7. ஸத்தபுத்தகா²த³கபேதிவத்து²வண்ணனா

நக்³கா³ து³ப்³ப³ண்ணரூபாஸீதி இத³ம் ஸத்த²ரி ஸாவத்தி²யம் விஹரந்தே ஸத்தபுத்தகா²த³கபேதிம் ஆரப்³ப⁴ வுத்தம். ஸாவத்தி²யா கிர அவிதூ³ரே அஞ்ஞதரஸ்மிம் கா³மகே அஞ்ஞதரஸ்ஸ உபாஸகஸ்ஸ த்³வே புத்தா அஹேஸும் – பட²மவயே டி²தா ரூபஸம்பன்னா ஸீலாசாரேன ஸமன்னாக³தா. தேஸம் மாதா ‘‘புத்தவதீ அஹ’’ந்தி புத்தப³லேன ப⁴த்தாரம் அதிமஞ்ஞதி. ஸோ ப⁴ரியாய அவமானிதோ நிப்³பி³ன்னமானஸோ அஞ்ஞம் கஞ்ஞம் ஆனேஸி. ஸா நசிரஸ்ஸேவ க³ப்³பி⁴னீ அஹோஸி. அத²ஸ்ஸ ஜேட்ட²ப⁴ரியா இஸ்ஸாபகதா அஞ்ஞதரம் வேஜ்ஜம் ஆமிஸேன உபலாபேத்வா தேன தஸ்ஸா தேமாஸிகம் க³ப்³ப⁴ம் பாதேஸி. அத² ஸா ஞாதீஹி ச ப⁴த்தாரா ச ‘‘தயா இமிஸ்ஸா க³ப்³போ⁴ பாதிதோ’’தி புட்டா² ‘‘நாஹம் பாதேமீ’’தி முஸா வத்வா தேஹி அஸத்³த³ஹந்தேஹி ‘‘ஸபத²ம் கரோஹீ’’தி வுத்தா ‘‘ஸாயம் பாதம் ஸத்த ஸத்த புத்தே விஜாயித்வா புத்தமம்ஸானி கா²தா³மி, நிச்சம் து³க்³க³ந்தா⁴ ச மக்கி²காபரிகிண்ணா ச ப⁴வேய்ய’’ந்தி ஸபத²ம் அகாஸி.

ஸா அபரேன ஸமயேன காலம் கத்வா தஸ்ஸ க³ப்³ப⁴பாதனஸ்ஸ முஸாவாத³ஸ்ஸ ச ப²லேனேவ பேதயோனியம் நிப்³ப³த்தித்வா புத்தனயேன புத்தமம்ஸானி கா²த³ந்தீ தஸ்ஸேவ கா³மஸ்ஸ அவிதூ³ரே விசரதி. தேன ச ஸமயேன ஸம்ப³ஹுலா தே²ரா கா³மகாவாஸே வுத்த²வஸ்ஸா ப⁴க³வந்தம் த³ஸ்ஸனாய ஸாவத்தி²ம் ஆக³ச்ச²ந்தா தஸ்ஸ கா³மஸ்ஸ அவிதூ³ரே ஏகஸ்மிம் பதே³ஸே ரத்தியம் வாஸம் கப்பேஸும். அத² ஸா பேதீ தேஸம் தே²ரானம் அத்தானம் த³ஸ்ஸேஸி. தம் மஹாதே²ரோ கா³தா²ய புச்சி² –

35. ‘‘நக்³கா³ து³ப்³ப³ண்ணரூபாஸி, து³க்³க³ந்தா⁴ பூதி வாயஸி;

மக்கி²காஹி பரிகிண்ணா, கா நு த்வம் இத⁴ திட்ட²ஸீ’’தி.

ஸா தே²ரேன புட்டா² தீஹி கா³தா²ஹி படிவசனம் அதா³ஸி –

36. ‘‘அஹம் ப⁴த³ந்தே பேதீம்ஹி, து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா.

