7. கம்மகதா²வண்ணனா

கம்மகதா²வண்ணனா

234. இதா³னி தஸ்ஸா ஹேதுஸம்பத்தியா பச்சயபூ⁴தம் கம்மம் த³ஸ்ஸேந்தேன கதி²தாய கம்மகதா²ய அபுப்³ப³த்தா²னுவண்ணனா. தத்த² அஹோஸி கம்மம் அஹோஸி கம்மவிபாகோதிஆதீ³ஸு அதீதப⁴வேஸு கதஸ்ஸ கம்மஸ்ஸ அதீதப⁴வேஸுயேவ விபக்கவிபாகம் க³ஹேத்வா ‘‘அஹோஸி கம்மம் அஹோஸி கம்மவிபாகோ’’தி வுத்தம். தஸ்ஸேவ அதீதஸ்ஸ கம்மஸ்ஸ தி³ட்ட²த⁴ம்மவேத³னீயஸ்ஸ உபபஜ்ஜவேத³னீயஸ்ஸ ச பச்சயவேகல்லேன அதீதப⁴வேஸுயேவ அவிபக்கவிபாகஞ்ச அதீதேயேவ பரினிப்³பு³தஸ்ஸ ச தி³ட்ட²த⁴ம்மவேத³னீயஉபபஜ்ஜவேத³னீயஅபரபரியாயவேத³னீயஸ்ஸ கம்மஸ்ஸ அவிபக்கவிபாகஞ்ச க³ஹேத்வா அஹோஸி கம்மம் நாஹோஸி கம்மவிபாகோதி வுத்தம். அதீதஸ்ஸேவ கம்மஸ்ஸ அவிபக்கவிபாகஸ்ஸ பச்சுப்பன்னப⁴வே பச்சயஸம்பத்தியா விபச்சமானம் விபாகம் க³ஹேத்வா அஹோஸி கம்மம் அத்தி² கம்மவிபாகோதி வுத்தம். அதீதஸ்ஸேவ கம்மஸ்ஸ அதிக்கந்தவிபாககாலஸ்ஸ ச பச்சுப்பன்னப⁴வே பரினிப்³பா³யந்தஸ்ஸ ச அவிபச்சமானம் விபாகம் க³ஹேத்வா அஹோஸி கம்மம் நத்தி² கம்மவிபாகோதி வுத்தம். அதீதஸ்ஸேவ கம்மஸ்ஸ விபாகாரஹஸ்ஸ அவிபக்கவிபாகஸ்ஸ அனாக³தே ப⁴வே பச்சயஸம்பத்தியா விபச்சிதப்³ப³ம் விபாகம் க³ஹேத்வா அஹோஸி கம்மம் ப⁴விஸ்ஸதி கம்மவிபாகோதி வுத்தம். அதீதஸ்ஸேவ கம்மஸ்ஸ அதிக்கந்தவிபாககாலஸ்ஸ ச அனாக³தப⁴வே பரினிப்³பா³யிதப்³ப³ஸ்ஸ ச அவிபச்சிதப்³ப³ம் விபாகம் க³ஹேத்வா அஹோஸி கம்மம் ந ப⁴விஸ்ஸதி கம்மவிபாகோதி வுத்தம். ஏவம் அதீதகம்மம் அதீதபச்சுப்பன்னானாக³தவிபாகாவிபாகவஸேன ச²தா⁴ த³ஸ்ஸிதம்.

பச்சுப்பன்னப⁴வே கதஸ்ஸ தி³ட்ட²த⁴ம்மவேத³னீயஸ்ஸ கம்மஸ்ஸ இதே⁴வ விபச்சமானம் விபாகம் க³ஹேத்வா அத்தி² கம்மம் அத்தி² கம்மவிபாகோதி வுத்தம். தஸ்ஸேவ பச்சுப்பன்னஸ்ஸ கம்மஸ்ஸ பச்சயவேகல்லேன இத⁴ அவிபச்சமானஞ்ச தி³ட்டே²வ த⁴ம்மே பரினிப்³பா³யந்தஸ்ஸ இத⁴ அவிபச்சமானஞ்ச விபாகம் க³ஹேத்வா அத்தி² கம்மம் நத்தி² கம்மவிபாகோதி வுத்தம். பச்சுப்பன்னஸ்ஸேவ கம்மஸ்ஸ உபபஜ்ஜவேத³னீயஸ்ஸ ச அபரபரியாயவேத³னீயஸ்ஸ ச அனாக³தப⁴வே விபச்சிதப்³ப³ம் விபாகம் க³ஹேத்வா அத்தி² கம்மம் ப⁴விஸ்ஸதி கம்மவிபாகோதி வுத்தம். பச்சுப்பன்னஸ்ஸேவ கம்மஸ்ஸ உபபஜ்ஜவேத³னீயஸ்ஸ பச்சயவேகல்லேன அனாக³தப⁴வே அவிபச்சிதப்³ப³ஞ்ச அனாக³தப⁴வே பரினிப்³பா³யிதப்³ப³ஸ்ஸ அபரபரியாயவேத³னீயஸ்ஸ அவிபச்சிதப்³ப³ஞ்ச விபாகம் க³ஹேத்வா அத்தி² கம்மம் ந ப⁴விஸ்ஸதி கம்மவிபாகோதி வுத்தம். ஏவம் பச்சுப்பன்னகம்மம் பச்சுப்பன்னானாக³தவிபாகாவிபாகவஸேன சதுதா⁴ த³ஸ்ஸிதம்.

