8. கூ³த²கா²த³கபேதவத்து²வண்ணனா

கூ³த²கூபதோ உக்³க³ந்த்வாதி இத³ம் ஸத்த²ரி ஜேதவனே விஹரந்தே ஏகம் கூ³த²கா²த³கபேதம் ஆரம்ப⁴ வுத்தம். ஸாவத்தி²யா கிர அவிதூ³ரே அஞ்ஞதரஸ்மிம் கா³மகே ஏகோ குடும்பி³கோ அத்தனோ குலூபகம் பி⁴க்கு²ம் உத்³தி³ஸ்ஸ விஹாரம் காரேஸி. தத்த² நானாஜனபத³தோ பி⁴க்கூ² ஆக³ந்த்வா படிவஸிம்ஸு. தே தி³ஸ்வா மனுஸ்ஸா பஸன்னசித்தா பணீதேன பச்சயேன உபட்ட²ஹிம்ஸு. குலூபகோ பி⁴க்கு² தம் அஸஹமானோ இஸ்ஸாபகதோ ஹுத்வா தேஸம் பி⁴க்கூ²னம் தோ³ஸம் வத³ந்தோ குடும்பி³கம் உஜ்ஜா²பேஸி. குடும்பி³கோ தே பி⁴க்கூ² குலூபகஞ்ச பரிப⁴வந்தோ பரிபா⁴ஸி. அத² குலூபகோ காலம் கத்வா தஸ்மிம்யேவ விஹாரே வச்சகுடியம் பேதோ ஹுத்வா நிப்³ப³த்தி, குடும்பி³கோ பன காலம் கத்வா தஸ்ஸேவ உபரி பேதோ ஹுத்வா நிப்³ப³த்தி. அதா²யஸ்மா மஹாமோக்³க³ல்லானோ தம் தி³ஸ்வா புச்ச²ந்தோ –

766. ‘‘கூ³த²கூபதோ உக்³க³ந்த்வா, கோ ந தீ³னோ பதிட்ட²ஸி;

நிஸ்ஸம்ஸயம் பாபகம்மந்தோ, கிம் நு ஸத்³த³ஹஸே துவ’’ந்தி. –

கா³த²மாஹ. தம் ஸுத்வா பேதோ –

767. ‘‘அஹம் ப⁴த³ந்தே பேதோம்ஹி, து³க்³க³தோ யமலோகிகோ;

பாபகம்மம் கரித்வான, பேதலோகம் இதோ க³தோ’’தி. –

கா³தா²ய அத்தானம் ஆசிக்கி². அத² நம் தே²ரோ –

768. ‘‘கிம் நு காயேன வாசாய, மனஸா து³க்கடம் கதம்;

கிஸ்ஸகம்மவிபாகேன, இத³ம் து³க்க²ம் நிக³ச்ச²ஸீ’’தி. –

கா³தா²ய தேன கதகம்மம் புச்சி². ஸோ பேதோ –

769. ‘‘அஹு ஆவாஸிகோ மய்ஹம், இஸ்ஸுகீ குலமச்ச²ரீ;

அஜ்ஜா²ஸிதோ மய்ஹம் க⁴ரே, கத³ரியோ பரிபா⁴ஸகோ.

770. ‘‘தஸ்ஸாஹம் வசனம் ஸுத்வா, பி⁴க்க²வோ பரிபா⁴ஸிஸம்;

தஸ்ஸகம்மவிபாகேன, பேதலோகம் இதோ க³தோ’’தி. –

த்³வீஹி கா³தா²ஹி அத்தனா கதகம்மம் கதே²ஸி.

769. தத்த² அஹு ஆவாஸிகோ மய்ஹந்தி மய்ஹம் ஆவாஸே மயா கதவிஹாரே ஏகோ பி⁴க்கு² ஆவாஸிகோ நிப³த்³த⁴வஸனகோ அஹோஸி. அஜ்ஜா²ஸிதோ மய்ஹம் க⁴ரேதி குலூபகபா⁴வேன மம கே³ஹே தண்ஹாபி⁴னிவேஸவஸேன அபி⁴னிவிட்டோ².

770. தஸ்ஸாதி தஸ்ஸ குலூபகபி⁴க்கு²ஸ்ஸ. பி⁴க்க²வோதி பி⁴க்கூ². பரிபா⁴ஸிஸந்தி அக்கோஸிம். பேதலோகம் இதோ க³தோதி இமினா ஆகாரேன பேதயோனிம் உபக³தோ பேதபூ⁴தோ.