37. ‘‘காலேன ஸத்த புத்தானி, ஸாயம் ஸத்த புனாபரே;

விஜாயித்வான கா²தா³மி, தேபி நா ஹோந்தி மே அலம்.

38. ‘‘பரிட³ய்ஹதி தூ⁴மாயதி, கு²தா³ய ஹத³யம் மம;

நிப்³பு³திம் நாதி⁴க³ச்சா²மி, அக்³கி³த³ட்³டா⁴வ ஆதபே’’தி.

38. தத்த² நிப்³பு³திந்தி கு²ப்பிபாஸாது³க்க²ஸ்ஸ வூபஸமம். நாதி⁴க³ச்சா²மீதி ந லபா⁴மி. அக்³கி³த³ட்³டா⁴வ ஆதபேதி அதிஉண்ஹஆதபே அக்³கி³னா ட³ய்ஹமானா விய நிப்³பு³திம் நாதி⁴க³ச்சா²மீதி யோஜனா.

தம் ஸுத்வா மஹாதே²ரோ தாய கதகம்மம் புச்ச²ந்தோ –

39. ‘‘கிம் நு காயேன வாசாய, மனஸா து³க்கடம் கதம்;

கிஸ்ஸகம்மவிபாகேன, புத்தமம்ஸானி கா²த³ஸீ’’தி. – கா³த²மாஹ;

அத² ஸா பேதீ அத்தனோ பேதலோகூபபத்திஞ்ச புத்தமம்ஸகா²த³னகாரணஞ்ச கதே²ந்தீ –

40. ‘‘அஹூ மய்ஹம் து³வே புத்தா, உபோ⁴ ஸம்பத்தயோப்³ப³னா;

ஸாஹம் புத்தப³லூபேதா, ஸாமிகம் அதிமஞ்ஞிஸம்.

41. ‘‘ததோ மே ஸாமிகோ குத்³தோ⁴, ஸபதிம் மய்ஹமானயி;

ஸா ச க³ப்³ப⁴ம் அலபி⁴த்த², தஸ்ஸா பாபம் அசேதயிம்.

42. ‘‘ஸாஹம் பது³ட்ட²மனஸா, அகரிம் க³ப்³ப⁴பாதனம்;

தஸ்ஸ தேமாஸிகோ க³ப்³போ⁴, பூதிலோஹிதகோ பதி.

43. ‘‘தத³ஸ்ஸா மாதா குபிதா, மய்ஹம் ஞாதீ ஸமானயி;

ஸபத²ஞ்ச மம் காரேஸி, பரிபா⁴ஸாபயீ ச மம்.

44. ‘‘ஸாஹம் கோ⁴ரஞ்ச ஸபத²ம், முஸாவாத³ம் அபா⁴ஸிஸம்;

‘புத்தமம்ஸானி கா²தா³மி, ஸசே தம் பகதம் மயா’.

45. ‘‘தஸ்ஸ கம்மஸ்ஸ விபாகேன, முஸாவாத³ஸ்ஸ சூப⁴யம்;

புத்தமம்ஸானி கா²தா³மி, புப்³ப³லோஹிதமக்கி²தா’’தி. – இமா கா³தா² அபா⁴ஸி;

40-45. தத்த² புத்தப³லூபேதாதி புத்தப³லேன உபேதா, புத்தானம் வஸேன லத்³த⁴ப³லா. அதிமஞ்ஞிஸந்தி அதிக்கமித்வா மஞ்ஞிம் அவமஞ்ஞிம். பூதிலோஹிதகோ பதீதி குணபலோஹிதம் ஹுத்வா க³ப்³போ⁴ பரிபதி. ஸேஸம் ஸப்³ப³ம் அனந்தரஸதி³ஸமேவ. தத்த² அட்ட² தே²ரா, இத⁴ ஸம்ப³ஹுலா. தத்த² பஞ்ச புத்தா, இத⁴ ஸத்தாதி அயமேவ விஸேஸோதி.

ஸத்தபுத்தகா²த³கபேதிவத்து²வண்ணானா நிட்டி²தா.