3. அபி⁴ஸமயகதா²

அபி⁴ஸமயகதா²வண்ணனா

19. இதா³னி இத்³தி⁴கதா²னந்தரம் பரமித்³தி⁴பூ⁴தம் அபி⁴ஸமயம் த³ஸ்ஸேந்தேன கதி²தாய அபி⁴ஸமயகதா²ய அபுப்³ப³த்தா²னுவண்ணனா. தத்த² அபி⁴ஸமயோதி ஸச்சானம் அபி⁴முகே²ன ஸமாக³மோ, படிவேதோ⁴தி அத்தோ². கேன அபி⁴ஸமேதீதி கிம் வுத்தம் ஹோதி? ‘‘ஏவம் மஹத்தி²யோ கோ², பி⁴க்க²வே, த⁴ம்மாபி⁴ஸமயோ’’திஆதீ³ஸு (ஸம். நி. 2.74) ஸுத்தபதே³ஸு யோ ஸோ அபி⁴ஸமயோதி வுத்தோ, தஸ்மிம் அபி⁴ஸமயே வத்தமானே அபி⁴ஸமேதா புக்³க³லோ கேன த⁴ம்மேன ஸச்சானி அபி⁴ஸமேதி, அபி⁴முகோ² ஹுத்வா ஸமாக³ச்ச²தி, படிவிஜ்ஜ²தீதி வுத்தம் ஹோதீதி. அயம் தாவ சோத³கஸ்ஸ புச்சா². சித்தேன அபி⁴ஸமேதீதி சித்தம் வினா அபி⁴ஸமயாபா⁴வதோ ததா² விஸ்ஸஜ்ஜனம். ஹஞ்சீதிஆதி³ புன சோத³னா. ஹஞ்சி யதீ³தி அத்தோ². ‘‘சித்தேனா’’தி வுத்தத்தா தேன ஹி அஞ்ஞாணீ அபி⁴ஸமேதீதி ஆஹ. ந அஞ்ஞாணீ அபி⁴ஸமேதீதி சித்தமத்தேனேவ அபி⁴ஸமயாபா⁴வதோ படிக்கே²போ. ஞாணேன அபி⁴ஸமேதீதி படிஞ்ஞா. புன ஹஞ்சீதிஆதி³ ‘‘ஞாணேனா’’தி வுத்தத்தா அஞ்ஞாணீ அசித்தகோதி சோத³னா. ந அசித்தகோ அபி⁴ஸமேதீதி அசித்தகஸ்ஸ அபி⁴ஸமயாபா⁴வதோ படிக்கே²போ. சித்தேன சாதிஆதி³ படிஞ்ஞா. புன ஹஞ்சீதிஆதி³ ஸப்³ப³சித்தஞாணஸாதா⁴ரணவஸேன சோத³னா. ஸேஸசோத³னாவிஸ்ஸஜ்ஜனேஸுபி ஏஸேவ நயோ.

