்வா ஸுத்³தே⁴ ஓகாஸே ட²பேஸி. அத² அட்³ட⁴மாஸச்சயேன த்³வே மம்ஸபேஸியோ அஹேஸும். தாபஸோ தி³ஸ்வா ஸாது⁴கதரம் ட²பேஸி. ததோ புன அத்³த⁴மாஸச்சயேன ஏகமேகிஸ்ஸா பேஸியா ஹத்த²பாத³ஸீஸானமத்தா²ய பஞ்ச பஞ்ச பிளகா உட்ட²ஹிம்ஸு. அத² ததோ அத்³த⁴மாஸச்சயேன ஏகா மம்ஸபேஸி ஸுவண்ணபி³ம்ப³ஸதி³ஸோ தா³ரகோ; ஏகா தா³ரிகா அஹோஸி. தேஸு தாபஸஸ்ஸ புத்தஸினேஹோ உப்பஜ்ஜி, அங்கு³ட்ட²தோ சஸ்ஸ கீ²ரம் நிப்³ப³த்தி, ததோ பபு⁴தி ச கீ²ரப⁴த்தம் லப⁴தி. ஸோ ப⁴த்தம் பு⁴ஞ்ஜித்வா கீ²ரம் தா³ரகானம் முகே² ஆஸிஞ்சதி. தேஸம் யம் யம் உத³ரம் பவிஸதி, தம் ஸப்³ப³ம் மணிபா⁴ஜனக³தம் விய தி³ஸ்ஸதி. ஏவம் நிச்ச²வீ அஹேஸும். அபரே பன ஆஹு – ‘‘ஸிப்³பி³த்வா ட²பிதா விய நேஸம் அஞ்ஞமஞ்ஞம் லீனா ச²வி அஹோஸீ’’தி. ஏவம் தே நிச்ச²விதாய வா லீனச்ச²விதாய வா லிச்ச²வீதி பஞ்ஞாயிம்ஸு.

தாபஸோ தா³ரகே போஸேந்தோ உஸ்ஸூரே கா³மம் பிண்டா³ய பவிஸதி, அதிதி³வா படிக்கமதி. தஸ்ஸ தம் ப்³யாபாரம் ஞத்வா கோ³பாலகா ஆஹம்ஸு – ‘‘ப⁴ந்தே, பப்³ப³ஜிதானம் தா³ரகபோஸனம் பலிபோ³தோ⁴, அம்ஹாகம் தா³ரகே தே³த², மயம் போஸேஸ்ஸாம, தும்ஹே அத்தனோ கம்மம் கரோதா²’’தி. தாபஸோ ‘‘ஸாதூ⁴’’தி படிஸ்ஸுணி. கோ³பாலகா து³தியதி³வஸே மக்³க³ம் ஸமம் கத்வா, புப்பே²ஹி ஓகிரித்வா; த⁴ஜபடாகா உஸ்ஸாபேத்வா தூரியேஹி வஜ்ஜமானேஹி அஸ்ஸமம் ஆக³தா. தாபஸோ ‘‘மஹாபுஞ்ஞா தா³ரகா, அப்பமாதே³ன வட்³டே⁴த², வட்³டே⁴த்வா ச அஞ்ஞமஞ்ஞம் ஆவாஹவிவாஹம் கரோத², பஞ்சகோ³ரஸேன ராஜானம் தோஸேத்வா பூ⁴மிபா⁴க³ம் க³ஹேத்வா நக³ரம் மாபேத², தத்ர குமாரம் அபி⁴ஸிஞ்சதா²’’தி வத்வா தா³ரகே அதா³ஸி. தே ‘‘ஸாதூ⁴’’தி படிஸ்ஸுணித்வா தா³ரகே நேத்வா போஸேஸும்.

தா³ரகா வட்³டி⁴மன்வாய கீளந்தா விவாத³ட்டா²னேஸு அஞ்ஞே கோ³பாலதா³ரகே ஹத்தே²னபி பாதே³னபி பஹரந்தி, தே ரோத³ந்தி. ‘‘கிஸ்ஸ ரோத³தா²’’தி ச மாதாபிதூஹி வுத்தா ‘‘இமே நிம்மாதாபிதிகா தாபஸபோஸிதா அம்ஹே அதீவ பஹரந்தீ’’தி வத³ந்தி. ததோ தேஸம் மாதாபிதரோ ‘‘இமே தா³ரகா அஞ்ஞே தா³ரகே விஹேடே²ந்தி து³க்கா²பேந்தி, ந இமே ஸங்க³ஹேதப்³பா³, வஜ்ஜேதப்³பா³ இமே’’தி ஆஹம்ஸு. ததோ பபு⁴தி கிர ஸோ பதே³ஸோ ‘‘வஜ்ஜீ’’தி வுச்சதி யோஜனஸதம் பரிமாணேன. அத² தம் பதே³ஸம் கோ³பாலகா ராஜானம் தோஸேத்வா அக்³க³ஹேஸும். தத்தே²வ நக³ரம் மாபேத்வா ஸோளஸவஸ்ஸுத்³தே³ஸிகம் குமாரம் அபி⁴ஸிஞ்சித்வா ராஜானம் அகம்ஸு. தாய சஸ்ஸ தா³ரிகாய ஸத்³தி⁴ம் வாரேய்யம் கத்வா கதிகம் அகம்ஸு – ‘‘ந பா³ஹிரதோ தா³ரிகா ஆனேதப்³பா³, இதோ தா³ரிகா ந கஸ்ஸசி தா³தப்³பா³’’தி. தேஸம் பட²மஸம்வாஸேன த்³வே தா³ரகா ஜாதா தீ⁴தா ச புத்தோ ச, ஏவம் ஸோளஸக்க²த்தும் த்³வே த்³வே ஜாதா. ததோ தேஸம் தா³ரகானம் யதா²க்கமம் வட்³ட⁴ந்தானம் ஆராமுய்யானனிவாஸனட்டா²னபரிவாரஸம்பத்திம் க³ஹேதும் அப்பஹோந்தம் தம் நக³ரம் திக்க²த்தும் கா³வுதந்தரேன கா³வுதந்தரேன பாகாரேன பரிக்கி²பிம்ஸு. தஸ்ஸ புனப்புனம் விஸாலீகதத்தா வேஸாலீத்வேவ நாமம் ஜாதம். இத³ம் வேஸாலீவத்து².

அயம் பன வேஸாலீ ப⁴க³வதோ உப்பன்னகாலே இத்³தா⁴ வேபுல்லப்பத்தா அஹோஸி. தத்த² ஹி ராஜூனம்யேவ ஸத்த ஸஹஸ்ஸானி ஸத்த ச ஸதானி ஸத்த ச ராஜானோ அஹேஸும், ததா² யுவராஜஸேனாபதிப⁴ண்டா³கா³ரிகப்பபு⁴தீனம். யதா²ஹ –

‘‘தேன கோ² பன ஸமயேன வேஸாலீ இத்³தா⁴ சேவ ஹோதி பீ²தா ச ப³ஹுஜனா ஆகிண்ணமனுஸ்ஸா ஸுபி⁴க்கா² ச, ஸத்த ச பாஸாத³ஸஹஸ்ஸானி, ஸத்த ச பாஸாத³ஸதானி, ஸத்த ச பாஸாதா³, ஸத்த ச கூடாகா³ரஸஹஸ்ஸானி, ஸத்த ச கூடாகா³ரஸதானி, ஸத்த ச கூடாகா³ரானி, ஸத்த ச ஆராமஸஹஸ்ஸானி, ஸத்த ச ஆராமஸதானி, ஸத்த ச ஆராமா, ஸத்த ச போக்க²ரணிஸஹஸ்ஸானி, ஸத்த ச போக்க²ரணிஸதானி, ஸத்த ச போக்க²ரணியோ’’தி (மஹாவ. 326).

ஸா அபரேன ஸமயேன து³ப்³பி⁴க்கா² அஹோஸி து³ப்³பு³ட்டி²கா து³ஸ்ஸஸ்ஸா. பட²மம் து³க்³க³தமனுஸ்ஸா மரந்தி, தே ப³ஹித்³தா⁴ ச²ட்³டே³ந்தி. மதமனுஸ்ஸானம் குணபக³ந்தே⁴ன அமனுஸ்ஸா நக³ரம் பவிஸிம்ஸு. ததோ ப³ஹுதரா மீயந்தி, தாய படிகூலதாய ச ஸத்தானம் அஹிவாதகரோகோ³ உப்பஜ்ஜி. இதி தீஹி து³ப்³பி⁴க்க²அமனுஸ்ஸரோக³ப⁴யேஹி உபத்³து³தாய வேஸாலியா நக³ரவாஸினோ உபஸங்கமித்வா ராஜானமாஹம்ஸு – ‘‘மஹாராஜ, இமஸ்மிம் நக³ரே திவித⁴ம் ப⁴யமுப்பன்னம், இதோ புப்³பே³ யாவ ஸத்தமா ராஜகுலபரிவட்டா ஏவரூபம் அனுப்பன்னபுப்³ப³ம், தும்ஹாகம் மஞ்ஞே அத⁴ம்மிகத்தேன ஏதரஹி உப்பன்ன’’ந்தி. ராஜா ஸப்³பே³ ஸந்தா²கா³ரே ஸன்னிபாதாபேத்வா, ‘‘மய்ஹம் அத⁴ம்மிகபா⁴வம் விசினதா²’’தி ஆஹ. தே ஸப்³ப³ம் பவேணிம் விசினந்தா ந கிஞ்சி அத்³த³ஸம்ஸு.

ததோ ரஞ்ஞோ தோ³ஸம் அதி³ஸ்வா ‘‘இத³ம் ப⁴யம் அம்ஹாகம் கத²ம் வூபஸமேய்யா’’தி சிந்தேஸும். தத்த² ஏகச்சே ச² ஸத்தா²ரோ அபதி³ஸிம்ஸு – ‘‘ஏதேஹி ஓக்கந்தமத்தே வூபஸமிஸ்ஸதீ’’தி. ஏகச்சே ஆஹம்ஸு – ‘‘பு³த்³தோ⁴ கிர லோகே உப்பன்னோ, ஸோ ப⁴க³வா ஸப்³ப³ஸத்தஹிதாய த⁴ம்மம் தே³ஸேதி மஹித்³தி⁴கோ மஹானுபா⁴வோ, தேன ஓக்கந்தமத்தே ஸப்³ப³ப⁴யானி வூபஸமேய்யு’’ந்தி. தேன தே அத்தமனா ஹுத்வா ‘‘கஹம் பன ஸோ ப⁴க³வா ஏதரஹி விஹரதி, அம்ஹேஹி வா பேஸிதே ஆக³ச்சே²ய்யா’’தி ஆஹம்ஸு. அதா²பரே ஆஹம்ஸு – ‘‘பு³த்³தா⁴ நாம அனுகம்பகா, கிஸ்ஸ நாக³ச்சே²ய்யும், ஸோ பன ப⁴க³வா ஏதரஹி ராஜக³ஹே விஹரதி, ராஜா ச பி³ம்பி³ஸாரோ தம் உபட்ட²ஹதி, கதா³சி ஸோ ஆக³ந்தும் ந த³தே³ய்யா’’தி. ‘‘தேன ஹி ராஜானம் ஸஞ்ஞாபேத்வா ஆனேஸ்ஸாமா’’தி த்³வே லிச்ச²விராஜானோ மஹதா ப³லகாயேன பஹூதம் பண்ணாகாரம் த³த்வா ரஞ்ஞோ ஸந்திகம் பேஸேஸும் – ‘‘பி³ம்பி³ஸாரம் ஸஞ்ஞாபேத்வா ப⁴க³வந்தம் ஆனேதா²’’தி. தே க³ந்த்வா ரஞ்ஞோ பண்ணாகாரம் த³த்வா தம் பவத்திம் நிவேதே³த்வா ‘‘மஹாராஜ, ப⁴க³வந்தம் அம்ஹாகம் நக³ரம் பேஸேஹீ’’தி ஆஹம்ஸு. ராஜா ந ஸம்படிச்சி² – ‘‘தும்ஹே ஏவ ஜானாதா²’’தி ஆஹ. தே ப⁴க³வந்தம் உபஸங்கமித்வா வந்தி³த்வா ஏவமாஹம்ஸு – ‘‘ப⁴ந்தே, அம்ஹாகம் நக³ரே தீணி ப⁴யானி உப்பன்னானி. ஸசே ப⁴க³வா ஆக³ச்சே²ய்ய, ஸோத்தி² நோ ப⁴வேய்யா’’தி. ப⁴க³வா ஆவஜ்ஜேத்வா ‘‘வேஸாலியம் ரதனஸுத்தே வுத்தே ஸா ரக்கா² கோடிஸதஸஹஸ்ஸசக்கவாளானி ப²ரிஸ்ஸதி, ஸுத்தபரியோஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ ப⁴விஸ்ஸதீ’’தி அதி⁴வாஸேஸி. அத² ராஜா பி³ம்பி³ஸாரோ ப⁴க³வதோ அதி⁴வாஸனம் ஸுத்வா ‘‘ப⁴க³வதா வேஸாலிக³மனம் அதி⁴வாஸித’’ந்தி நக³ரே கோ⁴ஸனம் காராபேத்வா ப⁴க³வந்தம் உபஸங்கமித்வா ஆஹ – ‘‘கிம், ப⁴ந்தே, ஸம்படிச்சி²த்த² வேஸாலிக³மன’’ந்தி? ‘‘ஆம, மஹாராஜா’’தி. ‘‘தேன ஹி, ப⁴ந்தே, ஆக³மேத², யாவ மக்³க³ம் படியாதே³மீ’’தி.

அத² கோ² ராஜா பி³ம்பி³ஸாரோ ராஜக³ஹஸ்ஸ ச க³ங்கா³ய ச அந்தரா பஞ்சயோஜனம் பூ⁴மிம் ஸமம் கத்வா, யோஜனே யோஜனே விஹாரம் மாபேத்வா, ப⁴க³வதோ க³மனகாலம் படிவேதே³ஸி. ப⁴க³வா பஞ்சஹி பி⁴க்கு²ஸதேஹி பரிவுதோ பாயாஸி. ராஜா பஞ்சயோஜனம் மக்³க³ம் பஞ்சவண்ணேஹி புப்பே²ஹி ஜாணுமத்தம் ஓகிராபேத்வா த⁴ஜபடாகாபுண்ணக⁴டகத³லிஆதீ³னி உஸ்ஸாபேத்வா ப⁴க³வதோ த்³வே ஸேதச்ச²த்தானி, ஏகேகஸ்ஸ ச பி⁴க்கு²ஸ்ஸ ஏகமேகம் உக்கி²பாபேத்வா ஸத்³தி⁴ம் அத்தனோ பரிவாரேன புப்ப²க³ந்தா⁴தீ³ஹி பூஜம் கரோந்தோ ஏகேகஸ்மிம் விஹாரே ப⁴க³வந்தம் வஸாபேத்வா மஹாதா³னானி த³த்வா பஞ்சஹி தி³வஸேஹி க³ங்கா³தீரம் நேஸி. தத்த² ஸப்³பா³லங்காரேஹி நாவம் அலங்கரோந்தோ வேஸாலிகானம் ஸாஸனம் பேஸேஸி – ‘‘ஆக³தோ ப⁴க³வா, மக்³க³ம் படியாதே³த்வா ஸப்³பே³ ப⁴க³வதோ பச்சுக்³க³மனம் கரோதா²’’தி. தே ‘‘தி³கு³ணம் பூஜம் கரிஸ்ஸாமா’’தி வேஸாலியா ச க³ங்கா³ய ச அந்தரா தியோஜனம் பூ⁴மிம் ஸமம் கத்வா ப⁴க³வதோ சத்தாரி, ஏகேகஸ்ஸ ச பி⁴க்கு²னோ த்³வே த்³வே ஸேதச்ச²த்தானி ஸஜ்ஜேத்வா பூஜம் குருமானா க³ங்கா³தீரே ஆக³ந்த்வா அட்ட²ம்ஸு.

பி³ம்பி³ஸாரோ த்³வே நாவாயோ ஸங்கா⁴டேத்வா, மண்ட³பம் கத்வா, புப்ப²தா³மாதீ³ஹி அலங்கரித்வா தத்த² ஸப்³ப³ரதனமயம் பு³த்³தா⁴ஸனம் பஞ்ஞாபேஸி. ப⁴க³வா தஸ்மிம் நிஸீதி³. பஞ்சஸதா பி⁴க்கூ²பி நாவம் அபி⁴ருஹித்வா யதா²னுரூபம் நிஸீதி³ம்ஸு. ராஜா ப⁴க³வந்தம் அனுக³ச்ச²ந்தோ க³லப்பமாணம் உத³கம் ஓரோஹித்வா ‘‘யாவ, ப⁴ந்தே, ப⁴க³வா ஆக³ச்ச²தி, தாவாஹம் இதே⁴வ க³ங்கா³தீரே வஸிஸ்ஸாமீ’’தி வத்வா நிவத்தோ. உபரி தே³வதா யாவ அகனிட்ட²ப⁴வனா பூஜமகம்ஸு, ஹேட்டா² க³ங்கா³னிவாஸினோ கம்ப³லஸ்ஸதராத³யோ நாகா³ பூஜமகம்ஸு. ஏவம் மஹதியா பூஜாய ப⁴க³வா யோஜனமத்தம் அத்³தா⁴னம் க³ங்கா³ய க³ந்த்வா வேஸாலிகானம் ஸீமந்தரம் பவிட்டோ².

ததோ லிச்ச²விராஜானோ தேன பி³ம்பி³ஸாரேன கதபூஜாய தி³கு³ணம் கரோந்தா க³லப்பமாணே உத³கே ப⁴க³வந்தம் பச்சுக்³க³ச்சி²ம்ஸு. தேனேவ க²ணேன தேன முஹுத்தேன விஜ்ஜுப்பபா⁴வினத்³த⁴ந்த⁴காரவிஸடகூடோ க³ளக³ளாயந்தோ சதூஸு தி³ஸாஸு மஹாமேகோ⁴ வுட்டா²ஸி. அத² ப⁴க³வதா பட²மபாதே³ க³ங்கா³தீரே நிக்கி²த்தமத்தே போக்க²ரவஸ்ஸம் வஸ்ஸி. யே தேமேதுகாமா, தே ஏவ தேமேந்தி, அதேமேதுகாமா ந தேமேந்தி. ஸப்³ப³த்த² ஜாணுமத்தம் ஊருமத்தம் கடிமத்தம் க³லப்பமாணம் உத³கம் வஹதி, ஸப்³ப³குணபானி உத³கேன க³ங்க³ம் பவேஸிதானி பரிஸுத்³தோ⁴ பூ⁴மிபா⁴கோ³ அஹோஸி.

லிச்ச²விராஜானோ ப⁴க³வந்தம் அந்தரா யோஜனே யோஜனே வாஸாபேத்வா மஹாதா³னானி த³த்வா தீஹி தி³வஸேஹி தி³கு³ணம் பூஜம் கரோந்தா வேஸாலிம் நயிம்ஸு. வேஸாலிம் ஸம்பத்தே ப⁴க³வதி ஸக்கோ தே³வானமிந்தோ³ தே³வஸங்க⁴புரக்க²தோ ஆக³ச்சி², மஹேஸக்கா²னம் தே³வானம் ஸன்னிபாதேன அமனுஸ்ஸா யேபு⁴ய்யேன பலாயிம்ஸு. ப⁴க³வா நக³ரத்³வாரே ட²த்வா ஆனந்த³த்தே²ரம் ஆமந்தேஸி – ‘‘இமம் ஆனந்த³, ரதனஸுத்தம் உக்³க³ஹேத்வா ப³லிகம்மூபகரணானி க³ஹேத்வா லிச்ச²விகுமாரேஹி ஸத்³தி⁴ம் வேஸாலியா தீஸு பாகாரந்தரேஸு விசரந்தோ பரித்தம் கரோஹீ’’தி ரதனஸுத்தம் அபா⁴ஸி. ஏவம் ‘‘கேன பனேதம் ஸுத்தம், கதா³, கத்த², கஸ்மா ச வுத்த’’ந்தி ஏதேஸம் பஞ்ஹானம் விஸ்ஸஜ்ஜனா வித்தா²ரேன வேஸாலிவத்து²தோ பபு⁴தி போராணேஹி வண்ணியதி.

ஏவம் ப⁴க³வதோ வேஸாலிம் அனுப்பத்ததி³வஸேயேவ வேஸாலினக³ரத்³வாரே தேஸம் உபத்³த³வானம் படிகா⁴தத்தா²ய வுத்தமித³ம் ரதனஸுத்தம் உக்³க³ஹேத்வா ஆயஸ்மா ஆனந்தோ³ பரித்தத்தா²ய பா⁴ஸமானோ ப⁴க³வதோ பத்தேன உத³கம் ஆதா³ய ஸப்³ப³னக³ரம் அப்³பு⁴க்கிரந்தோ அனுவிசரி. ‘‘யம் கிஞ்சீ’’தி வுத்தமத்தேயேவ ச தே²ரேன யே புப்³பே³ அபலாதா ஸங்காரகூடபி⁴த்திப்பதே³ஸாதி³னிஸ்ஸிதா அமனுஸ்ஸா, தே சதூஹி த்³வாரேஹி பலாயிம்ஸு, த்³வாரானி அனோகாஸானி அஹேஸும். ததோ ஏகச்சே த்³வாரேஸு ஓகாஸம் அலப⁴மானா பாகாரம் பி⁴ந்தி³த்வா பலாதா. அமனுஸ்ஸேஸு க³தமத்தேஸு மனுஸ்ஸானம் க³த்தேஸு ரோகோ³ வூபஸந்தோ, தே நிக்க²மித்வா ஸப்³ப³க³ந்த⁴புப்பா²தீ³ஹி தே²ரம் பூஜேஸும். மஹாஜனோ நக³ரமஜ்ஜே² ஸந்தா²கா³ரம் ஸப்³ப³க³ந்தே⁴ஹி லிம்பித்வா விதானம் கத்வா ஸப்³பா³லங்காரேஹி அலங்கரித்வா தத்த² பு³த்³தா⁴ஸனம் பஞ்ஞாபேத்வா ப⁴க³வந்தம் ஆனேஸி.

ப⁴க³வா ஸந்தா²கா³ரம் பவிஸித்வா பஞ்ஞத்தே ஆஸனே நிஸீதி³. பி⁴க்கு²ஸங்கோ⁴பி கோ² ராஜானோ மனுஸ்ஸா ச பதிரூபே ஓகாஸே நிஸீதி³ம்ஸு. ஸக்கோபி தே³வானமிந்தோ³ த்³வீஸு தே³வலோகேஸு தே³வபரிஸாய ஸத்³தி⁴ம் உபனிஸீதி³ அஞ்ஞே ச தே³வா. ஆனந்த³த்தே²ரோபி ஸப்³ப³ம் வேஸாலிம் அனுவிசரந்தோ ஆரக்க²ம் கத்வா வேஸாலினக³ரவாஸீஹி ஸத்³தி⁴ம் ஆக³ந்த்வா ஏகமந்தம் நிஸீதி³. தத்த² ப⁴க³வா ஸப்³பே³ஸம் ததே³வ ரதனஸுத்தம் அபா⁴ஸீதி.

224. தத்த² யானீத⁴ பூ⁴தானீதி பட²மகா³தா²யம் யானீதி யாதி³ஸானி அப்பேஸக்கா²னி வா மஹேஸக்கா²னி வா. இதா⁴தி இமஸ்மிம் பதே³ஸே, தஸ்மிம் க²ணே ஸன்னிபதிதட்டா²னம் ஸந்தா⁴யாஹ. பூ⁴தானீதி கிஞ்சாபி பூ⁴தஸத்³தோ³ ‘‘பூ⁴தஸ்மிம் பாசித்திய’’ந்தி ஏவமாதீ³ஸு (பாசி. 69) விஜ்ஜமானே, ‘‘பூ⁴தமித³ந்தி, பி⁴க்க²வே, ஸமனுபஸ்ஸதா²’’தி ஏவமாதீ³ஸு (ம. நி. 1.401) க²ந்த⁴பஞ்சகே, ‘‘சத்தாரோ கோ², பி⁴க்கு², மஹாபூ⁴தா ஹேதூ’’தி ஏவமாதீ³ஸு (ம. நி. 3.86) சதுப்³பி³தே⁴ பத²வீதா⁴த்வாதி³ரூபே, ‘‘யோ ச காலக⁴ஸோ பூ⁴தோ’’தி ஏவமாதீ³ஸு (ஜா. 1.2.190) கீ²ணாஸவே, ‘‘ஸப்³பே³வ நிக்கி²பிஸ்ஸந்தி, பூ⁴தா லோகே ஸமுஸ்ஸய’’ந்தி ஏவமாதீ³ஸு (தீ³. நி. 2.220) ஸப்³ப³ஸத்தே, ‘‘பூ⁴தகா³மபாதப்³யதாயா’’தி ஏவமாதீ³ஸு (பாசி. 90) ருக்கா²தி³கே, ‘‘பூ⁴தம் பூ⁴ததோ ஸஞ்ஜானாதீ’’தி ஏவமாதீ³ஸு (ம. நி. 1.3) சாதுமஹாராஜிகானம் ஹேட்டா² ஸத்தனிகாயம் உபாதா³ய வத்ததி. இத⁴ பன அவிஸேஸதோ அமனுஸ்ஸேஸு த³ட்ட²ப்³போ³.

ஸமாக³தானீதி ஸன்னிபதிதானி. பு⁴ம்மானீதி பூ⁴மியம் நிப்³ப³த்தானி. வாதி விகப்பனே. தேன யானீத⁴ பு⁴ம்மானி வா பூ⁴தானி ஸமாக³தானீதி இமமேகம் விகப்பம் கத்வா புன து³தியம் விகப்பம் காதும் ‘‘யானி வா அந்தலிக்கே²’’தி ஆஹ. அந்தலிக்கே² வா யானி பூ⁴தானி நிப்³ப³த்தானி, தானி ஸப்³பா³னி இத⁴ ஸமாக³தானீதி அத்தோ². ஏத்த² ச யாமதோ யாவ அகனிட்ட²ம், தாவ நிப்³ப³த்தானி பூ⁴தானி ஆகாஸே பாதுபூ⁴தவிமானேஸு நிப்³ப³த்தத்தா ‘‘அந்தலிக்கே² பூ⁴தானீ’’தி வேதி³தப்³பா³னி. ததோ ஹேட்டா² ஸினேருதோ பபு⁴தி யாவ பூ⁴மியம் ருக்க²லதாதீ³ஸு அதி⁴வத்தா²னி பத²வியஞ்ச நிப்³ப³த்தானி பூ⁴தானி, தானி ஸப்³பா³னி பூ⁴மியம் பூ⁴மிபடிப³த்³தே⁴ஸு ச ருக்க²லதாபப்³ப³தாதீ³ஸு நிப்³ப³த்தத்தா ‘‘பு⁴ம்மானி பூ⁴தானீ’’தி வேதி³தப்³பா³னி.

ஏவம் ப⁴க³வா ஸப்³பா³னேவ அமனுஸ்ஸபூ⁴தானி ‘‘பு⁴ம்மானி வா யானி வ அந்தலிக்கே²’’தி த்³வீஹி பதே³ஹி விகப்பேத்வா புன ஏகேன பதே³ன பரிக்³க³ஹேத்வா ‘‘ஸப்³பே³வ பூ⁴தா ஸுமனா ப⁴வந்தூ’’தி ஆஹ. ஸப்³பே³தி அனவஸேஸா. ஏவாதி அவதா⁴ரணே, ஏகம்பி அனபனேத்வாதி அதி⁴ப்பாயோ. பூ⁴தாதி அமனுஸ்ஸா. ஸுமனா ப⁴வந்தூதி ஸுகி²தமனா, பீதிஸோமனஸ்ஸஜாதா ப⁴வந்தூதி அத்தோ². அதோ²பீதி கிச்சந்தரஸன்னியோஜனத்த²ம் வாக்யோபாதா³னே நிபாதத்³வயம். ஸக்கச்ச ஸுணந்து பா⁴ஸிதந்தி அட்டி²ம் கத்வா, மனஸி கத்வா, ஸப்³ப³சேதஸோ ஸமன்னாஹரித்வா தி³ப்³ப³ஸம்பத்திலோகுத்தரஸுகா²வஹம் மம தே³ஸனம் ஸுணந்து.