அனாக³தப⁴வே காதப்³ப³ஸ்ஸ கம்மஸ்ஸ அனாக³தப⁴வே விபச்சிதப்³ப³ம் விபாகம் க³ஹேத்வா ப⁴விஸ்ஸதி கம்மம் ப⁴விஸ்ஸதி கம்மவிபாகோதி வுத்தம். தஸ்ஸேவ அனாக³தஸ்ஸ கம்மஸ்ஸ பச்சயவேகல்லேன அவிபச்சிதப்³ப³ஞ்ச அனாக³தப⁴வே பரினிப்³பா³யிதப்³ப³ஸ்ஸ அவிபச்சிதப்³ப³ஞ்ச விபாகம் க³ஹேத்வா ப⁴விஸ்ஸதி கம்மம் ந ப⁴விஸ்ஸதி கம்மவிபாகோதி வுத்தம். ஏவம் அனாக³தகம்மம் அனாக³தவிபாகாவிபாகவஸேன த்³விதா⁴ த³ஸ்ஸிதம். தம் ஸப்³ப³ம் ஏகதோ கத்வா த்³வாத³ஸவிதே⁴ன கம்மம் த³ஸ்ஸிதம் ஹோதி.

இமஸ்மிம் டா²னே ட²த்வா தீணி கம்மசதுக்கானி ஆஹரித்வா வுச்சந்தி – தேஸு ஹி வுத்தேஸு அயமத்தோ² பாகடதரோ ப⁴விஸ்ஸதீதி. சதுப்³பி³த⁴ஞ்ஹி கம்மம் தி³ட்ட²த⁴ம்மவேத³னீயம் உபபஜ்ஜவேத³னீயம் அபரபரியாயவேத³னீயம் அஹோஸிகம்மந்தி. தேஸு ஏகஜவனவீதி²யம் ஸத்தஸு சித்தேஸு குஸலா வா அகுஸலா வா பட²மஜவனசேதனா தி³ட்ட²த⁴ம்மவேத³னீயகம்மம் நாம. தம் இமஸ்மிம்யேவ அத்தபா⁴வே விபாகம் தே³தி. ததா² அஸக்கோந்தம் பன ‘‘அஹோஸி கம்மம் நாஹோஸி கம்மவிபாகோ, ந ப⁴விஸ்ஸதி கம்மவிபாகோ, நத்தி² கம்மவிபாகோ’’தி இமஸ்ஸ திகஸ்ஸ வஸேன அஹோஸிகம்மம் நாம ஹோதி. அத்த²ஸாதி⁴கா பன ஸத்தமஜவனசேதனா உபபஜ்ஜவேத³னீயகம்மம் நாம. தம் அனந்தரே அத்தபா⁴வே விபாகம் தே³தி. ததா² அஸக்கோந்தம் வுத்தனயேனேவ அஹோஸிகம்மம் நாம ஹோதி. உபி⁴ன்னம் அந்தரே பன பஞ்சஜவனசேதனா அபரபரியாயவேத³னீயகம்மம் நாம. தம் அனாக³தே யதா³ ஓகாஸம் லப⁴தி, ததா³ விபாகம் தே³தி. ஸதி ஸம்ஸாரப்பவத்தியா அஹோஸிகம்மம் நாம ந ஹோதி.