பரதோ பன கம்மஸ்ஸகதசித்தேன ச ஞாணேன சாதி கம்மஸ்ஸகா ஸத்தாதி ஏவம் கம்மஸ்ஸகதாய பவத்தசித்தேன ச ஞாணேன ச. ஸச்சானுலோமிகசித்தேன ச ஞாணேன சாதி ஸச்சபடிவேத⁴ஸ்ஸ அனுகூலத்தா ஸச்சானுலோமிகஸங்கா²தேன விபஸ்ஸனாஸம்பயுத்தசித்தேன ச விபஸ்ஸனாஞாணேன ச. கத²ந்தி யதா² அபி⁴ஸமயோ ஹோதி, ததா² கதே²துகம்யதா புச்சா². உப்பாதா³தி⁴பதேய்யந்தி யஸ்மா சித்தஸ்ஸ உப்பாதே³ அஸதி சேதஸிகானம் உப்பாதோ³ நத்தி². ஆரம்மணக்³க³ஹணஞ்ஹி சித்தம் தேன ஸஹ உப்பஜ்ஜமானா சேதஸிகா கத²ம் ஆரம்மணே அக்³க³ஹிதே உப்பஜ்ஜிஸ்ஸந்தி. அபி⁴த⁴ம்மேபி சித்துப்பாதே³னேவ சேதஸிகா விப⁴த்தா, தஸ்மா மக்³க³ஞாணஸ்ஸ உப்பாதே³ அதி⁴பதிபூ⁴தம் சித்தந்தி அத்தோ². ஞாணஸ்ஸாதி மக்³க³ஞாணஸ்ஸ. ஹேது பச்சயோ சாதி ஜனகோ ச உபத்த²ம்ப⁴கோ ச. தம்ஸம்பயுத்தந்தி தேன ஞாணேன ஸம்பயுத்தம். நிரோத⁴கோ³சரந்தி நிப்³பா³னாரம்மணம். த³ஸ்ஸனாதி⁴பதேய்யந்தி ஸேஸானம் த³ஸ்ஸனகிச்சாபா⁴வா நிப்³பா³னத³ஸ்ஸனே அதி⁴பதிபூ⁴தம். சித்தஸ்ஸாதி மக்³க³ஸம்பயுத்தசித்தஸ்ஸ. தம்ஸம்பயுத்தந்தி தேன சித்தேன ஸம்பயுத்தம்.

20. யஸ்மா ஏதம்பி பரியாயம், ந கேவலம் சித்தஞாணேஹியேவ அபி⁴ஸமயோ, அத² கோ² ஸப்³பே³பி மக்³க³ஸம்பயுத்தசித்தசேதஸிகா த⁴ம்மா ஸச்சாபி⁴ஸமயகிச்சஸாத⁴னவஸேன அபி⁴ஸமயோ நாம ஹோந்தி, தஸ்மா தம்பி பரியாயம் த³ஸ்ஸேதுகாமோ கிம் நு ஏத்தகோயேவ அபி⁴ஸமயோதி புச்சி²த்வா ந ஹீதி தம் வசனம் படிக்கி²பித்வா லோகுத்தரமக்³க³க்க²ணேதிஆதி³மாஹ. த³ஸ்ஸனாபி⁴ஸமயோதி த³ஸ்ஸனபூ⁴தோ அபி⁴ஸமயோ. ஏஸ நயோ ஸேஸேஸுபி. ஸச்சாதி ஸச்சஞாணானி. மக்³க³ஞாணமேவ நிப்³பா³னானுபஸ்ஸனட்டே²ன விபஸ்ஸனா. விமோக்கோ²தி மக்³க³விமோக்கோ². விஜ்ஜாதி மக்³க³ஞாணமேவ. விமுத்தீதி ஸமுச்சே²த³விமுத்தி. நிப்³பா³னம் அபி⁴ஸமீயதீதி அபி⁴ஸமயோ, ஸேஸா அபி⁴ஸமேந்தி ஏதேஹீதி அபி⁴ஸமயா.