ஏவமேத்த² ப⁴க³வா ‘‘யானீத⁴ பூ⁴தானி ஸமாக³தானீ’’தி அனியமிதவசனேன பூ⁴தானி பரிக்³க³ஹேத்வா புன ‘‘பு⁴ம்மானி வா யானி வ அந்தலிக்கே²’’தி த்³விதா⁴ விகப்பேத்வா ததோ ‘‘ஸப்³பே³வ பூ⁴தா’’தி புன ஏகஜ்ஜ²ம் கத்வா ‘‘ஸுமனா ப⁴வந்தூ’’தி இமினா வசனேன ஆஸயஸம்பத்தியம் நியோஜேந்தோ ‘‘ஸக்கச்ச ஸுணந்து பா⁴ஸித’’ந்தி பயோக³ஸம்பத்தியம், ததா² யோனிஸோமனஸிகாரஸம்பத்தியம் பரதோகோ⁴ஸஸம்பத்தியஞ்ச, ததா² அத்தஸம்மாபணிதி⁴ஸப்புரிஸூபனிஸ்ஸயஸம்பத்தீஸு ஸமாதி⁴பஞ்ஞாஹேதுஸம்பத்தீஸு ச நியோஜேந்தோ கா³த²ம் ஸமாபேஸி.

225. தஸ்மா ஹி பூ⁴தாதி து³தியகா³தா². தத்த² தஸ்மாதி காரணவசனம். பூ⁴தாதி ஆமந்தனவசனம். நிஸாமேதா²தி ஸுணாத². ஸப்³பே³தி அனவஸேஸா. கிம் வுத்தம் ஹோதி? யஸ்மா தும்ஹே தி³ப்³ப³ட்டா²னானி தத்த² உபபோ⁴க³ஸம்பத³ஞ்ச பஹாய த⁴ம்மஸ்ஸவனத்த²ம் இத⁴ ஸமாக³தா, ந நடனச்சனாதி³த³ஸ்ஸனத்த²ம், தஸ்மா ஹி பூ⁴தா நிஸாமேத² ஸப்³பே³தி. அத² வா ‘‘ஸுமனா ப⁴வந்து ஸக்கச்ச ஸுணந்தூ’’தி வசனேன தேஸம் ஸுமனபா⁴வம் ஸக்கச்சம் ஸோதுகம்யதஞ்ச தி³ஸ்வா ஆஹ – யஸ்மா தும்ஹே ஸுமனபா⁴வேன அத்தஸம்மாபணிதி⁴யோனிஸோமனஸிகாராஸயஸுத்³தீ⁴ஹி ஸக்கச்சம் ஸோதுகம்யதாய ஸப்புரிஸூபனிஸ்ஸயபரதோகோ⁴ஸபத³ட்டா²னதோ பயோக³ஸுத்³தீ⁴ஹி ச யுத்தா, தஸ்மா ஹி பூ⁴தா நிஸாமேத² ஸப்³பே³தி. அத² வா யம் புரிமகா³தா²ய அந்தே ‘‘பா⁴ஸித’’ந்தி வுத்தம், தம் காரணபா⁴வேன அபதி³ஸந்தோ ஆஹ – ‘‘யஸ்மா மம பா⁴ஸிதம் நாம அதிது³ல்லப⁴ம் அட்ட²க்க²ணபரிவஜ்ஜிதஸ்ஸ க²ணஸ்ஸ து³ல்லப⁴த்தா, அனேகானிஸம்ஸஞ்ச பஞ்ஞாகருணாகு³ணேன பவத்தத்தா, தஞ்சாஹம் வத்துகாமோ ‘ஸுணந்து பா⁴ஸித’ந்தி அவோசம். தஸ்மா ஹி பூ⁴தா நிஸாமேத² ஸப்³பே³’’தி இத³ம் இமினா கா³தா²பதே³ன வுத்தம் ஹோதி.

ஏவமேதம் காரணம் நிரோபேந்தோ அத்தனோ பா⁴ஸிதனிஸாமனே நியோஜேத்வா நிஸாமேதப்³ப³ம் வத்துமாரத்³தோ⁴ ‘‘மேத்தம் கரோத² மானுஸியா பஜாயா’’தி. தஸ்ஸத்தோ² – யாயம் தீஹி உபத்³த³வேஹி உபத்³து³தா மானுஸீ பஜா, தஸ்ஸா மானுஸியா பஜாய மித்தபா⁴வம் ஹிதஜ்ஜா²ஸயதம் பச்சுபட்டா²பேதா²தி. கேசி பன ‘‘மானுஸியம் பஜ’’ந்தி பட²ந்தி, தம் பு⁴ம்மத்தா²ஸம்ப⁴வா ந யுஜ்ஜதி. யம்பி சஞ்ஞே அத்த²ம் வண்ணயந்தி, ஸோபி ந யுஜ்ஜதி. அதி⁴ப்பாயோ பனேத்த² – நாஹம் பு³த்³தோ⁴தி இஸ்ஸரியப³லேன வதா³மி, அபிச பன தும்ஹாகஞ்ச இமிஸ்ஸா ச மானுஸியா பஜாய ஹிதத்த²ம் வதா³மி – ‘‘மேத்தம் கரோத² மானுஸியா பஜாயா’’தி. ஏத்த² ச –

‘‘யே ஸத்தஸண்ட³ம் பத²விம் விஜேத்வா, ராஜிஸயோ யஜமானா அனுபரியகா³;

அஸ்ஸமேத⁴ம் புரிஸமேத⁴ம், ஸம்மாபாஸம் வாஜபேய்யம் நிரக்³க³ளம்.

‘‘மேத்தஸ்ஸ சித்தஸ்ஸ ஸுபா⁴விதஸ்ஸ, கலம்பி தே நானுப⁴வந்தி ஸோளஸிம்.

‘‘ஏகம்பி சே பாணமது³ட்ட²சித்தோ, மேத்தாயதி குஸலீ தேன ஹோதி;

ஸப்³பே³ ச பாணே மனஸானுகம்பீ, பஹூதமரியோ பகரோதி புஞ்ஞ’’ந்தி. (அ. நி. 8.1) –

ஏவமாதீ³னம் ஸுத்தானம் ஏகாத³ஸானிஸம்ஸானஞ்ச வஸேன யே மேத்தம் கரோந்தி, தேஸம் மேத்தா ஹிதாதி வேதி³தப்³பா³.

‘‘தே³வதானுகம்பிதோ போஸோ, ஸதா³ ப⁴த்³ரானி பஸ்ஸதீ’’தி. (தீ³. நி. 2.153; உதா³. 76; மஹாவ. 286) –

ஏவமாதீ³னம் வஸேன யேஸு கரீயதி, தேஸம்பி ஹிதாதி வேதி³தப்³பா³.

ஏவம் உப⁴யேஸம்பி ஹிதபா⁴வம் த³ஸ்ஸேந்தோ ‘‘மேத்தம் கரோத² மானுஸியா பஜாயா’’தி வத்வா இதா³னி உபகாரம்பி த³ஸ்ஸேந்தோ ஆஹ ‘‘தி³வா ச ரத்தோ ச ஹரந்தி யே ப³லிம், தஸ்மா ஹி நே ரக்க²த² அப்பமத்தா’’தி. தஸ்ஸத்தோ² – யே மனுஸ்ஸா சித்தகம்மகட்ட²கம்மாதீ³ஹிபி தே³வதா கத்வா சேதியருக்கா²தீ³னி ச உபஸங்கமித்வா தே³வதா உத்³தி³ஸ்ஸ தி³வா ப³லிம் கரோந்தி, காளபக்கா²தீ³ஸு ச ரத்திம் ப³லிம் கரோந்தி. ஸலாகப⁴த்தாதீ³னி வா த³த்வா ஆரக்க²தே³வதா உபாதா³ய யாவ ப்³ரஹ்மதே³வதானம் பத்திதா³னனிய்யாதனேன தி³வா ப³லிம் கரோந்தி, ச²த்தாரோபனதீ³பமாலா ஸப்³ப³ரத்திகத⁴ம்மஸ்ஸவனாதீ³னி காராபேத்வா பத்திதா³னனிய்யாதனேன ச ரத்திம் ப³லிம் கரோந்தி, தே கத²ம் ந ரக்கி²தப்³பா³. யதோ ஏவம் தி³வா ச ரத்தோ ச தும்ஹே உத்³தி³ஸ்ஸ கரோந்தி யே ப³லிம், தஸ்மா ஹி நே ரக்க²த². தஸ்மா ப³லிகம்மகாரணாபி தே மனுஸ்ஸே ரக்க²த² கோ³பயத², அஹிதம் தேஸம் அபனேத², ஹிதம் உபனேத² அப்பமத்தா ஹுத்வா தம் கதஞ்ஞுபா⁴வம் ஹத³யே கத்வா நிச்சமனுஸ்ஸரந்தாதி.

226. ஏவம் தே³வதாஸு மனுஸ்ஸானம் உபகாரகபா⁴வம் த³ஸ்ஸேத்வா தேஸம் உபத்³த³வவூபஸமனத்த²ம் பு³த்³தா⁴தி³கு³ணப்பகாஸனேன ச தே³வமனுஸ்ஸானம் த⁴ம்மஸ்ஸவனத்த²ம் ‘‘யம்கிஞ்சி வித்த’’ந்திஆதி³னா நயேன ஸச்சவசனம் பயுஜ்ஜிதுமாரத்³தோ⁴. தத்த² யம்கிஞ்சீதி அனியமிதவஸேன அனவஸேஸம் பரியாதி³யதி யம்கிஞ்சி தத்த² தத்த² வோஹாரூபக³ம். வித்தந்தி த⁴னம். தஞ்ஹி வித்திம் ஜனேதீதி வித்தம். இத⁴ வாதி மனுஸ்ஸலோகம் நித்³தி³ஸதி, ஹுரம் வாதி ததோ பரம் அவஸேஸலோகம். தேன ச ட²பேத்வா மனுஸ்ஸே ஸப்³ப³லோகக்³க³ஹணே பத்தே ‘‘ஸக்³கே³ஸு வா’’தி பரதோ வுத்தத்தா ட²பேத்வா மனுஸ்ஸே ச ஸக்³கே³ ச அவஸேஸானம் நாக³ஸுபண்ணாதீ³னம் க³ஹணம் வேதி³தப்³ப³ம். ஏவம் இமேஹி த்³வீஹி பதே³ஹி யம் மனுஸ்ஸானம் வோஹாரூபக³ம் அலங்காரபரிபோ⁴கூ³பக³ஞ்ச ஜாதரூபரஜதமுத்தாமணிவேளுரியபவாளலோஹிதங்கமஸாரக³ல்லாதி³கம், யஞ்ச முத்தாமணிவாலுகத்த²தாய பூ⁴மியா ரதனமயவிமானேஸு அனேகயோஜனஸதவித்த²தேஸு ப⁴வனேஸு உப்பன்னானம் நாக³ஸுபண்ணாதீ³னம் வித்தம், தம் நித்³தி³ட்ட²ம் ஹோதி.

ஸக்³கே³ஸு வாதி காமாவசரரூபாவசரதே³வலோகேஸு. தே ஹி ஸோப⁴னேன கம்மேன அஜீயந்தி க³ம்மந்தீதி ஸக்³கா³, ஸுட்டு² வா அக்³கா³திபி ஸக்³கா³. யந்தி யம் ஸஸ்ஸாமிகம் வா அஸ்ஸாமிகம் வா. ரதனந்தி ரதிம் நயதி, வஹதி, ஜனயதி, வட்³டே⁴தீதி ரதனம், யம்கிஞ்சி சித்தீகதம் மஹக்³க⁴ம் அதுலம் து³ல்லப⁴த³ஸ்ஸனம் அனோமஸத்தபரிபோ⁴க³ஞ்ச, தஸ்ஸேதம் அதி⁴வசனம். யதா²ஹ –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ரதனம் தேன வுச்சதீ’’தி.

பணீதந்தி உத்தமம், ஸேட்ட²ம், அதப்பகம். ஏவம் இமினா கா³தா²பதே³ன யம் ஸக்³கே³ஸு அனேகயோஜனஸதப்பமாணஸப்³ப³ரதனமயவிமானேஸு ஸுத⁴ம்மவேஜயந்தப்பபு⁴தீஸு ஸஸ்ஸாமிகம், யஞ்ச பு³த்³து⁴ப்பாத³விரஹேன அபாயமேவ பரிபூரேந்தேஸு ஸத்தேஸு ஸுஞ்ஞவிமானபடிப³த்³த⁴ம் அஸ்ஸாமிகம், யம் வா பனஞ்ஞம்பி பத²வீமஹாஸமுத்³த³ஹிமவந்தாதி³னிஸ்ஸிதம் அஸ்ஸாமிகம் ரதனம், தம் நித்³தி³ட்ட²ம் ஹோதி.

ந நோ ஸமம் அத்தி² ததா²க³தேனாதி ந-இதி படிஸேதே⁴, நோ-இதி அவதா⁴ரணே. ஸமந்தி துல்யம். அத்தீ²தி விஜ்ஜதி. ததா²க³தேனாதி பு³த்³தே⁴ன. கிம் வுத்தம் ஹோதி? யம் ஏதம் வித்தஞ்ச ரதனஞ்ச பகாஸிதம், ஏத்த² ஏகம்பி பு³த்³த⁴ரதனேன ஸதி³ஸம் ரதனம் நேவத்தி². யம்பி ஹி தம் சித்தீகதட்டே²ன ரதனம், ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம் மணிரதனஞ்ச, யம்ஹி உப்பன்னே மஹாஜனோ ந அஞ்ஞத்த² சித்தீகாரம் கரோதி, ந கோசி புப்ப²க³ந்தா⁴தீ³னி க³ஹேத்வா யக்க²ட்டா²னம் வா பூ⁴தட்டா²னம் வா க³ச்ச²தி, ஸப்³போ³பி ஜனோ சக்கரதனமணிரதனமேவ சித்திம் கரோதி பூஜேதி, தம் தம் வரம் பத்தே²தி, பத்தி²தபத்தி²தஞ்சஸ்ஸ ஏகச்சம் ஸமிஜ்ஜ²தி, தம்பி ரதனம் பு³த்³த⁴ரதனேன ஸமம் நத்தி². யதி³ ஹி சித்தீகதட்டே²ன ரதனம், ததா²க³தோவ ரதனம். ததா²க³தே ஹி உப்பன்னே யே கேசி மஹேஸக்கா² தே³வமனுஸ்ஸா, ந தே அஞ்ஞத்ர சித்தீகாரம் கரோந்தி, ந கஞ்சி அஞ்ஞம் பூஜேந்தி. ததா² ஹி ப்³ரஹ்மா ஸஹம்பதி ஸினேருமத்தேன ரதனதா³மேன ததா²க³தம் பூஜேஸி, யதா²ப³லஞ்ச அஞ்ஞே தே³வா மனுஸ்ஸா ச பி³ம்பி³ஸாரகோஸலராஜஅனாத²பிண்டி³காத³யோ. பரினிப்³பு³தம்பி ச ப⁴க³வந்தம் உத்³தி³ஸ்ஸ ச²ன்னவுதிகோடித⁴னம் விஸ்ஸஜ்ஜேத்வா அஸோகமஹாராஜா ஸகலஜம்பு³தீ³பே சதுராஸீதி விஹாரஸஹஸ்ஸானி பதிட்டா²பேஸி, கோ பன வாதோ³ அஞ்ஞேஸம் சித்தீகாரானம். அபிச கஸ்ஸஞ்ஞஸ்ஸ பரினிப்³பு³தஸ்ஸாபி ஜாதிபோ³தி⁴த⁴ம்மசக்கப்பவத்தனபரினிப்³பா³னட்டா²னானி படிமாசேதியாதீ³னி வா உத்³தி³ஸ்ஸ ஏவம் சித்தீகாரக³ருகாரோ வத்ததி யதா² ப⁴க³வதோ. ஏவம் சித்தீகதட்டே²னாபி ததா²க³தஸமம் ரதனம் நத்தி².

ததா² யம்பி தம் மஹக்³க⁴ட்டே²ன ரதனம், ஸேய்யதி²த³ம் – காஸிகம் வத்த²ம். யதா²ஹ – ‘‘ஜிண்ணம்பி, பி⁴க்க²வே, காஸிகம் வத்த²ம் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்சா’’தி, தம்பி பு³த்³த⁴ரதனேன ஸமம் நத்தி². யதி³ ஹி மஹக்³க⁴ட்டே²ன ரதனம், ததா²க³தோவ ரதனம். ததா²க³தோ ஹி யேஸம் பம்ஸுகம்பி படிக்³க³ண்ஹாதி, தேஸம் தம் மஹப்ப²லம் ஹோதி மஹானிஸம்ஸம், ஸேய்யதா²பி அஸோகஸ்ஸ ரஞ்ஞோ. இத³மஸ்ஸ மஹக்³க⁴தாய. ஏவம் மஹக்³க⁴தாவசனே சேத்த² தோ³ஸாபா⁴வஸாத⁴கம் இத³ம் தாவ ஸுத்தபத³ம் வேதி³தப்³ப³ம் –

‘‘யேஸம் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரம், தேஸம் தம் மஹப்ப²லம் ஹோதி மஹானிஸம்ஸம். இத³மஸ்ஸ மஹக்³க⁴தாய வதா³மி. ஸேய்யதா²பி தம், பி⁴க்க²வே, காஸிகம் வத்த²ம் மஹக்³க⁴ம், ததூ²பமாஹம், பி⁴க்க²வே, இமம் புக்³க³லம் வதா³மீ’’தி (அ. நி. 3.100).

ஏவம் மஹக்³க⁴ட்டே²னாபி ததா²க³தஸமம் ரதனம் நத்தி².

ததா² யம்பி தம் அதுலட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம் உப்பஜ்ஜதி இந்த³னீலமணிமயனாபி⁴ ஸத்தரதனமயஸஹஸ்ஸாரம் பவாளமயனேமி, ரத்தஸுவண்ணமயஸந்தி⁴, யஸ்ஸ த³ஸன்னம் த³ஸன்னம் அரானம் உபரி ஏகம் முண்டா³ரம் ஹோதி வாதம் க³ஹேத்வா ஸத்³த³கரணத்த²ம், யேன கதோ ஸத்³தோ³ ஸுகுஸலப்பதாளிதபஞ்சங்கி³கதூரியஸத்³தோ³ விய ஹோதி. யஸ்ஸ நாபி⁴யா உபோ⁴ஸு பஸ்ஸேஸு த்³வே ஸீஹமுகா²னி ஹோந்தி, அப்³ப⁴ந்தரம் ஸகடசக்கஸ்ஸேவ ஸுஸிரம், தஸ்ஸ கத்தா வா காரேதா வா நத்தி², கம்மபச்சயேன உதுதோ ஸமுட்டா²தி. யம் ராஜா த³ஸவித⁴ம் சக்கவத்திவத்தம் பூரேத்வா தத³ஹுபோஸதே² பன்னரஸே புண்ணமதி³வஸே ஸீஸம்ன்ஹாதோ உபோஸதி²கோ உபரிபாஸாத³வரக³தோ ஸீலானி ஸோதே⁴ந்தோ நிஸின்னோ புண்ணசந்த³ம் விய ஸூரியம் விய ச உட்டே²ந்தம் பஸ்ஸதி, யஸ்ஸ த்³வாத³ஸயோஜனதோ ஸத்³தோ³ ஸுய்யதி, யோஜனதோ வண்ணோ தி³ஸ்ஸதி, யம் மஹாஜனேன ‘‘து³தியோ மஞ்ஞே சந்தோ³ ஸூரியோ வா உட்டி²தோ’’தி அதிவிய கோதூஹலஜாதேன தி³ஸ்ஸமானம் நக³ரஸ்ஸ உபரி ஆக³ந்த்வா ரஞ்ஞோ அந்தேபுரஸ்ஸ பாசீனபஸ்ஸே நாதிஉச்சம் நாதினீசம் ஹுத்வா மஹாஜனஸ்ஸ க³ந்த⁴புப்பா²தீ³ஹி பூஜேதும் யுத்தட்டா²னே அக்கா²ஹதம் விய திட்ட²தி.

ததே³வ அனுப³ந்த⁴மானம் ஹத்தி²ரதனம் உப்பஜ்ஜதி, ஸப்³ப³ஸேதோ ரத்தபாதோ³ ஸத்தப்பதிட்டோ² இத்³தி⁴மா வேஹாஸங்க³மோ உபோஸத²குலா வா ச²த்³த³ந்தகுலா வா ஆக³ச்ச²தி. உபோஸத²குலா ஆக³ச்ச²ந்தோ ஹி ஸப்³ப³ஜேட்டோ² ஆக³ச்ச²தி, ச²த்³த³ந்தகுலா ஸப்³ப³கனிட்டோ² ஸிக்கி²தஸிக்கோ² த³மதூ²பேதோ. ஸோ த்³வாத³ஸயோஜனம் பரிஸம் க³ஹேத்வா ஸகலஜம்பு³தீ³பம் அனுஸம்யாயித்வா புரேபாதராஸமேவ ஸகம் ராஜதா⁴னிம் ஆக³ச்ச²தி.

தம்பி அனுப³ந்த⁴மானம் அஸ்ஸரதனம் உப்பஜ்ஜதி, ஸப்³ப³ஸேதோ ரத்தபாதோ³ காகஸீஸோ முஞ்ஜகேஸோ வலாஹகஸ்ஸ ராஜகுலா ஆக³ச்ச²தி. ஸேஸமேத்த² ஹத்தி²ரதனஸதி³ஸமேவ.

தம்பி அனுப³ந்த⁴மானம் மணிரதனம் உப்பஜ்ஜதி. ஸோ ஹோதி மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ ஆயாமதோ சக்கனாபி⁴ஸதி³ஸோ, வேபுல்லபப்³ப³தா ஆக³ச்ச²தி, ஸோ சதுரங்க³ஸமன்னாக³தேபி அந்த⁴காரே ரஞ்ஞோ த⁴ஜக்³க³தோ யோஜனம் ஓபா⁴ஸேதி, யஸ்ஸோபா⁴ஸேன மனுஸ்ஸா ‘‘தி³வா’’தி மஞ்ஞமானா கம்மந்தே பயோஜேந்தி, அந்தமஸோ குந்த²கிபில்லிகம் உபாதா³ய பஸ்ஸந்தி.

தம்பி அனுப³ந்த⁴மானம் இத்தி²ரதனம் உப்பஜ்ஜதி. பகதிஅக்³க³மஹேஸீ வா ஹோதி, உத்தரகுருதோ வா ஆக³ச்ச²தி மத்³த³ராஜகுலதோ வா, அதிதீ³கா⁴தி³ச²தோ³ஸவிவஜ்ஜிதா அதிக்கந்தா மானுஸம் வண்ணம் அப்பத்தா தி³ப்³ப³ம் வண்ணம், யஸ்ஸா ரஞ்ஞோ ஸீதகாலே உண்ஹானி க³த்தானி ஹோந்தி, உண்ஹகாலே ஸீதானி, ஸததா⁴ போ²டிததூலபிசுனோ விய ஸம்ப²ஸ்ஸோ ஹோதி, காயதோ சந்த³னக³ந்தோ⁴ வாயதி, முக²தோ உப்பலக³ந்தோ⁴, புப்³பு³ட்டா²யிதாதி³அனேககு³ணஸமன்னாக³தா ச ஹோதி.

தம்பி அனுப³ந்த⁴மானம் க³ஹபதிரதனம் உப்பஜ்ஜதி ரஞ்ஞோ பகதிகம்மகரோ ஸேட்டி², யஸ்ஸ சக்கரதனே உப்பன்னமத்தே தி³ப்³ப³ம் சக்கு² பாதுப⁴வதி, யேன ஸமந்ததோ யோஜனமத்தே நிதி⁴ம் பஸ்ஸதி ஸஸ்ஸாமிகம்பி அஸ்ஸாமிகம்பி. ஸோ ராஜானம் உபஸங்கமித்வா பவாரேதி ‘‘அப்போஸ்ஸுக்கோ த்வம், தே³வ, ஹோஹி, அஹம் தே த⁴னேன த⁴னகரணீயம் கரிஸ்ஸாமீ’’தி.

தம்பி அனுப³ந்த⁴மானம் பரிணாயகரதனம் உப்பஜ்ஜதி ரஞ்ஞோ பகதிஜேட்ட²புத்தோ, சக்கரதனே உப்பன்னமத்தே அதிரேகபஞ்ஞாவேய்யத்தியேன ஸமன்னாக³தோ ஹோதி, த்³வாத³ஸயோஜனாய பரிஸாய சேதஸா சித்தம் பரிஜானித்வா நிக்³க³ஹபக்³க³ஹஸமத்தோ² ஹோதி. ஸோ ராஜானம் உபஸங்கமித்வா பவாரேதி – ‘‘அப்போஸ்ஸுக்கோ த்வம், தே³வ, ஹோஹி, அஹம் தே ரஜ்ஜம் அனுஸாஸிஸ்ஸாமீ’’தி. யம் வா பனஞ்ஞம்பி ஏவரூபம் அதுலட்டே²ன ரதனம், யஸ்ஸ ந ஸக்கா துலயித்வா தீரயித்வா அக்³கோ⁴ காதும் ‘‘ஸதம் வா ஸஹஸ்ஸம் வா அக்³க⁴தி கோடிம் வா’’தி. தத்த² ஏகரதனம்பி பு³த்³த⁴ரதனேன ஸமம் நத்தி². யதி³ ஹி அதுலட்டே²ன ரதனம், ததா²க³தோவ ரதனம். ததா²க³தோ ஹி ந ஸக்கா ஸீலதோ வா ஸமாதி⁴தோ வா பஞ்ஞாதீ³னம் வா அஞ்ஞதரதோ கேனசி துலயித்வா தீரயித்வா ‘‘ஏத்தககு³ணோ வா இமினா ஸமோ வா ஸப்படிபா⁴கோ³ வா’’தி பரிச்சி²ந்தி³தும். ஏவம் அதுலட்டே²னாபி ததா²க³தஸமம் ரதனம் நத்தி².

ததா² யம்பி தம் து³ல்லப⁴த³ஸ்ஸனட்டே²ன ரதனம். ஸேய்யதி²த³ம் – து³ல்லப⁴பாதுபா⁴வோ ராஜா சக்கவத்தி சக்காதீ³னி ச தஸ்ஸ ரதனானி, தம்பி பு³த்³த⁴ரதனேன ஸமம் நத்தி². யதி³ ஹி து³ல்லப⁴த³ஸ்ஸனட்டே²ன ரதனம், ததா²க³தோவ ரதனம், குதோ சக்கவத்திஆதீ³னம் ரதனத்தம், யானி ஏகஸ்மிம்யேவ கப்பே அனேகானி உப்பஜ்ஜந்தி. யஸ்மா பன அஸங்க்²யேய்யேபி கப்பே ததா²க³தஸுஞ்ஞோ லோகோ ஹோதி, தஸ்மா ததா²க³தோ ஏவ கதா³சி கரஹசி உப்பஜ்ஜனதோ து³ல்லப⁴த³ஸ்ஸனோ. வுத்தம் சேதம் ப⁴க³வதா பரினிப்³பா³னஸமயே –

‘‘தே³வதா, ஆனந்த³, உஜ்ஜா²யந்தி – ‘தூ³ரா ச வதம்ஹ ஆக³தா ததா²க³தம் த³ஸ்ஸனாய, கதா³சி கரஹசி ததா²க³தா லோகே உப்பஜ்ஜந்தி அரஹந்தோ ஸம்மாஸம்பு³த்³தா⁴, அஜ்ஜேவ ரத்தியா பச்சி²மே யாமே ததா²க³தஸ்ஸ பரினிப்³பா³னம் ப⁴விஸ்ஸதி, அயஞ்ச மஹேஸக்கோ² பி⁴க்கு² ப⁴க³வதோ புரதோ டி²தோ ஓவாரேந்தோ, ந மயம் லபா⁴ம பச்சி²மே காலே ததா²க³தம் த³ஸ்ஸனாயா’’’தி (தீ³. நி. 2.200).

ஏவம் து³ல்லப⁴த³ஸ்ஸனட்டே²னபி ததா²க³தஸமம் ரதனம் நத்தி².

