5. உச்சு²பேதவத்து²வண்ணனா

இத³ம் மம உச்சு²வனம் மஹந்தந்தி இத³ம் உச்சு²பேதவத்து². தஸ்ஸ கா உப்பத்தி? ப⁴க³வதி வேளுவனே விஹரந்தே அஞ்ஞதரோ புரிஸோ உச்சு²கலாபம் க²ந்தே⁴ கத்வா ஏகம் உச்சு²ம் கா²த³ந்தோ க³ச்ச²தி. அத² அஞ்ஞதரோ உபாஸகோ ஸீலவா கல்யாணத⁴ம்மோ பா³லதா³ரகேன ஸத்³தி⁴ம் தஸ்ஸ பிட்டி²தோ பிட்டி²தோ க³ச்ச²தி. தா³ரகோ உச்சு²ம் பஸ்ஸித்வா ‘‘தே³ஹீ’’தி பரோத³தி. உபாஸகோ தா³ரகம் பரோத³ந்தம் தி³ஸ்வா தம் புரிஸம் ஸங்க³ண்ஹந்தோ தேன ஸத்³தி⁴ம் ஸல்லாபமகாஸி. ஸோ பன புரிஸோ தேன ஸத்³தி⁴ம் ந கிஞ்சி ஆலபி, தா³ரகஸ்ஸ உச்சு²க²ண்ட³ம்பி நாதா³ஸி. உபாஸகோ தம் தா³ரகம் த³ஸ்ஸேத்வா ‘‘அயம் தா³ரகோ அதிவிய ரோத³தி, இமஸ்ஸ ஏகம் உச்சு²க²ண்ட³ம் தே³ஹீ’’தி ஆஹ. தம் ஸுத்வா ஸோ புரிஸோ அஸஹந்தோ படிஹதசித்தம் உபட்ட²பேத்வா அனாத³ரவஸேன ஏகம் உச்சு²லட்டி²ம் பிட்டி²தோ கி²பி.

ஸோ அபரேன ஸமயேன காலம் கத்வா சிரம் பரிபா⁴விதஸ்ஸ லோப⁴ஸ்ஸ வஸேன பேதேஸு நிப்³ப³த்தி, தஸ்ஸ ப²லம் நாம ஸககம்மஸரிக்க²கம் ஹோதீதி அட்ட²கரீஸமத்தம் டா²னம் அவத்த²ரந்தம் அஞ்ஜனவண்ணம் முஸலத³ண்ட³பரிமாணேஹி உச்சூ²ஹி க⁴னஸஞ்ச²ன்னம் மஹந்தம் உச்சு²வனம் நிப்³ப³த்தி. தஸ்மிம் கா²தி³துகாமதாய ‘‘உச்சு²ம் க³ஹேஸ்ஸாமீ’’தி உபக³தமத்தே தம் உச்சூ² அபி⁴ஹனந்தி, ஸோ தேன புச்சி²தோ பததி.

அதே²கதி³வஸம் ஆயஸ்மா மஹாமோக்³க³ல்லானோ ராஜக³ஹம் பிண்டா³ய க³ச்ச²ந்தோ அந்தராமக்³கே³ தம் பேதம் அத்³த³ஸ. ஸோ தே²ரம் தி³ஸ்வா அத்தனா கதகம்மம் புச்சி² –

737. ‘‘இத³ம் மம உச்சு²வனம் மஹந்தம், நிப்³ப³த்ததி புஞ்ஞப²லம் அனப்பகம்;

தம் தா³னி மே ந பரிபோ⁴க³மேதி, ஆசிக்க² ப⁴ந்தே கிஸ்ஸ அயம் விபாகோ.

738. ‘‘ஹஞ்ஞாமி க²ஜ்ஜாமி ச வாயமாமி, பரிஸக்காமி பரிபு⁴ஞ்ஜிதும் கிஞ்சி;

ஸ்வாஹம் சி²ன்னதா²மோ கபணோ லாலபாமி, கிஸ்ஸ கம்மஸ்ஸ அயம் விபாகோ.

739. ‘‘விகா⁴தோ சாஹம் பரிபதாமி ச²மாயம்,

பரிவத்தாமி வாரிசரோவ க⁴ம்மே;

ருத³தோ ச மே அஸ்ஸுகா நிக்³க³லந்தி,

ஆசிக்க² ப⁴ந்தே கிஸ்ஸ அயம் விபாகோ.

740. ‘‘சா²தோ கிலந்தோ ச பிபாஸிதோ ச, ஸந்தஸ்ஸிதோ ஸாதஸுக²ம் ந விந்தே³;

புச்சா²மி தம் ஏதமத்த²ம் ப⁴த³ந்தே, கத²ம் நு உச்சு²பரிபோ⁴க³ம் லபே⁴ய்ய’’ந்தி.

741. ‘‘புரே துவம் கம்மமகாஸி அத்தனா, மனுஸ்ஸபூ⁴தோ புரிமாய ஜாதியா;

அஹஞ்ச தம் ஏதமத்த²ம் வதா³மி, ஸுத்வான த்வம் ஏதமத்த²ம் விஜான.

742. ‘‘உச்சு²ம் துவம் கா²த³மானோ பயாதோ, புரிஸோ ச தே பிட்டி²தோ அன்வக³ச்சி²;

ஸோ ச தம் பச்சாஸந்தோ கதே²ஸி, தஸ்ஸ துவம் ந கிஞ்சி ஆலபித்த².

743. ‘‘ஸோ ச தம் அப⁴ணந்தம் அயாசி, தே³ஹய்ய உச்சு²ந்தி ச தம் அவோச;

தஸ்ஸ துவம் பிட்டி²தோ உச்சு²ம் அதா³ஸி, தஸ்ஸேதம் கம்மஸ்ஸ அயம் விபாகோ.