21. புன மக்³க³ப²லவஸேன அபி⁴ஸமயம் பி⁴ந்தி³த்வா த³ஸ்ஸேதும் கிம் நூதிஆதி³மாஹ. ப²லக்க²ணே பனேத்த² யஸ்மா ஸமுச்சே²த³னட்டே²ன க²யே ஞாணம் ந லப்³ப⁴தி, தஸ்மா படிப்பஸ்ஸத்³த⁴ட்டே²ன அனுப்பாதே³ ஞாணந்தி வுத்தம். ஸேஸம் பன யதா²னுரூபம் வேதி³தப்³ப³ந்தி. இதா³னி யஸ்மா கிலேஸப்பஹானே ஸதி அபி⁴ஸமயோ ஹோதி, அபி⁴ஸமயே ச ஸதி கிலேஸப்பஹானம் ஹோதி, தஸ்மா சோத³னாபுப்³ப³ங்க³மம் கிலேஸப்பஹானம் த³ஸ்ஸேதுகாமோ ய்வாயந்திஆதி³மாஹ. தத்த² ய்வாயந்தி யோ அயம் மக்³க³ட்டோ² அரியபுக்³க³லோ. ஏவமாதி³கானி பனேத்த² சத்தாரி வசனானி சோத³கஸ்ஸ புச்சா². புன அதீதே கிலேஸே பஜஹதீதி இத³ம் சோத³னாய ஓகாஸதா³னத்த²ம் விஸ்ஸஜ்ஜனம். கீ²ணந்தி ப⁴ங்க³வஸேன கீ²ணம். நிருத்³த⁴ந்தி ஸந்தானவஸேன புனப்புனம் அனுப்பத்தியா நிருத்³த⁴ம். விக³தந்தி வத்தமானக்க²ணதோ அபக³தம். விக³மேதீதி அபக³மயதி. அத்த²ங்க³தந்தி அபா⁴வம் க³தம். அத்த²ங்க³மேதீதி அபா⁴வம் க³மயதி. தத்த² தோ³ஸம் த³ஸ்ஸேத்வா ந அதீதே கிலேஸே பஜஹதீதி படிக்கி²த்தம். அனாக³தசோத³னாய அஜாதந்தி ஜாதிம் அப்பத்தம். அனிப்³ப³த்தந்தி ஸபா⁴வம் அப்பத்தம். அனுப்பன்னந்தி உப்பாத³தோ பபு⁴தி உத்³த⁴ம் ந படிபன்னம். அபாதுபூ⁴தந்தி பச்சுப்பன்னபா⁴வேன சித்தஸ்ஸ அபாதுபூ⁴தம். அதீதானாக³தே பஜஹதோ பஹாதப்³பா³னம் நத்தி²தாய அப²லோ வாயாமோ ஆபஜ்ஜதீதி தது³ப⁴யம்பி படிக்கி²த்தம். ரத்தோ ராக³ம் பஜஹதீதி வத்தமானேன ராகே³ன ரத்தோ தமேவ ராக³ம் பஜஹதி. வத்தமானகிலேஸேஸுபி ஏஸேவ நயோ. தா²மக³தோதி தி²ரஸபா⁴வம் க³தோ. கண்ஹஸுக்காதி அகுஸலா ச குஸலா ச த⁴ம்மா யுக³னத்³தா⁴ ஸமமேவ வத்தந்தீதி ஆபஜ்ஜதீதி அத்தோ². ஸம்கிலேஸிகாதி ஏவம் ஸம்கிலேஸானம் ஸம்பயுத்தபா⁴வே ஸதி ஸம்கிலேஸே நியுத்தா மக்³க³பா⁴வனா ஹோதீதி ஆபஜ்ஜதீதி அத்தோ². ஏவம் பச்சுப்பன்னே பஜஹதோ வாயாமேன ஸத்³தி⁴ம் பஹாதப்³பா³னம் அத்தி²தாய ஸம்கிலேஸிகா ச மக்³க³பா⁴வனா ஹோதி, வாயாமோ ச அப²லோ ஹோதி. ந ஹி பச்சுப்பன்னானம் கிலேஸானம் சித்தவிப்பயுத்ததா நாம அத்தீ²தி.