ததா² யம்பி தம் அனோமஸத்தபரிபோ⁴க³ட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனாதி³. தஞ்ஹி கோடிஸதஸஹஸ்ஸத⁴னானம்பி ஸத்தபூ⁴மிகபாஸாத³வரதலே வஸந்தானம்பி சண்டா³லவேனனேஸாத³ரத²காரபுக்குஸாதீ³னம் நீசகுலிகானம் ஓமகபுரிஸானம் ஸுபினந்தேபி பரிபோ⁴க³த்தா²ய ந நிப்³ப³த்ததி. உப⁴தோ ஸுஜாதஸ்ஸ பன ரஞ்ஞோ க²த்தியஸ்ஸேவ பரிபூரிதத³ஸவித⁴சக்கவத்திவத்தஸ்ஸ பரிபோ⁴க³த்தா²ய நிப்³ப³த்தனதோ அனோமஸத்தபரிபோ⁴க³ம்யேவ ஹோதி, தம்பி பு³த்³த⁴ரதனேன ஸமம் நத்தி². யதி³ ஹி அனோமஸத்தபரிபோ⁴க³ட்டே²ன ரதனம், ததா²க³தோவ ரதனம். ததா²க³தோ ஹி லோகே அனோமஸத்தஸம்மதானம்பி அனுபனிஸ்ஸயஸம்பன்னானம் விபரீதத³ஸ்ஸனானம் பூரணகஸ்ஸபாதீ³னம் ச²ன்னம் ஸத்தா²ரானம் அஞ்ஞேஸஞ்ச ஏவரூபானம் ஸுபினந்தேபி அபரிபோ⁴கோ³, உபனிஸ்ஸயஸம்பன்னானம் பன சதுப்பதா³யபி கா³தா²ய பரியோஸானே அரஹத்தமதி⁴க³ந்தும் ஸமத்தா²னம் நிப்³பே³தி⁴கஞாணத³ஸ்ஸனானம் பா³ஹியதா³ருசீரியப்பபு⁴தீனம் அஞ்ஞேஸஞ்ச மஹாகுலப்பஸுதானம் மஹாஸாவகானம் பரிபோ⁴கோ³. தே ஹி தம் த³ஸ்ஸனானுத்தரியஸவனானுத்தரியபாரிசரியானுத்தரியாதீ³னி ஸாதே⁴ந்தா ததா² ததா² பரிபு⁴ஞ்ஜந்தி. ஏவம் அனோமஸத்தபரிபோ⁴க³ட்டே²னாபி ததா²க³தஸமம் ரதனம் நத்தி².

யம்பி தம் அவிஸேஸதோ ரதிஜனனட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம். தஞ்ஹி தி³ஸ்வா ராஜா சக்கவத்தி அத்தமனோ ஹோதி, ஏவம்பி தம் ரஞ்ஞோ ரதிம் ஜனேதி. புன சபரம் ராஜா சக்கவத்தி வாமேன ஹத்தே²ன ஸுவண்ணபி⁴ங்காரம் க³ஹேத்வா த³க்கி²ணேன ஹத்தே²ன சக்கரதனம் அப்³பு⁴க்கிரதி ‘‘பவத்தது ப⁴வம் சக்கரதனம், அபி⁴விஜினாது ப⁴வம் சக்கரதன’’ந்தி. ததோ சக்கரதனம் பஞ்சங்கி³கம் விய தூரியம் மது⁴ரஸ்ஸரம் நிச்ச²ரந்தம் ஆகாஸேன புரத்தி²மம் தி³ஸம் க³ச்ச²தி, அன்வதே³வ ராஜா சக்கவத்தி சக்கானுபா⁴வேன த்³வாத³ஸயோஜனவித்தி²ண்ணாய சதுரங்கி³னியா ஸேனாய நாதிஉச்சம் நாதினீசம் உச்சருக்கா²னம் ஹேட்டா²பா⁴கே³ன, நீசருக்கா²னம் உபரிபா⁴கே³ன, ருக்கே²ஸு புப்ப²ப²லபல்லவாதி³பண்ணாகாரம் க³ஹேத்வா ஆக³தானம் ஹத்த²தோ பண்ணாகாரஞ்ச க³ண்ஹந்தோ ‘‘ஏஹி கோ² மஹாராஜா’’திஏவமாதி³னா பரமனிபச்சகாரேன ஆக³தே படிராஜானோ ‘‘பாணோ ந ஹந்தப்³போ³’’திஆதி³னா நயேன அனுஸாஸந்தோ க³ச்ச²தி. யத்த² பன ராஜா பு⁴ஞ்ஜிதுகாமோ வா தி³வாஸேய்யம் வா கப்பேதுகாமோ ஹோதி, தத்த² சக்கரதனம் ஆகாஸா ஓதரித்வா உத³காதி³ஸப்³ப³கிச்சக்க²மே ஸமே பூ⁴மிபா⁴கே³ அக்கா²ஹதம் விய திட்ட²தி. புன ரஞ்ஞோ க³மனசித்தே உப்பன்னே புரிமனயேனேவ ஸத்³த³ம் கரோந்தம் க³ச்ச²தி, யம் ஸுத்வா த்³வாத³ஸயோஜனிகாபி பரிஸா ஆகாஸேன க³ச்ச²தி. சக்கரதனம் அனுபுப்³பே³ன புரத்தி²மம் ஸமுத்³த³ம் அஜ்ஜோ²கா³ஹதி, தஸ்மிம் அஜ்ஜோ²கா³ஹந்தே உத³கம் யோஜனப்பமாணம் அபக³ந்த்வா பி⁴த்தீகதம் விய திட்ட²தி. மஹாஜனோ யதா²காமம் ஸத்த ரதனானி க³ண்ஹாதி. புன ராஜா ஸுவண்ணபி⁴ங்காரம் க³ஹேத்வா ‘‘இதோ பட்டா²ய மம ரஜ்ஜ’’ந்தி உத³கேன அப்³பு⁴க்கிரித்வா நிவத்ததி. ஸேனா புரதோ ஹோதி, சக்கரதனம் பச்ச²தோ, ராஜா மஜ்ஜே². சக்கரதனஸ்ஸ ஓஸக்கிதோஸக்கிதட்டா²னம் உத³கம் பரிபூரதி. ஏதேனேவ உபாயேன த³க்கி²ணபச்சி²மஉத்தரேபி ஸமுத்³தே³ க³ச்ச²தி.

ஏவம் சதுத்³தி³ஸம் அனுஸம்யாயித்வா சக்கரதனம் தியோஜனப்பமாணம் ஆகாஸம் ஆரோஹதி. தத்த² டி²தோ ராஜா சக்கரதனானுபா⁴வேன விஜிதம் பஞ்சஸதபரித்ததீ³பபடிமண்டி³தம் ஸத்தயோஜனஸஹஸ்ஸபரிமண்ட³லம் புப்³ப³விதே³ஹம், ததா² அட்ட²யோஜனஸஹஸ்ஸபரிமண்ட³லம் உத்தரகுரும், ஸத்தயோஜனஸஹஸ்ஸபரிமண்ட³லம்யேவ அபரகோ³யானம், த³ஸயோஜனஸஹஸ்ஸபரிமண்ட³லம் ஜம்பு³தீ³பஞ்சாதி ஏவம் சதுமஹாதீ³பத்³விஸஹஸ்ஸபரித்ததீ³பபடிமண்டி³தம் ஏகம் சக்கவாளம் ஸுபு²ல்லபுண்ட³ரீகவனம் விய ஓலோகேதி. ஏவம் ஓலோகயதோ சஸ்ஸ அனப்பிகா ரதி உப்பஜ்ஜதி. ஏவம்பி தம் சக்கரதனம் ரஞ்ஞோ ரதிம் ஜனேதி, தம்பி பு³த்³த⁴ரதனஸமம் நத்தி². யதி³ ஹி ரதிஜனனட்டே²ன ரதனம், ததா²க³தோவ ரதனம். கிம் கரிஸ்ஸதி ஏதம் சக்கரதனம்? ததா²க³தோ ஹி யஸ்ஸா தி³ப்³பா³ய ரதியா சக்கரதனாதீ³ஹி ஸப்³பே³ஹிபி ஜனிதா சக்கவத்திரதி ஸங்க²ம்பி கலம்பி கலபா⁴க³ம்பி ந உபேதி, ததோபி ரதிதோ உத்தரிதரஞ்ச பணீததரஞ்ச அத்தனோ ஓவாத³ப்பதிகரானம் அஸங்க்²யேய்யானம்பி தே³வமனுஸ்ஸானம் பட²மஜ்ஜா²னரதிம், து³தியததியசதுத்த²பஞ்சமஜ்ஜா²னரதிம், ஆகாஸானஞ்சாயதனரதிம், விஞ்ஞாணஞ்சாயதனஆகிஞ்சஞ்ஞாயதனனேவஸஞ்ஞானாஸஞ்ஞாயதனரதிம், ஸோதாபத்திமக்³க³ரதிம், ஸோதாபத்திப²லரதிம், ஸகதா³கா³மிஅனாகா³மிஅரஹத்தமக்³க³ப²லரதிஞ்ச ஜனேதி. ஏவம் ரதிஜனனட்டே²னாபி ததா²க³தஸமம் ரதனம் நத்தீ²தி.

அபிச ரதனம் நாமேதம் து³வித⁴ம் ஹோதி ஸவிஞ்ஞாணகம் அவிஞ்ஞாணகஞ்ச. தத்த² அவிஞ்ஞாணகம் சக்கரதனம் மணிரதனம், யம் வா பனஞ்ஞம்பி அனிந்த்³ரியப³த்³த⁴ம் ஸுவண்ணரஜதாதி³, ஸவிஞ்ஞாணகம் ஹத்தி²ரதனாதி³ பரிணாயகரதனபரியோஸானம், யம் வா பனஞ்ஞம்பி ஏவரூபம் இந்த்³ரியப³த்³த⁴ம். ஏவம் து³விதே⁴ சேத்த² ஸவிஞ்ஞாணகரதனம் அக்³க³மக்கா²யதி. கஸ்மா? யஸ்மா அவிஞ்ஞாணகம் ஸுவண்ணரஜதமணிமுத்தாதி³ரதனம், ஸவிஞ்ஞாணகானம் ஹத்தி²ரதனாதீ³னம் அலங்காரத்தா²ய உபனீயதி.

ஸவிஞ்ஞாணகரதனம்பி து³வித⁴ம் திரச்சா²னக³தரதனம், மனுஸ்ஸரதனஞ்ச. தத்த² மனுஸ்ஸரதனம் அக்³க³மக்கா²யதி. கஸ்மா? யஸ்மா திரச்சா²னக³தரதனம் மனுஸ்ஸரதனஸ்ஸ ஓபவய்ஹம் ஹோதி. மனுஸ்ஸரதனம்பி து³வித⁴ம் இத்தி²ரதனம், புரிஸரதனஞ்ச. தத்த² புரிஸரதனம் அக்³க³மக்கா²யதி. கஸ்மா? யஸ்மா இத்தி²ரதனம் புரிஸரதனஸ்ஸ பரிசாரிகத்தம் ஆபஜ்ஜதி. புரிஸரதனம்பி து³வித⁴ம் அகா³ரிகரதனம், அனகா³ரிகரதனஞ்ச. தத்த² அனகா³ரிகரதனம் அக்³க³மக்கா²யதி. கஸ்மா? யஸ்மா அகா³ரிகரதனேஸு அக்³கோ³ சக்கவத்தீபி ஸீலாதி³கு³ணயுத்தம் அனகா³ரிகரதனம் பஞ்சபதிட்டி²தேன வந்தி³த்வா உபட்ட²ஹித்வா பயிருபாஸித்வா ச தி³ப்³ப³மானுஸிகா ஸம்பத்தியோ பாபுணித்வா அந்தே நிப்³பா³னஸம்பத்திம் பாபுணாதி.

ஏவம் அனகா³ரிகரதனம்பி து³வித⁴ம் – அரியபுது²ஜ்ஜனவஸேன. அரியரதனம்பி து³வித⁴ம் ஸேக்கா²ஸேக்க²வஸேன. அஸேக்க²ரதனம்பி து³வித⁴ம் ஸுக்க²விபஸ்ஸகஸமத²யானிகவஸேன, ஸமத²யானிகரதனம்பி து³வித⁴ம் ஸாவகபாரமிப்பத்தம், அப்பத்தஞ்ச. தத்த² ஸாவகபாரமிப்பத்தம் அக்³க³மக்கா²யதி. கஸ்மா? கு³ணமஹந்ததாய. ஸாவகபாரமிப்பத்தரதனதோபி பச்சேகபு³த்³த⁴ரதனம் அக்³க³மக்கா²யதி. கஸ்மா? கு³ணமஹந்ததாய. ஸாரிபுத்தமோக்³க³ல்லானஸதி³ஸாபி ஹி அனேகஸதா ஸாவகா ஏகஸ்ஸ பச்சேகபு³த்³த⁴ஸ்ஸ கு³ணானம் ஸதபா⁴க³ம்பி ந உபேந்தி. பச்சேகபு³த்³த⁴ரதனதோபி ஸம்மாஸம்பு³த்³த⁴ரதனம் அக்³க³மக்கா²யதி. கஸ்மா? கு³ணமஹந்ததாய. ஸகலம்பி ஹி ஜம்பு³தீ³பம் பூரேத்வா பல்லங்கேன பல்லங்கம் க⁴ட்டேந்தா நிஸின்னா பச்சேகபு³த்³தா⁴ ஏகஸ்ஸ ஸம்மாஸம்பு³த்³த⁴ஸ்ஸ கு³ணானம் நேவ ஸங்க²ம் ந கலம் ந கலபா⁴க³ம் உபேந்தி. வுத்தம்பி சேதம் ப⁴க³வதா – ‘‘யாவதா, பி⁴க்க²வே, ஸத்தா அபதா³ வா…பே… ததா²க³தோ தேஸம் அக்³க³மக்கா²யதீ’’திஆதி³ (ஸம். நி. 5.139; அ. நி. 4.34; 5.32; இதிவு. 90). ஏவம் கேனசிபி பரியாயேன ததா²க³தஸமம் ரதனம் நத்தி². தேனாஹ ப⁴க³வா ‘‘ந நோ ஸமம் அத்தி² ததா²க³தேனா’’தி.

ஏவம் ப⁴க³வா பு³த்³த⁴ரதனஸ்ஸ அஞ்ஞேஹி ரதனேஹி அஸமதம் வத்வா இதா³னி தேஸம் ஸத்தானம் உப்பன்னஉபத்³த³வவூபஸமனத்த²ம் நேவ ஜாதிம் ந கோ³த்தம் ந கோலபுத்தியம் ந வண்ணபோக்க²ரதாதி³ம் நிஸ்ஸாய, அபிச கோ² அவீசிமுபாதா³ய ப⁴வக்³க³பரியந்தே லோகே ஸீலஸமாதி⁴க்க²ந்தா⁴தீ³ஹி கு³ணேஹி பு³த்³த⁴ரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி பு³த்³தே⁴ ரதனம் பணீதம், ஏதேன ஸச்சேன ஸுவத்தி² ஹோதூ’’தி.

தஸ்ஸத்தோ² – இத³ம்பி இத⁴ வா ஹுரம் வா ஸக்³கே³ஸு வா யம்கிஞ்சி அத்தி² வித்தம் வா ரதனம் வா, தேன ஸத்³தி⁴ம் தேஹி தேஹி கு³ணேஹி அஸமத்தா பு³த்³த⁴ரதனம் பணீதம். யதி³ ஏதம் ஸச்சம், ஏதேன ஸச்சேன இமேஸம் பாணீனம் ஸோத்தி² ஹோது, ஸோப⁴னானம் அத்தி²தா ஹோது, அரோக³தா நிருபத்³த³வதாதி. ஏத்த² ச யதா² ‘‘சக்கு²ம் கோ², ஆனந்த³, ஸுஞ்ஞம் அத்தேன வா அத்தனியேன வா’’திஏவமாதீ³ஸு (ஸம். நி. 4.85) அத்தபா⁴வேன வா அத்தனியபா⁴வேன வாதி அத்தோ². இதரதா² ஹி சக்கு² அத்தா வா அத்தனியம் வாதி அப்படிஸித்³த⁴மேவ ஸியா. ஏவம் ரதனம் பணீதந்தி ரதனத்தம் பணீதம், ரதனபா⁴வோ பணீதோதி அயமத்தோ² வேதி³தப்³போ³. இதரதா² ஹி பு³த்³தோ⁴ நேவ ரதனந்தி ஸிஜ்ஜே²ய்ய. ந ஹி யத்த² ரதனம் அத்தி², தம் ரதனந்தி ஸிஜ்ஜ²தி. யத்த² பன சித்தீகதாதி³அத்த²ஸங்கா²தம் யேன வா தேன வா விதி⁴னா ஸம்ப³ந்த⁴க³தம் ரதனத்தம் அத்தி², யஸ்மா தம் ரதனத்தமுபாதா³ய ரதனந்தி பஞ்ஞாபீயதி, தஸ்மா தஸ்ஸ ரதனத்தஸ்ஸ அத்தி²தாய ரதனந்தி ஸிஜ்ஜ²தி. அத² வா இத³ம்பி பு³த்³தே⁴ ரதனந்தி இமினாபி காரணேன பு³த்³தோ⁴வ ரதனந்தி ஏவம்பேத்த² அத்தோ² வேதி³தப்³போ³. வுத்தமத்தாய ச ப⁴க³வதா இமாய கா³தா²ய ராஜகுலஸ்ஸ ஸோத்தி² ஜாதா, ப⁴யம் வூபஸந்தம். இமிஸ்ஸா கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

227. ஏவம் பு³த்³த⁴கு³ணேன ஸச்சம் வத்வா இதா³னி நிப்³பா³னத⁴ம்மகு³ணேன வத்துமாரத்³தோ⁴ ‘‘க²யம் விராக³’’ந்தி. தத்த² யஸ்மா நிப்³பா³னஸச்சி²கிரியாய ராகா³த³யோ கீ²ணா ஹோந்தி பரிக்கீ²ணா, யஸ்மா வா தம் தேஸம் அனுப்பாத³னிரோத⁴க்க²யமத்தம், யஸ்மா ச தம் ராகா³தி³வியுத்தம் ஸம்பயோக³தோ ச ஆரம்மணதோ ச, யஸ்மா வா தம்ஹி ஸச்சி²கதே ராகா³த³யோ அச்சந்தம் விரத்தா ஹோந்தி விக³தா வித்³த⁴ஸ்தா, தஸ்மா ‘‘க²ய’’ந்தி ச ‘‘விராக³’’ந்தி ச வுச்சதி. யஸ்மா பனஸ்ஸ ந உப்பாதோ³ பஞ்ஞாயதி, ந வயோ ந டி²தஸ்ஸ அஞ்ஞத²த்தம், தஸ்மா தம் ந ஜாயதி ந ஜீயதி ந மீயதீதி கத்வா ‘‘அமத’’ந்தி வுச்சதி, உத்தமட்டே²ன பன அதப்பகட்டே²ன ச பணீதந்தி. யத³ஜ்ஜ²கா³தி யம் அஜ்ஜ²கா³ விந்தி³, படிலபி⁴, அத்தனோ ஞாணப³லேன ஸச்சா²காஸி. ஸக்யமுனீதி ஸக்யகுலப்பஸுதத்தா ஸக்யோ, மோனேய்யத⁴ம்மஸமன்னாக³தத்தா முனி, ஸக்யோ ஏவ முனி ஸக்யமுனி. ஸமாஹிதோதி அரியமக்³க³ஸமாதி⁴னா ஸமாஹிதசித்தோ. ந தேன த⁴ம்மேன ஸமத்தி² கிஞ்சீதி தேன க²யாதி³னாமகேன ஸக்யமுனினா அதி⁴க³தேன த⁴ம்மேன ஸமம் கிஞ்சி த⁴ம்மஜாதம் நத்தி². தஸ்மா ஸுத்தந்தரேபி வுத்தம் ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸம் த⁴ம்மானம் அக்³க³மக்கா²யதீ’’திஆதி³ (அ. நி. 4.34; இதிவு. 90).

ஏவம் ப⁴க³வா நிப்³பா³னத⁴ம்மஸ்ஸ அஞ்ஞேஹி த⁴ம்மேஹி அஸமதம் வத்வா இதா³னி தேஸம் ஸத்தானம் உப்பன்னஉபத்³த³வவூபஸமனத்த²ம் க²யவிராகா³மதபணீததாகு³ணேஹி நிப்³பா³னத⁴ம்மரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி த⁴ம்மே ரதனம் பணீதம் ஏதேன ஸச்சேன ஸுவத்தி² ஹோதூ’’தி. தஸ்ஸத்தோ² புரிமகா³தா²ய வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

228. ஏவம் நிப்³பா³னத⁴ம்மகு³ணேன ஸச்சம் வத்வா இதா³னி மக்³க³த⁴ம்மகு³ணேன வத்துமாரத்³தோ⁴ ‘‘யம் பு³த்³த⁴ஸேட்டோ²’’தி. தத்த² ‘‘பு³ஜ்ஜி²தா ஸச்சானீ’’திஆதி³னா (மஹானி. 192; சூளனி. பாராயனத்து²திகா³தா²னித்³தே³ஸ 97; படி. ம. 1.162) நயேன பு³த்³தோ⁴, உத்தமோ பஸம்ஸனீயோ சாதி ஸேட்டோ², பு³த்³தோ⁴ ச ஸோ ஸேட்டோ² சாதி பு³த்³த⁴ஸேட்டோ². அனுபு³த்³த⁴பச்சேகபு³த்³த⁴ஸங்கா²தேஸு வா பு³த்³தே⁴ஸு ஸேட்டோ²தி பு³த்³த⁴ஸேட்டோ². ஸோ பு³த்³த⁴ஸேட்டோ² யம் பரிவண்ணயீ, ‘‘அட்ட²ங்கி³கோ ச மக்³கா³னம், கே²மம் நிப்³பா³னப்பத்தியா’’தி (ம. நி. 2.215) ச ‘‘அரியம் வோ, பி⁴க்க²வே, ஸம்மாஸமாதி⁴ம் தே³ஸேஸ்ஸாமி ஸஉபனிஸம் ஸபரிக்கா²ர’’ந்தி (ம. நி. 3.136) ச ஏவமாதி³னா நயேன தத்த² தத்த² பஸம்ஸி பகாஸயி. ஸுசிந்தி கிலேஸமலஸமுச்சே²த³கரணதோ அச்சந்தவோதா³னம். ஸமாதி⁴மானந்தரிகஞ்ஞமாஹூதி யஞ்ச அத்தனோ பவத்திஸமனந்தரம் நியமேனேவ ப²லதா³னதோ ‘‘ஆனந்தரிகஸமாதீ⁴’’தி ஆஹு. ந ஹி மக்³க³ஸமாதி⁴ஞ்ஹி உப்பன்னே தஸ்ஸ ப²லுப்பத்தினிஸேத⁴கோ கோசி அந்தராயோ அத்தி². யதா²ஹ –

‘‘அயஞ்ச புக்³க³லோ ஸோதாபத்திப²லஸச்சி²கிரியாய படிபன்னோ அஸ்ஸ, கப்பஸ்ஸ ச உட்³ட³ய்ஹனவேலா அஸ்ஸ, நேவ தாவ கப்போ உட்³ட³ய்ஹேய்ய, யாவாயம் புக்³க³லோ ந ஸோதாபத்திப²லம் ஸச்சி²கரோதி, அயம் வுச்சதி புக்³க³லோ டி²தகப்பீ. ஸப்³பே³பி மக்³க³ஸமங்கி³னோ புக்³க³லா டி²தகப்பினோ’’தி (பு. ப. 17).

ஸமாதி⁴னா தேன ஸமோ ந விஜ்ஜதீதி தேன பு³த்³த⁴ஸேட்ட²பரிவண்ணிதேன ஸுசினா ஆனந்தரிகஸமாதி⁴னா ஸமோ ரூபாவசரஸமாதி⁴ வா அரூபாவசரஸமாதி⁴ வா கோசி ந விஜ்ஜதி. கஸ்மா? தேஸம் பா⁴விதத்தா தத்த² தத்த² ப்³ரஹ்மலோகே உப்பன்னஸ்ஸாபி புன நிரயாதீ³ஸு உப்பத்திஸம்ப⁴வதோ, இமஸ்ஸ ச அரஹத்தஸமாதி⁴ஸ்ஸ பா⁴விதத்தா அரியபுக்³க³லஸ்ஸ ஸப்³பு³ப்பத்திஸமுக்³கா⁴தஸம்ப⁴வதோ. தஸ்மா ஸுத்தந்தரேபி வுத்தம் ‘‘யாவதா, பி⁴க்க²வே, த⁴ம்மா ஸங்க²தா, அரியோ அட்ட²ங்கி³கோ மக்³கோ³ தேஸம் அக்³க³மக்கா²யதீ’’திஆதி³ (அ. நி. 4.34; இதிவு. 90).

ஏவம் ப⁴க³வா ஆனந்தரிகஸமாதி⁴ஸ்ஸ அஞ்ஞேஹி ஸமாதீ⁴ஹி அஸமதம் வத்வா இதா³னி புரிமனயேனேவ மக்³க³த⁴ம்மரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி த⁴ம்மே…பே… ஹோதூ’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

229. ஏவம் மக்³க³த⁴ம்மகு³ணேனாபி ஸச்சம் வத்வா இதா³னி ஸங்க⁴கு³ணேனாபி வத்துமாரத்³தோ⁴ ‘‘யே புக்³க³லா’’தி. தத்த² யேதி அனியமேத்வா உத்³தே³ஸோ. புக்³க³லாதி ஸத்தா. அட்டா²தி தேஸம் க³ணனபரிச்சே²தோ³. தே ஹி சத்தாரோ ச படிபன்னா சத்தாரோ ச ப²லே டி²தாதி அட்ட² ஹோந்தி. ஸதம் பஸத்தா²தி ஸப்புரிஸேஹி பு³த்³த⁴பச்சேகபு³த்³த⁴ஸாவகேஹி அஞ்ஞேஹி ச தே³வமனுஸ்ஸேஹி பஸத்தா². கஸ்மா? ஸஹஜாதஸீலாதி³கு³ணயோகா³. தேஸஞ்ஹி சம்பகவகுலகுஸுமாதீ³னம் ஸஹஜாதவண்ணக³ந்தா⁴த³யோ விய ஸஹஜாதஸீலஸமாதி⁴ஆத³யோ கு³ணா. தேன தே வண்ணக³ந்தா⁴தி³ஸம்பன்னானி விய புப்பா²னி தே³வமனுஸ்ஸானம் ஸதம் பியா மனாபா பஸம்ஸனீயா ச ஹோந்தி. தேன வுத்தம் ‘‘யே புக்³க³லா அட்ட²ஸதம் பஸத்தா²’’தி.

அத² வா யேதி அனியமேத்வா உத்³தே³ஸோ. புக்³க³லாதி ஸத்தா. அட்ட²ஸதந்தி தேஸம் க³ணனபரிச்சே²தோ³. தே ஹி ஏகபீ³ஜீ கோலம்கோலோ ஸத்தக்க²த்துபரமோதி தயோ ஸோதாபன்னா, காமரூபாரூபப⁴வேஸு அதி⁴க³தப்ப²லா தயோ ஸகதா³கா³மினோ, தே ஸப்³பே³பி சதுன்னம் படிபதா³னம் வஸேன சதுவீஸதி, அந்தராபரினிப்³பா³யீ, உபஹச்சபரினிப்³பா³யீ, ஸஸங்கா²ரபரினிப்³பா³யீ, அஸங்கா²ரபரினிப்³பா³யீ, உத்³த⁴ம்ஸோதோ அகனிட்ட²கா³மீதி, அவிஹேஸு பஞ்ச, ததா² அதப்பஸுத³ஸ்ஸஸுத³ஸ்ஸீஸு. அகனிட்டே²ஸு பன உத்³த⁴ம்ஸோதவஜ்ஜா சத்தாரோதி சதுவீஸதி அனாகா³மினோ, ஸுக்க²விபஸ்ஸகோ ஸமத²யானிகோதி த்³வே அரஹந்தோ, சத்தாரோ மக்³க³ட்டா²தி சதுபஞ்ஞாஸ. தே ஸப்³பே³பி ஸத்³தா⁴து⁴ரபஞ்ஞாது⁴ரானம் வஸேன தி³கு³ணா ஹுத்வா அட்ட²ஸதம் ஹோந்தி. ஸேஸம் வுத்தனயமேவ.

சத்தாரி ஏதானி யுகா³னி ஹோந்தீதி தே ஸப்³பே³பி அட்ட² வா அட்ட²ஸதம் வாதி வித்தா²ரவஸேன உத்³தி³ட்ட²புக்³க³லா, ஸங்கே²பவஸேன ஸோதாபத்திமக்³க³ட்டோ² ப²லட்டோ²தி ஏகம் யுக³ம், ஏவம் யாவ அரஹத்தமக்³க³ட்டோ² ப²லட்டோ²தி ஏகம் யுக³ந்தி சத்தாரி யுகா³னி ஹோந்தி. தே த³க்கி²ணேய்யாதி ஏத்த² தேதி புப்³பே³ அனியமேத்வா உத்³தி³ட்டா²னம் நியமேத்வா நித்³தே³ஸோ. யே புக்³க³லா வித்தா²ரவஸேன அட்ட² வா அட்ட²ஸதம் வா, ஸங்கே²பவஸேன சத்தாரி யுகா³னி ஹோந்தீதி வுத்தா, ஸப்³பே³பி தே த³க்கி²ணம் அரஹந்தீதி த³க்கி²ணேய்யா. த³க்கி²ணா நாம கம்மஞ்ச கம்மவிபாகஞ்ச ஸத்³த³ஹித்வா ‘‘ஏஸ மே இத³ம் வேஜ்ஜகம்மம் வா ஜங்க⁴பேஸனிகம் வா கரிஸ்ஸதீ’’தி ஏவமாதீ³னி அனபேக்கி²த்வா தீ³யமானோ தே³ய்யத⁴ம்மோ, தம் அரஹந்தி நாம ஸீலாதி³கு³ணயுத்தா புக்³க³லா. இமே ச தாதி³ஸா, தேன வுச்சந்தி தே ‘‘த³க்கி²ணேய்யா’’தி.