அபரம்பி சதுப்³பி³த⁴ம் கம்மம் யக்³க³ருகம் யப்³ப³ஹுலம் யதா³ஸன்னம் கடத்தா வா பன கம்மந்தி. தத்த² குஸலம் வா ஹோது அகுஸலம் வா, க³ருகாக³ருகேஸு யம் க³ருகம் மாதுகா⁴தாதி³கம்மம் வா மஹக்³க³தகம்மம் வா, ததே³வ பட²மம் விபச்சதி. ததா² ப³ஹுலாப³ஹுலேஸுபி யம் ப³ஹுலம் ஹோதி ஸுஸீல்யம் வா து³ஸ்ஸீல்யம் வா, ததே³வ பட²மம் விபச்சதி. யதா³ஸன்னம் நாம மரணகாலே அனுஸ்ஸரிதகம்மம் வா கதகம்மம் வா. யஞ்ஹி ஆஸன்னமரணே அனுஸ்ஸரிதும் ஸக்கோதி காதும் வா, தேனேவ உபபஜ்ஜதி. ஏதேஹி பன தீஹி முத்தம் புனப்புனம் லத்³தா⁴ஸேவனம் கடத்தா வா பன கம்மம் நாம ஹோதி. தேஸம் அபா⁴வே தம் படிஸந்தி⁴ம் ஆகட்³ட⁴தி.

அபரம் வா சதுப்³பி³த⁴ம் கம்மம் ஜனகம் உபத்த²ம்ப⁴கம் உபபீளகம் உபகா⁴தகந்தி. தத்த² ஜனகம் நாம குஸலம்பி ஹோதி அகுஸலம்பி. தம் படிஸந்தி⁴யம் பவத்தேபி ரூபாரூபவிபாகம் ஜனேதி. உபத்த²ம்ப⁴கம் பன ஜனேதும் ந ஸக்கோதி, அஞ்ஞேன கம்மேன தி³ன்னாய படிஸந்தி⁴யா ஜனிதே விபாகே உப்பஜ்ஜனகஸுக²து³க்க²ம் உபத்த²ம்பே⁴தி, அத்³தா⁴னம் பவத்தேதி. உபபீளகம் அஞ்ஞேன கம்மேன தி³ன்னாய படிஸந்தி⁴யா ஜனிதே விபாகே உப்பஜ்ஜனகஸுக²து³க்க²ம் பீளேதி பா³த⁴தி, அத்³தா⁴னம் பவத்திதும் ந தே³தி. உபகா⁴தகம் பன குஸலம்பி அகுஸலம்பி ஸமானம் அஞ்ஞம் து³ப்³ப³லகம்மம் கா⁴தேத்வா தஸ்ஸ விபாகம் படிபா³ஹித்வா அத்தனோ விபாகஸ்ஸ ஓகாஸம் கரோதி. ஏவம் பன கம்மேன கதே ஓகாஸே தம் விபாகம் உப்பன்னம் நாம வுச்சதி.

இதி இமேஸம் த்³வாத³ஸன்னம் கம்மானம் கம்மந்தரஞ்ச விபாகந்தரஞ்ச பு³த்³தா⁴னம் கம்மவிபாகஞாணஸ்ஸேவ யாதா²வஸரஸதோ பாகடம் ஹோதி அஸாதா⁴ரணம் ஸாவகேஹி. விபஸ்ஸகேன பன கம்மந்தரம் விபாகந்தரஞ்ச ஏகதே³ஸதோ ஜானிதப்³ப³ம். தஸ்மா அயம் முக²மத்தத³ஸ்ஸனேன கம்மவிஸேஸோ பகாஸிதோதி.

235. ஏவம் ஸுத்³தி⁴ககம்மவஸேன பட²மவாரம் வத்வா ததே³வ கம்மம் த்³விதா⁴ விப⁴ஜித்வா குஸலாகுஸலாதி³யுக³லவஸேன த³ஸஹி பரியாயேஹி அபரே த³ஸ வாரா வுத்தா. தத்த² ஆரோக்³யட்டே²ன குஸலம், அனாரோக்³யட்டே²ன அகுஸலம், இத³ம் து³கம் ஜாதிவஸேன வுத்தம். அகுஸலமேவ ராகா³தி³தோ³ஸஸம்யோகே³ன ஸாவஜ்ஜம், குஸலம் தத³பா⁴வேன அனவஜ்ஜம். அகுஸலம் அபரிஸுத்³த⁴த்தா, கண்ஹாபி⁴ஜாதிஹேதுத்தா வா கண்ஹம், குஸலம் பரிஸுத்³த⁴த்தா, ஸுக்காபி⁴ஜாதிஹேதுத்தா வா ஸுக்கம். குஸலம் ஸுக²வுத்³தி⁴மத்தா ஸுகு²த்³ரயம், அகுஸலம் து³க்க²வுத்³தி⁴மத்தா து³க்கு²த்³ரயம். குஸலம் ஸுக²ப²லவத்தா ஸுக²விபாகம், அகுஸலம் து³க்க²ப²லவத்தா து³க்க²விபாகந்தி ஏவமேதேஸம் நானாகாரோ வேதி³தப்³போ³தி.

கம்மகதா²வண்ணனா நிட்டி²தா.