ந ஹீதி சதுதா⁴ வுத்தஸ்ஸ வசனஸ்ஸ படிக்கே²போ. அத்தீ²தி படிஜானனம். யதா² கத²ம் வியாதி அத்தி²பா⁴வஸ்ஸ உதா³ஹரணத³ஸ்ஸனத்த²ம் புச்சா². யதா² அத்தி², தம் கேன பகாரேன விய அத்தி², கிம் விய அத்தீ²தி அத்தோ². ஸேய்யதா²பீதி யதா² நாம. தருணருக்கோ²தி ப²லதா³யகபா⁴வதீ³பனத்த²ம் தருணக்³க³ஹணம். அஜாதப²லோதி ப²லதா³யகத்தேபி ஸதி ப²லக்³க³ஹணதோ புரேகாலக்³க³ஹணம். தமேனந்தி தம் ருக்க²ம். ஏனந்தி நிபாதமத்தம், தம் ஏதந்தி வா அத்தோ². மூலம் சி²ந்தே³ய்யாதி மூலதோ சி²ந்தே³ய்ய. அஜாதப²லாதி அஜாதானி ப²லானி. ஏவமேவந்தி ஏவம் ஏவம். உப்பாதோ³ பவத்தம் நிமித்தம் ஆயூஹனாதி சதூஹிபி பச்சுப்பன்னக²ந்த⁴ஸந்தானமேவ வுத்தம். யஸ்மிஞ்ஹி க²ந்த⁴ஸந்தானே யம் யம் மக்³க³ஞாணம் உப்பஜ்ஜதி, தேன தேன மக்³க³ஞாணேன பஹாதப்³பா³னம் கிலேஸானம் தம் க²ந்த⁴ஸந்தானம் அபீ³ஜம் ஹோதி, தஸ்ஸ அபீ³ஜபூ⁴தத்தா தப்பச்சயா தே தே கிலேஸா அனுப்பன்னா ஏவ ந உப்பஜ்ஜந்தி. ஆதீ³னவம் தி³ஸ்வாதி அனிச்சாதி³தோ ஆதீ³னவம் தி³ஸ்வா. அனுப்பாதோ³திஆதீ³ஹி சதூஹி நிப்³பா³னமேவ வுத்தம். சித்தம் பக்க²ந்த³தீதி மக்³க³ஸம்பயுத்தம் சித்தம் பக்க²ந்த³தி. ஹேதுனிரோதா⁴ து³க்க²னிரோதோ⁴தி கிலேஸானம் பீ³ஜபூ⁴தஸ்ஸ ஸந்தானஸ்ஸ அனுப்பாத³னிரோதா⁴ அனாக³தக்க²ந்த⁴பூ⁴தஸ்ஸ து³க்க²ஸ்ஸ ஹேதுபூ⁴தானம் கிலேஸானம் அனுப்பாத³னிரோதோ⁴ ஹோதி. ஏவம் து³க்க²ஸ்ஸ ஹேதுபூ⁴தகிலேஸானம் அனுப்பாத³னிரோதா⁴ து³க்க²ஸ்ஸ அனுப்பாத³னிரோதோ⁴ ஹோதி. ஏவம் கிலேஸப்பஹானயுத்திஸப்³பா⁴வதோ ஏவ அத்தி² மக்³க³பா⁴வனாதிஆதி³மாஹ. அட்ட²கதா²யம் (விஸுத்³தி⁴. 2.832) பன ‘‘ஏதேன கிம் தீ³பிதம் ஹோதி? பூ⁴மிலத்³தா⁴னம் கிலேஸானம் பஹானம் தீ³பிதம் ஹோதி. பூ⁴மிலத்³தா⁴ பன கிம் அதீதா அனாக³தா, உதா³ஹு பச்சுப்பன்னாதி? பூ⁴மிலத்³து⁴ப்பன்னாயேவ நாமா’’தி வத்வா கதி²தகிலேஸப்பஹானஸ்ஸ வித்தா²ரகதா² ஸுதமயஞாணகதா²ய மக்³க³ஸச்சனித்³தே³ஸவண்ணனாயம் வுத்தனயேனேவ வேதி³தப்³பா³, இத⁴ பன மக்³க³ஞாணேன பஹாதப்³பா³ கிலேஸாயேவ அதி⁴ப்பேதாதி.

அபி⁴ஸமயகதா²வண்ணனா நிட்டி²தா.