ஸுக³தஸ்ஸ ஸாவகாதி ப⁴க³வா ஸோப⁴னேன க³மனேன யுத்தத்தா, ஸோப⁴னஞ்ச டா²னம் க³தத்தா, ஸுட்டு² ச க³தத்தா ஸுட்டு² ஏவ ச க³த³த்தா ஸுக³தோ, தஸ்ஸ ஸுக³தஸ்ஸ. ஸப்³பே³பி தே வசனம் ஸுணந்தீதி ஸாவகா. காமஞ்ச அஞ்ஞேபி ஸுணந்தி, ந பன ஸுத்வா கத்தப்³ப³கிச்சம் கரோந்தி. இமே பன ஸுத்வா கத்தப்³ப³ம் த⁴ம்மானுத⁴ம்மபடிபத்திம் கத்வா மக்³க³ப²லானி பத்தா, தஸ்மா ‘‘ஸாவகா’’தி வுச்சந்தி. ஏதேஸு தி³ன்னானி மஹப்ப²லானீதி ஏதேஸு ஸுக³தஸாவகேஸு அப்பகானிபி தா³னானி தி³ன்னானி படிக்³கா³ஹகதோ த³க்கி²ணாவிஸுத்³தி⁴பா⁴வம் உபக³தத்தா மஹப்ப²லானி ஹோந்தி. தஸ்மா ஸுத்தந்தரேபி வுத்தம் –

‘‘யாவதா, பி⁴க்க²வே, ஸங்கா⁴ வா க³ணா வா, ததா²க³தஸாவகஸங்கோ⁴ தேஸம் அக்³க³மக்கா²யதி, யதி³த³ம் சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴…பே… அக்³கோ³ விபாகோ ஹோதீ’’தி (அ. நி. 4.34; 5.32; இதிவு. 90).

ஏவம் ப⁴க³வா ஸப்³பே³ஸம்பி மக்³க³ட்ட²ப²லட்டா²னம் வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

230. ஏவம் மக்³க³ட்ட²ப²லட்டா²னம் வஸேன ஸங்க⁴கு³ணேன ஸச்சம் வத்வா இதா³னி ததோ ஏகச்சியானம் ப²லஸமாபத்திஸுக²மனுப⁴வந்தானம் கீ²ணாஸவபுக்³க³லானம்யேவ கு³ணேன வத்துமாரத்³தோ⁴ ‘‘யே ஸுப்பயுத்தா’’தி. தத்த² யேதி அனியமிதுத்³தே³ஸவசனம். ஸுப்பயுத்தாதி ஸுட்டு² பயுத்தா, அனேகவிஹிதம் அனேஸனம் பஹாய ஸுத்³தா⁴ஜீவிதம் நிஸ்ஸாய விபஸ்ஸனாய அத்தானம் பயுஞ்ஜிதுமாரத்³தா⁴தி அத்தோ². அத² வா ஸுப்பயுத்தாதி பரிஸுத்³த⁴காயவசீபயோக³ஸமன்னாக³தா. தேன தேஸம் ஸீலக்க²ந்த⁴ம் த³ஸ்ஸேதி. மனஸா த³ள்ஹேனாதி த³ள்ஹேன மனஸா, தி²ரஸமாதி⁴யுத்தேன சேதஸாதி அத்தோ². தேன தேஸம் ஸமாதி⁴க்க²ந்த⁴ம் த³ஸ்ஸேதி. நிக்காமினோதி காயே ச ஜீவிதே ச அனபேக்கா² ஹுத்வா பஞ்ஞாது⁴ரேன வீரியேன ஸப்³ப³கிலேஸேஹி கதனிக்கமனா. தேன தேஸம் வீரியஸம்பன்னம் பஞ்ஞாக்க²ந்த⁴ம் த³ஸ்ஸேதி.

கோ³தமஸாஸனம்ஹீதி கோ³த்ததோ கோ³தமஸ்ஸ ததா²க³தஸ்ஸேவ ஸாஸனம்ஹி. தேன இதோ ப³ஹித்³தா⁴ நானப்பகாரம்பி அமரதபம் கரோந்தானம் ஸுப்பயோகா³தி³கு³ணாபா⁴வதோ கிலேஸேஹி நிக்கமனாபா⁴வம் தீ³பேதி. தேதி புப்³பே³ உத்³தி³ட்டா²னம் நித்³தே³ஸவசனம். பத்திபத்தாதி ஏத்த² பத்தப்³பா³தி பத்தி, பத்தப்³பா³ நாம பத்தும் அரஹா, யம் பத்வா அச்சந்தயோக³க்கே²மினோ ஹோந்தி, அரஹத்தப²லஸ்ஸேதம் அதி⁴வசனம், தம் பத்திம் பத்தாதி பத்திபத்தா. அமதந்தி நிப்³பா³னம். விக³ய்ஹாதி ஆரம்மணவஸேன விகா³ஹித்வா. லத்³தா⁴தி லபி⁴த்வா. முதா⁴தி அப்³யயேன காகணிகமத்தம்பி ப்³யயம் அகத்வா. நிப்³பு³திந்தி படிப்பஸ்ஸத்³த⁴கிலேஸத³ரத²ம் ப²லஸமாபத்திம். பு⁴ஞ்ஜமானாதி அனுப⁴வமானா. கிம் வுத்தம் ஹோதி? யே இமஸ்மிம் கோ³தமஸாஸனம்ஹி ஸீலஸம்பன்னத்தா ஸுப்பயுத்தா, ஸமாதி⁴ஸம்பன்னத்தா மனஸா த³ள்ஹேன, பஞ்ஞாஸம்பன்னத்தா நிக்காமினோ, தே இமாய ஸம்மாபடிபதா³ய அமதம் விக³ய்ஹ முதா⁴ லத்³தா⁴ ப²லஸமாபத்திஸஞ்ஞிதம் நிப்³பு³திம் பு⁴ஞ்ஜமானா பத்திபத்தா நாம ஹோந்தீதி.

ஏவம் ப⁴க³வா ப²லஸமாபத்திஸுக²மனுப⁴வந்தானம் கீ²ணாஸவபுக்³க³லானம்யேவ வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

231. ஏவம் கீ²ணாஸவபுக்³க³லானம் கு³ணேன ஸங்கா⁴தி⁴ட்டா²னம் ஸச்சம் வத்வா இதா³னி ப³ஹுஜனபச்சக்கே²ன ஸோதாபன்னஸ்ஸேவ கு³ணேன வத்துமாரத்³தோ⁴ ‘‘யதி²ந்த³கீ²லோ’’தி. தத்த² யதா²தி உபமாவசனம். இந்த³கீ²லோதி நக³ரத்³வாரனிவாரணத்த²ம் உம்மாரப்³ப⁴ந்தரே அட்ட² வா த³ஸ வா ஹத்தே² பத²விம் க²ணித்வா ஆகோடிதஸ்ஸ ஸாரதா³ருமயத²ம்ப⁴ஸ்ஸேதம் அதி⁴வசனம். பத²விந்தி பூ⁴மிம். ஸிதோதி அந்தோ பவிஸித்வா நிஸ்ஸிதோ. ஸியாதி ப⁴வேய்ய. சதுப்³பி⁴ வாதேஹீதி சதூஹி தி³ஸாஹி ஆக³தவாதேஹி. அஸம்பகம்பியோதி கம்பேதும் வா சாலேதும் வா அஸக்குணேய்யோ. ததூ²பமந்தி ததா²வித⁴ம். ஸப்புரிஸந்தி உத்தமபுரிஸம். வதா³மீதி ப⁴ணாமி. யோ அரியஸச்சானி அவேச்ச பஸ்ஸதீதி யோ சத்தாரி அரியஸச்சானி பஞ்ஞாய அஜ்ஜோ²கா³ஹேத்வா பஸ்ஸதி. தத்த² அரியஸச்சானி விஸுத்³தி⁴மக்³கே³ வுத்தனயேனேவ வேதி³தப்³பா³னி.

அயம் பனேத்த² ஸங்கே²பத்தோ² – யதா² ஹி இந்த³கீ²லோ க³ம்பீ⁴ரனேமதாய பத²விஸ்ஸிதோ சதுப்³பி⁴ வாதேஹி அஸம்பகம்பியோ ஸியா, இமம்பி ஸப்புரிஸம் ததூ²பமமேவ வதா³மி, யோ அரியஸச்சானி அவேச்ச பஸ்ஸதி. கஸ்மா? யஸ்மா ஸோபி இந்த³கீ²லோ விய சதூஹி வாதேஹி ஸப்³ப³தித்தி²யவாத³வாதேஹி அஸம்பகம்பியோ ஹோதி, தம்ஹா த³ஸ்ஸனா கேனசி கம்பேதும் வா சாலேதும் வா அஸக்குணேய்யோ. தஸ்மா ஸுத்தந்தரேபி வுத்தம் –

‘‘ஸேய்யதா²பி, பி⁴க்க²வே, அயோகீ²லோ வா இந்த³கீ²லோ வா க³ம்பீ⁴ரனேமோ ஸுனிகா²தோ அசலோ அஸம்பகம்பீ, புரத்தி²மாய சேபி தி³ஸாய ஆக³ச்சே²ய்ய பு⁴ஸா வாதவுட்டி², நேவ நம் ஸங்கம்பேய்ய ந ஸம்பகம்பேய்ய ந ஸம்பசாலேய்ய. பச்சி²மாய…பே… த³க்கி²ணாய… உத்தராய சேபி…பே… ந ஸம்பசாலேய்ய. தம் கிஸ்ஸ ஹேது? க³ம்பீ⁴ரத்தா, பி⁴க்க²வே, நேமஸ்ஸ ஸுனிகா²தத்தா இந்த³கீ²லஸ்ஸ. ஏவமேவ கோ², பி⁴க்க²வே, யே ச கோ² கேசி ஸமணா வா ப்³ராஹ்மணா வா ‘இத³ம் து³க்க²ந்தி…பே… படிபதா³’தி யதா²பூ⁴தம் பஜானந்தி, தே ந அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ம் ஓலோகேந்தி ‘அயம் நூன ப⁴வம் ஜானம் ஜானாதி பஸ்ஸம் பஸ்ஸதீ’தி. தம் கிஸ்ஸ ஹேது? ஸுதி³ட்ட²த்தா, பி⁴க்க²வே, சதுன்னம் அரியஸச்சான’’ந்தி (ஸம். நி. 5.1109).

ஏவம் ப⁴க³வா ப³ஹுஜனபச்சக்க²ஸ்ஸ ஸோதாபன்னஸ்ஸேவ வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

232. ஏவம் அவிஸேஸதோ ஸோதாபன்னஸ்ஸ கு³ணேன ஸங்கா⁴தி⁴ட்டா²னம் ஸச்சம் வத்வா இதா³னி யே தே தயோ ஸோதாபன்னா ஏகபீ³ஜீ கோலம்கோலோ ஸத்தக்க²த்துபரமோதி. யதா²ஹ –

‘‘இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி…பே… ஸோ ஏகம்யேவ ப⁴வம் நிப்³ப³த்தித்வா து³க்க²ஸ்ஸந்தம் கரோதி, அயம் ஏகபீ³ஜீ. ததா² த்³வே வா தீணி வா குலானி ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி, அயம் கோலம்கோலோ. ததா² ஸத்தக்க²த்தும் தே³வேஸு ச மனுஸ்ஸேஸு ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி, அயம் ஸத்தக்க²த்துபரமோ’’தி (பு. ப. 31-33).

தேஸம் ஸப்³ப³கனிட்ட²ஸ்ஸ ஸத்தக்க²த்துபரமஸ்ஸ கு³ணேன வத்துமாரத்³தோ⁴ ‘‘யே அரியஸச்சானீ’’தி. தத்த² யே அரியஸச்சானீதி ஏதம் வுத்தனயமேவ. விபா⁴வயந்தீதி பஞ்ஞாஓபா⁴ஸேன ஸச்சபடிச்சா²த³கம் கிலேஸந்த⁴காரம் வித⁴மித்வா அத்தனோ பகாஸானி பாகடானி கரோந்தி. க³ம்பீ⁴ரபஞ்ஞேனாதி அப்பமேய்யபஞ்ஞதாய ஸதே³வகஸ்ஸபி லோகஸ்ஸ ஞாணேன அலப்³ப⁴னேய்யபதிட்ட²பஞ்ஞேன, ஸப்³ப³ஞ்ஞுனாதி வுத்தம் ஹோதி. ஸுதே³ஸிதானீதி ஸமாஸப்³யாஸஸாகல்யவேகல்யாதீ³ஹி தேஹி தேஹி நயேஹி ஸுட்டு² தே³ஸிதானி. கிஞ்சாபி தே ஹோந்தி பு⁴ஸம் பமத்தாதி தே விபா⁴விதஅரியஸச்சா புக்³க³லா கிஞ்சாபி தே³வரஜ்ஜசக்கவத்திரஜ்ஜாதி³ப்பமாத³ட்டா²னம் ஆக³ம்ம பு⁴ஸம் பமத்தா ஹோந்தி, ததா²பி ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதா⁴ ட²பேத்வா ஸத்த ப⁴வே அனமதக்³கே³ ஸம்ஸாரே யே உப்பஜ்ஜேய்யும் நாமஞ்ச ரூபஞ்ச, தேஸம் நிருத்³த⁴த்தா அத்த²ங்க³தத்தா ந அட்ட²மம் ப⁴வம் ஆதி³யந்தி, ஸத்தமப⁴வே ஏவ பன விபஸ்ஸனம் ஆரபி⁴த்வா அரஹத்தம் பாபுணந்தீதி.

ஏவம் ப⁴க³வா ஸத்தக்க²த்துபரமவஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

233. ஏவம் ஸத்தக்க²த்துபரமஸ்ஸ அட்ட²மம் ப⁴வம் அனாதி³யனகு³ணேன ஸங்கா⁴தி⁴ட்டா²னம் ஸச்சம் வத்வா இதா³னி தஸ்ஸேவ ஸத்த ப⁴வே ஆதி³யதோபி அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்டே²ன கு³ணேன வத்துமாரத்³தோ⁴ ‘‘ஸஹாவஸ்ஸா’’தி. தத்த² ஸஹாவாதி ஸத்³தி⁴ம்யேவ. அஸ்ஸாதி ‘‘ந தே ப⁴வம் அட்ட²மமாதி³யந்தீ’’தி வுத்தேஸு அஞ்ஞதரஸ்ஸ. த³ஸ்ஸனஸம்பதா³யாதி ஸோதாபத்திமக்³க³ஸம்பத்தியா. ஸோதாபத்திமக்³கோ³ ஹி நிப்³பா³னம் தி³ஸ்வா கத்தப்³ப³கிச்சஸம்பதா³ய ஸப்³ப³பட²மம் நிப்³பா³னத³ஸ்ஸனதோ ‘‘த³ஸ்ஸன’’ந்தி வுச்சதி. தஸ்ஸ அத்தனி பாதுபா⁴வோ த³ஸ்ஸனஸம்பதா³, தாய த³ஸ்ஸனஸம்பதா³ய ஸஹ ஏவ. தயஸ்ஸு த⁴ம்மா ஜஹிதா ப⁴வந்தீதி ஏத்த² ஸுஇதி பத³பூரணமத்தே நிபாதோ. ‘‘இத³ம்ஸு மே, ஸாரிபுத்த, மஹாவிகடபோ⁴ஜனஸ்மிம் ஹோதீ’’திஏவமாதீ³ஸு (ம. நி. 1.156) விய. யதோ ஸஹாவஸ்ஸ த³ஸ்ஸனஸம்பதா³ய தயோ த⁴ம்மா ஜஹிதா ப⁴வந்தி பஹீனா ப⁴வந்தீதி அயமேவேத்த² அத்தோ².

இதா³னி ஜஹிதத⁴ம்மத³ஸ்ஸனத்த²ம் ஆஹ ‘‘ஸக்காயதி³ட்டீ² விசிகிச்சி²தஞ்ச, ஸீலப்³ப³தம் வாபி யத³த்தி² கிஞ்சீ’’தி. தத்த² ஸதி காயே விஜ்ஜமானே உபாதா³னக்க²ந்த⁴பஞ்சகஸங்கா²தே காயே வீஸதிவத்து²கா தி³ட்டி² ஸக்காயதி³ட்டி², ஸதீ வா தத்த² காயே தி³ட்டீ²திபி ஸக்காயதி³ட்டி², யதா²வுத்தப்பகாரே காயே விஜ்ஜமானா தி³ட்டீ²தி அத்தோ². ஸதியேவ வா காயே தி³ட்டீ²திபி ஸக்காயதி³ட்டி², யதா²வுத்தப்பகாரே காயே விஜ்ஜமானே ரூபாதி³ஸங்கா²தோ அத்தாதி ஏவம் பவத்தா தி³ட்டீ²தி அத்தோ². தஸ்ஸா ச பஹீனத்தா ஸப்³ப³தி³ட்டி²க³தானி பஹீனானியேவ ஹோந்தி. ஸா ஹி நேஸம் மூலம். ஸப்³ப³கிலேஸப்³யாதி⁴வூபஸமனதோ பஞ்ஞா ‘‘சிகிச்சி²த’’ந்தி வுச்சதி, தம் பஞ்ஞாசிகிச்சி²தம் இதோ விக³தம், ததோ வா பஞ்ஞாசிகிச்சி²தா இத³ம் விக³தந்தி விசிகிச்சி²தம், ‘‘ஸத்த²ரி கங்க²தீ’’திஆதி³னா (த⁴. ஸ. 1008; விப⁴. 915) நயேன வுத்தாய அட்ட²வத்து²காய விமதியா ஏதம் அதி⁴வசனம். தஸ்ஸா பஹீனத்தா ஸப்³ப³விசிகிச்சி²தானி பஹீனானி ஹோந்தி. தஞ்ஹி நேஸம் மூலம். ‘‘இதோ ப³ஹித்³தா⁴ ஸமணப்³ராஹ்மணானம் ஸீலேன ஸுத்³தி⁴ வதேன ஸுத்³தீ⁴’’திஏவமாதீ³ஸு (த⁴. ஸ. 1222; விப⁴. 938) ஆக³தம் கோ³ஸீலகுக்குரஸீலாதி³கம் ஸீலம் கோ³வதகுக்குரவதாதி³கஞ்ச வதம் ‘‘ஸீலப்³ப³த’’ந்தி வுச்சதி. தஸ்ஸ பஹீனத்தா ஸப்³ப³ம்பி நக்³கி³யமுண்டி³காதி³ அமரதபம் பஹீனம் ஹோதி. தஞ்ஹி தஸ்ஸ மூலம். தேன ஸப்³பா³வஸானே வுத்தம் ‘‘யத³த்தி² கிஞ்சீ’’தி. து³க்க²த³ஸ்ஸனஸம்பதா³ய சேத்த² ஸக்காயதி³ட்டி², ஸமுத³யத³ஸ்ஸனஸம்பதா³ய விசிகிச்சி²தம், மக்³க³த³ஸ்ஸனனிப்³பா³னத³ஸ்ஸனஸம்பதா³ய ஸீலப்³ப³தம் பஹீயதீதி விஞ்ஞாதப்³ப³ம்.

234. ஏவமஸ்ஸ கிலேஸவட்டப்பஹானம் த³ஸ்ஸேத்வா இதா³னி தஸ்மிம் கிலேஸவட்டே ஸதி யேன விபாகவட்டேன ப⁴விதப்³ப³ம், தப்பஹானா தஸ்ஸாபி பஹானம் தீ³பேந்தோ ஆஹ ‘‘சதூஹபாயேஹி ச விப்பமுத்தோ’’தி. தத்த² சத்தாரோ அபாயா நாம நிரயதிரச்சா²னபேத்திவிஸயஅஸுரகாயா, தேஹி ஏஸ ஸத்த ப⁴வே உபாதி³யந்தோபி விப்பமுத்தோதி அத்தோ².

ஏவமஸ்ஸ விபாகவட்டப்பஹானம் த³ஸ்ஸேத்வா இதா³னி யம் இமஸ்ஸ விபாகவட்டஸ்ஸ மூலபூ⁴தம் கம்மவட்டம், தஸ்ஸாபி பஹானம் த³ஸ்ஸேந்தோ ஆஹ ‘‘ச²ச்சாபி⁴டா²னானி அப⁴ப்³ப³ காது’’ந்தி. தத்த² அபி⁴டா²னானீதி ஓளாரிகட்டா²னானி, தானி ஏஸ ச² அப⁴ப்³போ³ காதும். தானி ச ‘‘அட்டா²னமேதம், பி⁴க்க²வே, அனவகாஸோ, யம் தி³ட்டி²ஸம்பன்னோ புக்³க³லோ மாதரம் ஜீவிதா வோரோபேய்யா’’திஆதி³னா (அ. நி. 1.271; ம. நி. 3.128; விப⁴. 809) நயேன ஏககனிபாதே வுத்தானி மாதுகா⁴தபிதுகா⁴தஅரஹந்தகா⁴தலோஹிதுப்பாத³ஸங்க⁴பே⁴த³அஞ்ஞஸத்தா²ருத்³தே³ஸகம்மானி வேதி³தப்³பா³னி. தானி ஹி கிஞ்சாபி தி³ட்டி²ஸம்பன்னோ அரியஸாவகோ குந்த²கிபில்லிகம்பி ஜீவிதா ந வோரோபேதி, அபிச கோ² பன புது²ஜ்ஜனபா⁴வஸ்ஸ விக³ரஹணத்த²ம் வுத்தானி. புது²ஜ்ஜனோ ஹி அதி³ட்டி²ஸம்பன்னத்தா ஏவம்மஹாஸாவஜ்ஜானி அபி⁴டா²னானிபி கரோதி, த³ஸ்ஸனஸம்பன்னோ பன அப⁴ப்³போ³ தானி காதுந்தி. அப⁴ப்³ப³க்³க³ஹணஞ்சேத்த² ப⁴வந்தரேபி அகரணத³ஸ்ஸனத்த²ம். ப⁴வந்தரேபி ஹி ஏஸ அத்தனோ அரியஸாவகபா⁴வம் அஜானந்தோபி த⁴ம்மதாய ஏவ ஏதானி வா ச², பகதிபாணாதிபாதாதீ³னி வா பஞ்ச வேரானி அஞ்ஞஸத்தா²ருத்³தே³ஸேன ஸஹ ச² டா²னானி ந கரோதி, யானி ஸந்தா⁴ய ஏகச்சே ‘‘ச²சா²பி⁴டா²னானீ’’தி பட²ந்தி. மதமச்ச²க்³கா³ஹாத³யோ சேத்த² அரியஸாவககா³மதா³ரகானம் நித³ஸ்ஸனம்.

ஏவம் ப⁴க³வா ஸத்த ப⁴வே ஆதி³யதோபி அரியஸாவகஸ்ஸ அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்ட²கு³ணவஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

235. ஏவம் ஸத்த ப⁴வே ஆதி³யதோபி அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்ட²கு³ணவஸேன ஸங்கா⁴தி⁴ட்டா²னம் ஸச்சம் வத்வா இதா³னி ‘‘ந கேவலம் த³ஸ்ஸனஸம்பன்னோ ச² அபி⁴டா²னானி அப⁴ப்³போ³ காதும், கிம் பன அப்பமத்தகம்பி பாபம் கம்மம் கத்வா தஸ்ஸ படிச்சா²த³னாயபி அப⁴ப்³போ³’’தி பமாத³விஹாரினோபி த³ஸ்ஸனஸம்பன்னஸ்ஸ கதபடிச்சா²த³னாபா⁴வகு³ணேன வத்துமாரத்³தோ⁴ ‘‘கிஞ்சாபி ஸோ கம்மம் கரோதி பாபக’’ந்தி.

தஸ்ஸத்தோ² – ஸோ த³ஸ்ஸனஸம்பன்னோ கிஞ்சாபி ஸதிஸம்மோஸேன பமாத³விஹாரம் ஆக³ம்ம யம் தம் ப⁴க³வதா லோகவஜ்ஜஸஞ்சிச்சானதிக்கமனம் ஸந்தா⁴ய வுத்தம் ‘‘யம் மயா ஸாவகானம் ஸிக்கா²பத³ம் பஞ்ஞத்தம், தம் மம ஸாவகா ஜீவிதஹேதுபி நாதிக்கமந்தீ’’தி (சூளவ. 385; அ. நி. 8.19; உதா³. 45), தம் ட²பேத்வா அஞ்ஞம் குடிகாரஸஹஸேய்யாதி³ம் வா பண்ணத்திவஜ்ஜவீதிக்கமஸங்கா²தம் பு³த்³த⁴படிகுட்ட²ம் காயேன பாபகம்மம் கரோதி, பத³ஸோத⁴ம்மஉத்தரிச²ப்பஞ்சவாசாத⁴ம்மதே³ஸனாஸம்ப²ப்பலாபப²ருஸவசனாதி³ம் வா வாசாய, உத³ சேதஸா வா கத்த²சி லோப⁴தோ³ஸுப்பாத³னஜாதரூபாதி³ஸாதி³யனம் சீவராதி³பரிபோ⁴கே³ஸு அபச்சவேக்க²ணாதி³ம் வா பாபகம்மம் கரோதி. அப⁴ப்³போ³ ஸோ தஸ்ஸ படிச்ச²தா³ய, ந ஸோ தம் ‘‘இத³ம் அகப்பியமகரணீய’’ந்தி ஜானித்வா முஹுத்தம்பி படிச்சா²தே³தி, தங்க²ணஞ்ஞேவ பன ஸத்த²ரி வா விஞ்ஞூஸு வா ஸப்³ரஹ்மசாரீஸு ஆவி கத்வா யதா²த⁴ம்மம் படிகரோதி, ‘‘ந புன கரிஸ்ஸாமீ’’தி ஏவம் ஸம்வரிதப்³ப³ம் வா ஸம்வரதி. கஸ்மா? யஸ்மா அப⁴ப்³ப³தா தி³ட்ட²பத³ஸ்ஸ வுத்தா, ஏவரூபம் பாபகம்மம் கத்வா தஸ்ஸ படிச்சா²தா³ய தி³ட்ட²னிப்³பா³னபத³ஸ்ஸ த³ஸ்ஸனஸம்பன்னஸ்ஸ புக்³க³லஸ்ஸ அப⁴ப்³ப³தா வுத்தாதி அத்தோ².

கத²ம் –

‘‘ஸேய்யதா²பி, பி⁴க்க²வே, த³ஹரோ குமாரோ மந்தோ³ உத்தானஸேய்யகோ ஹத்தே²ன வா பாதே³ன வா அங்கா³ரம் அக்கமித்வா கி²ப்பமேவ படிஸம்ஹரதி, ஏவமேவ கோ², பி⁴க்க²வே, க⁴ம்மதா ஏஸா தி³ட்டி²ஸம்பன்னஸ்ஸ புக்³க³லஸ்ஸ, கிஞ்சாபி ததா²ரூபிம் ஆபத்திம் ஆபஜ்ஜதி, யதா²ரூபாய ஆபத்தியா வுட்டா²னம் பஞ்ஞாயதி, அத² கோ² நம் கி²ப்பமேவ ஸத்த²ரி வா விஞ்ஞூஸு வா ஸப்³ரஹ்மசாரீஸு தே³ஸேதி விவரதி உத்தானீகரோதி, தே³ஸேத்வா விவரித்வா உத்தானீகத்வா ஆயதிம் ஸம்வரம் ஆபஜ்ஜதீ’’தி (ம. நி. 1.496).