744. ‘‘இங்க⁴ த்வம் க³ந்த்வான பிட்டி²தோ க³ண்ஹேய்யாஸி, க³ஹேத்வான தம் கா²த³ஸ்ஸு யாவத³த்த²ம்;

தேனேவ த்வம் அத்தமனோ ப⁴விஸ்ஸஸி, ஹட்டோ² சுத³க்³கோ³ ச பமோதி³தோ சாதி.

745. ‘‘க³ந்த்வான ஸோ பிட்டி²தோ அக்³க³ஹேஸி, க³ஹேத்வான தம் கா²தி³ யாவத³த்த²ம்;

தேனேவ ஸோ அத்தமனோ அஹோஸி, ஹட்டோ² சுத³க்³கோ³ ச பமோதி³தோ சா’’தி. –

வசனபடிவசனகா³தா² பேதேன தே²ரேன ச வுத்தா.

737-8. தத்த² கிஸ்ஸாதி கீதி³ஸஸ்ஸ, கம்மஸ்ஸாதி அதி⁴ப்பாயோ. ஹஞ்ஞாமீதி விஹஞ்ஞாமி விகா⁴தம் ஆபஜ்ஜாமி. விஹஞ்ஞாமீதி வா விபா³தி⁴யாமி, விஸேஸதோ பீளியாமீதி அத்தோ². க²ஜ்ஜாமீதி கா²தி³யாமி, அஸிபத்தஸதி³ஸேஹி நிஸிதேஹி கா²த³ந்தேஹி விய உச்சு²பத்தேஹி கந்தியாமீதி அத்தோ². வாயமாமீதி உச்சு²ம் கா²தி³தும் வாயாமம் கரோமி. பரிஸக்காமீதி பயோக³ம் கரோமி. பரிபு⁴ஞ்ஜிதுந்தி உச்சு²ரஸம் பரிபு⁴ஞ்ஜிதும், உச்சு²ம் கா²தி³துந்தி அத்தோ². சி²ன்னதா²மோதி சி²ன்னஸஹோ உபச்சி²ன்னதா²மோ, பரிக்கீ²ணப³லோதி அத்தோ². கபணோதி தீ³னோ. லாலபாமீதி து³க்கே²ன அட்டிதோ அதிவிய விலபாமி.

739. விகா⁴தோதி விகா⁴தவா, விஹதப³லோ வா. பரிபதாமி ச²மாயந்தி டா²தும் அஸக்கோந்தோ பூ⁴மியம் பபதாமி. பரிவத்தாமீதி பரிப்³ப⁴மாமி. வாரிசரோவாதி மச்சோ² விய. க⁴ம்மேதி க⁴ம்மஸந்தத்தே த²லே.

740-4. ஸந்தஸ்ஸிதோதி ஓட்ட²கண்ட²தாலூனம் ஸோஸப்பத்தியா ஸுட்டு² தஸிதோ. ஸாதஸுக²ந்தி ஸாதபூ⁴தம் ஸுக²ம். ந விந்தே³தி ந லபா⁴மி. தந்தி துவம். விஜானாதி விஜானாஹி. பயாதோதி க³ந்தும் ஆரத்³தோ⁴. அன்வக³ச்சீ²தி அனுப³ந்தி⁴. பச்சாஸந்தோதி பச்சாஸீஸமானோ. தஸ்ஸேதம் கம்மஸ்ஸாதி ஏத்த² ஏதந்தி நிபாதமத்தம், தஸ்ஸ கம்மஸ்ஸாதி அத்தோ². பிட்டி²தோ க³ண்ஹேய்யாஸீதி அத்தனோ பிட்டி²பஸ்ஸேனேவ உச்சு²ம் க³ண்ஹேய்யாஸி. பமோதி³தோதி பமுதி³தோ.

745. க³ஹேத்வான தம் கா²தி³ யாவத³த்த²ந்தி தே²ரேன ஆணத்தினியாமேன உச்சு²ம் க³ஹேத்வா யதா²ருசி கா²தி³த்வா மஹந்தம் உச்சு²கலாபம் க³ஹேத்வா தே²ரஸ்ஸ உபனேஸி, தே²ரோ தம் அனுக்³க³ண்ஹந்தோ தேனேவ தம் உச்சு²கலாபம் கா³ஹாபேத்வா வேளுவனம் க³ந்த்வா ப⁴க³வதோ அதா³ஸி, ப⁴க³வா பி⁴க்கு²ஸங்கே⁴ன ஸத்³தி⁴ம் தம் பரிபு⁴ஞ்ஜித்வா அனுமோத³னம் அகாஸி, பேதோ பஸன்னசித்தோ வந்தி³த்வா க³தோ, ததோ பட்டா²ய யதா²ஸுக²ம் உச்சு²ம் பரிபு⁴ஞ்ஜி.

ஸோ அபரேன ஸமயேன காலம் கத்வா தாவதிம்ஸேஸு உப்பஜ்ஜி. ஸா பனேஸா பேதஸ்ஸ பவத்தி மனுஸ்ஸலோகே பாகடா அஹோஸி. அத² மனுஸ்ஸா ஸத்தா²ரம் உபஸங்கமித்வா தம் பவத்திம் புச்சி²ம்ஸு. ஸத்தா² தேஸம் தமத்த²ம் வித்தா²ரதோ கதே²த்வா த⁴ம்மம் தே³ஸேஸி, தம் ஸுத்வா மனுஸ்ஸா மச்சே²ரமலதோ படிவிரதா அஹேஸுந்தி.

உச்சு²பேதவத்து²வண்ணனா நிட்டி²தா.