தம் ஸுத்வா தே²ரோ இதரஸ்ஸ க³திம் புச்ச²ந்தோ –

771. ‘‘அமித்தோ மித்தவண்ணேன, யோ தே ஆஸி குலூபகோ;

காயஸ்ஸ பே⁴தா³ து³ப்பஞ்ஞோ, கிம் நு பேச்ச க³திம் க³தோ’’தி. –

கா³த²மாஹ. தத்த² மித்தவண்ணேனாதி மித்தபடிரூபேன மித்தபடிரூபதாய.

புன பேதோ தே²ரஸ்ஸ தமத்த²ம் ஆசிக்க²ந்தோ –

772. ‘‘தஸ்ஸேவாஹம் பாபகம்மஸ்ஸ, ஸீஸே திட்டா²மி மத்த²கே;

ஸோ ச பரவிஸயம் பத்தோ, மமேவ பரிசாரகோ.

773. ‘‘யம் ப⁴த³ந்தே ஹத³ந்தஞ்ஞே, ஏதம் மே ஹோதி போ⁴ஜனம்;

அஹஞ்ச கோ² யம் ஹதா³மி, ஏதம் ஸோ உபஜீவதீ’’தி. – கா³தா²த்³வயமாஹ;

772. தத்த² தஸ்ஸேவாதி தஸ்ஸேவ மய்ஹம் புப்³பே³ குலூபகபி⁴க்கு²பூ⁴தஸ்ஸ பேதஸ்ஸ. பாபகம்மஸ்ஸாதி பாபஸமாசாரஸ்ஸ. ஸீஸே திட்டா²மி மத்த²கேதி ஸீஸே திட்டா²மி, திட்ட²ந்தோ ச மத்த²கே ஏவ திட்டா²மி, ந ஸீஸப்பமாணே ஆகாஸேதி அத்தோ². பரவிஸயம் பத்தோதி மனுஸ்ஸலோகம் உபாதா³ய பரவிஸயபூ⁴தம் பேத்திவிஸயம் பத்தோ. மமேவாதி மய்ஹம் ஏவ பரிசாரகோ அஹோஸீதி வசனஸேஸோ.

773. யம் ப⁴த³ந்தே ஹத³ந்தஞ்ஞேதி ப⁴த³ந்தே, அய்ய மஹாமோக்³க³லான, தஸ்ஸம் வச்சகுடியம் யம் அஞ்ஞே உஹத³ந்தி வச்சம் ஓஸ்ஸஜந்தி. ஏதம் மே ஹோதி போ⁴ஜனந்தி ஏதம் வச்சம் மய்ஹம் தி³வஸே தி³வஸே போ⁴ஜனம் ஹோதி. யம் ஹதா³மீதி தம் பன வச்சம் கா²தி³த்வா யம்பஹம் வச்சம் கரோமி. ஏதம் ஸோ உபஜீவதீதி ஏதம் மம வச்சம் ஸோ குலூபகபேதோ தி³வஸே தி³வஸே கா²த³னவஸேன உபஜீவதி, அத்தபா⁴வம் யாபேதீதி அத்தோ².

தேஸு குடும்பி³கோ பேஸலே பி⁴க்கூ² ‘‘ஏவம் ஆஹாரபரிபோ⁴க³தோ வரம் தும்ஹாகம் கூ³த²கா²த³ன’’ந்தி அக்கோஸி. குலூபகோ பன குடும்பி³கம்பி ததா²வசனே ஸமாத³பேத்வா ஸயம் ததா² அக்கோஸி, தேனஸ்ஸ ததோபி படிகுட்ட²தரா ஜீவிகா அஹோஸி. ஆயஸ்மா மஹாமோக்³க³ல்லானோ தம் பவத்திம் ப⁴க³வதோ ஆரோசேஸி. ப⁴க³வா தமத்த²ம் அட்டு²ப்பத்திம் கத்வா உபவாதே³ ஆதீ³னவம் த³ஸ்ஸேத்வா ஸம்பத்தபரிஸாய த⁴ம்மம் தே³ஸேஸி. ஸா தே³ஸனா மஹாஜனஸ்ஸ ஸாத்தி²கா அஹோஸீதி.

கூ³த²கா²த³கபேதவத்து²வண்ணனா நிட்டி²தா.