ஏவம் ப⁴க³வா பமாத³விஹாரினோபி த³ஸ்ஸனஸம்பன்னஸ்ஸ கதபடிச்சா²த³னாபா⁴வகு³ணேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

236. ஏவம் ஸங்க⁴பரியாபன்னானம் புக்³க³லானம் தேன தேன கு³ணப்பகாரேன ஸங்கா⁴தி⁴ட்டா²னம் ஸச்சம் வத்வா இதா³னி ய்வாயம் ப⁴க³வதா ரதனத்தயகு³ணம் தீ³பேந்தேன இத⁴ ஸங்கே²பேன அஞ்ஞத்ர ச வித்தா²ரேன பரியத்தித⁴ம்மோ தே³ஸிதோ, தம்பி நிஸ்ஸாய புன பு³த்³தா⁴தி⁴ட்டா²னம் ஸச்சம் வத்துமாரத்³தோ⁴ ‘‘வனப்பகு³ம்பே³ யத² பு²ஸ்ஸிதக்³கே³’’தி. தத்த² ஆஸன்னஸன்னிவேஸவவத்தி²தானம் ருக்கா²னம் ஸமூஹோ வனம், மூலஸாரபே²க்³கு³தசஸாகா²பலாஸேஹி பவுட்³டோ⁴ கு³ம்போ³ பகு³ம்போ³, வனே பகு³ம்போ³ வனப்பகு³ம்போ³, ஸ்வாயம் ‘‘வனப்பகு³ம்பே³’’தி வுத்தோ. ஏவம்பி ஹி வத்தும் லப்³ப⁴தி ‘‘அத்தி² ஸவிதக்கஸவிசாரே, அத்தி² அவிதக்கவிசாரமத்தே, ஸுகே² து³க்கே² ஜீவே’’திஆதீ³ஸு விய. யதா²தி ஓபம்மவசனம். பு²ஸ்ஸிதானி அக்³கா³னி அஸ்ஸாதி பு²ஸ்ஸிதக்³கோ³, ஸப்³ப³ஸாகா²பஸாகா²ஸு ஸஞ்ஜாதபுப்போ²தி அத்தோ². ஸோ புப்³பே³ வுத்தனயேனேவ ‘‘பு²ஸ்ஸிதக்³கே³’’தி வுத்தோ. கி³ம்ஹான மாஸே பட²மஸ்மிம் கி³ம்ஹேதி யே சத்தாரோ கி³ம்ஹமாஸா, தேஸம் சதுன்னம் கி³ம்ஹானம் ஏகஸ்மிம் மாஸே. கதமஸ்மிம் மாஸே இதி சே? பட²மஸ்மிம் கி³ம்ஹே, சித்ரமாஸேதி அத்தோ². ஸோ ஹி ‘‘பட²மகி³ம்ஹோ’’தி ச ‘‘பா³லவஸந்தோ’’தி ச வுச்சதி. ததோ பரம் பத³த்த²தோ பாகடமேவ.

அயம் பனேத்த² பிண்ட³த்தோ² – யதா² பட²மகி³ம்ஹனாமகே பா³லவஸந்தே நானாவித⁴ருக்க²க³ஹனே வனே ஸுபுப்பி²தக்³க³ஸாகோ² தருணருக்க²க³ச்ச²பரியாயனாமோ பகு³ம்போ³ அதிவிய ஸஸ்ஸிரிகோ ஹோதி, ஏவமேவம் க²ந்தா⁴யதனாதீ³ஹி ஸதிபட்டா²னஸம்மப்பதா⁴னாதீ³ஹி ஸீலஸமாதி⁴க்க²ந்தா⁴தீ³ஹி வா நானப்பகாரேஹி அத்த²ப்பபே⁴த³புப்பே²ஹி அதிவிய ஸஸ்ஸிரிகத்தா ததூ²பமம் நிப்³பா³னகா³மிமக்³க³தீ³பனதோ நிப்³பா³னகா³மிம் பரியத்தித⁴ம்மவரம் நேவ லாப⁴ஹேது ந ஸக்காராதி³ஹேது, கேவலஞ்ஹி மஹாகருணாய அப்³பு⁴ஸ்ஸாஹிதஹத³யோ ஸத்தானம் பரமம்ஹிதாய அதே³ஸயீதி. பரமம்ஹிதாயாதி ஏத்த² ச கா³தா²ப³ந்த⁴ஸுக²த்த²ம் அனுனாஸிகோ, அயம் பனத்தோ² ‘‘பரமஹிதாய நிப்³பா³னாய அதே³ஸயீ’’தி.

ஏவம் ப⁴க³வா இமம் ஸுபுப்பி²தக்³க³வனப்பகு³ம்ப³ஸதி³ஸம் பரியத்தித⁴ம்மம் வத்வா இதா³னி தமேவ நிஸ்ஸாய பு³த்³தா⁴தி⁴ட்டா²னம் ஸச்சவசனம் பயுஞ்ஜதி ‘‘இத³ம்பி பு³த்³தே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³, கேவலம் பன இத³ம்பி யதா²வுத்தப்பகாரபரியத்தித⁴ம்மஸங்கா²தம் பு³த்³தே⁴ ரதனம் பணீதந்தி யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

237. ஏவம் ப⁴க³வா பரியத்தித⁴ம்மேன பு³த்³தா⁴தி⁴ட்டா²னம் ஸச்சம் வத்வா இதா³னி லோகுத்தரத⁴ம்மேன வத்துமாரத்³தோ⁴ ‘‘வரோ வரஞ்ஞூ’’தி. தத்த² வரோதி பணீதாதி⁴முத்திகேஹி இச்சி²தோ ‘‘அஹோ வத மயம்பி ஏவரூபா அஸ்ஸாமா’’தி, வரகு³ணயோக³தோ வா வரோ, உத்தமோ ஸேட்டோ²தி அத்தோ². வரஞ்ஞூதி நிப்³பா³னஞ்ஞூ. நிப்³பா³னஞ்ஹி ஸப்³ப³த⁴ம்மானம் உத்தமட்டே²ன வரம், தஞ்சேஸ போ³தி⁴மூலே ஸயம் படிவிஜ்ஜி²த்வா அஞ்ஞாஸி. வரதோ³தி பஞ்சவக்³கி³யப⁴த்³த³வக்³கி³யஜடிலாதீ³னம் அஞ்ஞேஸஞ்ச தே³வமனுஸ்ஸானம் நிப்³பே³த⁴பா⁴கி³யவாஸனாபா⁴கி³யவரத⁴ம்மதா³யீதி அத்தோ². வராஹரோதி வரஸ்ஸ மக்³க³ஸ்ஸ ஆஹடத்தா வராஹரோதி வுச்சதி. ஸோ ஹி ப⁴க³வா தீ³பங்கரதோ பபு⁴தி ஸமதிம்ஸ பாரமியோ பூரேந்தோ புப்³ப³கேஹி ஸம்மாஸம்பு³த்³தே⁴ஹி அனுயாதம் புராணம் மக்³க³வரம் ஆஹரி, தேன வராஹரோதி வுச்சதி. அபிச ஸப்³ப³ஞ்ஞுதஞ்ஞாணபடிலாபே⁴ன வரோ, நிப்³பா³னஸச்சி²கிரியாய வரஞ்ஞூ, ஸத்தானம் விமுத்திஸுக²தா³னேன வரதோ³, உத்தமபடிபதா³ஹரணேன வராஹரோ, ஏதேஹி லோகுத்தரகு³ணேஹி அதி⁴கஸ்ஸ கஸ்ஸசி அபா⁴வதோ அனுத்தரோ.

அபரோ நயோ – வரோ உபஸமாதி⁴ட்டா²னபரிபூரணேன, வரஞ்ஞூ பஞ்ஞாதி⁴ட்டா²னபரிபூரணேன, வரதோ³ சாகா³தி⁴ட்டா²னபரிபூரணேன, வராஹரோ ஸச்சாதி⁴ட்டா²னபரிபூரணேன, வரம் மக்³க³ஸச்சமாஹரீதி. ததா² வரோ புஞ்ஞுஸ்ஸயேன, வரஞ்ஞூ பஞ்ஞுஸ்ஸயேன, வரதோ³ பு³த்³த⁴பா⁴வத்தி²கானம் தது³பாயஸம்பதா³னேன, வராஹரோ பச்சேகபு³த்³த⁴பா⁴வத்தி²கானம் தது³பாயாஹரணேன, அனுத்தரோ தத்த² தத்த² அஸதி³ஸதாய, அத்தனா வா அனாசரியகோ ஹுத்வா பரேஸம் ஆசரியபா⁴வேன, த⁴ம்மவரம் அதே³ஸயி ஸாவகபா⁴வத்தி²கானம் தத³த்தா²ய ஸ்வாகா²ததாதி³கு³ணயுத்தஸ்ஸ வரத⁴ம்மஸ்ஸ தே³ஸனதோ. ஸேஸம் வுத்தனயமேவாதி.

ஏவம் ப⁴க³வா நவவிதே⁴ன லோகுத்தரத⁴ம்மேன அத்தனோ கு³ணம் வத்வா இதா³னி தமேவ கு³ணம் நிஸ்ஸாய பு³த்³தா⁴தி⁴ட்டா²னம் ஸச்சவசனம் பயுஞ்ஜதி ‘‘இத³ம்பி பு³த்³தே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. கேவலம் பன யம் வரம் நவலோகுத்தரத⁴ம்மம் ஏஸ அஞ்ஞாஸி, யஞ்ச அதா³ஸி, யஞ்ச ஆஹரி, யஞ்ச அதே³ஸயி, இத³ம்பி பு³த்³தே⁴ ரதனம் பணீதந்தி ஏவம் யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

238. ஏவம் ப⁴க³வா பரியத்தித⁴ம்மம் லோகுத்தரத⁴ம்மஞ்ச நிஸ்ஸாய த்³வீஹி கா³தா²ஹி பு³த்³தா⁴தி⁴ட்டா²னம் ஸச்சம் வத்வா இதா³னி யே தம் பரியத்தித⁴ம்மம் அஸ்ஸோஸும் ஸுதானுஸாரேன ச படிபஜ்ஜித்வா நவப்பகாரம்பி லோகுத்தரத⁴ம்மம் அதி⁴க³மிம்ஸு, தேஸம் அனுபாதி³ஸேஸனிப்³பா³னப்பத்திகு³ணம் நிஸ்ஸாய புன ஸங்கா⁴தி⁴ட்டா²னம் ஸச்சம் வத்துமாரத்³தோ⁴ ‘‘கீ²ணம் புராண’’ந்தி. தத்த² கீ²ணந்தி ஸமுச்சி²ன்னம். புராணந்தி புராதனம். நவந்தி ஸம்பதி வத்தமானம். நத்தி²ஸம்ப⁴வந்தி அவிஜ்ஜமானபாதுபா⁴வம். விரத்தசித்தாதி விக³தராக³சித்தா. ஆயதிகே ப⁴வஸ்மிந்தி அனாக³தமத்³தா⁴னம் புனப்³ப⁴வே. தேதி யேஸம் கீ²ணம் புராணம் நவம் நத்தி²ஸம்ப⁴வம், யே ச ஆயதிகே ப⁴வஸ்மிம் விரத்தசித்தா, தே கீ²ணாஸவா பி⁴க்கூ². கீ²ணபீ³ஜாதி உச்சி²ன்னபீ³ஜா. அவிரூள்ஹிச²ந்தா³தி விரூள்ஹிச²ந்த³விரஹிதா. நிப்³ப³ந்தீதி விஜ்ஜா²யந்தி. தீ⁴ராதி தி⁴திஸம்பன்னா. யதா²யம் பதீ³போதி அயம் பதீ³போ விய.

கிம் வுத்தம் ஹோதி? யம் தம் ஸத்தானம் உப்பஜ்ஜித்வா நிருத்³த⁴ம்பி புராணம் அதீதகாலிகம் கம்மம் தண்ஹாஸினேஹஸ்ஸ அப்பஹீனத்தா படிஸந்தி⁴ஆஹரணஸமத்த²தாய அகீ²ணம்யேவ ஹோதி, தம் புராணம் கம்மம் யேஸம் அரஹத்தமக்³கே³ன தண்ஹாஸினேஹஸ்ஸ ஸோஸிதத்தா அக்³கி³னா த³ட்³ட⁴பீ³ஜமிவ ஆயதிம் விபாகதா³னாஸமத்த²தாய கீ²ணம். யஞ்ச நேஸம் பு³த்³த⁴பூஜாதி³வஸேன இதா³னி பவத்தமானம் கம்மம் நவந்தி வுச்சதி, தஞ்ச தண்ஹாபஹானேனேவ சி²ன்னமூலபாத³பபுப்ப²மிவ ஆயதிம் ப²லதா³னாஸமத்த²தாய யேஸம் நத்தி²ஸம்ப⁴வம், யே ச தண்ஹாபஹானேனேவ ஆயதிகே ப⁴வஸ்மிம் விரத்தசித்தா, தே கீ²ணாஸவா பி⁴க்கூ² ‘‘கம்மம் கே²த்தம் விஞ்ஞாணம் பீ³ஜ’’ந்தி (அ. நி. 3.77) ஏத்த² வுத்தஸ்ஸ படிஸந்தி⁴விஞ்ஞாணஸ்ஸ கம்மக்க²யேனேவ கீ²ணத்தா கீ²ணபீ³ஜா. யோபி புப்³பே³ புனப்³ப⁴வஸங்கா²தாய விரூள்ஹியா ச²ந்தோ³ அஹோஸி, தஸ்ஸாபி ஸமுத³யப்பஹானேனேவ பஹீனத்தா புப்³பே³ விய சுதிகாலே அஸம்ப⁴வேன அவிரூள்ஹிச²ந்தா³ தி⁴திஸம்பன்னத்தா தீ⁴ரா சரிமவிஞ்ஞாணனிரோதே⁴ன யதா²யம் பதீ³போ நிப்³பு³தோ, ஏவம் நிப்³ப³ந்தி, புன ‘‘ரூபினோ வா அரூபினோ வா’’தி ஏவமாதி³ம் பஞ்ஞத்திபத²ம் அச்சேந்தீதி. தஸ்மிம் கிர ஸமயே நக³ரதே³வதானம் பூஜனத்தா²ய ஜாலிதேஸு பதீ³பேஸு ஏகோ பதீ³போ விஜ்ஜா²யி, தம் த³ஸ்ஸேந்தோ ஆஹ – ‘‘யதா²யம் பதீ³போ’’தி.

ஏவம் ப⁴க³வா யே தம் புரிமாஹி த்³வீஹி கா³தா²ஹி வுத்தம் பரியத்தித⁴ம்மம் அஸ்ஸோஸும், ஸுதானுஸாரேனேவ படிபஜ்ஜித்வா நவப்பகாரம்பி லோகுத்தரத⁴ம்மம் அதி⁴க³மிம்ஸு, தேஸம் அனுபாதி³ஸேஸனிப்³பா³னப்பத்திகு³ணம் வத்வா இதா³னி தமேவ கு³ணம் நிஸ்ஸாய ஸங்கா⁴தி⁴ட்டா²னம் ஸச்சவசனம் பயுஞ்ஜந்தோ தே³ஸனம் ஸமாபேஸி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³, கேவலம் பன இத³ம்பி யதா²வுத்தேன பகாரேன கீ²ணாஸவபி⁴க்கூ²னம் நிப்³பா³னஸங்கா²தம் ஸங்கே⁴ ரதனம் பணீதந்தி ஏவம் யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

தே³ஸனாபரியோஸானே ராஜகுலஸ்ஸ ஸோத்தி² அஹோஸி, ஸப்³பூ³பத்³த³வா வூபஸமிம்ஸு சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி.

239-241. அத² ஸக்கோ தே³வானமிந்தோ³ ‘‘ப⁴க³வதா ரதனத்தயகு³ணம் நிஸ்ஸாய ஸச்சவசனம் பயுஞ்ஜமானேன நாக³ரஸ்ஸ ஸோத்தி² கதா, மயாபி நாக³ரஸ்ஸ ஸோத்தி²த்த²ம் ரதனத்தயகு³ணம் நிஸ்ஸாய கிஞ்சி வத்தப்³ப³’’ந்தி சிந்தேத்வா அவஸானே கா³தா²த்தயம் அபா⁴ஸி ‘‘யானீத⁴ பூ⁴தானீ’’தி. தத்த² யஸ்மா பு³த்³தோ⁴ யதா² லோகஹிதத்தா²ய உஸ்ஸுக்கம் ஆபன்னேஹி ஆக³ந்தப்³ப³ம், ததா² ஆக³ததோ, யதா² ச ஏதேஹி க³ந்தப்³ப³ம், ததா² க³ததோ, யதா² வா ஏதேஹி ஆஜானிதப்³ப³ம், ததா² ஆஜானனதோ, யதா² ச ஜானிதப்³ப³ம், ததா² ஜானனதோ, யஞ்ச ததே²வ ஹோதி, தஸ்ஸ க³த³னதோ ச ‘‘ததா²க³தோ’’தி வுச்சதி. யஸ்மா ச ஸோ தே³வமனுஸ்ஸேஹி புப்ப²க³ந்தா⁴தி³னா ப³ஹினிப்³ப³த்தேன உபகரணேன, த⁴ம்மானுத⁴ம்மப்படிபத்தாதி³னா ச அத்தனி நிப்³ப³த்தேன அதிவிய பூஜிதோ, தஸ்மா ஸக்கோ தே³வானமிந்தோ³ ஸப்³ப³தே³வபரிஸம் அத்தனா ஸத்³தி⁴ம் ஸம்பிண்டே³த்வா ஆஹ ‘‘ததா²க³தம் தே³வமனுஸ்ஸபூஜிதம், பு³த்³த⁴ம் நமஸ்ஸாம ஸுவத்தி² ஹோதூ’’தி.

யஸ்மா பன த⁴ம்மே மக்³க³த⁴ம்மோ யதா² யுக³னந்த⁴ ஸமத²விபஸ்ஸனாப³லேன க³ந்தப்³ப³ம் கிலேஸபக்க²ம் ஸமுச்சி²ந்த³ந்தேன, ததா² க³தோதி ததா²க³தோ. நிப்³பா³னத⁴ம்மோபி யதா² க³தோ பஞ்ஞாய படிவித்³தோ⁴ ஸப்³ப³து³க்க²விகா⁴தாய ஸம்பஜ்ஜதி, பு³த்³தா⁴தீ³ஹி ததா² அவக³தோ, தஸ்மா ‘‘ததா²க³தோ’’தி வுச்சதி. யஸ்மா ச ஸங்கோ⁴பி யதா² அத்தஹிதாய படிபன்னேஹி க³ந்தப்³ப³ம் தேன தேன மக்³கே³ன, ததா² க³தோ, தஸ்மா ‘‘ததா²க³தோ’’ த்வேவ வுச்சதி. தஸ்மா அவஸேஸகா³தா²த்³வயேபி ததா²க³தம் த⁴ம்மம் நமஸ்ஸாம ஸுவத்தி² ஹோது, ததா²க³தம் ஸங்க⁴ம் நமஸ்ஸாம ஸுவத்தி² ஹோதூதி வுத்தம். ஸேஸம் வுத்தனயமேவாதி.

ஏவம் ஸக்கோ தே³வானமிந்தோ³ இமம் கா³தா²த்தயம் பா⁴ஸித்வா ப⁴க³வந்தம் பத³க்கி²ணம் கத்வா தே³வபுரமேவ க³தோ ஸத்³தி⁴ம் தே³வபரிஸாய. ப⁴க³வா பன ததே³வ ரதனஸுத்தம் து³தியதி³வஸேபி தே³ஸேஸி, புன சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி. ஏவம் ப⁴க³வா யாவ ஸத்தமம் தி³வஸம் தே³ஸேஸி, தி³வஸே தி³வஸே ததே²வ த⁴ம்மாபி⁴ஸமயோ அஹோஸி. ப⁴க³வா அட்³ட⁴மாஸமேவ வேஸாலியம் விஹரித்வா ராஜூனம் ‘‘க³ச்சா²மா’’தி படிவேதே³ஸி. ததோ ராஜானோ தி³கு³ணேன ஸக்காரேன புன தீஹி தி³வஸேஹி ப⁴க³வந்தம் க³ங்கா³தீரம் நயிம்ஸு. க³ங்கா³யம் நிப்³ப³த்தா நாக³ராஜானோ சிந்தேஸும் – ‘‘மனுஸ்ஸா ததா²க³தஸ்ஸ ஸக்காரம் கரோந்தி, மயம் கிம் ந கரிஸ்ஸாமா’’தி ஸுவண்ணரஜதமணிமயா நாவாயோ மாபேத்வா ஸுவண்ணரஜதமணிமயே ஏவ பல்லங்கே பஞ்ஞாபேத்வா பஞ்சவண்ணபது³மஸஞ்ச²ன்னம் உத³கம் கரித்வா ‘‘அம்ஹாகம் அனுக்³க³ஹம் கரோதா²’’தி ப⁴க³வந்தம் உபக³தா. ப⁴க³வா அதி⁴வாஸேத்வா ரதனனாவமாரூள்ஹோ பஞ்ச ச பி⁴க்கு²ஸதானி ஸகம் ஸகம் நாவம். நாக³ராஜானோ ப⁴க³வந்தம் ஸத்³தி⁴ம் பி⁴க்கு²ஸங்கே⁴ன நாக³ப⁴வனம் பவேஸேஸும். தத்ர ஸுத³ம் ப⁴க³வா ஸப்³ப³ரத்திம் நாக³பரிஸாய த⁴ம்மம் தே³ஸேஸி. து³தியதி³வஸே தி³ப்³பே³ஹி கா²த³னீயபோ⁴ஜனீயேஹி மஹாதா³னம் அத³ம்ஸு. ப⁴க³வா அனுமோதி³த்வா நாக³ப⁴வனா நிக்க²மி.

பூ⁴மட்டா² தே³வா ‘‘மனுஸ்ஸா ச நாகா³ ச ததா²க³தஸ்ஸ ஸக்காரம் கரோந்தி, மயம் கிம் ந கரிஸ்ஸாமா’’தி சிந்தேத்வா வனகு³ம்ப³ருக்க²பப்³ப³தாதீ³ஸு ச²த்தாதிச²த்தானி உக்கி²பிம்ஸு. ஏதேனேவ உபாயேன யாவ அகனிட்ட²ப்³ரஹ்மப⁴வனம், தாவ மஹாஸக்காரவிஸேஸோ நிப்³ப³த்தி. பி³ம்பி³ஸாரோபி லிச்ச²வீஹி ஆக³தகாலே கதஸக்காரதோ தி³கு³ணமகாஸி, புப்³பே³ வுத்தனயேனேவ பஞ்சஹி தி³வஸேஹி ப⁴க³வந்தம் ராஜக³ஹம் ஆனேஸி.

ராஜக³ஹமனுப்பத்தே ப⁴க³வதி பச்சா²ப⁴த்தம் மண்ட³லமாளே ஸன்னிபதிதானம் பி⁴க்கூ²னம் அயமந்தரகதா² உத³பாதி³ – ‘‘அஹோ பு³த்³த⁴ஸ்ஸ ப⁴க³வதோ ஆனுபா⁴வோ, யம் உத்³தி³ஸ்ஸ க³ங்கா³ய ஓரதோ ச பாரதோ ச அட்ட²யோஜனோ பூ⁴மிபா⁴கோ³ நின்னஞ்ச த²லஞ்ச ஸமம் கத்வா வாலுகாய ஓகிரித்வா புப்பே²ஹி ஸஞ்ச²ன்னோ, யோஜனப்பமாணம் க³ங்கா³ய உத³கம் நானாவண்ணேஹி பது³மேஹி ஸஞ்ச²ன்னம், யாவ அகனிட்ட²ப⁴வனா ச²த்தாதிச²த்தானி உஸ்ஸிதானீ’’தி. ப⁴க³வா தம் பவத்திம் ஞத்வா க³ந்த⁴குடிதோ நிக்க²மித்வா தங்க²ணானுரூபேன பாடிஹாரியேன க³ந்த்வா மண்ட³லமாளே பஞ்ஞத்தவரபு³த்³தா⁴ஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி? பி⁴க்கூ² ஸப்³ப³ம் ஆரோசேஸும். ப⁴க³வா ஏதத³வோச – ‘‘ந, பி⁴க்க²வே, அயம் பூஜாவிஸேஸோ மய்ஹம் பு³த்³தா⁴னுபா⁴வேன நிப்³ப³த்தோ, ந நாக³தே³வப்³ரஹ்மானுபா⁴வேன, அபிச கோ² புப்³பே³ அப்பமத்தகபரிச்சாகா³னுபா⁴வேன நிப்³ப³த்தோ’’தி. பி⁴க்கூ² ஆஹம்ஸு – ‘‘ந மயம், ப⁴ந்தே, தம் அப்பமத்தகம் பரிச்சாக³ம் ஜானாம, ஸாது⁴ நோ ப⁴க³வா ததா² கதே²து, யதா² மயம் தம் ஜானேய்யாமா’’தி.

ப⁴க³வா ஆஹ – பூ⁴தபுப்³ப³ம், பி⁴க்க²வே, தக்கஸிலாயம் ஸங்கோ² நாம ப்³ராஹ்மணோ அஹோஸி. தஸ்ஸ புத்தோ ஸுஸீமோ நாம மாணவோ ஸோளஸவஸ்ஸுத்³தே³ஸிகோ வயேன, ஸோ ஏகதி³வஸம் பிதரம் உபஸங்கமித்வா அபி⁴வாதே³த்வா ஏகமந்தம் அட்டா²ஸி. தம் பிதா ஆஹ – ‘‘கிம், தாத ஸுஸீமா’’தி? ஸோ ஆஹ – ‘‘இச்சா²மஹம், தாத, பா³ராணஸிம் க³ந்த்வா ஸிப்பம் உக்³க³ஹேது’’ந்தி. ‘‘தேன ஹி, தாத ஸுஸீம, அஸுகோ நாம ப்³ராஹ்மணோ மம ஸஹாயகோ, தஸ்ஸ ஸந்திகம் க³ந்த்வா உக்³க³ண்ஹாஹீ’’தி கஹாபணஸஹஸ்ஸம் அதா³ஸி. ஸோ தம் க³ஹேத்வா மாதாபிதரோ அபி⁴வாதே³த்வா அனுபுப்³பே³ன பா³ராணஸிம் க³ந்த்வா உபசாரயுத்தேன விதி⁴னா ஆசரியம் உபஸங்கமித்வா அபி⁴வாதே³த்வா அத்தானம் நிவேதே³ஸி. ஆசரியோ ‘‘மம ஸஹாயகஸ்ஸ புத்தோ’’தி மாணவம் ஸம்படிச்சி²த்வா ஸப்³ப³ம் பாஹுனேய்யமகாஸி. ஸோ அத்³தா⁴னகிலமத²ம் படிவினோதே³த்வா தம் கஹாபணஸஹஸ்ஸம் ஆசரியஸ்ஸ பாத³மூலே ட²பேத்வா ஸிப்பம் உக்³க³ஹேதும் ஓகாஸம் யாசி. ஆசரியோ ஓகாஸம் கத்வா உக்³க³ண்ஹாபேஸி.

ஸோ லஹுஞ்ச க³ண்ஹந்தோ ப³ஹுஞ்ச க³ண்ஹந்தோ க³ஹிதக³ஹிதஞ்ச ஸுவண்ணபா⁴ஜனே பக்கி²த்தமிவ ஸீஹதேலம் அவினஸ்ஸமானம் தா⁴ரேந்தோ த்³வாத³ஸவஸ்ஸிகம் ஸிப்பம் கதிபயமாஸேனேவ பரியோஸாபேஸி. ஸோ ஸஜ்ஜா²யம் கரோந்தோ ஆதி³மஜ்ஜ²ம்யேவ பஸ்ஸதி, நோ பரியோஸானம். அத² ஆசரியம் உபஸங்கமித்வா ஆஹ – ‘‘இமஸ்ஸ ஸிப்பஸ்ஸ ஆதி³மஜ்ஜ²மேவ பஸ்ஸாமி, பரியோஸானம் ந பஸ்ஸாமீ’’தி. ஆசரியோ ஆஹ – ‘‘அஹம்பி, தாத, ஏவமேவா’’தி. ‘‘அத² கோ, ஆசரிய, இமஸ்ஸ ஸிப்பஸ்ஸ பரியோஸானம் ஜானாதீ’’தி? ‘‘இஸிபதனே, தாத, இஸயோ அத்தி², தே ஜானேய்யு’’ந்தி. தே உபஸங்கமித்வா ‘‘புச்சா²மி, ஆசரியா’’தி. ‘‘புச்ச², தாத, யதா²ஸுக²’’ந்தி. ஸோ இஸிபதனம் க³ந்த்வா பச்சேகபு³த்³தே⁴ உபஸங்கமித்வா புச்சி² – ‘‘ஆதி³மஜ்ஜ²பரியோஸானம் ஜானாதா²’’தி? ‘‘ஆமாவுஸோ, ஜானாமா’’தி. ‘‘தம் மம்பி ஸிக்கா²பேதா²’’தி. ‘‘தேன, ஹாவுஸோ, பப்³ப³ஜாஹி, ந ஸக்கா அபப்³ப³ஜிதேன ஸிக்கி²து’’ந்தி. ‘‘ஸாது⁴, ப⁴ந்தே, பப்³பா³ஜேத² வா மம், யம் வா இச்ச²த², தம் கத்வா பரியோஸானம் ஜானாபேதா²’’தி. தே தம் பப்³பா³ஜேத்வா கம்மட்டா²னே நியோஜேதும் அஸமத்தா² ‘‘ஏவம் தே நிவாஸேதப்³ப³ம், ஏவம் பாருபிதப்³ப³’’ந்திஆதி³னா நயேன ஆபி⁴ஸமாசாரிகம் ஸிக்கா²பேஸும். ஸோ தத்த² ஸிக்க²ந்தோ உபனிஸ்ஸயஸம்பன்னத்தா ந சிரேனேவ பச்சேகபோ³தி⁴ம் அபி⁴ஸம்பு³ஜ்ஜி². ஸகலபா³ராணஸியம் ‘‘ஸுஸீமபச்சேகபு³த்³தோ⁴’’தி பாகடோ அஹோஸி லாப⁴க்³க³யஸக்³க³ப்பத்தோ ஸம்பன்னபரிவாரோ. ஸோ அப்பாயுகஸம்வத்தனிகஸ்ஸ கம்மஸ்ஸ கதத்தா ந சிரேனேவ பரினிப்³பா³யி. தஸ்ஸ பச்சேகபு³த்³தா⁴ ச மஹாஜனகாயோ ச ஸரீரகிச்சம் கத்வா தா⁴துதோ க³ஹேத்வா நக³ரத்³வாரே தூ²பம் பதிட்டா²பேஸும்.

அத² கோ² ஸங்கோ² ப்³ராஹ்மணோ ‘‘புத்தோ மே சிரக³தோ, ந சஸ்ஸ பவத்திம் ஜானாமீ’’தி புத்தம் த³ட்டு²காமோ தக்கஸிலாய நிக்க²மித்வா அனுபுப்³பே³ன பா³ராணஸிம் பத்வா மஹாஜனகாயம் ஸன்னிபதிதம் தி³ஸ்வா ‘‘அத்³தா⁴ ப³ஹூஸு ஏகோபி மே புத்தஸ்ஸ பவத்திம் ஜானிஸ்ஸதீ’’தி சிந்தேந்தோ உபஸங்கமித்வா புச்சி² – ‘‘ஸுஸீமோ நாம மாணவோ இத⁴ ஆக³தோ அத்தி², அபி நு தஸ்ஸ பவத்திம் ஜானாதா²’’தி? தே ‘‘ஆம, ப்³ராஹ்மண, ஜானாம, அஸ்மிம் நக³ரே ப்³ராஹ்மணஸ்ஸ ஸந்திகே திண்ணம் வேதா³னம் பாரகூ³ ஹுத்வா பச்சேகபு³த்³தா⁴னம் ஸந்திகே பப்³ப³ஜித்வா பச்சேகபு³த்³தோ⁴ ஹுத்வா அனுபாதி³ஸேஸாய நிப்³பா³னதா⁴துயா பரினிப்³பா³யி, அயமஸ்ஸ தூ²போ பதிட்டா²பிதோ’’தி ஆஹம்ஸு. ஸோ பூ⁴மிம் ஹத்தே²ன பஹரித்வா, ரோதி³த்வா ச பரிதே³வித்வா ச தம் சேதியங்க³ணம் க³ந்த்வா திணானி உத்³த⁴ரித்வா உத்தரஸாடகேன வாலுகம் ஆனேத்வா, பச்சேகபு³த்³த⁴சேதியங்க³ணே ஆகிரித்வா, கமண்ட³லுதோ உத³கேன ஸமந்ததோ பூ⁴மிம் பரிப்போ²ஸித்வா வனபுப்பே²ஹி பூஜம் கத்வா உத்தரஸாடகேன படாகம் ஆரோபேத்வா தூ²பஸ்ஸ உபரி அத்தனோ ச²த்தம் ப³ந்தி⁴த்வா பக்காமீதி.

ஏவம் அதீதம் த³ஸ்ஸேத்வா தம் ஜாதகம் பச்சுப்பன்னேன அனுஸந்தே⁴ந்தோ பி⁴க்கூ²னம் த⁴ம்மகத²ம் கதே²ஸி – ‘‘ஸியா கோ² பன வோ, பி⁴க்க²வே, ஏவமஸ்ஸ அஞ்ஞோ நூன தேன ஸமயேன ஸங்கோ² ப்³ராஹ்மணோ அஹோஸீ’’தி, ந கோ² பனேதம் ஏவம் த³ட்ட²ப்³ப³ம், அஹம் தேன ஸமயேன ஸங்கோ² ப்³ராஹ்மணோ அஹோஸிம், மயா ஸுஸீமஸ்ஸ பச்சேகபு³த்³த⁴ஸ்ஸ சேதியங்க³ணே திணானி உத்³த⁴டானி, தஸ்ஸ மே கம்மஸ்ஸ நிஸ்ஸந்தே³ன அட்ட²யோஜனமக்³க³ம் விக³தகா²ணுகண்டகம் கத்வா ஸமம் ஸுத்³த⁴மகம்ஸு, மயா தத்த² வாலுகா ஓகிண்ணா, தஸ்ஸ மே நிஸ்ஸந்தே³ன அட்ட²யோஜனமக்³கே³ வாலுகம் ஓகிரிம்ஸு. மயா தத்த² வனகுஸுமேஹி பூஜா கதா, தஸ்ஸ மே நிஸ்ஸந்தே³ன நவயோஜனமக்³கே³ த²லே ச உத³கே ச நானாபுப்பே²ஹி புப்ப²ஸந்த²ரம் அகம்ஸு. மயா தத்த² கமண்ட³லுத³கேன பூ⁴மி பரிப்போ²ஸிதா, தஸ்ஸ மே நிஸ்ஸந்தே³ன வேஸாலியம் போக்க²ரவஸ்ஸம் வஸ்ஸி. மயா தஸ்மிம் சேதியே படாகா ஆரோபிதா, ச²த்தஞ்ச ப³த்³த⁴ம், தஸ்ஸ மே நிஸ்ஸந்தே³ன யாவ அகனிட்ட²ப⁴வனா படாகா ச ஆரோபிதா, ச²த்தாதிச²த்தானி ச உஸ்ஸிதானி. இதி கோ², பி⁴க்க²வே, அயம் மய்ஹம் பூஜாவிஸேஸோ நேவ பு³த்³தா⁴னுபா⁴வேன நிப்³ப³த்தோ, ந நாக³தே³வப்³ரஹ்மானுபா⁴வேன, அபிச கோ² அப்பமத்தகபரிச்சாகா³னுபா⁴வேன நிப்³ப³த்தோ’’தி. த⁴ம்மகதா²பரியோஸானே இமம் கா³த²மபா⁴ஸி –

‘‘மத்தாஸுக²பரிச்சாகா³, பஸ்ஸே சே விபுலம் ஸுக²ம்;

சஜே மத்தாஸுக²ம் தீ⁴ரோ, ஸம்பஸ்ஸம் விபுலம் ஸுக²’’ந்தி. (த⁴. ப. 290);

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ரதனஸுத்தவண்ணனா நிட்டி²தா.

2. ஆமக³ந்த⁴ஸுத்தவண்ணனா

ஸாமாகசிங்கூ³லகசீனகானி சாதி ஆமக³ந்த⁴ஸுத்தம். கா உப்பத்தி? அனுப்பன்னே ப⁴க³வதி ஆமக³ந்தோ⁴ நாம ப்³ராஹ்மணோ பஞ்சஹி மாணவகஸதேஹி ஸத்³தி⁴ம் தாபஸபப்³ப³ஜ்ஜம் பப்³ப³ஜித்வா ஹிமவந்தம் பவிஸித்வா பப்³ப³தந்தரே அஸ்ஸமம் காராபேத்வா வனமூலப²லாஹாரோ ஹுத்வா தத்த² படிவஸதி, ந கதா³சி மச்ச²மம்ஸம் கா²த³தி. அத² தேஸம் தாபஸானம் லோணம்பி³லாதீ³னி அபரிபு⁴ஞ்ஜந்தானம் பண்டு³ரோகோ³ உப்பஜ்ஜி. ததோ தே ‘‘லோணம்பி³லாதி³ஸேவனத்தா²ய மனுஸ்ஸபத²ம் க³ச்சா²மா’’தி பச்சந்தகா³மம் ஸம்பத்தா. தத்த² மனுஸ்ஸா தேஸு பஸீதி³த்வா நிமந்தேத்வா போ⁴ஜேஸும், கதப⁴த்தகிச்சானம் நேஸம் மஞ்சபீட²பரிபோ⁴க³பா⁴ஜனபாத³மக்க²னாதீ³னி உபனேத்வா ‘‘ஏத்த², ப⁴ந்தே, வஸத², மா உக்கண்டி²த்தா²’’தி வஸனட்டா²னம் த³ஸ்ஸேத்வா பக்கமிம்ஸு. து³தியதி³வஸேபி நேஸம் தா³னம் த³த்வா புன க⁴ரபடிபாடியா ஏகேகதி³வஸம் தா³னமத³ம்ஸு. தாபஸா சதுமாஸம் தத்த² வஸித்வா லோணம்பி³லாதி³ஸேவனாய தி²ரபா⁴வப்பத்தஸரீரா ஹுத்வா ‘‘மயம், ஆவுஸோ, க³ச்சா²மா’’தி மனுஸ்ஸானம் ஆரோசேஸும். மனுஸ்ஸா தேஸம் தேலதண்டு³லாதீ³னி அத³ம்ஸு. தே தானி ஆதா³ய அத்தனோ அஸ்ஸமமேவ அக³மம்ஸு. தஞ்ச கா³மம் ததே²வ ஸம்வச்ச²ரே ஸம்வச்ச²ரே ஆக³மிம்ஸு. மனுஸ்ஸாபி தேஸம் ஆக³மனகாலம் விதி³த்வா தா³னத்தா²ய தண்டு³லாதீ³னி ஸஜ்ஜேத்வாவ அச்ச²ந்தி, ஆக³தே ச நே ததே²வ ஸம்மானேந்தி.

அத² ப⁴க³வா லோகே உப்பஜ்ஜித்வா பவத்திதவரத⁴ம்மசக்கோ அனுபுப்³பே³ன ஸாவத்தி²ம் க³ந்த்வா தத்த² விஹரந்தோ தேஸம் தாபஸானம் உபனிஸ்ஸயஸம்பத்திம் தி³ஸ்வா ததோ நிக்க²ம்ம பி⁴க்கு²ஸங்க⁴பரிவுதோ சாரிகம் சரமானோ அனுபுப்³பே³ன தம் கா³மம் அனுப்பத்தோ. மனுஸ்ஸா ப⁴க³வந்தம் தி³ஸ்வா மஹாதா³னானி அத³ம்ஸு. ப⁴க³வா தேஸம் த⁴ம்மம் தே³ஸேஸி. தே தாய த⁴ம்மதே³ஸனாய அப்பேகச்சே ஸோதாபன்னா, ஏகச்சே ஸகதா³கா³மினோ, ஏகச்சே அனாகா³மினோ அஹேஸும், ஏகச்சே பப்³ப³ஜித்வா அரஹத்தம் பாபுணிம்ஸு. ப⁴க³வா புனதே³வ ஸாவத்தி²ம் பச்சாக³மாஸி. அத² தே தாபஸா தம் கா³மம் ஆக³மிம்ஸு. மனுஸ்ஸா தாபஸே தி³ஸ்வா ந புப்³ப³ஸதி³ஸம் கோதூஹலமகம்ஸு. தாபஸா தம் புச்சி²ம்ஸு – ‘‘கிம், ஆவுஸோ, இமே மனுஸ்ஸா ந புப்³ப³ஸதி³ஸா, கிம் நு கோ² அயம் கா³மோ ராஜத³ண்டே³ன உபத்³து³தோ, உதா³ஹு து³ப்³பி⁴க்கே²ன, உதா³ஹு அம்ஹேஹி ஸீலாதி³கு³ணேஹி ஸம்பன்னதரோ கோசி பப்³ப³ஜிதோ இமம் கா³மமனுப்பத்தோ’’தி? தே ஆஹம்ஸு – ‘‘ந, ப⁴ந்தே, ராஜத³ண்டே³ன, ந து³ப்³பி⁴க்கே²னாயம் கா³மோ உபத்³து³தோ, அபிச பு³த்³தோ⁴ லோகே உப்பன்னோ, ஸோ ப⁴க³வா ப³ஹுஜனஹிதாய த⁴ம்மம் தே³ஸேந்தோ இதா⁴க³தோ’’தி.

தம் ஸுத்வா ஆமக³ந்த⁴தாபஸோ ‘‘பு³த்³தோ⁴தி, க³ஹபதயோ, வதே³தா²’’தி? ‘‘பு³த்³தோ⁴தி, ப⁴ந்தே, வதா³மா’’தி திக்க²த்தும் வத்வா ‘‘கோ⁴ஸோபி கோ² ஏஸோ து³ல்லபோ⁴ லோகஸ்மிம், யதி³த³ம் பு³த்³தோ⁴’’தி அத்தமனோ அத்தமனவாசம் நிச்சா²ரேத்வா புச்சி² – ‘‘கிம் நு கோ² ஸோ பு³த்³தோ⁴ ஆமக³ந்த⁴ம் பு⁴ஞ்ஜதி, ந பு⁴ஞ்ஜதீ’’தி? ‘‘கோ, ப⁴ந்தே, ஆமக³ந்தோ⁴’’தி? ‘‘ஆமக³ந்தோ⁴ நாம மச்ச²மம்ஸம், க³ஹபதயோ’’தி. ‘‘ப⁴க³வா, ப⁴ந்தே, மச்ச²மம்ஸம் பரிபு⁴ஞ்ஜதீ’’தி. தம் ஸுத்வா தாபஸோ விப்படிஸாரீ அஹோஸி – ‘‘மாஹேவ கோ² பன பு³த்³தோ⁴ ஸியா’’தி. புன சிந்தேஸி – ‘‘பு³த்³தா⁴னம் பாதுபா⁴வோ நாம து³ல்லபோ⁴, க³ந்த்வா பு³த்³த⁴ம் தி³ஸ்வா புச்சி²த்வா ஜானிஸ்ஸாமீ’’தி. ததோ யேன ப⁴க³வா க³தோ, தம் மக்³க³ம் மனுஸ்ஸே புச்சி²த்வா வச்ச²கி³த்³தி⁴னீ கா³வீ விய துரிததுரிதோ ஸப்³ப³த்த² ஏகரத்திவாஸேன ஸாவத்தி²ம் அனுப்பத்வா ஜேதவனமேவ பாவிஸி ஸத்³தி⁴ம் ஸகாய பரிஸாய. ப⁴க³வாபி தஸ்மிம் ஸமயே த⁴ம்மதே³ஸனத்தா²ய ஆஸனே நிஸின்னோ ஏவ ஹோதி. தாபஸா ப⁴க³வந்தம் உபஸங்கம்ம துண்ஹீபூ⁴தா அனபி⁴வாதே³த்வாவ ஏகமந்தம் நிஸீதி³ம்ஸு. ப⁴க³வா ‘‘கச்சி வோ இஸயோ க²மனீய’’ந்திஆதி³னா நயேன தேஹி ஸத்³தி⁴ம் படிஸம்மோதி³. தேபி ‘‘க²மனீயம், போ⁴ கோ³தமா’’திஆதி³மாஹம்ஸு. ததோ ஆமக³ந்தோ⁴ ப⁴க³வந்தம் புச்சி² – ‘‘ஆமக³ந்த⁴ம், போ⁴ கோ³தம, பு⁴ஞ்ஜஸி, ந பு⁴ஞ்ஜஸீ’’தி? ‘‘கோ ஸோ, ப்³ராஹ்மண, ஆமக³ந்தோ⁴ நாமா’’தி? ‘‘மச்ச²மம்ஸம், போ⁴ கோ³தமா’’தி. ப⁴க³வா ‘‘ந, ப்³ராஹ்மண, மச்ச²மம்ஸம் ஆமக³ந்தோ⁴. அபிச கோ² ஆமக³ந்தோ⁴ நாம ஸப்³பே³ கிலேஸா பாபகா அகுஸலா த⁴ம்மா’’தி வத்வா ‘‘ந, ப்³ராஹ்மண, இதா³னி த்வமேவ ஆமக³ந்த⁴ம் புச்சி², அதீதேபி திஸ்ஸோ நாம ப்³ராஹ்மணோ கஸ்ஸபம் ப⁴க³வந்தம் புச்சி². ஏவஞ்ச ஸோ புச்சி², ஏவஞ்சஸ்ஸ ப⁴க³வா ப்³யாகாஸீ’’தி திஸ்ஸேன ச ப்³ராஹ்மணேன கஸ்ஸபேன ச ப⁴க³வதா வுத்தகா³தா²யோ ஏவ ஆனேத்வா தாஹி கா³தா²ஹி ப்³ராஹ்மணம் ஸஞ்ஞாபேந்தோ ஆஹ – ‘‘ஸாமாகசிங்கூ³லகசீனகானி சா’’தி. அயம் தாவ இமஸ்ஸ ஸுத்தஸ்ஸ இத⁴ உப்பத்தி.

அதீதே பன கஸ்ஸபோ கிர போ³தி⁴ஸத்தோ அட்டா²ஸங்க்²யேய்யானி கப்பஸதஸஹஸ்ஸஞ்ச பாரமியோ பூரேத்வா பா³ராணஸியம் ப்³ரஹ்மத³த்தஸ்ஸ ப்³ராஹ்மணஸ்ஸ த⁴னவதீ நாம ப்³ராஹ்மணீ, தஸ்ஸா குச்சி²ம்ஹி படிஸந்தி⁴ம் அக்³க³ஹேஸி. அக்³க³ஸாவகோபி தம் தி³வஸம்யேவ தே³வலோகா சவித்வா அனுபுரோஹிதப்³ராஹ்மணஸ்ஸ பஜாபதியா குச்சி²ம்ஹி நிப்³ப³த்தி. ஏவம் தேஸம் ஏகதி³வஸமேவ படிஸந்தி⁴க்³க³ஹணஞ்ச க³ப்³ப⁴வுட்டா²னஞ்ச அஹோஸி, ஏகதி³வஸமேவ ஏதேஸம் ஏகஸ்ஸ கஸ்ஸபோ, ஏகஸ்ஸ திஸ்ஸோதி நாமமகம்ஸு. தே ஸஹபம்ஸுகீளனகா த்³வே ஸஹாயா அனுபுப்³பே³ன வுட்³டி⁴ம் அக³மிம்ஸு. திஸ்ஸஸ்ஸ பிதா புத்தம் ஆணாபேஸி – ‘‘அயம், தாத, கஸ்ஸபோ நிக்க²ம்ம பப்³ப³ஜித்வா பு³த்³தோ⁴ ப⁴விஸ்ஸதி, த்வம்பிஸ்ஸ ஸந்திகே பப்³ப³ஜித்வா ப⁴வனிஸ்ஸரணம் கரேய்யாஸீ’’தி. ஸோ ‘‘ஸாதூ⁴’’தி படிஸ்ஸுணித்வா போ³தி⁴ஸத்தஸ்ஸ ஸந்திகம் க³ந்த்வா ‘‘உபோ⁴பி, ஸம்ம, பப்³ப³ஜிஸ்ஸாமா’’தி ஆஹ. போ³தி⁴ஸத்தோ ‘‘ஸாதூ⁴’’தி படிஸ்ஸுணி. ததோ வுட்³டி⁴ம் அனுப்பத்தகாலேபி திஸ்ஸோ போ³தி⁴ஸத்தம் ஆஹ – ‘‘ஏஹி, ஸம்ம, பப்³ப³ஜிஸ்ஸாமா’’தி போ³தி⁴ஸத்தோ ந நிக்க²மி. திஸ்ஸோ ‘‘ந தாவஸ்ஸ ஞாணம் பரிபாகம் க³த’’ந்தி ஸயம் நிக்க²ம்ம இஸிபப்³ப³ஜ்ஜம் பப்³ப³ஜித்வா அரஞ்ஞே பப்³ப³தபாதே³ அஸ்ஸமம் காராபேத்வா வஸதி. போ³தி⁴ஸத்தோபி அபரேன ஸமயேன க⁴ரே டி²தோயேவ ஆனாபானஸ்ஸதிம் பரிக்³க³ஹேத்வா சத்தாரி ஜா²னானி அபி⁴ஞ்ஞாயோ ச உப்பாதே³த்வா பாஸாதே³ன போ³தி⁴மண்ட³ஸமீபம் க³ந்த்வா ‘‘புன பாஸாதோ³ யதா²டா²னேயேவ பதிட்டா²தூ’’தி அதி⁴ட்டா²ஸி, ஸோ ஸகட்டா²னேயேவ பதிட்டா²ஸி. அபப்³ப³ஜிதேன கிர போ³தி⁴மண்ட³ம் உபக³ந்தும் ந ஸக்காதி. ஸோ பப்³ப³ஜித்வா போ³தி⁴மண்ட³ம் பத்வா நிஸீதி³த்வா ஸத்த தி³வஸே பதா⁴னயோக³ம் கத்வா ஸத்தஹி தி³வஸேஹி ஸம்மாஸம்போ³தி⁴ம் ஸச்சா²காஸி.

ததா³ இஸிபதனே வீஸதிஸஹஸ்ஸா பப்³ப³ஜிதா படிவஸந்தி. அத² கஸ்ஸபோ ப⁴க³வா தே ஆமந்தேத்வா த⁴ம்மசக்கம் பவத்தேஸி. ஸுத்தபரியோஸானே ஸப்³பே³வ அரஹந்தோ அஹேஸும். ஸோ ஸுத³ம் ப⁴க³வா வீஸதிபி⁴க்கு²ஸஹஸ்ஸபரிவுதோ தத்தே²வ இஸிபதனே வஸதி. கிகீ ச நம் காஸிராஜா சதூஹி பச்சயேஹி உபட்டா²தி. அதே²கதி³வஸம் பா³ராணஸிவாஸீ ஏகோ புரிஸோ பப்³ப³தே சந்த³னஸாராதீ³னி க³வேஸந்தோ திஸ்ஸஸ்ஸ தாபஸஸ்ஸ அஸ்ஸமம் பத்வா தம் அபி⁴வாதே³த்வா ஏகமந்தம் அட்டா²ஸி. தாபஸோ தம் தி³ஸ்வா ‘‘குதோ ஆக³தோஸீ’’தி புச்சி². ‘‘பா³ராணஸிதோ, ப⁴ந்தே’’தி. ‘‘கா தத்த² பவத்தீ’’தி? ‘‘தத்த², ப⁴ந்தே, கஸ்ஸபோ நாம ஸம்மாஸம்பு³த்³தோ⁴ உப்பன்னோ’’தி. தாபஸோ து³ல்லப⁴வசனம் ஸுத்வா பீதிஸோமனஸ்ஸஜாதோ புச்சி² – ‘‘கிம் ஸோ ஆமக³ந்த⁴ம் பு⁴ஞ்ஜதி, ந பு⁴ஞ்ஜதீ’’தி? ‘‘கோ ப⁴ந்தே, ஆமக³ந்தோ⁴’’தி? ‘‘மச்ச²மம்ஸம் ஆவுஸோ’’தி. ‘‘ப⁴க³வா, ப⁴ந்தே, மச்ச²மம்ஸம் பு⁴ஞ்ஜதீ’’தி. தம் ஸுத்வா தாபஸோ விப்படிஸாரீ ஹுத்வா புன சிந்தேஸி – ‘‘க³ந்த்வா தம் புச்சி²ஸ்ஸாமி, ஸசே ‘ஆமக³ந்த⁴ம் பரிபு⁴ஞ்ஜாமீ’தி வக்க²தி, ததோ நம் ‘தும்ஹாகம், ப⁴ந்தே, ஜாதியா ச குலஸ்ஸ ச கோ³த்தஸ்ஸ ச அனனுச்ச²விகமேத’ந்தி நிவாரேத்வா தஸ்ஸ ஸந்திகே பப்³ப³ஜித்வா ப⁴வனிஸ்ஸரணம் கரிஸ்ஸாமீ’’தி ஸல்லஹுகம் உபகரணம் க³ஹேத்வா ஸப்³ப³த்த² ஏகரத்திவாஸேன ஸாயன்ஹஸமயே பா³ராணஸிம் பத்வா இஸிபதனமேவ பாவிஸி. ப⁴க³வாபி தஸ்மிம் ஸமயே த⁴ம்மதே³ஸனத்தா²ய ஆஸனே நிஸின்னோயேவ ஹோதி. தாபஸோ ப⁴க³வந்தம் உபஸங்கம்ம அனபி⁴வாதே³த்வா துண்ஹீபூ⁴தோ ஏகமந்தம் அட்டா²ஸி. ப⁴க³வா தம் தி³ஸ்வா புப்³பே³ வுத்தனயேனேவ படிஸம்மோதி³. ஸோபி ‘‘க²மனீயம், போ⁴ கஸ்ஸபா’’திஆதீ³னி வத்வா ஏகமந்தம் நிஸீதி³த்வா ப⁴க³வந்தம் புச்சி² – ‘‘ஆமக³ந்த⁴ம், போ⁴ கஸ்ஸப, பு⁴ஞ்ஜஸி, ந பு⁴ஞ்ஜஸீ’’தி? ‘‘நாஹம், ப்³ராஹ்மண, ஆமக³ந்த⁴ம் பு⁴ஞ்ஜாமீ’’தி. ‘‘ஸாது⁴, ஸாது⁴, போ⁴ கஸ்ஸப, பரகுணபம் அகா²த³ந்தோ ஸுந்த³ரமகாஸி, யுத்தமேதம் போ⁴தோ கஸ்ஸபஸ்ஸ ஜாதியா ச குலஸ்ஸ ச கோ³த்தஸ்ஸ சா’’தி. ததோ ப⁴க³வா ‘‘அஹம் கிலேஸே ஸந்தா⁴ய ‘ஆமக³ந்த⁴ம் ந பு⁴ஞ்ஜாமீ’தி வதா³மி, ப்³ராஹ்மணோ மச்ச²மம்ஸம் பச்சேதி, யம்னூனாஹம் ஸ்வே கா³மம் பிண்டா³ய அபவிஸித்வா கிகீரஞ்ஞோ கே³ஹா ஆப⁴தம் பிண்ட³பாதம் பரிபு⁴ஞ்ஜேய்யம், ஏவம் ஆமக³ந்த⁴ம் ஆரப்³ப⁴ கதா² பவத்திஸ்ஸதி. ததோ ப்³ராஹ்மணம் த⁴ம்மதே³ஸனாய ஸஞ்ஞாபேஸ்ஸாமீ’’தி து³தியதி³வஸே காலஸ்ஸேவ ஸரீரபரிகம்மம் கத்வா க³ந்த⁴குடிம் பாவிஸி. பி⁴க்கூ² க³ந்த⁴குடித்³வாரம் பிஹிதம் தி³ஸ்வா ‘‘ந ப⁴க³வா அஜ்ஜ பி⁴க்கூ²ஹி ஸத்³தி⁴ம் பவிஸிதுகாமோ’’தி ஞத்வா க³ந்த⁴குடிம் பத³க்கி²ணம் கத்வா பிண்டா³ய பவிஸிம்ஸு.

ப⁴க³வாபி க³ந்த⁴குடிதோ நிக்க²ம்ம பஞ்ஞத்தாஸனே நிஸீதி³. தாபஸோபி கோ² பத்தஸாகம் பசித்வா கா²தி³த்வா ப⁴க³வதோ ஸந்திகே நிஸீதி³. கிகீ காஸிராஜா பி⁴க்கூ² பிண்டா³ய சரந்தே தி³ஸ்வா ‘‘குஹிம் ப⁴க³வா, ப⁴ந்தே’’தி புச்சி²த்வா ‘‘விஹாரே, மஹாராஜா’’தி ச ஸுத்வா நானாப்³யஞ்ஜனரஸமனேகமம்ஸவிகதிஸம்பன்னம் போ⁴ஜனம் ப⁴க³வதோ பாஹேஸி. அமச்சா விஹாரம் நேத்வா ப⁴க³வதோ ஆரோசேத்வா த³க்கி²ணோத³கம் த³த்வா பரிவிஸந்தா பட²மம் நானாமம்ஸவிகதிஸம்பன்னம் யாகு³ம் அத³ம்ஸு, தாபஸோ தி³ஸ்வா ‘‘கா²த³தி நு கோ² நோ’’தி சிந்தேந்தோ அட்டா²ஸி. ப⁴க³வா தஸ்ஸ பஸ்ஸதோயேவ யாகு³ம் பிவந்தோ மம்ஸக²ண்ட³ம் முகே² பக்கி²பி. தாபஸோ தி³ஸ்வா குத்³தோ⁴. புன யாகு³பீதஸ்ஸ நானாரஸப்³யஞ்ஜனம் போ⁴ஜனமத³ம்ஸு, தம்பி க³ஹேத்வா பு⁴ஞ்ஜந்தம் தி³ஸ்வா அதிவிய குத்³தோ⁴ ‘‘மச்ச²மம்ஸம் கா²த³ந்தோயேவ ‘ந கா²தா³மீ’தி ப⁴ணதீ’’தி. அத² ப⁴க³வந்தம் கதப⁴த்தகிச்சம் ஹத்த²பாதே³ தோ⁴வித்வா நிஸின்னம் உபஸங்கம்ம ‘‘போ⁴ கஸ்ஸப, முஸா த்வம் ப⁴ணஸி, நேதம் பண்டி³தகிச்சம். முஸாவாதோ³ ஹி க³ரஹிதோ பு³த்³தா⁴னம், யேபி தே பப்³ப³தபாதே³ வனமூலப²லாதீ³ஹி யாபேந்தா இஸயோ வஸந்தி, தேபி முஸா ந ப⁴ணந்தீ’’தி வத்வா புன இஸீனம் கு³ணே கா³தா²ய வண்ணேந்தோ ஆஹ ‘‘ஸாமாகசிங்கூ³லகசீனகானி சா’’தி.

242. தத்த² ஸாமாகாதி து⁴னித்வா வா ஸீஸானி உச்சினித்வா வா க³ய்ஹூபகா³ திணத⁴ஞ்ஞஜாதி. ததா² சிங்கூ³லகா கணவீரபுப்ப²ஸண்டா²னஸீஸா ஹோந்தி. சீனகானீதி அடவிபப்³ப³தபாதே³ஸு அரோபிதஜாதா சீனமுக்³கா³. பத்தப்ப²லந்தி யம்கிஞ்சி ஹரிதபண்ணம். மூலப²லந்தி யம்கிஞ்சி கந்த³மூலம். க³விப்ப²லந்தி யம்கிஞ்சி ருக்க²வல்லிப²லம். மூலக்³க³ஹணேன வா கந்த³மூலம், ப²லக்³க³ஹணேன ருக்க²வல்லிப²லம், க³விப்ப²லக்³க³ஹணேன உத³கே ஜாதஸிங்கா⁴தககஸேருகாதி³ப²லம் வேதி³தப்³ப³ம். த⁴ம்மேன லத்³த⁴ந்தி தூ³தேய்யபஹிணக³மனாதி³மிச்சா²ஜீவம் பஹாய வனே உஞ்சா²சரியாய லத்³த⁴ம். ஸதந்தி ஸந்தோ அரியா. அஸ்னமானாதி பு⁴ஞ்ஜமானா. ந காமகாமா அலிகம் ப⁴ணந்தீதி தே ஏவம் அமமா அபரிக்³க³ஹா ஏதானி ஸாமாகாதீ³னி பு⁴ஞ்ஜமானா இஸயோ யதா² த்வம் ஸாது³ரஸாதி³கே காமே பத்த²யந்தோ ஆமக³ந்த⁴ம் பு⁴ஞ்ஜந்தோயேவ ‘‘நாஹம், ப்³ராஹ்மண, ஆமக³ந்த⁴ம் பு⁴ஞ்ஜாமீ’’தி ப⁴ணந்தோ அலிகம் ப⁴ணஸி, ததா² ந காமகாமா அலிகம் ப⁴ணந்தி, காமே காமயந்தா முஸா ந ப⁴ணந்தீதி இஸீனம் பஸம்ஸாய ப⁴க³வதோ நிந்த³ம் தீ³பேதி.

243. ஏவம் இஸீனம் பஸம்ஸாபதே³ஸேன ப⁴க³வந்தம் நிந்தி³த்வா இதா³னி அத்தனா அதி⁴ப்பேதம் நிந்தா³வத்து²ம் த³ஸ்ஸேத்வா நிப்பரியாயேனேவ ப⁴க³வந்தம் நிந்த³ந்தோ ஆஹ ‘‘யத³ஸ்னமானோ’’தி தத்த² த³-காரோ பத³ஸந்தி⁴கரோ. அயம் பனத்தோ² – யம் கிஞ்சிதே³வ ஸஸமம்ஸம் வா தித்திரமம்ஸம் வா தோ⁴வனச்சே²த³னாதி³னா புப்³ப³பரிகம்மேன ஸுகதம், பசனவாஸனாதி³னா பச்சா²பரிகம்மேன ஸுனிட்டி²தம், ந மாதரா ந பிதரா, அபிச கோ² பன ‘‘த³க்கி²ணேய்யோ அய’’ந்தி மஞ்ஞமானேஹி த⁴ம்மகாமேஹி பரேஹி தி³ன்னம், ஸக்காரகரணேன பயதம் பணீதமலங்கதம், உத்தமரஸதாய ஓஜவந்ததாய தா²மப³லப⁴ரணஸமத்த²தாய ச பணீதம் அஸ்னமானோ ஆஹாரயமானோ, ந கேவலஞ்ச யம்கிஞ்சி மம்ஸமேவ, அபிச கோ² பன இத³ம்பி ஸாலீனமன்னம் விசிதகாளகம் ஸாலிதண்டு³லோத³னம் பரிபு⁴ஞ்ஜமானோ ஸோ பு⁴ஞ்ஜஸி, கஸ்ஸப, ஆமக³ந்த⁴ம், ஸோ த்வம் யம்கிஞ்சி மம்ஸம் பு⁴ஞ்ஜமானோ இத³ஞ்ச ஸாலீனமன்னம் பரிபு⁴ஞ்ஜமானோ பு⁴ஞ்ஜஸி, கஸ்ஸப, ஆமக³ந்த⁴ந்தி ப⁴க³வந்தம் கோ³த்தேன ஆலபதி.

244. ஏவம் ஆஹாரதோ ப⁴க³வந்தம் நிந்தி³த்வா இதா³னி முஸாவாத³ம் ஆரோபேத்வா நிந்த³ந்தோ ஆஹ ‘‘ந ஆமக³ந்தோ⁴…பே… ஸுஸங்க²தேஹீ’’தி. தஸ்ஸத்தோ² – புப்³பே³ மயா புச்சி²தோ ஸமானோ ‘‘ந ஆமக³ந்தோ⁴ மம கப்பதீ’’தி இச்சேவ த்வம் பா⁴ஸஸி, ஏவம் ஏகம்ஸேனேவ த்வம் பா⁴ஸஸி ப்³ரஹ்மப³ந்து⁴ ப்³ராஹ்மணகு³ணவிரஹிதஜாதிமத்தப்³ராஹ்மணாதி பரிபா⁴ஸந்தோ ப⁴ணதி. ஸாலீனமன்னந்தி ஸாலிதண்டு³லோத³னம். பரிபு⁴ஞ்ஜமானோதி பு⁴ஞ்ஜமானோ. ஸகுந்தமம்ஸேஹி ஸுஸங்க²தேஹீதி ததா³ ப⁴க³வதோ அபி⁴ஹடம் ஸகுணமம்ஸம் நித்³தி³ஸந்தோ ப⁴ணதி.

ஏவம் ப⁴ணந்தோ ஏவ ச ப⁴க³வதோ ஹேட்டா² பாத³தலா பபு⁴தி யாவ உபரி கேஸக்³கா³ ஸரீரமுல்லோகேந்தோ த்³வத்திம்ஸவரலக்க²ணாஸீதிஅனுப்³யஞ்ஜனஸம்பத³ம் ப்³யாமப்பபா⁴பரிக்கே²பஞ்ச தி³ஸ்வா ‘‘ஏவரூபோ மஹாபுரிஸலக்க²ணாதி³படிமண்டி³தகாயோ ந முஸா ப⁴ணிதும் அரஹதி. அயம் ஹிஸ்ஸ ப⁴வந்தரேபி ஸச்சவாசானிஸ்ஸந்தே³னேவ உண்ணா ப⁴முகந்தரே ஜாதா ஓதா³தா முது³ தூலஸன்னிபா⁴, ஏகேகானி ச லோமகூபேஸு லோமானி. ஸ்வாயம் கத²மிதா³னி முஸா ப⁴ணிஸ்ஸதி. அத்³தா⁴ அஞ்ஞோ இமஸ்ஸ ஆமக³ந்தோ⁴ ப⁴விஸ்ஸதி, யம் ஸந்தா⁴ய ஏதத³வோச – ‘நாஹம், ப்³ராஹ்மண, ஆமக³ந்த⁴ம் பு⁴ஞ்ஜாமீ’தி, யம்னூனாஹம் ஏதம் புச்சே²ய்ய’’ந்தி சிந்தேத்வா ஸஞ்ஜாதப³ஹுமானோ கோ³த்தேனேவ ஆலபந்தோ இமம் கா³தா²ஸேஸம் ஆஹ –

‘‘புச்சா²மி தம் கஸ்ஸப ஏதமத்த²ம், கத²ம்பகாரோ தவ ஆமக³ந்தோ⁴’’தி.

245. அத²ஸ்ஸ ப⁴க³வா ஆமக³ந்த⁴ம் விஸ்ஸஜ்ஜேதும் ‘‘பாணாதிபாதோ’’தி ஏவமாதி³மாஹ. தத்த² பாணாதிபாதோதி பாணவதோ⁴. வத⁴சே²த³ப³ந்த⁴னந்தி ஏத்த² ஸத்தானம் த³ண்டா³தீ³ஹி ஆகோடனம் வதோ⁴, ஹத்த²பாதா³தீ³னம் சே²த³னம் சே²தோ³, ரஜ்ஜுஆதீ³ஹி ப³ந்தோ⁴ ப³ந்த⁴னம். தே²ய்யம் முஸாவாதோ³தி தே²ய்யஞ்ச முஸாவாதோ³ ச. நிகதீதி ‘‘த³ஸ்ஸாமி, கரிஸ்ஸாமீ’’திஆதி³னா நயேன ஆஸம் உப்பாதே³த்வா நிராஸாகரணம். வஞ்சனானீதி அஸுவண்ணம் ஸுவண்ணந்தி கா³ஹாபனாதீ³னி. அஜ்ஜே²னகுத்தந்தி நிரத்த²கமனேகக³ந்த²பரியாபுணனம். பரதா³ரஸேவனாதி பரபரிக்³க³ஹிதாஸு சாரித்தாபஜ்ஜனம். ஏஸாமக³ந்தோ⁴ ந ஹி மம்ஸபோ⁴ஜனந்தி ஏஸ பாணாதிபாதாதி³அகுஸலத⁴ம்மஸமுதா³சாரோ ஆமக³ந்தோ⁴ விஸ்ஸக³ந்தோ⁴ குணபக³ந்தோ⁴. கிம் காரணா? அமனுஞ்ஞத்தா கிலேஸஅஸுசிமிஸ்ஸகத்தா ஸப்³பி⁴ ஜிகு³ச்சி²தத்தா பரமது³க்³க³ந்த⁴பா⁴வாவஹத்தா ச. யே ஹி உஸ்ஸன்னகிலேஸா ஸத்தா, தே தேஹி அதிது³க்³க³ந்தா⁴ ஹோந்தி, நிக்கிலேஸானம் மதஸரீரம்பி து³க்³க³ந்த⁴ம் ந ஹோதி, தஸ்மா ஏஸாமக³ந்தோ⁴. மம்ஸபோ⁴ஜனம் பன அதி³ட்ட²மஸுதமபரிஸங்கிதஞ்ச அனவஜ்ஜம், தஸ்மா ந ஹி மம்ஸபோ⁴ஜனம் ஆமக³ந்தோ⁴தி.

246. ஏவம் த⁴ம்மாதி⁴ட்டா²னாய தே³ஸனாய ஏகேன நயேன ஆமக³ந்த⁴ம் விஸ்ஸஜ்ஜேத்வா இதா³னி யஸ்மா தே தே ஸத்தா தேஹி தேஹி ஆமக³ந்தே⁴ஹி ஸமன்னாக³தா, ந ஏகோ ஏவ ஸப்³பே³ஹி, ந ச ஸப்³பே³ ஏகேனேவ, தஸ்மா நேஸம் தே தே ஆமக³ந்தே⁴ பகாஸேதும் ‘‘யே இத⁴ காமேஸு அஸஞ்ஞதா ஜனா’’திஆதி³னா நயேன புக்³க³லாதி⁴ட்டா²னாய தாவ தே³ஸனாய ஆமக³ந்தே⁴ விஸ்ஸஜ்ஜேந்தோ த்³வே கா³தா²யோ அபா⁴ஸி.

தத்த² யே இத⁴ காமேஸு அஸஞ்ஞதா ஜனாதி யே கேசி இத⁴ லோகே காமபடிஸேவனஸங்கா²தேஸு காமேஸு மாதிமாதுச்சா²தீ³ஸுபி மரியாதா³விரஹேன பி⁴ன்னஸம்வரதாய அஸம்யதா புது²ஜ்ஜனா. ரஸேஸு கி³த்³தா⁴தி ஜிவ்ஹாவிஞ்ஞேய்யேஸு ரஸேஸு கி³த்³தா⁴ க³தி⁴தா முச்சி²தா அஜ்ஜோ²ஸன்னா அனாதீ³னவத³ஸ்ஸாவினோ அனிஸ்ஸரணபஞ்ஞா ரஸே பரிபு⁴ஞ்ஜந்தி. அஸுசிபா⁴வமஸ்ஸிதாதி தாய ரஸகி³த்³தி⁴யா ரஸபடிலாப⁴த்தா²ய நானப்பகாரமிச்சா²ஜீவஸங்கா²தஅஸுசிபா⁴வமிஸ்ஸிதா. நத்தி²கதி³ட்டீ²தி ‘‘நத்தி² தி³ன்ன’’ந்திஆதி³த³ஸவத்து²கமிச்சா²தி³ட்டி²ஸமன்னாக³தா. விஸமாதி விஸமேன காயகம்மாதி³னா ஸமன்னாக³தா. து³ரன்னயாதி து³விஞ்ஞாபயா ஸந்தி³ட்டி²பராமாஸீஆதா⁴னக்³கா³ஹீது³ப்படினிஸ்ஸக்³கி³தாஸமன்னாக³தா. ஏஸாமக³ந்தோ⁴தி ஏஸ ஏதாய கா³தா²ய புக்³க³லே அதி⁴ட்டா²ய நித்³தி³ட்டோ² ‘‘காமேஸு அஸம்யததா ரஸகி³த்³த⁴தா ஆஜீவவிபத்தினத்தி²கதி³ட்டி²காயது³ச்சரிதாதி³விஸமதா து³ரன்னயபா⁴வதா’’தி அபரோபி புப்³பே³ வுத்தேனேவத்தே²ன ச²ப்³பி³தோ⁴ ஆமக³ந்தோ⁴ வேதி³தப்³போ³. ந ஹி மம்ஸபோ⁴ஜனந்தி மம்ஸபோ⁴ஜனம் பன யதா²வுத்தேனேவத்தே²ன ந ஆமக³ந்தோ⁴தி.

247. து³தியகா³தா²யபி யே லூக²ஸாதி யே லூகா² நிரஸா, அத்தகிலமதா²னுயுத்தாதி அத்தோ². தா³ருணாதி கக்க²ளா தோ³வசஸ்ஸதாயுத்தா. பிட்டி²மம்ஸிகாதி புரதோ மது⁴ரம் ப⁴ணித்வா பரம்முகே² அவண்ணபா⁴ஸினோ. ஏதே ஹி அபி⁴முக²ம் ஓலோகேதுமஸக்கோந்தா பரம்முகா²னம் பிட்டி²மம்ஸகா²த³கா விய ஹோந்தி, தேன ‘‘பிட்டி²மம்ஸிகா’’தி வுச்சந்தி. மித்தத்³து³னோதி மித்ததூ³ஹகா, தா³ரத⁴னஜீவிதேஸு விஸ்ஸாஸமாபன்னானம் மித்தானம் தத்த² மிச்சா²படிபஜ்ஜனகாதி வுத்தம் ஹோதி. நிக்கருணாதி கருணாவிரஹிதா ஸத்தானம் அனத்த²காமா. அதிமானினோதி ‘‘இதே⁴கச்சோ ஜாதியா வா…பே… அஞ்ஞதரஞ்ஞதரேன வத்து²னா பரே அதிமஞ்ஞதி, யோ ஏவரூபோ மானோ கேதுகம்யதா சித்தஸ்ஸா’’தி (விப⁴. 880) ஏவம் வுத்தேன அதிமானேன ஸமன்னாக³தா. அதா³னஸீலாதி அதா³னபகதிகா, அதா³னாதி⁴முத்தா அஸம்விபா⁴க³ரதாதி அத்தோ². ந ச தே³ந்தி கஸ்ஸசீதி தாய ச பன அதா³னஸீலதாய யாசிதாபி ஸந்தா கஸ்ஸசி கிஞ்சி ந தே³ந்தி, அதி³ன்னபுப்³ப³ககுலே மனுஸ்ஸஸதி³ஸா நிஜ்ஜா²மதண்ஹிகபேதபராயணா ஹோந்தி. கேசி பன ‘‘ஆதா³னஸீலா’’திபி பட²ந்தி, கேவலம் க³ஹணஸீலா, கஸ்ஸசி பன கிஞ்சி ந தே³ந்தீதி. ஏஸாமக³ந்தோ⁴ ந ஹி மம்ஸபோ⁴ஜனந்தி ஏஸ ஏதாய கா³தா²ய புக்³க³லே அதி⁴ட்டா²ய நித்³தி³ட்டோ² ‘‘லூக²தா, தா³ருணதா, பிட்டி²மம்ஸிகதா, மித்ததூ³பி⁴தா, நிக்கருணதா, அதிமானிதா, அதா³னஸீலதா, அதா³ன’’ந்தி அபரோபி புப்³பே³ வுத்தேனேவத்தே²ன அட்ட²விதோ⁴ ஆமக³ந்தோ⁴ வேதி³தப்³போ³, ந ஹி மம்ஸபோ⁴ஜனந்தி.

248. ஏவம் புக்³க³லாதி⁴ட்டா²னாய தே³ஸனாய த்³வே கா³தா²யோ வத்வா புன தஸ்ஸ தாபஸஸ்ஸ ஆஸயானுபரிவத்தனம் விதி³த்வா த⁴ம்மாதி⁴ட்டா²னாயேவ தே³ஸனாய ஏகம் கா³த²ம் அபா⁴ஸி. தத்த² கோதோ⁴ உரக³ஸுத்தே வுத்தனயேனேவ வேதி³தப்³போ³. மதோ³தி ‘‘ஜாதிமதோ³, கோ³த்தமதோ³, ஆரோக்³யமதோ³’’திஆதி³னா (விப⁴. 832) நயேன விப⁴ங்கே³ வுத்தப்பபே⁴தோ³ சித்தஸ்ஸ மஜ்ஜனபா⁴வோ. த²ம்போ⁴தி த²த்³த⁴பா⁴வோ. பச்சுபட்டா²பனாதி பச்சனீகட்டா²பனா, த⁴ம்மேன நயேன வுத்தஸ்ஸ படிவிருஜ்ஜி²த்வா டா²னம். மாயாதி ‘‘இதே⁴கச்சோ காயேன து³ச்சரிதம் சரித்வா’’திஆதி³னா (விப⁴. 894) நயேன விப⁴ங்கே³ விப⁴த்தா கதபாபபடிச்சா²த³னதா. உஸூயாதி பரலாப⁴ஸக்காராதீ³ஸு இஸ்ஸா. ப⁴ஸ்ஸஸமுஸ்ஸயோதி ஸமுஸ்ஸிதம் ப⁴ஸ்ஸம், அத்துக்கம்ஸனதாதி வுத்தம் ஹோதி. மானாதிமானோதி ‘‘இதே⁴கச்சோ ஜாதியா வா…பே… அஞ்ஞதரஞ்ஞதரேன வத்து²னா புப்³ப³காலம் பரேஹி ஸதி³ஸம் அத்தானம் த³ஹதி, அபரகாலம் அத்தானம் ஸேய்யம் த³ஹதி, பரே ஹீனே த³ஹதி, யோ ஏவரூபோ மானோ…பே… கேதுகம்யதா சித்தஸ்ஸா’’தி (விப⁴. 880) விப⁴ங்கே³ விப⁴த்தோ. அஸப்³பி⁴ ஸந்த²வோதி அஸப்புரிஸேஹி ஸந்த²வோ. ஏஸாமக³ந்தோ⁴ ந ஹி மம்ஸபோ⁴ஜனந்தி ஏஸ கோதா⁴தி³ நவவிதோ⁴ அகுஸலராஸி புப்³பே³ வுத்தேனேவத்தே²ன ஆமக³ந்தோ⁴தி வேதி³தப்³போ³, ந ஹி மம்ஸபோ⁴ஜனந்தி.

249. ஏவம் த⁴ம்மாதி⁴ட்டா²னாய தே³ஸனாய நவவித⁴ம் ஆமக³ந்த⁴ம் த³ஸ்ஸேத்வா புனபி புப்³பே³ வுத்தனயேனேவ புக்³க³லாதி⁴ட்டா²னாய தே³ஸனாய ஆமக³ந்தே⁴ விஸ்ஸஜ்ஜேந்தோ திஸ்ஸோ கா³தா²யோ அபா⁴ஸி. தத்த² யே பாபஸீலாதி யே பாபஸமாசாரதாய ‘‘பாபஸீலா’’தி லோகே பாகடா. இணகா⁴தஸூசகாதி வஸலஸுத்தே வுத்தனயேன இணம் க³ஹேத்வா தஸ்ஸ அப்பதா³னேன இணகா⁴தா, பேஸுஞ்ஞேன ஸூசகா ச. வோஹாரகூடா இத⁴ பாடிரூபிகாதி த⁴ம்மட்டட்டா²னே டி²தா லஞ்ஜம் க³ஹேத்வா ஸாமிகே பராஜேந்தா கூடேன வோஹாரேன ஸமன்னாக³தத்தா வோஹாரகூடா, த⁴ம்மட்ட²படிரூபகத்தா பாடிரூபிகா. அத² வா இதா⁴தி ஸாஸனே. பாடிரூபிகாதி து³ஸ்ஸீலா. தே ஹி யஸ்மா நேஸம் இரியாபத²ஸம்பதா³தீ³ஹி ஸீலவந்தபடிரூபம் அத்தி², தஸ்மா படிரூபா, படிரூபா ஏவ பாடிரூபிகா. நராத⁴மா யேத⁴ கரோந்தி கிப்³பி³ஸந்தி யே இத⁴ லோகே நராத⁴மா மாதாபிதூஸு பு³த்³த⁴பச்சேகபு³த்³தா⁴தீ³ஸு ச மிச்சா²படிபத்திஸஞ்ஞிதம் கிப்³பி³ஸம் கரோந்தி. ஏஸாமக³ந்தோ⁴ ந ஹி மம்ஸபோ⁴ஜனந்தி ஏஸ ஏதாய கா³தா²ய புக்³க³லே அதி⁴ட்டா²ய நித்³தி³ட்டோ² ‘‘பாபஸீலதா, இணகா⁴ததா, ஸூசகதா, வோஹாரகூடதா, பாடிரூபிகதா, கிப்³பி³ஸகாரிதா’’தி அபரோபி புப்³பே³ வுத்தேனேவத்தே²ன ச²ப்³பி³தோ⁴ ஆமக³ந்தோ⁴ வேதி³தப்³போ³, ந ஹி மம்ஸபோ⁴ஜனந்தி.

250. யே இத⁴ பாணேஸு அஸஞ்ஞதா ஜனாதி யே ஜனா இத⁴லோகே பாணேஸு யதா²காமசாரிதாய ஸதம்பி ஸஹஸ்ஸம்பி மாரேத்வா அனுத்³த³யாமத்தஸ்ஸாபி அகரணேன அஸம்யதா. பரேஸமாதா³ய விஹேஸமுய்யுதாதி பரேஸம் ஸந்தகம் ஆதா³ய த⁴னம் வா ஜீவிதம் வா ததோ ‘‘மா ஏவம் கரோதா²’’தி யாசந்தானம் வா நிவாரேந்தானம் வா பாணிலேட்³டு³த³ண்டா³தீ³ஹி விஹேஸம் உய்யுதா. பரே வா ஸத்தே ஸமாதா³ய ‘‘அஜ்ஜ த³ஸ, அஜ்ஜ வீஸ’’ந்தி ஏவம் ஸமாதி³யித்வா தேஸம் வத⁴ப³ந்த⁴னாதீ³ஹி விஹேஸமுய்யுதா. து³ஸ்ஸீலலுத்³தா³தி நிஸ்ஸீலா ச து³ராசாரத்தா, லுத்³தா³ ச குரூரகம்மந்தா லோஹிதபாணிதாய, மச்ச²கா⁴தகமிக³ப³ந்த⁴கஸாகுணிகாத³யோ இதா⁴தி⁴ப்பேதா. ப²ருஸாதி ப²ருஸவாசா. அனாத³ராதி ‘‘இதா³னி ந கரிஸ்ஸாம, விரமிஸ்ஸாம ஏவரூபா’’தி ஏவம் ஆத³ரவிரஹிதா. ஏஸாமக³ந்தோ⁴ ந ஹி மம்ஸபோ⁴ஜனந்தி ஏஸ ஏதாய கா³தா²ய புக்³க³லே அதி⁴ட்டா²ய நித்³தி³ட்டோ² ‘‘பாணாதிபாதோ வத⁴சே²த³ப³ந்த⁴ன’’ந்திஆதி³னா நயேன புப்³பே³ வுத்தோ ச அவுத்தோ ச ‘‘பாணேஸு அஸம்யததா பரேஸம் விஹேஸதா து³ஸ்ஸீலதா லுத்³த³தா ப²ருஸதா அனாத³ரோ’’தி ச²ப்³பி³தோ⁴ ஆமக³ந்தோ⁴ வேதி³தப்³போ³, ந ஹி மம்ஸபோ⁴ஜனந்தி. புப்³பே³ வுத்தம்பி ஹி ஸோதூனம் ஸோதுகாமதாய அவதா⁴ரணதாய த³ள்ஹீகரணதாயாதி ஏவமாதீ³ஹி காரணேஹி புன வுச்சதி. தேனேவ ச பரதோ வக்க²தி ‘‘இச்சேதமத்த²ம் ப⁴க³வா புனப்புனம், அக்கா²ஸி நம் வேத³யி மந்தபாரகூ³’’தி.

251. ஏதேஸு கி³த்³தா⁴ விருத்³தா⁴திபாதினோதி ஏதேஸு பாணேஸு கே³தே⁴ன கி³த்³தா⁴, தோ³ஸேன விருத்³தா⁴, மோஹேன ஆதீ³னவம் அபஸ்ஸந்தா புனப்புனம் அஜ்ஜா²சாரப்பத்தியா அதிபாதினோ, ஏதேஸு வா ‘‘பாணாதிபாதோ வத⁴சே²த³ப³ந்த⁴ன’’ந்திஆதி³னா நயேன வுத்தேஸு பாபகம்மேஸு யதா²ஸம்ப⁴வம் யே கே³த⁴விரோதா⁴திபாதஸங்கா²தா ராக³தோ³ஸமோஹா, தேஹி கி³த்³தா⁴ விருத்³தா⁴ அதிபாதினோ ச. நிச்சுய்யுதாதி அகுஸலகரணே நிச்சம் உய்யுதா, கதா³சி படிஸங்கா²ய அப்படிவிரதா. பேச்சாதி அஸ்மா லோகா பரம் க³ந்த்வா. தமம் வஜந்தி யே, பதந்தி ஸத்தா நிரயம் அவம்ஸிராதி யே லோகந்தரிகந்த⁴காரஸங்கா²தம் நீசகுலதாதி³பே⁴த³ம் வா தமம் வஜந்தி, யே ச பதந்தி ஸத்தா அவீசிஆதி³பே⁴த³ம் நிரயம் அவம்ஸிரா அதோ⁴க³தஸீஸா. ஏஸாமக³ந்தோ⁴தி தேஸம் ஸத்தானம் தமவஜனனிரயபதனஹேது ஏஸ கே³த⁴விரோதா⁴திபாதபே⁴தோ³ ஸப்³பா³மக³ந்த⁴மூலபூ⁴தோ யதா²வுத்தேனத்தே²ன திவிதோ⁴ ஆமக³ந்தோ⁴. ந ஹி மம்ஸபோ⁴ஜனந்தி மம்ஸபோ⁴ஜனம் பன ந ஆமக³ந்தோ⁴தி.

252. ஏவம் ப⁴க³வா பரமத்த²தோ ஆமக³ந்த⁴ம் விஸ்ஸஜ்ஜேத்வா து³க்³க³திமக்³க³பா⁴வஞ்சஸ்ஸ பகாஸேத்வா இதா³னி யஸ்மிம் மச்ச²மம்ஸபோ⁴ஜனே தாபஸோ ஆமக³ந்த⁴ஸஞ்ஞீ து³க்³க³திமக்³க³ஸஞ்ஞீ ச ஹுத்வா தஸ்ஸ அபோ⁴ஜனேன ஸுத்³தி⁴காமோ ஹுத்வா தம் ந பு⁴ஞ்ஜதி, தஸ்ஸ ச அஞ்ஞஸ்ஸ ச ததா²வித⁴ஸ்ஸ ஸோதே⁴தும் அஸமத்த²பா⁴வம் த³ஸ்ஸேந்தோ ‘‘ந மச்ச²மம்ஸ’’ந்தி இமம் ச²ப்பத³ம் கா³த²மாஹ. தத்த² ஸப்³ப³பதா³னி அந்திமபாதே³ன யோஜேதப்³பா³னி – ந மச்ச²மம்ஸம் ஸோதே⁴தி மச்சம் அவிதிண்ணகங்க²ம், ந ஆஹுதியஞ்ஞமுதூபஸேவனா ஸோதே⁴தி மச்சம் அவிதிண்ணகங்க²ந்தி ஏவம். ஏத்த² ச ந மச்ச²மம்ஸந்தி அகா²தி³யமானம் மச்ச²மம்ஸம் ந ஸோதே⁴தி, ததா² அனாஸகத்தந்தி ஏவம் போராணா வண்ணேந்தி. ஏவம் பன ஸுந்த³ரதரம் ஸியா ‘‘ந மச்ச²மம்ஸானம் அனாஸகத்தம் ந மச்ச²மம்ஸானானாஸகத்தம், மச்ச²மம்ஸானம் அனாஸகத்தம் ந ஸோதே⁴தி, மச்ச’’ந்தி அதா²பி ஸியா, ஏவம் ஸந்தே அனாஸகத்தம் ஓஹீயதீதி? தஞ்ச ந, அமரதபேன ஸங்க³ஹிதத்தா. ‘‘யே வாபி லோகே அமரா ப³ஹூ தபா’’தி ஏத்த² ஹி ஸப்³போ³பி வுத்தாவஸேஸோ அத்தகிலமதோ² ஸங்க³ஹம் க³ச்ச²தீதி. நக்³கி³யந்தி அசேலகத்தம். முண்டி³யந்தி முண்ட³பா⁴வோ. ஜடாஜல்லந்தி ஜடா ச ரஜோஜல்லஞ்ச. க²ராஜினானீதி க²ரானி அஜினசம்மானி. அக்³கி³ஹுத்தஸ்ஸுபஸேவனாதி அக்³கி³பாரிசாரியா. அமராதி அமரபா⁴வபத்த²னதாய பவத்தகாயகிலேஸா. ப³ஹூதி உக்குடிகப்பதா⁴னாதி³பே⁴த³தோ அனேகே. தபாதி ஸரீரஸந்தாபா. மந்தாதி வேதா³. ஆஹுதீதி அக்³கி³ஹோமகம்மம். யஞ்ஞமுதூபஸேவனாதி அஸ்ஸமேதா⁴தி³யஞ்ஞா ச உதூபஸேவனா ச. உதூபஸேவனா நாம கி³ம்ஹே ஆதபட்டா²னஸேவனா, வஸ்ஸே ருக்க²மூலஸேவனா, ஹேமந்தே ஜலப்பவேஸஸேவனா. ந ஸோதே⁴ந்தி மச்சம் அவிதிண்ணகங்க²ந்தி கிலேஸஸுத்³தி⁴யா வா ப⁴வஸுத்³தி⁴யா வா அவிதிண்ணவிசிகிச்ச²ம் மச்சம் ந ஸோதே⁴ந்தி. கங்கா²மலே ஹி ஸதி ந விஸுத்³தோ⁴ ஹோதி, த்வஞ்ச ஸகங்கோ²யேவாதி. ஏத்த² ச ‘‘அவிதிண்ணகங்க²’’ந்தி ஏதம் ‘‘ந மச்ச²மம்ஸ’’ந்திஆதீ³னி ஸுத்வா ‘‘கிம் நு கோ² மச்ச²மம்ஸானம் அபோ⁴ஜனாதி³னா ஸியா விஸுத்³தி⁴மக்³கோ³’’தி தாபஸஸ்ஸ கங்கா²ய உப்பன்னாய ப⁴க³வதா வுத்தம் ஸியாதி நோ அதி⁴ப்பாயோ. யா சஸ்ஸ ‘‘ஸோ மச்ச²மம்ஸம் பு⁴ஞ்ஜதீ’’தி ஸுத்வாவ பு³த்³தே⁴ கங்கா² உப்பன்னா, தம் ஸந்தா⁴யேதம் வுத்தந்தி வேதி³தப்³ப³ம்.

253. ஏவம் மச்ச²மம்ஸானாஸகத்தாதீ³னம் ஸோதே⁴தும் அஸமத்த²பா⁴வம் த³ஸ்ஸேத்வா இதா³னி ஸோதே⁴தும் ஸமத்தே² த⁴ம்மே த³ஸ்ஸேந்தோ ‘‘ஸோதேஸு கு³த்தோ’’தி இமம் கா³த²மாஹ. தத்த² ஸோதேஸூதி ச²ஸு இந்த்³ரியேஸு. கு³த்தோதி இந்த்³ரியஸம்வரகு³த்தியா ஸமன்னாக³தோ. ஏத்தாவதா இந்த்³ரியஸம்வரபரிவாரஸீலம் த³ஸ்ஸேதி. விதி³திந்த்³ரியோ சரேதி ஞாதபரிஞ்ஞாய ச²ளிந்த்³ரியானி விதி³த்வா பாகடானி கத்வா சரேய்ய, விஹரேய்யாதி வுத்தம் ஹோதி. ஏத்தாவதா விஸுத்³த⁴ஸீலஸ்ஸ நாமரூபபரிச்சே²த³ம் த³ஸ்ஸேதி. த⁴ம்மே டி²தோதி அரியமக்³கே³ன அபி⁴ஸமேதப்³ப³சதுஸச்சத⁴ம்மே டி²தோ. ஏதேன ஸோதாபத்திபூ⁴மிம் த³ஸ்ஸேதி. அஜ்ஜவமத்³த³வே ரதோதி உஜுபா⁴வே ச முது³பா⁴வே ச ரதோ. ஏதேன ஸகதா³கா³மிபூ⁴மிம் த³ஸ்ஸேதி. ஸகதா³கா³மீ ஹி காயவங்காதி³கரானம் சித்தத²த்³த⁴பா⁴வகரானஞ்ச ராக³தோ³ஸானம் தனுபா⁴வா அஜ்ஜவமத்³த³வே ரதோ ஹோதி. ஸங்கா³திகோ³தி ராக³தோ³ஸஸங்கா³திகோ³. ஏதேன அனாகா³மிபூ⁴மிம் த³ஸ்ஸேதி. ஸப்³ப³து³க்க²ப்பஹீனோதி ஸப்³ப³ஸ்ஸ வட்டது³க்க²ஸ்ஸ ஹேதுப்பஹானேன பஹீனஸப்³ப³து³க்கோ². ஏதேன அரஹத்தபூ⁴மிம் த³ஸ்ஸேதி. ந லிப்பதி தி³ட்ட²ஸுதேஸு தீ⁴ரோதி ஸோ ஏவம் அனுபுப்³பே³ன அரஹத்தம் பத்தோ தி⁴திஸம்பதா³ய தீ⁴ரோ தி³ட்ட²ஸுதேஸு த⁴ம்மேஸு கேனசி கிலேஸேன ந லிப்பதி. ந கேவலஞ்ச தி³ட்ட²ஸுதேஸு, முதவிஞ்ஞாதேஸு ச ந லிப்பதி, அஞ்ஞத³த்து² பரமவிஸுத்³தி⁴ப்பத்தோ ஹோதீதி அரஹத்தனிகூடேன தே³ஸனம் நிட்டா²பேஸி.

254-5. இதோ பரம் ‘‘இச்சேதமத்த²’’ந்தி த்³வே கா³தா² ஸங்கீ³திகாரேஹி வுத்தா. தாஸமத்தோ² – இதி ப⁴க³வா கஸ்ஸபோ ஏதமத்த²ம் புனப்புனம் அனேகாஹி கா³தா²ஹி த⁴ம்மாதி⁴ட்டா²னாய புக்³க³லாதி⁴ட்டா²னாய ச தே³ஸனாய யாவ தாபஸோ அஞ்ஞாஸி, தாவ ஸோ அக்கா²ஸி கதே²ஸி வித்தா²ரேஸி. நம் வேத³யி மந்தபாரகூ³தி ஸோபி தஞ்ச அத்த²ம் மந்தபாரகூ³, வேத³பாரகூ³, திஸ்ஸோ ப்³ராஹ்மணோ வேத³யி அஞ்ஞாஸி. கிம் காரணா? யஸ்மா அத்த²தோ ச பத³தோ ச தே³ஸனானயதோ ச சித்ராஹி கா³தா²ஹி முனீ பகாஸயி. கீதி³ஸோ? நிராமக³ந்தோ⁴ அஸிதோ து³ரன்னயோ, ஆமக³ந்த⁴கிலேஸாபா⁴வா நிராமக³ந்தோ⁴, தண்ஹாதி³ட்டி²னிஸ்ஸயாபா⁴வா அஸிதோ, பா³ஹிரதி³ட்டி²வஸேன ‘‘இத³ம் ஸேய்யோ இத³ம் வர’’ந்தி கேனசி நேதும் அஸக்குணேய்யத்தா து³ரன்னயோ. ஏவம் பகாஸிதவதோ சஸ்ஸ ஸுத்வான பு³த்³த⁴ஸ்ஸ ஸுபா⁴ஸிதம் பத³ம் ஸுகதி²தம் த⁴ம்மதே³ஸனம் ஸுத்வா நிராமக³ந்த⁴ம் நிக்கிலேஸயோக³ம், ஸப்³ப³து³க்க²ப்பனூத³னம் ஸப்³ப³வட்டது³க்க²ப்பனூத³னம், நீசமனோ நீசசித்தோ ஹுத்வா வந்தி³ ததா²க³தஸ்ஸ, திஸ்ஸோ ப்³ராஹ்மணோ ததா²க³தஸ்ஸ பாதே³ பஞ்சபதிட்டி²தம் கத்வா வந்தி³. தத்தே²வ பப்³ப³ஜ்ஜமரோசயித்தா²தி தத்தே²வ ச நம் ஆஸனே நிஸின்னம் கஸ்ஸபம் ப⁴க³வந்தம் திஸ்ஸோ தாபஸோ பப்³ப³ஜ்ஜமரோசயித்த², அயாசீதி வுத்தம் ஹோதி. தம் ப⁴க³வா ‘‘ஏஹி பி⁴க்கூ²’’தி ஆஹ. ஸோ தங்க²ணம்யேவ அட்ட²பரிக்கா²ரயுத்தோ ஹுத்வா ஆகாஸேனாக³ந்த்வா வஸ்ஸஸதிகத்தே²ரோ விய ப⁴க³வந்தம் வந்தி³த்வா கதிபாஹேனேவ ஸாவகபாரமிஞாணம் படிவிஜ்ஜி²த்வா திஸ்ஸோ நாம அக்³க³ஸாவகோ அஹோஸி, புன து³தியோ பா⁴ரத்³வாஜோ நாம. ஏவம் தஸ்ஸ ப⁴க³வதோ திஸ்ஸபா⁴ரத்³வாஜம் நாம ஸாவகயுக³ம் அஹோஸி.

அம்ஹாகம் பன ப⁴க³வா யா ச திஸ்ஸேன ப்³ராஹ்மணேன ஆதி³தோ திஸ்ஸோ கா³தா² வுத்தா, யா ச கஸ்ஸபேன ப⁴க³வதா மஜ்ஜே² நவ, யா ச ததா³ ஸங்கீ³திகாரேஹி அந்தே த்³வே, தா ஸப்³பா³பி சுத்³த³ஸ கா³தா² ஆனேத்வா பரிபுண்ணம் கத்வா இமம் ஆமக³ந்த⁴ஸுத்தம் ஆசரியப்பமுகா²னம் பஞ்சன்னம் தாபஸஸதானம் ஆமக³ந்த⁴ம் ப்³யாகாஸி. தம் ஸுத்வா ஸோ ப்³ராஹ்மணோ ததே²வ நீசமனோ ஹுத்வா ப⁴க³வதோ பாதே³ வந்தி³த்வா பப்³ப³ஜ்ஜம் யாசி ஸத்³தி⁴ம் பரிஸாய. ‘‘ஏத² பி⁴க்க²வோ’’தி ப⁴க³வா அவோச. தே ததே²வ ஏஹிபி⁴க்கு²பா⁴வம் பத்வா ஆகாஸேனாக³ந்த்வா ப⁴க³வந்தம் வந்தி³த்வா கதிபாஹேனேவ ஸப்³பே³வ அக்³க³ப²லே அரஹத்தே பதிட்ட²ஹிம்ஸூதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ஆமக³ந்த⁴ஸுத்தவண்ணனா நிட்டி²தா.

3. ஹிரிஸுத்தவண்ணனா

ஹிரிம் தரந்தந்தி ஹிரிஸுத்தம். கா உப்பத்தி? அனுப்பன்னே ப⁴க³வதி ஸாவத்தி²யம் அஞ்ஞதரோ ப்³ராஹ்மணமஹாஸாலோ அட்³டோ⁴ அஹோஸி அஸீதிகோடித⁴னவிப⁴வோ. தஸ்ஸ ஏகபுத்தகோ அஹோஸி பியோ மனாபோ. ஸோ தம் தே³வகுமாரம் விய நானப்பகாரேஹி ஸுகூ²பகரணேஹி ஸம்வட்³டே⁴ந்தோ தம் ஸாபதேய்யம் தஸ்ஸ அனிய்யாதேத்வாவ காலமகாஸி ஸத்³தி⁴ம் ப்³ராஹ்மணியா. ததோ தஸ்ஸ மாணவஸ்ஸ மாதாபிதூனம் அச்சயேன ப⁴ண்டா³கா³ரிகோ ஸாரக³ப்³ப⁴ம் விவரித்வா ஸாபதேய்யம் நிய்யாதேந்தோ ஆஹ – ‘‘இத³ம் தே, ஸாமி, மாதாபிதூனம் ஸந்தகம், இத³ம் அய்யகபய்யகானம் ஸந்தகம், இத³ம் ஸத்தகுலபரிவட்டேன ஆக³த’’ந்தி. மாணவோ த⁴னம் தி³ஸ்வா சிந்தேஸி – ‘‘இத³ம் த⁴னம்யேவ தி³ஸ்ஸதி, யேஹி பன இத³ம் ஸஞ்சிதம், தே ந தி³ஸ்ஸந்தி, ஸப்³பே³வ மச்சுவஸம் க³தா. க³ச்ச²ந்தா ச ந இதோ கிஞ்சி ஆதா³ய அக³மம்ஸு, ஏவம் நாம போ⁴கே³ பஹாய க³ந்தப்³போ³ பரலோகோ, ந ஸக்கா கிஞ்சி ஆதா³ய க³ந்தும் அஞ்ஞத்ர ஸுசரிதேன. யம்னூனாஹம் இமம் த⁴னம் பரிச்சஜித்வா ஸுசரிதத⁴னம் க³ண்ஹேய்யம், யம் ஸக்கா ஆதா³ய க³ந்து’’ந்தி. ஸோ தி³வஸே தி³வஸே ஸதஸஹஸ்ஸம் விஸ்ஸஜ்ஜேந்தோ புன சிந்தேஸி – ‘‘பஹூதமித³ம் த⁴னம், கிம் இமினா ஏவமப்பகேன பரிச்சாகே³ன, யம்னூனாஹம் மஹாதா³னம் த³தே³ய்ய’’ந்தி. ஸோ ரஞ்ஞோ ஆரோசேஸி – ‘‘மஹாராஜ, மம க⁴ரே ஏத்தகம் த⁴னம் அத்தி², இச்சா²மி தேன மஹாதா³னம் தா³தும். ஸாது⁴, மஹாராஜ, நக³ரே கோ⁴ஸனம் காராபேதா²’’தி. ராஜா ததா² காராபேஸி. ஸோ ஆக³தாக³தானம் பா⁴ஜனானி பூரேத்வா ஸத்தஹி தி³வஸேஹி ஸப்³ப³த⁴னமதா³ஸி, த³த்வா ச சிந்தேஸி – ‘‘ஏவம் மஹாபரிச்சாக³ம் கத்வா அயுத்தம் க⁴ரே வஸிதும், யம்னூனாஹம் பப்³ப³ஜேய்ய’’ந்தி. ததோ பரிஜனஸ்ஸ ஏதமத்த²ம் ஆரோசேஸி. தே ‘‘மா, த்வம் ஸாமி, ‘த⁴னம் பரிக்கீ²ண’ந்தி சிந்தயி, மயம் அப்பகேனேவ காலேன நானாவிதே⁴ஹி உபாயேஹி த⁴னஸஞ்சயம் கரிஸ்ஸாமா’’தி வத்வா நானப்பகாரேஹி தம் யாசிம்ஸு. ஸோ தேஸம் யாசனம் அனாதி³யித்வாவ தாபஸபப்³ப³ஜ்ஜம் பப்³ப³ஜி.

தத்த² அட்ட²விதா⁴ தாபஸா – ஸபுத்தப⁴ரியா, உஞ்சா²சாரிகா, ஸம்பத்தகாலிகா, அனக்³கி³பக்கிகா, அஸ்மமுட்டி²கா, த³ந்தலுய்யகா, பவத்தப²லிகா, வண்டமுத்திகா சாதி (தீ³. நி. அட்ட². 1.280). தத்த² ஸபுத்தப⁴ரியாதி புத்ததா³ரேன ஸத்³தி⁴ம் பப்³ப³ஜித்வா கஸிவணிஜ்ஜாதீ³ஹி ஜீவிகம் கப்பயமானா கேணியஜடிலாத³யோ. உஞ்சா²சாரிகாதி நக³ரத்³வாரே அஸ்ஸமம் காராபேத்வா தத்த² க²த்தியப்³ராஹ்மணகுமாராத³யோ ஸிப்பாதீ³னி ஸிக்கா²பேத்வா ஹிரஞ்ஞஸுவண்ணம் படிக்கி²பித்வா திலதண்டு³லாதி³கப்பியப⁴ண்ட³படிக்³கா³ஹகா, தே ஸபுத்தப⁴ரியேஹி ஸேட்ட²தரா. ஸம்பத்தகாலிகாதி ஆஹாரவேலாய ஸம்பத்தம் ஆஹாரம் க³ஹேத்வா யாபேந்தா, தே உஞ்சா²சாரிகேஹி ஸேட்ட²தரா. அனக்³கி³பக்கிகாதி அக்³கி³னா அபக்கபத்தப²லானி கா²தி³த்வா யாபேந்தா, தே ஸம்பத்தகாலிகேஹி ஸேட்ட²தரா. அஸ்மமுட்டி²காதி முட்டி²பாஸாணம் க³ஹேத்வா அஞ்ஞம் வா கிஞ்சி வாஸிஸத்த²காதி³ம் க³ஹேத்வா விசரந்தா யதா³ சா²தா ஹோந்தி, ததா³ ஸம்பத்தருக்க²தோ தசம் க³ஹேத்வா கா²தி³த்வா உபோஸத²ங்கா³னி அதி⁴ட்டா²ய சத்தாரோ ப்³ரஹ்மவிஹாரே பா⁴வேந்தி, தே அனக்³கி³பக்கிகேஹி ஸேட்ட²தரா. த³ந்தலுய்யகாதி முட்டி²பாஸாணாதீ³னிபி அக³ஹேத்வா சரந்தா கு²தா³காலே ஸம்பத்தருக்க²தோ த³ந்தேஹி உப்பாடேத்வா தசம் கா²தி³த்வா உபோஸத²ங்கா³னி அதி⁴ட்டா²ய ப்³ரஹ்மவிஹாரே பா⁴வேந்தி, தே அஸ்மமுட்டி²கேஹி ஸேட்ட²தரா. பவத்தப²லிகாதி ஜாதஸ்ஸரம் வா வனஸண்ட³ம் வா நிஸ்ஸாய வஸந்தா யம் தத்த² ஸரே பி⁴ஸமுளாலாதி³, யம் வா வனஸண்டே³ புப்ப²காலே புப்ப²ம், ப²லகாலே ப²லம், தமேவ கா²த³ந்தி. புப்ப²ப²லே அஸதி அந்தமஸோ தத்த² ருக்க²பபடிகம்பி கா²தி³த்வா வஸந்தி, ந த்வேவ ஆஹாரத்தா²ய அஞ்ஞத்ர க³ச்ச²ந்தி. உபோஸத²ங்கா³தி⁴ட்டா²னம் ப்³ரஹ்மவிஹாரபா⁴வனம் ச கரோந்தி, தே த³ந்தலுய்யகேஹி ஸேட்ட²தரா. வண்டமுத்திகா நாம வண்டமுத்தானி பூ⁴மியம் பதிதானி பண்ணானியேவ கா²த³ந்தி, ஸேஸம் புரிமஸதி³ஸமேவ, தே ஸப்³ப³ஸேட்டா².

அயம் பன ப்³ராஹ்மணகுலபுத்தோ ‘‘தாபஸபப்³ப³ஜ்ஜாஸு அக்³க³பப்³ப³ஜ்ஜம் பப்³ப³ஜிஸ்ஸாமீ’’தி வண்டமுத்திகபப்³ப³ஜ்ஜமேவ பப்³ப³ஜித்வா ஹிமவந்தே த்³வே தயோ பப்³ப³தே அதிக்கம்ம அஸ்ஸமம் காராபேத்வா படிவஸதி. அத² ப⁴க³வா லோகே உப்பஜ்ஜித்வா பவத்திதவரத⁴ம்மசக்கோ அனுபுப்³பே³ன ஸாவத்தி²ம் க³ந்த்வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாவத்தி²வாஸீ ஏகோ புரிஸோ பப்³ப³தே சந்த³னஸாராதீ³னி க³வேஸந்தோ தஸ்ஸ அஸ்ஸமம் பத்வா அபி⁴வாதே³த்வா ஏகமந்தம் அட்டா²ஸி. ஸோ தம் தி³ஸ்வா ‘‘குதோ ஆக³தோஸீ’’தி புச்சி². ‘‘ஸாவத்தி²தோ, ப⁴ந்தே’’தி. ‘‘கா தத்த² பவத்தீ’’தி? ‘‘தத்த², ப⁴ந்தே, மனுஸ்ஸா அப்பமத்தா தா³னாதீ³னி புஞ்ஞானி கரோந்தீ’’தி. ‘‘கஸ்ஸ ஓவாத³ம் ஸுத்வா’’தி? ‘‘பு³த்³த⁴ஸ்ஸ ப⁴க³வதோ’’தி. தாபஸோ பு³த்³த⁴ஸத்³த³ஸ்ஸவனேன விம்ஹிதோ ‘‘பு³த்³தோ⁴தி த்வம், போ⁴ புரிஸ, வதே³ஸீ’’தி ஆமக³ந்தே⁴ வுத்தனயேனேவ திக்க²த்தும் புச்சி²த்வா ‘‘கோ⁴ஸோபி கோ² ஏஸோ து³ல்லபோ⁴’’தி அத்தமனோ ப⁴க³வதோ ஸந்திகம் க³ந்துகாமோ ஹுத்வா சிந்தேஸி – ‘‘ந யுத்தம் பு³த்³த⁴ஸ்ஸ ஸந்திகம் துச்ச²மேவ க³ந்தும், கிம் நு கோ² க³ஹேத்வா க³ச்சே²ய்ய’’ந்தி. புன சிந்தேஸி – ‘‘பு³த்³தா⁴ நாம ஆமிஸக³ருகா ந ஹோந்தி, ஹந்தா³ஹம் த⁴ம்மபண்ணாகாரம் க³ஹேத்வா க³ச்சா²மீ’’தி சத்தாரோ பஞ்ஹே அபி⁴ஸங்க²ரி –

‘‘கீதி³ஸோ மித்தோ ந ஸேவிதப்³போ³, கீதி³ஸோ மித்தோ ஸேவிதப்³போ³;

கீதி³ஸோ பயோகோ³ பயுஞ்ஜிதப்³போ³, கிம் ரஸானம் அக்³க³’’ந்தி.

ஸோ தே பஞ்ஹே க³ஹேத்வா மஜ்ஜி²மதே³ஸாபி⁴முகோ² பக்கமித்வா அனுபுப்³பே³ன ஸாவத்தி²ம் பத்வா ஜேதவனம் பவிட்டோ². ப⁴க³வாபி தஸ்மிம் ஸமயே த⁴ம்மதே³ஸனத்தா²ய ஆஸனே நிஸின்னோயேவ ஹோதி. ஸோ ப⁴க³வந்தம் தி³ஸ்வா அவந்தி³த்வாவ ஏகமந்தம் அட்டா²ஸி. ப⁴க³வா ‘‘கச்சி, இஸி, க²மனீய’’ந்திஆதி³னா நயேன ஸம்மோதி³. ஸோபி ‘‘க²மனீயம், போ⁴ கோ³தமா’’திஆதி³னா நயேன படிஸம்மோதி³த்வா ‘‘யதி³ பு³த்³தோ⁴ ப⁴விஸ்ஸதி, மனஸா புச்சி²தே பஞ்ஹே வாசாய ஏவ விஸ்ஸஜ்ஜேஸ்ஸதீ’’தி மனஸா ஏவ ப⁴க³வந்தம் தே பஞ்ஹே புச்சி². ப⁴க³வா ப்³ராஹ்மணேன புட்டோ² ஆதி³பஞ்ஹம் தாவ விஸ்ஸஜ்ஜேதும் ஹிரிம் தரந்தந்தி ஆரபி⁴த்வா அட்³ட⁴தேய்யா கா³தா²யோ ஆஹ.

256. தாஸம் அத்தோ² – ஹிரிம் தரந்தந்தி ஹிரிம் அதிக்கமந்தம் அஹிரிகம் நில்லஜ்ஜம். விஜிகு³ச்ச²மானந்தி அஸுசிமிவ பஸ்ஸமானம். அஹிரிகோ ஹி ஹிரிம் ஜிகு³ச்ச²தி அஸுசிமிவ பஸ்ஸதி, தேன நம் ந ப⁴ஜதி ந அல்லீயதி. தேன வுத்தம் ‘‘விஜிகு³ச்ச²மான’’ந்தி. தவாஹமஸ்மி இதி பா⁴ஸமானந்தி ‘‘அஹம், ஸம்ம, தவ ஸஹாயோ ஹிதகாமோ ஸுக²காமோ, ஜீவிதம்பி மே துய்ஹம் அத்தா²ய பரிச்சத்த’’ந்தி ஏவமாதி³னா நயேன பா⁴ஸமானம். ஸய்ஹானி கம்மானி அனாதி³யந்தந்தி ஏவம் பா⁴ஸித்வாபி ச ஸய்ஹானி காதும் ஸக்கானிபி தஸ்ஸ கம்மானி அனாதி³யந்தம் கரணத்தா²ய அஸமாதி³யந்தம். அத² வா சித்தேன தத்த² ஆத³ரமத்தம்பி அகரோந்தம், அபிச கோ² பன உப்பன்னேஸு கிச்சேஸு ப்³யஸனமேவ த³ஸ்ஸேந்தம். நேஸோ மமந்தி இதி நம் விஜஞ்ஞாதி தம் ஏவரூபம் ‘‘மித்தபடிரூபகோ ஏஸோ, நேஸோ மே மித்தோ’’தி ஏவம் பண்டி³தோ புரிஸோ விஜானேய்ய.

257. அனன்வயந்தி யம் அத்த²ம் த³ஸ்ஸாமி, கரிஸ்ஸாமீதி ச பா⁴ஸதி, தேன அனனுக³தம். பியம் வாசம் யோ மித்தேஸு பகுப்³ப³தீதி யோ அதீதானாக³தேஹி பதே³ஹி படிஸந்த²ரந்தோ நிரத்த²கேன ஸங்க³ண்ஹந்தோ கேவலம் ப்³யஞ்ஜனச்சா²யாமத்தேனேவ பியம் மித்தேஸு வாசம் பவத்தேதி. அகரோந்தம் பா⁴ஸமானம், பரிஜானந்தி பண்டி³தாதி ஏவரூபம் யம் பா⁴ஸதி, தம் அகரோந்தம், கேவலம் வாசாய பா⁴ஸமானம் ‘‘வசீபரமோ நாமேஸ அமித்தோ மித்தபடிரூபகோ’’தி ஏவம் பரிச்சி²ந்தி³த்வா பண்டி³தா ஜானந்தி.

258. ந ஸோ மித்தோ யோ ஸதா³ அப்பமத்தோ, பே⁴தா³ஸங்கீ ரந்த⁴மேவானுபஸ்ஸீதி யோ பே⁴த³மேவ ஆஸங்கமானோ கதமது⁴ரேன உபசாரேன ஸதா³ அப்பமத்தோ விஹரதி, யம்கிஞ்சி அஸ்ஸதியா அமனஸிகாரேன கதம், அஞ்ஞாணகேன வா அகதம், ‘‘யதா³ மம் க³ரஹிஸ்ஸதி, ததா³ நம் ஏதேன படிசோதே³ஸ்ஸாமீ’’தி ஏவம் ரந்த⁴மேவ அனுபஸ்ஸதி, ந ஸோ மித்தோ ஸேவிதப்³போ³தி.